Zovins e Furlanetât

Vuê o soi intervignût a la Cunvigne di Ente Friuli nel Mondo su "Zovins e furlanetât".
O soi restât scaturît pai coments che al à fat il prof. Tellia che al à fat intindi che la identitât furlane no covente...
Us propon chi l'intervent che o ai fat.

Zovins e furlanetât tal 2010

Cuant che a non da La Patrie dal Friûl o soi stât invidât a intervignî a cheste setime cunvigne dai Furlans tal mont, e o ai savût dal titul de zornade, mi soi fat une domande: aial sens fevelâ di furlanetât a zovins che forsit il Friûl no lu àn mai viodût o lu viodin vuê pe prime volte?
La domande no je banâl come che banâl no je la domande che si lee secont di me in maniere strente a une seconde domande: aial sens mantignî la nestre lenghe furlane intun mont che al devente simpri plui piçul ta cheste ete de globalizazion?
Lin par ordin.
Se vuê o sin chi, evidentementri no je dome par condividi une zornade di fieste. Piês al sarès limitâsi a un cjalâsi indaûr, lassantsi puartâ vie de nostalgjie par un Friûl che nol è plui.
Cuant che i nestris nonos a àn lassade cheste tiere, o met ancje la mê famee stant che i miei a son stâts “libars di scugnî lâ” in Argjentine (a Buenos Aires); in Gjermanie (a Colonie); in Svuizare (a Zurîc e Aarau); in Francie (a Parîs), al jere dal sigûr no par turisim ma parcè che chi e jere miserie o parcè che a vevin la ilusion di cjatâ dulà che a levin alc di miôr.

La lidrîs e je restade vive, ma chest nol baste plui.
Continuâ suntune strade dal ricuardâ ce che al è stât lassât, nol puartarà di nissune bande. Cemût podìno pensâ che i dissendents di emigrâts pal mont, int che e à savût costruîsi une posizion (par ducj o pensi a Sandra Pizzolitto, ministre dal cumierç e dal disvilup economic dal Ontario, ma tancj a saressin i esemplis) si podedin contentâ di une sunade di liron, une vilote, di un album di vecjis fotos in blanc e neri? Dut chest patrimoni al va ben e si à di tignîlu di cont, ma vuê il Friûl di chenti al à la responsabilitât morâl di fâ cognossi ce che cheste tiere e je orepresint.

Pierdi une culture al è un dam orent pal mont intîr
Duncje o vin di jessi pronts a frontâ cheste sfide cul mont di vuê, tignint presint che il pericul di pierdisi tal vilaç globalizât al è grant. E par dîle cun Robert Jhonson, gure espert di "life training e za consulent di Bill Clinton, Bill Gates e Micheal Jordan, o vin di "distinguisi par no estinguisi".
Spes tes discussions che cualchidun al imbastìs in cont dal Friûl, al capite di sintîsi a dî: “a ce coventie la lenghe furlane se o sin 600.000 mil chei che la fevelin achì e il mont al è invezit di 6 miliarts di personis”. Daûr di chest resonament aritmetic alore la stesse obiezion e podarès jessi fate ancje par dutis lis feveladis, cjapant dentri il stes inglês, il stes castilian, il stes cinês: ce plui, ce mancul o sin ducj piçui e ducj grancj a seconde dal element di confront.
Pre Antoni Beline, par agns diretôr da “La Patrie dal Friûl”, za tal 1989 al scriveve sul libri “Struture e/o culture” che o cjatais su la jentrade «A chest pont la cuistion e sarès sierade cu la prospietive, no tant lontane, che lis culturis mancul fuartis, come lis nestris, a vegnin glotudis e assimiladis di chês plui fuartis, come il talian. Cu la stesse logjiche, ancje il talian al vignarà glotût de culture anglo-americane e cussì chei che nus varan copâts nô a saran copâts ancje lôr. Ma chest nol è che mi jempli il cûr di sodisfazion. Parcè che la pierdite di une sole culture, ancje de plui rimite, e je un dam culturâl orent. Une pierdite che nissune teorie sul vilaç-globâl no pues justificâle. Un mont là che si è compagns tal sens di jessi ducj cence savôr e cence odôr e je une disgracie che ti fâs vigni frêt dome a pensâle. Imagjinâsi a vivile.
A rivuart dai piçui che si difindin, acusâts simpri di jessi antisociâi e nemîs dal progrès, che al sarès chest planete vualivât, mi permet di osservâ che la robe e je vere juste par ledrôs. Chel che al à une sô invidualitât al podarà confrontâsi, dâ e cjapâ. Il vêr indivualist al è chel che si sint citadin dal mont e vonde, par ce che nol à nuie ce dâ e nuie ce cjapâ. Dome pensâ pal so glotidôr».

Si à di montâ a cjaval, no colâ di chê altre bande
A ce covential continuâ a fâ vivi une lenghe? Montâ sù sul cjaval de modernitât nol à di significâ, taiâ la lidrîs cu la essence dal nestri jessi furlans. E il spieli di un popul al è la lenghe che chest popul al fevele: il so prin biliet di visite, la sô prime cjarte di identitât di mostrâ a chei altris popui. Par fâ une batude o disarès che il todesc al è precîs, come precise e je la sô lenghe, il talian al è cavilôs come che e je cavilose la sô lenghe, e vie indevant. La lenghe furlane e je sclete e sute come che a son i furlans. Ben si intint che ognidun di chescj aspiets al à il dret e il ledrôs de medaie, e ogni popul al è biel.
Come che al diseve Dree Venier intun editoriâl su La Patrie, duncje «La cuestion no je “dulà si vadial cul furlan” ma “dulà vadial il Friûl cence lenghe furlane”: al sparìs!»
Ve alore che al devente fondamentâl peâsi a chest fuart element di identificazion par podê continuâ a trasmeti no dome un vocabolari, ma ancje dut un sisteme di valôrs che cheste lenghe e puarte cun se.

No je dome une cuistion di lenghe.
La lenghe furlane no je dome un mieç di espression. Vere: se al fos dome chest al bastarès dome un codiç linguistic, ma o savìn ducj ce fin che al à fat l’esperanto e che l’inglês che si fevele tal cuotidian pai rapuarts internazionâi nol è la lenghe di William Shakespeare, ma une forme puare che e covente par puartâ juste il minim de informazion e che cualchidun al clame “globish”. Dal sigûr no puarte cun se chê complessitât di patrimoni che al identifiche un popul ben definît. Ce che mi preocupe di plui al è che dispès chi in Friûl al somee che al ziri chel virus strani, fi de globalizazion e che si clame “esterofilie”: o vin scuviert chei altris, dimenteantsi di noaltris. E vuê plui di cualchidun si è dismenteât di savê fevelâ furlan. Ma se i Furlans tal mont, e voaltris o sês l’esempli concret, a àn vuadagnade stime al è parcè che si presentavin cuntun patrimoni di culture, lenghe, esperience, mistîr, cognossincis, valôrs e identitât ben definîts. La storie de emigrazion furlane e je divierse de storie de emigrazion taliane, ancje se dispès e ven cjapade dentri di chê. O puarti dome l’esempli di une realtât che o ai vude la furtune di cognossi diretementri. Cuant che tal 1876 il prin ministri de Argjentine Nicolas Avellaneda al pensave a une leç di imigrazion al à cirût cuâi che a podevin jessi i destinataris di chestis assegnazions di terens e i è stât rispuindût e conseât un popul che al steve tal nord Italie, ai confins cul mont austriac, e che si clamave (e si clame) “furlans”. Nol è un câs che i sedi stât fat il nestri non: cussì tal 1878 a son rivâts il prins 295 fondadôrs che cul lôr patrimoni di cognossince e di culture a àn fat nassi cheste comunitât che inmò in dì di vuê e rapresente une realtât virtuose e esemplâr di furlanetât tal mont. E nol è l’unic câs che al testemonee la stime che il nestri popul si è vuadagnât ator pal mont.

Une clâf universâl
Covential zontâ inmò alc? Po ben, o cjali simpri tal pratic daûr di une esperience che no je masse grande, ma dal sigûr direte.
E il spont mal à dât propit il President Pieri Pittaro te conference stampe che al à fat in borc dal sâl juste martars passâts cuant che al à dit che i furlans dissendents di emigrants ator pal mont a son sui 4 milions di lôr. No saran ducj tai vertiçs dal sisteme economic tai rispetîfs paîs, ma se o provìn a pensâ che in dut il mont, chescj a puedin jessi lis “puartis par jentrâ” tai marcjâts dai 5 continents, la prospetive e gambie. E no pôc. Provait a imagjinâsi che chel fîl che al pues leâ un furlan canadês, cuntun furlan argjentin, passant par un furlan european, fint a un furlan australian si clamedi lenghe furlane, permetint cussì di cori di une bande a di chê altre dal mont, cence mai gambiâ no dome codiç, ma nancje identitât: ce sensazion provaiso cuant che o sintîs a fevelâ par furlan? No ise za di se une clâf che ti vierç cun plui facilitât e in mancul timp chê puarte clamade “difidence”? E ta chest mont che al va simpri plui di corse, i vêrs siôrs a son chei che a rivaran a spindi miôr il lôr timp. No ise une oportunitât che forsit o vin pierdude masse voltis ta chescj agns? Trope economie no puedie zirâ se in ogni continent i furlans a decidin di metisi in rêt e fâsi di tramit par relatîfs marcjâts economics, deventant cussì pont di riferiment par chei altris furlans? Ce isal miôr di dut, se no podê contâ suntune pussibilitât di comunicazion za nestre? Nissun dinee la impuartance di imparâ ancje chês altris lenghis, ancje parcè che chi buine part e cognòs za plui di une lenghe e duncje o pensi che nissun al puedi acusânus di jessi sierâts. Anzit, i studis a confermin che il frut che al nas intun ambient plurilengâl (tal nestri câs, furlan-talian; furlan-castilian; furlan-inglês e vie indevant) al disvilupe abilitâts superiôrs che i dan un vantaç ancje tal imparâ gnovis lenghis (us consei la leture dal libri: “Il cjâf dai furlans” di Franc Fari, neurolinguist furlan di nomee mondiâl). Duncje se o vin za une briscule di plui, parcè no zuiâsile?

La esperience di “La Patrie dal Friûl”
Vignint a la nestre ativitât plui specifiche, lu vin za sperimentât tal concret. Di cuant jo e Dree Venier tal 2006 o sin stâts clamâts di pre Antoni Beline e o vin decidût di metisi al servizi di chest gjornâl storic, nassût tal 1946 e che fin dai prins numars al vignive fûr dut par furlan (ancje in agns che no jerin contribûts pe lenghe furlane), o vin cirût di slargjâ lis colaborazions sedi dal pont di viste anagrafic, tirant dentri zovins e poiantsi su lis tecnologjiis di vuê, sedi dal pont di viste gjeografic. L'impuartant al jere, e al è ancjemò cul diretôr di vuê Dree Valcic, continuâ a fâ un gjornâl par furlan. E la lenghe furlane e je stade il fîl che nus à permetût di tirâ dongje colaborazions di dut il mont: il stes Dree Venier nol vîf in Friûl, ma a Milan; o vin Chiara Segrado che al Cairo, in Egjit, e lavorave te Bancje mondiâl e nus à vût scrit di finance; za di mês o vin a Colonia Caroya Marta Copetti e Claudio Roya che nus tegnin informâts di ce che al sucêt di là dal Ocean; o vin une rubriche su la Austrie, scrite di Janez Erat, un sloven straferît là e inamorât dal furlan; e sul prossim numar di Avost, la federazion dai Fogolârs dal Canadà (cul President Ivano Cargnello e Sonya David) e je stade determinante par podê vê l'onôr di intervistâ Sandra Pizzolitto Pupatello, ministre dal cumierç e dal disvilup economic dal Ontario. Us fâs dome une anticipazion di ce che nus à dit jê (che tra l'altri, e fevele par inglês e benon par furlan e no dome la nestre lenghe) «Il furlan al pues deventâ la “lenghe francje” parcè che o pensi che cuant che i Furlans si cjatin pal mont, chest al è za un pas in plui: il fat di vê lis stessis origjins al permet subit di jessi in sintonie. E al jude ancje i rapuarts economics parcè che tu ti sintis za de stesse famee». E se o zontìn a cheste frase ce che mi à dit subit dopo, che stant la crisi dai USA a stan cirint gnûfs marcjâts e che «Il Friûl al podarès jessi la puarte de Europe pal Canadà», si capìs subit l'aspiet propit PRATIC e ECONOMIC che la afermazion di apartignince di Sandra Pizzolitto Pupatello si tire daûr, e di ce sorte di ocasions che o podìn vê devant. Isal il câs di pierdi un caric di briscule di cheste sorte?
E ducj chescj rapuarts, che a son dome une cerce di dute la ativitât e i contats che o vin vût in chescj passe 3 agns di lavôr, a son nassûts in gracie dal fat che o fevelìn e o scrivìn par furlan. Us dîs chest no cun chê di fâ viodi “ce brâfs che o sin”, ma par dâ un esempli concret di ce potenzialitâts che il nestri popul al à. Noaltris o vin fat zirâ informazion, parcè no podaressial chest il principi chel che al fâs zirâ ancje chei altris rapuarts economics tra i furlans ator pal mont?

La nature nus insegne
Baste cjalâsi ator par vê i insegnaments che ti coventin te vite.
Une plante cence la lidrîs e cence la tiere par supâ ce che i covente par vivi, si secje e e mûr.
Une plante cuntune lidrîs debile, al prin soflâ di burlaç e cole, si secje e e mûr.
Dome chê plante che e à lidrîs profondis, e rive no dome a butâ e a tignî bot ai burlaçs, ma ancje e slargje simpri di plui i siei ramaçs, dant fueis e pomis.
Chei ramaçs, chês fueis e chês pomis che a àn lidrîs in Friûl e che a supin chê linfe che o podìn clamâ lenghe furlane, o sês ducj voaltris, o sin ducj noaltris, Furlans tal mont.

Mandi Emilio Crozzolo

Mi àn visât che al è mancjât Emilio Crozzolo, president de Societât Furlane di Buenos Aires. Jo no lu cognossevi di persone, ma cuant che tal 2007 (che in chel an la Societât e à fat 80 agns) o vin proponude la FriûlTV nus veve mandât un messaç video che us torni a proponi. Jo lu ricuardarai cussì.
Un mandi di cûr a ducj i furlans di Buenos Aires e a la famee di Emilio Crozzolo in chest moment dificil.

Un pas a la volte...

Dal sigûr o vês let ducj de notizie che e rivuarde la Arlef e la scuadre di balon dal Udin, che a àn firmât un acuardi par promovi la lenghe furlane (fracait chi par lei il comunicât). Prin pas, la consulence pe version par furlan dal sît www.udinese.it (te foto, gjavade fûr dal sît uficiâl dal Udin o podês viodi il president Franco Soldati cul president de Arlef, Lorenzo Zanon: compliments e grazie a ducj i doi e a la famee Pozzo par cheste firme).
Jo o soi content par tancj motîfs: prin di dut parcè che al è di timp che o speravi ta chest pas. Lu vevi za di tant sugjerît al president dal Udin Soldati e lu ringrazii par cheste sensibilitât. Cence veleitâts di paternitât de idee, o speri tal gno piçul di vê contribuît ancje jo cu lis mês informazions a cjapâ cheste decision.
Po dopo o soi content parcè che cumò l'Udin (scusait ma jo no rivi a clamâle Udinês, mi plâs di plui cussì, come che le ai clamade fin di piçul) al vedi cjapade la strade di grandis scuadris come il Barcelone (che e à il sît prin par catalan) e l'Atletic Bilbao (che lu à par basc).
Par chest, continuant i ringraziaments prin di dut o dîs grazie ai Fantats furlans, che al è di agnorums che a batin su chest argoment e Radio Onde Furlane che e à tacât a fâ dal an passât la trasmission di Enrico Turloni, il Balon al è di ducj.
E grazie ancje al Associazion dal Udinese Club (di chest an e à volût ancje la colaborazion cu La Patrie dal Friûl) e a Friuli nel mondo che di timp a puartin indevant il discors cui tifôs e i emigrâts. Cun di plui, vêso mai viodût il bandieron che al ven tirât sui distints e che al è stât realizât cul contribût de provincie di Udin? Cuant che lu ai viodût dal vêr l'an passât, o soi restât cence flât di trop content che o jeri!
Sierant o ai voie di ringraziâ ancje Massimo Lombardo de agjenzie Alan Norman che e je chê che e cure sedi il sît dal Udin che chel de Arlef, parcè che secont me un rûl lu à vût ancje lui.
Cuant che si lavore insiemit e la idee e je buine, prin o dopo i risultâts a rivin: Alè Udin!!!

Marta Copetti di Colonia Caroya

Par tancj Marta Copetti e je une vôs: la vôs de trasmission "Fuarce Furlans" di Radio FM Comunicar di Colonia Caroya.

E ancje jo le ai cognossude pe prime volte grazie a la radio: o ai ancje vût il plasê di jessi so ospit cualchi volte, midiant di une telefonade o di un colegament skype che di fat ti anulin la distance tra il Friûl e la Argjentine.

Ma il plasê plui grant al è chel che o ai vût fevelanti di persone e danti la man stant che Marta e je in Friûl par cualchi dì inmò e si sin cjatâts. I ai regalât une copie dal ultin numar de Patrie dal Friûl e cualchi libri di pre Antoni Beline par che ju puarti te lôr biblioteche pai Furlans di Colonia Caroya.

No finarai mai di dâmi di maravee a pensâ che di là dal Atlantic e je une comunitât che, pe plui part, no à mai viodût il Friûl (par esempli, il nono di Marta al è rivât in Argjentine che al jere inmò frut tal 1879.), ma e continue a fevelâ par furlan cun braure... e pensâ invezit che achì a son furlans che a àn scuasit vergogne...

O saludi cun afiet Claudio e no dome chei di Colonia Caroya, ma i Furlans di dute la Argjentine e di dute la diaspore de emigrazion che ju à puartâts par ogni cjanton dal mont.

Di Dartigne a Buenos Aires

Aromai a son tancj mês che o dopri il blog, ma a sucedin simpri robis che inmò mi dan di maravee.
La ultime e je stade une mail che mi è rivade su la pueste dal blog. Cui che mi scrîf si clame Ruben Romanini (te foto cu la sô famee) e al è di Pilar in Argjentine o di Dartigne in Friûl... o di ducj i doi i puescj! La sô e je la storie di tancj furlans e ancje dai Romanini, che come gno nono (al jere di Borc di Clame) a son partîts par lavorâ vie di cjase. A difarence di gno nono che al è tornât dongje fasintsi une vite chi in Patrie, altris come il pari di Ruben a son restâts vie e la lôr famee e je cressude lontan di chi. No sai se o sin parincj, ma o soi stât une vore content di cheste biele sorprese par diviersis motivazions: viodi che i Furlans (che ta chest câs si clame ancje come me!) ancje di lontan a continuin a cirî un leam cul Friûl e che il gno blog al pues judâju tal tignî chest puint.
Un mandi grant grant a Ruben, a la sô famee e ducj chei Furlans ator pal mont che, ancje se a àn sul passepuart une citadinance difarente, tal cûr a restin simpri int dal Friûl.

Lenghe furlane e imigrazion

O segnali une interessante e biele iniziative de Provincie di Udin che adun cun chê di Pordenon, come Associazion di Provinciis, e à inmaneât une cunvigne dal teme "Furlan e imigrazion".
O pensi che al sedi necessari par une integrazion complete, previodi iniziativis che a permetin ai imigrâts di cognossi la culture de tiere li che a rivin. Cuant che o jeri a Tavagnà o vevin colaborât cuntun associazion "Mediatori di Comunità" fasint un cors di furlan pai imigrât: une des plui bielis esperiencis che o vedi mai fat tal gno lavôr (te foto, il volantin di chê volte: fracait su la imagjin par viodilu ben). E o soi content di viodi che tra i relatôrs e je ancje Irma Guzman, messicane, ma aromai furlane di adozion, che e je stade tra lis personis che o ai cognossût ta chê esperience.
Ve chi l'invît pe cunvigne di Voleson ai 29 di Zenâr a lis 17.00: fracait chi.

Lenghis minoritariis, media e emigrazion

Al è di un pôc che il Consorzi universitari furlan al à publicât i ats di une cunvigne fate a Colorêt cuasi 2 agns indaûr (ai 19 di Mai dal 2007).
O jeri intervignût ancje jo fevelant di blog, Internet e lenghe furlane: ve chi il link a "Emigrâts inte Rêt", il gno contribût che al è stât publicât tal librut (cun DVD di une seconde cunvigne simpri sul stes teme, ma fate a Colonia Caroya).
Grazie al Cuf e grazie a Luca!

Daniele inmò a Rome

E continue la cronache de esperience dal grup di furlans a la cunvigne dai emigrants che si davuelç ta chescj dîs a Rome. Nestri corispondent al è Daniele Martina di Gjenue che dopo de prime pontade, nus inzorne su ce che al è sucedût îr.

Rome, ai 12 di Dicembar

Zornade penze chê di îr. Dopo un cafè otim bevût li dal storic bar Giolitti ufiert dal president dal Fogolâr di Rome Adriano Degano, il grup si è metût in file par jentrâ a Montecitorio. Cui che come me al vîf la politiche cun passion e interès, passâ la soie di chê sale al è stât une grande emozion. Mi soi sentât intun puest centrâl e cun chei altris o ai assistût cun atenzion ai intervents di Franco Frattini, Gianfranco Fini, Renato Schifani e Giorgio Napolitano. A la fin de assemblee la nestre ativiste dal Fogolâr furlan di Santo Domingo, la simpatiche e biele Sandy Gobet e je lade in Rai par une interviste, intant che la segretarie dal Senatôr Ferruccio Saro nus spietave me, Ilaria, Walter e Igor. Nus à fat visitâ lis stanziis dal Senât e dopo nus à compagnât al riceviment cul parlamentâr di Martignà. A lis 4 e mieze dal dopomisdì a son tacadis lis voris li de FAO, ocasion par cognossi i furlan Marco Bravin di Mendoza, Aljandro Borghese di Cordoba, la za nomenade Sandy di Santo Domingo, la venite (ma amie dai furlans!) Sarah Bianquin Chiapinoto di Santa Maria in Brasîl. Tai voi di Sandro Faner dal Fogolâr furlan di Bahia Blanca o ai viodût dute la maravee di jessi rivât pe prime volte in Italie e il desideri di lâ il prime pussibil a Aquilee, tiere dai siei vons. Tal dopomisdì une biele fevelade tra di nô e l'Assessôr regjonâl Roberto Molinaro disponibil a scoltânus e a conseânus. Dopo une cene intun piçul ristorant, une sane durmide par frontâ vuê lis voris di comission e in serade grant gale cun specialitâts regjonâls (di chestis, tantis a son furlanis!).
Di Rome un “Mandi di cûr!”

Daniele Martina
(al continue...)

Furlan in Argjentine

Us segnali une iniziative che si fasarà doman a Udin:

La Fondazion CRUP
Vie Manin, 15 - Udin

la Universitât dal Friûl - CIRF
Vie Petracco, 6 - Udin

e la CLAPE - Friûl dal Mont
Vie del Sale, 9 - Udin

A àn cetant plasê di invidâUs al incuintri di studi di joibe ai 11 di Dicembar cu ven,
li de sale riunions de Fondazion CRUP di Udin, in vie Manin 15, a tacâ des 11.00 sul argoment:

Fevelâ furlan in Argjentine

Imagjinis e impressions di un viaç di ricercje in Argjentine, in preparazion de tesi di lauree di Sofia Solayne Noboa Feliz in Lenghis e Leteraturis forestis, puartade indevant cu la assistence de Prof. Rizzolatti, diretore dal CIRF.

Sofia, partide ai 9 di Otubar e tornade ai 15 di Novembar di chest an, e à contatât cuasi 150 fameis di emigrâts furlans residents a Buenos Aires, a Cordoba e a Colonia Caroya. Cun lôr, e à compilât un cuestionari di pueste, e regjistrât imagjins e intervistis une vore significativis.

La Sô presince e sarà cetant preseade.

Salûts di rispiet,
Dot. Silvano Antonini Canterin
Prof. Piera Rizzolatti
Siôr Gianpaolo Della Schiava

Segretarie dal incuintri:
CLAPE – Friûl dal Mont
Vie Sottomonte 30
33011 – Dartigne
mail: info@clape.it
sît: www.clape.it

Daniele, un furlan a Rome

O vin un corispondent inviât a Rome: Daniele Martina, furlan spilimbergês di Gjenue. Chi us met il so rapuart de trasfierte pe riunion che e je a Rome cun ducj i migrants.

A lis sîs di buinore di un miercus di Dicembar, cjamât di ploie, Rome e jeve ben planc tal gran "va e ven" di taxi che a corin come jeurs jù pes stradis inmò desiertis e cuviertis di piere.

Ca di dôs oris si cjatarìn in cuatricent e forsit ancje di plui li de Cjamare dai Deputâts dulà che o sarìn ricevût dal President de Repubbliche e di chei dai doi rams dal Parlament. Îr vie pe fare di acreditament dal palaç grandonon de Fao, progjetât par jessi sede dal “Ministeri pe Afriche orientâl taliane”; si respirave un aiar che al travanave ligrie messedade cun preocupazion. La ligrie e jere di nô zovins, la novitât di jentrâ pe prime volte in chel che il nestri Pisolini al definive “Il Palaç”, l’entusiasim di dâsi dongje e cognossisi. Pôris par un avignî malsigûr e pôc clâr, in spiete par chel che al vignarà fûr di cheste conference, cu la sperance di evitâ lis solitis frasis fatis e la retoriche vetero-tricoloriste, un miscliç pericolôs di stereotips esaltâts a la massime potence cuant che a son i mondiâi di balon. Noaltris furlans come simpri dividûts in Stâts difarents si sin riunîts fûr, a la stazion Termini o ai spietât Walter Matiussi delegât de Efasce e Ilaria Cigar di Triest. Dopo une gulizion svelte svelte cuntun panin cu la porchete, si sin sistemâts tai albiercs e a lis 3 e mieze di dopomisdì (miezore prime dal previst) o jerin za li de Fao contents e curiôs come fruts tal prin dì di scuele. A spietânus al jere Igor Cerno de Union Emigrants Slovens. Grande e je stade la sorprese cuant che li dal banc des informazions o ai sintût a fevelâ par furlan: e jere Michela une zovine ativiste dal Fogolâr Furlan di Rome, origjinarie di Flaiban. La nestre amie e domandave di partecipâ a la manifestazion, e dopo un pocje di resistence, i responsabili i àn dât il permès. Une furlane di plui, la scuadre e cjape farce!!! A viodile cussì la nestre delegazion no sarà numerose, i Comitèes dal forest a àn nomenâts pôcs furlans, ancje se la nestre e je une des diasporis plui organizadis, cun centenârs di Fogolârs, Fameis, Circui, Club e vie indevant. Pôcs ma cun tante voie di tignî alte la bandiere blu cu la acuile zale che e bat tal cûr e tancj programs tal cjâf.
Mandi Friûl.

Interviste argjentine

Spes us ai fevelât di Colonia Caroya e di Radio FM Communicar, la radio che in Argjentine e trasmet par furlan pai furlans di là jù. Ogni tant mi capite che mi clamin e ancje sabide passade, midiant di Skype, o soi stât lôr ospit cun gno grant plasê.
O speri che un doman, no masse distant, mi capitarà la ocasion di fâ un saltut jù par là.
Mandi a ducj i furlans de Argjentine, ma ancje a ducj chei che a son ator pal mont.
Ve ca sot il file de interviste e un grazie a Claudio, Marta e dute la Redazion de Radio.

Farcadice al Visionario

Miercus us ai za dit che o presentìn la Patrie a Sant Denêl, ma al è ancje un apontament di cine al Visionari cun Farcadice di Carlo Della Vedova e Luca Peresson (te foto a Toronto). Lis proiezions a son 2: la prime e je tal dopomisdì a lis 17.30, la seconde di sere.
Jo no rivarai a lâ, e o savês parcè: us spieti.

More argjentine

Ancje se il titul al pues imbroiâ, chi no si fevele di une biele femine latinoamericane cui cjavei neris, ma dal zûc de more che, come l'an passât, al è daûr a deventâ simpri plui famôs ancje di là de Grande aghe atlantiche.
Ve chi il logo dal 3° campionât di more a Colonia Caroya!
E se us capite di passâ par là... mi racomandi: trrrrrrr, cinc, siet, duteeeeeeeeeee!

Sgarfefurlans e Unesco

Tal an internazionâl des lenghis, la trasmission di Loris Vescovo (te foto cu la maiute nere) e je stade inseride tal sît de Unesco cuntune schede dute sô. Bulo Loris e compliments a ducj chei che a àn lavorât par cheste trasmission.

Ve chi la schede dal portâl Unesco.

Confindustrie su Telefriuli

Usgnot Telefriuli e dedica un speciâl a la assemblee di Confindustrie di lunis passât. O speri che e mandi in onde ancje l'intervent de ministre Sandra Pupatello Pizzolitto (te foto cun Donald Ziraldo, Luca Peresson e Carlo Della Vedova).

Inzornament: ve chi la pagjine dal sît di Confindustrie di Udin cul video dal prin intervent de ministre Sandra Pizzolitto Pupatello.
(un grazie doverôs a Luca, che i ai cjapade dal so blog la foto!)

Biel intervent de ministre Pizzolitto

Che la ministre canadese pal cumierç e il disvilup economic Sandra Pizzolitto (te foto cul President de Regjon Renzo Tondo e il President di Confindustrie di Udin Adriano Luci) e fos une persone pardabon straordenarie, lu vevi za acenât cualchi zornade indaûr. E îr a la assemblee di Confindustrie di Udin e je rivade puntuâl la conferme. Jo no jeri, ma mi àn riferît, e no stenti a crodi, che la ministre Pizzolitto e à fevelât bogns 10 minûts par furlan! E e je stade grandiose no dome parcè che e à doprât la lenghe furlane, ma ancje par chel che e à dit: forme e sostance cun fuarts riferiments al valôr de indentitât e dal jessi furlans. O pensi che e sedi stade une dimostrazion esemplâr e savê che il public in sale (nol covente che o disi cui che al jere) al vedi preseât cun entusiasim chest intervent, al vedi di fâ pensâ. Ancje la Mercigaglia, presidente de Confindustrie taliane, mi àn riferît, e à di vê dit che e veve capît alc e che i displaseve di no podê ancje jê saludâ par furlan: la prossime volte si prepararà alc par furlan.
Une notizie che e mertave secont me plui spazi rispiet a ce che i à dât la stampe: Messaggero, Gazzettino (cuntune biele citazion di Luci) e Radio Onde Furlane a àn metût in evidence chest fat. Ma jo mi sarès spietât alc di plui.
Par concludi, la Sandra Pizzolitto e à continuât il so intervent par inglês, corezint la interprete cuant che e sintetizave masse la traduzion par talian. Insome, se o fos a stâ in Ontario o votarès Sandra Pizzolitto Pupatello.

Sandra Pizzolitto Pupatello ospit di Confindustrie di Udin

Cheste e je Sandra Pizzolitto Pupatello. Ai plui, forsit, chest non no ur dîs nuie, ma cheste biele siore e je la ministre pal cumierç e il disvilup economic dal Ontario e e sarà ospit de Confindustrie di Udin, lunis che al ven pe assemblee anuâl.
La ministre Pizzolitto e à origjin furlane, braurose des sôs lidrîs e fevele benon ancje par furlan e in pratiche si pues ben dî che e je la seconde cjarie dal Guvier dal Ontario.
No pensi che al coventi zontâ nuie altri: personis cussì a fasin capî ce che a àn puartât i furlans pal mont. Al sarès propit biel vierzi un puint cul Canadà, par un dialic di disvilup economic cun chel paîs: la seconde citât furlane tal mont e je Toronto e al sarès propit impuartant che la nestre int e aprofitàs di chest canâl.
Dopo dut chest, o ringrazii inmò une volte Luca e Carlo che me àn fate cognossi midiant dal documentari "Farcadice - Diari di Viaç: Toronto".

Farcadice a Maian

Dopo de serade sul Pisperc (isal stât cualchidun che nus conti cemût che e je lade?), sabide ai 30 di Avost si davuelzarà la seconde serade di cine par furlan dedicât a Farcadice, i documentaris su la emigrazion furlane fats di Luca Peresson e Carlo Della Vedova.
Apontament a 9 di sere a Deveà: fracait chi par viodi il program de serade.

Inmò compliments a Luca e Carlo

Nus àn dit che Farcadice, la serie di documentaris su la emigrazion furlane (Colonia Caroya, Charleroi, Umkomaas e Toronto), aromai si sierave.
Sperìn che il gnûf ricognossiment che a àn ricevût a Bardonecchia (Piemont) al zovi a fâur gambiâ idee. Pal moment, inmò tancj compliments a Luca e Carlo (te foto) e 2 grazie: un come "Christian" par vêmi dât la pussibilitât di partecipâ a une part di chest progjet e un come "furlan" par vêmi regalât une testemoneance inestimabil su la storie de mê int.
Par cui che al è interessât a viodi i documentaris, usgnot a Trep te cuarte fieste dal Emigrant e sarà la proiezion vierte par ducj. Si tache cuant che al va jù il soreli.

I diaris di Luca e Carlo

Luca nus vise che a son on-line ducj i documentaris di Farcadice: Colonia Caroya, Charleroi, Umkomaas e Toronto.
Grazie a Luca e a Carlo (te foto) pal lavoron che a àn fat.