18 marzo 2007

Societât Filologjiche Furlane

Di chest an o soi jentrât tal Consei Gjenerâl de Societât Filologjiche Furlane e cun îr o soi stât ancje nomenât te comission "Comunicazion" de SFF.
Îr dopomisdì o vin elet il president, tornant a confermâ Lorenzo Pelizzo.
O vin ancje aprovât ae unanimitât un document une vore impuartant li che la Societât Filologjiche e domande cun fuarce il rispiet e la metude in vore de leç 482/99 in particolâr l'art 4 (comis 1 e 2) pal insegnament dal furlan a scuele.
Tal prin coment o cjatais dut il document.

1 commento:

Christian Romanini ha detto...

MOZION APROVADE AE UNANIMITÂT

Daspò la notizie de propueste par une leç di suaze sul aprendiment/insegnament dal furlan - metude adun de Comission pai obietîfs didatics costituide dentri tal Osservatori regionâl de lenghe e de culture furlanis (OLF) e po dopo cjapade de Agjenzie regjonâl de lenghe furlane (ARLeF) - traviers i mieçs di comunicazion, cjarte stampade e sîts internet in particolâr, si è tornade a impiâ la cuestion dal furlan a scuele.
La Societât Filologjiche Furlane e je la istituzion regjonâl che, salacor plui di cualsisei altri ent o associazion, fin dal inviâsi des sôs ativitâts - duncje une vorone prime des normis statâls di pupilance des lenghis autoctonis - si è impegnade a pro di un slargjament inte scuele dal patrimoni culturâl e linguistic dal furlan. A titul di esempli, a puedin valê: la istituzion, tai agns Cuarante, dai prins cors di culture par insegnants, i concors di diviers gjenars pai fruts des scuelis, la produzion di svariâts materiâi didatics, lis tantis publicazions ce pai students ce pai insegnants, par no fevelâ po dopo des consulencis, de istituzion di un setôr di documentazion scolastiche te Biblioteche dal sodalizi e di une Comission scuele o ben, plui in gjenerâl, di dutis lis formis di colaborazion intiessudis cui organisims scolastics.
Stant il sfuarç di difindi e di promovi la marilenghe ancje midiant lis istituzions scolastichis, la Societât Filologjiche Furlane - là che tra l’altri a operin oms e feminis che dispès a vegnin propit dal mont de scuele - no pues che augurâsi e domandâ cun fuarce ai orghins regjonâi che a ’nd àn competence la metude in vore de leç statâl 482/1999, in particolâr i comis 1 e 2 dal articul 4, là che si dîs, in sostance, che l’aprendiment de lenghe minoritarie al à di jessi sigurât traviers il percors de scuele dal oblic.
Cun chê stesse fuarce, la Societât Filologjiche e racomande ai orghins competents, prin di dut e sore dut, la massime informazion e trasparence tai confronts di ducj i sogjets - istituzions, uficis, insegnants, gjenitôrs - in relazion al pês, in tiermins di risorsis umanis e economichis, che la aplicazion de leç e domandarà.
I vûl fate clarece, in altri peraulis, su cui al à di fâ ce e, cuestion di no pôc cont, cun cuâi mieçs. Se e je vere che par rivâ al obietîf stabilît de leç 482/1999 a coventin un numar suficient di insegnants formâts come cu va, materiâi didatics e, plui in gjenerâl, la disponibilitât e il coinvolziment di cetancj sogjets - scuelis, Universitât, Ufici Scolastic Regjonâl, comissions e vie indenant - i vûl metût jù in prime istance un plan di lavôr un grum in detai e cun cifris precisis. La Societât Filologjiche Furlane, in sumis, tal confermâ la sô responsabilitât e il so impegn a pro de valorizazion e de promozion dal patrimoni culturâl e identitari furlan, e domande clarece, prudence e bon sens ancje in cheste ocasion, fondamentâl pal avignî de nestre lenghe. O declarìn, par concludi, la nestre intenzion di continuâ a fâ dut ce che al è pussibil par contribuî a inviâ la metude in vore des normis statâls di pupilance de lenghe furlane e par fâ capî ai furlans - par nassite o ben par elezion - che studiâ il furlan e par furlan nol è un limit, ma une grande ocasion di cressite culturâl e inteletuâl.