Une segnalazion

Vuê a Vençon al son stâts celebrâts i 30 agns dal Inapa (istituto nazionale di assistenza e di patronato per l'artigianato ). Chest ent al è nassût juste tal 76 e la Confartigianato di Udin e à volût ricuardâ chest aniversari a Vençon: a jerin presints te sale consiliâr dal municipi il President Nazionâl Mario Galli, il presindent de Confartigianato di Udin Carlo Faleschini, il sindic di Vençon Amedeo Pascolo e tancj aministradôrs. Cun di plui a àn puartât un salût ancje il pres. de provincie Strassoldo, l'ass. regjonâl Bertossi e l'on. Compagnon. Tra lis testemoneancis al è stât mostrât un filmât de epoche dal taramot su la Inapa, che in 6 mês in chê volte e à fat fûr scuasit 17.000 pratichis par tornâ a meti in vore lis piçulis aziendis! Vie pe cunvigne a àn cjapât la peraule ancje il diretôr nazionâl Paolo Landi e il president onorari de Confartigianato BEPPINO DELLA MORA, che al à fat une propueste: nomenâ senadôr a vite il comissari straordenari pe ricostruzion Giuseppe Zamberletti. La propueste e je stade condividude di dute la sale cuntune grande batude di mans!

Complean dal Silvio

Vuê al finìs i agns Silvio Berlusconi. Auguris!

Doman al è Consei comunâl

Dopo un atac di un Troian ( che o varès tornât a batiâ, ma par delicate no us dîs cemût), ve chi che o soi di gnût operatîf e cuntun tot di euros in mancul par paiâ l'antivirus...
Tornant al nestri comun, us visi che al è doman al è consei comunâl.
Su la mozion par Zamberletti mi fâs plasê che si feveli tal marcjât... o speri dome che i peçots no sedin stâts metûts fûr di un de maiorance. In câs contrari, compliments a chel pote che dopo des riunions al met ator vôs in place.
Dut câs o ai propit gust di viodi ce che al ven fûr doman di sere: ve chi intant l'ordin dal dì.

A scuele di furlan

E intant che la Lega Nord e à presentât une buine propueste di leç pal insegnament dal furlan te scuele, noaltris achì o continuìn cu lis nestris lezionutis di furlan on line...

Zornade europeane des lenghis

Come che us ai za visât, vuê il Consei de Europe al celebre la zornade europeane des lenghis e la impuartance dal lôr aprendiment.
Jo us invidi a Felet a viodi une mostre su lis lenghis minoritariis di dute Europe: dal sigûr o varês cualchi biele sorprese.
Us spieti e us fasarai cun plasê la vuide ae mostre: cjalait achì dutis lis iniziativis ancje di Udin.

Cjante che ti passe...

Fûc a Rivis Darcjan

Vuê sul Messaggero, ma ancje come che al veve ricuardât Luca, tal post precedent, al è l'articul sul fûc che al à devestât l'implant di Rivis. Al semee che la situazion e sedi fûr pericul, ma al conven vê lis orelis spiçadis: no je une situazion tant biele.

Cjacaris a son cjacaris,fats a son fats...

Chê altre sere su lis gnovis o ai sintût i contribûts che al Provincie di Udin e à dât aes Associazions di Maian:
Pro Maian: 5.000 euros pe mostre (President);
Avulls: 6.000 euros pe ativitât (Ass. Politichis Sociâls Adriano Piuzzi);
Nostro Domani: 7.000 = 4.000 pe ativitât e 3.000 pe inaugurazion di Pêrs (Ass. Politichis Sociâls Adriano Piuzzi);
ASD Majanese: 3.000 euros pal campus volley pai fruts chest Istât (Ass. Sport Fabio D'Andrea).
In totâl 21.000 euros pes associazions di Maian.

Zornade Europeane des Lenghis

Us consei di lâ a lei achì...

Une leç pe scuele furlane

Il cons. regjonâl de Lega Nord Claudio Violino al à fat une propueste di leç pe scuele furlane. Us met un tic di rassegne stampe di lei e comentâ...

Luca Peresson e Farcadice: Premiâts!!!!

Farcadice, il documentari di Luca Peresson di Farle e Carlo Della Vedova su la emigrazion furlane in Belgjiche (in particolâr tes minis a tirâ fûr cjarbon) al à vinçût il prin premi al Concors di Cordenons.
Complimentons ai doi regjiscj!!! Savint ce che us è tocjât o soi propit content di chest ricognossiment, pardabon meretât!!! Un documentari di viodi: fracait achì par lei une recension.

Protezion civîl e une mê propueste

Tal ultin fin setemane a Glemone e je stade la fieste de protezion civîl e une vore di volontaris a son passâts ancje par Maian, par viodi dopo 30 agns, i risultâts de ricostruzion. Intant te ultime comission culture o ai proponût di puartâ indevant un documentari sul Taramot a Maian. Stant che no vin masse finanziaments culachidun nol jere masse convint, a par sparagnâ al à dit che al sarès plui economic fâ une publicazion. Sul fat di no strassâ i bêçs o soi dacuardi, ma mi semeave une biele idee chel di cjapâ sù i filmâts di archivi su Maian (cineteche dal Friûl) e zontâju cuntune schirie di intervistis al consei comunâl che al jere tal 1976: ae fin dal mês o varìn un incuintri in consei e mi semeave la ocasion par tacâ di li, stant che par furtune, ancje se cun cualchi carnavâl, a son inmò cuasi ducj. Ma plui di cualchidun al è perplès parcè che ancje tirâ fûr dai archivis al è un lavoron lunc... almacul cussì al semee, ma forsit al è za stât fat e nol convetarès tant par fâ une biele robe che mi pâr za a bon pont: lait al lei l'articul sul Messaggero di vuê...

A scuele di furlan

A continuin lis lezions par imparâ a lei e scrivi par furlan: tierce lezion e ancje avonde particolâr... Lait a viodi il prin coment e se o podês lait a lei il test de grafie uficiâl: fracait achì

Cjante che ti passe

Ai 29 di Setembar al è Consei Comunâl

Te prossime sentade che e sarà ai 29 di Setembar, il Consei comunâl di vuê al ringraziarà il Consei comunâl dal 1976 a 30 agns di distance. Jo o ai pensât di fâ une propueste pal on. Giuseppe Zamberletti, comissari straordenari pal guvier nomenât dopo dal taramot dai 6 di Mai 1976 pe gjestion de emergjence e de ricostruzion. Tal prin coment o cjatais la propueste...

Par Mai - Par simpri

La Pro Majano e à inmaneât une serade di musiche, poesiis e imagjins par ricuardâ i 30 agns dal Taramot. La serade e sarà aes 20.30 di sabide ai 16 di Setembar te Glesie di SS Pieri e Pauli di Maian. E partecipà ancje la Corâl Gotis di Notis di Cjassà: altris informazion lis cjatais achì

Sabide a Madone di Buie: Farcadice - la emigrazion furlane in Argjentine e Belgjiche

La associazion "El tomât" e presente sabide 16 di setembar a vot e mieze di sere
tal centri de comunitât di Madone di Buie:
Farcadice di Carlo della Vedova e Luca Peresson, documentaris su la emigrazion furlane pal mont.
A son 2 diaris di viaç a Colonia Caroya e a Charleroi che a fevelin de storie di migrants furlans in Argjentine e in Belgjiche (di chest o vin za fevelât ancje a Jugn, si visaiso?)

A proposit di integrazion

Tal ultin consei comunâl o vin fevelât di integrazion. Achì un presenti une iniziative che si fasarà a Tavagnà e che e podarès jessi un element par tacâ a viodi ce fâ ancje a Maian: un cors di lenghe e culture furlane pai migrants.
La robe biele di cheste iniziative no je dome il nivel dal program e la presince di docents une vore cualificâts: Stefania Garlatti Costa, Gian Paolo Gri, Silvana Schiavi Fachin, Bruno Forte, Federico Rossi, Mauro Pascolini, Leo Virgili, Novella Del Fabbro. Dal sigûr tancj di voaltris ju cognossin.
Come che us disevi, il biel di cheste iniziative al è che cors al è stât volût, domandât e inmaneât di une associazion di "mediatori di comunità", imigrâts che a lavorin pe integrazion dai gnûfs migrants che a rivin in Friûl. Duncje la integrazion e passe ancje pal furlan!
La iniziative e je fate in colaborazion cul Comun di Tavagnà-Sportel pe lenghe furlane, ASS4 dal Friûl di mieç e cul contribût de Provincie di Udin (Lr15/96). Se o fracais su la imagjin, le viodarêr plui grande.

Friuli doc 2006

Cun doman al vierç Friuli doc 2006, chel pal popul. Di fat chel pai vips al è za tacât cu la cene in place S. Jacum. Une cene cuntun significât politic...

A scuele di furlan

A continuin lis lezions par imparâ a lei e scrivi par furlan. Lait a viodi il prin coment e se o podês lait a lei il test de grafie uficiâl: fracait achì

Par no dismenteâ: a mi mi plâs ricuardâlis cussì

Ai 11 di Setembar di 5 agns indaûr jo o jeri in autostrade. O vevi compagnât il fari Vittorio a Traversetolo par une mostre intant che o tornavi indaûr mi à clamât Alessandra par informâmi di chê disgracie che e à segnât la storie.
Dopo cinc agns si sint inmò une strane sensazion cuant che si fevele di chê zornade.
Cun di plui a son tacâts a zirâ in internet diviers filmâts... Un in particolâr mi à fat pardabon impression: lait a viodi achì

Schumi!!!

Cjante che ti passe(dedicât a chei che si sustin...)

Meeting Internazionâl di Atletiche

Ancje chest an la Libertas di Maian e à inmaneât il meeting internazionâl di atletiche. Dopo vê ospitât ancje delegazions di Oradea (Romanie) e Beslan (Ossezie), chest an o varìn a Maian ancje une delegazion de Guinee. Al è propit vêr che il Sport nol è dome gare, ma ancje solidarietât.
Achì un pocje di rassegne stampe su la manifestazion...

Comunitât Colinâr

Sul gjornâl, tai ultins timps no si lei dome di rotatoriis, ma o ai cjatât ancje riferiments e articui su la Comunitât Colinâr. Us met achì un toc che al fâs viodi che chest ent al è un tic in pericul e o speri che al puedi tornâ a ripiâsi: no volarès che chestis a sedin provis gjenerâls par une fughe di cierts comuns de Colinâr cun conseguencis su la esistence stesse de Comunitât...

Vinars al è Consei Comunâl aes 18.30

Vinars al è il Consei Comunâl convocât daûr de domande de Minorance:
Tra lis robis di discori a son:

• rispuestis a interogazions;
• propueste par doprâ chei 140.000 euros (che tra l'altri la Zonte e à za deliberât di metiju pal Magazin Comunâl gnûf);
• proprueste pe riduzion des indenitâts (che a Maian al è za stât decidût di vê al minim proviodût di leç);
• propueste di une cunvigne sul Cipaf (che la Comission Ativitât produtivis e à za tacât a progjetâ cul Ass. Minisini);
• propueste di mozion de cons. Giovanna Iesse a pro dal Tor de Glesie;
• propueste de Fieste de Integrazion.

Di plui no sai parcè che a son ducj ponts proponûts de Minorance e duncje o larìn a scoltâ in ce che a consistin chestis propuestis.

Fieste a Cjasesole di joibe fin domenie

Di joibe fin domenie e je fieste a Cjasesole.
Di neo motâr però mi soi permetût di meti il manifest di sabide, cu la manifestazion Ducati vierte a dutis lis motos.
E duncje: ducj a Cjasesole! Mandi Dario!

A scuele di furlan

A continuin lis lezionutis di furlan. Dopo de prime de setemane passade, ve chi un altri boconut di Grafie Uficiâl... a proposit: vêso discjamât il pdf dal librut dal Olf? NO?!! Alore ve lu achì di gnûf: fracait e lait a leilu ogni tant.
Par lei la seconde lezionute, cjalait il prin coment...

Italie - Lituanie: 1 - 1

Dut di viodi!...

Muris in fieste

Chest fin setemane e il prossim e je la fieste di Muris: par viodi il program complet, fracait achì.