La Balconete. Un slambri di critiche teatrâl

di Elio Varutti
Di Nadâl, une cene plurilengâl
Tal Gnûf Teatri "Giovanni da Udine" di Udin ai 10 di Avrîl dal 2008, opare di Paolo Patui

Chest spetacul lu àn za viodût a Sant Denêl, Dartigne, Pontebe, Sant Vît dal Tiliment, Çarvignan, Cormons e Udin. Fat dal Centri Servizis e Spetacui Teatri stabil di inovazion dal Friûl Vignesie Julie "La lungje cene di Nadâl" e sta dentri chest pinsîr dal autôr: "Mi soi doprât sul teme de lenghe furlane tal teatri". Al à dit cussì Paolo Patui su chest test produsût intal an passât, fevelant cul regjist Gigi Dall’Aglio. Patui al à voltât e adatât in marilenghe "The Long Christmas Dinner", opare dal dramaturc american Thornton Wilder. La comedie, dal 1931, e veve vût une gruesse fortune intai teatris americans.
Il lavôr di Patui al è sul Nûfcent in Friûl, lant daûr ae vite di une famee di un paisut dongje Cividât. Lui di robis di teatri si intint. Nassût tal 1957, Patui si è laureât in Letaris modernis a Triest, cuntune tesi di Storie dal teatri, dute pontade su la figure dal autôr cjargnel Luigi Candoni, publicade tal 1987. Al à tacât a cjapâ premi di teatri tal 1979. Daspò al à lavorât pe Biennâl di Vignesie e pe RAI cun Elio Bartolini, par rivâ tal 2000 a scrivi "Bigatis: storie di donne friulane in filanda".
Cussì e je saltade fûr la idee di cheste "Lungje cene di Nadâl", un spetacul pulît, che al dure pôc di plui di une ore e mieçe. Il lavôr al è stât metût adun dal Centri Servizis e Spetacui Teatri Stabil di Inovazion dal Friûl Vignesie Julie. La sene e tache cu la famee che si tire dongje pe cene di Nadâl tal 1918. Lis lenghis feveladis tal palc a son il furlan, il sloven des Valadis dal Nadison (dome cualchi peraule, cualchi mût di dî), il talian e il dialet venit dai udinês. Il contest al è chel plurilengâl e plen di morbin. Come che al è scrit intai ats dal Consei de Europe dal 2000, la tindince plurilengâl e met l’acent su la integrazion di plui ocasions. Za il lengaç di cheste cjase al è un miscliç di sloven, di furlan e di talian. Daspò i atôrs a àn di meti ordin in chestis esperiencis linguistichis in maniere oblicue, prontant une competence comunicative cul public. Al sarès di fâlu viodi a scuele, tant che al è biel e impuartant pe storie.
Barbe Romeu (un madressût Fabiano Fantini) che al è stât emigrant in Americhe, al fevele furlan, cun cualchi peraule par inglês, come che e capite di sintî intai Fogolârs furlans de Americhe, dal Canadà o de Australie. La sô e je une figure ancestrâl. Si pues cjatale in ogni famee.
Dopo de cene ae fin de Vuere Grande, si passe al taramot dal 1928 e ancje par chel dal 1976, cence dismenteâsi dal fassisim, de vuere partigjane, cu la copadice di Purçus. Daspò e ven il timp de Ricostruzion, cul "Piano Marshall" e i soldâts americans che e puartavin lis "ciunghis". A son jenfri dal at unic ancje lis lotis pe autonomie furlane, pe universitât dal Friûl, ma ancje i sassinaments dai carabinîrs di Petean e dal maressiâl des prisons Santoro, copât dai teroriscj a Udin tal 1978.
Dut al è ben struturât. E i batimans a vegnin fûr a sene vierte, oltri che ae fin dal spetacul. A vegnin ben ancje lis imagjinis registradis di Cjaurêt, dal Orcolat e des cenis za fatis di cheste famee che e si clame Scarbolo, che a passin tal mûr de cjase. Po dopo la regjie e je chê dal mestri Gigi Dall’Aglio, un om di culture di Parme, che al à lavorât vie pe Italie e ancje tal forest, par inglês, par francês. Al è za stât regjist di "Bigatis" e al à fat spetacui in finlandês, in lenghe arabe classiche e par "parsi", fevelât tal Iran.
La schirie di atôrs (un plui brâf di chel altri) che a lavorin tal palc e cjape dentri Maria Ariis, Andrea Collavino, Sandra Cosatto, Stefania Del Bianco, Fabiano Fantini, Guido Feruglio, Rita Maffei, Riccardo Maranzana, Roberto Sferzi e Adriana Vasques, che e sune ancje il piano dal vîf, su composizions fatis a pueste dal mestri Davide Pitis.
Ancje lis vistiduris e lis senis a àn la lôr impuartance tal spetacul e a son opare di Emanuela Dall’Aglio. I zûcs des lûs a son di Alberto Bevilacqua e dute la produzion e je stade metude adun cul jutori dal Ent Regjonâl Teatrâl, de Fondazion Crup e des Provinciis di Udin e di Pordenon.
Pensait che il regjist Gigi Dall’Aglio (un dai plui brâf che o vin in Italie) al è sigûr di dî che Patui al è il plui brâf autôr di teatri di cumò, no dome culì te Patrie, ma di dut il Bielpaîs. Alore Bepi Agostinis, chel che al cjapave sù firmis pal Teatri Stabil dal Friûl, intun dibatit public fat dal Erdisu, te sale de Universitât di Viâl Ongjarie a Udin ai 19 di Març dal 2008, al à dit che i vin bielzà il dramaturc pal teatri stabil dal Friûl. Angela Felice, professore e storiche dal teatri furlan, invezit e à dit di jessi di une impinion contrarie. No si pues meti un oblic di fâ doi o trê spetacui par an, parcè che il teatri nol va ben fat cussì. Cheste e je la sô conclusion. Intant Patui al scrîf.

La Balconete. Un slambri di critiche teatrâl

di Elio Varutti
Gildut, cramâr dal Nûfcent
Ae Sale Comelli di Udin ai 11 di Otubar dal 2007

E je stade presentade a Udin, ai 11 di Otubar dal 2007, inte sale Comelli, la comedie brilant “Gildut”, di Eligio Zanier. La comunitât di Sant Marc, parochie in Chiavris, e à podût gjoldi di cheste gnove opare, scrite dal autôr inte vierte passade. Metude in sene de companie “Il Teatro di Eligio” e conte une storie, dute par furlan, di fan, di miserie e di pôre che e podeve vivi un cualsisei paisut, dopo che e jere passade la Seconde vuere mondiâl. La rapresentazion e je un monolic, che l’atôr Daniele Copetti, di Osôf, al sa puartâ indevant par ducj i cincuante minûts dal spetacul, cu la regjie dal stes Zanier. O sin a Puriessim, dongje Cividât, e Gildut al lave a scuele, intai prins agns dal secul passât. Cussì e scomence la conte dal monolic. Il frut al tribulave cu lis astis e cu la leture. Al meteve dute la anime, ma nol rivave a fâ nuie di bon. La mestre lu veve tal cûr istès. Daspò e ven fûr che Gildut al à une straordenarie capacitât di fâ conts. A voli, i baste dâ une cjalade e ti dîs il numar precîs dai miluçs di un miluçâr e vie indevant. Lui al jere brâf ancje cu lis jerbis curativis e al preparave misturis di dâ a cui che al domandave. Cualchidun in paîs al disè che sô mari e jere une strie. A vivevin intune barache dongje il Nadison. Cuant che Gildut al devente grant lu viodevin dongje la “Mariute”, un grues clap dal flum, che al somee a une femine poiade jù. Al jere restât di bessôl, parcè che la mari e jere muarte. Lui al preparave i medicaments par vuarî la int, come che e faseve sô mari. al jere come un cramâr vuaritôr. Intai agns cincuante e capite une malatie in paîs. Ducj i fruts a deventavin zâi e a pativin come no mai. Si diseve che e je colpe di Gildut, aromai su lis cincuantis primeveris, che al viveve di bessôl te barache. Di sere e si viodeve, dongje la sô cjase, un fûc misteriôs. Alore la int dal paîs e decît di lâ a viodi di chest om. A van su in vot di lôr, ma a scuvierzin che il fûc al è di ca, po di là, cence lassâ cinise. Daspò a saltin fûr i maçarots, oms e feminis piçui piçui, che a stavin dongje di Gildut. Plens di sgrisui pe schene e di pôre i vot oms di Puriessim a tornin in paîs e a contin la storie dai maçarots, cussì a si passin il paniç. Une femine cul fi malât e decît di lâ su dal Gildut, par domandâ di vuarî ducj lis canais. E cussì al fo. Il cramâr bon al vuarìs ducj e la vite e podê continuâ. E je stade une biele esperience di teatri storic, tant cjâr a Zanier, che al à contât altris vicendis dal Friûl dal Nûfcent. Brâf il regjist autôr, che al è stât judât dal fonic Giovanni Salvador.

La Balconete: un slambri di critiche teatrâl

Dopo cualchi timp di polse, e torne a tacâ "La Balconete: un slambri di critiche teatrâl" par cure di Elio Varutti, che o ringrazii pal contribût che mi mande, permetintmi di insiorâ il blog cuntun argoment che jo no cognòs tant.
Ve ca la gnove pontade.

Balera, teatri bal cence peraulis

Al Palamostris di Udin ai 22 di Setembar dal 2007

Nol fevele nissun in cheste rapresentazion. Par dute la ore e mieze di spetacul i vincjecuatri atôrs, oms e feminis, no si disin une peraule che a sedi une. A balin, a saltin, si impegnin intune mimiche esemplâr, ma nuie vôs. Al è dut un balinâ di lôr cu la musiche a dut volum. Un mimic di ca, doi che a berghelin di là – cence vôs, mal racomandi – dome cul la gjestualitât dal cuarp. E cemût che si remenin, al è propri un spetacul! No tu âs timp nancje di cjalâ di une altre bande. I tiei voi a son simpri li, pontâts sul palc, indulà che i balarins e lis balarinis a fasin i lôr numars. Il zûc des lûs e des musichis regjistradis bisugne dî che a son impuartantons, par mostrâ la storie taliane dal Nûfcent viovude intune sale di bal. «Balera» al è il titul dal spetacul metût in sene al Palamostris di Udin ai 22 di Setembar dal 2007.
Lôr si clamin «L’Accademia & Compagnia dei Riuniti». A son un grup amatoriâl di Umbertide, in provincie di Perugje. E tant di cjapiel ae regjie di Achille Rosselletti. Lui al fâs plaits e laments, parcé che tai festivals i dan la colpe di no fâ teatri, par vie che nissun atôr al fevele in sene. Par chel no son mai invidâts e a son simpri metûts in bande. Alore si pues dî che al à fat ben Renzo Lavia, president de Associazion Teatrâl Furlane, a puartâur culì a Udin. Al è il secont spetacul dedicât ai vincj agns di ativitât di cheste associazion. Cemût isal lât? Al è finît cu la int in pîts che e bateve lis mans, par une vore di minûts.
Chest spetacul al podarès jessi doprât ancje a scuele, par displeâ ai fantats la storie de Italie, passant vie pes musichis dal timp. Di cuant che la int e scoltave te radio «Vola colomba bianca», o cui naziscj cun tant di svastiche e Lilì Marlene. Daspò di passe a «Bella ciao» dai partigjans, al «rock and roll» dai soldâts americans, fintremai ai bai dai agns sessante, il twist, lis cjançons di Caterina Caselli e vie discorint. No podeve mancjâ la vite politiche daspò dal sessantevot, lis musichis dai Inti Illimani, di John Travolta, il consumisim e, si finìs, cu lis fantacinis «velinis» te television dai agns otante e novante. Il «secul curt» in musiche e bal, nol è dome un spetacul al sarès un fat didatic.

La Balconete: un slambri di critiche teatrâl

di Elio Varutti

Ce che al è Teatronet
Un circuit dramaturgjic metût adun in Friûl intal 2000. Une sorte di franchising teatrâl. Compagniis di Udin, Feagne, Padue, Trent, Modene, Castrovillari, Reggio Calabria e Messine

Teatronet al è un circuit di teatri nassût in Friûl intal 2006. Precisamentri tal cjâf di Rosi Fasiolo, colaboradore de pagjine dai spetacui de «Il Gazzettino» de redazion di Udin. Cuâi sono i obietîfs di Teatronet? «Cheste organizazion – e dîs Rosi Fasiolo - e je daûr a tirâ dongje e a puartâ di fûr teatri “a cost zero” tal teritori dal stât talian». Ce vuelial dî “a cost zero”? La voie e je che di organizâ e disvilupâ une gnove rêt di sgambis culturâi a nivel talian, «tra spazis e compagniis teatrâls professionistis – e continue Fasiolo - cul fin di fâ zirâ spetacui di buine cualitât artistiche a “cost zero”, vâl a dî che il spetacul ospitât nol à di vê un vuadagn, se no il gustâ e il durmî pai atôrs e pai tecnics di sene».
Cui che al ospite al à di meti a disposizion la struture tecniche e une schirie di servizis, come i imprescj pe lûs, pe scolte, pe publicitât, pai gjornaliscj o pe SIAE, i dirits di scoltâ musiche o di viodi alc di artistic. La compagnie che e ven di fûr e varà di rangjâsi cu lis spesis di traspuart e eventualmentri cu l’ENPALS, vâl a dî cui coscj di previdence sociâl dai atôrs. Al sarà pussibil fâ cualchi incuintri o cualchi laboratori o, parfin, un cors formatîf cui atôrs e cui regjiscj.
Tra i teatrants di esportazions a son doi grups furlans: un al è il “Teatrino del Rifo”, di Tor di Zuin, di Giorgio Monte e l’altri al è un grup di diplomâts de Academie Nico Pepe di Udin, che a àn metût sù “Buonanotte Desdemona” propit par metisi adun cun Teatronet.
Cuâl isal il futûr di Teatronet? «Al è sucedût che al si è formât un biel pôc di moviment intor vie di chest sproc di teatri – e zonte Fasiolo – e jo o speri che al vadi indevant ancjemò par cualchi an, almancul fin che jo o rivi a tirâ il cjaruç».
Un tic di strache e il pinsîr di discoragjâsi a vegnin fûr se, come che al à scrit Gianni Cianchi su «Il Nuovo FVG» dal 23 di Març dal 2007, a son pôcs i spetadôrs a lis replichis di Palaç Pico a Feagne. Ma chei di Teatronet no molin.
Lis compagniis e i diretôrs artistics che a aderissin a Teatronet a son «Sipario!», di Claudio Mezzelani, di Feagne, in provincie di Udin, «Carichi Sospesi», cun Marco Caldiron di Padue, «Teatrincorso», cun Elena Marino, di Trent, «Teatro dei Venti», cun Stefano Tè, di Modena, «Aprustum», cun Casimiro Gatto, di Castrovillari, in provincie di Cosenza, «Spazio Teatro», cun Gaetano Tramontana, di Reggio Calabria e «Teatro dei Naviganti», cun Mariapia Rizzo di Messine.
Ma cemût mai la sale che à di burî fûr il spetacul no à di paiâ la compagnie? «Parcè che e à un preventîf masse piçul – e conte Fasiolo - sedi public, sedi privât, par rivâ a tirâ dongje un cartelon di sest, bisugne tignî di cont che dute la ativitât e dâ une visibilitât plui fuarte, cu la pussibilitât di domandâ plui bêçs ai ents publics o ai privâts che a sponsorizin la art».
Cuâl isal il vantaç pe compagnie che e ven di fûr a “vuadagn zero”? I gnûfs contats, il fat che la viodin ator pe Italie «intun circuit zà prontât pes iniziativis – e displee Fasiolo – e chest compit al è dut pal organizatôr che al va ator pe Italie a sielzi i spetacui, lis salis e i teatris pal circuit Teatronet».
Al somee a un contrat di frachising pai spetacui teatrâi, indulà che il franchisor nol cjape nuie, al lavore ancje lui “a vuadagn zero”. Si pense di plui a la art e di macul ai bêçs. Impuartante e je la rêt di informazions dai grups teatrâi dal circuit. A son regulis e parametris di rispietâ pe buine realizazion dal progjet.
Par sierâ e si trate di un circuit di stât talian prontât cun modalitâts diviersis dal solit teatri, culì e si vûl sburtâ i gnûfs grups che a fasin teatri di inovazion e ancje se i politics a àn taiât i bêçs di dâ, chescj zovins a vulin puartâ indevant la lôr ativitât artistiche, che e si fonde su la cualitât.
Il spirt gjenerâl – e siere Fasiolo - «al è chel di judâ il teatri a no sierâsi intun moment cussì dificil, ancje economicamentri, ma si à di butâsi fûr e cirî di confrontâsi cu lis altris realtâts talianis che a àn la stesse dibisugne».

La Balconete: un slambri di critiche teatrâl

di Elio Varutti

Clò, opare dal Teatri dai Navigants

Al è stât sù par trê dîs, dal 16 al 18 di Març dal 2007, al Teatri SpaziOff di Palaç Pico di Feagne, il spetacul cul titul «Clò». Metût in sene dal Teatri dai Navigants di Messine e ispirât a la opare dramaturgjiche di Samuel Beckett, cheste recite e mostre dute la sô fuarce artistiche. Trê feminis a son in sene, Cristiana Minasi, Stefania Pecora e Mariapia Rizzo, che e à ancje rincurât la dramaturgjie dal test, fondât sul teme de comunicazion umane e su lis robis di mats che nus tocje di vivi. Lis atoris si movin ben su la sene e a mostrin un mût di recitâ che al ti cjape, mert dal regjist Domenico Cucinotta. Ancje i vistîts e lis senografiis, cui pizets, sielzudis di Isabella Attanasio, a àn la lôr impuartance par mostrânus la muse dal teatri.
Lis atoris a somein a un alc di un altri timp. A son trucadis di paiaç, ma ti fasin vignî tal cjâf il teatri vieri, chel de Grecie antighe, indulà che a recitavin cu la mascare. E la int e leve mate pal so teatri. Lis atoris si fevelin cun dificoltât, come te vite moderne, indulà che si rive a berghelâsi, invezit di fevelâ. Dut al è pôc clâr. No si rive a capîsi, se no tornant a dî la stesse robe dite prime. Ogni tant a somein a trê sûrs. Cualchi volte si rive a capî che a àn il stes pari, ma lis maris a son diviersis. La cjase indulà che a vivin e somee a une preson. Si sint la dibisugne di butâsi di fûr. E dut sul palc al à di cjapâ il sens da la vite cuotidiane, intune biele serade di teatri vivude culì, in Friûl.