29 luglio 2009

Majano Nuova 2009

Come ogni an cuant che si scree il Festival, ti rive pes mans ancje l'ultin numar di Majano Nuova, la riviste publicade de Pro Loco. O ai tacât a sfueâle e mi soi fermât a lei lis primis pagjinis che a son dedicadis al ricuart di Dino Bortolotti, mancjât ai 20 di Avrîl di chest an: za dome par chescj lamps di memorie, che mi àn tornât a puartâ a tancj episodis che ancje jo o ai vivût cun e grazie a Dino, il numar al vâl la pene di jessi metût vie e tignût cont. Grazie a ducj chei che a àn scrit chestis bielis pagjinis par une persone pardabon speciâl che e mancjarà no dome ta chest Festival, ma par dut il paîs.

27 luglio 2009

Il mestri e i delfins

Come che o ai za dit, o soi un so fan. E cuant che o ai lete cheste enesime "Cjacarade" o ai pensât di condividile cun voaltris. Le met tal prin coment: si fevele dal acuari di Triest e no dome...

25 luglio 2009

Mandi Boss!

Cuant che le ai lete sui gjornâi no rivavi a crodi. Ancje Bruce Springsteen al à imparât cualchi peraule di furlan e vie pal conciert di joibe passade al à berghelât 3 voltis «Mandi Udin!».
Vie pe serade al à ancje dit «O soi content di jessi cun voaltris achì stasere». Une dimostrazion di afiet che e da braure a ducj i furlans!
Mandi Boss e grazie!

24 luglio 2009

Il grup dai letôrs su Feisbûc

Vuê o aprofiti di une iniziative che o ai cjapât cualchi dì indaûr e us ringrazii ducj voaltris, letôrs di chest blog.
Su Feisbûc, o Muselibri, o Facebook, o ai screât il grup dai letôrs di chest blog: lait a viodi chest link e se o vês voie o podês metisi in note.
In pôcs dîs il grup al à passât i 70 iscrits: no me spietavi une rispueste cussì svelte e numerose, grazie!
Intant inmò grazie par jessi simpri in tancj e par vê fat deventâ cheste sorte di diari une piçule place virtuâl par cjatâsi e discori.

23 luglio 2009

Il Festival al sta par tacâ

Come ogni an, cu la fin di Lui al tache il Festival di Maian.
La Pro Loco di Maian e à lavorât une vore ancje chest an e chi podês lei dut il program 2009.
E sul gjornâl di vuê si pues lei ancje une letare che o cjatais ancje tai coments.

22 luglio 2009

Un grazie a Aldo

Fasint un piçul resocont de Messe di Aquilee di domenie passade o aprofiti par ringraziâ Aldo Taboga par vê fat chest biel servizi sul so portâl www.natisone.it. Us consei di lâ a viodi chest link e cussì o cjatarês tantis informazions su cheste messe che e je pardabon intense.
Jo stes, tornant a lei il libretut che nus àn dât e scoltant i cjants che a àn jemplade la Basiliche, mi soi sintût piçul piçul denant de profonditât dal messaç che Glesie furlane mi à fat cognossi. Disìn che svicinantmi a cheste associazion culturâl o ai rivât ancje a tornâ a cjatâ un percors che o vevi lassât in bande.
Tornant a la celebrazion, us consei di scoltâ cun atenzion chest file audio.
E chi us propon il test dal

Cjant di Sant Ermacure:

Sù, fâsti dongje, int di Sant Ermacure,
al to pastor e a Fortunât rivolziti,
ai testemonis, che tu sâs in glorie,
parcè che pe lôr fede a àn dât la vite.

Achì passarin, come vint in furie,
popui ruviei di brame e di tristerie,
ma tu âs viodût te dì de gran miserie,
il segno che il Signôr no ti bandone.

Gjolt, Aquilee, Diu ti da la glorie,
che, fruçonâts i mûrs de tô supierbie,
cence des armis cjantistu vitorie
pai tiei nemîs clamâts a jessi fradis!

Chi l'om furlan e chel da la Slovenie
e il todesc a cirin amicizie
e, tant diviers, a cjatin une patrie,
che e à tai martars dute la sô fuarce.

Chi la semence de Furlane Glesie,
di Redenzion e puartave lis primiziis
e tal martiri si viestì di glorie,
sfidant a muart la prepotence umane.

Laudât Idiu, Trinitât santissime,
Pari, cul Fi, a pâr cul unic Spiritu,
che al sielç i debui, cun dissen di gracie,
par palesâ tal mont la sô potence. Amen.

20 luglio 2009

Salt de cuaie by war

Ve chi une simpatiche cjançonute di Aldo Rossi che al comente la conversion di une ex presidente de regjon che de Leghe Nord e je passade cul Pd. No che mi vedi impressionât plui di tant, ancje parcè che a Maian o sin za usâts a viodi a saltâ di une bande a chê altre (provait par crodi: fracait chi). A proposit, rispiet a un an indaûr in consei comunâl a Maian nol è gambiât cuissà ce: cualchidune e continue a sentâsi in minorance (cuant che e ven, e simpri plui di râr...) e a proponisi fûr dal Municipi tant che referente pal centridrete, anzit pal Popolo della Libertà (sì, "libertât" di fâ cussì...)

19 luglio 2009

La Patrie di Lui

La Patrie di Lui e je rivade par pueste. Ta chest numar o vin fevelât de situazion de tutele linguistiche frontant diviers aprofondiments: la sentence de cort costituzionâl, i tais de leç 482, lis polemichis e vie indevant.
Jo e il Dree o vin firmât un "editorialut in pirulis" che al comente propit chestis ultimis polemichis: lait a leilu chi, sul Sît de Patrie.
Us visi che vuê aes 6 di sere us spietìn ducj a Aquilee li che Glesie Furlane e celebre la messe dai Sants Ermacure e Fortunât e al vignarà ancje let un comunicât in mert a lis stessis polemichis che o disevi chi parsore.

17 luglio 2009

16 luglio 2009

15 luglio 2009

Semplicementri Supernaturâl!!!

Joi ce cjoche!
Ce cjoche di musiche, fenomenâl!
O soi inmò che o baluci prime di indurmidîmi!
No ai altris peraulis par descrivi la sensazion, lis sensazions provadis usgnot al conciert di Carlos Santana (te foto) in place Unitât a Triest.
O savevi che o varès stât a un event no di pôc, ma cjatâsi devant di un mît de musiche planetarie, mi à lassât cence flât, se no par balâ, tignî il timp, cjantâ, insumis gjoldimi un spetacul pardabon emozionant.
Une band di musiciscj di gale, ma cuant che e à tacât a cori pe place la "vôs" di chê ghitare, la magjie e je tacade.
Cun cheste vere liende vivente, no classificabil dome intun unic gjenar musicâl, Afriche, Sudameriche, Nordameriche, Caraibis, in pratiche dutis lis notis dal mont si son fondudis intun univiers di musiche che nol sarà facil, se no impussibil, dismenteâ. E a pensâ che a son passâts 40 agns, no tu rivis a rinditi cont che chel siorut cu la baretone sul cjâf al jere ancje lui là, a Woodstock, tante e je la energjie che e nas dai soi dêts che svelts e sigûrs a corin su lis cuardis de ghitare... Dôs oris cence un moment di polse, un toc vie daûr chel altri!
Insumis, par fâle curte, ancje parcè che ogni peraule e sarà simpri masse pôc par dut che che o ai vivût e scoltât, o podarai dî: "O jeri ancje jo".
Anzit "O jerin ancje NÔ", stant che cheste serade speciâl e je stade inmò plui preziose parcè che le ai condividude cun Venusia.

Ps: Lait a viodi ancje il sît internet di Santana, al merte!

13 luglio 2009

Fieste dai Scampanotadôrs

Domenie ai 26 us consei di lâ a Zui, su la plêf di Sant Pieri pe fieste dai Scampanotadôrs Furlan.
L'apontament al è a buinore pe visite vuidade a la Polse di Cougnes e po dopo lis iniziativis a continuin cu la messe e la fieste par dute la zornade.
Un grazie a Michele di Maian che mi à fat cognossi cheste biele realtât furlane (fracait chi par lâ tal lôr sît internet)!

12 luglio 2009

I Sants Ermacure e Fortunât, Patrons dal Friûl

Vuê il Friûl al ricuarde Ermacure, prin vescul di Aquilee, e Furtunât so diacun, che cul sacrifici de lôr vite a àn plantade chenti la prime comunitât cristiane fondade sul amôr, sul servizi, sul vanzeli, no su la prepotence, sul podê o su la cariere.
Il grop di Glesie Furlane come ogni an al invide il popul furlan te basiliche mari di Aquilee pe Messe grande di avôt dal Friûl. L’apontament al è par domenie ai 19 di Lui aes 6 sore sere.
E sarà la ocasion par preâ pal nestri popul, par cjapâ coragjo tal Signôr. Dopo Messe, si starà un moment in compagnie par un ghiringhel.

Tal invît che chest an Glesie furlane e à mandât al è ancje ripuartât un pas di une predicje che pre Checo Placerean al à fat propit a Aquilee, te fieste dai Sants Ermacure e Furtunât di 30 agns indaûr. Al jere il mês di Lui dal 1979 e pre Checo al diseve: “No si fâs pastorâl ni di predis ni di vescui se no metintsi dacuardi e metintsi in simpatie, in sintonie cu la vite, cul mût di vivi, cul mût di crodi, cul mût di preâ, cul mût intîr di dâ significât a la esistence dal propri popul. No si salve il furlan se no cuntune pastorâl furlane. No si ricostruìs il Friûl se no cuntune cjase e cuntune glesie furlane. No moderne e nancje antighe; furlane. E no si puartilu in glesie imponint mût di preâ, mût di assisti o di cjantâ o in cualunche altre manifestazion religjose che si puedi fâ in glesie, che no sedi nestre, nassude culì. Che si deventi miôr? Si devente miôr aprofondint lis robis, capintlis profondementri, lant fint a font de robe par gambiâ, no metint i vistîts di chei altris”.

11 luglio 2009

Insium o realtât?

In esclusive us regali cheste foto.
Insium o realtât?
No us rispuint nancje sot torture: us dîs dome che cuant che o ai viodût chescj 4 volums dal GDBTF mi soi un tic ingropât pe emozion.
E o ai mandât a trai plui di cualchi pipinot che al à tant scrit dibant sui gjornâi... tiè!

10 luglio 2009

Fraie dal Istitût ladin furlan cu la Patrie

Par domenie ai 12 di Lui l’Istitût ladin furlan “pre Checo Placerean” al à inmaneade la fraie anuâl. L’apontament al è pes 11 di buinore li de aree pes fiestis di Sant Lurinç di Sedean. Il program, che si vierzarà cul salût introdutîf dal President dal Istitût William Cisilino, al previôt i intervents dal President de Provincie di Udin, on. Pieri Fontanini, dal assessôr regjonâl Claudio Violino, dal President de Agjenzie regjonâl pe lenghe furlane Lorenzo Zanon e di me tant che vicediretôr da La Patrie dal Friûl. E sarà la ocasion no dome pai socis e amîs dal Istitût par cjatâsi adun, ma ancje pe nestre redazion par presentâ l’ultin numar de riviste che e à un speciâl dedicât a la situazion de tutele des lenghis minoritariis e duncje ancje dal furlan "Culture in fûc?".
Un grazie al Istitût ladin furlan, in particolâr al president William Cisilino, che nus ospite e a Radio Onde Furlane, in particolâr al diretôr Mauro Missana che mi à clamât ancje chest mês par presentâ la Patrie dentri de trasmission Atorator (fracait chi par cjatâ la trasmission dopo che e sarà lade in onde).

09 luglio 2009

Benvignude furlanie

Vuê us segnali la trasmission Benvignude furlanie sugjeride di bande di Marco "El lobo" di Rosario in Argjentine. E va in onde ancje su Internet: fracait chi.
Ogni sabide a lis 11, orari argjentin: sintonizaitsi cheste sabide!

Buine scolte e mandi a ducj i Furlans ator pal mont.

08 luglio 2009

Cui passial sul gno puint?

Spes, su lis cuistions de lenghe furlane, a cjapin la peraule tancj che a tachin disint "Jo no soi un espert, ma..." e jù cuntune predicjone su cemût che si varès di fâ, "parcè che jo o ai simpri fevelât par furlan..." e vie indevant cuasi che pe politiche linguistiche al sedi suficient jessi nassût intun puest o ta chel altri, trascurant dal dut che forsit (ma o gjavarès il "forsit") al è necessari ancje par chest argoment vê une formazion sientifiche, esperience, mistîr e vie indevant. Cence nuie gjavâ al fevelâ de int, stant che ducj i vocabolaris a son la codificazion di une lenghe che in principi e je prime fevelade e dopo scrite. Ma cheste "codificazion" e à dibisugne di criteris che a nassin dal studi.
Un dai ultins in ordin timp, ma che dal sigûr nol sarà l'ultin, al è stât Gianfranco Ellero sul Gazzettino di chê altre dì. Ellero al tache scrivint "Non sono un linguista e un vocabolarista, ma credo di aver titolo per intervenire nel dibattito sul Grande Dizionario Digitale perché fui il lettore di terzo livello per il Vocabolario di Maria Tore Barbina. La compilatrice, infatti, volle che, in bozze, il suo lavoro fosse criticamente analizzato da monsignor Aldo Moretti, tarcentino, e poi, nella veste di giudice semantico e di "appello", dallo scrivente, parlante dalla nascita il friulano di Fraforeano". (Tai coments dut l'articul di Ellero o fracant chi).
Forsit il prof Ellero nol à let chest document (fracant chi), di fat al dîs che dal vocabolari nol sa tant: lis varietâts a son za previodudis e inseridis in part, parcè che il lavôr al è lunc. Chest al podarès jessi plui svelt se si permetès a plui int di lavorâi parsore: ma, come che al dîs Ellero, chest al coste e se lui al sa cemût tirâ fûr plui bêçs, jo dal sigûr lu ringraziarès di cûr.
Però cumò o provi a fâ ancje un paragon: jo no soi espert ni di ciments ni di costruzions. Ma stant che di cuant che o soi nassût o cjapi la autostrade di Glemone a Damâr par lâ a Tumieç, e ogni volte o fâs il puint che al passe parsore dal lât di Cjavaç... alore cumò o pensi di vê il titul par metimi a fâ i calcui e resonâ su ce maniere che si à di fâ une opare stradâl di chê fate. Chi in bande il risultât: cui vuelial passâ?
A part lis batudis, us torni a segnalâ il document su la lessicografie che al rispuint a tancj altris "dubis ancestrâi" di Ellero che se al ves vût un tic di plui atenzion al varès podût leilu prime di scrivi tantis imprecisions e fâ une brute malinformazion.

07 luglio 2009

Rosario in Argjentine

Vuê o saludi "El lobo" dal circul Alef di Rosario che mi veve domandât un articulut sul Udin: ur al ai mandât e lui lu à metût sul lôr blog, fracant chi "Un struc di Udin".
E la Rêt dai Furlans ator pal mont si slargje simpri di plui.

Mandi a ducj, mandi lobo!

Ps: un grazie ancje ai Fantats furlans, parcè che la foto e je lôr.

06 luglio 2009

A proposit di Vin: la propueste Keber

O ai savût che te cuistion Tocai, si è zontade une gnove pontade: Edi Keber - che ancje chest an al à vinçût tant che miôr produtôr dal cuei - al rinuncjarà a batiâ "friulano" il so tocai vint miôr di clamâlu "collio".
A parê dal gno informadôr, che o ringrazii, cheste e je "une prime crepe plene di (bon)sens".
E jo no rivi a dâi tuart.
Lait a viodi la schede dal vin, fracant chi.

05 luglio 2009

La cjacarade dal Mestri

O scuen ameti di jessi un so tifôs: Dree Valcic (te foto), colaboradôr de Patrie dal Friûl, ma prime gjornalist dal Gazzettino al è une des vôs che o lei di gust. E la sô "Cjacarade", rubriche fisse sul cuotidian, e je simpri buine par un spont, par une riflession. E cheste che us segnali e us ripuarti tal prin coment, e je stade par me terapeutiche parcè che mi à fat passâ la incazadure pe delusion che o vevi vût leint un intervent dal ass. De Anna di cualchi zornade indaûr. Ancje jo o ai simpri vude simpatie (che e continue ancje vuê) pal ex president de Provincie di Pordenon ancje parcè che o cjati pardabon gustôs sedi pal so caratar sedi pe sô fevelade in Folp di Cordenons. Però ai lei ce che al jere scrit sul gjornâl di cualchi zornade indaûr mi veve deludût chê cjapade di posizion (us met ancje chê tai coments). Par furtune che il Mestri Valcic mi à fat cjalâ il fat sot di une altre lûs. E a la fin mi à fat fâ ancje une ridade!

04 luglio 2009

Il prin libri di Andrea Monaco

Us segnali la cuviertine dal prin libri di Andrea Monaco.
Jo inmò no ai rivât a leilu ancje parcè che al è a pene jessût in librarie.
Isal cualchidun che al è za in stât di fâ une recension?

03 luglio 2009

Par continuâ a cjaminâ

Ve chi il video che al fâs un piçul struc de cjaminade di domenie passade, di Vençon a Sant Tomâs.
E je une testemoneance significative ancje se, pûr plasintmi ancje a mi i Abba, personalmentri o varès sielte une altre colone sonore: la sinfonie de nature e i moments che si à stâts cidins in scolte dome dai nestris pas no son paragonabii a nissune altre musiche.

02 luglio 2009

Bruno Pizzul par furlan

Mi soi butât sul gjornalisim sportîf... E cussì mi soi cjatât invidât di Gianluca Bertozzi a Mondo Bianconero, la trasmission web de Associazion dai Udin Club.
O ai vût tant plasê ancje parcè che ospit telefonic al jere il mitic Bruno Pizzul. Cuant che al è stât il moment des domandis i ai domandât ancje jo une robe, ven a stâi, parcè che secont lui l'Udin al fevele tant di marcjât, ma no si fevele mai cu la stesse fuarce di fâ cressi i zovins, pescjant tes societâts regjonâl, in maniere di vê plui furlans tal Udin e magari ancje vê cualchi zovament ancje sul belanç societari.
Bruno mi à rispuindût ancje par furlan disintmi che il setôr dai zovins al è ruvinât des "scuelis di balon" li che si da un tai masse "professionistic" e si piert la dimension dal zûc... risultât? I fruts si stufin e a molin: chest al è un probleme no dome dal Udin.
Po dopo e je intervignude ancje Marina Presello che e à continuât a fevelâ cun Pizzul par furlan e a chel pont no lu à plui tignût nissun, continuant la interviste dute in lenghe furlane!
Un grazie a Gianluca e a la Associazion dai Club dal Udin pe biele esperience che o speri che e podedi disvilupâsi tal timp.

01 luglio 2009

Cjaminâ

Vêso mai stât di Vençon a Sant Tomâs? Sì, a son sù par jù 20 km che par solit si fasin in 20/25 minûts a seconde di trop che tu coris cu la machine e dal trafic che tu cjatis par strade. E a la fin ce ti restial? I semafars tra Glemone e Osôf? Il passaç de ferovie o la zone industriâl di Riul? La dople curve di Cumierç?
Ma fâju a pît (e passant par Glemone e pe campagne dongje dal Tiliment a deventin in dut cuasi 35km) al è dut un altri gust. Provâ par crodi. Come che o vin fat jo e Venusia cun altris 70 di lôr partint a 6 di buinore di li dal Domo di Vençon e rivant a Sant Tomâs li de gleseute di Sant Zuan tor 6 di sere.
No je stade dome une esperience di fadie, ma une maniere par tornâ a cjatâ i timps naturâi dal moviment, gjoldint dal paisaç, dai profums, dai colôrs. Une esperience di riscuvierte interiôr su lis olmis di chei che par secui si son spostâts a pît... cui par necessitât, cui par fede, cui par motîfs difarents.
Al pues someâ fûr dai timps, ma e je une esperience che o consei parcè che il viaç plui interessant tal cjaminâ a pît al è chel dentri di se.
Un grazie a Marino e Marco par vê rindût pussibil chest.


Visualizzazione ingrandita della mappa