29 dicembre 2006

Simpri a proposit di terapie assistide cui cjans


Cualchi zornade indaûr o vevin za fevelât de ativitât di un gnûf grup che al è daûr a nassi a Maian pal disvilup de terapie assistide cui cjans (te foto, une part dal grup: tal mieç a son ancje Viviana e Jessica). Vuê ancje il Messaggero al ripuarte la notizie relative ai progjets di cheste gnove realtât.

28 dicembre 2006

27 dicembre 2006

Il pinsîr di Josef Marchet

A distance di pôc timp de sô scree, la golaine di studis sul autonomisim, edite dal Istitût ladin furlan di Coder di Sedean, e je za rivade al numar nûf: di fat al jere il 2002 cuant che in ocasion dai trente agns de muart di Fausto Schiavi, esponent di ponte dal Moviment Friûl, al jessive il prin volum dedicât al pinsîr dai grancj autonomiscj de nestre regjon. E cumò al è a pene stât presentât l’ultin, pal moment, che al à tant che protagonist pre Josef “Bepo” Marchet, om di glesie e inteletuâl come pôcs che masse adore, cuarante agns indaûr, al à lassât chest Friûl, inmò vuarfin di une figure che puedi cjapâ il so puest... (continue a lei achì).

Mostre sul Taramot

1) Maian

2) Glesie di Pêrs

3) Tal cimitieri di Maian

4) Inmò a Maian

5) I funerâi tal cimitieri

6) Condomini a Maian

7) Il biel tor e la glesie di Maian, o ce che al reste...

8) Il condomini sdrumât

9) Un miedi cui socoridôrs

10) Un femine sot des maseriisÎr di sere e je stade inaugurade une mostre fotografiche sul taramot. Si podarà visitâle fin ai 7 di Zenâr. Us visi che lis fotos a son di Zavagno, un fotograf di Poç di Codroip e ce che o viodarês nol sarà dut su Maian. Dentri de mostre e je ancje une publicazion che e fâs di catalic. Stant che mi sarès plasût viodi cualchi imagjin di plui su Maian, us ai metût achì cualchi scat che o ai cjatât su internet e che NO viodarês in mostre (cjale il sît de regjon).
O ai metudis chestis fotos soredut par chei che come me a son nassûts dopo dal taramot e che no àn viodût ce che al è sucedût tal nestri paîs. No ai voie di fâ nissune polemiche, ma o pensi che par trasmeti il spirt di comunitât a lis gjenerazions gnovis, al podeve jessi util e impuartant focalizâ la atenzion su Maian e lis nestris frazions.
E mi sarès plasût ancje vê la pussibilitât di fâ un documentari video, ma di chest o vin za fevelât...

26 dicembre 2006

Tsunami 2 agns dopo

Vuê a son 2 agns che un tsunami al à distrut e paîs e copât miârs di personis te Asie dal Sud. Grazie a une grande solidarietât, al è rivât un gran jutori par ricostruî. Achì o ringrazii Stefano Andreutti che tal indoman di chel tragjic Sant Stiefin dal 2004 si è ufiert par meti in pîts un grant conciert di beneficenze. I bêçs che o vin cjapât sù in chê sere li che a àn sunât tancj e tancj artiscj a son lâts a International Adoption che ju à puartâts ta chês zonis. Inmò grazie a ducj chei che a àn colaborât e a Stefano in particolâr.

19 dicembre 2006

Terapie assistide cui cjans

A Maian di diviers agns al è un grup di personis (te foto) che a fasin terapie assistide cui cjans: us segnali un biel articul sul Gazzettino di vuê.

18 dicembre 2006

Vinars al è consei comunâl CUN SORPRESE!

Come che al stabilìs la norme, la minorance comunâl e à convocât il prossim consei comunâl che al sarà vinars ai 22 di Dicembar dal 2006 aes 6 e mieze di sere: us fâs il link par lei l'ordin dal dì. Intant us met ancje un articul jessût vuê sul gjornâl. Lait a lei il prin coment.

15 dicembre 2006

Aniversari de 482/99

Vuê e finìs 7 agns la leç 482/99.
Vuê matine cjalant i gjornâi o ai cjatât un biel articul di William Cisilino. Lui cjatais come prin coment.

14 dicembre 2006

La musiche de Sardegne e incuintre il Friûl

Il Circolo Sardi Udine al à inmaneât "lenghe.doc", un confront tra la musiche de Sardegne e dal Friûl. Ospits il coro "Montanaru" (al è il sorenon di Antioco Casula un impuartant poete che ancje Pasolini al cognosseve), il grup folcloristic dai fruts (te foto) di Desulo, un comun in provincie di Nuoro. Pal Friûl si esibirà la Corâl di Feagne.
Il conciert al è Sabide ai 16 di Dicembar aes 20.45 tal auditorium comunâl di Felet.

13 dicembre 2006

Cualchidun al manten lis promessis e
invezit cualchidun altri al conte dome bufulis...

Cualchi setemane indaûr l'on. Renzo Tondo al à declarât denant di une sale straplene di int e ancje traviers i media, di volê impegnâsi di plui a pro de tutele e de valorizazion des lenghis minoritariis, un argoment che in passât nol veve masse aprofondît. Lui al à mantignude la promesse: lait a lei achì.
Intant lu ringrazii e o speri che al rivi ancje a intervignî in maniere concrete tes sedis li che al coventarà bati i pugns su la taule par difindi un dirit no dome dai furlans, ma di dutis lis 12 minorancis linguistichis di Italie. Ma oltri che un dirit, la cuestion de tutele linguistiche e pues rapresentâ une grande oportunitât ancje economiche: in Gales il cjamp des videoproduzions e de comunicazion televisive e à rapresentât une grande scomesse vinte di bande de minorance linguistiche galese. Ma ancje tai paîs basc o in Catalogne a son bielis esperiencis. Parcè chest no puedial jessi ancje pal Friûl e pes minorancis linguistichis dal Stât talian? In Trentin o Sud Tiröl o vin za esemplis.
Ma di chest argoment invezit il ministri Gentiloni no si vise e anzit, tal mês di Lui 2006 al prometeve une robe e cumò al fâs dut il contrari. Ce int!

12 dicembre 2006

Come il farc: no si viôt ni si sint, ma al lavore distès

Ta chestis zornadis o ai trascurât un tic il blog par fâ altris robutis che o vevi in pîts, ma intant ancje su altris sîts internet a fevelin di Maian... lait a viodi achì!

08 dicembre 2006

Il Sindic Benandant

Come che nus segnale ancje thermonuke, sul Gazetin di joibe e je une interviste a Cecotti, sindic di Udin che al declare inmò une volte di jessi un benandant. E ce âstu di dî?

07 dicembre 2006

Zornade de solidarietât

Come ogni an, a Maian la dì de Madone e je la zornade de solidarietât. E je une processio che e partìs de place e rive simpri in place dopo vê fat il zîr pal paîs. E je une ocasion par tirâ sù bêçs che dopo a vegnin dât in beneficenze: chest an ae associazion Nostro Domani e al Centri par Anzians. Un grazie ae Pro Majano e al comitât organizadôr che ogni an si dan di fâ pe meti in pîts cheste manifestazion: pocjis cjacaris e tant lavôr. No come chei che a fevelin e vonde!
Achì dut il program de manifestazion.

06 dicembre 2006

Un gnûf amì in Sardegne


Il gno blog e il blog dal furlanist a son deventâts amîs e zimui dal blog di Ivo Murgia, che de Sardegne nus dediche un post. Mandi o "a si biri"!

04 dicembre 2006

Une fevelade cun Pre Toni Beline


Pre Toni Beline e je une des inteligjencis plui vivarosis de nestre regjon. Cualchi zornade indaûr o ai vût il plasê di intervistâlu: lait a lei achì ce che mi à contât...

02 dicembre 2006

I Omenuts di Massimo Garlatti Costa

Vinars Prin di Dicembar, a son stâts presentâts i Omenuts.
Cheste e je une imagjin dal carton animât de Mattel_Fisher Price (copyright riservât) te version par furlan di Massimo Garlatti Costa. I dvd a son in vendite li de Societât Filologjiche Furlane e in dutis lis librariis de Provincie di Udin.
Ogni dvd (a son 2, pal moment...) al coste 12,50 euros, ma pai socis de Filologjiche al è il scont, baste passâ in vie Manin.
Lei une recension di Omenuts

Premis par chei di Maian

O soi propit content parcè dôs personis di Maian a àn ricevût un biel ricognossiment par om: Alessandro Zumino e Roberto Ongaro.
Alessandro Zumino al à cjapât il premi Bontât 2006 di bande de Associazione Cavalieri di Italia, che ogni àn e premie lis personis che si impegnin tal volontariât e te solidarietât. Par Sandro al è stât premiât il so impegn tal Avulss e te Protezion Civîl. La consegne dal premi e je vuê sabide aes 11 a Udin tal palaç Belgrât sede de Provincie di Udin.
Roberto Ongaro al à invezit cjapât il premi Nadâl Furlan 2006 di bande dal Circul Laurenzian di Buie, che al à volût cussì dâi un ricognossiment pe sô ativitât di scritôr in lenghe furlane. La consegne dal premi e je simpri vuê sabide aes 17 a Buie li de cjase de Zoventût a Sant Stiefin.
O ai propit gust par chestis dôs personis che a son ancje miei amîs!

30 novembre 2006

Concors di traduzion a Felet

Vuê joibe ai 30 di Novembar aes 6 sot sere li de sale consiliâr a Felet il comun di Tavagnà, adun cu la associazion LinguESTpress, al presente il concors "ESTROVERSO", Premi internazionâl di traduzion di leterature pe infanzie des lenghis dal est Europe al talian e al furlan.
Cul patrocini di Regjon autonome FVJ - assessorât ae culture, Provincie di Udin, Universitât dal Friûl e la Agjenzie Regjonâl pe Lenghe Furlane.

29 novembre 2006

Bulo Dario, bulos chei di Cjasesole!!!

Ancje se o vin za fevelât, cheste e val la pene di tornâ a ricuardâle: Dog of Tires si è confermade come une grande manifestazion sportive. Par savê come che e je lade, lait a lei achì.
Grazie a fotorf pe segnalazion e inmò compliments ai organizadôrs!

28 novembre 2006

Un altri consei comunâl

La setemane passade non vin rivât a discuti dut l'ordin dal dì e duncje martars ai 28 di Novembar aes 6 e mieze sot sere al è inmò Consei comunâl.

27 novembre 2006

Pal Parlament

Tal consei comunâl de setemane passade o ai rivât a fâ aprovâ cheste delibare che o mandarìn al Parlament a Rome. O soi propit content parcè che al sarès pardabon un at impuartant rivâ a ratificâ la Cjarte europeane pes lenghis regjonâls (1992).

25 novembre 2006

Usgnot teatri a Maian, sabide aes 20.45

Usgnot li dal auditorium e continue la rassegne di teatri adun cu la Pro Majano: "il Volpone" al è il titul dal spetacul.
Achì i detais de serade

22 novembre 2006

Us spieti vinars ai 24 di Novembar al Picaron


Vinars ai 24 di Novembar dal 2006 aes 8 di sere li dal ristorant “Al Picaron” (Sant Denêl) si davuelzarà la cunvigne: Friûl - Vignesie Julie e Sardegne, Regjons di Europe, specialitât a confront.
Intervents:
  • Introduzion di Adriano Piuzzi, Assessôr de Provincie di Udin;
  • "I risis in teme di tutele linguistiche te finanziarie statâl e tal gnûf Statût de Regjon Friûl-VJ" di Carli Pup Puartevôs dal Comitât 482;
  • conclusions di on. Renzo Tondo e on. Mauro Pili, za presidents de Regjon Friûl-VJ e de Regjon Sardegne e components de XIV comission parlamentâr Afârs europeans.
Si siere cuntun rinfresc. Us spieti in tancj.

21 novembre 2006

Interviste radiofoniche

Cheste interviste e je lade in onde vinars passât a buinore. O ringrazii Luca par vêmi judât a metile te rêt. Buine scolte.

19 novembre 2006

Casciano al lasse il grup di Fi-An-Udc

Ancje se un tic in ritart (cualchidun al à ancje pensât mâl, vere Masanc?) us publichi l'articul di vuê sul MV...

18 novembre 2006

Dal multimateriâl al monomateriâl


Tal display che al è in place fûr dal comun e je la comunicazion che si passarà de racuelte multimateriâl di cumò a chê monomateriâl. Chest al significhe che cumò o varìn di fâ plui atenzion tal dividi lis scovacis e no dome in scovacis umidis e secjis, e ancje i cassonets a saran di plui: veri-alumini; umit no riciclabil, cjarte, plastiche...

16 novembre 2006

Spietant la cunvigne dai 24, cjante che ti passe...

La nestre regjon si conferme ai prins puest te sene musicâl taliane, ancje se radios e televisions al semee che no si rindinc cont. Achì us presenti l'ultin video dai Kosovni Odpadki, grup furlan che al cjant in sloven e furlan, biele sintesi dal miscliç di culturis de nestre zone. Tal 2004 a Dicembar ju vevi clamâts a sunâ in auditorium: concierton fantastic!!!
Fantats, aromai al è di bant platâ la realtât, ven a stâi che la nestre regjon e je speciâl parcè che achì si incuintrin lis 3 culturis de Europe: gjermaniche, latine e slave e la nestre regjon e je une piçule sintesi dal jessi europeans... E chest nol sucêt di nissune altre bande in Europe.
Buine scolte!

15 novembre 2006

Friûl Vj e Sardegne a Sant Denêl, vinars ai 24 di Novembar aes 20.00

Vinars ai 24 di Novembar dal 2006 aes 8 di sere li dal ristorant “Al Picaron” (Sant Denêl) si davuelzarà la cunvigne: Friûl - Vignesie Julie e Sardegne, Regjons di Europe, specialitât a confront.
Intervents:
  • Introduzion di Adriano Piuzzi, Assessôr de Provincie di Udin;
  • "I risis in teme di tutele linguistiche te finanziarie statâl e tal gnûf Statût de Regjon Friûl-VJ" di Carli Pup Puartevôs dal Comitât 482;
  • conclusions di on. Renzo Tondo e on. Mauro Pili, za presidents de Regjon Friûl-VJ e de Regjon Sardegne e components de XIV comission parlamentâr Afârs europeans.
Si siere cuntun rinfresc. Us spieti in tancj.

14 novembre 2006

Dimissions in Comun e in Colinâr

Vuê e je la notizie des dimissions di Claudio Marcuzzi de incjarie di conseîr comunâl. Un mandi a un aversari leâl.

13 novembre 2006

Vinars 17 cunvigne tal Cjistiel di Susans

L'assessorât aes ativitâts produtivis al à inmaneât une cunvigne:
"Prospetivis di disvilup artesanâl/industriâl par Maian e il so comprensori".
A saran presints ancje l'ass. regjonâl Enrico Bertossi, l'ass. provinciâl Daniele Macorig, il president dal Cipaf Burello, Edi Snaidero, Giovanni Fantoni e Nereo Tassotti.
L'apontament al è pes 6 di sere.

12 novembre 2006

Documentari sul Taramot

O vevi proponût di fâ un dvd documentari sul Taramot: la idee no je plasude e alore nuie. Tocje contentâsi di chest piçul filmât, ancje se o speri che prin o dopo chest videodocumentari al nassi, parcè che ciertis robis no tu puedis ni scrivilis ni leilis: si à di viodilis e scoltâlis

Dogs of Tires a Cjasesole

Sabide e domenie che a vegnin a Cjasesole (tes Tires, in grafie uficiâl si varès di scrivi Tiris, ma al cole il zûc di peraulis...) e sarà la tierce edizion de corse cui cjans inmaneade di Dario dai Ols (Modesti) e dai siei colaboradôrs de Pro Loco di Cjasesole.
Apontament sabide di buinore pes verifichis di gare e domenie aes 10 pe gare vere.
Pardabon une biele robe di lâ a viodi: bulo Dario!

11 novembre 2006

La Patrie dal Friûl: Novembar 2006

Come che us ai anticipât, ve chi la gnove copertine de Patrie dal Friûl, mês di Novembar. Si fevele dal gnûf Friûl, di migrazion e tantis altris robis, se o vês voie di abonâsi, ve chi il cont corint intestât a:
La Patrie dal Friûl - Glemone
cont corint postâl n. 12052338 (a son dome 25 euros al an)

telefon 0432/981411
mail
info@lapatriedalfriul.org

09 novembre 2006

Rassegne stampe: notiziis dal Tar


Il Tar al à dât reson ae Provincie di Udin par chel che al inten la cuestion dai ricors Romanello che a vevin fermât il conferiment des scovacis a Sedean. Invezit di pensâ a domandâ difidis, ancje la Colinâr e varès vût di pensâ a risolvi il probleme. Jo lu vevi dit: cumò o soi propit curiôs di viodi ce che al sucêt.

07 novembre 2006

La Patrie dal Friûl

O aprofiti par fâ un pocje di publicitât al gjornâl La Patrie dal Friûl che al jes une volte al mês (chi in bande il numar di Otubar).
Al rive in abonament e se o vês voie di cjatâ un pocje di informazion che e met la lint su lis cuestions che a rivuardin il Friûl, us invidi a dâi un cuc in biblioteche. Se po us plâs o podês ancje abonâsi, tant no son grandis spesis di fâ.
Si acetin critichis e sugjeriments.
Ca di cualchi zornade al è pront ancje il numar di Novembar.

06 novembre 2006

Nostro Domani: sabide inaugurazion a Pêrs

La associazion "Nostro Domani Pontello Valentino" e inaugure sabide la sede di Pêrs.
Achì a saran il centri diurni e lis struturis di residence pai disabii, che un doman no podaran contâ plui dome su lis fameis. Cheste realtât e permetarà duncje di frontâ cun plui serenitât il futûr a chês personis mancul fortunadis.
La opare e je stade realizade ancje in grazie de ereditât di diviers milions che Valentino Pontello, un migrant origjinari di San Vît di Feagne, che al à lassâts i bêçs a cheste associazion che e met adun lis fameis dai disabii.
L'apontament pe cerimonie al è duncje par sabide ai 11 di Novembar a Pêrs aes 10.30 di buinore.

05 novembre 2006

Simpri a proposit di scovacis

Il president de Colinâr al ven in consei, nus conte tantis "bielis" robis su lis scovacis, ma tal doman sul gjornâl al ven fûr che cumò lis puartin a Ferrara e dopo a Davian: no podevial dînusal za in Consei cence che o vedin di leilui dal gjornâl? Intant ancje Thermonuke nus segnale une letare publicade sul Messaggero.

04 novembre 2006

Maian dal biel tor


Sul Messaggero di chê altre dì al jere un articul sul finanziament rivât ae Parochie di Maian par tornâ a fâ sù il tor. Par jessi sincîr, mi soi un tic afezionât a chest cussì come che al è... Mi plasarès viodi il progjet che al è proviodût.

03 novembre 2006

Presentazion dal libri di Angelo Dreosti

Sabide ai 4 di Novembar, aes 20.30 li dal centri parochiâl di Susans si presente il libri di Angelo Dreosti "La grande guerra in Carnia: nei diari parrocchiali e nei processi del tribunale militare".
Come che nus diseve Angelo "si trate di une racuelte di "Libris Storics" che i plevans di ogni paîs e compilavin vie pal periodi de vuere, dal '15 al '18, ma soredut tal an di ocupazion austriache. (Dut material inedit)".
Lait a viodi achì, ma soredut no stait a pierdi la presentazion a Susans.

30 ottobre 2006

Usgnot al è consei comunâl aes 18.30


Si fevelarà di scovacis, ma no saressial plui util puartâlis vie e netâ un tic ce che al è pes stradis?...

29 ottobre 2006

Live in Tresemane: ma dulà isal lât?...

E cumò o voi a taiâ il salam!

O aprofiti par ringraziâ inmò une volte Roberto Ongaro, parcè che cun lui o ai vût il plasê di condividi la "Segnalazion de Jurie" al premi Sant Simon 2006.
Pe cronache, al à vinçût Gianni Gregoricchio che al veve za vinçût il premi altris voltis.
La jurie e jere componude dal prof. Mario Turello (che al scrîf spes ancje pe pagjine culturâl dal Messaggero Veneto), di Pierluigi Cappello (premi Montale Europa 2004), Roberto Jacovissi e Franca Mainardis.