Gnogno apontaments

Ve chi un avîs che mi rive dal comun di Sedean

I Gnognosaurs in mostre: lis taulis origjinâls, i libris, i Gnognoboi, “fasiti la foto cui Gnognosaurs”, disegne i Gnognos e tant altri...
A San Lurinç di Sedean Cjase Uarnèl (vie Çorut, 1)

Inaugurazion: domenie ai 28 di Novembar aes 17.00

A saran presints l'autôr Andrea “Dree” Venier e la senegjadore Elisabetta PittanaVierzidure: vinars e sabide des 9.30 aes 12.30 fin ai 31 di Dicembar

In plui o ricuardìn ancje lis dôs presentazions dal libri "I Gnognosaurs 2"

Il gnûf libri dai dinosauruts plui simpatics dal mont

Vinars ai 26 di Novembar aes 18

li de Osterie Al Buso, Vie Simoni 8 a Spilimberc

A saran presints l'autôr Andrea “Dree” Venier e la senegjadore Elisabetta Pittana presentâts dal editôr Orazio Cantiello

Sabide ai 27 di Novembar aes 18

li de librerie Friuli, vie Rizzani 1/3 a Udin

A saran presints l'autôr Andrea “Dree” Venier, la senegjadore Elisabetta Pittana e William Cisilino responsabil P.O. Lenghis minoritariis de Regjon F-VJ

Un cuc indaûr

Ve ca une biele serade a Sedean sul teme de storie de nestre tiere: apontament joibe ai 8 di Avrîl aes 20.45 par un viaç storic pardabon interessant cun Venusia Dominici, Massimo Garlatti-Costa e Carli Pup.

Di Jerusalem a Sant Tomâs

Ve ca la locandine dal incuintri di miercus ai 10 di Març che si fasarà a Sant Tomâs. Une biele ocasion par viodi puescj lontans. Par lei miôr, fracait su la foto.
Ducj invidâts!

Elio a la Bit

Vuê o ai tornât a viodi Elio, un coleghe de Filologjiche che mi à dit di vê stât a la Bit. Mi à proponût di contâ chi ce che al veve viodût a Milan e vulintîr us propon ce che mi à mandât: lait a viodi tai coments...

Presentazion de Patrie a Ruvigne

Un grup di amîs de lenghe furlane di Ruvigne al presente il gnûf numar de riviste mensîl par furlan "La Patrie dal Friûl", che e sarà distribuide a gratis al public. Ta chest prin numar dal 2010, in cuviertine Giannola Nonino, intervistade di Dree Venier. Ma ancje tante atualitât e aprofondiments simpri cuntun voli furlanist, "par un Friûl plui furlan".
L'apontament al è par joibe ai 25 di Fevrâr a lis 20.00 li dal Museu di Ruvigne in Vile
A intervignaran:
Gianni Pascoli, presentadôr de serade a non dal grup dai amîs de lenghe furlane
Dree Valcic, diretôr da "La Patrie dal Friûl"
Pre Tonin Cjapielâr, Dino Temil, Dree Venier e Christian Romanini, de redazion da "La Patrie dal Friûl"
Angelo Floramo, moderadôr de serade.

Par lei cualchi articul za publicât sul sît de Patrie, fracait chi.

Si torne a cjaminâ

Dopo de biele esperience di Jugn dal an passât, ve ca une altre ocasion par tornâ a cjaminâ.

Fracait la foto par lei miôr il program de presentazion di doman di sere.

Tal segn di Gjone, a Aquilee

Us segnali chest apontament di usgnot te rassegne In File 2010 ai Colonos di Vilecjace di Listize.
Tal segn di Gjone a Aquilee al fevelarà de ricjece pluralistiche de antighe glesie di Aquilee.
La serade e sarà introdusude di Angelo Vianello, president de associazion culturâl Gilberto Pressacco e intervents a saran di Remo Cacitti e Angelo Floramo.
Si tache aes 20.30 e par viodi dut il program, fracait chi.

Sipari furlan

Tal teatri Giovanni da Udine e jentre la lenghe furlane: Sipari Furlan al propon Lenghe furlane: microstorie di un repertori, lezions spetacul par cure di e conduzudis di Angela Felice e Paolo Patui (te foto).

Cjacaris, citazions, leturis, visions, scoltis e une taule taronde dedicâts a la storie dal repertori in lenghe furlane (cun cualchi ecezion). Ducj i apontaments a son a jentrade libare ritirant il segnepuest.

Par viodi dut il program, fracait chi.

Ps: Biele iniziative dal Teatron, ma cuant che o ai let la parentesi "repertori in lenghe furlane (cun cualchi ecezion)" mi soi domandât se ancje tal repertori in lenghe taliane e je previodude "cualchi ecezion" par furlan... nol sarès mâl, no?

Contis curtis tal vagon

Il Sportel pe Lenghe Furlane dal Comun di Remanzâs, in colaborazion cu la Ostarie Leterarie “Contecurte” e inte suaze dal program invernâl inmaneât dal Assessorât pe Culture, a presentin joibe ai 14 di Zenâr dal 2010
aes 20.45 il secont apontament de rassegne CONTIS CURTIS TAL VAGON.
Si trate di un cicli di cuatri apontaments – la seconde joibe di ogni mês, fin al mês di Març – dedicâts ae leture par furlan intune curnîs pardabon sugjestive: il vagon di tren dal Laboratorio di Sant Urbano, in vie della Stazione, 42 a Remanzâs.
Un vagon dal 1920, di fature ceche e restaurât di pôc, al da ospitalitât ae Ostarie leterarie di Contecurte che, di virtuâl e devente finalmentri reâl in compagnie di ostîrs e camarîrs, stuzighets e lis contis curtis dai aventôrs.
Contecurte al è un blog (http://contecurte.splinder.com), une Ostarie Leterarie virtuâl li che, propit come intune ostarie reâl, si dan dongje i clients plui varis, ognidun cuntune sêt diferente e ognidun pront a contâ la sô storie e a condividi i siei pinsîrs cun chei altris aventôrs.
Lis seradis a àn un teme diviers daûr dal gjenar des contis. Dopo lis Contis par spaventâsi dal mês di Dicembar, chestis lis datis a vignî:
Joibe ai 14 di Zenâr aes 20.45 _ Contis par maraveâsi
Joibe ai 11 di Fevrâr aes 20.45 _ Contis par divertîsi
Joibe ai 11 di Març aes 20.45 _ Contis par rifleti
Dal moment che il spazi tal vagon al è pôc, si consee di prenotâ il puest li de Biblioteche “G. Missio”
tel. 0432 668750.

Glesie Furlane a Friuli Doc

Obietîf di Glesie furlane (www.glesiefurlane.org) al è chel di cognossi, studiâ, promovi, valorizâ cun ricercjis, publicazions, incuintris dut ce che al rivuarde la dimension religjose te culture furlane cirint tant traviers lis fonts storichis che la realtât contemporanie. Propit par cheste azion che e à chê di puartâ a une dimension plui umane e incjarnade la opare di evanzelizazion, la associazion e à cjapât cun plasê la pussibilitât di partecipâ a la prossime edizion di Friuli Doc (dai 17 ai 20 di Setembar 2009). Une ocasion nassude grazie al intervent de Provincie di Udin, in particolâr par mert dal President Pietro Fontanini e dal Assessôr al Turisim Franco Mattiussi, e cu la colaborazion de associazion “Strada del Vino” di Aquilee.
Tal spazi dedicât si podaran cjatâ i libris editâts di chest grup di cristians e furlans che a cirin di lâ a font des lôr lidrîs culturâls e religjosis, par podê conciliâ in maniere armoniche la proprie fede cu la proprie identitât culturâl. Vuê si fevelarès di "inculturazion de fede" o di "vanzelizazion de culture". Il grup, nassût viers i agns '70, sul sburt dal Concili Vatican II (1962-1965), dai prins pas de Teologjie de liberazion e tal contest politic-culturâl de cussience autonomistiche furlane, al à come figure carismatiche iniziâl il professôr pre Checo Placerean (1920-1986).
L’apontament al è duncje di joibe ai 17 fin domenie ai 20 di Setembar sot dal tendon di place Venerio, daûr de glesie di Sant Francesc, dulà che i visitadôrs a podaran cjatâ ancje i libris di pre Antoni Beline (1941-2007), ma no dome, domandant informazions e podint cognossi miôr cheste associazion che e cjale al avignî dal Friûl di vuê cence dismenteâ il patrimoni inestimabil che al ven da la tradizion dal Patriarcjât di Aquilee.

Ce nervôs!!!

Maledete la ore che lu ai viodût!!! E cumò o scomet che plui di cualchidun al va a tirâ fûr dal scansel il so "Rubik cube"!

Fieste dal Faf

Ancje in vacance si à un pinsîr pai amîs e duncje ve ca la segnalazion di vuê.
Une des robis di no pierdi par cheste fin di Istât e je la Faf.ieste, la fieste dai Fantats furlans a Feletis.
Fracait ca par savênt di plui.

INZORNAMENT SUI ORARIS: stant che e mancjave la ore de fieste, fracait chi par viodi ducj i oraris.

Polse

O ai decidût di fâ un tic di vacance. Ma no stait a vê pôre... no soi tant distant!
Mandiiiiiiii =)

Alè Udin

Al tache il campionât e a mi no mi reste che berghelâ:
Alè Udin!
Un mandi a ducj i amîs de Auc e in particolâr a Gianluca!
Fuarce Udin!!!

Ps: Cualchi zornade indaûr e je stade fate la presentazion dal Udin in place domo: par savênt di plui, fracait chi.

Zelig a Maian

Miercus al rive a Maian Punto Zelig, il spetacul comic che al à vût tant sucès par television.
A chest proposit us segnali che in Pro Majano a son inmò a disposizion i biliets: fracait chi par viodi.
O zonti ancje une biele iniziative che o ai sintût su Radio Spazio 103, che e met a disposizion 2 biliets... cemût fâ par vinciju?
Doman, martars ai 4 di Avost, o vês di sintonizâsi su lis frecuencis di Radio Spazio 103 des 9 fin 11 di buinore pe trasmission "Cafè 103 estate": cuant che a daran il "VIE" o varês di clamâ il 0432.512661. I plui svelts si puartaran a cjase 2 biliets par om.

Lignan

Al sarà stât parcè che e jere la prime domenie di Avost, al sarà stât parcè che al jere un soreli che al disfave ancje il savalon, al sarà stât parcè che il mâr al jere un figade, ma vuê a Lignan al jere plen di int.
E ancje jo mi soi butât tal mieç des ondis che a increspavin la aghe: masse biel!

Vuê o polsi

Il Festival al sta par tacâ

Come ogni an, cu la fin di Lui al tache il Festival di Maian.
La Pro Loco di Maian e à lavorât une vore ancje chest an e chi podês lei dut il program 2009.
E sul gjornâl di vuê si pues lei ancje une letare che o cjatais ancje tai coments.

La Patrie di Lui

La Patrie di Lui e je rivade par pueste. Ta chest numar o vin fevelât de situazion de tutele linguistiche frontant diviers aprofondiments: la sentence de cort costituzionâl, i tais de leç 482, lis polemichis e vie indevant.
Jo e il Dree o vin firmât un "editorialut in pirulis" che al comente propit chestis ultimis polemichis: lait a leilu chi, sul Sît de Patrie.
Us visi che vuê aes 6 di sere us spietìn ducj a Aquilee li che Glesie Furlane e celebre la messe dai Sants Ermacure e Fortunât e al vignarà ancje let un comunicât in mert a lis stessis polemichis che o disevi chi parsore.

Fieste dai Scampanotadôrs

Domenie ai 26 us consei di lâ a Zui, su la plêf di Sant Pieri pe fieste dai Scampanotadôrs Furlan.
L'apontament al è a buinore pe visite vuidade a la Polse di Cougnes e po dopo lis iniziativis a continuin cu la messe e la fieste par dute la zornade.
Un grazie a Michele di Maian che mi à fat cognossi cheste biele realtât furlane (fracait chi par lâ tal lôr sît internet)!