No taiâ la lenghe

Il Comitât 482 al à scrit un comunicât comentant la propueste che e jere stade fate di bande dal consei regjonâl in mert a la riduzion des spesis dal consei. Cun plasê o publichi cheste note dal Comitât e o ricjapi un biel post di Sandri che nus fâs capî ce che al significhe che in Friûl a son plui lenghis (come che si viôt te foto).

Un referendum sul referendum

Thermo nus segnale la letare di Fausto Floreani che sul Messaggero al propon un referendum sul progjet di recupar dal Ospedâl Langobart di Sant Zuan a Sant Tomâs. E jo us domandi un parê chi in bande, a proposit di cheste idee: cjalait chi la letare.

La Patrie olimpioniche

Se o sês abonâts, us à di jessi za rivade a cjase la Patrie dal Friûl dal mês di Avost, dedicade al Sport.
Ta cheste presentazion jo invezit us feveli di une robe che mi sta tant a cûr, ven a stâi il comunicât di Glesie Furlane, che pal moment e frene cui che al veve tante gole di molzi pre Antoni Beline di dopo muart. In buine sostance dopo che al à lassât cheste tiere, il so non al è lât su la bocje di tancj che a àn nasât l'afâr di sfrutâ in maniere comerciâl i siei scrits: e alore jù ducj a domandâ di voltâ par talian i libris di pre Antoni "par fâ cognossi i siei scrits a ducj".
Intun prin moment ancje jo o vevi valutade cheste necessitât, ma dopo pensant a pre Antoni mi soi dit: "Pre Antoni al saveve scrivi par talian miôr di ducj chei che cumò a domandin di voltâlu dal furlan al talian. La sô sielte di scrivi par furlan e à une motivazion precise: cussientizâ i furlans che la nestre lenghe e je buine par dutis lis situazions e duncje ancje pe leterature, che cun pre Antoni e à tocjât nivei une vore alts. Pre Antoni al à scrit par furlan, pai furlans, par che a cjapin cussience dal valôr de nestre lenghe".
O soi dal dut dacuardi cul comunicât di Glesie Furlane e Patrie dal Friûl, che o cjatais achì.
E mi displâs che ancje int che e jere dongje di pre Antoni no vedi capît (o no à volût capî...) chest resonament che al è a la fonde dal so lavôr.

La nestre Fieste Nazionâl: vierzìn i voi!

Ai 3 di Avrîl di ogni an si celebre la fieste de Patrie dal Friûl, ricuardant la nassite dal Stât Patriarcjâl di Aquilee.
Il contest
L’Imperadôr Indrì IV, tornant di Canossa, li che i jere stade gjavade la scomuniche di Pape Gregori VII, al ven salvât dal so amì Siart di Beilstein, Patriarcje di Aquilee, che lu jude a scjampâ de vuaite dai nobii che lu menaçavin. Par ringraziâlu de fedeltât e dal jutori prestât, ai 3 di Avrîl dal 1077 l’Imperadôr Indrì IV al firme la bole imperiâl che e conferìs al Patriarcje Siart il podê temporâl: pe prime volte la aree, che e cjape dentri i teritoris dal Friûl, Cjargne, Cjadovri, e ancje zonis che vuê a son in Austrie, Slovenie e Istrie, e je governade di une autoritât locâl e autonome che e à sede a Aquilee.
Lis funzions dal Patriarcjât
Il storic Gian Carlo Menis, te sô “Storie dal Friûl”, al scrîf «Si costituive cussì un vast e compat teritori che al veve di sotstâ ae uniche jurisdizion feudâl dal Patriarcje. Intune peraule al vignive fondât chel “principatus Italiae et Imperii”, politic-eclesiastic, che al sancive une realtât sociâl za consolidade mediant di un lunc procès storic e che, di li indevant, par trê secui e mieç, e varès unît i furlans in formis simpri plui elevadis di vite civîl».
Il Parlament dal Friûl, un dai prins in Europe
Il Stât Patriarcjâl si à di ricuardâlu ancje par un altri impuartant orghin istituzionâl: Il Parlament dal Friûl che al clamave adun rapresentants de glesie, de nobiltât e dai comuns. No je date precise che e documenti la fondazion di cheste istituzion, volude dal Patriarcje ancje par limitâ lis pressions de nobiltât. Ma al è sigûr che il Parlament dal Friûl al nassè ben prime dal 1215, cuant che in Ingletiere e fo scrite la Magna Charta Libertatum, il document che al fasarès tacâ la ete de democrazie parlamentâr.
Ma in Friûl o sin rivâts almancul 20 agns prime!
Il 3 di Avrîl in dì di vuê
Ricuardâ une date al à un valôr simbolic, ma no si pues fermâsi a une semplice celebrazion. Al à di jessi un moment par resonâ su la nestre storie, cence nostalgjiis anacronistichis, ma cu la cussience che il Stât Patriarcjâl al rapresente il prin e il plui lunc (al durà fintremai al 1420) esempli di autoguvier dal nestri teritori.
Ve chi ce che al diseve ancje Pre Checo Placerean.

Zornade internazionâl de Marilenghe

Proclamade de Unesco (United Nations Educational, Scientific and Cultural Organization, ven a stâi la Organizazion des Nazions Unidis pe Educazion, pes Siencis e pe Culture, n.d.r.) tal Novembar dal 1999, e celebrade ogni an tacant dal 2000 par promovi la diviersitât linguistiche e culturâl e il multilinguisim, ancje chest an ai 21 di Fevrâr si ricuardarà la Zornade internazionâl de Marilenghe.
Vuê, cuasit la metât des cirche 6000 lenghis feveladis ator pal mont a son in pericul. Dilunc dai ultins trê secui, tantis lenghis a son muartis cuntune dramatiche e inesorabile ande che e cres simpri di plui, massime vie pes Americhis e in Australie.
Tai ultins timps almancul 3000 lenghis a son in pericul di estinzion se no adiriture a son daûr a murî in tantis bandis dal mont.
Daûr di stimis resintis, la plui part des 6000 lenghis cognossudis tal mont a son feveladis di une vore pocje di int. La metât des lenghis di vuê a son feveladis di mancul di 10.000 personis e un cuart di dutis chestis 6.000 lenghis a son feveladis di mancul di 1.000 personis.
“Lis lenghis a son patrimoni inestimabil de umanitât. A son nassudis, a cressin e, cualchi volte, a son condanadis a murî. Di fat o vin di fâ dut ce che o podìn par tutelâlis come che o vin di cirî di salvâ e difindi la inestimabil diviersitât culturâl che e je tal mont. Par cheste finalitât e par vinci la sfide la multilinguisim – al à declarât Koichiro Matsuura, diretôr gjenerâl de Unesco – la Unesco e sosten politichis linguistichis che a promovin lis marilenghis”.
Lis lenghis a son duncje tal cûr dai obietîfs de Unesco. A son imprescj une vore fuarts par difindi e disvilupâ chest nestri inestimabil patrimoni.
Dutis lis iniziativis par promovi la difusion des lenghis mari a coventaran no dome par dâ fuarce a la diviersitât linguistiche e a la educazion multilengâl, ma ancje pal disvilup di une plui profonde cussience des tradizions linguistichis e culturâls di dut il mont e par ispirâ une solidarietât fondade su la comprension, la tolerance e il dialic.
E simpri su cheste stesse lungjece di onde, la Onu (United Nations Organization, ven a stâi la Organizazion des Nazions Unidis, n.d.r.) e à proclamât il 2008 tant che an mondiâl des lenghis minoritariis. Une sielte che e va a dâ inmò plui fuarce a la date dai 21 di Fevrâr.
Di fat, la Onu e à domandât a ducj i stâts membris di dâ fuarce a la conservazion e la difese di dutis lis lenghis feveladis di ducj i popui dal mont, di incressi lis ativitâts par promovi in ducj i contescj coletîfs, la protezion di dutis lis lenghis, in particolâr lis lenghis minoritariis e chês che a son in pericul di estinzion.
Si va duncje simpri plui viers un avignî li che l'inglês al sarà simpri plui necessari, ma ancje simpri mancul suficient te suaze des politichis di tutele linguistiche e pes relazions internazionâls. (articul che o ai publicât su la pagjine "Marilenghe" de Societât filologjiche furlane sul Mv, ai 5 di Fevrâr dal 2008)

Un Spieli te Patrie

Al è pront il gnûf numar da "La Patrie dal Friûl" che come ogni mês al torne tes cjasis dai abonâts. Ta chest numar si fevelarà di "Ribei", ven a stâi di chei che in Friûl le pensin o che le àn pensade divierse dal "mainstream" e che si son ancje batûts in non di ideis alternativis. Il spont al è l’inovâl de Joibe Grasse dal 1511, il riviel popolâr che al insanganà il Friûl ai 27 di Fevrâr di chel an.
Une biele novitât al è ancje il "Spieli", l'insert di informazion istituzionâl fat dai comuns di Puçui (comun cjâf file), Bordan, Cosean, Feagne, Flaiban, Merêt di Tombe, Mortean, Pagnà, Palme, Pasian di Prât, Sedean e Spilimberc.
Ca di cualchi zornade la riviste e sarà disponibil ancje in pdf sul sît Internet: "La Patrie dal Friûl".

Interviste a Radio Onde Furlane

Par cui che si fos perdût la interviste di Lunis a buinore, ve chi la regjistrazion fate a Radio Onde Furlane che nus à ospitâts me e il Dree.
Inmò un grazie al diretôr Mauro Missana.
Cui che al à voie al pues ancje abonâsi a La Patrie dal Friûl:
25,00 euros (pal forest 30,00 euros) sul cont corint postal n.12052338 intestât a "LA PATRIE DAL FRIÛL" Glemone.

Redazion e aministrazion V. Basilio Brollo, 6 - 33013 Glemone (Udin)
TEL. 0432 981411
FAX 0432 891941
La gnove e-mail de Patrie: info@lapatriedalfriul.org

Assise su FriûlTV

Us met achì il link ae FriûlTV, in maniere che o podês viodi la Assise des Rapresentancis furlanis.
Tra i tancj biei intervents, o met chel di Roberto Visentin, za senatôr.

Letare vierte al grup regjonâl di Forza Italia

Stant che des mês bandis al è di mode, mi è vignude ancje a mi chê di scrivi une letare.
O volarès ringraziâ il cons. reg. Massimo Blasoni par vêmi dade la ocasion di jessi scoltât inte fase di predisposizion di un dissen di leç a pro de tutele de lenghe furlane.
O ai domandât une copie de version finâl de propueste e dopo cualchi zornade che e je stade depositade e a sun di domandâle, o soi rivât a vêle e le ai lete.
Mi rint cont de dificoltât di meti dacuardi plui sensibilitâts: di chês plui sietichis a chês plui convintis che il furlan e il patrimoni linguistic de regjon a son è une ricjece (se nol fos clâr, a mi mi plasarès che si ves plui fuarce tal tutelâ la lenghe furlane, tacant de scuele). Mi à fat plasê che e sedi stade cjapade cheste iniziative e che almancul cualchidun ogni tant si vise di sintî un pôc ancje chei che no àn un rûl apicâl dentri dal partît. Di chest, ancje se il gno parê al conte in maniere relative, o doi at e o ringrazii Massimo Blasoni pe sensibilitât dimostrade.
Su lis tematichis che a rivuardin la politiche linguistiche nol è mai stât fat un resonament razionâl e aprofondît dentri dal nestri partît (o ricuardi e o ringrazii ancje l'on. Renzo Tondo pe cunvigne fate a Sant Denêl tal Novembar 2006 cun Mauro Pili, ma in chê volte i conseîrs regjonâi no jerin): ogni tant si lei cualchi articul sul gjornâl, ma nol è misteri che plui di cualchidun al manifesti posizions une vore contrariis. Cheste ultime iniziative di Massimo Blasoni e podeve jessi une buine ocasion, che però e je stade mancjade inmò une volte, stant che di ducj i conseîrs regjonâi che a jerin invidâts a lis riunions (e in pôc timp a son stâts fats plui incuintris), l'unic presint al è stât Massimo Blasoni, che lis veve convocadis. Mi àn insegnât che in politiche cui che al è assent al à simpri tuart...
Mi rint cont che a son tancj i problemis, lis necessitâts, lis domandis, e, parcè no, ancje i interès che ognidun al à, ma, stant ancje lis reazions pesantis provocadis de PDLR de Zonte Illy, forsit al jere il câs di frontâ ancje cheste tematiche.
Ancje noaltris operadôrs linguistics o vin fat sintî la nestre opinion criticant in maniere pesante lis sieltis di Illy e de sô Zonte Regjonâl. Idem, ma in maniere plui analitiche, si è esprimût ancje il Comitât 482 come che o podês lei ta chest document che al è stât dât martars ai 26 di Jugn ae Comission VI.
Ancje jo o jeri martars ai 26 di Jugn a TS, come puartevôs de Associazion e de Riviste "La Patrie dal Friûl" e il gno intervent al è stât une vore critic cuintri de Zonte Illy.
Conseîrs regjonâi di Forza Italia, us ricuardi l'apel che al è stât preparât dal Comitât 482 e che us invidi a lei e magari a sotscrivilu (baste mandâ une mail al comitât cun non-cognon-comun di residence): jo lu ai fat. Us ricuardi che il comitât 482 al è trasversâl e al cjape dentri esponents di ogni colôr politic, ma, come che o ai vût za dit, achì si fevele di un interès gjenerâl che al va parsore dai schieraments.
Mi auguri che in fase di discussion in Consei ancje Forza Italia si meti de bande de tutele de lenghe furlane, parcè che se o vin voie di continuâ a svantâsi di jessi il partît des riformis, no podìn acetâ di jessi conservadôrs in teme di politiche linguistiche: la nestre regjon e à bisugne di no pierdi altri timp e riformâ, inzornantlu, il cuadri legjislatîf in argoment e no metisi de bande de Zonte Illy che e je daûr a compuartâsi no dome di conservadore, ma adiriture di reazionarie, puartant indaûr la situazion a prime de leç regjonâl 15/96, de leç 482/99 e cuintri dute la normative europeane che cumò e je in vore.
Conseîrs regjonâi di Forza Italia, us domandi di rifleti su chest argoment e di difindi i dirits linguistics dai furlans: chest nol è un argoment che interesse il passât, ma la identitât de nestre int di vuê e ancje tancj zovins a sintin che cheste no je une robe che e sa di mufe, ma e rapresente une oportunitât di no pierdi. Su chest o fasarai di dut par difindi cheste posizion e mi rint inmò disponibil a fevelâ cun voaltris par aprofondî la cuestion, se o volarês fâlu.
Dut câs, come che o disevi, juste chê altre dì, o ai let la propueste di leç che Forza Italia e à presentât in regjon pe tutele de lenghe furlane.
No soi par nuie content.
O torni a dâ at a Massimo Blasoni e lu ringrâzii inmò di jessi stât l'unic a vê volût scoltâ e frontâ chest teme, ma cumò di front a ce che o ai let o ai provade une profonde delusion par vie che mi semee une vore dongje a chê che e à presentade la Zonte regjonâl.
Adiriture al ven dineât che il furlan al sedi un dirit, e al reste dome "è consentito" (art.6): e di chest o vevi preât za tal incuintri dal grup di lavôr che al fos modificât. Invezit no sai cemût, mal soi tornât a cjatâ tal test. Parcè, se o vevin decidût insiemit di meti a puest la definizion?
No stoi a fâle tant lungje su dutis chês altris osservazions che o vevi proponût e che a son stadis ignoradis.
O pues dome dî che su cheste cuestion Forza Italia e podeve vê la ocasion di dimostrâsi fuarce di riforme, ma ae fin si è fermade su posizion di fuarte conservazion di un "status quo" che al presente no dome problemis di aplicazion de norme in vore, ma adiriture e volarès limitâle inmò di plui.
O cjapi at, o rispieti ma no aprovi, ancje se la mê opinion no sai ce pês che e pues vê: forsit nissun...
Mi auguri che il grup ristret de comission VI al partorissi un dissen di leç plui fuart, ma lis premessis a son avonde brutis.
Po dopo in consei, o volarès capî ce che al fasarà il grup consiliâr di Forza Italia, considerât che nissun altri conseîr al à volût firmâ la propueste di Blasoni e adiriture, come che o ai za dit, no si è nancje presentât ae taule di lavôr par preparâle.
O resti a disposizion par aprofondî lis tematichis di politiche linguistiche dentri di Forza Italia parcè che mi rint cont che a 'nd è tante bisugne, ma pal moment mi sint une vore bessôl.
Mandi e bon lavôr.

Imprescj informatics pe Marilenghe

Continuant su la cuestion de marilenghe e de inovazion us segnali un pâr di robutis che o podês cjatâ sul sît dal Consorzi Friûl Lenghe 2000.
A son i plug-in dal Grant Dizionari Bilengâl Talian Furlan e dal Dizionari Ortografic Furlan di istalâ sul vuestri browser, in maniere di vê simpri a puartade di man l'imprest pe traduzion dal talian al furlan e dal furlan al talian.
Chescj modui a permetin di doprâ cun plui facilitât il Dizionari ortografic e il GDB TF tes versions o­n-line.
Cun di plui e je ancje la pussibilitât di discjamâ il driver de tastiere furlane par chei che a doprin il sisteme Windows in maniere di no lambicâsi par scrivi la cidilie e i acents juscj.
Un grazie di cûr al CFL2000.
Cui visial Beppe Grillo?

Zornade furlane dai dirits

Tacant des 9 di buinore, la programazion (90Mhz in FM o in streaming) di Radio Onde Furlane di vuê ai 27 di Fevrâr e je dedicade ae Zornade Furlane dai Dirits, come che nus ricuarde chest messaç dal puartevôs dal Comitât 482.

Ai 27 di Fevrâr al cole l’inovâl di une date un grum impuartante de storie furlane, ancje se a son inmò tancj i furlans che no le cognossin. Tal 1511 la Joibe Grasse e colave juste ai 27 di Fevrâr e, ta chê zornade, si invià il riviel plui grues de storie dal Friûl. In bandis di vuerilie, i contadins a cjaparin, a meterin a sac e a brusarin cjistiei e palaçs ator par dute la Patrie. Il riviel al fo inneât tal sanc, ma lis comunitâts furlanis a cjaparin cussience de lôr fuarce. Une fuarce che ur permetè di tratâ la lôr poie militâr a Vignesie daûr dal rispiet dai lôr dirits e che, cualchi an plui tart, e fasè nassi la Contadinance, orghin rapresentatîf des comunitâts rurâls cence avuâi in Europe. Ve che alore, chê dai 27 di Fevrâr, e je la date miôr par celebrâ la Zornade Furlane dai Dirits. Dirits che par nô, furlans dal Comitât 482, a son in primis chei linguistics e nazionâi, ma che a son leâts ad in dopli cun ducj chei altris dirits: salût, lavôr, cjase, scuele, ambient e v.i., parcè che no esistin dirits di prime e di seconde categorie. Dineâ un dirit, al vûl dî vierzi une puarte par dineâ ancje chei altris.

Ogni dì o viodìn metût sot dai pîts il nestri dirit, come popul, di decidi di bessôi dal nestri avignî. Ancje i nestris dirits linguistics a restin inmò sot atac: baste pensâ a cemût che, cundut de leç di tutele 482 dal 1999, il furlan al resti inmò fûr de puarte in cetantis scuelis e aministrazions publichis, e i tais ai fonts decidûts a Rome dal sigûr no zovin. L’impegn che o vin metût pe presince de nestre lenghe te radiotelevision publiche al à viodût ta chescj dîs un pas indenant, cul emendament fat bon de Comission parlamentâr di vigjilance su la RAI, ma si à di restâ in vuaite parcè che la bataie e je juste inviade. In fin, come furlans, o din dute la nestre solidarietât ai ativiscj des comunitâts slovenis dal Friûl, denant des bausiis e des agressions simpri plui penzis che si cjatin a vê di frontâ.

Par nô chê dai 27 di Fevrâr e je une date che e merete ricuardade, ma no si trate di une memorie sterpe, che e cjale indaûr cun nostalgjie. La Zornade Furlane dai Dirits e à di jessi une ocasion par ricjatâ cussience e braure di cui che o sin, par no dismenteâ che i furlans a àn savût lotâ pai lôr dirits. Une zornade di riflession, duncje, ma ancje un moment par cjalâ indenant, al avignî de nestre tiere e di ducj chei che i vivin. Di fat, o vin fevelât di dirits nazionâi e linguistics, ma ce isal di fâ denant di cui che al vûl une sanitât che e funzione come une aziende e no come un servizi, di cui che al vûl un lavôr simpri plui precarizât, di cui che al pense di sapulî lis nestris ricjecis naturâls sot di une plote di ciment, di cui che al pense al Friûl come a di une grande servitût militâr, viarie e energjetiche?

Cheste, duncje, plui che une dì di fieste e je une zornade di lote e di rivendicazion, ma une lote come che o sin usâts a fâle nô, in maniere democratiche: lis manariis e i forcjàs ju vin lassâts a cjase, o doprìn invezit lis armis dal dirit, dal impegn di ogni dì, de reson. Par che ducj i furlans a puedin gjoldi ad in plen dai lôr dirits e par che il Friûl al sedi patrie di dirits par ducj.

Il puartevôs dal Comitât 482
Carli Pup