Consei comunâl

Vuê al è consei comunâl, chel che al è stât convocât ancje parcè che chei di Intesa per Majano lu àn domandât pal discors dal Cuel dal Fum. Achì o podês cjatâ l'ordin dal dì, cussì o savês di ce che si fevelarà. Intant us conti ancje cualchi peçotut che al rivuarde la Minorance: un ucielut mi à contât che cualchidun (o cualchidune...) al (o e...) tache a vê cualchi mal di panze e al semee che nol (o no...) sedi masse content (o contente...) di stâ sui bancs de oposizion... Si acetin identikits: dai che a son dome 6 e duncje si varès di rivâ a scuvierzi avonde di corse...

Ps: a fuarce di rompi lis scjatis al semee che al zovi, di fat il pdf de convocazion al è stât publicât te home page dal Comun, che misteriosamentri e tache a jessi un ticut (ma no masse...) inzornade... Cui sa se ca di cualchi timp e sarà ancje par furlan?... Starìn a viodi!

La gare di pes dal Festival

Vuê o ai stât a pes li di Pighin cu la gare dal Festival. O jeri in scuadre cun Mauro Celotti President dai pescjadôrs di Maian. O sin rivâts fûr medaie par dome 20 grams: ce sfighe! Achì o vin a pene premiât la scuadre che ha vinçût: Rigoni, Gentile, Di Giusto e Celotti. Il prossim an o vin pensât di fâ une gare simpri li di Pighin però cun cualchi novitât che us contarai plui indevant...

Al tache il Festival

Ancje chest an o sin rivâts ae inaugurazion dal Festival. Daniele e i siei a àn lavorât fuart pardabon! E di usgnot fin ai 15 di Avost ducj in place a fâ fieste cu la Pro Majano. E se cualchi sere e je un tic di musiche alte, no stin a inrabiâsi: dopo dut a son dome 15 zornadis di fieste intun an. Un tic di colaborazion di bande di ducj e e sarà pardabon le fieste di dute la comunitât. Par savê alc di plui, lait a viodi il calendari complet: fracait achì.

Un consei cinematografic

Come che us ai za dit cualchi zornade indûr, o ai cjolte la moto: un chopper. Vuê mi è tornât tal cjâf un cine di tancj agns indaûr e che o pensi che o vedis viodût ancje voaltris: Easy Rider. Se, dopo lete cheste biele recension, us ven gole di viodi un tocut di presentazion dal cine, o podês lâ a viodi achì.
E se cualchidun no i plâs i gno gjubetin blanc: la mê taie e je XXL (eh sì o ai metût sù cualchi chilut...) e al pues lassâmi il gjachetin in regâl li de Pizerie di Jonny... Grazie!

Torneu di balon inmaneât dai Juniores dal Maian

Fin domenie li di Gardo al è il torneu di balon a scuadris 4+1 inmaneât dai fantats de categorie dai Juniores dal Maian. Esat: propit la scuadre alenade di Persel. Chei che a àn tant criticât, che a vadin a viodi ce che a son bogns di fâ i nestris zovins: a san divertîsi e dâsi di fâ pe societât. Us consei di lâ a viodi parcè che cu la man di Carlo e Daniela, ma ancje cuntun sac di int che a son rivâts a tirâ dongje, a dan ancje la pussibilitât di cenâ in compagnie.

Lunis al è consei comunâl:une mê propueste pe discussion

Lunis ai 31 di Lui aes 18.30 al sarà consei comunâl.
Jo o ai presentât un ordin dal dì pe cuestion dai implants di telefonie. Us fâs lei il test che o ai mandât a ducj i components de comission teritori e ambient.
Indicazions gjenerâls pe redazion dal plan pai implants tecnologjics di telefonie mobil
In conseguence de riunion de comission teritori ambient dai 21 di Lui passât li che i comissaris a àn savût de realizazion in curt di un plan che al regolamentarà lis modalitâts che cun chês i gjestôrs de telefonie mobil a podaran instalâ ripetitôrs gnûfs sul teritori comunâl, daûr de Lr n. 28 dal 2004 “Dissipline in cont i infrastruturis pe telefonie mobil”;
considerât che chescj implants a mandin su la aree di riferiment ondis eletromagnetichis che la lôr incidence sul organisim uman e je di un continuo argoment di studi par verificânt i efiets sul stes;
ritignût che la salût dai citadins e à di jessi un ben prioritari di tutelâ parsore di ducj chei altris interès;
preocupâts par un pussibil proliferâ cence regulis dai implants di telecomunicazions;
I conseîrs comunâi a indichin ae Zonte comunâl e al Sindic di metisi in vore in dutis lis sedis e tes manieris proviodudis de leç par fâ che chest plan pal insediament dai implants tecnologjics di telefonie mobil al sedi il plui restritîf pussibil par podê limitâ ai gjestôrs di telefonie mobil la pussibilitât di instalâ implants che a podaressi nosi ae popolazion.
In particolâr a indichin che chescj implants no dome a varan di jessi metûts lontan di ponts sensibii tant che scuelis e centri pai anzians, ma che i stes a sedin tignûts fûr dai centris abitâts e su teren di proprietât publiche par tirâ a pro de comunitât i afits che a vignaran. I ripetitôrs a varan di jessi mascarâts di pueste par limitâ l’impat visîf.
Chestis indicazions a varan di jessi trasmitudis ae comission tecniche incjariade di pueste di preparâ il plan in argoment.

Marilenghe e internet: Plone par Furlan

Il Sportel pe Lenghe Furlane dal Comun di Tavagnà al à colaborât pe realizazion di un impuartant progjet di disvilup di software open source in marilenghe: Plone par furlan.
La aministrazion comunâl di Tavagnà e à di simpri marcât la impuartance dal disvilup tecnologjic e de tutele de marilenghe. Cun chescj principis al è nassût "Plone par Furlan", un progjet in convenzion cun Tecnoteca srl, aziende di Felet che e lavore pal disvilup di sistemis informatics open source.
Cu la estension in marilenghe (prime tu âs di vê za discjamât il program: al è libar e tu lu cjatis su www.plone.org), i citadins di Tavagnà, ma ancje ducj che che a àn a cûr la tutele de lenghe furlane, a varan la pussibilitât di creâ pagjinis internet cuntun software "Libar e par Furlan!"
Par save alc di plui, lait a lei ancje achì: Comun di Tavagnà

Ce sorte di sglavin!

Mi displâs par chei che a vevin programât di passâ la serade a Mulin Gnûf pe serade dedicade al cine di Massimo Garlatti Costa, ma cun dute chê ploie che e je vignude jù o vin scugnût rinviâ lis proiezions.
In program a jerin il documentari storic "Friûl viaç te storie" realizât pe Provincie di Udin tal 2004, il documentari sui 25 agns di Radio Onde Furlane "La Radio libare dai Furlans Libars" dal 2005 e par sierâ in glorie il documentari sul mont dal porno par furlan "Buris, libars di scugnî vignî". Altris informazions su www.buris.it o tal sît dal Comun di Tavagnà.
A pene che a sarà decidude une altre date si fasarà di gnûf la informazion e la publicitât che a coventin.
Intant jo e Massimo o vin decidût di metisi in societât par risolvi i problemis di sut ator pal mont: no pluvial plui? isal masse sec? Nissun probleme: jo e lui o decidìn di fâ une rassegne di cine par furlan tai vuestris cjamps e o podês stâ sigûrs che chê sere al sglavine! La Coldiretti nus à za proponût un contrat... Ce âstu di fâ? Tocje sdramatizâ un tic...
Ten di voli i inzornaments su www.comune.tavagnacco.ud.it

Tal 2007 o disarìn "E jere une volte il Tocai"

Duncje, cence fâle tant lungje: in Europe a son doi vins che a àn il non scuasit compagn (juste dome il non, parcè che pal gust mi pâr che ducj a disin che al è plui bon il nestri), ven a stâi il "Tocai" nestri e il "Tokaj" de Ongjarie. Cualchi an indaûr e je nassude cheste barufe par vê la esclusive dal non e induvinait cui che le à cjapade tal ...? Juste: propit noaltris, che cul 2007 o varìn di usâsi a doprâ il non "Friulano". A mi mi pâr une broade gambiâi non e o varès pluitost doprât un non furlan, ma mi rint ancje cont che daûr a son studis di marcjât e considerazion che e à fat ancje la Federdoc, la associazion dai produtôrs DOC, che tra l'altri president al è Stefano Trinco di Maian. O speri che almancul pe promozion dal prodot, i produtôrs e la Regjon a vedin la creance di pontâ su la valorizazion dal prodot doprant ancje il Furlan: a Mortean a àn vude la inteligjence di regjistrâ "La blave di Mortean". Par savê alc di plui, lait a lei achì...

Sul furlan Rai fûr leç

Al pâr che l’istât 2006 al sedi tacât une vore ben par chel che al inten la tutele linguistiche. In particolâr pal furlan, al sarà parcè che a son 10 agns de leç regjonâl 15 dal 1996, ma tai ultins timps si viôt a boli diviersis iniziativis.
Di fat al è za stât nomenât il gnûf grup di lavôr che al varà di puartâ insom la revision normative tornant un pôc a pensâ e miorâ chest imprest di tutele di nivel regjonâl. Ma in chestis setemanis no si fevele dome di tutele de lenghe furlane stant che la leç 482 dal 1999 “Normis in cont de tutele des minorancis linguistichis storichis” e fevele in particolâr, daûr dal articul 2, “che tal fin di atuâ l’articul 6 de Costituzion e in armonie cui principis gjenerâi stabilîts dai organisims europeans e internazionâi, la Republiche e tutele la lenghe e la culture des popolazions albanesis, catalanis, gjermanichis, greghis, slovenis e cravuatis e di chês che a fevelin il francês, il franco provençâl, il furlan, il ladin, l’ocitan e il sart”...
Par continuâ a lei, fracait achì...

Un libri di lei te rêt

Cualchi mês indaûr la Scuele pe Infanzie di Maian e à presentât un bi-libri che al jentrave tal progjet "E cumò ti conti jo!". O ringrazii il Preside, lis mestris Silvia e Donatella e i frutins di Maian pe biele esperience che mi àn regalât dantmi la pussibilitât di colaborâ ae iniziative.
Lis copiis dal libri a son finidis, ma chi sot o podês lei la conte di "Pieri e Gjilde" publicade tal sît internet dal Istitût Comprensîf.
Fracait achì par lei il libri

Il plan pai implants de telefonie

Te prossime comission Teritori-Ambient che o ai convocât par vinars 21, si fevelarà di diviersis robutis. Une e je la prevision di un plan che al definissi lis modalitâts di instalazion dai implants tecnologjics: in pocjis peraulis tropis e dulà che a varan di jessi metudis lis antenis pai telefonuts.
Jo o ai une opinion e o volevi viodi ce che o pensais ancje voaltris: il probleme des antenis al è sot dai voi di ducj e stant che nissun al à voie di rinunciâ al celulâr al covente meti des regulis par evitâ che a vegnin sù pai cence ordin.
Secont me prin di dut chescj pâi a àn di jessi lontan dai ponts sensibii (scuelis, cjasis e ducj chei puescj li che e je une alte concentrazion di popolazion) e po al sarès impuantant che a fossin metudis suntune aree publiche cussì almancul l'afit dal teren al reste ae comunitât e no tes sachetis di chel o di chel altri privât. I doi pâi che a son a Maian in teorie no crein pericul, ma al sarès ben che no vignessin dongje ancje altris.
E sarà une specifiche comission tecniche a lavorâ su di chest document, ma mi è semeât util che ancje il consei comunâl al fos informât di cemût che a varan di lavorâ chescj tecnics. Cussì se si à di dâ cualchi consei, si lu fâs daurman e no dopo che il progjet al è za stât fat.

Il Messâl par Furlan

Domenie li de Basiliche di Aquilee, la Glesie furlane e à ricuardât i Sant protetôrs dal Friûl: Macôr e Fortunât. Ma come che si lei ancje tal sît di Radio Onde Furlane, la nestre Glesie e je daûr a fadiâ no pôc par fâsi ricognossi il Messâl par Furlan. O vin za la Bibie, ma pal Messâl la robe e semee plui lungje. Lait a lei achì il parcè...
Jo doman o clami il predi di Vilegnove

ps: repetita juvant e sul Friuli al è jussût un articul in mert ae cuestion de tutele linguistiche.
Lait a lei achì

Domande par risarciment dai dams

Cualchi zornade indaûr al è stât un biel aiaron e cualchi cjase e cualchi capanon a àn vût dams: cuvierts e cops menâts vie, morârs colâts e vie indevant. Cui che inmò no lu à fat al pues presentâ domande di risarciment li dal ufici tecnic. Par coretece di informazion us visi che nol è dite che a rivin i bêçs: se la regjon no fâs il stanziament e e lasse fûr il comun di Maian, nol sarà nuie ce fâ. Ma intant si pues presentâ la domande distès e se o vês ancje cualchi foto, puartait ancje chês. L'ufici tecnic al à in numar 0432/948455 e dopo o vês di fâ il numar che us ven domandât. Achì al è il modul par fâ domande

Ca di cualchi zornade al tache il Festival

Nol mancje tant ae scree dal prossin Festival di Maian. In chestis zornadis si à fevelât di fotografiis e no ducj a son stâts dacuardi: cheste chi in bande o speri che invecit no displasarà a la plui part. E je Hoara Borselli che e presentarà une des plui impuartantis, se no adiriture la plui impuartante serade di dut il calendari dai apontaments inmaneâts de Pro Majano: la tape furlane (uniche date de regjon) dal Festival Show, il spetacul di Radio Birikina.
Par savê dut il program de fieste si pues lâ a viodi te home page de Pro Majano.

Un cjanton dal gno paîs

Sabide o ai stât a bevi in cafè li dal barut e "par câs" o vevi la machine fotografiche te sachete... Cussì mi soi impensât dai miei letôrs e o ai fate une foto dal cuel. Cheste che o viodês e je che part che e je juste daûr de palacine dai implants sportîfs. In prin plan e je la ringhiere che e delimitave ancje prime il limit de strade e subite parsore e je la stradele che e puarte insom dal cuel. Intant us segnali in anteprime che Intesa per Majano e à convocât il Consei Comunâl: le àn fate come at simbolic parcè che a savevin benon che dentri de fin di Lui lu varessin fat distès. Se cheste e je colaborazion... Mah!?

Ise une responsabilitât sul blog?

A Aosta il tribunâl al à fat une condane par difamazion a un che al veve un blog. La sentence secont me e je viziade di une interpretazion no corete de normative su la editorie. No si pues pensâ che un che al vierç un blog al vedi la stesse responsabilitât di un diretôr di gjornâl par vie che cheste e je une iniziative libare che no à nissune carateristiche di professionalitât domandade a di un gjornâl: in pocjis peraulis un blog nol è un gjornâl. Ciert, chest nol significhe che e je une biele robe trai in maniere scorete ufindint la int e salacor platâsi daûr dal anonimât. E po prime di scrivi une porcarie al sarès ben savê che al baste visâ la polizie postâl e cuntune piçule ricercje (ven a stâi, no masse complicade di fâ par chei che a àn i imprescj) si rive a cjatâ fûr i IP ven a stai il codiç che al identifiche ogni computer e che al lasse il segn dal passaç intun sît o intun altri.
Morâl de favule: disêt la vuestre opinion, ancje critiche, ma fasêtlu cun coretece e cence ufindi, cussì nissun al podarâ meti in discussion nancje il bon gust di chest spazi. Se po cualchidun distès al tache a scrivi malignitâts e peraulis difamatoriis, si cjaparà dutis lis conseguencis e cun di plui al dimostrarà trop triste che e pues jessi la int, soredut cuant che e pues fevelâ cence scugnî mostrâ la muse...
Ciert al è che la normative e varès di jessi plui clare...
Par savê alc di plui us consei di lei ancje achì.

Un ucielut mi à contât...

Le savêso la ultime? Al semee che cualchidun (e no sai cui) al sedi une vore infastidît di chest blog. No lu riten une robe che e funzione, anzit e je une robe che e fâs dan.
Jo no sai se cheste robe e vâl o no vâl, se e covente o se no convente, se e plâs o se no plâs... Dal sigûr no plâs a ducj... e se mi domandin di sierâlu?!? Ce pensaiso?
Dut câs cumò o vierzìn une piçule lotarie, chel che mi jude a capî al vinç une foto dal Cuel dal Fum: cui podaressial jessi chel che i ven il mâl di panse cuant che al ven a lei achì?
Dut câs domenie la foto dal Cuel dal Fum e rive chel distès...

Furlan e Universitât

Vuê e je stade la cerimonie di consegne dai atestâts pai cors di furlan inmaneâts de Universitât di Udin midiant dal Cirf (Centri Interdipartimentâl di Ricercje su la culture e la lenghe dal Friûl) cu la colaborazion de Societât Filologjiche Furlane.
Il Magnific Retôr Furio Honsell (te foto mi consegne l'atestât dal Cors di Traduzion) al à fat un discors une vore biel e plen di significât.
Intant al à fevelât par furlan puartant i salûts te nestre lenghe (lui al è de Ligurie) e po al à dite une altre biele robe: "Cuant che o sint i fruts che a fevelin par furlan mi si vierç il cûr parcè che vê la pussibilitât di cressi intune regjon plurilengâl al permet di consolidâ un sisteme di aprendiment che al facilite la formazion e la istruzion. Chest al è un patrimoni che no podìn permetisi di pierdi!" O fâs presint che al à simpri doprade la prime persone: "la nestre realtât", "no podìn pierdi il nestri patrimoni culturâl", "la nestre Universitât dal Friûl".
Cumò mi domandi:
Ce si puedial zontâ se ancje di di fûr si rindin cont de impuartance di fevelâ plui lenghis e nus disin di no molâ?
Ancje la mê mestre des elementârs ur diseve ai gjenitôr "I fruts a àn di fevelâ furlan e a scuele a àn la pussibilitât di imparâ une altre lenghe: il talian e lis mestris a son achì ancje par chel, ma no vin di dismenteâ il furlan!" No stin a cjalâ i esemplis negatîfs come che al à fat cualchidun ancje tai post precedents: se cualchidun nol à vude la pussibilitât di une istruzion, no podìn dâ la colpe al furlan. La colpe e je di cui che no i à dât la pussibilitât di imparâ a fevelâ un bon talian: tropis voltis no si sintial a fevelâ chei talianots che ur disin ai fruts "Sta tento a non sbrissiare!" Chest al fâs dan, no il furlan!

La magjie dal Lât

Paolo Paron nus segnale une biele iniziative "Oltre le nuvole, i suoni dell'anima", che si davuelzarà joibe ai 13 di Lui aes 21.00 dongje Tarvis, li dal Lât disore a Fusinis. La serade e jentre tal progjet "Magica Europa".

Compagnât de musiche de Arpe celtiche sunade di Eliana e Katia Zunino, Paolo al leiarà contis antighis su striis, benandants, spirts folets e personaçs magjics intune atmosfere che e pescje te tradizion popolâr de Scozie, de Irlande e de Bretagne.

Italie Campion e Friûl Nazion!

Vuê e je la assemblee de Majanese

Se cualchidun nol à inmò let i manifestuts che a son ator, vuê aes 20.30 li dal palaç des associazions e je la assemblee anuâl de ASD Majanese. Il president Lorenzo Natolini al à ancje scrit une biele letare sul Messaggero. Al à butât biel pugn di pevar e o speri par lui che cualchidun al rispuindi al so apel. O soi propit curiôs di viodi cemût che e va la assemblee. E se cualchidun si permet di criticâ chê letare o soi propit curiôs di sintî lis argomentazions...

Friûl - Sardegne: lontans o dongje?

Cualchidun si è domandât ce che al jentre il jessi furlan cul jessi sart... Ben chest dibatit al è stât discorût ancje in altris bandis: lait a viodi sedi achì sedi achì.
Forsit cumò che e à vint la Italie (e jo o soi content) a cualchidun i si è tornât a sveâ une bruare nazionalistiche taliane.
Ma a cjalâ ben il significât des peraulis jo o preferìs considerâ il Friûl (e la Sardegne) une Nazion come che al diseve il linguist Saussure: “in largje misure e je propit la lenghe che e fâs une nazion”. Nazion duncje no come sinonim di stât sanzionât cun elements juridics, ma come formazion o grup sociâl.
Dutis chestis Nazions a stan dentri di un Stât plurilengâl (Italie), che nol varès par gno cont di vê pôre di valorizâlis e tutelâlis. Achì, ni di altris bandis, no ai mai fevelât di secession: o preferìs però doprâ lis peraulis pal lôr significât reâl, che salacor par masse agns al è stât platât a nô e a dutis lis altris ints che a fevelin une lenghe minoritarie (ancje la Sardegne). Us consei di lei il libri dal prof Bonamore.

Campions dal Mont!!!

O pensi che di cheste gnot si visarìn par tancj agns: Italie campion dal Mont intal an plui brut pal balon talian! Par furtune e je int come Cannavaro e Gattuso (ma tancj a son chei di ricuardâ) che nus àn fat il regâl plui biel!
Campions dal Mont, in Gjermanie, dopo vê vint cui parons di cjase e vincint in finâl cuintri la Francie! Grazie fantats!!!

Un cjanton dal gno paîs

Come che o ai vût fevelât cun Nangank che al è tal forest, cheste rubricute e je dedicate ai cjantons dal nestri comun. Par sei precîs, cheste fotografie le ai fate inmò chest Unvier: o jeri tai Sanmartins e o ai cjalât viers il Cjampon (la mont colôr di rose) e il Cuarnan parsore Glemone e Dartigne. Viodìn se chei di Maian a induvin ce cjasis che a son chês zalutis...
(par viodi la foto plui grande al baste frachâi parsore vie)

Spietant la Finâl mondiâl: Italie vs Francie

In Finâl cumò o vin Zidane e i siei...
Apontament par domenie di sere li de Sagre di Farle par viodi la partide ducj insiemit!

Vive Farle, vive il Cuar!!!

Trê dîs di fieste a Farle: di vuê fin domenie (7, 8 e 9) si podarà mangjâ, bevi, scoltâ buine musiche (usgnot al sune Rudy) e stâ in ligrie tal prât li che a jerin lis scuelis une volte. Domenie si podarà viodi ancje la partide de Italie.

Sunsplash tal Rivelin

A Maian o vin il Cuel dal FUM e a Osôf?
Al tache vuê il Sunsplash.
Ocjo cu lis batudis: masse facil...

Conference dai Cjâfs grup

Vuê aes 18.30 e je convocade la Conference dai Cjâfs grup par decidi dal prossin consei comunâl.
Intesa per Majano dopo de comission ambient, che o ai convocât la setemane passade, e à domandât di fâ un consei dome par fevelâ dal Cuel dal Fum. Jo o pensi che di chest argoment si puedi fevelâ ancje in Consei, ma fâ une sentade di pueste dome par chest, mi pâr un tic masse. Ancje parcè che pe fin dal mês dal sigûr al vignarà fat e si pues fevelâ in chê.
Al semee che cheste propueste no ur vadi ben e che se no fasìn come che a disin lôr, Intesa per Majano e à menaçât di convocâlu jê il Consei comunâl (e je une regule che e permet ai components dal Consei di convocâ une sentade ogni volte che lu domandin, e lôr i numars ju àn).
Us contarai dopo de riunion, cemût che e je lade...

Circul dai Sarts di Udin: Maria Marceddu vicepresident

Maria Marceddu in Cividino, che e sta a Farle, e je stade elete vicepresident dal Circul dai Sart di Udin.
Friûl e Sardegne a son dôs nazions une vore impurtantis tal stât talian, ancje se cualchidun al met inmò in discussion lis nestris lenghis.
O soi propit content che une mê vicine di cjase e vedi l'onôr di vê vude cheste impuartante carghe, che le puartarà in particolâr a proviodi des iniziativis culturâls dal Circul.
Compliments a Maria e o speri che ancje la zonte si visedi di cheste realtât e che e valorizi i rapuarts tra lis nestris ints.

E cumò la finâl: cui saraie chê altre scuadre?

2 a O ae Gjermanie e cumò si viodìn in finâl: cui saraie chê altre nazionâl? Spietìn il risultât di Portugal vs Francie

Se doman cualchidun nol à voie di viodi la partide...

Diviers ma intune: minorancis inte Comunitât Europeane
Carli Pup ospit dal Comun di Tavagnà
Martars ai 4 di Lui, a Branc li dal Centri Sociâl aes 20.30, inte suaze des conferencis "Furlan: par fevelâ di dut" Carli Pup, redatôr di Radio Onde Furlane, al presentarà une relazion su la realtât des minorancis linguistichis in Europe. La conference e je di grande atualitât stant che ven dopo dal referendum de Catalogne: e sarà duncje la ocasion par un confront e une riflession in mert ancje a chest argoment. La serade e sarà compagnade di une proiezion di diapositivis su la cuestion.

Libertât

Semifinâls:Italie vs Gjermanie e France vs Portugal

E se noaltris o sarìn a zuiâsi la semifinâl come tal 1970 in Messic, Francês e Portughês a saran di chê altre semifinâl.
Cui vadial in finâl?

10.000 voltis grazie

Propit vuê o vin passât il tet des 10.000 visitis al blog. Un risultât che no varès pensât, stant che al è dome 3 mês che al è nassût chest esperiment di comunicazion. Cualchidun si domande a ce che al covente vê un puest dulà fevelâ, comentâ, salacor contâ ancje cualchi tristerie. Jo no sai se al covente o mancul... o sai dome che podê esprimi ognidun la sô opinion e sedi une biele libertât. Ancje se a cualchidun al dâ fastidi. Dut câs, grazie a ducj chei che a partecipin.

La gnot blancje in Mulin

Vuê li dal Mulin Cocconi di Ospedalet di Glemone e varà inizi la prime gnot blancje.
Nuie fiestis in place, ma un tornâ a discuvierzi ce che a fasevin i nestris nonos, cuant che, finide la trebiadure, si fermavin di sere fintremai a buinore te arie par contâsi cemût che al jere lât il lavôr, ma ancje zuiant e passant un pôc di timp insiemit cence pinsîrs. Usgnot di sabide Prin di Lui, tra leturis, musiche, zûcs, filmâts, contis di vielis mulinârs e ancje une mostre fotografiche sui mistîrs dal mont agricul di une volte, il Mulin Cocconi al spietarà il nassi dal soreli par fâ fieste insiemit cun dutis lis personis che a son stadis dongje al ecomuseu e cu la int che, si spere numerose, e varà gust di tornâ a vivi chês atmosferis aromai lontanis.