Ce spietistu? Aboniti

La Patrie dal Friûl a Zenâr no ven fûr, stant che a ‘nd è 11 numars intun an e il prin al sarà chel “dopli” di Zenâr/Fevrâr. Duncje o vês ancjemò timp par abonâsi e cjalâ il 2009 cuntun voli furlan.
Une volte al mês met in bande un moment par un cjanton dut furlan: aboniti a LA PATRIE DAL FRIÛL.

Tacâ l'an cuntune donazion

Bon dai, nol è propit il Prindalan, ma o sin inmò in Zenâr e duncje mi someave just che par tacâ chest 2009 par ben, mi mancjave alc.
E cussì vuê o soi tornât a donâ plasme tal ospedâl di Sant Denêl.
Lu consei a ducj e par vê plui informazions us segnali il sît de Associazion Furlane Donadôrs di Sanc: e je une buine pratiche che e fâs dal ben par cui che al à bisugne e ancje a cui che le fâs, stant che par jessi donadôrs al ven domandât dome di tignîsi in salût.
Un "mandi" di cûr al nestri President Renzo Peressoni che al è un vulcan di ideis e di entusiasim!

Ps. Un grazie ancje a la Friûlpoint e ai Fantats furlans, fornidôrs des maiutis di cheste campagne spontanie di publicitât a pro de Donazion dal Sanc.

Sperant te cure definitive

Vuê e je la zornade cuintri dal Aids. No stin a dismenteâsi!

Zornade cuintri de violence su lis feminis

Vuê o torni a proponi un test che o vevi scrit l'an passât... parcè che ciertis robis a restin simpri validis.
O dedichi ancje jo un pinsîr a la zornade internazionâl cuintri de violence su lis feminis.
Lis statistichis a disin che in Italie une femine su trê e patìs violence (lei dut l'articul sul Corriere).
Sperant che nol vedi mai di coventâ, o segnali a dutis lis feminis che a lei chest blog, un servizi che ur dâ la pussibilitât di cjatâ cualchidun che lis scolti. No stait a tignî dentri ciertis robis brutis che us àn fat: ancje se al pues semeâus dificil, insormontabil, o vês di denunciâ cui che us à fat e us fâs dal mâl.
Parcè che se cualchidun al alce lis mans (no dome tal sens fisic: tantis altris a son lis formis di violence) su lis feminis, nol merte nissun dûl o justificazion... nol merte nancje di jessi clamât om.

In ricuart di cui che nol è plui

Vuê si ricuardin lis vitimis de strade. Come ducj o ai ancje jo personis che a son partidis e no son plui tornadis parcè che la lôr strade si è fermade. E vuê, ma no dome vuê, come l'an passât, un pinsîr al è par lôr, par che lis fameis e i amîs no vedin plui di patî la mancjance di une muart su la strade: un apel a ducj par evitâ lis muarts des stradis.

La mostre dal Dree

Ve chi un ricuart de inaugurazion de mostre dai Gnognos in ocasion di Friulidoc li de Filologjiche. O soi stât content pal Dree che al à vude la ocasion di meti in mostre i siei dinosauruts, ma o ai vude come la impression che al è mancjât alc.
Forsit in Filologjiche e je inmò une cierte distance gjenerazionâl: mi spietavi plui atenzion par une atrazion che e je stade preseade une vore di bande de int, ma che ta chê sere de scree mi à parût un tic trascurade stant che dut i sorestants a son lâts di corse a plan tiere a vierzi chê altre mostre invezit che fermâsi un moment di plui parsore a taiâ il "nastri" cul Dree. A part chest, o torni scrivi: o soi content pal papà dai Gnognos! Bulo!

La Patrie olimpioniche

Se o sês abonâts, us à di jessi za rivade a cjase la Patrie dal Friûl dal mês di Avost, dedicade al Sport.
Ta cheste presentazion jo invezit us feveli di une robe che mi sta tant a cûr, ven a stâi il comunicât di Glesie Furlane, che pal moment e frene cui che al veve tante gole di molzi pre Antoni Beline di dopo muart. In buine sostance dopo che al à lassât cheste tiere, il so non al è lât su la bocje di tancj che a àn nasât l'afâr di sfrutâ in maniere comerciâl i siei scrits: e alore jù ducj a domandâ di voltâ par talian i libris di pre Antoni "par fâ cognossi i siei scrits a ducj".
Intun prin moment ancje jo o vevi valutade cheste necessitât, ma dopo pensant a pre Antoni mi soi dit: "Pre Antoni al saveve scrivi par talian miôr di ducj chei che cumò a domandin di voltâlu dal furlan al talian. La sô sielte di scrivi par furlan e à une motivazion precise: cussientizâ i furlans che la nestre lenghe e je buine par dutis lis situazions e duncje ancje pe leterature, che cun pre Antoni e à tocjât nivei une vore alts. Pre Antoni al à scrit par furlan, pai furlans, par che a cjapin cussience dal valôr de nestre lenghe".
O soi dal dut dacuardi cul comunicât di Glesie Furlane e Patrie dal Friûl, che o cjatais achì.
E mi displâs che ancje int che e jere dongje di pre Antoni no vedi capît (o no à volût capî...) chest resonament che al è a la fonde dal so lavôr.

I diaris di Luca e Carlo

Luca nus vise che a son on-line ducj i documentaris di Farcadice: Colonia Caroya, Charleroi, Umkomaas e Toronto.
Grazie a Luca e a Carlo (te foto) pal lavoron che a àn fat.

Lait a votâ

Si è sierade la campagne eletorâl e come che al è just, ancje jo di sabide fint lunis o rispietarai la regule di no fevelâ di elezions ta chestis zornadis, fintremai che no si savaran i risultâts.
Cun di plui, ta chest fin di setemane, a restaran visibii dome i posts di joibe indevant. Forsit cheste sielte e podarès someâ ecessive, ma o preferìs fâ cussì.
Dut câs, l'archivi al reste acessibil.
Prime di sierâ cheste campagne eletorâl o fâs però une ultime racomandazion indipendentementri des vuestris opinions politichis: LAIT A VOTÂ!
O vin vût tant di spietâ prime che tal 1946 ducj a podessin esercitâ chest dirit e forsit cumò a cualchidun, massime pai zovins, al somee une robe naturâl. Ma no je cussì.
Cualchi volte si à la tentazion di dî "Nol covente: tant nol gambie nuie, a decidin simpri chei"... clamaitmi idealist, ma jo o soi convint che se no si va a votâ si fâs un plasê a chei che no àn rispiet dai citadins e dai nestris dirits. Par chest us torni a dî a ducj: LAIT A VOTÂ!
E stant che a saran tantis schedis, par no fâ confusion, cjalait achì.

Il 5 par MIL ae Patrie

Ancje chest an, come l'an passât, cuant che tu âs di fâ la declarazion dai redits, tu puedis decidi di regalâ il 5 par mil a un ent.
Dânus une man: no ti coste nuie, al baste dome meti tes caselis il riferiment de Patrie dal Friûl.
Scrîf 01299830305.

LOTANT PAR UN FRIÛL PLUI FURLAN, TU STÂS MIÔR ANCJE TU!

Riedo Pup al diseve:
«A son sfueis che a àn un intent sôl: dâi vôs a la int, sintî, racuei e documentâ lis propuestis, lis richiestis e lis protestis dai furlans. A son gjornâi che a fasin vitis a vivi, a stentin a rivâ, ma no molin. A son come poleçuts denant dai falcuçs, ma no si rindin. A son e a vuelin restâ a servizi dal Friûl e a muerin pluitost di metisi al servizi de poiane».
(gjavât fûr dal libri «Magari Ancje» ed. «La Vita Cattolica», 1983)

Grazie pal to contribût!

Il Comitât 482 te Rêt

O segnali la iniziative dal Comitât 482 che si met in linie cun pagjine web (te foto) e blog.
Une vore di documents, informazions e segnalazions di bande dal coordenament che al met adun associazions, ents e singui citadins che a àn a cûr la tutele dai dirits linguistics di furlans, slovens e todescs de nestre regjon.

Meditazion eletorâl

No ai vût maniere di partecipâ a tantis elezions. Di 12 agns in ca ogni tant o voi a cjoli la schede e la matite e dopo vê segnât, o met il gno vôt te casele.
Ma mai come chest an o pensi a ce che o larai a scrivi su chês schedis che ai 13 e ai 14 di Avrîl a saran cjapadis sù pe elezion de Provincie di Udin, dal Consei Regjonâl F-VJ e dal Parlament.
E il gno nol sarà dal sigûr un vôt "aliniât e cuviert": o soi stât elet intune liste li che insiemit a corevin An-Udc-Forza Italia, ma l'asset politic al è gambiât cuntune fusion imponude (An+Forza Italia=Pdl), une separazion derivade (Udc par so cont) e duncje o soi che mi domandi ce che o votarai.
Il dibatiment a nivel regjonâl su la cuestion identitarie e la tutele de lenghe furlane mi à segnât une vore. Mi à smaraveât la tristerie di cierts intervents e la posizion che sedi An, sedi Forza Italia, sedi l'Udc a àn cjapât a nivel regjonâl mi à viert i voi. O ai cirût in mil manieris di comunicâ cul grup consiliâr di Forza Italia, ma mi soi cjatât denant un mûr di gome. Cuntune ecezion, Massimo Blasoni, che mi à dât la ocasion di fevelâi, di furnî cualchi dât: a la fin nol à votât cuintri, ma nol à nancje votât a pro de gnove leç di tutele de lenghe furlane. Si è impegnât (e i doi at), ma par gno cont no avonde. Il rest dai conseîrs a àn fat declarazions velenosis cuintri de lenghe furlane, doprant une terminologjie al limit de decence. No pues votâ par int che a àn dimostrât tante contrarietât par un teme che jo o riten fondamentâl no dome pe mê identitât, ma ancje pe specialitât regjonâl come che al à ancje dit plui voltis Claudio Violino (te foto parsore), conseîr regjonâl de Lega Nord.

Tachìn de Regjon.
Fate la premesse chi parsore, o dîs che il rapuart personâl cun Renzo Tondo (te foto) al è par gno cont fûr di discussion e duncje Renzo Tondo al è e al reste il gno candidât pe presidence de regjon. E alore cemût fâ? Mi soi metût a lei lis listis e o ai cjalât cui e se o cognossevi cualchidun che tal Centridrete al à lavorât a pro de lenghe furlane in maniere fuarte: cui che al à tirât simpri di cheste bande, difindint cun fuarce la lenghe furlane al è Claudio Violino (Lega Nord, te foto parsore), che o cognòs personalmentri e che o sai che su cheste cuestion nol molarà. In regjon o votarai e us invidi ancje voaltris a scrivi Claudio Violino (Lega Nord, te foto parsore) a pro dal candidât president Renzo Tondo.

Po dopo o ai pensât a la Provincie di Udin.
Chi o soi plui seren parcè che al torne a cori Adriano Piuzzi (Pdl) che mi à garantît une atenzion ancje a la cuestion linguistiche. Cun di plui il candidât president al è Pietro Fontanini e duncje o soi trancuil. Stant che o voti tal coleç di Sant Denêl, su la schede al è za il non e duncje al baste segnâ une X sul simbul Pdl: Adriano Piuzzi (te foto) a pro dal candidât president Pietro Fontanini.

Ancje se o soi a stâ di une altre bande, o dîs ancje alc sul Comun di Udin.
Chi o darès la preference a Simone Bressan (Pdl), un zovin in gjambe, colaboradôr de Patrie dal Friûl e che come me in Forza Italia al è sensibil a la cuestion de tutele linguistiche. Simone, no pues votâti, ma se o fos a stâ a Udin tu varessis dal sigûr la mê preference.

E par sierâ, viodìn dal Parlament.
La fusion cun An no mi va jù. Secont me al jere miôr mantignî la struture federade cui 4 simbui, ma al è stât imponût che si ves di meti insiemit Fi e An. Cheste fusion sbilançade a drete, viers An, un partît che al è cuintri a la tutele des identitât furlane no mi à plasût e no mi plâs. Cun di plui e je la barzalete che pal Senât il Pdl al à candidât Giovanna Iesse che e je in oposizion in consei comunâl di Maian e nus à votât cuintri ancje te aprovazion dal belanç: a mi chestis luianiis no mi plasin e duncje un motîf in plui par no votâ Pdl in Parlament. O varès fat il sfuarç se almancul Vanni Lenna al fos stât tignût in considerazion, e invezit al è stât spostât di une posizion sigure a la cjamare, a une incierte al Senât. E ce centrial Frattini? Îr al è vignût a Udin e tra lis robis che al à dit, al à contestât la leç sul furlan. O soi schifât.
E si son ancje sustâts parcè che i furlans dal Pdl no àn ubidît e no àn metût dentri in liste Volpe Pasini pe Regjon.
Cun cheste, mi soi fat une idee avonde precise di cemût che il Pdl di Rome al considare il Friûl: une robute di meti sul marcjât.
Par tant sedi pal Senât sedi pe Cjamare NO VOTARAI Pdl!
Ta chei dîs achì o cjalarai ben ce che a ufrissin i partîts pe nestre regjon.
Cussì, pal moment, no doi nissune indicazion pal Parlament, se no che dal sigûr NO VOTARAI Pdl.

Zornade internazionâl de Marilenghe

Proclamade de Unesco (United Nations Educational, Scientific and Cultural Organization, ven a stâi la Organizazion des Nazions Unidis pe Educazion, pes Siencis e pe Culture, n.d.r.) tal Novembar dal 1999, e celebrade ogni an tacant dal 2000 par promovi la diviersitât linguistiche e culturâl e il multilinguisim, ancje chest an ai 21 di Fevrâr si ricuardarà la Zornade internazionâl de Marilenghe.
Vuê, cuasit la metât des cirche 6000 lenghis feveladis ator pal mont a son in pericul. Dilunc dai ultins trê secui, tantis lenghis a son muartis cuntune dramatiche e inesorabile ande che e cres simpri di plui, massime vie pes Americhis e in Australie.
Tai ultins timps almancul 3000 lenghis a son in pericul di estinzion se no adiriture a son daûr a murî in tantis bandis dal mont.
Daûr di stimis resintis, la plui part des 6000 lenghis cognossudis tal mont a son feveladis di une vore pocje di int. La metât des lenghis di vuê a son feveladis di mancul di 10.000 personis e un cuart di dutis chestis 6.000 lenghis a son feveladis di mancul di 1.000 personis.
“Lis lenghis a son patrimoni inestimabil de umanitât. A son nassudis, a cressin e, cualchi volte, a son condanadis a murî. Di fat o vin di fâ dut ce che o podìn par tutelâlis come che o vin di cirî di salvâ e difindi la inestimabil diviersitât culturâl che e je tal mont. Par cheste finalitât e par vinci la sfide la multilinguisim – al à declarât Koichiro Matsuura, diretôr gjenerâl de Unesco – la Unesco e sosten politichis linguistichis che a promovin lis marilenghis”.
Lis lenghis a son duncje tal cûr dai obietîfs de Unesco. A son imprescj une vore fuarts par difindi e disvilupâ chest nestri inestimabil patrimoni.
Dutis lis iniziativis par promovi la difusion des lenghis mari a coventaran no dome par dâ fuarce a la diviersitât linguistiche e a la educazion multilengâl, ma ancje pal disvilup di une plui profonde cussience des tradizions linguistichis e culturâls di dut il mont e par ispirâ une solidarietât fondade su la comprension, la tolerance e il dialic.
E simpri su cheste stesse lungjece di onde, la Onu (United Nations Organization, ven a stâi la Organizazion des Nazions Unidis, n.d.r.) e à proclamât il 2008 tant che an mondiâl des lenghis minoritariis. Une sielte che e va a dâ inmò plui fuarce a la date dai 21 di Fevrâr.
Di fat, la Onu e à domandât a ducj i stâts membris di dâ fuarce a la conservazion e la difese di dutis lis lenghis feveladis di ducj i popui dal mont, di incressi lis ativitâts par promovi in ducj i contescj coletîfs, la protezion di dutis lis lenghis, in particolâr lis lenghis minoritariis e chês che a son in pericul di estinzion.
Si va duncje simpri plui viers un avignî li che l'inglês al sarà simpri plui necessari, ma ancje simpri mancul suficient te suaze des politichis di tutele linguistiche e pes relazions internazionâls. (articul che o ai publicât su la pagjine "Marilenghe" de Societât filologjiche furlane sul Mv, ai 5 di Fevrâr dal 2008)

Un Spieli te Patrie

Al è pront il gnûf numar da "La Patrie dal Friûl" che come ogni mês al torne tes cjasis dai abonâts. Ta chest numar si fevelarà di "Ribei", ven a stâi di chei che in Friûl le pensin o che le àn pensade divierse dal "mainstream" e che si son ancje batûts in non di ideis alternativis. Il spont al è l’inovâl de Joibe Grasse dal 1511, il riviel popolâr che al insanganà il Friûl ai 27 di Fevrâr di chel an.
Une biele novitât al è ancje il "Spieli", l'insert di informazion istituzionâl fat dai comuns di Puçui (comun cjâf file), Bordan, Cosean, Feagne, Flaiban, Merêt di Tombe, Mortean, Pagnà, Palme, Pasian di Prât, Sedean e Spilimberc.
Ca di cualchi zornade la riviste e sarà disponibil ancje in pdf sul sît Internet: "La Patrie dal Friûl".

Mi ilumini di mancul

Ancje jo o ai aderît ae iniziative di Radio2 "Mi ilumini di mancul" e ai 15 di Fevrâr o distudarai un pocjis di lûs. Fasêtlu ancje voaltris: aderît ancje voaltris ae iniziative.

Grazie a Glesie Furlane

O aprofiti par ringraziâ la Associazion Glesie Furlane che e à regalatât un carton di libris a la biblioteche comunâl dal gno paîs.
I titui regalâts a son a son passe 30 e pal plui a son libris che al veve scrit pre Antoni.
Cumò ancje i utents de nestre biblioteche a podaran cjatâ e lei i siei pinsîrs e lis sôs riflessions.

Dolce letarute

Mi è rivade une mail...

Il Lunari des Furlanis

O ringrazii Liberateromanini pe puntuâl segnalazion! Ve chi Silvia di Maian!

Zornade cuintri dal AIDS

Vuê, Prin di Dicembar, e je la zornade mondiâl cuintri dal Aids.
Une des formis di trasmission de malatie e je chê midiant di rapuarts sessuâi.
Se us capite di vê rapuarts ocasionâi, stait atents: jo no condivît che lis personis a vedin esperiencis dome dentri dal matrimoni e dome pe procreazion.
L'argoment al è une vore dificil e no volarès dî banalitâts.
Mi limiti a dâ un consei, no dome par evitâ gravidancis no voludis: dopraitlu.

Zornade cuintri de violence su lis feminis

Vuê o dedichi ancje jo un pinsîr a la zornade internazionâl cuintri de violence su lis feminis.
Lis statistichis a disin che in Italie une femine su trê e patìs violence (lei dut l'articul sul Corriere).
Sperant che nol vedi mai di coventâ, o segnali a dutis lis feminis che a lei chest blog, un servizi che ur dâ la pussibilitât di cjatâ cualchidun che lis scolti. No stait a tignî dentri ciertis robis brutis che us àn fat: ancje se al pues semeâus dificil, insormontabil, o vês di denunciâ cui che us à fat e us fâs dal mâl.
Parcè che se cualchidun al alce lis mans (no dome tal sens fisic: tantis altris a son lis formis di violence) su lis feminis, nol merte nissun dûl o justificazion... nol merte nancje di jessi clamât om.