30 dicembre 2007

Un blog intun clic

Si siere l'an e si vierç un gnûf blog! Ve ca Ranieri Furlan (daûr de machine) che tra une fotografie e chê altre al à cjatât timp e snait par screâ il so biel blog: di lei, ma soredut di viodi pes bielis fotos!

29 dicembre 2007

Fiestis alchimistichis

O scuen ametilu: mi mancjave!
Dopo un biel pôc di timp o ai tornât a meti il nâs te scansie de biblioteche par divertiment e mi soi cjolt cualchi libri di lei, che si zonte a chel che mi à puartât Bambin Gjesù.
Une persone speciâl mi à conseât chest libri "L'Alchimista" di Paulo Coelho. Lu ai a pene tacât ma la sô maniere di scrivi sute e direte mi divertìs pardabon. Cui lui aial za let di voaltris? Ma mi racomandi: no stait a gjavâmi la sorprese dal finâl!

28 dicembre 2007

Cence peraulis

Beh, ma dopo il gustâ di Nadâl, no mi semee che al coventi scrivi tant di plui... burp!
E ca di un pôc si torne a tacâ :-)

27 dicembre 2007

Regâl di lei

Sot dal Arbul o ai cjatât chest libri: "La Grammatica di Dio" di Stefano Benni: cognossint ce che o ai za di lui, mi spieti une leture plasevule. Stin a viodi... anzit... stin a lei. E voaltris ce vêso cjatât?

26 dicembre 2007

Bon 2008!

Un grazie a Sandri Di Suald pal biel dissen augurâl e tancj tancj auguris di Bon Principi a ducj voaltris letôrs dal blog e aes vuestris fameis!

24 dicembre 2007

Charlie Chaplin, 1899-1977



Trente agns indaûr, la dì di Nadâl dal 1977 in Svuizare al murive Charlie Chaplin.
Ducj lu ricuardin come Charlot, ma un dai films che mi son plasût di plui al è cence dubi: "Il Grant Ditatôr", un cine dal 1940 ma che al semee scrit chê altre dì, come che si pues scoltâ dal Discors finâl ae umanitât che us met ta chest clip.
Bon Nadâl a ducj e ancje a ti, Charlie.

23 dicembre 2007

Bon Nadâl cu La Pastorele


O ringrazii il Jaio par chest biel regâl e o auguri a ducj i letôrs dal blog un Bon Nadâl e un Bon Principi.
Come che mi à scrit ancje il Carli:

Bon Nadâl, Bon Finiment e Miôr Principi
Che lis flamis e i fums dai pignarûi
nus puartin un avignî di pâs e di libertât.

La Pastorele

Di Nadâl chest an ti prei
Cjantimi la pastorele
Din don dan cun doi cjargnei
Din don dan e une cjargnele

E sot mieze gnot
Se o soi za pognet
Tegnimi dismot
E o sarai cuiet
Po, se a 'nd è la lune
Impensiti in chê volte
Cuant che a fâ furtune
Nô si lave vie
Cence nancje un franc
E nuie inte sachete
Dome un toc di pan...
... Un toc di pan.

Di Nadâl o sin ducj biei
Par cjantâ la pastorele
Dami un lapis e dami un sfuei
Che o le scrîf a la mê biele
Di Nadâl se tu mi spietis
O cjantarai la pastorele.

Din din dan cun lis cjampanis
Bon Nadâl ae mê cjargnele.

22 dicembre 2007

A chei de barete nissun je pete

O soi daûr a scrivi la letarute a Bambin Gjesù e par no fâ cjapâ frêt ae coce e cjatâ miôr la ispirazion, mi soi metût cheste biele baretute! =)

ps: vêso scrit ancje voaltris la letarute al Bambin Gjesù? ce i vêso domandât?

Premi a Luca e Carlo

Congratulazions a Luca Peresson e Carlo Della Vedova (te foto) che a àn vinçût il premi dal cine furlan cun "Farcadice-Diari di viaç", documentaris su la emigrazion furlane.
Farcadice al à 4 pontadis: Colonia Caroya, Charleroi, Umkomaas e Toronto.
Chest l'estrat dal verbâl de jurie:

"[...] Cjapant in considerazion sei Diari di viaç, Charleroi, Belgjiche sei Diari di viaç, Umkomaas, Sud Afriche, la Comission e consegne il premi a:
Farcadice, Diari di viaç di Carlo Della Vedova e Luca Peresson
cun cheste motivazion:
"L'otim nivel di realizazion professionâl des dôs oparis (Diari di viaç, Charleroi, Belgjiche e Diari di viaç, Umkomaas, Sud Afriche) al è compagnât di une sielte atente dai materiâi, di une sensibilitât indiscutibile tal savê condusi lis intervistis, di une composizion de imagjin acurade e elegante che e riclame a di une culture cinematografiche vivarose, e al è metût in evidence par vie di un montaç eficaç, li che il snait, dentri di un progjet cussì complès, al rive a coinvolzi dal dut il spetatôr [...]".

Ju ringrazii ancje par vêmi dât l'onôr di contribuî a chest progjet cuntun gno piçul intervent.
Compliments di cûr!!!

20 dicembre 2007

Slovenie in Schengen

Cun doman al cole dal dut il confin cu la Slovenie che e jentre inte aree di Schengen: lâ fint a Lubiane al sarà come vignî a Farle, nissun ti domandà i documents sul valic.
O capìs che cualchidun al sedi preocupât di chest, ancje par un discors di sigurece, ma jo o pensi che finalmentri si zire pagjine sierant un cjapitul di divisions lungjis cuasit un secul!
E sperìn che a gambiin maniere di pensâ ducj chei che a àn tal cjâf chê brute definizion dal Friûl: "la sentinella sul confine orientale"!!!

Dolce letarute

Mi è rivade une mail...

18 dicembre 2007

Eletrocjadene di Nadâl

Il zugut des fiestis
Nol è Nadâl cence il zugut di auguris di Nadâl, e cussì chei simpaticons dal blog Corona's a àn inmaneât une cjadene di Sant Antoni... Joi ce biel! Ve chi lis mês rispuestis:

Trê adietîfs par descrivi il to blog:
Furlan, sticeboris, rispietôs (de grafie de lenghe furlane)

Trops blogarins âstu cognossût di persone?
1, 2, 3, 4, 5 ... parcè metisi un limit?

Cuâl blogarin varessistu gust di cognossi di persone?
La domande valie dome pai blogarins o ancje pes blogarinis? ;-) Però stant che no si rispuint mai a une domande cuntune altre domande... Ma thermonuke dulà isal finît? ;-)

Cuâl isal il prin blog che tu leis a buinore?
Ma al è clâr: chel chi, ve! ;-)

Fasaressistu fieste se al sieràs cuâl blog?
Nissun: libertât di espression par ducj!

Fâs talent scout: segnale un zovin blogarin-promesse.
Trentespagnolets: lait a viodi... al è "sul prin dâ sù", ma al è propit simpatic e al fasarà strade... magari al scrivarà ancje un libri ;-)

Fat.
E cumò o passi l'Elettrocjadenefurlane a la blogarine furlane in Egjit la Chiara, a Simone e a Renzo

17 dicembre 2007

16 dicembre 2007

Honsell su pre Toni

Îr a Glemone si è davuelte une cunvigne e e je stade ancje screade une mostre su la opare leterarie di pre Toni Beline (te foto). Ancje il Retôr Magnific Furio Honsell al è intervignût par memoreâ la figure di chest grant predi furlanist.
Tal prin coment us met un articul li che si ripuartin lis declarazions di Honsell.
La mostre sui libris di pre Toni e larà indevant fint ai 6 di Zenâr dal 2008.

15 dicembre 2007

Auguris in Vile

Lunis ai 17 di Dicembar aes 6 e mieze di sere a Vile Manin a Passarian di Codroip il grup regjonâl di Forza Italia al fasarà i auguris a iscrits e simpatizants.
Chest an, cuant che mi è rivât l'invît, o ai viodût cun plasê che si son visâts ancje di fâ i auguris par furlan, dongje des tantis lenghis che a son stadis dopradis par scrivi il biliet.
Mi visi che l'an passât o vevi segnalât la mancjance e chest an a àn viodût di meti a puest. Sperìn che al sedi un piçul segnâl par miorâ un ategjament suntun argoment che nol è stât tratât ben dal nestri grup regjonâl in ocasion de discussion de gnove leç di tutele de lenghe furlane.

13 dicembre 2007

Bad Santa

Chê altre sere o ai viodût un cine di Nadâl un tic particolâr: Bad Santa al è il titul origjinâl.
A mi mi à plasût parcè che ancje se e jere cualchi peraulate, mi à plasût la ironie di font e il messaç finâl che al è positîf. Us consei di viodilu, par fâ cualchi biele ridade, ma ancje par une riflession. Ve chi la recension e cualchi opinion (che o condivît cuant che a son positivis).
Buine vision!

Sante Luzie in Patrie

Par un regâl speciâl, domande a Sante Luzie (dissen di Gianni Di Lena) che ti puarti un abonament pe Patrie dal Friûl.

SANTE LUZIE

Sante Luzie benedete,
aio di dîle propri sclete?
Jo o volarès dal to bon cûr
un plasê… devantdaûr!

Ce mi zovie mai la viste
su la tiere cussì triste?
Ce aio di fâ mò dai miei voi
cuant che il mont al è un imbroi?

Ce biel viodi chês maseriis,
chest ledan, chestis tristeriis,
chestis tantis robariis
par chel mostri di paîs!

Viodi musis rabeosis,
ongulis lungjis e cragnosis,
balarins e cjochelis
che a blestemin sot lis stelis!

Ce biel gust viodi frutatis
sgherlis, socis, sfaçadatis;
o fantats cussì dordei
che a no san cjatâ di miei!

Sante Luzie benedete,
aio di dîle propri sclete?
No saressial miei sei vuarp
e pe anime e pal cuarp?

Pre Bepo Marchet 1946

Cussì al scriveve pre Bepo 60 agns e passe indaûr. Ma jo o pensi che al sedi stât masse pessimist.

Conciert di Nadâl

Ancje chest an la Corâl di Maian e fasarà il conciert di Nadâl, sabide ai 15 di Dicembar aes 20.45 in auditorium.
Te stesse sere al sarà consegnât ancje il premi "Une vôs par ducj" volût de famee Maschio par ricuardâ il nono Pippo.

12 dicembre 2007

Solidarietât a Sant Tomâs

Cheste biele locandine (dissen di Arturo Picca) e publicize il marcjadut di solidarietât che i zovins de parochie di Sant Tomâs a fasin ogni an par tirâ sù ufiertis pe "Cjase famee Scrosoppi" di Udin. Cheste struture e da acet ai fruts che il judiç pai minôr al à slontanât des lôr fameis par diviers motîfs. Pal tierç an i zovins di Sant Tomâs a àn decidût di dâ une man a cheste realtât che e jude chescj fruts a cressi cuntun pocje di serenitât che no àn rivât a cjatâ a cjase lôr.
Un grazie a Anna e a ducj i volantaris che a àn decidût di impegnâsi ancje chest an.
L'apontament al è par cheste domenie ai 16 di Dicembar des 2 e mieze dopomisdì fint di sere par fâ dal ben: jo o pensi che o larai tor lis 5.
Al sarès biel cjatâsi cualchi blogarin alì par dâ une man: al baste pôc par judâ tant!

Par viodi la locandine plui grande, fracait achì!

Premiazion dal concors Estroverso

La prime edizion dal Concors internazionâl di traduzion di leterature pe infanzie si sierarà in maniere definitive cu la cerimonie di premiazion che si davuelzarà a Tavagnà li dal Centri civic in place “di Prampero” martars ai 18 di Dicembar dal 2007 aes 5 e mieze di sere.
Ta chê ocasion a saran comunicâts i nons dai vincidôrs dal concors che al à viodût la partecipazions di concorints di dute la Regjon, de Italie, ma ancje di cualchi partecipant fûr dal stât talian. Un biel inizi par un progjet che al à la ambizion di presentâsi come une novitât sul panorame dai concors leteraris “Cheste esperience e rapresente un “unicum” e al merte atenzion” al à declarât il prof. Livio Sossi, docent di leterature de infanzie li de Universitât dal Friûl e president de Jurie.
Lis lenghis protagonistis de prime edizion a son stadis l’ongjarês, il sloven e il cec che a son stadis voltadis par talian e par furlan.
“La aministrazion comunâl e à volût cussì promovi la difusion di tescj pai fruts parcè che o sin convints che dome cjalant cun atenzion ai plui piçui si podarà costruî une grande Europe dai popui, intune vision di integrazion des culturis” al à declarât Gianfranco Balzano, assessôr pes politichis di partecipazion dal comun di Tavagnà.
La iniziative e je stade coordenade dal sportel pe lenghe furlane dal comun di Tavagnà e e je stade patrocinade de Regjon GVJ, provincie di Udin, universitât dal Friûl, Agjenzie pe lenghe furlane e associazion Linguestpress.
“O vin volût cjapâ i principis dal Consei di Europe che al dîs che la nestre, citadins europeans, e je une realtât plurilengâl e lu sarà simpri” al comente il prof. Mario Pezzetta, sindic di Tavagnà “La cognossince dai popui di dute Europe e des lenghis internazionâls e passe in maniere evidente traviers la cognossince e la promozion des nestris lenghis: chê locâl (la lenghe furlane) e chê dal nestri stât (la lenghe taliane)”.
Pe primevere 2008 e je previodude ancje une cunvigne su la impuartance de traduzion in particolâr par oparis destinadis ai plui piçui, a conferme che l’interès e la iniziative dal Comun di Tavagnà a continuin su cheste strade.

11 dicembre 2007

Cjâr amì, ti scrîf

L'an al sta par finî e fevelant cuntune persone che mi è tant cjare, o vin tacât un discors su la amicizie... nus judaiso a dâ une biele definizion? Amicizie e je...

10 dicembre 2007

Dalai Lama a Udin

Udin e je pronte a ospitâ il Dalai Lama, che nol è dome une autoritât religjose che e à ricevût il premi Nobel pe pâs, ma al è ancje la massime autoritât temporâl dal Tibet.
Però i nestris politics al semee che a vedin pôre a dâ solidarietât a chest om parcè che forsit a àn pôre di cualchi conseguence de Cine, di fâi displasê al stât che al à colonizât il Tibet e esiliât il Dalai Lama: in Tibet al è un reât ancje vê dome une foto dal Dalai Lama te sachete!
La Cine e je un stât che ducj a cjalin come la gnove frontiere de economie, ma masse voltis si dismenteisi che in Cine no son rispietâts i dirits civîi!
O speri che te politiche di cjase nestre, cualchidun al vedi lis balis par denunciâ cheste vergogne, sotane de sêt di insiorâsi cuntun paîs che al spiete dome che chest siorut al mueri par podê dâ la ultime legnade al Tibet!
Politics tirait fûr lis balis!

09 dicembre 2007

Pensâ difarent



Nome chei che a son cussì mats di pensâ di podê gambiâ il mont, a rivin a gambiâlu pardabon.

E pre Toni al diseve ancje "Se no rivais a gambiâ il mont, cirît che il mont no us gambii voaltris. Se no rivais a salvâlu, metêtle dute par che no us sassini".

Un grazie a Aldo par vê tirât fûr chest filmât.

Il Lunari des Furlanis

O ringrazii Liberateromanini pe puntuâl segnalazion! Ve chi Silvia di Maian!

08 dicembre 2007

Vie lui, vie ducj

Cun 29 vôts favorevui, 1 contrarie e la assence dal diret interessât, e je stade aprovade la mozion di sfiducie al president (fint a îr) de Provincie di Udin, Marzio Strassoldo.
Cumò, dentri di 20 dîs (mi pâr che cussì al sedi il tiermini), al rivarà il comissari che al puartarà l'ent fint aes prossimis elezions.
Mi displâs che cheste vicende si sedi sierade ta cheste maniere. Strassoldo al à fat un erôr e al jere just che al lassàs la incarghe... Nol à volût molâ, ma ce aial risolt? Mah?!
Ducj a cjase (pecjât) e si torne a votâ in primevere.

07 dicembre 2007

R.esistence in Dub

Cualchi zornade indaûr us vevi mostrât la Premiazion dal Premi Friûl 2007 di R.esistence in Dub al premi Friûl.
Vuê us met il video de esibizion: la vôs e je chê di DJ Tubet!

Lenghe furlane europeane

Usgnot a Cjase Turoldo a Coder di Sedean aes 20.30, il president dal Istitût Ladin Furlan William Cisilino al moderarà l'incuintri “La gnove leç regjonâl sul furlan intal contest european: un prin belanç”. A intervignaran Monica Sabata (te foto), diretore di Linguapax, un organisim de UNESCO pe promozion de diviersitât linguistiche cun sedis in dut il mont; Giuseppe Corongiu, consulent dal President de Sardegne, Renato Soru, pes cuistions peadis ae lenghe sarde; e Marco Viola, diretôr dal Servizi minorancis de Provincie autonome di Trent.
Pecjât che chei che a varessin dibisugne di vignî a scoltâ la cunvigne probabilmentri no saran: dute chê rie di conseîrs regjonâi e politics de nestre regjon che a continuin a trai cuintri de tutele de lenghe furlane.

06 dicembre 2007

Un tic di toponomastiche

Tal prin coment us met une piçule conte di amôr che nus fasarà zirâ un pôc i comuns furlans... cuntun tic di ironie...
O ringrazii Federica che mi àn mandât cheste robute :-)

05 dicembre 2007

Tondo: che e sedi la volte buine?

Edi Snaidero ae fin al à dit "No, grazie!" e al à rinunciât a cori pes regjonâls.
Cui che nol à mai molât e che in dì di vuê al à dimostrât di crodi intune vitorie al è Renzo Tondo. Cualchidun, come il senadôr di Martignà (provincie di Gjenue), al continue a dî che "Renzo nol va ben, al è adore par fâ nons" e balis variis, ma inmò nol à une alternative: magari spietìno che al vegni il 2009 par tirâ fûr un non? (viodêt che si vote te primavere dal 2008!).
Sperìn che e sedi la volte buine e che a Renzo i vegnin dade la pussibilitât che tal 2003 i è stade neade: lui, Renzo, intant al è za partît.

04 dicembre 2007

Benvignût Santino Roya

Simpri par restâ in teme di furlans ator pal mont, vuê o doi il benvignût su cheste tiere a Santino Roya (te foto), rivât a Colonia Caroya ai 29 di Novembar passâts.
O fâs lis congratulazions a so pari, il gno amì Claudio Roya che al lavore a Radio FM Communicar, a la mame Maria Laura e al fradi Luca.
Un altri furlanargjentin che al fâs cressi la biele comunitât furlane di Colonia Caroya!

03 dicembre 2007

Cun Loris Vescovo in Gnove Zelande

Loris Vescovo, grant musicist, al è in Gnove Zelande par un progjet (sgrafe furlans) su la emigrazion furlane jù par là.
Al à screât un blog che si pues lei par viodi ce che al cumbine ta chest so biel viaç.

Mandi Loris e mandi a ducj i furlans di là jù!

(te foto fate a Taupo, Gnove Zelande, di çampe a drete: Devid Cudicio di Torean di Cividât, Loris Vescovo e Doro Zanini di Udin)

02 dicembre 2007

Premi Friûl 2007


Si è sierât il premi Friûl e chest an son stât premiâts i R.esistence in dub, che a fasin musiche ispirantsi a la Gjamaiche cjantant par furlan.
Il zovin che al fevele sul palc al è DJ Tubet.

01 dicembre 2007

Zornade cuintri dal AIDS

Vuê, Prin di Dicembar, e je la zornade mondiâl cuintri dal Aids.
Une des formis di trasmission de malatie e je chê midiant di rapuarts sessuâi.
Se us capite di vê rapuarts ocasionâi, stait atents: jo no condivît che lis personis a vedin esperiencis dome dentri dal matrimoni e dome pe procreazion.
L'argoment al è une vore dificil e no volarès dî banalitâts.
Mi limiti a dâ un consei, no dome par evitâ gravidancis no voludis: dopraitlu.

30 novembre 2007

Sant Andree, il purcit su la bree

AI 30 DI NOVEMBAR

Ogni cuâl trat mi capite di fermâmi a fâ cuatri cjacaris cun chei che a àn viodudis cori plui stagjons di me e dispès lis contis che a legrin chescj incuintris a tachin cu la classiche formule "Mi visi che…". Un panin cul salam al ufrì la ocasion par tornâ cul ricuart a etis aromai lontanis, une vore duris ma ancje bielis par chel che lis à vivudis, forsit parcè che leadis cetant a un periodi de vite cuant che il jessi gaiarins al prevaleve ancjemò su lis preocupazions che in curt a varessin vût il sorevint.

"In campagne, cuant che l'unvier al clucive sot di une coltre penze di nêf, pocjis a jerin lis ocasions di fâ fieste.
La vuere e jere finide di pôc, ma la bataie cuotidiane par sbarcjâ il lunari no veve voie di cognossi nissun armistizi.
Une des pocjis ecezions si presentave tor dai ultins dîs di novembar.
In particolâr la tradizion contadine e fissave pal trente, un di chei apontaments plui bramâts di dut l'an e su la bocje al coreve cun suturne sacralitât il sproc "Sant Andree, il purcit su le bree!".
Tant che ogni so predecessôr, dut câs, il protagonist de zornade di chel an al spietave cence savê il so destin tal piçul cjôt insom dal curtîl. Anzit, vadì che si visave cun tant agrât di chê buinore cuant che un contadin si veve sistemât il cjapiel e cuntune vosone al veve confermât "O cjol chel!", contentant il frut che lu compagnave e che pie no pie al rivave sore dal sierai li che une scrove e tignive a ments la sô fiolance colôr di rose.
Di chel dì indevant al jere stât tirât sù cun dutis lis graciis, figotât e sossolât. In curt al varès scuviert il parcè di tante atenzion.
Forsit al veve tacât a nasâ puce di stiç di cuant che par doi dîs lu vevi tignût a dizun.
Chei vogluts neris mi fissavin cun fâ interogatîf intant che o sieravi la puartele dal cjôt. Aromai al jere scûr e il frêt, che al becave, al prometeve un altri regâl cjandit, dopo des sblancjadis dai dîs passâts. Il cîl al mantignì lis promessis dopo cene, cuant che o cjalavi de mê cjamarute chei cuatri mûrs che a clucivin pe ultime gnot chel ospit toful di chel an. E intant che il mulin dal cîl al tacave a masanâ gjenerôs flocs cjandits, o sintì za in chê volte une grande nostalgjie.
I glons des cjampanis mi derin la buine gnot e mi indurmidii sintint i miei ducj cjapâts tal finî i ultins preparatîfs par l'indoman.
Come simpri la cjase e jevà une vore adore. Il businôr de cusine, propit sot de mê cjamarute, cun dolcece mi tirà fûr de val dai insiums.
O cognossei clare la vôs dal vieri purcitâr dal paîs che, cu la solite baldance di chei che a àn une considerazion masse grande de lôr part, al jere par preparâ i siei fiers dal mistîr.
Une curiositât sadiche mi tirà fûr des coltris e, cence volê fâmi viodi, mi fasei fûr cirint di vualmâ lis lamis che a lusivin ordenadis cuntune cure scuasit chirurgjiche su la taule de cusine. Intant che o rimiravi chel glaçât e signestri campionari di art purcitarie, un "Bundì!" al segnalâ che il gno tentatîf di no jessi scuviert al jere falît e ancje par me al jere rivât il moment di cjapâ part al rituâl.
Cence grant entusiasim o cjapai l'invît a preparâmi. Cuant che o foi vistût, o lei jù pe gulizion. No vei il timp di gjoldimi la scudielone di lat, che za mi cjatai te nêf fin tai zenoi dut cjapât tal me compit: tignî la cuarde che in curt e varès menât, cence tante creance, il purcit viers la sô "fieste".
Che semplice incarghe mi semeà di fondamentâl impuartance, dât che o jeri il vuardian dal unic imprest che al varès permetût di tacâ la "cerimonie".
Cence visâmi plui de maluserie dai miei insiums, o stavi braurôs e dret tant che un pichet denant dal cjôt in spiete di consegnâ al vieri purcitât, al pai e a so fradi la gruesse soie.
Ogni braure e svant si sdrumarin cuant che o sintii il rugnâ dal grant nemâl. O cirii di fâ une timide resistence intal moment che o scugnii consegnâ la cuarde ai grancj, ma lis mês manutis fredis a molarin prest denant de fuarce dal barbe.
O restai glaçât te nêf, che cence remission e continuave a vignî jù.
O varès volût scjampâ a pene che il trement berghelâ de bestie al sbregà l'aiar, ma o restai di clap, fermât di un assurt sens dal dovê che mi impedive di bandonâ il lûc des operazions.
Di bot al fo un cidinôr che mi insuspietì.
Cuant che o viodei jessi dal cjôt i miei a mans scjassant e blestemant come pocjis voltis ju vevi sintûts, o sintii une strane gjonde. Jo, la mame e la agne o lerin dongje a chei oms e, viodût chei segns che a vevin intor, no mi coventà scoltâ lis spiegazions di gno pari par capî che no jerin rivâts adore te lôr intenzion e il purcit sflacjôs al veve resistût cun fuarce a chel tentatîf di menâlu al creatôr.
I trê si netarin di corse e intant che i doi fradis a faserin viodi di vê cualchi dubi tal tornâ a frontâ subit la bestie che seont lôr e veve mostrade une fuarce sore nature, il vieri purcitâr, ferît plui tal orgoi che tal fisic, al le dret tal lûc dal duel.
"A cost di strissinâlu di bessôl, cumò lu sistemi jo!".
Al fruçâ il cjapiel sul cjâf, al sparì tal scûr dal cjôt, lassantnus dongje de cjalderie, li che di timp e jere daûr a bulî la aghe.
La lote e continuà par cetancj minûts jenfri blestemis e rugnadis, fintremai che di gnûf al tornà il cidinôr dentri chei cuatri mûrs.
Di bot une sagome e jessì de puartele dal cjôt, lant tal mieç dal curtîl.
Si fermà a pôcs metris di nô cul cjapiel butât un tic a drete e il voli braurôs di cui che intun bot al jere rivât adore a svindicâ cetantis gjenerazions suinis.
Al rugnâ sodisfat, scjadenant il bonspirt dai presints.
Purtrop par lui e fo une glorie efimare, che e scugnî rassegnâsi a niçulâ jù dai luncs raclis di faiâr ben in rie tal camarin di cjase mê.
Se mi visi ben, no crôt che il vieri purcitâr al sedi plui jentrât intun cjôt cence la juste assistence."

Chel panin cul salam al veve un gust diviers dal solit…

29 novembre 2007

I Savoia a domandin un risarciment

Come che nus ricuarde il nestri Trentespagnolets e ancje Brâf furlan, i Savoia (puarins) a àn domandât un risarciment di 260 milions di euros...
A cheste domande, a mi mi ven dome une rispueste: cheste chi sot...

28 novembre 2007

Gambiaments in consei

Sul Messaggero di vuê al è un articul che al fevele di Giovanna Iesse (te foto), conseîr comunâl di Maian, elete te liste La nuova Majano, come esponent de "Margherita". Dopo de fusion dal Partît Democratic, stant che i ecuilibris di centriçampe si son spostâts une vore a çampe cu la predominance dai Ds, Giovanna Iesse e jes dal Grup Intesa per Majano par fâ un grup par so cont. E vuê tal articul (che us met come prin coment) e fâs une declarazion curiose...

27 novembre 2007

Contribûts par Maian

O ai savût che tai ultins riparts a son stâts di pôc assegnâts de Provincie di Udin chescj contribûts:
Assessorât ae politichis sociâls e pai zovins
al Comun di Maian (tot: 18300 euros) par:
Centri sociâl di Deveà: 2900 euros
Centri sociâl di Cjasesole: 2900 euros
Centri sociâl di Pêrs 2500 euros
Centri sociâl di Farle 2500 euros
Centri sociâl di Sant Salvadôr 2500 euros
Centri sociâl di Trivià 2500 euros
Centri sociâl di Susans 2500 euros

ae Parochie di Ss. Pieri e Pauli (Maian): 2500 euros

e dal assessorât al turisim ae Pro Majano: 9.000 euros.

O torni a dî ce che o ai dit ancje in consei comunâl: grazie a Adriano Piuzzi, assessôr aes Politichis sociâls e pai zovins de Provincie di Udin, par dut ce che al à fat fint cumò pal nestri comun e pes associazions dal nestri teritori.

26 novembre 2007

Peraulis crosadis a Felet

Peraulis Crosadis: par imparâ zuiant
A Tavagnà un imprest didatic par furlan

La aministrazion comunâl di Tavagnà e à realizât un impuartant imprest ludic didatic par svicinâ i plui piçui al ûs de lenghe furlane a scuele: Peraulis crosadis e altris zûcs enigmistics.
Come che si lei te prefazion dal librut, patrocinât ancje de Agjenzie regjonâl pe lenghe furlane, “Ai 26 di Setembar dute Europe e à celebrât la Zornade europeane des lenghis e duncje ancje chês locâls. Fint dal 2001 (che al è stât l'an european des lenghis) il Consei de Europe al à volût dedicâ cheste zornade di fin Setembar a chest impuartant argoment, marcant a clâr trê principis di fonde: “la Europe e je plurilengâl e lu sarà simpri; l'aprendiment des lenghis al ufrìs une oportunitât ai citadins; ognidun al è in stât di fâlu”.
La finalitât di chest progjet e je propit chê di judâ i fruts a incressi la lôr paronance de lenghe furlane.
Il librut al è stât distribuît ai arlêfs des classis tierce, cuarte e cuinte des scuelis primariis dal comun (plui di 330 fruts) parcè che, come che al à vût dit Mario Pezzetta, sindic di Tavagnà e promotôr de iniziative, “Dome tacant dai plui zovins si pues garantî un avignî ae lenghe furlane che e rapresente un element identitari tra i plui impuartants de nestre comunitât, cu la sperance che e deventi simpri di plui ancje ocasion di confront e contat tra lis tantis culturis che a vivin sul nestri teritori”.
La publicazion e je nassude di une sinergjie tra il Sportel pe lenghe furlane dal Comun di Tavagnà e la cjase editore Kappavu che e à curât la realizazion de publicazion che si presente cu la ambizion di podê jessi di esempli ancje par prossimis esperiencis similârs.
“Intun mont che al devente simpri plui piçul midiant des gnovis tecnologjiis” al continue Pezzetta “Ancje il Vieri Continent al à di frontâ il pericul de omologazion des culturis. Chest progjet al nas propit par fâ rifleti su la impuartance de difese de nestre lenghe e de nestre tradizion, no par sierâsi tal nestri “curtîl”, ma te convinzion che dome valorizant il "particolâr" si pues pandi une culture de integrazion tra lis identitâts diferentis presintis in Europe e duncje ancje tal nestri comun”.
Lis primis reazions a son stadis une vore positivis e ancje i insegnants des classis, che a àn ricevût il libretut, a àn preseât il progjet che si presente come un imprest util par imparâ zuiant, come che al è just che a fasin i fruts.

Info:
lenghe.furlane@comune.tavagnacco.ud.it oppure tel 0432/577326

25 novembre 2007

Zornade cuintri de violence su lis feminis

Vuê o dedichi ancje jo un pinsîr a la zornade internazionâl cuintri de violence su lis feminis.
Lis statistichis a disin che in Italie une femine su trê e patìs violence (lei dut l'articul sul Corriere).
Sperant che nol vedi mai di coventâ, o segnali a dutis lis feminis che a lei chest blog, un servizi che ur dâ la pussibilitât di cjatâ cualchidun che lis scolti. No stait a tignî dentri ciertis robis brutis che us àn fat: ancje se al pues semeâus dificil, insormontabil, o vês di denunciâ cui che us à fat e us fâs dal mâl.
Parcè che se cualchidun al alce lis mans (no dome tal sens fisic: tantis altris a son lis formis di violence) su lis feminis, nol merte nissun dûl o justificazion... nol merte nancje di jessi clamât om.

24 novembre 2007

La agonie de politiche

E je cuasi miezegnot e su telefriuli e je la regjistrazion dal consei provinciâl di vinars su la mozion di sfiducie a Strassoldo.
O ai scoltât tancj intervents populiscj, int che e berghelave e cjâf grup di partît che come il leghist che par sputanâ Strassoldo, cavalcant la onde de moralizazion, si invente un ricat, smentît di ducj: figure di cjocolatin.
Chel document firmât di Strassoldo e Tavoschi al è stât un erôr e une robe che no veve di jessi fate, ma rivâ a tirâ ledan ta chê maniere, propit no mi à plasût.
Mi àn plasût i intervents di Adriano Piuzzi e Fabio D'Andrea, che a àn condanât l'episodi dal pat Strassoldo-Tavoschi, ma a àn difindût l'ent Provinciâl e il lavôr fat fint cumò.
Udc e Lega Nord spacadis vinars in consei, vuê si son dimetûts l'assessôr Decorte dal Udc e i assessôrs di AN...
E pal moment dut rinviât al prossim consei provinciâl (altris 15 dîs?...).
Al reste il fat che chest episodi al restarà tai libris come il paradigme de sconfite de politiche. Su ogni front.

23 novembre 2007

Pasolini domenie a Felet

Domenie a lis 20.45 tal auditorium di Felet apontament cu la musiche, la poesie e i colôrs cul spetacul Pieripauli di Loris Vescovo, Claudia Grimaz, Ermes Ghirardini e Alfredo Pecile.

JENTRADE LIBARE!

Altris info, sul sît dal comun di Tavagnà

Par viodi la cartuline dal conciert plui grande, fracait achì.

22 novembre 2007

Snaidero viers il NO

Îr al è stât celebrât 1 an di vite de Fondazion Rino Snaidero.
Ma ce che forsit al interessave di plui il mont de politiche e jere dal sigûr la sielte di Edi Snaidero (te foto).
Al è probabil che Edi Snaidero al disi di NO a la candidature pes regjonâls.
E zire vôs che lui al ves za decidût di timp, ma che cualchidun i vedi dit di spietâ prin di anunciâ la rinuncie.
No si trate cussì une persone par ben che e veve pensât di impegnâsi (intun prin moment forsit pardabon) intun mont che nol è propit il so.
Dute cheste vicende e je stade gjestide une vore mâl e plui di cualchidun al varès di sintîsi in debit cun Edi Snaidero pe maniere che al è stât strumentalizât.
Tra l'altri cumò o sin di gnûf te situazion di partence.
Ce si spietial a formalizâ une volte par dutis la candidature di Renzo Tondo per regjonâls 2008?

21 novembre 2007

Consei comunâl e gnûf cjâfgrup

Lunis che al ven al sarà consei comunâl. Nol è inmò stât convocât, ma aromai si trate dome di definî la ore.
La cuestion politiche plui interessante e sarà la presentazion dal gnûf cjâfgrup di Forza Italia, ancje se no sai fint cuant che si doprarà chest non...
Stant che Gaggiano al à dit che lui al à fat il grup di An, lui al fasarà il cjâfgrup di se ste e duncje la sielte par Forza Italia il cercli si strenç...

ps: dopo che o ai fat il post, ve ca la convocazion...

19 novembre 2007

Disasi dai zovins

E à tignût banc tai ultins dîs une cuestion che secont di me e à cualchi veretât e cualchi strumentalizazion.
E je vere che a son ciertis situazions che a van tignudis sot voli: baste dome lei i fats di cronache sucedûts a Maian tal ultin an... nancje chi o sin plui intune realtât bucoliche: ma lu sino mai stâts? Situazions dificilis a son simpri stadis.
Chest al è avonde lapalissian e se si reste sul gjenerâl al è facil dî robis scontadis e colâ te retoriche.
Ma se si va tal particolâr al è ancje il risi di pescjâ une "buiace" se no si dâ argomentazions particolârs e precisis. Duncje il mert di cui che al à stiçade la cuestion al è chel di vê dât la ocasion di fevelâ di un aspiet de nestre societât; la pecje e sta tal vê trat cussì, avonde malut, forsit parcè che al jere nervôs: magari la dì dopo no le varès frontade ta chê maniere.
Jo o pensi che cualchi volte si esagjere tal volê meti une "cjampane di veri" sui zovins: si fevele di "disasi dai zovins" che no san dulà lâ. Secont me nol è il "puest" che al risolf il probleme, ma a son i rapuarts che a àn di nassi tra di lôr. ASD Majanese (comprindût il grup di zovins che no son dome une scuadre, ma ancje un grup di amîs), ma ancje Libertas, ma ancje dutis lis altris associazions (ancje la Pro Maian, ma ancje lis realtâts plui piçulis) a son daûr a fâ un lavoron ecezionâl che probabilmentri nancje il comun al rivarès a fâ bessôl cui centris di agregazion e altris iniziativis similârs propit parcè che intune associazion e je une struture e un sisteme di rapuarts che al garantìs i iscrits. Nol è un câs che i "centris di agregazions" o "centris sociâi" che a funzionin di plui ancje a Maian e frazions a son in man a Associazions o comitâts une vore atîfs: duncje, come che o disevi, nol è un puest che al risolf il probleme, ma lis personis che lu fasin funzionâ.
Ma il discors al è pardabon masse dificil di risolvi in pocjis riis, e o speri che la discussion che e ven no vedi di ridusisi a un "gjalinâr di barufis". Par plasê.

18 novembre 2007

Zornade in ricuart des vitimis de strade



Un pinsîr par chei che no son plui, ma ancje par chei che a son restâts, ma che no rivin a dismenteâju...
Par fermâ la stragje stradâl, precedence a la vite: simpri!

Domenie cun pre Toni e la sô sapience



Par furtune che al è Marino che sul so blog al continue a dâ vôs a pre Antoni Beline:

Un popul cence storie nol va indenant; al va indenant il cuarp ma no il popul. Si pues fâ di mancul di lâ a messe e no crôt di blestemâ, ma cence culture e cence religjon no si va indenant. La religjon e je alc di plui profont dal lâ a scuele.

(pre Toni Beline)

17 novembre 2007

Gnot di amôr



Îr o ai stât a cjatâ Sdrindule, che o saludi e o ringrazii pe simpatie e pe disponibilitât.
O ai comprât il Cd cu lis sôs cjançons e lui mi à regalât il test di chê sô plui biele, chê che e restarà come "Stelutis alpinis":

Gnot di amôr
peraulis e musiche di Sdrindule

Gnot e dì
jo ti viôt chi cun me,
ma ce frêt di bessôl chi tal jet:
jo o crodevi di vêti par me dute la vite.
O vevi un agnul poiât chi sul cûr
mi diseve “cun te o soi sigûr",
"tenmi strete plui strete, di amôr o mûr”.

Tu la sole, la prime, l'amôr,
o ai passât masse timp di bessôl,
jo ti cjali tai voi e o capìs no tu puedis lassâmi.
Une gnot che no conte par te,
une vite che e va vie cun te,
e tu agnul dal gno Paradîs cence di me.

E tu vâs vie cence dîmi nuie,
al reste il cjalt dal to cuarp
ta chel jet, jo no ai plui nuie:
jo ti prei, Signôr, jude il gno dolôr.

O vevin scrit su chel arbul tal viâl
“jo e te” cuntun segn sul cûr.
O vevin dit une dì “O tornarìn, o sarìn insieme”.
Sì chel segn lu veve il gno cûr
e chel viâl al fâs pôre, al è scûr,
nancje il cjant di un amôr che al dîs “Jo o mûr”.

E tu vâs vie cence dîmi nuie,
ilusion di un moment, di une gnot, di une bausie...
jo le spieti ca, ma no tornarà.

note:
la version trascrite e rispiete lis regulis gramaticâls de lenghe furlane, po dopo, come che al sucêt tal fevelât ciertis elisions a son naturâls e duncje no stait a bruntulâmi se ce che al è scrit no lu sintîs tal cjantât.
O ringrazii Sdrindule che mi à dât il permès di meti la cjançon in rêt: un regâl pai furlans di dut il mont!
Cui che al volès comprâ il Cd al pues lâ a cjatâlu a cjase a Pagnà in "via della motta, 5/c", ma se lu visais par telefon, us spieghe cemût rivâ:
Sdrindule 0432/661325
o mandâ une mail a:
dipetardo@libero.it

16 novembre 2007

Il Diari di Tosoni

Al è disponibil on-line il Diari di Novembar, diret di Mauro Tosoni.

Plantis sul Cuel

Stant che in setemane o vin vût la gnove jentrade di Il Giustiziere come comentadôr, no vin fevelât dome di sport e "passetimps" no masse salutârs, ma ancje di ecologjie.
Par chest i ai prometût che o varès fevelât dal Cuel dal Fum, che al è un pôc che no trati sul blog.
Lant a cjalâ indaûr, mi soi impensât che za cualchidun al veve fevelât di speciis vegjetâls in pericul e vuê o propon une discussion "verde": ce proponêso par inverdî il Cuel dal Fum?


Ps1: ancje se l'assessôr ai LLPP Zucchiatti al dîs che no nus lei simpri, stait trancuii che ducj i sugjeriments i saran recapitâts, stant che dal sigûr al è za stât visât.
Ps2: rivìno a discuti cence scanâsi? ;-)

15 novembre 2007

La Pro Majano e ringrazie i colaboradôrs

La associazion Pro Majano e fasarà fieste sabide ai 17 di Novembar li dal ristorant Staderie di Sant Denêl.
Il motîf: ringraziâ i 100 e passe colaboradôr che a àn judât il Gnut e la Pro Loco in dutis lis ativitâts di chest ultin an.
E a son stadis propit tantis:
  • il Festival;
  • Friuli Doc;
  • la cene furlane a Traversetolo;
  • l'apontament dai vins a Lignan e vie indevant cu lis tantis iniziativis dal Gjal.
Par sabide o soi stât invidât ancje jo: mi à fat plasê e o ringrazii il president pal invît e par vê decidût di dedicâ un spazi ae promozion de lenghe furlane dentri de ultime mostre dal artesanât. E di chest o mandi un grazie sincîr ancje a Marco Serafin.

13 novembre 2007

Ridistrubuzion des deleghis

Cu la jentrade di Stefano Tuti, no vin vût dome un gambi di personis in zonte (ancje se cualchidun al lasse intindi che lis novitâts no si fermin achì).
Dut câs, pal moment e je stade fate ancje une ridistribuzion des deleghis.
Prime di lâ indevant, o aprofiti par fâi di gnûf i compliments e i auguris di bon lavôr a Stefano, cu la sperance che lu fasedin lavorâ te maniere miôr (e a lunc) e che nol vedi di passâ ce che o ai passât jo.
Tornant a la cuestion de ridistribuzion, lait a viodi lis gnovis deleghis: fracait achì

12 novembre 2007

Ring

Forsit al è miôr continuâ la discussion ta chest post, tra "paladins de justizie somarie e i difensôrs dal spirt alcolic" che chi a varàn il spazi par sbrocâsi... Thermorichieste sodisfate (o speri).
A mi chest scuintri nol è che mi interessi plui di tant: o ai masse difiets par metimi a judicâ chei altris, però o soi curiôs di viodi fint dulà che e rive la discussion... magari o lassi un coment ancje jo... ma no cumò.

11 novembre 2007

Sant Martin

Vuê o ai stât a Deveà, che e je la fieste di Sant Martin come ogni an...
La corse, lis cjastinis, i ufiei, i fruts e il soreli, ma nol jere Feliciano daûr dal banc...
Di là sù però un tai di ribuele lu à bevût cun noltris.

Furlan di Aldo

Finalmentri che al è vignût fûr il gnûf CD di Aldo Rossi, cumò si pues cerçâ une altre cjançon di chest so ultin lavôr in marilenghe: FURLAN!
Di po Aldo, ma dulà si puedial vignî a scoltâti une sere?

I 60 agns di messe di don Remigio

Vuê il nestri plevan, don Remigio Tosoratti (te foto), al fâs i 60 agns di messe. Al è rivât a Farle 28 agns indaûr.
Auguris!

10 novembre 2007

Auguris a la Ninine

Duncje, stant che e je rivade la segnalazion, o speri di rimediâ pal ritart: auguris Ninine! :-)
Te foto no sarà une torte cu lis cjandelutis, ma a mi chest mi plâs un casin!

Gjeometrie invernâl

Vuê o jeri tal curtîl e cjalant la tasse dai lens, mi è vignude voie di fotografâ chel rai di lûs che al bateve propit li.
Cussì, cjapade la machinute fotografiche o ai fat cualchi foto: ce us semeial?

gjeometrie invernâl 01
gjeometrie invernâl 02
gjeometrie invernâl 03
gjeometrie invernâl 04
gjeometrie invernâl 05
gjeometrie invernâl 06

Un grazie al gno pari che al à intassât i lens.
Ps: sì, sì... lu sai... l'Unvier al tache a Dicembar, ma mi pareve plui adat chest non pluitost che cjalâ sul Lunari... e po, cemût di disial? No esistin plui lis stagjons di mieç... :-)