30 giugno 2006

Italie vs Ucraine

Ancje se cualchidun al à bruntulât, ve chi la partide di vuê: Italie cuintri Ucraine. O sarai patriotic, ma jo o preferìs la Italie...

29 giugno 2006

SS Pieri e Pauli: fieste a Borc de Glesie

Vuê a Maian e je fieste. A son i Sants Pieri e Pauli e, come che al sucêt di 20 agns in ca, a Borc de Glesie e je sagre.
A saran 4 zornadis di fieste e in particolâr o ai voie di visâ che sabide Prin di Lui i Donadôrs di Sanc di Maian a fasin la zornade de donazion e a misdì a van a gustâ li de sagre.

28 giugno 2006

Riunion de Comission Teritori Ambient

Joibe 29 aes 18.30 o ai convocât la Comission par fevelâ dal Cuel dal Fum, come concuardât cu la Minorance.
A proposit, dopo de riunion de redazion o ai cjatât un volantin de Minorance che mi permet di comentâ cun voaltris, par fâ cualchi precisazion:
1) il prin toc al torne a marcâ che la Minorance "no je dacuardi cul progjet": VERE, in consei a àn dite che no son dacuardi;
2) "i intervents dai assessôr a son stâts incierts e no masse precîs" e "a son dubis di bande di tante int": VERE la prime (si podeve rispuindi un tic plui benut), avonde vere la seconde, no saressin achì a fevelâ;
3) "il progjet in cors al è stât fat bon dome de Zonte di Centridrete": VERE, ma al jere stât fevelât ancje in comission Ambient tal mês di Mai dal 2005;
4) cheste le scrif par talian, tal volantin si lei "Grazie alla decisa presa di posizione di Intesa per Majano", il consiglio ha deciso di far sospendere i lavori": FALS, come che si pues ancje lei tal verbâl dal Consei e tes cjartis in comun, la sospension dai lavôrs e je precedent, mi pâr che lu à fat presint ancje la Minorance vie pal Consei.
Cumò jo o soi par cirî di continuâ su la strade de colaborazion tra fuarcis politichis, ma come che la Minorance e met in evidence ce che la Majorance no fâs ben, achì mi permet di domandâ di vê il dirit di fâ la stesse robe cun lôr.
Tornant ae comission o ai pensât di convocâ sedi i components, ma ancje l'architet, il sindic, i assessôrs ai LLPP e al Ambient, il ciâf grup di Intesa per Majano e il responsabil dal Ufici Tecnic.
O speri che e vegni fûr une riunion precise, ancje dure, ma soredut serene e che pal futûr si rivedi a une condivision des opinions, in particolâr pal fat che il disvilup dal Parc al continuarà ancje dopo chest lot di lavôrs.

27 giugno 2006

Riunion de Redazion di Majanoinforma

Ogni an a jessin doi numars di un bolentin di Informazion: un prin dal Festival e un prin di Nadâl.
La redazion e je fate de Comission pai Afârs Gjenerâls, che si da dongje usgnot aes 18.30. O soi stât invidât ancje jo, ancje se no soi te comission. Stant che e je la prime riunion al coventarà cjatâsi inmò cualchi volte e o ai pensât di domandâus ancje a voaltris ce che us plasarès meti dentri dal Gjornalut dal Comun. Ce disêso?

26 giugno 2006

Referendum: risultâts de sezion 1

Te sezion n.1 a àn votât 640 personis su 1199 (53,38%).
I oms a son stât 312 e lis feminis 328.
Al à vinçût il Sì 373 (58,28%) cuintri 260 No (6 schedis nulis e 1 blancje).
Al di là dai discors politics il dât plui impuartant al è che la int e je lade a votâ. Ancje se cualchidun si è permetût di afermâ che a chei di Maian no i interessave dal referendum...
robis di mats...


ps: risultâts gjenerâi di Maian

Par tacâ ben la setemane




25 giugno 2006

Air Show a Triest

Vuê a Triest e sarà la esibizion des Frecce Tricolori!
Lassant stâ polemichis politichis, a mi mi à fat une vore mâl il discors de senatore di Rifondazione Comunista Menapace che e à criticât la nestre patulie acrobatiche.
Mi à displasût parcè che no à fevelât a non de int, ma di une fazion.
O soi convint ancje jo che al è impuartant il sisteme sanitari, chel scolastic, la cualitât de vite, ma o pensi che la PAN e sedi dut fûr che un strument di vuere di eliminâ.
Chest nol è un discors partitic e no contesti la Menapace dome parcè che jo o soi di Forza Italia e jê di Rifondazione Comunista. O pensi dome che no podìn disfâ un simbul de Italie e che o vin la furtune di vê propit achì tal nestri Friûl. Percè che indipendentementri des fazions, la plui part dal Friûl e vûl ben ae Frecce Tricolori e chest la Menapace al sarès util che lu capissi. O pensi che o proponarai une mozion di solidarietât ae PAN e o speri di rivâ a vê la condivision di dut il Consei Comunâl.

24 giugno 2006

Spietant Italie vs Australie

Lunis no sai ce partide che e sarà ma mi pâr che come tifoserie no sin mâl ni di une bande ni di chê altre…
Intant che o spietìn la Nazionâl, o vin di visâsi che DOMENIE SI PUES LÂ A VOTÂ NO DOME IL REFERENDUM, MA ANCJE PAI COMITÂTS DI FRAZION (ancje se cualchidun al pense che no coventin a nuie…).
ATENZION, PAI COMITÂTS SI VOTE DOME DOMENIE.

23 giugno 2006

Rassegne stampe: GAZZETTINO


Chest al è l'articul di vuê sul Gazzettino.
Pe precision us met in sintesi ancje il confront tra la mozion di CENSURE che e veve presentât la sinistre e invezit la MOZION che o vin fat par evitâ che il Sindic al cjapàs une legnade di chês fuartis.
Come che o disevi, Intesa per Majano, incavolâts come une ruie (ma cuntun tic di reson), e veve proponût une prime version che e proviodeve la CENSURA al Sindic: une posizion pardabon critiche e che ancje secont me e jere masse.
Alore par cirî di no fâ deventâ un câs di stât chest episodi, jo o ai proponût che chel test al fos ritirât e che il dut si trasformàs intun "INVITO AL SINDACO E ALLA GIUNTA A CONTATTARE LA CONFERENZA DEI CAPIGRUPPO PER DECIDERE DI INIZIATIVE POLITICHE". (il test complet al è public e si pues domandâ il verbâl in municipi se no mi crodês)
E mi pâr che a sedi une biele diference tra une "censure" e "un invît a visâ la conference", o no?
Ciert, la sinistre e disarà che il sindic al è stât lassât bessôl, ma no stin a dismenteâsi che invezit e je la sinistre che e à ritirât il test e e à votât la version che ur vin proponût noaltris. Se o vessin volût abandonâ il Sindic, no lu varessìn difindût. (e cheste precisazion e je fate in particolâr par chei che a van a meti ator - a Udin - versions falsis disint che il sotscrit al è trist e le à cul sindic!)

Par chei che no le àn vude in regâl tal ultin consei comunâl

Stant che aromai a mancjin pocjis oris al referendum, cheste setemane o propon la leture di un test un tic particolâr, ma une vore impuartant... Mi pâr che no coventin presentazions! Dut câs achì no fâs nissune propagande, ma stant la impuartance che la cjarte costituzionâl e à come test di riferiment de democrazie e libertât di un popul, o consei di lâ a dâi un voli ogni tant.
Par savê alc di plui, frache achì

22 giugno 2006

Crosere SS463-Viâl Rino Snaidero

Îr di sere o vin vude la comunicazion uficiâl di bande dal Assessôr che la rotonde no si fasarà: tant ben!
E pensâ che cualchi mês indaûr cualchidun mi à dite "Tu ti sês insumiât: nissun al à mai fevelât di rotonde".
Jo o ai simpri dite che e jere une robe che no leve ben e no mi displâs gran che achì no si fasarà la rotonde.
Al covente cjatâ une altre soluzion e o soi convint che nol covente butâ jù nissune cjase...
Tes prossimis setemanis la Zonte e varès di cjapâ contat cul Anas par resonâ insiemit suntune altre soluzion. Jo o metarès a puest la crosere cirint di vuadagnâ un toc di strade sistemant dongje Taboghe (par intindisi chel sblecut di jerbe tal cjanton in bas a diestre) par permeti a plui machinis di cjapâ la strade par Glemone, o intubarès i fossâi che a son su la statâl, o metarès un lampegjant zâl parsore la crosere e o cirarès di meti un tic di spartitrafic par chei che a vegnin jù di Susans sistemant la dople corsie dongje dal stop.
No stin a dismenteâsi che lis zonis plui pericolosis (e mi riferìs a incidents e dams une vore grâfs) no son li di cheste crosere, ma de bande di Cumierç. Achì il trafic al stop al cres 2 voltis in dì par durâ forsit 15 minûts. Su la statâl al covente no fermâ i camions, ma controlâ la velocitât: meti une rotonde al sarès stât meti un tapon su la direzion Nord-Sud che magari cussì no e à une vore di trafic pesant.

Un consei comunâl biel penç

Le vin fate tarde ancje chest consei comunâl.
Parcè cheste foto? Dome parcè che vie pal consei si à fat plui voltis riferiment a la impuartance dal rûl democratic des istituzions e dal rispiet des formis di esercizi di chest dirit: il tricolôr mi semee un biel simbul che al podi meti ducj dacuardi. Si à favelât tant e mi à ancje plasût chest confront che finalmentri si rive a vê tra lis parts (salacor, cualchidun nol sarà dacuardi): o ai di ameti che nol è facil confrontâsi cun int che e à plui esperience e "mistîr", ma e je però une biele ocasion di cressite.

20 giugno 2006

Domenie e lunis: si vote sì

Lunis di sere mi son un tic ziradis lis "elichis": o soi convint che al coventi informâ la int, ma o lis robis si fasin cun criteri o al è miôr no fâlis.
Di fat nissun saveve e nissun al è stât, orpo!
E po ancje la costituzionaliste che e veve di jessi super partes, fin dal inizi si è declarade cuintri la riforme: chest nol è un judizi tecnic, chest al è cjapâ posizion e no mi va ben. E po ancje dute la cuistion no je stade gjestide cun ecuilibri e cun cautele politiche, scusait cheste definizion. Ancje la minorance no à condividût cheste maniere di fâ e o speri che un doman, se e sarà inmò la ocasion di vê a ce fâ cuntun argoment politic, almancul la conference dai cjâfs grups, se no dut il consei, e vegni clamade a esprimisi in mert.
Cussì nol va ben! Dut câs, se cualchidun al à inmò dubis: domenie al referendum SI VOTE SI!!!

15 giugno 2006

Miercus al è consei comunâl:
belanç consuntîf

Miercus che al ven (21/06/06) al sarà Consei comunâl aes 18.30.
Il pont plui impuartant al è il cont consuntîf, ven a stâi il belenç des ativitâts fatis di cheste aministrazion tal an finanziari 2005. Ma mi risulte che e je ancje cualchi biele interogazion e interpelance... O soi propit curiôs: une volte al vignive a cjatâmi sul blog ancje il Cuç, cui sa se nus anticipe alc achì, stant che cussì ancje la int e pues intervignî. Cuç, se tu sês, bat un colp!

ps: par dî la veretât, ancje de maiorance al passave (e salacor al passe inmò) cualchidun, ma al è plui dificil esponisi se tu stâs te stanzie dai botons: al è plui comut cjalâ cence cjapâ posizion... tacant dal prin là parsore

14 giugno 2006

Dulinvie par ricuardâ Elio Bartolini

PERCORS DI CULTURE PLURÂL IN FRIÛL
Comun di Udin - Assessorât ae Culture - Il Laboratorio
ELIO BARTOLINI - la dibisugne di une memorie
Vinars ai 16 di Jugn aes 9 di sere
inte Cort di Palaç Morpurgo
“D’AMORE E DI ALTRE SOLITUDINI”
sclesis di un autoritrat

Il Friûl culturâl al fâs onôr a Elio Bartolini intune sera de speciâl di leturis, cjançons e filmâts
La manifestazion in onôr di Elio Bartolini e larà indenant cun:
BERTO LÔF - Domenie ai 18 di Jugn aes 11 (Visionario)
BIGATIS - Martars ai 20 di Jugn aes 9 di sere (Visionario)
Cul jutori di:
RAI sede regjonâl pal Friûl Vignesie Julie, CSS Teatro Stabile di Innovazione dal Friûl Vignesie Julie, Visionario Centro Arti Visive
Progjet par cure di Paolo Patui e Valter Colle

13 giugno 2006

Tresemane: Crocodîl Furlan

Intant che o spietavi che al vignìs scûr o ai stât a fâ un zirut dongje de Tresemane. Jo no ai viodût nissun crocodîl , ma o ai rivât a fotografâ cheste besteute... Le ai ancje clamade e, cuant che i ai berghelât "Nessie", si è voltade, mi à sbeleât e e à fat un salt te aghe: no le ai plui viodude!
A part monadis, jo o speri che chel svelton che al à molât cualsisedi retil di grandis dimension li ator, al vegni almancul muardût di un sborf! Cussì al capìs forsit che al è miôr lassâ pierdi i mercjâts di bestiis esotichis. Se po no je nancje vere che e je une bestie simil ator pe Tresemane, alore o pensi che i gjornâi locâi a vedin almancul di regalâi un abonament gratis al simpaticon che al à metude ator la vôs: cun dutis lis copiis che a àn vendudis in chestis zornadis par merit so!...

11 giugno 2006

Mondiâl di Gjermanie

Doman prime partide de Italie al Mondiâl di Gjermanie. Si acetin pronostics.

ps: cuntune tifose cussì forsit al è miôr cjalâ in tribune...

10 giugno 2006

MUSICHE FURLANE FUARTE su Telefriuli

E tache domenie ai 11 di Jugn, a lis 20.30, une gnove trasmission di Telefriuli in lenghe furlane. Il program, ideât di Giorgio Cantoni, si clame "Musiche Furlane Fuarte, un program di musiche vive" e in sîs puntadis, de durade di une ore, al proponarà i concierts di une schirie di grups musicâi, cjantantis e cjantants, fra i plui vivarôs de gnove musiche furlane: ARBE GARBE, PANTAN, FABIAN RIZ, MADRAC, DEK ILL CEESA, JONOKOGNOS, PRISKA, TUBET & PANSELECTA, PARAFANGOS, BRUT & MADONE,
SILVIA MICHELOTTI e KOSOVNI ODPADKI.
I concierts, realizâts dal vîf intal studi di Telefriuli, a son
presentâts di Mojra Bearzot, che cul jutori di Dek ill Ceesa, Albi Zanier e Leo Virgili, jenfri un toc e chel altri e interviste i
musiciscj su la lôr musiche, i tescj des cjançons, la sielte di
esprimisi par furlan, i lôr progjets musicâi e discografics e tant altri.
In ogni trasmission al sarà ancje un cjanton dediât ai libris par furlan, cun servizis realizâts ator pal Friûl cun Giusi Gubiani e Stefania Nonino che a lein cualchi tocut e a discorin sui libris.
Il program, realizât di zovins e indreçât a un public zovin, al vûl meti in evidence la impuartance fondamentâl che intai ultins agns e à vût la musiche par svicinâ lis gnovis gjenerazions a la lenghe furlane.
Il messaç che chescj musiciscj a pandin al è chel che une culture no si pues difindi cul romanticisim, cu la nostalgjie pal Friûl di une volte, cuntune cierte filologjie pes peraulis plui arcaichis, ma fasintle vivi tal presint cun esperiencis che a puartin la lenghe stesse a confrontâsi cul mont globalizât.
Par fâ juste cualchi esempli: i Arbe Garbe a son stâts invidâts, tal mês di Otubar, inte Laponie svedese al "Liet International", il plui impuartant festival par musichis tes lenghis minoritariis europeanis.
I Kosovni Odpadki a àn vinçût il mês passât il "Mantova Music Festival" e a son stâts invidâts, tal mês di Avost, a Budapest pal "Sziget Festival", il plui grant festival musical estîf in Europe. Madrac al à di pôc realizât "Real", il prin cd di musiche furlane disponibil in rêt, par intîr, sui principâi servizis par discjamâ musiche.
Musiche Furlane Fuarte, che al è stât finanziât de Regjon Friûl Vignesie Julie cui fonts pe lenghe furlane, al larà in onde su Telefriuli daûr di chest calendari:
- domenie ai 11 di Jugn: Parafangos e Pantan
- domenie ai 18 di Jugn: Fabian Riz e Silvia Michelotti
- domenie ai 25 di Jugn: Kosovni Odpadki e Priska
- domenie ai 2 di Lui: Dek ill Ceesa e Brût & Madone
- domenie ai 9 di Lui: Arbe Garbe e Tubet & Panselecta
- domenie ai 16 di Lui: Madrac e Jonokognòs

09 giugno 2006

Woodstock Furlan: Pascat Day


Par vuê e doman tai prâts disot Cjavurià, come ogni an, un grup di amîs al à inmaneât un fin setemane di musiche e divertiment: il Pascat Day.
E je proviodude anche une mostre dal disc.
Si pues rivâ cu la tende e dome un imperatif: divertîsi!

08 giugno 2006

Cjante che ti passe




Dal Messaggero di îr - pagjine marilenghe


Ai 6 di Mai dal 1350, te plane di Sant Zorç da la Richinvelde, intune vuaite tindude cun viltât di bande di cualchi famee di nobii furlans, al murive il Patriarcje Bertrant. Al veve novante agns (al jere nassût tal 1260 in France) e la scusse fuarte di difensôr de fede e dal Friûl, che e veve vinçût il timp e tantis bataiis, no rivà a difindisi des invidiis e des tristeriis di une cierte nobiltât furlane, che salacor e veve plui a cûr i siei interès che no chei de nestre Tiere. Chescj nobii mâl a sopuartavin il rigôr di un Patriarcje forest, francês come Zuan XXII di Quercy, il Pape che lu veve nomenât, che al rivà a dâ al guvier di chest teritori stabilitât e disvilup.
Al jere il 1334, cuant che za in là cui agns, indi veve aromai 74, in pôcs dîs de sô nomine, al jentrà in Friûl par sentâsi a cjâf dal Patriarcjât di Aquilee. Ancje se part de nobiltât e la int di chenti i de il benvignût e i si mostrâ amie, di bot al dovè ancje scuintrâsi cul Leon di Vignesie, la Acuile imperiâl e dute chê araldiche bestialitât che e cirive di tignî cont dome dal ben des lôr sachetis che no dal ben dal Friûl. Al diseve ben pre Josef Marchet tal 1950 “Aes fìestis che son stadis o che vignaran fatis chest mês in memorie di Bertrant di Sant-Geniès, nissun plui di noaltris al podarès da un consens intîr e cjalt. Parcè che di ducj i parons che, par un viers o par chel altri, a governarin il Friûl, il Patriarcje caorsin al fo vadì l'unic che al mostrà di capî ben la situazion gjeografìche e etniche de nestre Regjon e che al cirî di adatâ dute la sô ativitât e la sô pulitiche aes esigjencis che nassevin di cheste situazion”. No dome: di fat Bertrant, om di grant rigôr spirituâl al scugnî meti ordin ancje te Glesie stesse. In pôcs agns le clamà adun plui voltis dant regulis fuartis pe condote dal clericât e si impegnà cetant pe incressite dai ordins monastics.
Cun man ferme (la stesse che dispès e tignive ben strente la spade, ancje sot Nadâl, come che al sucedè a Gurize tal 1340) al à tignût a fâ cressi cheste Tiere che lu veve adotât. Inmò une volte, come che dispès al capite ancje in dì di vuê, al à scugnût jessi un che nol jere furlan a fânus cirî di capî cetant valôr e ce grandece che al veve (e al à) il nestri Friûl.
Se al podès jevâsi sù di chê arcje li che al polse tal Domo di Udin, al viodarès un Friûl une vore difarent di chel che al à lassât, no son dubis: un teritori ancje plui piçul dal so Patriarcjât, une regjon risuride dal ultin Orcolat dal 1976, une gnove Universitât dal Friûl, che e istruìs la zoventût di chenti e no dome: lui, che al jere stât professôr di dirit, dal sigûr al varès gust di viodi cheste vivarositât academiche.
Ma salacor, une robe lu disturbarès plui di chês altris: un Friûl che masse dispès no si vise des sôs tradizions, des sôs ricjecis culturâls, dal valôr de sô storie e che si lasse cjapâ masse voltis di altris interès che no son chei dai Furlans e de nestre Tiere.
E se si inacuarzès che la sô abilitât diplomatiche no fos avonde par fâ capî chest principi (come che pal passât tantis voltis no à bastât…), nol varès un moment di esitazion tal tornâ a cjapâ sù inmò une volte chê spade!
Al è dovê di ducj i Furlans dimostrâ che la braure di chest nestri popul e la culture "di popui" che e je la carateristiche di fonde dal nestri patrimoni storic e tradizionâl a àn di jessi plui fuarts di ducj i puars individualisims, i stes (par un ciert pont di viste) che àn copât Bertrant di Saint Geniès.
A distance di 656 agns de sô muart, e sarès la maniere miôr par memoreâ chest nestri Grant Patriarcje!

04 giugno 2006

Benandants tra storie e leterature


Martars ai 6 di Jugn a Branc di Tavagnà si presente il libri di Alessandro Carrozzo "I sium, il viaç, la bataie - il miluç de magne".
Al è un studi sui Benandants e sui fenomens siamanics in Friûl.
Une conference di no pierdì.
Par viodi il program complet, frache achì.

03 giugno 2006

Farcadice: diari di viaç - Charleroi (Belgjiche)

Chest al è un invît a vignî a viodi un documentari che al fevele di emigrazion. La opare e à la regjie di Carlo Della Vedova e Luche Peresson.
L'apontament al è li dal dal Auditorium des scuelis elementārs di Tarcint

JOIBE AI 8 DI JUGN A 8 E MIEZE SORE SERE (20:30)

02 giugno 2006

Al referendum: si vote sì

Il Guvier di Centriçampe al à za tacât a disfâ. Cumò o vin di difindi une des riformis plui impuartantis fatis dal Guvier di Centridrete: achì us spieghe ce che al è il prossim referendum su la riforme costituzionâl.

Voaltris ce pensaiso? Intant Renzo Tondo le pense cussì...

ps: nol covente il quorum e duncje il referendum al vâl ancje cuntune sole persone che e va a votâ

01 giugno 2006

Luca Peresson di Farle a Stocolme!

Illy al dîs che i furlaniscj a son “politicants da strapazzo”; in Europe invezit nus cirin par espuartâ il lavôr dai furlaniscj, come il gno amì Luca Peresson di Farle (te foto il prin tacant di drete) e Adrian Cescje di Nimis (dongje Luca).
Compliments al Centri Friûl Lenghe 2000 (Luca al è il President) e che Illy al continui a dî dutis lis monadis che i passin pal cjâf!
Par savê alc di plui, frache achì...