Soldatin di Ferigo

Giorgio Ferigo, che il prossim an a saran 20 agns che al è mancjât, al è stât miedi, operari, musicist, cjantautôr, scritôr, animadôr culturâl, vôs autorevul de Cjargne e no dome...

E autôr di une des plui fuartis cjançons cuintri de vuere e de retoriche che e dopre i muarts par celebrâ ce che di "grande" e je stade une tragjedie e, come che al diseve il Pape Benedet XV, un inutil stragjo.

Soldatin di Giorgio Ferigo

Lis cjastinis dal Checo

Il câs mi à puartât a Pàvana, a doi mês de muart di Francesco Guccini e pôcs dîs dopo dal aniversari de muart di Augusto Daolio, 34 agns indaûr. Doi mestris de musiche, unîts di un leam artistic e poetic che al fâs naturâl pensâju insiemi.

Tra chei tornants e i boscs di cjastinârs dal Apenin tra Toscane e Emilie, mi soi sintût un pôc a cjase. Cuasi in Cjargne.

Il puarton, il citofon, la cjase. Il curtîl dulà che si son celebradis lis esecuiis privadis. La voie di citofonâ, il pudôr di disturbâ…

La ostarie buteghe su la mitiche SS64 Porrettana, il mulin di Chicon. E il cimitieri, dulà che Francesco al polse insiemi cui gjenitôrs. Un salût cun emozion, cun dutis chês peraulis e chês musichis che mi lein a lui e a Augusto.

Otubar, pôcs minûts, intune matine di soreli cuasi sot misdì… O soi tornât a partî, cu lis sôs cjançons che mi corevin dentri come il Limentra viers Bologne, e te sachete cualchi cjastine… lis cjastinis dal Checo.

Tiere furlane si presente ai Agnui

Al sarà presentât in maniere uficiâl ai 23 di Lui aes 6 di sere, li dal teatri tende di Dieç (frache il link) (fraz. di Tumieç, UD) il cuint numar di Tiere Furlane, periodic di culture e teritori de regjon autonome Friûl – Vignesie Julie (frache il link) e rivade aromai al secont an di ativitât.
A presentaran Tiere Furlane (frache il link) n. 5 pre Alessio Geretti dal Comitât di Sant Florian (frache il link) ; Gilberto Ganzer, diretôr dai Museus Civics di Pordenon; Enos Costantini, curadôr editoriâl de riviste, Claudio Violino, assessôr regjonâl aes risorsis agriculis, naturâls e forestâts (frache il link) e il President de Regjon (frache il link) Renzo Tondo (frache il link)
Il progjet, che o ai il plasê di direzi e volût cun fuarce dall’assessorât a la agricolture, al à come obietîf «Valorizâ e fâ cognossi il patrimoni culturâl de regjon interie midiant de riscuvierte dal teritori» come che al sclarìs l’assessôr Violino (frache il link).
E propit par mantignî il leam cul teritori, a continuin lis presentazions itinerantis e chest ultin numar al sarà presentât a Dieç (frache il link), sugjestive suaze e sede dal impuartant event espositîf chest an dedicât ai Agnui (frache il link)«La sielte e je colade su chest paîs de Cjargne, piçul tes dimensions, ma grant par dut ce che il Comitât di Sant Florian (frache il link) al fâs ta chescj agns» al declare l’assessôr Violino (frache il link)«E po, “la Cjargne e je la mari dal Friûl”: Tiere Furlane (frache il link) no podeve no jessi presentade ancje chi e la ocasion nus ven dai contignûts di chest numar che al fevele propit de tradizion de latarie e dai mulins di Dieç (frache il link)».
Sul numar 5 di Tiere Furlane (frache il link) si fevele di fat di chescj elements, ma ancje di vuardi e de tradizion de bire in Friûl. I “personaçs” presints su cheste edizion a son Eugenio Caneva fondadôr de prime latarie sociâl cjargnele di Culino (1880) e Giovanni Bolle un grant sienziât a servizi de agricolture gurizane. Cun di plui une puntuâl ricercje storiche e mostre lis claris origjins de “Jote”, nassude propit in Cjargne par po jessi espuartade diventant embleme gastronomic di une grande citât. Il numar si siere cuntune sugjestive panoramiche fotografiche dedicade a Grau storiche: no dome “tiere” duncje, ma ancje “lagune furlane”.
Atenzion a lis lidrîs, ma il voli ben pontât sul avignî: al continue l’impegn ancje pai furlans tal mont che a puedin lei midiant de Rêt i contignûts di Tiere Furlane (frache il link). A son costants i inzornaments su internet: i aretrâts (i prins numars a son finîts) a son e a saran consultabii on line dal sît de regjon www.regione.fvg.it/tierefurlane (frache il link) e il profîl dal popolâr social network “Facebook” (frache il link) al è aromai rivât a passe 500 adesions.
“Tiere Furlane” (frache il link) e je ancje une trasmission cuindisinâl in onde ogni vinars des 11.00 e in repliche sabide aes 5 dopomisdì e domenie aes 9 e mieze su lis frecuencis di Radio Onde Furlane (frache il link) (Udin, Gurize, Basse Furlane e Friûl di Mieç: 90.00 mhz FM; Cjargne: 90.20 mhz FM; Colonia Caroya Argjentine 96.60 Mhz FM) o su www.ondefurlane.eu (frache il link) in streaming.

La bussade des crôs a Zui

Come tal 2008, ancje chest an te dì de Sense o ai stât sul plan de Vincule a la bussade des crôs. E chest an o ai puartât ancje Ninine parsore Zui.
Chi une volte e jere la sede dal Vescul e chest rituâl al vûl ricuardâ il leam/dipendence tra la plêf di Sant Pieri e dutis chês altris plêfs de Cjargne.
Une cerimonie pardabon sugjestive, cussì biele e profonde che tu rivis ancje a perdonâ cui che tal mieç di tante int al continue a peteçâ e a contâsi chê dal ors, dismenteantsi di jessi prin di dut a messe e no intune sagre.

Biele e vonde!

Aldo Rossi me veve fate scoltâ in anteprime l'an passât intune biele sere di Istât.
Ogni volte che le scolti mi vegnin i sgrisui come ta chê sere. Brâf Alduti!

Fieste de Filologjiche

Si ten vuê te Concje di Tumieç la "Fraie de Vierte", ven a stâi la fieste di Primevere de Societât Filologjiche Furlane, un dai apontaments plui impuartants dal an. E sarà ancje la ocasion di consegnâ ai corsiscj i atestâts di frecuence pai cors 2008.

Par viodi dut il program, fracait chi.

Frico a Lavarian

Passant par Lavarian si pues vê la sorprese di cjatâti tal mieç de... Cjargne! Eh sì, no ai sbaliât di scrivi: tal marcjât de sabide e jere une barache cul frico di siore Catine, cjargnele doc. E stant che al frico no si resist, si sin fermâts a gustâ: frico e polente! E po o ai mangjât ancje un tocut di formadi frant.
E come che si viôt te foto (grazie ae Ninine pe colaborazion) al jere dut bon!

La Crôs dal Friûl... E je achì!

Dificil di contâ ce che si sint dentri. Une vore dificil.
A viodi dutis chês crôs inflochetadis (cjale chi la foto), metudis in cercli di front de Crôs Mari di Sant Pieri in Cjargne, ti si sglonfe il cûr pe emozion. No je dome une cerimonie religjose. Al è un rituâl antîc, no vieri. Vieri al è ce che al è passât, antîc al è ce che al manten la fuarce des lidrîs simpri vivis di un popul. E intant che il Prevost di Zui lis clame, lis crôs a rispuindin "E je achì!", testemoneant che in 700 e passe agns che si ripet cheste tradizion, vuê come îr, la int a sint la fuarce di rimpinâsi fintremai sul Plan de Vincule par viodi la bussade des crôs e preâ inte nestre lenghe.
Pardabon une cerimonie sugjestive, cuntun soreli timit, ma simpri li a tignîti compagnie intune zornade che e reste tal cûr. E intant che o ven vie cuntune serenitât che no vevi di timp, o cjali jù pe val de Bût, un panorame che ti gjave il flât.
E po si domandisi parcè che la Cjargne le clamin la mari dal Friûl...

Sagre des crôs a Zui

Come ogni an, la dì de Sense e sarà la cerimonie une vore sugjestive des crôs de Cjargne che a fasin omaç lant a bussâ la crôs mari di Zui.
Pre Toni Beline i tigneve une vore a cheste zornade e, ancje cuant che nol veve podût partecipâ lu ricuardave: ve chi un biel intervent che us torni a proponi ancje chest an, fracait chi.

Simpri plui Aldo

Juste chê altre dî o ai fat une minirecension sul ultin disc di Aldo Rossi. E mi semee che i sedi plasude...
Vuê us met il gnûf video di Aldo presentât îr.

I mil di Aldo

Come che nus vise l'autôr stes, la cjançon Furlan di Aldo Rossi (te foto) e je stade scoltade passe 1000 voltis sul so myspace: compliments a Aldo.
Ma i compliments no son dome par chest travuart.
O ai scoltât il so Cd e i vevi ancje prometût di fâi une recension achì. E no le ai fate prime dome parcè che il lavôr di Aldo al è une vore articolât e al mertarès un recensôr vêr, un che si intint di musiche pardabon. Parcè che il Cd di Aldo al è une sorprese continue, imprevedibil. Al passe cun facilitât di un stîl a chel altri cence tancj fastidis, tratant temis difarents: chest al è Aldo, ven a stât ecletic e il so lavôr al ven fûr diviersificât inevitabilmentri. E se a cualchidun i plâs di plui un musicist che al vedi une linie uniche, beh, jo o dîs che o preferìs la musiche di Aldo, simpri bon di metisi in discussion e esplorâ sperimentazions gnovis: la identitarie "Furlan", la emozionant "A là sù" che mi fâs vignî i sgrisui ogni volte che le sint, la satiriche "Brake chel cjan", la oniriche "Viers di me", la caraibiche "Sù pa muse", il ritmi coinvolzent di "Zucar", la biele dediche al "Gno paîs", e dutis chês altris cjançons che si pues scoltâ in passe trê cuarts di buine musiche...
Bulo Aldo, artist masse cjargne pai furlans e masse furlan pai cjargnei! ;-)

Domenie ricuardant pre Antoni Beline

Cualchi zornade indaûr us ai segnalât il blog di Marino che al presente cualchi cerce des intervist che al à fat a pre Toni. Vuê us met achì lis ultimis peraulis che o vin sintût di pre Toni: il so testament spirtuâl.
Se dopo o volês ancje viodi cualchi pirule des sôs intervistis, fracait i links chi sot:

pre Toni in pirulis 1

pre Toni in pirulis 2

Lu dîs simpri e no mi stufi: plui al passe il timp e plui si sint che la sô vôs (libare plui de mê) e mancje!

Amarcord Friuli Doc 2007 - 2

Gjite a Verzegnis

O ai a pene metude vie la moto: o ai fat un zirut in Cjargne.
O volevi lâ a Dieç pe mostre su la Apocalìs, ma ae fin, vignude ore di gustâ, o ai fat un salt al Fogolâr, li di Manuela: cussì la gjite che e veve di jessi culturâl si è trasformade in gjite gastronomiche!
Chest ce che o ai mangjât: di antipast "tocj in braide cun coculis e rosmarin", di prin "vuardi cun luianie e porcins", di secont "frico di patatis cun polente rustide", aghe "Goccia di Carnia" e cafè coret (juste un sclip di gnapute parcè che in moto no si pues esagjerâ). Mangjât come un pape e servît e riverît: Manuela no dome e je une frute biele e simpatiche, ma ancje une coghe super cuntun ristorant pardabon ecezionâl.
Po dopo o ai polsât un moment e cuant che o jeri sigûr che ancje "soflant" nol sarès sucedût nuie, o ai tornât a piâ la moto e mi soi inviât sù par Siele Cjanzutan fint jù pal cjanâl di Sant Francesc, Spilimberc, Feagne e vie fint a cjase.
Propit une zornade spetacolâr: no sai parcè che o voi spes in Cjargne in moto... forsit semplicementri parcè che la Cjargne e je biele e vonde.

Tes foto: la mont Mariane viodude di Cjacis di Verzegnis

Vêr motâr furlan a Cjasesole

Domenie ator in moto: une des ultimis, mi sa...
Al jere un tic frescut e si tache a sintî che l'Istât al è daûr a finî.
O jeri a Cjasesole pal solit zîr che ogni an a fasin a Siele Chianzutan, ma par une schirie di motivazions (ancje il motoGP) a son stadis diviersis defezions. Ancje se no jerin in tancj, si è decidût di partî chel distès, ma la sezion custom e jere minoritarie (dome jo: ti pareve, destinât a jessi minoritari...) e duncje lis motos stradâls mi àn dât il fum...
Pensant ben di no lambicâmi plui di tant a coriur daûr e preferint une ande plui turistiche, o ai lassât che a lessin e mi soi lât a fâ un zirut di bessôl sù par Tumieç e dulintor cun calme.
Oh, mi racomandi: cheste foto le ai fate tal curtîl di mê sûr cu la moto distudade! Par strade si va simpri ben taponât e cul casc ben leât sul cjâf!

ps: grazie a Moreno pe maiute!

Benvenuto on the web

Stant che mi disês che o feveli dome par furlan, o ai doprât un titul anglo-talian par presentâ il sît gnûf dal albierc di Renzo: ve ca il link.
Jo e Thermo i vin za dât un sugjeriment, ma o scuen ancje ameti che il sît mi plâs une vore!

Il paîs dai orlois

Come che us vevi za dit, vuê o ai stât ta la val dal timp a Pesaria.
Us met achì une cerce di ce che o ai viodût ta chest paîs, maraveôs come dute la Cjargne.
O ringrazii di cûr i Colonos e il Tomât di Buie pe biele gjite e la organizazion ecezionâl. Compliments!

Al fevele Federico Rossi...

Viaç te val dal timp - Federico Rossi

... Al fevele Guglielmo Pitzalis...

Viaç te val dal timp - Guglielmo Pitzalis

... A fevelin la vuide e la aghe...

Viaç te val dal timp - Orloi a bascule

... Al fevele il carillon...

Viaç te val dal timp - Orloi cul carillon


... e ducj noaltris a scoltâ il timp che al cor.

Ce fiestone li di Renzo

Grande fieste îr di sere a Tumieç li di Renzo.
Tancj amîs, biele atmosfere e buine cusine!
Se cualchi papavar al vignìs fûr dai palaçons e al stes un tic di plui cu la int, nol varès dubis su cui che al varès di vuidâ la Regjon cul prossin an. Sperìn che chest Avost al puart un tic di sintiment te coce di plui di cualchidun.
Îr tante int a Tumieç e à mostrât che se al dipendès dal popul, lis sieltis a saressin za fatis.
Grazie Renzo e une bussade a Sonia!

21e BIKER FEST:IL PLUI SPETACOLÂR RADUN MOTÂR IN EUROPE

RALLY & ROCK FESTIVAL a Sudri (Udin) – A-23 jessude Cjargne-Tumieç

La edizion 21 de Biker Fest, il plui spetacolâr motoradun european, si davuelzarà dai 21 ai 24 di Jugn li de aree de Mont çoncolan, in comun di Sudri (Udin); un event storic, une manifestazion uniche tal so gjenar che, di an in an, e continue a clamâ dongje a ogni edizion desinis di miârs di personis che a rivin di ogni bande dal mont (chest an a saran ospits dai Stâts Unîts, Canadà, Australie, Santo Domingo, ma ancje de Russie, Ucraine e Moldavie). Il puest dal incuitri ideâl di ducj i motârs europeans, a cjaval di chopper, custom, naked o streetfighter che a sedin, un univiers colorât, un mont par so cont che si torne a cjatâ e al devente protagonist par cuatri dîs par an, dîs fats di incuitris internazionâi, novitâts, curiositât, musiche, amicizie, fradilance e solidarietât.

Il Bike Show al previôt i premis plui siôrs mai metûts in pali intun Bike Show european e la partecipazion dai plui impuartants costumizers internazionâi. Ta cheste edizion a saran ufierts 3 viaçs ae Bike Week di Daytona 2008 e altris premis bielons ai proprietaris des miôr motos tes categoriis Chopper U.S. Engine, Custom U.S. Engine, Chopper, Custom, Bobber, Café Racer, Naked, Streetfighter, Classiche, Full Dresser, Speciali e Best in Show. Dal 1996 fin vuê a son stâts distribuîts sîs viaçs complets e disesiet biliets di avion, cun destinazion la Bike Week di Daytona, in Floride.

Ancje par chest an la lotarie e met in pali une sflandorose Honda Shadow Spirit 750! Pal passât a son stadis vinçudis ae lotarie siet H-D Sportster, dôs Yamaha Drag Star, une Moto Guzzi Breva, une Moto Guzzi California Special, dôs Custombike, trê Honda Shadow 750 e une Kymco. Cun di plui la HONDA Italia Uficiâl e sarà presint par ufrî al public demo ride cun ducj i gnûfs modei e cors di vuide sigure par ducj, comprindûts i minôrs di etât.
Chest an ancje ARCTIC CAT cui siei Quad multiûs al darà la pussibilitât di provâ i siei innomenâts cuadriciclis.
Come simpri la colone puartant di chest event e sarà la musiche: di agns a montin sù sul palc band e personaçs innomenâts tant che Ronnie James Dio, Kim Brown, Creedence Clearwater Revival, Status Quo, Uriah Heep, Dr. Feelgood, Sweet, Alvin Lee, Whitesnake, Motörhead, Soon, Rats, Yardbirds, Animals, Canned Heat, Wishbone Ash, Blues Pumpm, Alex Sure Band, Trutz “Viking” Groth, Ten Years After, Kim & The Cadillacs, Saxon, Twin Dragons e Tony Martin (Black Sabbath), Andrea Braido, Uli Roth degli Scorpions e Jaime Dolce... Sieltis che a pescjin tai stîi e tai ritmis classics dai mestris mondiâi e fûr di discussion dal Rock e dal Blues.
Ancje chest an la Fieste dai Motârs a viodarà protagoniste la musiche cun Paul Di’ Anno, il prin cantant dai Iron Maiden,e cun tantis tribute band di Rock Heavy Metal (cjale il program).
Come di tradizion de Fieste dai Motârs, no mancjaran lis spetacolârs e entusiasmantis esibizions dai Dragster, dai Stunt Men Internaziozâi, cul famôs Ricky Angerer (D) e dal Motocross Freestyle cui FMX International (I) come ancje i spetacui acrobatics, i divertents bike game, ma a saran ancje i esuberants Burn Out di Udo Bracht (D), kart, ape race, trike, sidecar e un contest pai motoveicui plui stranis... No mancjaran ancje lis elezions des Miss, il sexy bike show internazionâl cun Justine, i cors di vuide sigure, e vie indevant. Spazi ancje pai passionât di aerografie e tatuaçs; e po cetancj barachis par compra di dut: dai vistîts di piel ai ogjets indians, dai cjapiei ai acessoris par moto e tant tant di plui.

Par cui che al ame i viaç e la discuvierte di altris popui, ae Fieste dai Motârs a podarà cjatâ diviers motocicliscj che par cheste ocasion a contaran lis lôr entusiasmantis esperiencis di viaçs in ogni bande dal mont, de Indie ae Cine, de Irlande ae Siberie. Pai passionâts di culture indiane invezit e je une novitât assolude: pe prime volte la Fieste dai Mortârs e ospitarà une part dal museu storic sui natîfs di Americhe dal siôr Biscotti Enrico di Orvieto.

Events tal event
Cun di plui domenie a buinore al è di no pierdi la 12. US CAR REUNION, storic radun di machinis americanis, li che si podarà rimirâ cetantis machinis a “stars and strips”, che si esibiran ancje in garis di regolaritât (www.uscarreunion.it) e il radun nazionâl di RIVS – regjistri talian di veicui storics – al sarà presint cuntun stand di pueste, par dâ conseis su lis sigurazions agjevoladis pai veicui storics imatricolâts prime dal 1987.

Cun di plui al sarà pussbil partecipâ a ativitât di interès sociâl come chês inmaneadis dal Coordenament Mototocicliscj, de associazion DISMO (Dimensione Sigurece in Moto – Disabii in moto) e de Associazione Motociclisti Incolumi, che a sensibilizaran i presints su argoment sune vore seris e cjalts che a fasin patî il motociclisim e i motocicliscj disabii, come la sigurece su la strade, lis omologazions e lis patentis speciâls. Cun di plui, presints de Belgjiche, de Gjermanie e de Italie i pastôrs motârs protestants.

Us visìn che la Fieste dai Motârs e rapresente ancje une otime ocasion par fâ un san mototurisim e par cognossi miôr la Regjon che le ospite, il Friûl – Vignesie Julie (www.turismo.fvg.it). Di fat, logade tal cûr de Cjargne, e permet di visitâ localitâts di grant interès culturâl e naturalistic, museus e bielecis storichis e ancje di preseâ la innomenade tradizion enogastronomiche; par fâ vivi in maniere complete l'event, a saran inmaneâts zîrs turistics e enogastronomics. Pe prime volte chest an al sarà presint ae manifestazion www.terredimoto.it, sodalizi che al ponte al disvilup di un sisteme integrât tra events/aveniments tradizionâi di promozion e acet turistic e servizis e iniziativis studiadis di pueste pal turist su dôs rovedis, cu la finalitât di fâ cognossi lis particolaritâts teritoriâls, storichis e culturâls e la splendide morfologjie dal Friûl, midiant dal comun denominatôr de passion pes motos.

Altris comunicâts stampe specifics (ancje in altris lenghis), e ancje materiâl audio, video e fotografic, a puedin jessi domandâts al Ufici Stampe.

Par info diviersis e su Bike Show e Stand (+39) 0432.948777; fax (+39) 0432.948606
e-mail: info@bikerfest.it – sito web: www.bikerfest.com

GRANDE DISPONIBILITÂT di ALBIERCS
Par hotel e acet: +39/(0)433-778921 - info@albergodiffuso.org - (Albierc Difondût di Sudri);
Par hotel e acet e curis termâls (Termis di Darte): +39/(0)433.929290 – arta@infocarnia.org - (Carnia Welcome)
Par altris informazions turistichis e par mototuriscj: www.terredimoto.it – www.turismo.fvg.it

VTC in Cjargne: la trasmission di Marino Plazzotta

Us ai za fevelât di Marino Plazzotta, gno amì e colaboradôr sedi de Patrie dal Friûl, sedi di Video Tele Carnia.
Cheste e je une pontade de rubriche televisive che e va in onde su la emitent che si cjape dome in Cjargne o su internet.
Jo i ai domandât a Marino di fâ la rubriche par cjargnel e no par talian e o speri tant che dopo di cheste pontade, al continui cussì!