30 ottobre 2006

Usgnot al è consei comunâl aes 18.30


Si fevelarà di scovacis, ma no saressial plui util puartâlis vie e netâ un tic ce che al è pes stradis?...

29 ottobre 2006

Live in Tresemane: ma dulà isal lât?...

E cumò o voi a taiâ il salam!

O aprofiti par ringraziâ inmò une volte Roberto Ongaro, parcè che cun lui o ai vût il plasê di condividi la "Segnalazion de Jurie" al premi Sant Simon 2006.
Pe cronache, al à vinçût Gianni Gregoricchio che al veve za vinçût il premi altris voltis.
La jurie e jere componude dal prof. Mario Turello (che al scrîf spes ancje pe pagjine culturâl dal Messaggero Veneto), di Pierluigi Cappello (premi Montale Europa 2004), Roberto Jacovissi e Franca Mainardis.

28 ottobre 2006

Radio Maian: biel, ma...

Îr o ai stât a viodi “Radio Maian” in auditorium. La serade mi è plasude, ma alc no mi convinç. Il spetacul al è la riproposizion di trasmissions che il trê atôrs Moretti, Scruzzi e Fantini (secont me simpri bravons) a fasevin par radio.
Federico Rossi al à vude une biele idee a volê riproponi un spetacul radiofonic in forme teatrâl, ma forsit la magjie de radio e je chê che no tu viodi e dome il sintî ti fâs inmagjinâ i personaçs che tu sintis… par chest, ancje se mi soi fat cualchi biele ridade, o dîs che no mi à convint al 100%: jo o scolti une vore di radio e ancje lis trasmissions che Radio Onde Furlane e fâs (comprindudis chês fatis dal Teatro Incerto) a son pardabon di cualitât, ma forsit îr di sere e je mancjade chê magjie de Radio…
O ai tornât a scoltâ la regjistrazion e par Radio al fâs dut un altri efiet, confermant che il mieç radiofonic al à dute une altre fuarce… forsit ancje parcè che il public nol à partecipât come che il Teatro Incerto al mertave.
Fevelant di altri: us spieti a Codroip cheste sere aes 20.00.

27 ottobre 2006

Premi Leterari Sant Simon di Codroip

Jo e Roberto Ongaro (chi in bande la cuviertine di un so libri) o vin partecipât insieme al Premi Sant Simon 2006. La edizion di chest an, la numar 27, e veve come teme la traduzion di une conte di Ippolito Nievo: "Il Varmo".
No sai cui che al à vinçût, ma jo e Roberto o vin vude une "Segnalazion de Jurie".
O soi pardabon content di chest premi parcè che o pues condividi la felicitât e la sodisfazion cuntun cjâr amì come Roberto, un "vecjo comunist" che però mi à simpri dimostrât stime e amicizie! E la stime e la amicizie a son reciprochis!
Us invidi ducj a Codroip, te sale dal consei comunâl aes 20.00 di Sabide ai 28 di Otubar pe cerimonie di consegne dai premis e par bevi un tai in compagnie!
Mandi e grazie Roberto!

24 ottobre 2006

Bersani cuintri lis minorancis linguistichis

Il decret Bersani al à provocât cetancj efiets cuntri i principis che al declarave. Al veve di jessi un at pes liberalizazions, ma tra lis conseguencis negativis o vin ancje un tai une vore fuart aes risorsis de Leç 482/99: di fat te liste dai tais zontade al decret o cjatìn lis minorancis linguistichis. La "riduzion" proviodude e je di 1.813.273 euros pal 2007, di 1.929.359 euros pal 2008 e di ben 4.387.405 euros pal 2009. Si trate di tais ae leç 482/99 di tutele des minorancis linguistichis storichis che e à une dotazion totâl che no rive nancje ai 10 milions di euros (i ten a marcâ che e je une leç che e vâl su dut il teritori dal stât talian, lis minorancis a son 12: fasêt voaltris il cont...)

23 ottobre 2006

Fieste in cjase dai Tabacârs


Vuê e à fat 100 agns la none di Cristian Taboghe, Marie Urli, che achì te foto e je cul fi Vito e la fie Ancilla. Augurons!

21 ottobre 2006

Fieste di Sant Simon a Codroip

La fieste di Sant Simon e dure dut il mês di Otubar e duncje cheste che e jentre e je la ultime setemane: duncje par cualchi zornade inmò al è pussibil lâ a fâ cualchi biel zirut stant che il program de manifestazion al è une vore siôr e us al consei.
Il Sant Simon al è ancje un premi leterari une vore impuartant e che chest an al stât dedicât a Agnul di Spere.
Il premi Sant Simon al è stât vinçût di cetancj impuartant scritôrs furlans. Tai agns Novante ancje un nestri concitadin Roberto Ongaro lu à vinçût par 2 voltis (si visaiso dal libri "Il Muc" o di "Cretevierte"?) e al è stât segnalât altris 2 voltis (par esempli cun "Il pecjât di Mosè").
Sabide ai 28 di Otubar, come ogni an, o savarìn cui che al à vinçût la edizion numar 27.

20 ottobre 2006

Rassegne teatrâl a Maian: si tache sabide

Sabide e tache la rassegne teatrâl: il prin spetacul si clame "Richter" e al è stât fat in ocasion dal 30° anivesari dal taramot. Chest spetacul al nas di un laboratori teatrâl che al è stât inmaneât de comunitât colinâr tal 2004/2005. O soi content parcè che cuant che si pensave ce argoments tratâ a son stadis fatis plui propuestis: une sul teatri comic, une sul taramot e altris. Lis primis 2 a son deventadis spetacui che a ziraran ator pai teatris. Cheste dal taramot e je une idee che o ai proponût jo in chê volte e che e jere plasude a ducj chei altris components de consulte, che se no conti la veretât a puedin smentîmi. Tal spetacul a son ancje components de compagnie teatrâl di Maian: Ivan Zucchiatti e Mauro Vignuda. Dut il program de rassegne, lu cjatais achì

19 ottobre 2006

20.000 voltis grazie!!!

Cheste scomesse e je nassude cun chê di fâmi un pocje di campagne eletorâl (lade benon, stant dutis lis premessis e i malauguris che mi àn tirât). E cumò ve chi che o vin passât i 20.000 contats in 7 mês o pôc plui. Par un blog che al fevele di un paîs di 6 mil abitants come Maian al è un biel sucès.
Intant o fasìn un "cincin" virtuâl, ma cuant che mi cjatais ator, no stait a vê pôre di scuedimi di bevi!
Grazie ai tancj visitadôrs e ai diviers comentadôrs che a mantegnin vive la discussion. Grazie, grazie, grazie!!!

17 ottobre 2006

Thermorubriche di Otubar:
il Termovalorizatôr

Thermonuke al stice la discussion su la soluzion de costruzion di un thermovalorizatôr (te foto un esempli). Ma ce isal chest sacrabolt di termovalorizatôr? Un termovalorizatôr al è...
E voaltris ce pensaiso di pussibilitât di fant sù un chi dongje? Jo no sai ce se al conven o nol conven, ma se o pensi che cuant che o voi a mangjâ un fete di pressut mi disin che al è cussì bon par vie dal aiar che o vin in zone Sant Denêl... cualchi domande mi ven sù. Vino di pontâ sul turisim e sul agroalimentâr o no?
Intant ancje Beppe Grillo aà fevelât di chest argoment: fracait achì

15 ottobre 2006

Incaric Anci


Sabide mi è rivade la comunicazion uficiâl: La Associazion Nazionâl dai Comuns di Italie e à istituide la Comission Nazionâl pes Politichis pai Zovins e la Anci FVG mi à designât component di cheste comission nazionâl.
La coord. regjonâl Zovins Aministradôrs si clame Isabella De Monte e la cjâf delegazion e je Elia Vezzi, mê coscrite che e je stade sindic di Paluce. Come in dutis lis regjons, cheste delegazion regjonâl e je fate di sindics, assessôrs e conseîrs cun mancul di 35 agns e e à sede a Rome li che si cjatarà cui rapresentants di dutis lis regjons: in dut 300 Aministradôrs zovins di Italie.

14 ottobre 2006

Emergjence scovacis? Ma nooooo...

Nus vevin dit che no saressin stât grancj problemis dopo dal fûc che al à disfat l'implant pes scovacis di Rivis Darcjan. Passâts 15 dîs o varès gust di viodi ce risultâts che e à mandât la Arpa. E intant je stade a pene firmade une autorizazion par sblocâ la situazion de racuelte e il conferiment dai refudums. Puedio domandâus in ce stât che a son i cassonets di fûr di cjase vuestre?

11 ottobre 2006

A scuele di furlan

A continuin i apontaments cu la scuele di furlan: ve chi la lezionute di cheste setemane...

08 ottobre 2006

Renato Mertens e Elio Bartolini

Di vuê fin ai 15 di Otubar al sarà pussibil visitâ la mostre di Renato Mertens su lis poesiis di Elio Bartolini. La iniziative e je stade inmaneade di Alessandro Venuti cu la colaborazion di Margherita Plos.

07 ottobre 2006

Octobiker: fieste a Pêrs!

Vuê e doman a Pêrs cun Moreno, Carla, Michy e ducj i amîs motârs che no àn inmò metude vie la moto: dai che a son i ultins dîs par cori ator prin dal frêt!
Mi à dit Moreno che usgnot e je ancje une biele sorprese... alc si pues capî leint i coments tal post precedent...
Intant par chei che no son stâts ae bikerfest, ve chi un piçul filmât sul teme:

E se lu dîs un premi Oscar...

Cjante che ti passe...

06 ottobre 2006

ThermoJukebox....

Cjante che ti passe...

Bruce in Friûl

Gran...bassi: ce sorte di fi...oret!

Margherita Granbassi e je la gnove medaie di aur dal fioret mondiâl! E dopo il sucès personâl ancje pe scuadre al è rivât un arint che però al è un tic amâr...
Come che si pues lei te biografie, e je triestine e pe nestre regjon e je une altre medaie di aur che si zonte ai tancj campions di chi. E po no stait a vignî a contâme che o soi integralist: cuant che si fevele di fi...oret si va ducj dacuardi: furlans e triestins!
A part batudis, o fâs i compliments a jê e al dut il sport targât FVG: brave Margherita!

05 ottobre 2006

Açâr in mostre: si presente ancje un libri


Mi è rivade une segnalazion: inte suaze des manifestazions che a son tor de mostre "ACCIAIO DOMANI", lunis ai 9 di Otubar aes 18.00 tal municipi di Udin, Sale Ajace, al sarà presentât il romanç Il for Martin di Tarcisio Mizzau, che tra Italie Argjentine al lee lis vicendis di chest for cu la storie de Safau tai agns '70. Al presente il prof. Mario Turello.

04 ottobre 2006

A scuele di furlan

Ve chi la gnove lezionute di furlan. Us visi ancje che ai prins di Novembar a Maian al varès di tacâ il cors di furlan de Universitât de Tierce Etât e il mestri al è Roberto Ongaro. Ocjo che e je une biele ocasion par fâ un pocje di scuele di persone. E po Roberto al è ancje simpatic!

03 ottobre 2006

Lis conseguencis dal fûc di Rivis Darcjan

Cheste e je la fotografie dal fumaron che al è jevât sù dopo dal fûc de setemane passade. Ta chest altri blog invezit, cualchi considerazion di comentâ. Intant vie pal Consei di vinars il sindic al à dit che l'Arpa nol à inmò scrit un verbâl, ma nus à dit che nol è pericul ambientâl. Sperìn ben, ma intant o spieti di lei il verbâl cuant che lu mandin.

02 ottobre 2006

Dal Friûl ae Europe passant par Rome: une propueste

Tal ultin consei comunâl o vin fevelât ancje di tutele linguistiche. Dopo de interogazion o ai presentât un document che us met tai coments e che al sarà discutût laprossime volte.
Intant us segnali une interviste di lei...