27 settembre 2007

Scoop: neri come un Gjal, il president de Pro Loco inferocît e avilît

Tal dopomisdì di îr, o ai vude une telefonade cul President (te foto) de Pro Majano.
Mi à manifestât dute la sô avilizion e rabie pal ategjament de assessore ae culture, che i à dit che secont jê "La Pro Majano no à ringraziât avonde la Aministrazion Comunâl".
No sai ben ce che al è sucedût, ma dal sigûr o sai che, no dome la Pro Majano e à simpri ringraziât publichementri la Aministrazion Comunâl, ma adiriture al protocol dal Comun e varès di jessi une letare firmade dal President de Pro Majano che al ringrazie in maniere uficiâl e scrite la Aministrazion Comunâl...
No rivi a crodi che si fasedin telefonadis dal gjenar par scuedi un "grazie" a une associazion... cun dut ce che al è stât fat ancje cul Festival di chest an...
Sperìn ben, ma mi sa che i rapuarts a son avonde tirâts... e tire tire, la cuarde si romp.
E dopo mai che il President al jere rivât al limit e no sai se al torne indaûr...
Stin a viodi e o speri di vê cualchi smentide. Pal ben de Pro Majano, pal ben dal paîs.

26 settembre 2007

Mozion trasversâl a pro des leçs di tutele linguistiche.

Il consei comunâl di Maian, su mê propueste al à aprovât une mozion a pro des leçs di tutele des minorancis linguistichis.
Achì us met il test de relazion introdutive e tal prin coment definitîf aprovât ae unanimitât di dut il Consei comunâl di Maian.

Relazion introdutive: relatôr Christian Romanini (Forza Italia)

Par introdusi cheste mozion, o volarès domandâ dome cualchi minût par ricuardâ une figure fondamentâl par dut il Friûl e i furlans: pre Toni Beline, mancjât ai 23 di Avrîl dal 2007.
Pre Toni cualchi volte al vignive ancje a Maian a cjatâ une sô sûr che e je nestre concitadine.
La muart di chest predi, inteletuâl, furlanist e lasse un grant vueit no dome par chei che lu àn cognossût, ma soredut par dut il popul furlan che, ancje se no ducj si rindin cont, al è restât plui puar.
La maniere piês par ricuardâlu al sarès limitâsi a sempliç discors di circostance, dismenteantsi di ce che al à dit, scrit e puartât indevant.
Ta chest moment storic li che ancje in Regjon e je daûr a puartâ in aule la gnove propueste di leç pe tutele de lenghe, al sarès stât impuartant vêlu inmò cun nô cu lis sôs riflessions e invîts a no vergognâsi de nestre identitât furlane, invidantnus a jessi braurôs di ce che di plui fuart e biel o vin te nestre culture: la nestre lenghe furlane.
Ta cheste setemane, cjârs coleghis, Us ai cun plasê fat vê une copie dal so libri “Une scuele pai furlans” li che e ven fûr dute la fuarce profetiche e la grandece inteletuâl di un om che nol è stât dome un grant esponent dal mont culturâl e predi, ma ancje un mestri che za 30 agns indaûr al veve anticipât temis e esperiencis che vuê o sintìn tant a fevelâ.
O speri che la leture us vedi dât sponts di riflession e stiçade la curiositât.
O ai vude la furtune di cognossilu di persone tai ultins mês de sô vite e mi auguri che il so testament inteletuâl al podedi jessi pardabon chê semence che e cressarà simpri di plui ancje cumò ce lui al à lassât cheste esistence terene. In cheste ete globalizade e cu la tindince a omologâsi, ducj, ancje i singui comuns e i singui conseîrs comunâi a àn il dovê di difindi la identitât de nestre int, tacant dai plui piçui za tes scuelis, parcè che al è di bant cjalâsi ator pal mont se no si cognòs di dulà che si ven. Dal sigûr, cjapant cussience de nestre realtât nus sarà ancje plui facil frontâ lis grandis sfidis ator pal mont.
Dut chest duncje par sierâsi tal nestri “curtîl”, ma te convizion che dome valorizant il “particolâr” si pues pandi une culture de integrazion tra lis identitâts difarentis presintis in Europe e no dome, ancje tal nestri comun e te nestre regjon: par chest la mozion in argoment e fâs riferiment ancje aes comunitâts slovenis e gjermanofonis de nestre regjon, propit intune vision di Friûl tant che esempli e laboratori par une convivence tra i popui, duncje intune solidarietât tra comunitâts linguistichis.
Juste ai 26 di Setembar il Consei di Europe, e no un gruput di “cuatri furlaniscj”, al à fissât la zornade europeane des lenghis disint a clâr trê principis di fonde:

  • La Europe e je plurilengâl e lu sarà simpri;
  • L'aprendiment des lenghis al ufrìs une oportunitât ai citadins;
  • Ognidun al è in stât di fâlu.
I rapuarts internazionâi a àn dibisugne sì di une lenghe francje internazionâl, ma al sarès secont me contraditori fevelâ di Europe cence visâsi des lenghis locâls: chest lu disin lis normis europeanis.

Come che al à dit ancje cualchi timp indaûr il president de Sardegne Soru “No capìs parcè che noaltris o vin la responsabilitât di protezi un nuraghe, di protezi e salvâ cualchi piere di une citât puniche e magari o vin di lâ a pierdi une robe vive tant che la lenghe, che e fevele di nô centant di plui di un muret punic: e fevele di un popul e di une storie cent mil voltis di plui di cuatri pieris metudis in rie”. E o soi convint che ancje pre Toni le varès pensade te stesse maniere ancje se noaltris no vin i nuraghis, parcè che no je une cuestion ni di colôr politic ni di origjins, ma di valôrs di fonde di un popul, che al sedi sart o furlan, ma tal stes câs popui che a àn voie di frontâ la sfide de globalizazion cu la lôr muse e cuntun element identitari ben definît, ma in pericul.
E cumò vignint al detai de mozion presentade, o scuen dî che la propueste di leç in esam in consei regjonâl e je stade argoment di un lunc dibatiment chest Istât: tancj pas indevant a son stâts fat, ma si pues miorâle inmò e no si à di sbassâ il nivel di atenzion. Ve chi la mozion che us lei...

Zornade europeane des lenghis

Vuê e je la zornade europeane des lenghis.

Ve ca il program di ce che al è dongje di nô.

25 settembre 2007

Piçui erois a saressin cressûts...

Come prometût a Thermo, ve ca une foto dal album dai ricuarts...

Al jere scrit tal destin... ve ca il Superfurlan che cuant che al jere piçul, in spiete de maiute juste, za si vistive di eroi: cui isal che nol à mai fat une foto come cheste?

Cheste foto e partecipe a Tantottanta.

Une rie no je un confin

Domenie ai 30 di Setembar si scree la mostre dentri dal progjet Intereg Italie Austrie tal Cjistiel di Susans aes 11.00.

Chescj i artiscj:
AnaMAS, GiulioBAISTROCCHI, LeoGANS, RenatoMERTENS, ThomasWIZANY, EdiFASIOLO AstridRIEDER, MonicaZUMINO, GloriaZOITL, ElenaCLARA, AlessioBRUGNOLI, CooperativaRAGNATELA, NikiPFEIFFER, MimmoMIRABILE, FaustoDEGANUTTI, ElioLucioMODESTO, AnitaCOSSETTINI, FabioZOLLI, OnorinaVIT, SilvanoCASTELLAN, LauraDIBIDINO, JackCAMOLETTI, LuiginaIACUZZI, EnricoDALBELLO, GiulianaFADI, ArturoPICCA, FernandoGEROMETTA, FrankQUATTRIN, LedaNASSIMBENI, VittorioSGOIFO, ValterZUCCHIATTI, RobertaMASETTI, UgoRASSATTI, EugenioEnricoMILANESE, SilviaGIUSTI, FerminaFORTE, BrunoDARIO, ElenaFASIOLO, GabriellaLEONARDUZZI, FulviaSPIZZO, DaniaDELLECASE, SarahPERSELLO, MarcoCARNELOS, CarmelaDILENO, GabrieleFASIOLO, AndreaDALLACOSTA, LucianoCLINAZ, KatrinTRAMPITSCH.
La mostre e je curade di Alessandro Venuti.

E il program complet us al met dentri dal prin coment.

Te foto, la opare di Ana Mas (Austrie) che si intitule apont "Une rie no je un confin" (titul origjinâl: "Una linea non è un confine")

23 settembre 2007

Gjite a Verzegnis

Verzegnis 23/09/2007 f
Verzegnis 23/09/2007 b
O ai a pene metude vie la moto: o ai fat un zirut in Cjargne.
O volevi lâ a Dieç pe mostre su la Apocalìs, ma ae fin, vignude ore di gustâ, o ai fat un salt al Fogolâr, li di Manuela: cussì la gjite che e veve di jessi culturâl si è trasformade in gjite gastronomiche!
Chest ce che o ai mangjât: di antipast "tocj in braide cun coculis e rosmarin", di prin "vuardi cun luianie e porcins", di secont "frico di patatis cun polente rustide", aghe "Goccia di Carnia" e cafè coret (juste un sclip di gnapute parcè che in moto no si pues esagjerâ). Mangjât come un pape e servît e riverît: Manuela no dome e je une frute biele e simpatiche, ma ancje une coghe super cuntun ristorant pardabon ecezionâl.
Po dopo o ai polsât un moment e cuant che o jeri sigûr che ancje "soflant" nol sarès sucedût nuie, o ai tornât a piâ la moto e mi soi inviât sù par Siele Cjanzutan fint jù pal cjanâl di Sant Francesc, Spilimberc, Feagne e vie fint a cjase.
Propit une zornade spetacolâr: no sai parcè che o voi spes in Cjargne in moto... forsit semplicementri parcè che la Cjargne e je biele e vonde.

Tes foto: la mont Mariane viodude di Cjacis di Verzegnis

E Edi ce fasial?

Fint cumò no vevi mai frontât la cuestion de candidature di Edi Snaidero pes prossimis regjonâls. Ma dopo setemanis che si fevele di un pussibil candidât pe Regjon che al ven di Maian, mi semee che aromai si puedi dî alc.
Dal sigûr e sarès une candidature autorevule: un che al è a cjâf di une aziende di sucès nol à dibisugne dai miei compliments.
No sai se ae fin al acetarà o no.
Dal sigûr però, in cualitât di sempliç eletôr che al à votât di chê bande e che al volarès vinci lis elezions regjonâls, o dîs dome che il timp al passe...
Se Illy, tal 2003 al à vinçût, buine colpe le à la Cdl che e à brusât une vitorie sigure lassant a cjase Renzo Tondo.
Ma no stin a dismenteâsi che l'ex Sindic di Triest (2 mandâts) e ex parlamentâr (1 legjislature), ancje se al veve za une lungje esperience di politiche (mi fasin ridi chei che a definissin Illy "esterni a la politiche": nol varà la tessare, ma politiche a 'nd à masanade avonde), al à tacât a fâ campagne eletorâl cuasi un an prime des elezions, metint in cjamp dute la fuarce mediatiche des sôs risorsis.
Chest par dî che il prossim candidât de Cdl pes regjonâls al varà un biel "ce fâ" e "ce cori", stant che cheste volte Illy al è di mês che al fâs campagne eletorâl, ma cheste volte le fâs come President in cjarie.
O met achì dome une declarazion di un politic che inmò une volte al à dimostrât classe di vendi e grande coretece: «Ho sempre detto a Berlusconi che sarei rimasto a disposizione di un progetto vincente. Darò una mano forte per vincere le prossime elezioni regionali qualora Snaidero confermi la sua disponibilità ad accettare la candidatura» (il politic che al à dit cussì sul Mv dai 2 di Setembar dal 2007 al è Renzo Tondo).
Ma intant l'orloi al cor e e plui il timp al passe, piês al è.

Zucar e Cheb

Sacris scrituris, La Gjenesi


La domenie e je zornade di leturis sacris: achì al baste dome scoltâ, ma se si à voie si pues ancje lei il prin coment.

Dedicât a... decidêt voaltris!

22 settembre 2007

Leons ce sielzi




Guccini

La FriûlTV e cres

Grazie a Luca Peresson, la FriûlTV e cres simpri plui.
Cumò se o lais sul sît o podês viodi cualchi biele novitât: a çampe i links par scoltâ Radio Onde Furlane cui fûs oraris di Argjentine e Canadà.
Simpri de Argjentine e rive la novitât de StreamTV che nus permet di scoltâ e viodi il studi di Radio FM Comunicâr, di dulà che si trasmet Fuarce Furlans (in repliche ogni lunis aes 13.30 su Radio Onde Furlane FM 90.0 Mhz).
Ta cheste trasmission o ai vût l'onôr di jessi ospit 2 voltis: la ultime, juste aes 17.30 di vuê sabide 22 di Setembar dal 2007.

Un mandi di cûr a Claudio Roya, ae redazion de Radio, ai curadôrs dal program Fuarce Furlans e a dute Colonia Caroya (te foto, la corse dal Purcit, altri che chê dai mus di Feagne!)

A proposit di imprescj: PacarDay

Juste cualchi zornade indaûr si fevelave di tetoiis e di imprescj: ve ca alore in azion il sotscrit cuntun imprest!
Bon bon, nol sarà grant come chel altri, ma al va benon... ;-)

Un grazie a la frute che mi à fotografât l'imprest e a Toni Pesenato e a la R.T.I.A snc che vûe e doman, (ma ancje sabide e domenie che a vegnin) a fasin une sorte di "PacarDay" (la zornade de pacare, ndr) par provâ i imprescj che a son tal plaçâl.

Al è ancje un bon sotgol di cerçâ!

Amarcord Friuli Doc

La edizion di Friuli Doc 2007 e je stade une edizion di record, che no si pues smenteâ. Dal sigûr no le dismentee il Gnut e ducj chei de Pro Majano che tal lôr stand sù tal plaçâl dal Cjistiel a àn vût une visite di ecezion: la Cristina Chiabotto (te foto cul Gnut: di notâ la espression spierdude dal president... e cemût dâi tuart?), za miss Italie e pardabon une sorte di fr...ute!
Compliments!

Consei Comunâl martars ai 25

Martars aes 18.30 al è convocât il Consei Comunâl: ve ca l'ordin dal dì.
Dai che forsit la Cdl e presente il gnûf cjâf grup...

21 settembre 2007

La tuie

Stant che al è di cualchi dì che si fevele di gjats e gjatis (thermo, ocjo che ti sgrife...) ve ca la mê (anzit, di mê sûr...) bielissime gjate!

Une brute notizie - inzornaments 2

Al jere un pôc che no si sintive a fevelâ, ma îr sui gjornâi a son tornâts a vign¡i fûr doi articul su la cuestion des molestiis ta scuele di bal...

20 settembre 2007

O ai i biliets!!!


Vasco Rossi -- E....
O soi a pene rivât cjase e te sachete o ai i biliets pal conciert di Vasco de setemane prossime.
E...
al sarà il tierç che o voi a viodi: i ultins no mai soi mai pierdûts!

19 settembre 2007

Motârs a Pêrs

Il gno amì Moreno mi vise che ancje chest an e sarà a Pêrs la Octobiker, la fieste autunâl pai motârs di chenti e no dome.
Duncje, ducj a Pêrs in moto par scoltâ buine musiche, viodi il video de Bikerfest di chest an, mangjâ e bevi (aghe, mi racomandi) in compagnie e parcè no sclarî il voli cun cualchi biele parussule!

18 settembre 2007

Sclariments

O ai simpri dit che chest blog al è stât creât par fevelâ de mês robis, ma ancje par un san dibatiment. Par chest no mi displâs se la int achì e à voie di confrontâsi come che al è sucedût cualchi zornade indaûr. Jo no soi jentrât tal mert de cuestion, ancje parcè che no ai elements par lâ a fonts tal discors, ma mi interesse di capî e sintî la vôs di ducj. Mi è rivade une mail di Adriano Ceschia, clamât in cause plui voltis, che o publichi achì di sot. Prin di lassâus a la leture, o consei pal ben des personis coivoltis, di cjapâ contat personalmentri tra di lôr, se a àn voie: tantis voltis a cuatri voi si sclarisissi miôr soredut par cuestions cussì specifichis che a rivuardin tancj fats passâts e i rapuarts tra lis personis.
Dit chest, ve chi la mail di Adrian Cescje.

Tai dîs passâts e je stade une polemiche tra Alberto di Caporiacco e Luca Peresson vignude fûr di une precisazion di Peresson suntun scrit di di Caporiacco, che mi clamave in cause. Si tratave dal rûl che o varès vût jo, e cun mê il Moviment Friûl, inte vicende de leç regjonâl in discussion pe lenghe furlane.
Al è just che o fasi cualchi precisazion.
O scomenci cul dî che jo o soi stât, o soi e o resti un responsabil politic dal Mf, ma cuant che o jerin membri dal Olf dal 1996 al 2005 e cumò che o jeri e o soi membri de Comission pai obietîfs didatics dal Arlef, non jeri e no soi dentri in chei orghins parcè che o rapresenti il Mf. Che o vedi vude pocje o tante part intes sieltis de politiche linguistiche pe lenghe furlane (e indi ai vude tante, lu dîs propit cence modestie), no pues dî che i risultâts de mê azion a son di atribuî al Mf come che impen si podarès atribuî a un partît la presentazion di une propueste di leç sô intun consei regjonâl. Intun altri significât al è merit dal Mf ce che al è sucedût in chescj agns intor de lenghe furlane. Fint a ducj i agns 80 il Mf al à lotât bessôl tant che fuarce politiche pe afermazion istituzionâl de lenghe furlane, presentant propueste di leç (refudade dal consei regjonâl di in chê volte!) e cjapant sù desinis di miârs di firmis in ogni contrade dal Friûl, e al so interni al à elaborade une strategjie di intervent cul definî chei ponts che po a distance di agns a son deventâts i ponts di fonde de leç 15/99 (la prime formulazion de leç e à la firme di Adrian Cescje, passade po a Fontanin president de Regjon tal 1993 e a Cecot par che le fasessin lâ indenant) e la propueste di leç de Comission pai obietîfs didatics dal Arlef dal 2006. Cemût mai? Parcè che Adrian Cescje, che o soi jo, ju veve pensâts e fats deventâ patrimoni de politiche dal Mf tai agns 70 e 80, e simpri Adrian Cescje al à continuât a proponiju ancje daspò dal ritîr dal Mf tal 1992 in dutis lis sedis dulà che al jere presint, e a domandâ che altris personis di buine volontât e che a amin la nestre lenghe ju presentassin tant che se a fossin robe lôr. Chest al significhe che altris personis che no son dal Mf a àn dât il lôr contribût e puartadis novitâts, ma lis liniis di fonde di chês leçs o propuestis di leç a jerin za patrimoni storic dal Mf. Tai agns 90 e vuê il Mf al è presint cu la sô anime politiche li che a son presints i siei militants di une volte che si riferissin acjemò ai siei valôrs, ancje se ai voi di chei che no san o no vuelin savê e viodi nol imparìs. A voltis il Mf al è presint ancje intune forme plui concrete di une presince ideâl. Dal sigûr li che al è presint Adrian Cescje.
E cumò cualchi altre precisazion. La propueste di leç de maiorance regjonâl e je fate di dôs parts, che a varessin vût di sei dôs propuestis di leç: une part e je la revision (o la continuazion de distruzion, a gno viodi) de leç 15/99, e chê altre e je un intervent pal insegnament dal furlan tes scuelis. A àn volût fândi une uniche leç, che si ur veve domandât di fândi dôs separadis, ma il probleme nol è tant chel. Il probleme al è che di une bande a àn metût te revision de 15 un articul che al permet di podê modificâ la grafie uficiâl (se al sucedès chest, o podaressin butâ vie 10 e plui agns di politiche linguistiche te editorie, e o varessin garantide la precarietât di ogni azion pe lenghe scrite) e di podê modificâ la aplicazion teritoriâl de leç, di chê altre a àn prontât un dispositîf pal insegnament tes scuelis che nol mudarà la situazion atuâl tes scuelis de lenghe furlane, parcè che si continuarà a fâ insegnament in aparence, in forme margjinâl e no sistematiche, par progjets li che i bêçs a saran doprâts par altri che pe lenghe. O soi daûr a dâ un judizi tecnic e no ideologjic de soluzion cjatade fûr di cheste maiorance regjonâl par dâle di intindi che e à tant a cûr la lenghe furlane che e à fintremai prontade une leç. La leç le ai definide une leç-trufe, e tâl, par cui che i interesse, le à definide ancje il Moviment Friûl, che par dut li che al podarà fâlu savê lu fasarà savê. Ma su chest cantin di aspiets tecnics no voi indenant. Magari une altre volte.
Tal 2003 o ai domandade tant che membri dal Olf e otignude la formazion di une Comission pai obietîfs didatics che po e je passade al Arlef, fate di me, di Bruno Forte, di Silvana Fachin Schiavi, di Maria Carminati, di Odorico Serena, di Roberto Dapit, di Alessandra Burelli. Prin e à lavorât par meti jù i programs di scuele pal insegnament dal furlan (2004) e po par une propueste di leç tecnichementri buine pal insegnament, te suaze dal plurilinguisim. E jere la realizazion concrete di un program di azion vieri dal Mf, e jo, pe mê part li dentri, lu proponevi, cence vê bisugne di dî che al jere ce che al veve volût l’Mf fintremai dai agns 70 e 80. La presince di chei altris membris de comission e significave inricjî chês liniis di intervent di competencis tecnichis inzornadis cualificadis e ad hoc pai agns di cumò. Prin di metisi a lavorâ su la propueste, la Comission e mandà tal 2005 ai conseîrs regjonâi un document ben articolât e fat di liniis di intervent pal insegnament tes scuelis, avonde ben definidis, che dome la Lega Nord e à trasformât in propueste di leç (la prime presetade in materie). Po, cul 2006, la Comission e prontà la sô propueste di leç, domandade po tra lis altris dal president dal Consei Tesini. E tal zenâr 2007 e prontà lis normis transitoriis pe aplicazion de leç. In cheste propueste di leç o ai spindût il gno cerviel e in chê e dome in chê mi ricognòs jo e si ricognòs l’Mf. Intant la Zonte e veve formade une comission pe revision de leç 15, che si ocupave ancje dal insegnament, e la comission pe istruzion dal Consei e tacave a discuti la cuistion. La LN e cjapave la leç de comission dal Arlef e le firmave ancje chê tant che propueste di leç regjonâl par che si le discutès, se no nissun altri le varès cjapade in considerazion. Ce che al è deventât di chês propuestis, lu varessin di savê, e jo lu ripet: une propueste di leç-trufe.
In compens e je une propueste di leç (che salacor e deventarà une leç) che i permetarà a Illy di presentâsi in campagne eletorâl tant che grant amì de lenghe furlane, parcè che, a front de violence nazionalistiche e fassiste di diestre e di çampe cuintri de lenghe furlane di chescj mês, la posizion di Illy e de propueste di maiorance e somee a tancj une grande robe. E il Comitât 482 cu la manifestazion stade a Udin, poiât dal Comitât pe autonomie sot de direzion di Arnaldo Baracet, al à permetût (magari cuintri des sôs intenzions) che Illy e la sô compagnie e fasessin la biele figure di salvadôrs de lenghe furlane te scuelis e fûr, cuintri de furie nazionalistiche dai lôr aversaris e dai lôr stes amîs di partît. Ma nol à permetût che nissun membri de Comission pai obietîfs didatics dal Arlef, che al varès vude la competence par fâlu e fâlu ben, ju disturbàs se al ves esplicade la propueste di leç sô e i difiets di chê de maiorance, ni Cescje, che lu veve domandât, ni altris. E pûr, dut il davoi che al è sucedût, al è sucedût parcè che cualchidun lu veve inviât passant par chê Comission! Ise stade dome che une distrazion? Mah, cui che al vûl crodilu, che lu crodi.
La storie e je cheste.
Ma e je dome une piçule part di dute la storie.

Adrian Cescje.

No ai i dêts tal nâs

Di cualchi timp, te blogosfere a zirin stranis insinuazions sul gno cont: lait a viodi achì...
Intant, par clarece di informazion o torni a meti plui in grant la foto cu la bielissime maiute e lis spilutis dai gnognosaurs di Dree.

Al è inmò timp par lâ a viodi la mostre.

17 settembre 2007

Interviste a Radio Onde Furlane



Par cui che si fos perdût la interviste di Lunis a buinore, ve chi la regjistrazion fate a Radio Onde Furlane che nus à ospitâts me e il Dree.
Inmò un grazie al diretôr Mauro Missana.
Cui che al à voie al pues ancje abonâsi a La Patrie dal Friûl:
25,00 euros (pal forest 30,00 euros) sul cont corint postal n.12052338 intestât a "LA PATRIE DAL FRIÛL" Glemone.

Redazion e aministrazion V. Basilio Brollo, 6 - 33013 Glemone (Udin)
TEL. 0432 981411
FAX 0432 891941
La gnove e-mail de Patrie: info@lapatriedalfriul.org

16 settembre 2007

Buine cjaminade, Elio

O mandi un salût a Elio Segrado, il papà de mê amie Chiara.
Cumò Elio al è che al cjamine bande Sant Jacum di Galizie e al barufe cu lis visiis.
E je une biele robe, chê di fâ chest pelegrinaç: a son centenârs di km a pît e dal sigûr une esperience che ti lasse alc di profont.
Mandi Elio e buine cjaminade!

Un mandi ancje ae siore Graziana (la mame di Chiara) e une bussade a Chiara in Egjit!

Ocjo, us ten di voli...

O ai screât i ocjâi gnûfs... biei, eh?

15 settembre 2007

Lunis o soi a Onde Furlane

Come ogni mês, Mauro Missana, diretôr di Radio Onde Furlane, al ospite La Patrie dal Friûl dentri de sô trasmission Ator Ator.
Lunis aes 10.30 cirche, jo e il Dree, diretôr de riviste, o sarìn siei ospits par presentâ il numar di Setembar da La Patrie dal Friûl, cuntun speciâl su lis lenghis minoritariis in Italie.
O vin sielt chest teme parcè che ai 26 di Setembar e je la Zornade Europeane des Lenghis.
O ringrazii Radio Onde Furlane pe disponibilitât e pe biele colaborazion che o sin daûr a meti in pîts.
Restait in scolte e cui che al à voie al pues ancje abonâsi a La Patrie dal Friûl:

25,00 euros (pal forest 30,00 euros) sul cont corint postal n.12052338 intestât a "LA PATRIE DAL FRIÛL" Glemone.

Redazion e aministrazion V. Basilio Brollo, 6 - 33013 Glemone (Udin)
TEL. 0432 981411
FAX 0432 891941
La gnove e-mail de Patrie: info@lapatriedalfriul.org

Mandi ai Furlans di Argjentine

Mi è rivât chest avîs di Colonia Caroya. O aprofiti par saludâ il Circul Alef e il so president Claudio Roya, gno amì!
Un mandi di cûr a ducj i furlans che a son di là de "grande Aghe oceaniche" e ator pal mont.

Ve ca il Diari di Setembar

Al è jessût il numar di Setembar dal mensîl di Tosoni.

12 settembre 2007

Tui tui

Intun coment dal blog e je vignude fûr une cuestion relative ai gjats a Deveà (te foto la mê bielissime tuie, che no va ator).
O ai fat un pâr di domandis in paîs e dut ce che o ai savût al è di une riunion avonde strane li che dutis lis associazion a son stadis clamadis par decidi se al jere just destinâ une sale dal centri di Deveà par dâ ospitalitât a cualchi gjatut che nol à altri domicili.
Jo no sai ben ce che al è saltât fûr, ma mi semee che ni pal ben dai gjatuts ni pal ûs che al è previodût pai centris sociâi, al sedi just che chestis besteutis a sedin tignudis ta chest puest.
E no mi semee nancje just disturbâ la int par fevelâ di une cuestion come cheste: forsit plui di cualchidun al à alc di miôr di fâ.
Ma o podarès no vê vût une informazion corete e o domandi cualchi informazion di plui se cualchidun dai letôrs al cognòs cualchi particolâr di plui.
E su ispirazion di Thermonuke, us met une robute di scoltâ...

11 settembre 2007

11 di Setembar

Cheste zornade e à pe storie resinte un significât particolâr che nus puarte indaûr a ce che al è sucedût a New York tal 2001.
Ma ai 11 di Setembar, in Catalogne si celebre un aniversari: nus conte alc Sandri Carrozzo...

10 settembre 2007

Assise des rapresentancis furlanis

Fin cumò a difese de lenghe furlane si son jevadis dome vôs singulis, plui o mancul autorevulis. Cumò il front furlanist si mobilite e al da apontament a ducj chei che a crodin tal valôr de indentitât di un popul, ancje piçul, te Gnove Europe che e cres di an in an, si da apontament pai 11 di Setembar aes 17.30 te Aula magna de Universitât dal Friûl in plaçâl Kolbe.
Promotôrs dal incuintri a son il stes ateneu, il comitât 482, il comitât pe autonomie e pal rilanç dal Friûl, i media de diocesi di Udin Vite Catoliche e Radio Spazio 103 e la emitent radiofoniche Onde Furlane. Argoment, la poie dai previodiments che il Consei regjonâl al esaminarà in autun par fissâ lis normis di tutele e valorizazion des lenghis minoritariis presintis in Regjon.

08 settembre 2007

Zucchiatti pinsîr

Il 8 di Setembar al rapresente une date avonde particolâr pe storie de Italie. Vuê no savevi propit ce scrivi e duncje mi limiti a fâ un tic di rassegne stampe: o speravi di vê sclariments a proposit un ciert document che nus veve mandât Intesa per Majano e juste îr sul MV, al à dite la sô l'assessôr Zucchiatti (te foto al è chel a drete, cun De Sabbata-chel tal mieç- e il Sindic Zonta a çampe...).

Par coretece di informazion o ai di fâ une precisazion (fate vuê sabide ai 8/9/2007 aes 10.30).
La foto e je stade fate a Cjasesole vinars di sere ai 7 di Setembar. La organizazion de fieste e à invidât dut il consei comunâl a une cene. No jerin dome lis personis te foto, ma ancje altris conseîrs (a une cierte ore o soi rivât ancje jo).
Jo stes o ai lamentât pocje clarece tes vicendis des ultimis setemanis e se no ves scrit cheste specifiche o varès fat il stes erôr: une informazion no corete. E chest nol sarès stât just: al è di bant lamentâsi se si fâs par prin l'erôr. Duncje, ancje se dentri o cjatarês cualchi coment un tic ironic, par rispiet des personis e des istituzions che chestis a rapresentin, no vin di dismenteâ (jo par prin) di cirî di restâ corets.
Par tant o speri di vê sclarît.

07 settembre 2007

Gnognomostre

Joibe ai 14 di setembar, a lis 6 sotsere (ore 18.00) li dal Ginger bar di via Poscolle 5 a Udin , si scree la mostre «I Gnognosaurs» cun protagoniscj i fumuts disegnâts di Andrea «Dree» Venier.
La mostre e larà indevant par un mês. Event in colaborazion cun «Ateneo delle idee».
I Gnognosaurs a tachin a jessi publicâts par talian cul non di «Scemosauri», su lis pagjinis dal mensîl «Dino Gildo» dal editôr Barbieri. Tal 1995 a son simpri par talian cul non di «Pazzosauri» su lis pagjinis di «Jeans Card Notizie» - diretôr artistic Sandri Di Suald - periodic fat par cont di un consorzi di bancjis furlanis. Pôc dopo par furlan a deventin «i Gnognosaurs» e il non al funzione cussì ben e al è simpatic al public di ogni divignince, che di li indevant al sarà l'unic non uficiâl des strichis in cualsisei lenghe che a vegnin publicadis.
Oltri a vignî fûr regolarmentri su la riviste par fruts «Alc&Cè», a son stâts doprâts par calendaris e poster promozionâi par pandi l'ûs de marilenghe.

06 settembre 2007

Superego

Par doprâ un eufemisim, a son zornadis anomalis... no dome a son stâts moviments e contats... ma di cualchi timp in ca ancje manifestazions di solidarietât tai miei confronts che a son rivadis di bande di int che no je de "mê" bande e no dome.
Un grazie inmò a Luigino De Sabbata, a Luche.
Dut chest o pensi che al vedi puartât ancje il bon thermonuke a dedicâ chest video... il rest lu à puartât a batiâmi come chest post! e duncje cumò becaitsi ancje la foto! ;-)
No pues no ameti che il thermo mi fâs dispès resonâ ancje se su cierts argoments no sin in sintonie. Come che no soi in sintonie su cierts altris ancje cu chei che o ai nomenât prime... Ma dome cuntun confront viert e seren si rive a resonâ, come che al sucêt cu lis altris dviersis personis che mi contatin... e come che si viôt te foto (grazie a Ranieri che me à fate!)... a panze plene si resone inmò miôr.
Lu sai, lu sai: al è un post un tic delirant, ma vuê mi leve di fâ cussì, stant che dopo vê let cierts verbâi, cierts articui e ciertis declarazions, e cierts resoconts nol sarà dal sigûr chest post a scandalizâ nissun... o forsit sì?
Dut câs o sin a cjase mê e o met ce che o ai voie, lassant vierte la puarte a ducj, ancje a chei che a volaran tirâmi jù la piel par chestis riis. Come simpri, o soi chi e no come altris che a vuachin tant ma che ae fin doprin la peraule "trasparence" dome par jemplâsi la bocje...
Us lassi, cjantant ce che nus à tirât fûr il thermonuke...

05 settembre 2007

Muris in curt - premiazions

Come che us ai za dit, chest an e jere la prime edizion di Muris in Curt, concors di curtmetraçs a Muris di Ruvigne (te foto, un panorame). Sabide di sere ai 8 di Setembar a saran la proiezion e la premiazion des oparis in concors. Al presente Dario Zampa.
Jo o sarai là, ancje parcè che o scuen par une motivazion che cumò no pues dîus... Us disarai dut ta chê sere!

04 settembre 2007

Cjasesole, la sagre e continue

Come che us ai contât, îr o ai stât a Cjasesole pal zîr in moto. E je lade come che us ai dit, ma achì o aprofiti par fâ une considerazion e un ringraziament.
La considerazion
Come che si mangje te sagre di Cjasesole, al è dificil di cjatâ ator: bon, curât e bondant. O ai cjolt un plat di cjar miste, polente e patatis che mi soi propit gjoldût.
Il ringraziament

A Dario dai Ols e a ducj chei che a dan une man (te foto dute la scuadre, cussì se ju viodês ur podês dî "BULOS" ancje voaltris che o leiês il blog) o vin di dîur dome grazie pal impegn e pal servizi che a fasin no dome a Cjasesole, ma a dute la comunitât. Tignêt dûr!

Achì il program de fieste che e continue ancje chest fin di setemane.

Un grazie ancje a Ranieri Furlan pe foto!

03 settembre 2007

Diari di Viaç - Canadà, si torne a cjase

E ancje cheste volte o vin finît. Doman o sarìn tal aereopuart par cjapâ l’avion.
O varès podût lassâ cualchi messaç di plui, ma no ai vût timp (ancje parcè che o ai rispuindût a un pâr di post... e i minûts a jerin chei che a jerin).
No podevi partî cence ringraziâ une persone ecezionâl che nus à judât tant. Lu fâs ancje a non di Carli.
Robert Pontisso (te foto al è cun so fi e so pari... e su Ezio al sarès cetant ce dî...) al è cognossût ancje par vê inviât (e inmò in dì di vuê al è impegnât te opare) ae version furlane di Mozilla Firefox, il web browers concorint (e dal dut superiôr) a chel di Microsoft.
No vierç une parentesi sul fat che al sedi un canadês la persone che par prin al à pensât di voltâ par furlan la interface grafiche di Firefox parcè che no vâl la pene fâlu cumò...
Ma personalmentri Robert al è prime di dut une persone straordenarie che o soi onorât di considerâlu amì e che di doman mi mancjarà. Ancje se cun Internet si sta pôc a mantignî o contats, gustâ insiemit e fâsi une fevelade come che al è sucedût vuê, no je la stesse robe.
Ma o soi plui fortunât di cui che mi lei... almancul jo cun lui o ai gustâ!
Un altri grant, une vore grant, grazie a Giusy che nus à judâts pardabon tant tai ultins doi documentaris.
Une ultime, curte considerazion stant che o sin che o tornìn dal viaç che al sierarà, simpri che nol sucedi alc che par dîle francje no pensi pussibil nancje di lontan, la serie dai “Diaris di viaç”: par cui che al viodarà lis imagjins a saran storiis, forsit gnovis, forsit interessantis, cuissà...; par me e par Carli al restarà il ricuart di decinis e decinis di personis maraveosis che nus àn concedût un pôc dal lôr timp ma che soredut nus àn regalât un pôc des lôrs storiis e un tocut de lôr vite. Noaltris o sin personis tant fortunadis.

Grazie e mandi Luche


Mandi Luche, Carli e Giusy: grazie a voaltris!

Vêr motâr furlan a Cjasesole

Domenie ator in moto: une des ultimis, mi sa...
Al jere un tic frescut e si tache a sintî che l'Istât al è daûr a finî.
O jeri a Cjasesole pal solit zîr che ogni an a fasin a Siele Chianzutan, ma par une schirie di motivazions (ancje il motoGP) a son stadis diviersis defezions. Ancje se no jerin in tancj, si è decidût di partî chel distès, ma la sezion custom e jere minoritarie (dome jo: ti pareve, destinât a jessi minoritari...) e duncje lis motos stradâls mi àn dât il fum...
Pensant ben di no lambicâmi plui di tant a coriur daûr e preferint une ande plui turistiche, o ai lassât che a lessin e mi soi lât a fâ un zirut di bessôl sù par Tumieç e dulintor cun calme.
Oh, mi racomandi: cheste foto le ai fate tal curtîl di mê sûr cu la moto distudade! Par strade si va simpri ben taponât e cul casc ben leât sul cjâf!

ps: grazie a Moreno pe maiute!

02 settembre 2007

Voie di salt de cuaie

Vie pal ultin consei il Sindic al à anunciât che al procedarà a "messedâ lis cjartis", ven a stâi: i assessôrs a restin chei, ma ur gambiarà lis deleghis.
Di cualchi zornade al è stât publicât un document pardabon interessant: i contats dal tandem Sindic Zonta-assessôr Zucchiatti cu la minorance di Intesa per Maiano.
Vuê sul gjornâl si lei un altri intervent firmât de minorance che e dîs cui che al à domandât i contats e i prins acuardis che a varessin vût come finalitât une gnove maiorance dal Sindic Zonta-assessôr Zucchiatti, che a varessin volût saltâ di là cun Intesa per Majano.
Che al sedi il cjalt?

No i free un caz a nissun!

Chest al è il risultât dal scandai: "Ce pensaiso des mês dimissions di cjâf grup?"
I 168 vôts a son dividûts cussì:
  1. no i free un caz (a nissun) 89 (52%)
  2. une sielte juste 35 (20%)
  3. un altri at de vuere mai finide 23 (13%)
  4. un erôr politic 13 (7%)
  5. un plasê fat ae zonte interie 6 (3%)
  6. nissune opinion2 (1%)

01 settembre 2007

FLK

Se il nero


Vuê us feveli dai FLK, grup mitic de sene musicâl furlane. Dopo siet agns a son tornâts cuntun disc (Dancing Calipso) che al à za fat fevelâ une vore. Su la Patrie dal Friûl di Setembar o vin ancje une recension dal lôr ultin lavôr.
Intant su segnali che domenie ai 2 di Setembar aes 17.30 si podarà scoltâju al Città Fiera di Martignà.
Intant compliments a ducj i components dal grup, in particolâr a Cristina Mauro, une des vôs (pocjis) plui bielis de nestre musiche (e no dome) e a Stiefin Montello, che o saludi di cûr!

Sagre a Cjasesole

E tache la Sagre de Madone dal Don, a Cjasesole.
Come simpri compliments a Dario dai Ols e a ducj chei che a dan une man par meti in pîts une des fiestis di paîs li che si mangje miôr e si sint il gust dal plasê di stâ insiemit.