Un altri colp di Spade

No sai cui che al è...

O sai che al è di Udin... almancul a disin...

E se ancje no ai tantis altris informazions su di lui, dome une foto sô di cuant che al jere zovin, aromai mi sta simpatic, ancje parcè che mi vise ogni volte di dut ce che al fâs.

Alore jo us visi ancje voaltris che al è di pôc jessût il so ultin libri simpri su Marlowe... chi in bande la cuviertine: Dimmi chi sei Marlowe.

Jo mi contentarès di savê cui che al è Frank Spada... se no altri par dîi di no molâ... ops, ma jal ai za dit!

La culture e je simpri nobile

O sin a Blessan cun Glesie Furlane, La Patrie dal Friûl e la Serling par partecipâ a la Fafieste, un event che si sta dimostrant la juste maniere di fâ fieste cence dismenteâ che "no dome di frico al vîf il furlan"... e se us al dîs jo, fricodipendent, o podês crodimi.
Come che o disevi o sin presints par promovi lis nestris publicazions e tai moments di polse, o cjapi la ocasion di tornâ a sfueâ i libris di pre Antoni, za lets ma che a san smaraveâti ogni volte che tu ju cjapis in man. Cun Mauro mi è capitât di fermâmi suntun passaç di "Trilogjie tormentade" il libri che pre Toni al à scrit tai agns 90 e che i à fat vinci il premi Sant Simon dal 1999.
Si trate di riflessions su trê oms che a somein une vore lontan: don Milani, Oscar Wilde e Pieri Pauli Pasolini. Propit su chest ultin inteletuâl, mi soi fermât a lei chestis riis che us torni a proponi chi sot. Nol è mai biel lei i libris a tocs e un consei che us doi di cûr al è di gjoldi de prime a la ultime ducj i libris che us capitin sot man. Comprindût chel chi.

Ve chi ce che al scriveve pre Antoni...

La culture e je simpri nobile (pagjine 205)
O sai che l'om inteligjent e curiôs al rive a passâ cun libertât e facilitât de leterature plui blasonade a chê plui sclete, cunvint che no esist une culture nobile e une ignobile, parcè che la culture e je simpri nobile come che la ignorance e je simpri ignobile. Ma chescj resonaments, che a somein scontâts, no jentrin par nuie intai compuartaments normâi de intelighentsia taliane e ancje furlane, simpri pronte a bandonâ il mancul pal plui. Là che il mancul al è chel che al da mancul pussibilitâts di public e di cariere. E i inteletuâi di riunde furlane dificilmentri a àn savût resisti a lis sirenis che a cjantanvin tal mâr plui larc e a àn stralozât cun armis e bagais dai gravârs dal Tiliment ai paltans dal Arno o, miei, dal Tevere, che al sfilie il Palaç di plui dongje.

Ancje il restâ furlans e je une sielte (pagjine 206)
Mi permet un ricuart personâl. Seben che no soi un inteletuâl di prime cualitât, no pues dineâ di vê rivât a fâmi un ciert non tra i scritôrs nostrans, judât salacor de pocje fole dai contendents. Poben plui di une volte mi è stât dât il consei, ni cirût ni condividût, di bandonâ la lenghe furlane parcè che no da pussibilitât di sboc. Come se la culture e ves di jessi in funzion de cariere.
Mi visi ancje de impression orende che al à fate pari Turoldo a Aquilee te grande celebrazion dai 11 di Lui dal 1976 pes vitimis dal taramot, cuant che si è scusât di no podê fevelâ par furlan parcè che al veve di dî robis "masse impuartantis".
Cemût aial vivût Pasolini il so amôr pe culture-mari peade a la realtât contadine e i aprofondiments filologjics de culture umanistiche che i cjapavin simpri plui e il timp e il cûr? Aial rivât a mantignî un ecuilibri no facil o la seconde i aie cjapade la volte a la prime, come che la periferie di Rome i veve cjapade la volte a la periferie culturâl furlane? Cemût mai che, dopo de primevere curte de Academiuta, i scrits par furlan a son sparîts e intes letaris si respire un contest culturâl che nol à plui nuie di "locâl"? No soi in grât di dâ une rispueste. Mi sint in dirit però di fâmi e di fâ la domande.
[...]
pre Antoni Beline (Trilogjie tormentade, ed. Glesie Furlane - Premi Sant Simon 1999)

Rispiet

Al è un pôc che al mancje un post gnûf… ma disìn che mi soi cjapât un moment par lei alc di plui e scrivi alc di mancul. Parcè?
Parcè che cuant che tu ti cjatis pes mans pagjinis come chês scritis di Amato De Monte e la sô femine Cinzia Gori, tu ti rindis cont di trop che a pesin lis lôr peraulis e trop invezit che a son cuasi di bant dutis chês altris, comprindudis lis tôs.
“Gli ultimi giorni di Eluana” al è un libri che o ai let dut di un flât, cun intensitât e atenzion. Parcè che o volevi capî. O ai simpri cirût di no lassâmi tirâ te confusion di chei dîs, di no cedi a la tentazion de gare a cui che al berghelave di plui par vê reson. E o soi content di no jessi sbrissât, ancje grazie al grant esempli che mi à dât une altre persone impuartante.
Cui miôr di lui che al à cjapade une responsabilitât cussì grande podevial descrivi chei fats? Sigûr che Beppino Englaro al à scrit ancje lui un libri, articui, si è batût par puartâ indevant cheste bataie. Ma cuant che al è jessût chest libri o ai sintude une fuarce strane che mi à dit a colp che o vevi di cjolilu.
E lei lis pagjinis scritis dal miedi De Monte, un riferiment a nivel di anestesie, une specializazion fondamentâl de medisine, mi à fat vignî i sgrisui. Cui che lis à scritis nol veve dome une opinion, ma ancje la competence necessarie par tratâ un câs come chel di Eluana Englaro. E propit leint chestis pagjinis o ai vude la sensazion clare che Amato De Monte al à zontât a la sô preparazion sientifiche ancje chê part di umanitât che e covente in situazions cussì. O ai capît che par lui no si tratave di un “câs Englaro”, ma dal dolôr di une famee che e veve dibisugne di delicatece e rispiet. Robe che invezit tancj no àn fat. Ta chês zornadis ai sintude tante confusion, ma o ai vude la impression che la plui part no à vude chê di metisi in discussion, cirint magari di capî ce che chê famee e à passât.
In tancj a jerin cussì preocupâts di fâ savê ce che al jere miôr fâ, cence magari nancje vê viodude la situazion cui lôr voi, che forsit no àn cirût (o no àn vude voie) di imagjinâ ce che un pari e une mari a puedin sintî denant di une disgracie cussì grande come viodi une fie ferme intun jet par cussì tant timp dopo di un incident, savint cemût che le pensave cheste fie. E claris a vegnin fûr lis contradizions di un sisteme che si è dimostrât une vore impreparât a frontâ tematichis cussì grandis.
Par furtune che invezit a son personis che impreparadis no son. Amato De Monte mi à fat rifleti e lu ringrazii. Lu ringrazii pe sô professionalitât di miedi al servizi di cui che al à bisugne, ma ancje pe umanitât di om che e ven fûr di chest libri. Rispiet de persone, rispiet dal dolôr dai cjârs, rispiet de justizie… sì parcè che forsit, tal grant davoi, plui di cualchidun si è dismenteât ancje dal fat che ce che al è stât fat al jere l’adempiment di un at in non de leç uficiâl in rispiet di une volontât difindude cun trasparence in ducj chescj agns.
Jo no sai cemût che mi sarès compuartât intune situazion cussì... o ai za dit che si varès di jessi li par podê fevelâ, ma dal sigûr o varès domandât di vê la gracie di podê confrontâmi cuntune persone come lui, che mi à dimostrât di cognossi pardabon il significât de peraule “rispiet”.

PS: us consei di lei il so libri, ma ancje di lâ a viodi il sît http://www.pereluana.it/, di lei chest intervent di pre Tonin Cjapielâr che us vevi za segnalât e di scoltâ cheste cjançon di Aldo Rossi "Pari".

Il libri su Eluana Englaro

O soi lât a comprâ il libri di Amato De Monte che o viodês te foto l'invît pe presentazion di sabide passade: Gli ultimi giorni di Eluana.

O pensi che in tancj, masse, si son permetûts di fevelâ, cuasi simpri cence nancje cognossi in prime persone il câs, la famee, cui che al è stât dongje di Eluana Englaro. In câs come chescj o pensi che par dâ une opinion (sedi a pro sedi contrarie) si varès di fevelâ dome se si è cjapâts dentri te stessis condizions che al à vivût Beppino Englaro cu la sô famee. E si varès di fâlu cun massim rispiet e discrezion.

O ai vude maniere di sdongjâ il dot. Amato De Monte cualchi mês dopo di chel Fevrâr 2009 e mi soi permetût di fevelâi cualchi secont par dâi la mê solidarietât pe maniere che al è stât (mal)tratât.

Par chest mi leiarai tal cidin chest libri e us segnali chest link cuntune riflession di pre Tonin su la Patrie dal an passât: fracait chi.

Novitâts su Frank Spada

Ogni tant al passe par di ca o te Ostarie leterarie, ma al è un pôc che no lu viôt... Cumò o ai capît parcè: Frank Spada si viôt che al jere impegnât cul so ultin libri "Marlowe ti amo" che al sarà tes librariis tor fin di Zenâr o Fevrâr (si cjatarà forsit za prime li de librarie Tarantola di Udin).
Cjalant la cuviertine, mi pâr di capî che al sarà un libri par talian... cjâr Frank, a cuant une publicazion ancje par furlan? ;-)

Sant Andree, il Gnognosaur su la bree

Fasint i auguris di bon onomastic al papà dai Gnognosaurs, us regali chest video. Auguris Dree (Gioele al ringrazie).

Dinosaurs sot dai puartis a Udin!

Tai prossins dîs cui che al passarà par Udin al podarà viodi stranis olmis sot dai puartis: olmis di dinosaurs. «I dinosaurs sono estints? No, a rivin in librarie!» al è il sproc che al compagne la jessude de prime racuelte da «I Gnognosaurs», fumut in lenghe furlane nassût de fantasie dal ilustradôr Andrea “Dree” Venier. Sabide ai 28 di Novembar il sproc al devente realtât e il volum al sarà presentât li de librarie Ribis di Udin a lis 5 dopomisdì. I protagoniscj a son simpatics dinosaurs che a fevelin par furlan e che lis lôr aventuris a son publicadis a strichis su Alc&Cè, riviste par fruts in alegât a La Vita Cattolica. Chescj piçui erois dal Jurassic a àn la carataristiche di jessi propit gnognos, e di chest e nas dute une schirie di gags spiritosis e sureâls. I dissens a son une vore colorâts, cun trat sintetic e une vore personâl. Il volum al è publicât de cjase editore “L'Omino Rosso” di Pordenon, specializade in leterature par fruts. Pal apontament al sarà presint il president de Arlef (Agjenzie Regjonâl pe Lenghe Furlane) Loreno Zanon, Sandri Di Suald, creadôr di Tarvos, il prin fumut par furlan, l'autôr Dree Venier e la senegjadore Elisabetta Pittana. Par dute la durade dal event Dree Venier al sarà disponibil par fâ lis “dedicacès”, (tiermin francês che al significhe dedichis autografis dissegnadis) a cui che al volarà comprâ il libri. Une ocasion di no pierdi par cui che al vûl un libri “grifât” di persone di un autôr e par viodilu in vore intant che al dissegne.
Il debut in librarie al è stât anunciât di une promozion inovative su Internet, midiant dai cussì clamâts “social network”: misteriosis emails, cun olmis di dinosaurs che a fasevin intuî che alc al veve di sucedi, a àn precedût la scree di un blog dedicât (www.gnognosaurs.blogspot.com) li che si puedin cjatâ zûcs, strichis ineditis, indicazions par gadgets omaç di ritirâ in diviers ponts dal Friûl e discjamâ contignûts difarents. Po i “Gnognos” a son sbarcjâts ancje sul innomenât Facebook cun, par esempli, il quiz “Ce Gnogno sêstu?” e midiant di altris aplicazions dopradis tra i utents dal “social network” plui famôs. Cui disial che il furlan nol cjale al avignî? I Gnognosaurs lu fasin, ancje se a vegnin dal Jurassic.

Il prin libri di Andrea Monaco

Us segnali la cuviertine dal prin libri di Andrea Monaco.
Jo inmò no ai rivât a leilu ancje parcè che al è a pene jessût in librarie.
Isal cualchidun che al è za in stât di fâ une recension?

Il diari di Bobby Sands

Vuê o ai voie di ringraziâ Carli Pup che mi à fat cognossi miôr Bobby Sands.
Di fat us segnali e us consei ancje a voaltris cheste publicazion curade di Carli "Il diari di Bobby Sands", edizions Kappavu.
Par jessi precîs no si trade dome de traduzion furlane dal militant republican irlandês, ma ancje un biel struc di storie su la Irlande.
Une pagjine interessante di storie resinte inmò pôc cognossude, pardabon emozionante.
Cun di plui, lis pagjinis dal diari a comunichin dute la dramaticitât, ma ancje la dignitât e la braure di un om muart pai siei ideâi e pe libertât dal so popul.
Une vore biele la conte che e siere il libri e che e fevele di une lodule, tant che simbul di libertât.

Serade a Leggermente

O soi a pene tornât cjase di Leggermente, li che o ai stât a lei un tocut di "De senectute" di pre Toni.
Une biele serade, che e à viodût tante int a partecipâ, sedi leint sul palc sedi dome a scoltâ sentâts in sale.
Tra i tancj a jerin ancje la Ninine, il Brâf furlan e Flavia.
O amet che o jeri emozionât, ma cuant che o ai tacât a lei, la pôre si è sfantade.
Un grazie e compliments a Paolo Patui pe biele iniziative.

La gramatiche di Sandri

Juste dôs setemanis indaûr al è stât presentât il libri de gramatiche furlane (Ed. Serling).
Ve ca il video de presentazion cul intervent di Sandri Carrozzo.

Un gnûf libri di Sandri

Jo il furlan lu ai imparât dai miei nonos e nissun al à di vignî a insegnâmi di difûr a scrivi...
Cheste magari cussì no, e je une frase di tancj che a tachin i discors a pro dal furlan (secont lôr...) e cuintri lis regulis de lenghe scrite.
Po ben, ancje jo il furlan lu ai imparât di chei di cjase (nonos, mame, papà...), ma par colpe de scuele taliane no ai vude la pussibilitât di imparâ a lei e a scrivi la mê lenghe cuant che o jeri frut e dopo fantat. Tancj inmò vuê si scandalizin se si fevele di insegnâ il furlan a scuele, ma a mi mi àn obleât a imparâ il talian, che no jere la mê lenghe cence domandâ se la mê famee o jo o fossin dacuardi sui programs, sui timps, sui contignûts: si lu à fat e vonde... No doi judizis, ma o ripuarti i fats.
O ai scugnût spietâ di vê cuasi 30 agns par fâ i prins cors di furlan, la mê lenghe: la prime volte o ai stât a scuele di Linda Picco e subit dopo di Sandri Carrozzo, che o ringrazii. O ai imparât a scrivi la lenghe standard, cognossint la grafie uficiâl, cence dismenteâ la mê varietât che si fevele a Farle, e in buine part dal Friûl centrâl, anzit. Propit grazie a chestis lezions o ai cognossût dute la ricjece des varietâts dal Friûl, robe che prime no savevi che a fossin cussì tantis.
E Sabide ai 16 di Mai, Sandri al presente il so ultin libri che al insegne a scrivi "cors di grafie furlane", li de librarie Friuli a Udin.
O invidi ducj voaltris a lâ a la presentazion no dome par cognossi il libri, e magari ancje comprâlu, ma ancje par cognossi Sandri che al è simpri une vore brâf.

Tal ort

E intant e je rivade la Primereve e cui prins cjalduts (aiar permetint) dal sigûr cualchidun al à cjapât sù i imprescj e al à tacât a lavorâ l'ort. A chescj, ma ancje chei pucefadiis che come me no àn chê di metisi a svangjâ o semplicementri no àn l'ort, us segnali la recension dal libri di Stefano Montello, jussude su IL FRIULI di vinars ai 13 di Març dal 2009 te pagjine Marilenghe.

ORT, PASSION FURLANE

Fi di un impleât comunâl che si jere “sfrancjât” lassant la tiere e rivant a lâ a vore in Municipi, Stefano Montello al ven fûr in librarie cu la sô ultime fadie leterarie dedicade a la grande passion dai furlans “Manuâl critic pal ort-l'art da la jeche”.
“Ancje se gno pari al diseve che o tornavi indaûr” al dîs Montello, za cognossût al public pe sô vôs e pe sô musiche cui Flk “jo o ai cjatade la mê dimension tal lavôr di coltivadôr, dopo che diplomât mestri o vevi tacât a fâ il saldadôr: ma une dì, chê semençute di lidric mi à fat gambiâ vite”.
Montello al conte de sô esperience di agricoltôr, ma no dome. Il libri, editât de cjase editore universitarie Forum, te golaine di narative gnove “Fûrlanie […] vôs di un Friûl daviert al mont […]”, al è il pretest par fevelâ dai Furlans e de lôr identitât.
Inte prime part si riflet suntun interessant paralesim tra l'ambient e il popul, tra cemût che chest rapuart al pues condizionâ e ancje rifleti il caratar de int che lu vîf. O vin cussì il porton de cjase, separade dal esterni “e par cui che al ven rive de strade un mont blindât” si lei tes primis pagjinis. Un pôc come che al somee il furlan: “difensîf, prudent, suspietôs sul imprin; socievul e cence malizie dopo; solitari te fonde de anime; carogne cuant che si trate dal ort”. Sì, parcè che insom de proprietât domestiche al è chel blecut di tiere plui o mancul grant, li che si jentre (spes dome se si à la clâf dal clostri) in aparence par rilassâsi, ma che in realtât al è un “piçul cjamp di bataie”: un lote continue cun dutis lis besteutis che ti mangjin la verdure, cul delicât ecuilibri des sostancis che lis plantis a assorbissin, cul vicin che nol à mai di vê lis jechis miôr des tôs.... “In Friûl lis plui grandis barufis si àn vudis par cuistions di ort…” al conferme Montello.
E dopo une prime sezion introdutive li che l'autôr al conte carateristichis no dome dal ort, ma ancje dal ortolan passant tra citazions storichis e leterariis, si jentre tal ort, leteralmentri: la seconde part e je dedicade a lis plantis che si cjatis tes jechis. In ordin alfabetic a vegnin presentadis, tacant cul “militaresc” ai, passant pe freule “sensuâl”, il “poetic” pevaron fintremai a la “narcisistiche” vît, la ultime schede che si siere cuntune conte a jê dedicade.
L'ultin cjapitul dal libri al fevele dal Ort come “Teatri de Memorie”, come che al marche ancje Pierluigi Cappello che al firme la introduzion dal test. Un volumut che si siere masse adore par trop che al rive a coinvolzi il letôr cuntun furlan sclet e diret “la uniche lenghe che mi sintivi di doprâ par chest libri: se lu ves scrit par talian, mi sarès pierdût in milante pagjinis di plui”, nus conferme l'autôr. Il “Manuâl critic pal ort-l'art dal la jeche” si lei intun flât e al conferme la grande ecleticitât dal autôr che, in spiete di tornâ a cjapâ in man la ghitare, al pense za ai prossims progjets “Mi plasarès realizâ ancje un spetacul teatrâl su chest libri” nus confide.

Presentade La Comugne

Îr di sere o ai stât a la presentazion de riviste leterarie La Comugne.
O ai vût il plasê di puartâ i salûts dal gnûf Cda de Arlef, stant che il President nol à podût intervignî par un imprevist e mi à delegât. E o ringrazii la editore Alessandra Kersevan (za componente dal Cda de Arlef) e il curadôr dal progjet Pauli Cantarut (za component dal Cts de Arlef) che mi àn lassât fâ, dongje dai salûts, ancje cualchi riflession in gjenerâl che us torni a proponi, zontant magari ancje alc altri (no ai podût jentrâ tal particolâr, parcè che si tratave di un progjet decidût di finanziâ de Arlef di prin).
No met in dubi che la leterature in lenghe furlane e vedi propuestis interessantis, ma chest nol baste.
Prin di jentrâ te sale de presentazion o ai zirât tra lis scansiis de librarie che e ospitave l'event (une gruesse librarie di Udin). No ai cjatât un titul (un) par furlan: alore mi soi dit "al è vinars, o soi stracut, magari no mi soi inacuart che a son... o voi in casse e o domandi dal catalic". Risultât: "mandi, scusait une informazion: vêso libris in lenghe furlane"... al passe cualchi secont... rispueste de comesse (simpatiche e cun creance) "mmm.... aspetti... abbiamo questo (e mi mostre "il cjasâl dai animâi" che no ai capît parcè che lu veve sul bancon), ma altro... no... mi pare di no... ah sì: c'è anche questa rivista"... po si vise che forsit: "ma forse è venuto apposta"... e jo: "eh sì..."
Chest mi sburte a pensâ che nol è suficient stampâ materiâl (o feveli simpri in gjenerâl) se dopo no si lu cjate sul marcjât.
Parcè che al è just che un editôr al furnissi une ocasion pai scritôrs, ma no si pues trascurâ che dopo cheste "ocasion" no vedi di jessi fate cognossi e duncje secont me al è necessari rindile "popolâr", in maniere che la int le cjati: e chi al jentre in zûc il mont de distribuzion dai prodots che e viôt il librari come interlocutôr principâl dal letôr: dulà si vadial a cirî un libri? In librarie (a son ancje altris canâi, ma secont me la librarie e je inmò un canâl fuart).
E come che al diseve ancje Fulvio Romanin "Nol baste che un test al sedi publicât parcè che al è scrit par furlan: e covente robe ben scrite": secont me dome cussì tu puedis competi, dome se tu pontis a la cualitât.
Al è just, e lu condivît, ce che o ai let intune interviste, joibe sul Messaggero, li che si presentave La Comungne e la serade di vinars "l’obiettivo è quello di arrivare all’autonomia economica necessaria che ci permetta di non dipendere sempre dai finanziamenti pubblici".
Al è un discors une vore plui lunc e forsit un post nol è il puest plui adat, ma mi plaseve condividi chescj pinsîr cui letôrs di chest blog, ancje parcè che di chest argoment o vin za fevelât intune altre ocasion e o vevi cjatât intervents interessants. Us ringrazii za se o 'nt cjatarai ancje ta cheste ocasion.

ps: Tornant a La Comugne (e mi à fat plasê finalmentri viodi ancje lis musis dai scritôrs che a jerin in sale), mi à plasût sintî i intervents dai protagoniscj che a son stâts clamâts a lei cualchi cerce e o amet che diviers contribûts mi àn plasût.

La Pimpa a Coder

Sabide ai 21 di Març, a lis 3 e mieze dopomisdì li de Cjase Turoldo di Coder di Sedean, al sarà presentât il progjet “Golaine Imparelibris” da la Pimpa, la simpatiche cjiçute a balins ros, nassude dal lapis e de fantasie di Francesco Tullio Altan. La traduzion di 4 aventuris (Pimpa e lis robis, Pimpa e i colôrs, Pimpa e i numars e Pimpa e je in vore) e je pensade par une prime alfabetizazion dai plui piçui. Il progjet al è stât realizât dal Istitût ladin furlan “pre Checo Placerean” e dal portâl lengheNet cul jutori de Regjon Friûl – Vignesie Julie e cu la colaborazion de cjase editore Franco Cosimo Panini e de Quipos. A la presentazion a saran presints l’autôr dal fumut, Francesco Tullio Altan; il president dal Istitût, William Cisilino; il president de Agjenzie Regjonâl pe Lenghe Furlane (ARLeF), Lorenzo Zanon e la regjiste de Rai regjonâl, Claudia Brugnetta, che à curât la version televisive par furlan Pimpa. A cheste iniziative editoriâl e al è leât ancje il progjet “A scuele cu la Pimpa” pensât dal Istitût ladin furlan “pre Checo Placerean” cun chê di coinvolzi dutis lis direzions didatichis de Provincie di Udin e puartâ i libruts tes scuelis tant che materiâl didatic.

Trilogjie tormentade

A Sanremo un dai argoments di chest an e je stade la omosessualitât (cjançon di Povia, Benigni che al recite une letare di Oscar Wilde). Jo us segnali che li dal link http://www.friul.net/e_libris.php si pues scjamâ «Trilogjie tormentade» (te foto, la cuviertine), il libri di pre Antoni Beline li che al met a confront lis figuris di Oscar Wilde, Pieri Pauli Pasolini e pre Lorenzo Milani. Une des oparis plui origjinâls, e bielis, di pre Toni.
Chest libri, che o consei, al à vinçût il premi Sant Simon tal 1999 (pre Antoni al veve vinçût za une edizion tal 1981 cul libri "Pre Pitin").

Presentazion dal libri su la Ocitanie

Doman, domenie il Prin di Març 2009 aes 5 sot sere inte Sale multimediâl dal Centri di Coordenament Culturâl de Cjargne li dal Museu Cjargnel des arts e tradizions popolârs di Tumieç (v. Vittoria, 4) al vegnarà presentât il libri “Viaç in Europe. Ocitanie” di Marco Stolfo. L’apontament al è inmaneât de “Associazione della Carnia Amici dei Musei e dell’Arte”, che e à editât la publicazion.
L’incuintri al previôt i intervents di Paolo Moro (President de “Associazione della Carnia Amici dei Musei e dell’Arte”), Pauli Cantarut (Gjornalist e operatôr culturâl – “Radio Onde Furlane”), Dario Anghilante (Operatôr culturâl des Vals Ocitanis dal Piemont – associazion “Chambra d’Óc”) e dal autôr dal libri. Cun di plui si podarà viodi il video documentari “L’Occitania a pé” (2008, FR 3 Sud, 26’).
La presentazion si sierarà cuntun ghiringhel furlan-ocitan.

Debut su Contecurte

Cualchi zornade indaûr us ai segnalât la nassite di une Ostarie leterarie. Dopo cualchi dì mi soi ingolosît e o ai volût provâ ancje jo e mi soi butât, mandant une mê Contecurte. Par cui che no le ves inmò lete, ve chi il link a "Lis cialis".
Buine leture e o spieti un vuestri parê.

Estroverso 2009

Us segnali une biele iniziative dal Comun di Tavagnà che us vevi za dit timp indaûr: Estroverso al è un concors di traduzion di leterature pe infanzie partint di lenghis forestis rivant al talian o al furlan. Chest àn il concors si siere no dome cu la premiazion ma ancje cuntun seminari su lis problematichis relativis a la traduzion. Apontament al è par sabide dopomisdì ai 31 di Zenâr come che si pues lei sul sît dal comun: fracant chi.

Spietant la Zornade de Memorie

Doman e je la zornade de memorie, l'aniversari de liberazion dal cjamp di stermini di Auschwitz. Ma no vin di dismenteâ che nol covente lâ in Polonie o in Gjermanie par viodi testemoneancis di ce che il nazisim e il fassisim a àn fat. Vêso mai stât a Triest li de Risiere di San Sabba? Se la rispueste e je no, us consei di fâ une visite: jo o ai stât un Istât e cuant che o pensi a ce che o ai viodût mi vegnin inmò i sgrisui. E se o pensi che dut chest al è a une ore di strade di cjase mê, mi vegnin i sgrisui inmò di plui.
L'articul 1 de leç 211 dal 2000 al dîs "La Republiche taliane e ricognòs la zornade dai 27 di Zenâr, date che a son stâts butâts jù i cancei di Auschwitz, "Zornade de Memorie", cun chê di ricuardâ la Shoah (stermini dal popul ebraic lis leç raziâls, la persecuzion taliane dai citadins ebreus, i talians che a àn patide la deportazion, la prisonie, la muart, e ancje chei che, ancje in cjamps e posizions diferents, si son oponûts al progjet di stermini, e metint in pericul la lôr vite a àn salvât altris vitis e protezût i perseguitâts".
A scuele o vevi let "Se questo è un uomo" di Primo Levi, une testemoneance tragjiche di ce che al è stât. Come che tragjiche e emotivementri pardabon fuarte e je stade le cognossince direte di Boris Pahor (te foto cun me), un scritôr sloven di Triest che al à vivude su la sô piel la deportazion e che mi àn lassât dentri un alc di indescrivibil.
Dome a distance di passe 50 agns Pahor al à vût il just ricognossiment ancje dal public in Italie cun Necropoli. Cumò al è in librarie cuntun altri libri che si intitule "Qui è proibito parlare" une altre testemoneance che e fevele dal sintiment antisloven che al à caraterizât il Fassisim a Triest. Ma o scuen dî che inmò vuê chest sintiment a Triest al è inmò. E plui o voi di chês bandis e plui mi rint cont che e je vere.