Un gnûf blog: Comitât pe Autonomie

Us segnali une notivitât te blogosfere furlan: si trate dal blog dal Comitât pe Autonomie e pal Rilanç dal Friûl, che al à come president Gianfranco D'Aronco.
Pal moment al è par talian, ma mi àn garantît che ca di pôc e sarà doprade di plui ancje la lenghe furlane.
Intant benvignûts te Rêt e bon lavôr.

Salvâsi de stupiditât

O ai vude ocasion di rifleti cuntune persone a proposit di stupiditât.
Mi è tornade sot man cheste che us torni a proponi: il stupit ti splace parcè che ti fâs dam o ti fâs stâ mâl cence vê nissun vantaç par se. Il trist ti fâs mâl, ma par vê un vantaç! Duncje il stupit nol è prevedibil. Forsit par chest i nestris nonos a disevin: "Al è miôr vê da fâ cun cent triscj inteligjents che no cuntun stupit!".

Bentornade!

E je stade une polse di 6 mês, ma a la fin no à resistût: e je tornade la archeofurlane, che la plui part dai blogarins a cognossin cul non di Ninine (te foto)!
Po ben, cumò vonde scherçs e sot cun pale e pic par fânus scuvierzi alc di plui dal nestri patrimoni archeologjic! Cuâl saraial il prin archeopost dal 2010?

Internet libar!

Us segnali doi intervents: un sul blog di Aldo Rossi (di pôc laureât cun tesi "Marketing in Marilenghe", compliments!!!) e un dal prof. Francesco Pira, docent a Relazions publichis a Gurize.
Une frase mi à plasût in particolâr tal articul dal prof. Pira: "E credo che molte persone, le stesse che criticano i social network , e una larga parte della classe politica del nostro paese non siano mai entrati effettivamente in un social network. Non sanno neanche come sia fatto".
O soi dacuardi al 100%: di fat, masse int spes su chescj argoments e fevele di bant, cence savê di ce che e fevele!
Internet al à di restâ libar!

Fracait chi par lei il post di Aldo e fracait chi par lei la interviste al prof. Pira.

Robis di mats

O premet che no ai viodût il post in cuistion e duncje no sai ce che realmentri e à scrit Flavia, la assessore a la culture di Sant Denêl e blogger. Duncje comentâ cence vê elements nol è just parcè che no sai se e à ofindût cualchidun, se e à doprât peraulatis o altri.
Jo stes o ai vût ce discuti cun jê par posizions che e veve cjapât e no simpri o condividi ce che e scriveve.
Ma ce che o ai let sul gjornâl e il fat che al sedi stât ancje sierât il so blog, mi somee propit ecessîf. Mi somee une grande sconfite di ducj.

Vuê o polsi

Il grup dai letôrs su Feisbûc

Vuê o aprofiti di une iniziative che o ai cjapât cualchi dì indaûr e us ringrazii ducj voaltris, letôrs di chest blog.
Su Feisbûc, o Muselibri, o Facebook, o ai screât il grup dai letôrs di chest blog: lait a viodi chest link e se o vês voie o podês metisi in note.
In pôcs dîs il grup al à passât i 70 iscrits: no me spietavi une rispueste cussì svelte e numerose, grazie!
Intant inmò grazie par jessi simpri in tancj e par vê fat deventâ cheste sorte di diari une piçule place virtuâl par cjatâsi e discori.

Apel par Archeofurlane

Forsit za lu savês: vuê la Ninine (te foto intant in vore intun laboratori a meti a puest reperts archeologjics) e salude ducj i letôrs dal so blog parcè che e à decidût di sierâ archeofurlane.blogspot.com viert tal mês di Març dal 2008.
A ducj chei che a àn a cûr la blogosfere furlane e a àn vût maniere di preseâ i contignûts di chest blog dedicât a la archeologjie e a la storie de nestre tiere (e no dome), o domandi di partecipâ a cheste campagne par invidâ la Ninine a tignî dûr e o us domandi di passâ li di jê par sburtâle a continuâ a scrivi.
Ninine continue cul to blog!

Ancje jo us saludi

Mandi a ducj. Come che al à fat il Dree, ancje jo o ai decidût di sierâ barache. Aromai al è di cualchi timp che no rivi plui a garantî la frecuence di publicazion che o volarès. Par chest, prime di saludâus ducj cun chest post, o ai volût propit spietâ di publicâ il program de Fieste dai 3 di Avrîl: une date simbul pe nestre Patrie e che e restarà la ultime testemoneance par chei che pal avignî ur capitarà di passâ par chi.
O sieri ringraziant ducj i letôrs che mi àn tignude compagnie fint vuê e o aprofiti par fâ a ducj voaltris une ultime segnalazion: fracait chest link...

Zornade di EMME...nthal...

La setemane e je tacade di rive sù e par cualchi zornade no ai rivât a jessi tant presint. Ma come che nol bastàs, vuê mi soi jevât tart, parcè che no ai sintude la svee... o miôr: le ai sintude, le ai distudade ("dai dai, inmò un momentut e dopo o partìs...")... e vie jo: tornât a indurmidîmi!

Po dopo jù di corse fint a Triest cuntun trafic che mieç al bastave... e rivât intal forest, mi capite une altre "biele sorprese" che no us stoi chi a contâ, ma che mi conferme che "se la furtune e je vuarbe, la sfighe e viôt benon!"... Ancje chi trafic micidiâl par vie di une cunvigne su la droghe cun pulizais a sbreghebalon: e cussì dopo 1 ore e 40 minûts di strade finalmentri o soi rivât a vore (almancul li dut trancuil)... O disarès che par cheste setemane al podarès jessi avonde, ma doman al è vinars ai 13: jo no i crôt tant, no soi superstiziôs, ma un tic cumò o tachi a gratâmi...
Ce dî di plui? Sperìn almancul tal Udin usgnot!

Ostarie leterarie

Mi àn scrit i "ustîrs di Contecurte"... ve ca:

Un lûc virtuâl là che ducj a podin proponi e lei piçulis storiis in lenghe furlane. Cheste la idee dal blog «Contecurte», che o cjatais ae direzion http://contecurte.splinder.com
Nô lu definìn «une ostarie leterarie, li che si cjatisi par lei cualchi conte e fâle cognossi ai amîs». Une sorte di circul leterari di chei di une volte e di fat la grafiche e je ispirade a un imagjinari circul culturâl dal Votcent.
«Contecurte» e vûl jessi un lûc par ducj chei che àn voie di lei e scrivi par furlan, tignint di cont i timps curts dal web e il jessi pôc usâts a doprâ la marilenghe. Cun di fat, a vegnin ametudis dome contis curtis di al plui 2000 batudis.
La nestre iniziative e vûl jessi ancje un mût par preseâ e pandi une forme leterarie pôc considerade de editorie taliane come la conte, che invezit in altris paîs e je valutade come che e merte. Al sarès biel deventâ un pont di riferiment e une vetrine pai furlans che a àn tal cûr la leterature, cence confins di lenghe e… lungjece.
Vignît a cjatânus, autôrs e letôrs, su http://contecurte.splinder.com

I ustîrs di Contecurte

Bon Nadâl cul Puccipresepi

Cuant che lu ai viodût mi soi ribaltât dal ridi. E cussì o ai voie di condividi cun voaltris cheste gjonde te zornade che al è nassût il Bambin Jesù, par che e sedi fieste vere e in ligrie.
Ve ca il Puccipresepi e cun di plui in version furlane!
E ringraziant chei mats dai Corona's o auguri a ducj i letôrs dal blog un Bon Nadâl!

Pinsîr di Nadâl

Doman e je la dì de Fieste: in spiete di saludâ il Bambin Jesù, ta cheste vilie us regali a ducj voaltris une des plui bielis preieris di Nadâl che o cognossi.

Pinsîr di Nadâl
Ven jù Signôr
dal to cîl di glorie,
ven a comedâ la nestre storie.

Ven jù Signôr
in cheste puare tiere,
là che a regnin
svindic, fam e vuere.

Ven jù Signôr
a sfantâ la pôre e il scûr,
a morestâ e a sclipî il nestri cûr.

Ven jù ancje vuê
come chê dì a Betlem,
ven a viodi dal puar
e di chel che al zem.

Ven jù in chest mont
simpri plui forest:
dome cu la tô gracie
si podarà meti in sest.

Ven jù Signôr
dal to biel cîl stelât,
ven a viodi dal mont
che al è malât.

Ven jù Signôr
a fânus il grant regâl
dal perdon e de pâs
come tal prin Nadâl.

pre Antoni Beline

O soi "balât"

Come cuant che o jeri frut... mi soi inmalât sot fiestis: ogni volte che al ven dongje Nadâl, mi bechi il rafredôr e cussì o ai stât dute la domenie sierât in cjase a stranudâ =(
E vuê mi tocje ancje di lâ a Triest... etciù!

Interviste su TeleUdine

O soi stât contatât di TeleUdine. Chi us met il link li che si pues viodi la mê interviste dentri dal program Oblò: cun me a son stadis intervistadis ancje altris personis che forsit o cognossês...
Un grazie a la redazion di TeleUdine che mi à dât cheste oportunitât.

Furlan in TV par mût di dî

Alc nus veve za dit Luca a proposit dal Tg realizât de Provincie di Pordenon. Jo mi soi permetût di lâ a viodi plui a fonts ce iniziative che e jere e o ai scrit un articul publicât su Il Friuli di vinars ai 14 di Novembar dal 2008.
Te foto: Elena Zanussi, la sporteliste de Provincie di Pordenon che une vore ben e à conduzût par furlan il notiziari in cuistion.

Disastris!

Vuê us segnali une notizie pardabon avilente che e je sucedude dongje Spilimberc e che o ai let sul blog de Ninine.
Dal sigûr al è impuartant dâ un bon servizi di racuelte des scovacis, fâ funzionâ i ospedâi, asfaltâ lis stradis, ma se i aministradôrs publics a vessin di viodi dome di pocets, tombins, asfalts, e vie indevant... nol coventarès un consei comunâl: al bastarès dopleâ l'ufici tecnic e nomenâ un bon comissari. Se la classe dirigjente si permet di butâ vie lis lidrîs, al è dibant programâ l'avignî: nol è doman par un popul cence memorie.

Te foto di Wikipedia: Aquilee.

Campagne abonaments

Vuelistu jessi simpri inzornât su ce che al sucêt ta chest blog? Ti someial util (tal ben o tal mâl) di viodi ce che o cumbini? Po ben, se la rispueste e je "sì", alore aboniti! Cemût? Baste che tu ti iscrivis fracant chi!
Grazie a chei che lu àn za fat e a chei che lu fasaran!

Pat pal Furlanist

Dopo il Pat in difese de Universitât, viodût l'ultin post dal Dree (te foto), o proclami la iniziative popolât par evitâ la sieradure dal prin blog fûr par fûr par furlan:

Pat pal Furlanist!
Se ancje tu che tu leis chest blog, ma prime tu jeris un letôr ancje dal Furlanist, lasse chi un coment cun scrit "PAT PAL FURLANIST: DREE RESTE IN LINIE" (che tra l'altri al è ancje un invît a no meti sù masse chilos...).
Cun di plui, o podês mandâ une mail cul stes messaç: "PAT PAL FURLANIST: DREE RESTE IN LINIE" a ilfurlanist[gubanute]gmail[pont]com

Mandait une detule

Forsit cualchidun si è za inacuart, ma par cui che inmò no lu sa, al è stât viert chest simpatic sît "Si à di dî di sì di dì" li che ognidun al pues mandâ une detule furlane o un proverbi: si pues scrivi a ilfurlanist(gubanute)gmail.com