31 marzo 2007

Corot pal Friûl: il Tocai al è muart

No supuartât dal justizi Di-vin,
dopo lungje soference, te indifarence di cierts viticultôrs e di buine part de politiche.
A dan la dolorose gnove i furlans, un altri tocut de Patrie che si 'nt va.
Al lasse un vueit incolmabil ancje a ducj chei che su la butilie no san inmò ce dal diaul scrivi.

Ps: ma jo mi sbombi e o fâs come Aldo Rossi!

30 marzo 2007

Grazie ai volontaris

O ringrazii i volontaris che si son dâts di fâ par netâ lis nestris campagnis.
Tal prin coment, l'articul dal Mv di cualchi zornade indaûr scrit di Sandro Trevisan, che o ringrazii par vê fat la foto che o viodês achì in bande.

Fieste de Patrie dal Friûl, us spieti a Codroip

Ai 3 di Avrîl al cole l'aniversari de firme de bole imperiâl di Indrì IV, che al fasè nassi il stât Patriarcjâl di Siart di
Beilstein, Patriarcje di Aquilee.
In tantis bandis dal Friûl a son stadis inmaneadis une vore di iniziativis che par dute la setemane a laran indevant in dut il Friûl: achì dut il calendari.
Ancje Maian al fasarà une serade propit la sere dai 3 di Avrîl.

Jo invezit ai 2 di Avrîl us spieti a Codroip li che o soi stât invidât par fevelâ a non dal gjornâl La Patrie dal Friûl.
Lait a viodi l'invît.

Serade sul Ospedâl di Sant Zuan a Sant Tomâs

Usgnot aes 20.30 a Maian li de sale Ciro di Pêrs la archeolighe Tiziana Cividini e l'inzegnîr Marino Del Piccolo a presentaran il risultât des lôr ricercjis fatis fin cumò: ve chi il volantin.
O soi content che la Aministrazion e vedi cjapât in considerazion il sugjeriment che ur vevi dât tal consei di aprovazion dal belanç, cuant che o vevi invidât a fâ daurman un incuintri public su chest sît.

29 marzo 2007

La Balconete: un slambri di critiche teatrâl

di Elio Varutti

Ce che al è Teatronet
Un circuit dramaturgjic metût adun in Friûl intal 2000. Une sorte di franchising teatrâl. Compagniis di Udin, Feagne, Padue, Trent, Modene, Castrovillari, Reggio Calabria e Messine

Teatronet al è un circuit di teatri nassût in Friûl intal 2006. Precisamentri tal cjâf di Rosi Fasiolo, colaboradore de pagjine dai spetacui de «Il Gazzettino» de redazion di Udin. Cuâi sono i obietîfs di Teatronet? «Cheste organizazion – e dîs Rosi Fasiolo - e je daûr a tirâ dongje e a puartâ di fûr teatri “a cost zero” tal teritori dal stât talian». Ce vuelial dî “a cost zero”? La voie e je che di organizâ e disvilupâ une gnove rêt di sgambis culturâi a nivel talian, «tra spazis e compagniis teatrâls professionistis – e continue Fasiolo - cul fin di fâ zirâ spetacui di buine cualitât artistiche a “cost zero”, vâl a dî che il spetacul ospitât nol à di vê un vuadagn, se no il gustâ e il durmî pai atôrs e pai tecnics di sene».
Cui che al ospite al à di meti a disposizion la struture tecniche e une schirie di servizis, come i imprescj pe lûs, pe scolte, pe publicitât, pai gjornaliscj o pe SIAE, i dirits di scoltâ musiche o di viodi alc di artistic. La compagnie che e ven di fûr e varà di rangjâsi cu lis spesis di traspuart e eventualmentri cu l’ENPALS, vâl a dî cui coscj di previdence sociâl dai atôrs. Al sarà pussibil fâ cualchi incuintri o cualchi laboratori o, parfin, un cors formatîf cui atôrs e cui regjiscj.
Tra i teatrants di esportazions a son doi grups furlans: un al è il “Teatrino del Rifo”, di Tor di Zuin, di Giorgio Monte e l’altri al è un grup di diplomâts de Academie Nico Pepe di Udin, che a àn metût sù “Buonanotte Desdemona” propit par metisi adun cun Teatronet.
Cuâl isal il futûr di Teatronet? «Al è sucedût che al si è formât un biel pôc di moviment intor vie di chest sproc di teatri – e zonte Fasiolo – e jo o speri che al vadi indevant ancjemò par cualchi an, almancul fin che jo o rivi a tirâ il cjaruç».
Un tic di strache e il pinsîr di discoragjâsi a vegnin fûr se, come che al à scrit Gianni Cianchi su «Il Nuovo FVG» dal 23 di Març dal 2007, a son pôcs i spetadôrs a lis replichis di Palaç Pico a Feagne. Ma chei di Teatronet no molin.
Lis compagniis e i diretôrs artistics che a aderissin a Teatronet a son «Sipario!», di Claudio Mezzelani, di Feagne, in provincie di Udin, «Carichi Sospesi», cun Marco Caldiron di Padue, «Teatrincorso», cun Elena Marino, di Trent, «Teatro dei Venti», cun Stefano Tè, di Modena, «Aprustum», cun Casimiro Gatto, di Castrovillari, in provincie di Cosenza, «Spazio Teatro», cun Gaetano Tramontana, di Reggio Calabria e «Teatro dei Naviganti», cun Mariapia Rizzo di Messine.
Ma cemût mai la sale che à di burî fûr il spetacul no à di paiâ la compagnie? «Parcè che e à un preventîf masse piçul – e conte Fasiolo - sedi public, sedi privât, par rivâ a tirâ dongje un cartelon di sest, bisugne tignî di cont che dute la ativitât e dâ une visibilitât plui fuarte, cu la pussibilitât di domandâ plui bêçs ai ents publics o ai privâts che a sponsorizin la art».
Cuâl isal il vantaç pe compagnie che e ven di fûr a “vuadagn zero”? I gnûfs contats, il fat che la viodin ator pe Italie «intun circuit zà prontât pes iniziativis – e displee Fasiolo – e chest compit al è dut pal organizatôr che al va ator pe Italie a sielzi i spetacui, lis salis e i teatris pal circuit Teatronet».
Al somee a un contrat di frachising pai spetacui teatrâi, indulà che il franchisor nol cjape nuie, al lavore ancje lui “a vuadagn zero”. Si pense di plui a la art e di macul ai bêçs. Impuartante e je la rêt di informazions dai grups teatrâi dal circuit. A son regulis e parametris di rispietâ pe buine realizazion dal progjet.
Par sierâ e si trate di un circuit di stât talian prontât cun modalitâts diviersis dal solit teatri, culì e si vûl sburtâ i gnûfs grups che a fasin teatri di inovazion e ancje se i politics a àn taiât i bêçs di dâ, chescj zovins a vulin puartâ indevant la lôr ativitât artistiche, che e si fonde su la cualitât.
Il spirt gjenerâl – e siere Fasiolo - «al è chel di judâ il teatri a no sierâsi intun moment cussì dificil, ancje economicamentri, ma si à di butâsi fûr e cirî di confrontâsi cu lis altris realtâts talianis che a àn la stesse dibisugne».

28 marzo 2007

Cors di Furlan a Tavagnà

Us segnali il cors di furlan che si pues seguî cence spese a Tavagnà. Par savê alc di plui, lait a lei achì.
La insegnante dal cors e sarà Stefania Garlatti Costa

26 marzo 2007

Ricuart di Fiuggi

E je stade une trasfierte fadiose pe tante strade che o vin fat, ma dal sigûr e je stade une esperience pardabon impuartante. Confrontâsi su problematichis di ents locâi di dute Italie, ti jude a capî lis esperiencis di chei altris e salacor ancje a capî miôr lis cuestions dal to paîs. Duncje o torni a ringrazii il coordenament regjonâl par vêmi dade la pussibilitât di fâ part de delegazion furlane (un mandi particolâr a la mê coscrite Elia, za sindichesse di Paluce) e di vê podût scoltâ di dongje il Silvio (fracait su lis fotos par ingrandîlis).

23 marzo 2007

In partence par Fiuggi

Come che us ai za dit, usgnot no sarai in consei comunâl.
Cuntune delegazion dal coordenament regjonâl dal partît, vuê o voi a Fiuggi par 3 dîs ae tierce conference dai aministradôrs locâi di Forza Italia. Par savê alc di plui, fracait achì.
Se o rivi, us fasarai i inzornaments in timp reâl, se no us conti dut cuant che o torni.
O ringrazii Renzo Tondo, Vanni Lenna e Isidoro Gottardo che mi àn dât la pussibilitât di fâ cheste esperience.

22 marzo 2007

Zornade mondiâl de aghe

Ancje se e sarà une piçule gote, ancje jo o ricuardi la zornade mondiâl de aghe

Annuntio vobis gaudium magnum: Thermo in Montecitorio

Scusait ma o vevi inmò di ripiâmi de notizione de zornade: il nestri blogarin thermonuke al à fat il grant salt. Stuf di frecuentâ dome la piçule agorà di chest blog, vuê al è jentrât ae Cjamare dai Deputâts a Montecitorio a Rome.
Congratulazions al Thermo e un grazie al nestri Onorevul Renzo Tondo che al conferme di jessi masse fuarte!
Ce zornade! Ce zornade!

ps: se o cumbini, mi plasarès meti in linie la regjistrazion.

Un parê legâl de Regjon

Zirant su internet e grazie a une mê amie o ai cjatât chest document.
Un Comun furlan (mi plasarès savê cuâl... nol è publicât) al à domandât ae Regjon FVJ "DIREZIONE CENTRALE RELAZIONI INTERNAZIONALI, COMUNITARIE E AUTONOMIE LOCALI" une consulence... chi sot a son ducj i riferiments e ancje la rispueste relative:
"PROT. N. 14916 di data 14/09/2006
OGGETTO: Pubblicazione di atti dell'amministrazione su un blog personale da parte di un consigliere comunale.
MASSIMA Si ritiene che la pubblicazione delle deliberazioni degli organi collegiali e degli altri atti pubblici del comune, da parte di amministratori comunali o di privati cittadini, su siti internet diversi da quello istituzionale dell’ente sia consentita in considerazione del carattere pubblico di tali atti, che potrebbero in ogni caso essere visionati da chiunque all’albo pretorio o, al termine della pubblicazione, presso gli uffici comunali. In detta ipotesi, la pubblicazione, ovviamente priva di carattere ufficiale, deve avvenire nel rispetto delle disposizioni sulla riservatezza e sotto l’esclusiva responsabilità dell’amministratore o del privato che cura il sito".

No sai parcè, e pûr mi semee che a son masse coincidencis...

La Balconete: un slambri di critiche teatrâl

di Elio Varutti
Clò, opare dal Teatri dai Navigants

Al è stât sù par trê dîs, dal 16 al 18 di Març dal 2007, al Teatri SpaziOff di Palaç Pico di Feagne, il spetacul cul titul «Clò». Metût in sene dal Teatri dai Navigants di Messine e ispirât a la opare dramaturgjiche di Samuel Beckett, cheste recite e mostre dute la sô fuarce artistiche. Trê feminis a son in sene, Cristiana Minasi, Stefania Pecora e Mariapia Rizzo, che e à ancje rincurât la dramaturgjie dal test, fondât sul teme de comunicazion umane e su lis robis di mats che nus tocje di vivi. Lis atoris si movin ben su la sene e a mostrin un mût di recitâ che al ti cjape, mert dal regjist Domenico Cucinotta. Ancje i vistîts e lis senografiis, cui pizets, sielzudis di Isabella Attanasio, a àn la lôr impuartance par mostrânus la muse dal teatri.
Lis atoris a somein a un alc di un altri timp. A son trucadis di paiaç, ma ti fasin vignî tal cjâf il teatri vieri, chel de Grecie antighe, indulà che a recitavin cu la mascare. E la int e leve mate pal so teatri. Lis atoris si fevelin cun dificoltât, come te vite moderne, indulà che si rive a berghelâsi, invezit di fevelâ. Dut al è pôc clâr. No si rive a capîsi, se no tornant a dî la stesse robe dite prime. Ogni tant a somein a trê sûrs. Cualchi volte si rive a capî che a àn il stes pari, ma lis maris a son diviersis. La cjase indulà che a vivin e somee a une preson. Si sint la dibisugne di butâsi di fûr. E dut sul palc al à di cjapâ il sens da la vite cuotidiane, intune biele serade di teatri vivude culì, in Friûl.

21 marzo 2007

Une cisile no fâs Primevere...


...tant mancul i Pinguins che o ai viodût a cori pe place stant che vuê al è ancjemò un frêt cjan: îr al à neveât fin parsore Glemone.

20 marzo 2007

Vinars al è consei comunâl

La minorance e à tornât a convocâ il consei comunâl: ve chi l'ordin dal dì.
Magari cussì no, ma in chê sere jo no sarai, parcè che o soi fûr regjon par impegns che o vevi za cjapât di cualchi setemane e che no pues rinviâ.

19 marzo 2007

Auguris a ducj i paris!

Vuê e je la fieste dal papà e jo o fâs prin di dut i auguris al gno.
Auguris ancje a ducj i paris e a chei che si clamin Josef!

18 marzo 2007

Societât Filologjiche Furlane

Di chest an o soi jentrât tal Consei Gjenerâl de Societât Filologjiche Furlane e cun îr o soi stât ancje nomenât te comission "Comunicazion" de SFF.
Îr dopomisdì o vin elet il president, tornant a confermâ Lorenzo Pelizzo.
O vin ancje aprovât ae unanimitât un document une vore impuartant li che la Societât Filologjiche e domande cun fuarce il rispiet e la metude in vore de leç 482/99 in particolâr l'art 4 (comis 1 e 2) pal insegnament dal furlan a scuele.
Tal prin coment o cjatais dut il document.

17 marzo 2007

Lidrîs cuadrade di trê - tierce e ultime part

Grazie a Luca, al regjist Lorenzo Bianchini e al Cec che a àn decidût di publicâ in rêt il film: cheste e je la tierce e ultime part di un film di pôre bielon.

16 marzo 2007

Lidrîs cuadrade di trê - seconde part

Grazie a Luca, al regjist Lorenzo Bianchini e al Cec che a àn decidût di publicâ in rêt il film: cheste e je la seconde part di un film di pôre bielon.

Il Diari di Mauro Tosoni

O segnali il numar di Març dal Diari, il mensîl diret di Mauro Tosoni, che o ringrazii pe disponibilitât.
Il Diari si cjate tai locâi publics a gratis, o in cualchi edicule (e si paie dome 20 centesims), o li dal sportel pe lenghe furlane di Tavagnà a gratis o ta chest sît internet.

15 marzo 2007

Mauro Pili in preson!

Probabil che si visais di Mauro Pili (te foto), che al jere stât a Novembar in Friûl, ospit di Renzo Tondo ae cunvigne di Sant Denêl.
O lei propit sul blog di Renzo Tondo, che Mauro Pili al à decidût di fâ une azion fuarte cuintri Renato Soru, il president de regjon Sardegne, e si consegnarà te preson di Casteddu (par talian, Cagliari) par protestâ parcè che no son stadis ametudis a referendum lis firmis che al veve cjapât sù cuintri di une leç aprovade de regjon Sardegne.

14 marzo 2007

Un Tocai cun Aldo Rossi

Vuê mi soi cjatât cul mitic Aldo Rossi, il fautôr de vitoriose proteste di 2 zornadis indaûr.
Achì vuê us presenti un biel video che al fevele di Tocai.http://www2.blogger.com/img/gl.link.gif
Sul sît di Aldo o podês ancje cerçâ cualchi secont des cjançons dal Cd "Miôr curte": jo o ai dôs preferidis, vâl a dî "Frico" e "Cjalde chê sere", che mi fâs vignî i sgrisui ogni volte che le scolti.
Un biel esempli di un furlan che in maniere origjinâl e inovative al fâs un grant servizi pe musiche e pe nestre regjon: lait a scoltâ ancje achì.
Mi racomandi Aldo: visinus cuant che tu jessis cul gnûf Cd!

13 marzo 2007

Ator pal mont

Come che o varês viodût, chi in bande e je une mape che e mostre dut il mont e e segne di dulà che si coleghin i letôrs di chest blog.
Ta chestis ultimis setemanis, mi àn scrit sedi dai Stâts Unîts (une Romanini che e cirive informazions su la sô famee) e de Norvegjie (une universitarie che e studie lenghis romanzis e che e voleve vê la traduzion di une frase inglese par furlan, in maniere di fâ un confront cul francês, talian e altris lenghis di une sô ricercje).
O aprofiti par saludâ ducj i furlans dal "Friûl sparniçât" e in particolâr Chiara che nus lei dal Egjit, Giusy che e je in Sudafriche, Leonardo in Australie, i miei barbis che a son in France e Svuizare e Nangank che nus lei di Taipei.

12 marzo 2007

Je vin fate!

O publichi cun plasê la letare dal diretôr de Cepaf che o ringrazii par vê capît il sens de nestre proteste e par vê dimostrât di jessi une persone disponibil al confront e une vore sensibil: dôs carateristichis che a dimostrin inteligjence e mistîr.
Un grazie a Aldo Rossi!
Ve chi la rispueste a la nestre mail di proteste:

Gent. Sig.re,
Egr. Sig.ri,

il comunicato radio del Cefap che avete avuto modo di ascoltare in questi ultimi giorni aveva l’obiettivo di promuovere i corsi per Operatori Agrituristici attraverso una rappresentazione che volevamo risultasse spiritosa ed ironica; non era certo nostro intendimento voler mettere in cattiva luce l'uso della lingua Friulana che riteniamo essere patrimonio importante della nostra gente, della nostra terra e della nostra cultura.
Non volevamo neanche svilire il ruolo di coloro che lavorano presso gli agriturismi della nostra regione: per nostra esperienza personale la capacità d’accoglienza, la professionalità e la cortesia degli operatori agrituristici non sono assolutamente da mettere in discussione. Prendendo quindi atto delle vostre puntuali e forti ma anche cortesi rimostranze, e rendendomi conto che l’operazione così come pensata non è riuscita, mi scuso con tutti voi per il messaggio che inconsapevolmente è stato trasferito. Ho deciso di far ritirare lo spot come normale atto dovuto per rispetto degli ascoltatori, della nostra cara lingua e dei lavoratori in strutture agrituristiche. Sono certo che saprete apprezzare il gesto e mi auguro di potervi entro breve accogliere presso la nostra struttura di Codroipo o in qualche altra sede periferica per un brindisi con un buon vino della nostra terra.

Un saluto cordiale
Fabio Ponso

______________________
Fabio Ponso
Direttore
f.ponso@cefap.fvg.it

CeFAP
V.lo Resia, 3
33033 Codroipo (Ud)
tel 0432-821111
fax 0432-904278
www.cefap.fvg.it

11 marzo 2007

Imprescj informatics pe Marilenghe

Continuant su la cuestion de marilenghe e de inovazion us segnali un pâr di robutis che o podês cjatâ sul sît dal Consorzi Friûl Lenghe 2000.
A son i plug-in dal Grant Dizionari Bilengâl Talian Furlan e dal Dizionari Ortografic Furlan di istalâ sul vuestri browser, in maniere di vê simpri a puartade di man l'imprest pe traduzion dal talian al furlan e dal furlan al talian.
Chescj modui a permetin di doprâ cun plui facilitât il Dizionari ortografic e il GDB TF tes versions o­n-line.
Cun di plui e je ancje la pussibilitât di discjamâ il driver de tastiere furlane par chei che a doprin il sisteme Windows in maniere di no lambicâsi par scrivi la cidilie e i acents juscj.
Un grazie di cûr al CFL2000.
Cui visial Beppe Grillo?

10 marzo 2007

Thermorubriche: il valôr de inovazion

Thermonuke si domande e al domande di cjapâ sù la sfide tecnologjiche par un disvilup e une incressite de inovazion. No le metarès in cuintriposizion cu la tradizion se no si cor il risi di fâ la figurate di cualchi inomenât comic gjenovês.
Partant jessi leâts al disvilup tecnologjic nol significhe dismentâ lis nestris lidrîs come che jessi leâts aes nestris lidrîs nol significhe restâ indaûr. La sfide e sta tal cjatâ il just ecuilibri. E dopo cheste filipiche, us segnali il prin coment li che o ai fat un piçul struc de esperience che o ai fat a InnovAction 2007, un articul che al è jessût sul Gazzettino di chest vinars e us consei di comprâ il Friuli di chest vinars li che o ai scrit propit di chest argoment.

09 marzo 2007

O domandìn rispiet, ancje in Radio!!!

O ringrazii Aldo Rossi che nus segnale une brute publicitât radiofoniche (su radio company, ma mi semee di vêle sintude ancje suntune altre radio) di un cors Cefap pe gjestion di agriturisim li che i furlans a vegnin presentâts come int sdavassone che no je buine di fâ il so mistîr.
La publicitât e je par talian, ma a un ciert moment si sint a fevelâ furlan: anzit si sint a berghelâ par furlan in maniere cafone e pôc professionâl une femine, che dopo vê cjapât sù l'ordin in taule, si met a vosâ restant tal salon invezit che puartâlu in cusine, come che invezit al sucêt normalmentri.
Cussì il messaç negatîf subliminâl che al passe al è che se un al ves di vignî a mangjâ intun agriturisim furlan, si cjate une siorute (che no varès fat il cors Cefap) che e clame i ordins dal salon berghelant al cogo: no mi semee un biel sisteme par presentâ i nestris agriturisim, che invezit a son bielons, curâts, cun int professionâl che e sa fâ il so mistîr.
E tancj a son i ristoradôr che a lavorin pardabon benon e fevelant furlan, cun buine pâs dal Cefap.
Tal prin coment us met la mail che o podês copiâ e mandâ a info@cefap.fvg.it e info@radiocompany.com

08 marzo 2007

Assemblee de Pro Loco di Maian

Doman di sere aes 20.30 e sarà la assemblee de pro loco.
Une buine ocasion par cognossi la situazion di cheste impuartante associazion di Maian e ancje par dâ cualchi consei, se cualchidun al à voie di jessi costrutîf.

Auguris aes Feminis e al blog!

Nuie di miôr che fâ fieste in compagnie: vuê al è un an che o ai screât il gno blog, ma prin di dut e je la fieste de Feminis.
Auguris a dutis lis letoris!

05 marzo 2007

Auguris Diego! Vuarìs prest!

Vuê o ai let di Diego Rigali che al è colât cu la moto a Gurize. No ai informazions diretis, ma o sai dome che al è tal ospedâl là vie.
Mi displâs e i auguri di vuarî prest!

04 marzo 2007

Domenie di Assembleis

Zornade di adunancis: jo o larai ae assemblee anuâl de Societât Filologjiche Furlane che e tache a 9.30, ma ancje ator pal nestri comun a son previodûts doi incuintris publics.
Aes 10.15, chei di Intesa per Majano a fasin une assemblee a Maian e aes 11.30 il comitât di frazion di Farla al fâs une assemblee par fevelâ di antenis de telefonie.

03 marzo 2007

Eclìs di lune

Se al dure il biel timp, usgnot o podarìn viodi une eclìs lunâr: duncje ducj cul nâs par aiar tacant des 9 e alc di sere (eclissi totâl tor miezegnot).
Un spetacul di no pierdi ancje parcè che la prossime si podarà viodile dome ca di 19 agns.

02 marzo 2007

Vonde! Tal zîr di pocjis zornadis o scugnìn tornâ a scrivi

Che cualchidun nol viodi la ore di trai cuintri dal furlan, no je une novitât. Che il Messaggero al sedi tra i plui atîfs in chestis iniziativis cuintri la nestre marilenghe, ma ancje cuintri di dut l'insiemit des minorancis linguistichis de nestre regjon, no nus smaravee plui di tant. Ma che dopo il polvaron alçât di bant in ocasion des declarazions di Beppe Grillo, si torni a fâ un scandai su la cuestion de propueste de gnove leç pal insegnament dal furlan a scuele, nus semee une esagjerazion.
Dut câs no stin a avilîsi, ma propit de esperience vitoriose su la cuestion di Grillo (vêso viodût? cun dutis lis protestis che a àn ricevût, la robe e je muarte li) o pensìn che al sedi il câs di ripeti la proteste cun decision e civiltât, par fâ viodi a cierte informazion faziose e limitade che nô Furlans o savìn organizâsi e dî la nestre.
La domande dal Mv e je "Sêso favorevui al insegnament des materiis scolastichis ancje par furlan?"
O vin di mandâ un SMS al numar 48442 cun scrit:
"FORUM UD Furlan veicolâr a scuele? Sì, parcè che il plurilinguisim al è la fonde par une scuele furlane, europeane e moderne. (e zontait non e cognon)".
Viodìn se ju publichin!

Auguris al comandant dai vigjii

Come che o varês sintût, Livio Finazzo, comandant de nestre polizie comunâl, al è colât intun tombin fasint un sore lûc li des fornâs a Sant Liseu.
Si è fat mâl e cumò al à cualchi dì di prognosi, ma i podeve lâ piês par vie che al è mancjât pôc par che si fasès mâl pardabon cuntun spiçot che al jere dentri de buse. I auguri di vuarî prest.

01 marzo 2007

Lidrîs cuadrade di trê

Grazie a Luca, al regjist Lorenzo Bianchini e al Cec che a àn decidût di publicâ in rêt il film: cheste e je la prime part di un film di pôre bielon.