28 febbraio 2007

Il sît di Sant Zuan a Sant Tomâs

Usgnot e je la presentazion dal belanç a Sant Tomâs. La assessore Garzitto mi à visât che, prime di tacâ a sintî numars, e sarà presinte la archeolighe Tiziana Cividini che e presentarà al public il stât di fat dal sît dal Ospedâl di Sant Zuan. O pensi che e sarà une biele ocasion par cognossi cemût che a van indevant i lavôrs. Apontament aes 20.00 li dal centri parochiâl a Sant Tomâs.

27 febbraio 2007

Zornade furlane dai dirits

Tacant des 9 di buinore, la programazion (90Mhz in FM o in streaming) di Radio Onde Furlane di vuê ai 27 di Fevrâr e je dedicade ae Zornade Furlane dai Dirits, come che nus ricuarde chest messaç dal puartevôs dal Comitât 482.

Ai 27 di Fevrâr al cole l’inovâl di une date un grum impuartante de storie furlane, ancje se a son inmò tancj i furlans che no le cognossin. Tal 1511 la Joibe Grasse e colave juste ai 27 di Fevrâr e, ta chê zornade, si invià il riviel plui grues de storie dal Friûl. In bandis di vuerilie, i contadins a cjaparin, a meterin a sac e a brusarin cjistiei e palaçs ator par dute la Patrie. Il riviel al fo inneât tal sanc, ma lis comunitâts furlanis a cjaparin cussience de lôr fuarce. Une fuarce che ur permetè di tratâ la lôr poie militâr a Vignesie daûr dal rispiet dai lôr dirits e che, cualchi an plui tart, e fasè nassi la Contadinance, orghin rapresentatîf des comunitâts rurâls cence avuâi in Europe. Ve che alore, chê dai 27 di Fevrâr, e je la date miôr par celebrâ la Zornade Furlane dai Dirits. Dirits che par nô, furlans dal Comitât 482, a son in primis chei linguistics e nazionâi, ma che a son leâts ad in dopli cun ducj chei altris dirits: salût, lavôr, cjase, scuele, ambient e v.i., parcè che no esistin dirits di prime e di seconde categorie. Dineâ un dirit, al vûl dî vierzi une puarte par dineâ ancje chei altris.

Ogni dì o viodìn metût sot dai pîts il nestri dirit, come popul, di decidi di bessôi dal nestri avignî. Ancje i nestris dirits linguistics a restin inmò sot atac: baste pensâ a cemût che, cundut de leç di tutele 482 dal 1999, il furlan al resti inmò fûr de puarte in cetantis scuelis e aministrazions publichis, e i tais ai fonts decidûts a Rome dal sigûr no zovin. L’impegn che o vin metût pe presince de nestre lenghe te radiotelevision publiche al à viodût ta chescj dîs un pas indenant, cul emendament fat bon de Comission parlamentâr di vigjilance su la RAI, ma si à di restâ in vuaite parcè che la bataie e je juste inviade. In fin, come furlans, o din dute la nestre solidarietât ai ativiscj des comunitâts slovenis dal Friûl, denant des bausiis e des agressions simpri plui penzis che si cjatin a vê di frontâ.

Par nô chê dai 27 di Fevrâr e je une date che e merete ricuardade, ma no si trate di une memorie sterpe, che e cjale indaûr cun nostalgjie. La Zornade Furlane dai Dirits e à di jessi une ocasion par ricjatâ cussience e braure di cui che o sin, par no dismenteâ che i furlans a àn savût lotâ pai lôr dirits. Une zornade di riflession, duncje, ma ancje un moment par cjalâ indenant, al avignî de nestre tiere e di ducj chei che i vivin. Di fat, o vin fevelât di dirits nazionâi e linguistics, ma ce isal di fâ denant di cui che al vûl une sanitât che e funzione come une aziende e no come un servizi, di cui che al vûl un lavôr simpri plui precarizât, di cui che al pense di sapulî lis nestris ricjecis naturâls sot di une plote di ciment, di cui che al pense al Friûl come a di une grande servitût militâr, viarie e energjetiche?

Cheste, duncje, plui che une dì di fieste e je une zornade di lote e di rivendicazion, ma une lote come che o sin usâts a fâle nô, in maniere democratiche: lis manariis e i forcjàs ju vin lassâts a cjase, o doprìn invezit lis armis dal dirit, dal impegn di ogni dì, de reson. Par che ducj i furlans a puedin gjoldi ad in plen dai lôr dirits e par che il Friûl al sedi patrie di dirits par ducj.

Il puartevôs dal Comitât 482
Carli Pup

26 febbraio 2007

Ma nissun vuelial zontâ cualchi consei?

Come che us ai za dit, a son tacadis lis presentazions dal belanç ator pes frazions.
Mi semee che un pâr di argoments a son avonde sintûts de int e mi riferìs in particolâr a lis scovacis e a lis antenis. Cualchi consei ancje achì? Magari fasint un struc di ce che a àn dit ator pes frazions...

25 febbraio 2007

I furlans rapîts in Nigerie

No ai fevelât subit di chest argoment, parcè che mi semeave masse delicât. Ma vuê o leievi il gjornâl e o ai viodût che ancje Maian, in cualchi maniere, al jere cjapât dentri di cheste notizie. Intal servizi, e je une interviste a Fausto Floreani che al fevele de sô esperience in Nigerie.

24 febbraio 2007

Rugby, 6 nazions: Irlande vs Ingletiere

Vuê mi è capitât di viodi par television il "6 Nazions" di Rugby: Irlande cuintri Ingletiere.
Stant che mi è vignude iniments cheste cjançon dai U2 (Sunday, bloody Sunday), a mi mi è vignût di tignî pai Irlandês, che dopo a àn vinçût 43 a 13

Cheste no je une cjançon di riviel... cheste cjançon e je Domenie sanganade domenie

Sì. Mmh

No rivi a crodi a lis gnovis di vuê
Oh no rivi a sierâ i voi
E fâlu lâ vie!

Par trop?
Par trop vino di cjantâ cheste cjançon?
Par trop? Par trop?

Parcè che usgnot o podìn jessi adun
Usgnot

Butiliis rotis sot dai pîts dai fruts
Cuarps sparniçâts dilunc de strade cence jessude!
Ma no fasarai câs ae clamade de bataie
Mi dreçâ la schene
Dreçâ la schene cuintri dal mûr!

Domenie sanganade domenie
Domenie sanganade domenie
Domenie sanganade domenie (sanganade domenie)

Bon, anìn!

E la bataie e je za tacade
O son stâts tancj muart, ma dimi cui aial vinçût?
La buse e je fate dentri dai nestris cûrs
E lis maris, i fruts, i fradis, lis sûrs
Fats a tocs!

Domenie sanganade domenie
Domenie sanganade domenie

Par trop?
Par trop vino di cjantâ cheste cjançon?
Par trop? Par trop?

Parcè che usgnot o podìn jessi adun
Usgnot

Domenie sanganade domenie (usgnot)
(usgnot)Domenie sanganade domenie
(usgnot)

(Anìn)

Suie lis lagrimis dai tiei voi
Suie vie lis lagrimis
Oh, suie vie lis lagrimis
Oh, suie vie lis lagrimis
... Domenie sanganade domenie...
oh, suie la sclipignade di sanc dai tiei voi
... domenie sanganade domenie - domenie sanganade domenie... ah
domenie sanganade domenie... domenie sanganade domenie... ah

E je vere che o sin imuns
Cuant che i fats a son finzion e realtât televisive!
E vuê i milions a vain
O mangjìn e o bevìn intant che doman a muerin!

(domenie sanganade domenie)
La bataie vere e je inmò tacade (domenie sanganade domenie)
Par proclamâ la vitorie Jesus al à vinçût
(domenie sanganade domenie)
La...
...domenie sanganade domenie...
domenie sanganade domenie...

23 febbraio 2007

Belanç torzeon: presentazion tes frazions e cjâf lûc

Come ogni an a son tacâts i incuintris di presentazion dal belanç ator pes frazions e cjâf luc.
Par savê i oraris e i puescj, o podês clicâ sul sît dal Comun, li che o cjatais il calendari complet, paîs par paîs.
Finidis lis presentazion, il belanç al sarà puartât in aprovazion in consei tor de prime metât di Març.

Fornâs di Sant Liseu

Come che o varês za let sedi su chest blog, su chel de concorince e sui gjornâi, l'argoment di atualitât al è propit chel di chê che si clamave fornâs di Morandin (cumò la proprietât e je gambiade, ma par capîsi, o continui a clamale cussì).
Stant che a son in cors lis indagjins e il sît al è stât secuestrât, no sai ce dî, se no che o soi preocupât, come che o pensi che lu sedin ducj. Stin a viodi cemût che e va indevant la cuestion.

22 febbraio 2007

Furlan in Universitât: i cors dal Cirf

Il CIRF, Centri Interdipartimentâl di Ricercje su la culture e la lenghe dal Friûl, al organize ancje chest an i cors di lenghe furlane (L.482/1999 su la tutele des minorancis linguistichis storichis) pai dipendents des Aministrazions Publichis.
Il cors al è viert ancje ai students e ai citadins come uditôrs e nol proviôt nissun paiament.
Dut câs, o podês visitâ il sît internet dal CIRF.

CIRF – Universitât dal Friûl – Università degli Studi di Udine
Tel. 0432.556480
Fax 0432.556481

Gri gri: ma ce vâstu a dî?!


O soi un tic deludût des declarazions di Grillo a proposit di Marilenghe e Furlan.
Su diviersis robis o soi dacuardi (internet, skype, energjie, brusadôrs di scovacis, rapuart politics "dipendents"-citadins "datôrs di vore") ma su la cuestion de lenghe furlane, al à pescjât une buiace!
Su internet si dopre firefox par furlan, o vin la enciclopedie par furlan, il dizionaris par furlan, si scolte la radio par furlan, a son i blogs par furlan, i programs open source a son daûr a nassi ancje par furlan, o vin ancje biei documentaris.
E ancje la Universitât dal Friûl e lavore in cheste direzion o la Societât Sientifiche Tecnologjiche, cence contâ dutis lis aministrazions publichis impegnadis.
Ma jo mi domandi: cun dutis lis pussibilitâts che al à di informâsi, scuegnial scoltâ dome chei che i disin che chi o sin inmò cui scarpets e lis cossis? E chel grant gjornâl che al è il Messaggero al tete su chestis polemichis.
Cui che al volès fâ sintî la vôs furlane al pues mandâ chest SMS (numar: 48442) al Messaggero "FORUM UD Par Puar Beppe Grillo: Furlan e inovazion? Ducj i doi!!! (e visaitsi di meti non e cognon)".
Viodìn se ju publichin!

E trente!!! (mil)

Mi sa che lu zui al lot: 30! 30Agns e 30mil contats...
Grazie a ducj i letôr e cumò che o vin fat trente, fasarìn trenteun.
E par fâ fieste, un biel video catalan. Un spetacul che al fâs vignî i sgrisui!

21 febbraio 2007

Fin une e mieze... Ma almancul la ICI no cres

Sentade lungje lungje dal consei comunâl. Cheste volte o soi rivât prime par no fâ la figure di chê altre volte che aes 16.36 ju ai cjatâts ducj jù pes scjalis... eh sì, ancje jo o soi tra chei che a son rivâts in ritart e ancje se o vevi visât che o sarès rivât 10 minûts dopo, lis regulis a son regulis e duncje la mê assence e à pesât... O domandi scuse.
Par cheste sentade invezit o vin fevelât di diviersis robis, tant al jere lunc l'ordin dal dì.
Tra lis buinis gnovis il discors Ici che al reste come l'an passât, ma intun moment li che tassis e pression sul contribuent a son simpri che a cressin, chest nol è mâl.
Pe cuestion de telefonie invezit o vin decidût di tornâ a puartâ la adozion dal plan te prossime sentade: e je vignude fûr une discordance tra la planimetrie e la relazion, stant che dome il tecnic al podeve comedâle, lu puartarìn in adozion tal prossim consei.
L'assessôr Zucchiatti nus à sclarît che il plan al è necessari (parcè che se no i gjestôrs a son libars di fâ ce che a àn voie) e che ancje la zone di Susans e je comprindude dentri de zonizazion.
In Lui o vevin aprovât un ordin dal dì che al diseve di tignî lontan des cjasis lis antenis, ma jessint il servizi telefonic, un servizi public, i ents locâi no puedin fermâ la istalazion in centri abitât, se il gjestôr al à dibisugne.
Ciert al è che la normative e je pardabon ingredeade, ma l'impuartant al è no fâ alarmisim: i rilevaments fats in ocasion dal plan a disin che lis emissions a son sot dai valôrs limit.
Dut câs, o visi ducj i citadins, che dopo de adozion al sarà un timp par presentâ dutis lis osservazions dal câs, come par ducj i plans che a rivuardin la urbanizazion

20 febbraio 2007

Thermosafari: cheste no je une farcadice


Stant il "qui pro quo" di cualchi zornade indaûr o publichi un mini reportage dal Safari che Luca Peresson al à fat in Sudafriche. Mi à scrit che pensant a la discussion su "buiace di elefant" e "farcadice" che e jere nassude cul nestri Thermonuke, al jere necessari fâ viodi la diference. Ben cheste chi parsore: NO JE UNE FARCADICE, ma l'autôr (de buiace, no de foto) al è un ipopotam, che le à fate e al è scjampât cussì di corse che Luca nol à rivât nancje a fotografâlu... Di fat a son restâts dome un rinoceront e une zirafe (forsit stitics...).




Grazie a Luca pes fotos.

Vuê al è consei comunâl

Vuê al è consei comunâl aes 18.30, dopo che chê la convocazion di vinars passât e jere saltade.
Par viodi l'ordin dal dì, lait sul sît dal Comun di Maian

19 febbraio 2007

Sunait, sunait cjampanis!...

O ringrazii Michele, un zovin scampanotadôr di Maian che mi à segnalât il sît de lôr associazion: Associazion dai Scampanotadôrs Furlans "Gino Ermacora".
Al sarès biel tornâ a sintî une biele scampanotade ancje a Maian, magari pe fieste dai Sants Pieri e Pauli. Cumò i mandi une mail a pre Giuliano par segnalâi la cuestion! Compliments a Michele e a ducj chei che a continuin a scampanotâ pai nestris paîs.

18 febbraio 2007

Videocartuline: il mâr sudafrican, ce onde!


Luca Peresson al è in Sud Afriche, ma midiant di internet o rivìn a tignîsi in contat come se al fos a simpri a Farle. Cheste e je une video cartuline che nus fâs viodi il biel mâr sudafrican e sintî l'aiaron che al tire là jù, a Umkomaas. In spiete che al torni par contânus cemût che e je lade, lu saludi e cun lui o saludi ancje Giusy, Carli e ducj i furlans sudafricans

17 febbraio 2007

Mi ilumini di mancul

Se cualchidun nol saveve, us torni a ricuardâ che îr e je stade fate la iniziative "Mi ilumini di mancul". Il fin di cheste iniziative che e previodeve di distudâ la lûs par une ore a tacâ des 6 di sere e je une maniere concrete di sensibilizâ al sparagn de energje.
E je une statistiche che e dîs che se si rivàs a convertî dutis lis lampadinis che a son tal mont dal sisteme a incandescence a chel a fluorescence, si rivarès a distudâ un numar une vore grant di centrâls nucleârs (a fevelin di tor il 50%). Chest par dî che prin di fevelâ di plui energjie di produsi, al sarès prime di resonâ su plui tecnologjie che nus permeti di doprâ miôr la energjie che za o vin.
O podaressìn fâlu plui spes: une ore intun an a son 60 minûts, ma se noaltris o fasìn un minût in dì a son 365 minût intun an che a son 6 oris e no si visìn nancje. No?

16 febbraio 2007

Furlan di esportazion: PPP a Bruxelles

Fevelant un tic di culture, i gjornâi a ripuartin la notizie di une mostre su Pieri Pauli Pasolini e la sô poesie in lenghe furlane a Bruxelles.

Dedica
Fontana di aga dal me paìs.
A no è aga pì fre-scia che tal me paìs.
Fontana di rustic amòur.

(furlan di Pasolini, ndr)

15 febbraio 2007

Ma no si clamavial "Termovalorizatôr?"

Sul MV di vuê o ai cjatade cheste notizie che o met tal prin coment.
O ringrazii il letôr dal blog che mi à mostrât il comunicât Ansa.
In pratiche al è stât secuestrât un toc dal "brusadôr di scovacis" di Triest parcè che al incuine... La robe simpatiche e je che tal articul no si cjate plui scrit di nissune bande la peraule "termovalorizadôr".
Che a vedin let chest blog?

InnovAction 2007: il comun di Tavagnà ancje par furlan

Partîts! Come che us ai dit cualchi zornade indaûr, o podês vignî a cjatâmi a InnovAction 2007 li dal stand dal Comun di Tavagnà (te foto, il stand cun Roberto e Ivano, i doi miei coleghis che si ocupin dal Sisteme Informatîf Comunâl).
Tal bancut o vin preparât ancje une piçule racuelte di materiâl informatîf par furlan. Su chest teme, usgnot su Telefriuli aes 21 si fevelarà di Lenghe Furlane e Inovazion.
Su chest argoment o podês lâ a viodi doi progjet che il Sportel pe Lenghe Furlane di Tavagnà al à imbastît e che al è daûr a puartâ indevant ancje cun altris ents: Plone par furlan e Open Office par furlan.

14 febbraio 2007

Cartuline dal Sudafriche

Ve chi une altre biele cartuline che mi è rivade dal Sudafriche, in particolâr di Umkomaas.
Un mandi a Giusy, Luca e Carli che a son là jù

Furlan te Universitât dal Friûl

Par ducj i zovins che a volessin continuâ la lôr formazion te Universitât dal Friûl, cumò a puedin cjatâ la lôr strade consultant ancje la vuide ai cors di lauree pe prime volte par furlan.
Indreçade ai students des scuelis superiôrs, la Vuide e mostre tal detai la ufierte formative dal an academic 2006-2007 di dutis lis dîs facoltâts dal ateneu.
Il progjet lu à metût in vore il Centri interdipartimentâl di ricercje su la culture e la lenghe dal Friûl (Cirf) cui finanziaments de Leç 482/1999 su la tutele des minorancis linguistichis storichis.
La Vuide e vignarà presentade e dade fûr pe prime volte in ocasion dal Salon dal student programât par Vinars ai 16 e Sabide ai 17 di Fevrâr al Campus dai Rizzi, in vie delle Scienze 208. Il progjet di traduzion al à cjapât dentri ancje la “mini vuide”: un librut svelt che al presente in maniere sintetiche la ufierte didatiche, i servizis e lis ativitâts di ricercje de Universitât dal Friûl.
Lis dôs vuidis, stampadis ognidune intun miâr di copiis, a saran a disposizion li dal Centri orientament e tutorât, li dal Ufici relazions cul public, tes segretariis didatichis dal ateneu des sedis di Udin, Pordenon e Gurize. Cun di plui a vignaran distribuidis tai Sportei di orientament (Ritmo) de Regjon, in ducj i uficis Informezovins e ai insegnants dal orientament des scuelis superiôrs des provinciis di Udin, Pordenon e Gurize. Lis vuidis par furlan a àn chei stes contignûts e chê stesse grafiche de edizion taliane.
Al progjet a àn colaborât il Centri comunicazion e stampe e il Centri orientament e tutorât (Cort) dal ateneu, la cjase editore Forum e i studis di grafiche cdm/ekostudio.
« La fuarce e la origjinalitât di espression di cheste lenghe maraveose – al rimarche il retôr, Furio Honsell - e presentarà ogni dissipline, sedi fedelmentri che ancje sot di une lûs gnove, che e insiorarà la dissipline stesse e ancje il furlan». « Il sproc che al compagne lis vuidis al è “facoltât di inovazion” – e spieghe la diretore dal Cirf, Piera Rizzolatti – che al vûl riclamâ la atenzion su la largje sielte di ûs che la lenghe locâl e permet te comunicazion: dai argoments plui informâi a chei plui sofisticâts de tecnologjie e de ricercje sientifiche. ».
Dongje des vuidis in edizion furlane, il Cirf al presentarà tal Salon dal student altris novitâts: gnûfs materiâi stampâts de campagne di comunicazion F=MC2 ; il gnûf depliant informatîf dal Cirf bilengâl; lapis promozionâi de lenghe fats in plui colôrs cun plastiche riciclade di scjatis di cd, videocassetis e tacis; adesîfs che si darà fûr tai locâi publics, cuntun dissen studiât di pueste e il sproc “o feveli ancje par furlan” par sburtâ lis personis a fevelâ daurman par furlan dulà che a cjatin chest logo.

Vinars al è consei comunâl

Forsit cualchidun al sa za: vinars al è consei comunâl.
La novitât e je che la convocazion e je pes 16.30.
Par viodi l'ordin dal dì, lait sul sît dal Comun di Maian

13 febbraio 2007

Riunion Anci Zovins a Codroip

O soi a pene rientrât di Codroip.
Il sindic Vittorino Boem, che o ringrazii, al à dade ospitalitât ae riunion de Anci Zovins. E je stade la prime ocasion par cognossi chei altris aministradôrs che a son part di cheste gnove consulte Anci.
O vin ancje proponût ognidun cualchi argoment che al à a cûr e jo mi si permetût di ofrî il gno contribût pes interès e competencis che mi rivuardin (se si à di fevelâ, aò è miôr fevelâ di alc che si cognòs)... partant o ai proponût 3 "i" che i zovins a puedin e a varessin di puartâ indevant:
  • identitât: tutele linguistiche di une regjon come la nestre che e je plurilengâl (in sale a jerin furlans, ma ancje Kristian Tommasi di Savogne che nus à dit che li i conseis comunâi si fasin fevelant par sloven, Isabella De Monte di Pontebe, comun di lenghe todescje, Elia Vezzi di Paluce li che e je la comunitât che e fevele Tamavuês e duncje za te nestre riunion o vevin un panorame dal mosaic linguistic tipic de nestre regjon e par chest no trascurabil);
  • informazion: comunicazion cui citadins par incressi il rapuat tra aministradôrs e popolazion;
  • inovazion: disvilup e ûs des gnovis tecnologjiis ancje par incressi la informazion al citadin (ancje doprant software open source che al fasarès sparagnâ un sac di bêçs in tiermin di licencis, cun buine pâs di Bill Gats & Co).
Si à fevelât ancje di altris problemis: cualchidun al à fat presint il probleme des politichis sociâls, dal lavôr, dai bens demaniâi (casermis che a passin ai comuns), cuestion montane, integrazion e altris argoments che a varìn di frontâ tes prossimis riunions che si fasaran cul principi di zirâ sul teritori regjonâl ancje par cognossi lis realtâts dai diviers comuns.
Si è presentade une biele ocasion di confront e o speri di dâ, tal gno piçul, un contribût.

12 febbraio 2007

Setemane de inovazion: ancje Tavagnà

Dai 15 ai 18 a Udin e je Innovaction.
Dentri di cheste, us segnali la biele idee di BarCamp, une de-conference li che si fevelarà di dut ancje di blog.
Di no pierdi e lâ a viodi.
E intant cualchidun altri al à pensât di fâ un censiment dai blogs furlans.
Se o vês voie di vignî a cjatâmi, o sarai li dal stand dal Comun di Tavagnà: joibe, vinars e sabide a buinore (domenie no, parcè che o volarès lâ al Carnevâl di Resie). Us spieti a Innovaction!

Habemus blog minorantiae

A sun di vitis, cumò o vin ancje une altre cjampane che sune te blogosfere di Maian. Dopo scuasit un an si son decidûts a copiâmi e ancje Intesa per Majano, cun a cjâf Lieto Molinaro (te foto), e à viert un sô blog: lait a viodi.
Si domandarês parcè che o ai fat chest post... une vore sempliç: intune democrazie al è simpri impuartant che a sedin plui vôs e cheste novitât e conferme che l'imprest dal blog al è un bon imprest.
Cui sa se ancje cualchidun altri dal consei si decidarà o al continuarà a fâ fente di nuie...
E cui sa se chei di Intesa mi metaran tai link: tal sît dal Comun no soi, viodìn se tal lôr...

11 febbraio 2007

Cartuline de Indie

Chê altre dì mi è rivade une biele cartuline che e diseve:

"... pien di virtute che son da invidiare..."
Mandi di Renzo, Giovanni, Franco e Vendana


Grazie, mi à fat tant plasê e mi soi fat une biele ridade: une biele cartuline e une citazion pardabon impuartantone...

Mandi Giusy e bon viaç a Luca e Carli



Asimbonanga (We have not seen him)
Asimbonang' uMandela thina (We have not seen Mandela)
Laph'ekhona (In the place where he is)
Laph'ehleli khona (In the place where he is kept)

Oh the sea is cold and the sky is grey
Look across the Island into the Bay
We are all islands till comes the day
We cross the burning water

Chorus....

A seagull wings across the sea
Broken silence is what I dream
Who has the words to close the distance
Between you and me

Chorus....

Steve Biko, Victoria Mxenge
Neil Aggett
Asimbonanga
Asimbonang 'umfowethu thina (we have not seen our brother)
Laph'ekhona (In the place where he is)
Laph'wafela khona (In the place where he died)
Hey wena (Hey you!)
Hey wena nawe (Hey you and you as well)
Siyofika nini la' siyakhona (When will we arrive at our destination)

10 febbraio 2007

In ricuart dai muarts tes foibis

Ta cheste zornade si ricuardin i muarts tes foibis.
Jo no cognòs tant ben chê storie e mi limiti a ricuardâ inmò une volte i muarts.
Foibis, gulags, cjamps di concentrament, docis-gas, fors crematoris... indipendetementri dal colôr politic che al à fat nassi chescj orôrs dal secul curt, i politics di vuê, sedi di drete sedi di çampe, a àn il dovê morâl e la onestât inteletuâl di fâ dut il pussibil par informâ i citadins de assurditât di chês azion. Par no dismenteâ e par no ripeti. Ma o cjapi at che masse voltis, no si ricuardin i muarts, ma si à voie dome di dâsi la colpe l'un cul altri su cui che al à fat cheste o chê altre porcarie.
I muarts a mertin rispiet.

09 febbraio 2007

Vinars a buinore o soi su Radio Onde Furlane

Vuê, vinars ai 09 di Fevrâr dal 2007, a buinore dopo des 9.30 AM (ore furlane) e larà in onde su Radio Onde Furlane une mê interviste dentri de trasmission Ator Ator, condusude di Mauro Missane.
Come ogni mês Radio Onde Furlane e ospite la presentazion de riviste La Patrie dal Friûl e la redazion mi à delegât a rapresentâle in studi.
Cui che al à voie di scoltâ lis novitâts che al cjatarà su chest numar dedicât ae Slovenie, al pues scoltâ la Radio sedi sui 90Mh FM o ancje vie internet in streaming: al baste fracâ sul sît de Radio e colegâsi te sezion streaming. Frache chi. In repliche domenie.

08 febbraio 2007

In partence pal Sudafriche


O dedichi chest video a Giusy che e je za là jù e Luca e Carli, che invezit a son daûr a fâ la valîs par partî.
Bon viaç e saludait ducj i Furlans sudafricans!

La tutele dal furlan e la Europe

Come che nus vise Lenghe.net, vuê a Udin, a Palaç Belgrât, sede de Provincie, aes 15.00 e sarà une cunvigne sul teme "La tutele de lenghe furlane e l’Europe. Plurilinguisim, autonomie e identitât".
Al sarà presint ancje Aureli Argemì, il Diretôr dal Centri Internazionâl Escarrè pes Minorancis Etnichis e Nazionâls (CIEMEN) di Barcelone

07 febbraio 2007

Zornade di aniversaris

Cheste e je biele, tal sens di notizie (par dî la veretât, ancje la Jolie - te foto - e je une biele parussule). Dut câs, tornant ae cronache in teme di indentitât, us segnali cheste informazion VM18 che ILfurlanist nus regale de Catalogne...
Auguris ai fradis catalans!

Auguris Blasco: 07/02/1952

05 febbraio 2007

Vinars a Sant Denêl: conference su lis scovacis

Vinars che al ven a Sant Denêl aes 19.00 li de biblioteche Guarneriane, i Lions a àn inmaneade une conference par fevelâ di scovacis.
A saran presints ancje Lorenzo Cozianin, president de comunitât colinâr, Lorenzo Tosolini, sindic di Pasian di Prât che si è declarât disponibil a vê sul teritori dal so comun un "brusadôr di scovacis".
La robe che mi fâs zirâ lis scjatis al è che a continuin a platâsi daûr des peraulis: ancje sul gjornâl a fevelin simpri di "termovalorizzatore". Ma isal mai pussibil che no si puedi doprâ lis peraulis e clamâ lis robis cul lôr non: il "termovalorizzatore" prin di dut al è un "brusadôr di scovacis" che al fâs cinise di scovacis. Valorizial lis scovacis parcè che cul cjalt al fâs energjie? Bon al fasarà ancje energjie, no volarès che par risolvi 2 problemis (scovacis e energjie), si fasès un dam plui grant.
Lu ai za dit ancje se cualchidun mi cride: cirìn di risolvi i problemis par ordin, e no stin a doprâ la scuse de energjie par legjitimâ un sielte come chê dal "brusadôr di scovacis" (che se al fos tant biel, parcè no lu clamino "inceneritore" come cualchi an indaûr?).
E pe energjie o vin bisugne di plui tecnologjie che e eviti di straçâ lis fonts energjetichis che za a son. Al è come meti aghe intun colepaste: se no tu stropis cualchi busute, no tu varâs mai avonde aghe par jemplâ. Tachìn a sierâ cualchi buse, a otimizâ ce che o vin, cirìn di miorâ chei catafalcs che a son ator... e dome se dopo une atente politiche di consums e cuintri la energjie straçade no varìn nissun riscuintri, alore si podarà incressi il numar di centrâls e di "brusadôrs di scovacis".

04 febbraio 2007

Une sabide dopomisdì a Resie

Pe prime volte, îr dopomisdì o ai stât a Resie. O ringrazii Renzo Tondo, che al à volût puartâmi a un incuintri cul comitât cun a cjâf Sergio Chinese, che al è ancje il fondadôr dal sît internet: www.valresia.it, (che ta cheste foto di archivi al è cul prof. Han Steenwijk, che al è chel sentât).
E je stade la ocasion par viodi di dongje une realtât che no cognòs, se no par chel che o ai let in internet, cjalant sedi il sît di Sergio Chinese, ma ancje chel di www.resianet.org, il blog ILfurlanist, il blog di Resie e altri materiâl diviers.
Mi à plasût tornâ a viodi Sergio Chinese, che cun serenitât e motivant lis sôs ideis, nus à puartât lis sôs resons.
Pe prime volte o ai sintût ancje a fevelâ par Rosean, cuant che i ai domandât a Sergio Chinese di fâmi scoltâ i biei suns de lôr lenghe.
O ai vude une conferme: il teme al è delicât e complicât. Mi à fat plasê verificâ che Sergio al fevele ancje par furlan e chest al conferme che la nestre regjon e je un mosaic di culturis li che dutis a puedin cjatâ puest e convivi in trancuilitât. Baste volêlu. Par dî la veretât, cuant che o ai sintût il Rosean, mi à displasût cjapâ at che il plurilinguisim al jere dome di une bande: dome Sergio al podeve esprimisi par talian, Rosean e furlan, e jo dome in dôs lenghis. Mea culpa! ;-)
Grazie a Sergio Chinese e ai altris amîs roseans pe ospitalitât.

03 febbraio 2007

Ricuardant Gianni Gregoricchio


Ai 31 di Zenâr al è muart Gianni Gregoricchio.
Intal 2002 al ven ricognossût cuntun prin premi ae "Mostre dal Cine Furlan" la vore di animazion metude adun cun grande abilitât dai arlêfs dal IPSIA di Glemone: "Il princip bambin", une riduzion dal “Piçul princip” di Saint-Exupéry.
La cualitât dai lavôrs presentât in concors e an intivât la sensibilitât de jurie e dal public.
Un lavôr dai arlêfs des classis prime A e prime B dal cors par Operadôrs tai Servizis Sociâi.
Coordenament (pipinots, animazion, senografie, sfonts, tescj e regjie) de professore Chiara Pecile cul jutori (ripresis, lûs, fotografie e regjie) dal professôr Luca Peresson.
Montaç di Benedetto Parisi.
Mandi Gianni e grazie di dut.

02 febbraio 2007

Une mail de Australie

Piçulis sodisfazions, ma grandis emozions. Eh sì, propit cussì: chê altre dî o ai ricevude une biele mail di un furlan di Melbourne che mi à scrit par domandâmi cualchi informazion par podê imparâ a lei e a scrivi miôr par furlan. I ai mandât un pôc di materiâl e cun tante gjentilece mi à ringraziât. O publichi chi la sô mail, gjavant il non e il cognon, ma tignint dut come che al è par dimostrâ che cuant che lis lidrîs a son fuartis, la identitât no mole, anzit dispès e ten dûr plui di chê di chei che a son dongje. Mandi a ducj i furlans australians e a ducj i furlans ator pal mont.
La mail de Australie:
"Jo o soi nasut a Melbourne, Australia d’al 1950. Gno
parints a jerin di Arba e di Vendoi. Di frut a
parlavin simpri par furlan in cjasee. Vares gust di
imparalu mior. Gracie per vuestre gentilece e par dut
vestri lavor scrivint il blog.
mandi e grazie tant,
L. T."

01 febbraio 2007

Un altri sucès par Roberto Ongaro

O ai cjatât une biele notizie che e rivuarde Berto Ongjar, che al è rivât secont tal prin concors di "zâl par furlan" a Spilimberc. O vevi let la opare che al veve presentât e mi jere plasude une vore. O ai vût il plasê di condividi cun Ongjar la segnalazion al premi leterari Sant Simon dal 2006.
Cumò che o ai savût che al à vint ancje il secont premi ta chest concors o soi propit contenton! Bulo Berto!