31 maggio 2009

Serade a Leggermente

O soi a pene tornât cjase di Leggermente, li che o ai stât a lei un tocut di "De senectute" di pre Toni.
Une biele serade, che e à viodût tante int a partecipâ, sedi leint sul palc sedi dome a scoltâ sentâts in sale.
Tra i tancj a jerin ancje la Ninine, il Brâf furlan e Flavia.
O amet che o jeri emozionât, ma cuant che o ai tacât a lei, la pôre si è sfantade.
Un grazie e compliments a Paolo Patui pe biele iniziative.

30 maggio 2009

26 maggio 2009

Setemane enigmistiche costituzionâl

Tant par mostrâ il nivel di analisi de Cort Costituzionâl te sentence n.159/2009 su la L.R.29/2007 pe tutele de lenghe furlane, us propon chest concors a premis che o cjatais tal prin coment...

Ps: un grazie al gno "ghost consulent" che mi à judât te redazion dal quiz.

25 maggio 2009

24 maggio 2009

La bussade des crôs a Zui

Come tal 2008, ancje chest an te dì de Sense o ai stât sul plan de Vincule a la bussade des crôs. E chest an o ai puartât ancje Ninine parsore Zui.
Chi une volte e jere la sede dal Vescul e chest rituâl al vûl ricuardâ il leam/dipendence tra la plêf di Sant Pieri e dutis chês altris plêfs de Cjargne.
Une cerimonie pardabon sugjestive, cussì biele e profonde che tu rivis ancje a perdonâ cui che tal mieç di tante int al continue a peteçâ e a contâsi chê dal ors, dismenteantsi di jessi prin di dut a messe e no intune sagre.

23 maggio 2009

La sentence de cort costituzionâl

Come che o vês forsit za savût, la cort costituzionâl e à dât la sentence a proposit de leç regjonâl 29/07 pe tutele de lenghe furlane.
O ai inmò di lei ducj i documents, ma mi limiti a comentâ cheste notizie cun la imagjin che al à proponût Luca.
Ma o tornarai sul argoment.

21 maggio 2009

Il gnûf sît di Radio Onde Furlane

Radio Onde Furlane e à screât il so gnûf sît Internet: provait a fracâ chest link http://www.ondefurlane.eu par viodilu! e buine scolte sui 90.00 mhz o in streaming!
O aprofiti par fâi i auguris di bon lavôr a Pauli Cantarut, gnûf president de cooperative "Informazion furlane".

20 maggio 2009

Mandi Lelo Cjanton

Al è mancjât Lelo Cjanton, poete fondadôr dal grup "Risultive" (te foto, il grup tai agns 50: si pues ricognossi ancje pre Josef Marchet, il tierç di çampe a drete e dongje Lelo Cjanton).
Di simpri leât a la Filologjiche, al jere stât ancje diretôr dal setemanâl “Patrie dal Friûl” dal 48 al 53.
Chi sot o ripuarti une poesie che al veve scrit in ricuart di Chino Ermacora.

Chino di Sante Eufemie
Tor di Tarcint, sui cuei, tal mês di Avrîl,
si gjolt il blanc dai cjariesâr flurîts,
si sint il fresc dal cîl.
Biel il soreli gnûf,
e Sante Eufemie, biele, cui voi clârs
e cjale il Paradîs.
Ca sù la sô gleseute!
Co e sune la sô svelte campanele,
si jentre a scoltâ Messe,
e po dute la int
si ingrume li di fûr
che e je une piere cuntun non sculpît;
si dîs une preiere,
ma li no son vues di un sapulît,
li al è il ricuart di un cûr
che nol è muart, che al vûl
restâ daviert a vivi
par dâ inmò al Friûl, tun gnûf lusôr,
cul blanc dai cjariesârs un cjant di amôr.
Lelo Cjanton

18 maggio 2009

O ai cognossût Toni Capuozzo di persone

Lu ringrazii parcè che cognossilu e je stade une robe tant impensade e tant biele: o ai vût l'onôr di cjatâmi a cuatri voi cun Toni Capuozzo (te foto), innomenât gjornalist Mediaset, simpri une vore braurôs dal so leam cul Friûl.
Il dut al è sucedût li de ostarie "Da Pozzo", in plaçâl Cella, li che si vevin dât apontament par une sabide a buinore. O ai provât a domandâi se nus podave regalâ a noaltris da "La Patrie dal Friûl" l'editoriâl dal mês di Mai, numar dedicât al taramot: e nus à dit di sì confermantnus di jessi un nestri letôr!
“La fuarce e la fragjilitât”, cussì il titul dal editoriâl (fracait chi par leilu in anteprime), e je une riflession sul taramot, chel furlan dal 1976 e chel abrucês dai 6 di Avrîl di chest an. Tes peraulis di Capuozzo si cjatin tancj ricuarts di chel 6 di Mai in Friûl che al à segnade la storie de nestre tiere.
Inmò grazie di cûr a Toni Capuozzo!

17 maggio 2009

Cjaminant viers Sant Tomâs

Intune des ultimis comissions culture e je nassude la idee di fâ un program di ativitâts par fâ cognossi la realtât dai Ospidâi, o ospizis, medievâi come chel di Sant Tomâs.
Tra conferencis, cunvignis e iniziativis par cognossi il teritori, us segnali che ai 28 di Jugn, di domenie, e je organizade une cjaminade di Vençon a Sant Tomâs dilunc un troi sul Tiliment: si partirà de place de biele citadine medievâl a 6 di buinore, par rivâ dopo 8 oris a Sant Tomâs.
Ve ca il volantin cul program complet: fracait chest link.


16 maggio 2009

Cunvigne di toponomastiche in Branc

Vuê e je la cunvigne di Toponomastiche locâl (fracait su la imagjin par viodi la locandine), inmaneade dal Comun di Tavagnà adun cu la Societât Filologjiche Furlane e la Societât Furlane di Archeologjie e rivât cumò ae setime edizion. Aes 3 di dopomisdì in Branc tal centri civic, intitulade: “Toponomastiche e archeologjie: dâts e confronts”. Lis voris a saran coordenadis de Ninine archeofurlane.
I relatôrs e lis relazions a saran: Valter Zucchiatti: “Indizis toponomastics su la strade Cuncuardie - Ad Silanos”; Benvenuto Castellarin: “Sorevivincis langobardis te toponomastiche dal Friûl”; Giovanni Filippo Rosset: “Lis necropolis de culture paleoslave di Kottlach in Friûl tra archeologje e toponomastiche”; Franco Finco: “Considerazions su cualchi non di lûc dal Friûl” e Paola Barbierato: “La toponomastiche tant che lidrîs di cognossince pes ricercjis storichis e archeologjichis”.
Il calendari dai apontaments al è une vore siôr, cun mostris, presentazions di libris, di sîts internet, di ricercjis e cu la cunvigne stesse. Par viodi ducj i apontaments, si pues lâ sul sît dal comun di Tavagnà.

14 maggio 2009

Elezions ae Somsi

La societât operarie di Maian e à confermât il President Roberto Miani che i fâs i auguris di bon lavôr.
O aprofiti par segnalâ che al è ancje tacât il cineforum e che dopo de prime proiezion cun "Gli Ultimi", a la fin dal mês si podarà viodi "Rumore Bianco".

12 maggio 2009

Un gnûf libri di Sandri

Jo il furlan lu ai imparât dai miei nonos e nissun al à di vignî a insegnâmi di difûr a scrivi...
Cheste magari cussì no, e je une frase di tancj che a tachin i discors a pro dal furlan (secont lôr...) e cuintri lis regulis de lenghe scrite.
Po ben, ancje jo il furlan lu ai imparât di chei di cjase (nonos, mame, papà...), ma par colpe de scuele taliane no ai vude la pussibilitât di imparâ a lei e a scrivi la mê lenghe cuant che o jeri frut e dopo fantat. Tancj inmò vuê si scandalizin se si fevele di insegnâ il furlan a scuele, ma a mi mi àn obleât a imparâ il talian, che no jere la mê lenghe cence domandâ se la mê famee o jo o fossin dacuardi sui programs, sui timps, sui contignûts: si lu à fat e vonde... No doi judizis, ma o ripuarti i fats.
O ai scugnût spietâ di vê cuasi 30 agns par fâ i prins cors di furlan, la mê lenghe: la prime volte o ai stât a scuele di Linda Picco e subit dopo di Sandri Carrozzo, che o ringrazii. O ai imparât a scrivi la lenghe standard, cognossint la grafie uficiâl, cence dismenteâ la mê varietât che si fevele a Farle, e in buine part dal Friûl centrâl, anzit. Propit grazie a chestis lezions o ai cognossût dute la ricjece des varietâts dal Friûl, robe che prime no savevi che a fossin cussì tantis.
E Sabide ai 16 di Mai, Sandri al presente il so ultin libri che al insegne a scrivi "cors di grafie furlane", li de librarie Friuli a Udin.
O invidi ducj voaltris a lâ a la presentazion no dome par cognossi il libri, e magari ancje comprâlu, ma ancje par cognossi Sandri che al è simpri une vore brâf.

09 maggio 2009

Sul Corriere

Us segnali chest articul dal Corriere della Sera li che si fevele di un grup di zovins che a rapresentaran sot de insegne de Universitât dal Friûl, la Italie al Imagine Cup, une competizion informatiche: fracait chi.
Jo lu segnali parcè che tra chei zovins al è ancje Marco Amato di Maian che spes mi à dât conseis tecnics di nature informatiche.
La scuadre (te foto) si clame «Pata-Track» e cun Marco Amato a son ancje Elisa Buttussi, Alessandro Verona e Ivano Zanello: ducj insiemit a àn vinçût la categorie «software design», che tra dutis e je la plui impuartante dal premi.
Tancj compliments e un grant "in bocje al lôf" pe finâl che si tignarà in Egjit.

07 maggio 2009

La vôs di pre Checo Placerean

Îr o ai stât a Palaç Belgrât, sede de Provincie di Udin, a viodi la presentazion dal gnûf sît dal Istitût ladin furlan "pre Checo Placerean".
Al è propit un biel sît e in particolâr a mi mi à plasût il fat che e je stade metude adun une sezion dute dedicade al grant predi furlanist: e je une vore di robe di lei, fracait chest link!
Ma o ai ancje vût un regâl: mi è stât consegnât il file audio di une predicje di pre Checo fate a Aquilee ai 11 di Lui dal 1976 a pôcs mês dal taramot.
Un grazie di cûr al Istitût Ladin Furlan "pre Checo Placerean" par vêmi dât l'onôr di podê condividi cun ducj voaltris chest impuartant document.
O podês scoltâlu fracant chi o viodint il filmât chi sot.

03 maggio 2009

In ocasion dal aniversari dal Taramot dai 6 di Mai

Miercus ai 6 di Mai dal 2009 a lis 17.30 a Udin li de Sale Consiliâr de Provincie di Udin a Palaç Belgrât in place dal Patriarcjât, l’Istitût Ladin Furlan “Pre Checo Placerean” al presentarà la gnove version dal sît internet de associazion www.istitutladinfurlan.it. Al event a intervignaran Pietro Fontanini, President de Provincie di Udin, William Cisilino, President dal Istitût Ladin Furlan, Lorenzo Zanon, President de ARLeF e Arnaldo Baracetti, dal Comitât pe autonomie dal Friûl. Il sît al ufrìs cuntune vieste grafiche cetant atrative une vore di informazions su lis ativitâts davueltis de associazion. Cun di plui al cjape dentri un archivi informatic dedicât a la vite e a la opare di Pre Checo Placerean (te foto) che al sarà screât intant de presentazion.
Te sere invezit a Maian a 7 e mieze di sere, partint di li dal monument di vie Rome, e sarà une cerimonie par ricuardâ lis tantis vitimis che a son stadis in chê sere: il gno paîs al à vût un numar di muarts une vore alt, secont dome a chel di Glemone. Fracait chi par discjamâ la locandine dal event.