Robert Gerard “Bobby” Sands – Roibeard Gearóid Ó Seachnasaigh

09.03.1954 – 05.05.1981

Par Bobby Sands la lodule e jere un dai simbui de libertât. Si pues sierâle intune scjaipule, torturâle e fâi dut il mâl pussibil, ma no cjantarà mai par cui che le à impresonade. Se si vûl sintîle a cjantâ, bisugne lassâle libare.
Bobby Sands al è muart 30 agns indaûr. Cun lui a àn pierdût la vite altris nûf volontaris republicans. E je une feride che e bruse ancjemò. Dut câs, la lodule e va dilunc a cjantâ e, se si le scolte ben, si visisi che e cjante propit la sô cjançon di libertât:

Tiocfaidh ár lá – La nestre dì e vignarà

Se o vês gust di lei inmò alc, fracait su http://www.bobbysandstrust.com/ e ancje chi.

25 agns

Su La Patrie la "cuintristorie dal Nûfcent"

Dopo de solite polse dal mês passât, a Fevrâr e je tornade "La Patrie dal Friûl" (www.lapatriedalfriul.org), cun tantis confermis e novitâts.
Tacant de cuviertine, i letôrs a podaran cognossi la "Cuintristorie dal Nûfcent" curade di Angelo Floramo.
«Tal an li che a diviers nivei si volarès insegnâ la “storie” dai 150 agns de unitât di Italie – che e à invadût il Friûl dome tal 1866 (e des bandis di Gurize i talians a son rivâts dome dopo de prime vuere mondiâl)» a declarin chei da “La Patrie dal Friûl” «o proponìn une leture furlane autentiche de Storie dal “Secul curt”. Ogni mês la cuviertine e fevelarà di un event significatîf dal 1900 a vuê. Une corse dilunc dai decenis par capî miôr ce che al è sucedût in Friûl, cence contentâsi di ce che nus conte e che nus volarès imponi la Italie».
La prime pontade e je dedicade al deceni 1900-1910 cun Udin capitâl “de modernitât” cu la fiere campionarie dal 1903 e “de lûs” cun Artûr Malignani.
Il numar si vierç cuntune analisi storiche di Donato Toffoli sui 500 agns dal riviel contadin de Joibe Grasse dai 27 di Fevrâr dal 1511.
Tra lis novitâts ancje la rubriche dedicade a la Rêt e a lis gnovis tecnologjis “Furlans, digjitait furlan” cun Dree Venier, Michele Calligaris, Giorgio Jannis e Matieu Baldan.
Restant su la atualitât, un intervent di Marco De Agostini, segretari politic dal Moviment Friûl e la interviste esclusive a Sonia Cossettini, la “vigjilesse” furlane dal spot Rai tant criticât che e declare «La Patrie dal Friûl je stade la uniche a domandâmi cemût che le pensavi jo di dutis chestis polemichis sul spot RAI».
La Patrie si le cjate intes miôr librariis e ediculis, in dutis lis filiâls de Casse di Sparagn F-VJ o par abonament: tancj regâi e promozions par cui che al decît di abonâsi.
E sul sît www.lapatriedalfriul.org al è disponibil dut l’archivi dai numars passâts e za cualchi anticipazion di chest mês.

Tiere furlane si presente ai Agnui

Al sarà presentât in maniere uficiâl ai 23 di Lui aes 6 di sere, li dal teatri tende di Dieç (frache il link) (fraz. di Tumieç, UD) il cuint numar di Tiere Furlane, periodic di culture e teritori de regjon autonome Friûl – Vignesie Julie (frache il link) e rivade aromai al secont an di ativitât.
A presentaran Tiere Furlane (frache il link) n. 5 pre Alessio Geretti dal Comitât di Sant Florian (frache il link) ; Gilberto Ganzer, diretôr dai Museus Civics di Pordenon; Enos Costantini, curadôr editoriâl de riviste, Claudio Violino, assessôr regjonâl aes risorsis agriculis, naturâls e forestâts (frache il link) e il President de Regjon (frache il link) Renzo Tondo (frache il link)
Il progjet, che o ai il plasê di direzi e volût cun fuarce dall’assessorât a la agricolture, al à come obietîf «Valorizâ e fâ cognossi il patrimoni culturâl de regjon interie midiant de riscuvierte dal teritori» come che al sclarìs l’assessôr Violino (frache il link).
E propit par mantignî il leam cul teritori, a continuin lis presentazions itinerantis e chest ultin numar al sarà presentât a Dieç (frache il link), sugjestive suaze e sede dal impuartant event espositîf chest an dedicât ai Agnui (frache il link)«La sielte e je colade su chest paîs de Cjargne, piçul tes dimensions, ma grant par dut ce che il Comitât di Sant Florian (frache il link) al fâs ta chescj agns» al declare l’assessôr Violino (frache il link)«E po, “la Cjargne e je la mari dal Friûl”: Tiere Furlane (frache il link) no podeve no jessi presentade ancje chi e la ocasion nus ven dai contignûts di chest numar che al fevele propit de tradizion de latarie e dai mulins di Dieç (frache il link)».
Sul numar 5 di Tiere Furlane (frache il link) si fevele di fat di chescj elements, ma ancje di vuardi e de tradizion de bire in Friûl. I “personaçs” presints su cheste edizion a son Eugenio Caneva fondadôr de prime latarie sociâl cjargnele di Culino (1880) e Giovanni Bolle un grant sienziât a servizi de agricolture gurizane. Cun di plui une puntuâl ricercje storiche e mostre lis claris origjins de “Jote”, nassude propit in Cjargne par po jessi espuartade diventant embleme gastronomic di une grande citât. Il numar si siere cuntune sugjestive panoramiche fotografiche dedicade a Grau storiche: no dome “tiere” duncje, ma ancje “lagune furlane”.
Atenzion a lis lidrîs, ma il voli ben pontât sul avignî: al continue l’impegn ancje pai furlans tal mont che a puedin lei midiant de Rêt i contignûts di Tiere Furlane (frache il link). A son costants i inzornaments su internet: i aretrâts (i prins numars a son finîts) a son e a saran consultabii on line dal sît de regjon www.regione.fvg.it/tierefurlane (frache il link) e il profîl dal popolâr social network “Facebook” (frache il link) al è aromai rivât a passe 500 adesions.
“Tiere Furlane” (frache il link) e je ancje une trasmission cuindisinâl in onde ogni vinars des 11.00 e in repliche sabide aes 5 dopomisdì e domenie aes 9 e mieze su lis frecuencis di Radio Onde Furlane (frache il link) (Udin, Gurize, Basse Furlane e Friûl di Mieç: 90.00 mhz FM; Cjargne: 90.20 mhz FM; Colonia Caroya Argjentine 96.60 Mhz FM) o su www.ondefurlane.eu (frache il link) in streaming.

Un cuc indaûr

Ve ca une biele serade a Sedean sul teme de storie de nestre tiere: apontament joibe ai 8 di Avrîl aes 20.45 par un viaç storic pardabon interessant cun Venusia Dominici, Massimo Garlatti-Costa e Carli Pup.

Precisazions

Une des notiziis che vuê a àn plui spazi sui gjornâi di chi e no dome (al è un articul ancje su Repubblica) e je chê de proteste leghiste in consei regjonâl cuintri lis celebrazions dai 150 agns de Unitât di Italie che a saressin in program tal 2011. No jentri tal mert dal dibatiment, ma o cjali la storie e o provi a resonâ cul gno cjâf. Come furlan o riten plui concret e responsabil cjalâ i numars e lis datis: il jessi "pressapochist" nol è dal nestri popul.
Buine part dal Friûl storic al è colât sot dal Ream di Italie tal 1866 (fracait il link) e duncje chest an che al ven nol è nissun “150m talian” pal nestri teritori, che se mai al è stât concuistât ben 5 agns dopo dal 1861.
Cun di plui, la zone dal confin, e mi riferìs tant par semplificâ a buine part de contee di Gurize, ma no dome, e je deventade taliane dome dopo de fin de prime vuere mondiâl dal 1915-18 (che tancj a celebrin come “Grande Guerra”, ma che in sostance e je stade dome une grande tragjedie che e à fat murî miârs e miârs di zovins).
O sieri lassant fâ fieste il prossin an a cui che al vûl, ma se propit propit nol pues fâ di mancul, i ten a visâlu che chi di noaltris dut câs al fasarà fieste pai 145 agns de colade dal Friûl sot dai Savoia (sì, la famee di chel siôr, cualchidun lu clame princip dismenteantsi che i titui nobiliârs mi somee che a son stâts abolîts, che e à domandât a la Republiche taliane un mega risarciment pai 54 agns di esilii… ma a saressin ancje altris episodis di podê ricuardâ...).
Forsit forsit prime di fâ fieste, al bastarès almancul lei ben i fats de storie e no i proclamis de propagande nazionaliste taliane.
Invezit o torni a ricuardâ che secont me une vere fieste nazionâl furlane e je chê dai 3 di Avrîl, che e ricuarde la nassite dal Stât Patriarcjâl di Aquilee, une forme di guvier nestri nassût tal 1077 e che al cjapave dentri i teritoris fint in Cjadovri e chei che cumò a son Austrie, Slovenie e Istrie.
Buine fieste nazionâl furlane a ducj.

ps: se mai tal 2011 a colin i 500 agns dal riviel contadin de Joibe Grasse dal 1511... chê sì che e je une date impuartante e un aniversari di ricuardâ pal popul furlan che si è ribelât cuintri dai nobii che lu tibiavin.

Memorie infoibade

[...] Ce che mi fâs dubitâ de utilitât di chestis comemorazions al è che i vêrs protagoniscj no son lis vitimis muartis e chês restadis in vite, ma lis formazions partitichis o ideologjichis, che a doprin la storie come une tiracje e, se no ur torne cont, a fasin di dut par rimovi lis pagjinis no propit esaltantis de lôr militance [...]

pre Antoni Beline, Cirint lis Olmis di Diu, ai 17 di Fevrâr dal 2007 (par lei dut, fracait chi)

Cun di plui us segnali ancje chest document dal scrit di une comission taliane-slovene che al fevele di chest argoment. Pecjât che, ancje se in Slovenie al è stât publicât dal Guvier, chi inmò no. Fracait chest link.

Achì dut il pdf dal document.

Apel par Archeofurlane

Forsit za lu savês: vuê la Ninine (te foto intant in vore intun laboratori a meti a puest reperts archeologjics) e salude ducj i letôrs dal so blog parcè che e à decidût di sierâ archeofurlane.blogspot.com viert tal mês di Març dal 2008.
A ducj chei che a àn a cûr la blogosfere furlane e a àn vût maniere di preseâ i contignûts di chest blog dedicât a la archeologjie e a la storie de nestre tiere (e no dome), o domandi di partecipâ a cheste campagne par invidâ la Ninine a tignî dûr e o us domandi di passâ li di jê par sburtâle a continuâ a scrivi.
Ninine continue cul to blog!

Cjaminant viers Sant Tomâs

Intune des ultimis comissions culture e je nassude la idee di fâ un program di ativitâts par fâ cognossi la realtât dai Ospidâi, o ospizis, medievâi come chel di Sant Tomâs.
Tra conferencis, cunvignis e iniziativis par cognossi il teritori, us segnali che ai 28 di Jugn, di domenie, e je organizade une cjaminade di Vençon a Sant Tomâs dilunc un troi sul Tiliment: si partirà de place de biele citadine medievâl a 6 di buinore, par rivâ dopo 8 oris a Sant Tomâs.
Ve ca il volantin cul program complet: fracait chest link.

Cunvigne di toponomastiche in Branc

Vuê e je la cunvigne di Toponomastiche locâl (fracait su la imagjin par viodi la locandine), inmaneade dal Comun di Tavagnà adun cu la Societât Filologjiche Furlane e la Societât Furlane di Archeologjie e rivât cumò ae setime edizion. Aes 3 di dopomisdì in Branc tal centri civic, intitulade: “Toponomastiche e archeologjie: dâts e confronts”. Lis voris a saran coordenadis de Ninine archeofurlane.
I relatôrs e lis relazions a saran: Valter Zucchiatti: “Indizis toponomastics su la strade Cuncuardie - Ad Silanos”; Benvenuto Castellarin: “Sorevivincis langobardis te toponomastiche dal Friûl”; Giovanni Filippo Rosset: “Lis necropolis de culture paleoslave di Kottlach in Friûl tra archeologje e toponomastiche”; Franco Finco: “Considerazions su cualchi non di lûc dal Friûl” e Paola Barbierato: “La toponomastiche tant che lidrîs di cognossince pes ricercjis storichis e archeologjichis”.
Il calendari dai apontaments al è une vore siôr, cun mostris, presentazions di libris, di sîts internet, di ricercjis e cu la cunvigne stesse. Par viodi ducj i apontaments, si pues lâ sul sît dal comun di Tavagnà.

In ocasion dal aniversari dal Taramot dai 6 di Mai

Miercus ai 6 di Mai dal 2009 a lis 17.30 a Udin li de Sale Consiliâr de Provincie di Udin a Palaç Belgrât in place dal Patriarcjât, l’Istitût Ladin Furlan “Pre Checo Placerean” al presentarà la gnove version dal sît internet de associazion www.istitutladinfurlan.it. Al event a intervignaran Pietro Fontanini, President de Provincie di Udin, William Cisilino, President dal Istitût Ladin Furlan, Lorenzo Zanon, President de ARLeF e Arnaldo Baracetti, dal Comitât pe autonomie dal Friûl. Il sît al ufrìs cuntune vieste grafiche cetant atrative une vore di informazions su lis ativitâts davueltis de associazion. Cun di plui al cjape dentri un archivi informatic dedicât a la vite e a la opare di Pre Checo Placerean (te foto) che al sarà screât intant de presentazion.
Te sere invezit a Maian a 7 e mieze di sere, partint di li dal monument di vie Rome, e sarà une cerimonie par ricuardâ lis tantis vitimis che a son stadis in chê sere: il gno paîs al à vût un numar di muarts une vore alt, secont dome a chel di Glemone. Fracait chi par discjamâ la locandine dal event.

Sant Marc

Vuê o sin ai 25 di Avrîl. Stant che in Italie, la politiche e somee no vê nuie di miôr ce fâ che stâ a barufâsi su cheste date, jo o ricuardi Sant Marc te zornade dal so martiri (us fâs ancje presint che a son doi agns dal funerâl di pre Antoni).
O pensi che ducj o savedis che Sant Marc al è cognossût pal Leon e par jessi il patron di Vignesie.
Ma ce che forsit no ducj a san al è che Sant Marc nol à mai viodude Vignesie, ma Aquilee sì.
Di fat, come che si lei tal sît de Basiliche di Sant Marc a Vignesie, il vanzelist Marc al ven mandât di Pieri a puartâ il so vanzeli di Rome a Aquilee.
Li al cognòs Ermacure, so dissepul, che al deventarà il prin Vescul di Aquilee. Dopo vê consegnât il so vanzeli a la comunitât aquileiese, Marc al decît di tornâ a Rome: lu fâs compagnât di Ermacure. E propit dilunc di chest viaç, cuant che al rive te lagune al à une vision de citât che inmò no esisteve e che e deventarà Vignesie.
Rivâts a Rome, tor dal 50 dopo di Crist, Ermacure al torne a Aquilee e Marc al continue bande Alessandrie di Egjit, citât che e à vût un leam impuartanton cu la stesse Aquilee.
Come che o disevi, Marc al ven copât ai 25 di Avrîl e lis sôs relicuiis a restaran a Alessandrie fint al 828 d.C. cuant che i venezians lu trafuaran e lu puartaran a Vignesie, passe 7 secui dopo che al veve stât, di vîf, a Aquilee.
Auguris a ducj chei che si clamin Marc.

Fieste dal popul Furlan

Come che us disevi chê altre dì, vuê a son 932 agns de istituzion dal Stât Patriarcjâl di Aquilee e dut il Friûl al celebre la sô fieste.

Us segnali il blog dal comitât 842: fracait chi.

Auguris a ducj i Furlans che a son ancje fûr de Patrie.

Interviste dal Dree

Sul gjornâl di îr e je vignude fûr une interviste che us ripropon. Us visi ancje che Sabide o sarìn a Buie a li dal Museu de Medaie di Buie par presentâ il speciâl sui erois furlans: nestri ospit al sarà Carli Pup, colaboradôr e autôr dal libri “Memoriis platadis”. A parteciparan ancje l’on. Pietro Fontanini President de Provincie di Udin; Lorenzo Zanon, President de Agjenzie Regjonâl pe Lenghe Furlane; Claudio Marcuzzo, Sindic di Buie; e William Cisilino, president dal Istitût Ladin Furlan “pre Checo Placerean”.

Cun D'Aronco, Vidal e Burelli: Cadorna nol merte l'onôr di une place

Preseât Sindic di Udin,
vuê sul Messaggero al è un biel intervent che al fâs une propueste secont me di condividi: Gianfranco D'Aronco, Bruno Vidal e Ottorino Burelli a proponin di gjavâ il non di place Cadorna e intitulâle ai miârs di soldâts muarts (o miôr: mandâts a murî propit par cause di chest gjenerâl).
Us met chi la traduzion di un passaç dal articul, ripuartant tal prin coment dut il test.

Presât Sindic, su Cadorna a son stâts scrits libris su libris. Il so cult al è stât confermât di Mussolini tal 1924, cuant che il gjenerâl al fo promovût maressial di Italie. Al è di in chê volte che si è consolidade la venerazion dal piemontês. I ordins pai assalts mats, lis fusilazions te schene, i procès imediâts e lis decimazions a son prin di dut une sô responsabilitât.
Nissun al pense di celebrâ procès dopo muart: tant plui che la stesse comission di inchieste, istituide subit dopo Cjaurêt, finidis lis voris, lis sierà tun armaron. "Parce sepultis" sigûr: ancje Cadorna. Ma vuê si trate dome di meti finalmentri la peraule fin a un malintindiment: il continuâ di un ricognossiment a un personaç, che in pratiche tal imagjinari coletîf al ven metût sul stes plan dai inocents, che lu stes al à sacrificât.
Une des placis dal centri di Udin e je dedicade a Cadorna. O domandìn che chel non al vegni gjavât de citât, batiade une volte cul penôs titul di capitâl de vuere. Pluitost che si dedichi la place a lis vitimis, che 100.000 mil a son intassadis sot dai nestris voi a Redipulie e 25.000 a Udin.

Jo o disarès di copiâ chest post e di mandâlu al Sindic di Udin: e-mail: sindaco@comune.udine.it

Presentazion dal libri su la Ocitanie

Doman, domenie il Prin di Març 2009 aes 5 sot sere inte Sale multimediâl dal Centri di Coordenament Culturâl de Cjargne li dal Museu Cjargnel des arts e tradizions popolârs di Tumieç (v. Vittoria, 4) al vegnarà presentât il libri “Viaç in Europe. Ocitanie” di Marco Stolfo. L’apontament al è inmaneât de “Associazione della Carnia Amici dei Musei e dell’Arte”, che e à editât la publicazion.
L’incuintri al previôt i intervents di Paolo Moro (President de “Associazione della Carnia Amici dei Musei e dell’Arte”), Pauli Cantarut (Gjornalist e operatôr culturâl – “Radio Onde Furlane”), Dario Anghilante (Operatôr culturâl des Vals Ocitanis dal Piemont – associazion “Chambra d’Óc”) e dal autôr dal libri. Cun di plui si podarà viodi il video documentari “L’Occitania a pé” (2008, FR 3 Sud, 26’).
La presentazion si sierarà cuntun ghiringhel furlan-ocitan.

Zornade furlane dai dirits - edizion 2009

Come che us disevi îr, vuê e je la Zornade furlane dai dirits, che e cole tal aniversari dal riviel de joibe grasse dal 1511. Come ogni an, ancje jo us publichi il comunicât dal Comitât482.

Us visi ancje che usgnot su Telefriuli a lis 19.45 al va in onde "Contile juste" program di aprofondiment gjornalistic de Provincie di Udin: o sarai ancje jo e o ringrazii Anna Casasola par vêmi clamât.

27 di Fevrâr: Zornade Furlane dai Dirits

Al è zaromai di cualchi an che ai 27 di Fevrâr il Comitât 482, intune cun altris realtâts furlanis, al celebre la Zornade Furlane dai Dirits. Cheste date e ricuarde la Joibe Grasse dal 1511 cuant che si impià il riviel plui grant inte storie dal Friûl: un episodi storic che, fûr des leturis stereotipadis che cualchidun al va dilunc a proponi, al mostre a clâr ce che lis comunitâts furlanis a jerin prontis a fâ par difindi i lôr dirits. Il Comitât 482 al è nassût cun chê di difindi i dirits linguistics e nazionâi des diviersis comunitâts minorizadis dal Friûl e, duncje, al è propit su chest teren che si indrece prin di dut la nestre riflession. Magari cussì no, di fat, al è simpri il pericul di pierdi ce che si à rivât a otignî cun agns e agns di bataiis democratichis. Il risi al è, o almancul al varès di jessi, sot dai voi di ducj. Pensìn, par esempli, ae leç statâl 482/99, chê che il nestri Comitât al cjape il so non e che chest an e finìs dîs agns. Tai ultins agns i fonts par metile in vore si son sbassâts in maniere continuative: tal belanç statâl pal 2008 a son stâts metûts sù par jù 4 milions e 800 mil euros, ta chel pal 2009 i fonts a son deventâts 2 milions e 274 mil e la prospetive pal 2010 e je inmò plui basse. Cualchidun pensial pardabon che cuntun belanç di cheste fate si puedi garantî la presince des lenghis des dodis comunitâts minorizadis ricognossudis dal stât talian inte scuele, inte aministrazion publiche, intai mieçs di comunicazion? Cul gjavâi i fonts, tal cidin colpevul ancje de classe politiche nostrane, si va a sassinâ la 482, ven a dî la leç che e varès di meti in vore i articui 3 e 6 de Costituzion de Republiche taliane! In Regjon intant ce sucedial? La gnove leç sul furlan, la 29/07, e je ferme. No dal sigûr par vie de impugnazion di pôcs articui denant de Cort costituzionâl, ma parcè che la aministrazion regjonâl no à mot un dêt par fâ i regolaments che a coventaressin par metile in vore. Cun di plui, l’assessôr di riferiment al à za dit a clâr che, ancje se la Cort e ves di dî che i articui impugnâts dal guvier talian a van ben cussì come che a son, si larà a modificâ la leç, pidimentantle su doi dai siei aspiets di fonde: l’ûs de lenghe furlane inte scuele e inte aministrazion publiche. Nancje che si volès cirî di limitâ, impen di slargjâ, ce che al ven garantît cu la 482. La prospetive e somee propit cheste: gjavâi ai furlans ancje chei risultâts otignûts inta chescj agns cu lis ongulis e cui dincj. E la situazion no je cui sa ce miôr nancje pai slovens e pai todescs dal Friûl. No stin a fevelâ po di rom e sinti che, ancje chenti, no dome no si ju calcole di minorance linguistiche, ma a voltis si ju piture di forescj ancje se pe plui part a son citadins talians... Magari cussì no, chescj atacs ai dirits linguistics e nazionâi des comunitâts dal Friûl no podevin rivâ tun moment piês. Cun di fat, nol è mai stât cussì sempliç platâ dut daûr des emergjencis che si cjatìn a frontâ, veris o inventadis che a sedin. Cu la crisi economiche al è facil justificâ i tais pai fonts pes comunitâts minorizadis e pes lôr lenghis, cundut che si vedi tacât a taiâ za di prime de crisi e che i fonts metûts dal stât a sedin mancul di un fruçon dal so belanç. E nol impuarte nancje che cussì si tocjin dirits umans di fonde garantîts de Costituzion taliane, di acuardis internazionâi e riclamâts che al è pôc di une gnove risoluzion dal Parlament european. Il stât talian, di fat, invezit di ispirâsi ai principis democratics de sô Cjarte costituzionâl al pâr che al cimii ae muse piês dal so passât: chê nazionaliste e autoritarie. Cussì di une bande si taie cu la manarie risorsis e dirits, di chê altre bande si sabore pôre e asse cuintri di cui che al è diviers: vuê i imigrâts e doman cui sa? Cundut achel, nô o vin sperance parcè che, ancje tai moments plui scûrs de sô storie, il Friûl al à simpri savût resisti e resurî. La nestre e je une storie di resistence. Par chest o refudìn di sbassâ il cjâf e di adatâsi a cheste clime. Par chest o lin dilunc a rivendicâ il nestri jessi furlans: ni miôr, ni piês di chei altris popui, ma diviers. Cul impegn, duncje, a lotâ pai nestris dirits linguistics e nazionâi, intune cul dirit di decidi in plene autonomie dal nestri avignî. Tal stes timp no acetìn di colâ tal zûc dal meti identitât cuintri di identitât: furlans sì, ma solidaris cun cui che al patìs. Alore, come i nestris vons, o alcìn la bandiere dai dirits e dal autoguvier, par fâ sù un Friûl che al sedi patrie di dirits par dutis e par ducj.

Udin, Fevrâr dal 2009

Il puartevôs dal Comitât 482

Carli Pup

Doman programazion speciâl su Radio Onde Furlane

Ai 27 di Fevrâr il Comitât 482 al celebre la Zornade Furlane dai Dirits, une zornade pai furlans e pai lôr dirits. Us invidi a visitâ il sît dal Comitât (http://www.com482.org/) par scuvierzi cheste impuartante iniziative che e ven ricuardade ancje cuntune zornade di programazion speciâl su Radio Onde Furlane. O sarìn ancje jo e pre Roman.

ZORNADE FURLANE DAI DIRITS
Programazion dai 27 di Fevrâr dal 2009

fin a 08.30 - musiche furlane e des minorancis

08.30 -09.00 jentrade ai programs de buinore cun Mauro Missana e Carli Pup
09.00-10.00 aprofondiment storic su la Joibe Grasse dal 1511 cun Furio Bianco
10.00-11.00 dirits in musiche par cure di Pauli Cantarut
11.00-11.30 dirits linguistics: la situazion dai slovens dal Friûl cun Jole Namor
11.30-12.00 dirits linguistics: la situazion dai todescs dal Friûl cun Lucia Protto
12.00-12.30 dirits violâts: la situazion di rom e sinti cun Eva Rizzin
12.30-14.30 musiche furlane e des minorancis
14.30-15.00 jentrade ai programs dal daspomisdì cun Mauro Missana e Carli Pup
15.00-15.30 une leture storiche sul 1511 (par cure di Stefania Nonino)
15.30-16.00 dirit ae cjase in Friûl cun Luciano Aita e Maurizio Ingegneri
16.00-16.30 dirits des feminis in Friûl cun Lauretta Serafini e Eleonora Baldacci
16.30-17.00 proprietâts coletivis e ûs civics in Friûl cun Nadia Carestiato

17.00-17.30 glesie e dirits linguistics cun pre Romano Michelot e Christian Romanini

17.30-18.30 dirits in musiche par cure di Pauli Cantarut (R)
18.30-19.30 aprofondiment storic su la Joibe Grasse dal 1511 cun Furio Bianco (R)
des 19.30 indenant - musiche furlane e des minorancis

Cualchi dât sul sît di Sant Zuan a Sant Tomâs

Dispès une des acusis che mi ven fate e je chê di jessi un tifôs acanît dal progjet, ma di no vê nissun element concret che al justifichi cheste mê posizion. Cuasit che o ves cualchi interès o tornecont personâl. Cualchi zornade indaûr o vin fat une riunion de comission culture li che o vin vût cualchi informazion che mi somee just condividi cun voaltris, sperant che us podedi sclarî la impuartance di chest sît (za documentade di fonts di archivi). Ancje se al somee pleonastic, o torni a ricuardâ il significât dal non "Ospedâl" ta chest contest: no sin denant di une struture sanitarie come che si podarès intindile vuê, ma di une struture che e deve ospitalitât, acet, prin ai cuarps militârs che e jerin a presidiâ la zone, dopo vie pai secui ancje a dut chel passaç ancje di pelegrins che par motîfs religjôs a ziravin par dute Europe (tal dissen, 2 cavalîrs dal Ordin di Sant Zuan).
Tornant al sît za dal pont di viste struturâl, dute la aree e presente une articolazion une vore interessante: si puedin ricognossi ampliaments seguitîfs che a son stâts fats dilunc dai secui. La part plui antighe e je rapresentade de struture plui a ovest che e ven clamade "tor": ven a stâi li che i mûrs une vore larcs (cuasit un metri di spessôr) a fasin pensâ a une prime struture cun funzion difensive-militâr e cheste funzion origjinarie e je testemoneade ancje des feritoiis muradis che si viodin ben de bande interne (a son barconuts strets che a podevin vê la funzion di postazion pe vuardie).
Sot dai paviments dal cuarp centrâl dal ospedâl invezit a son stadis fatis lis indagjins archeologjichis che intune aree une vore strete a àn puartât a scuvierzi ben 3 nivei di paviment (fat avonde particolâr e par capî di plui al coventarès slargjâ lis trinceis di sgjâf). Ta chescj sgjâfs a son vignûts fûr diviers reperts di ceramiche ingubiade (no soi espert, ma o speri di vê scrit just...). Al plan parsore a son stadis ancje cjatadis, sot de stabilidure plui resinte, decorazions frescadis databilis tor dal tart 1300. Cun di plui ancje la forme dai barcons (sierâts in epoche seguitive) a testemonein la antighitât de struture.
Al è di dî che il lavôr di indagjin archeologjiche al è stât condizionât ancje dal lavôr di metude in sigurece de aree e chest al à ralentât: al jere pericul che cualchidun si fasès mâl.
Tes setemanis passadis ancje la soreintendent e à fat un sorelûc dimostrantsi une vore interessade al sît che al rapresente un esempli une vore râr (se no l'unic) in regjon di chestis struturis: pal solit te ete di mieç si fevele di cjistiel (ven a stâi di abitazions dai siôrs) no ricuardantsi invezit che la plui part de popolazion no viveve in cjistiel ma al jere plui facil che e ves contat cun struturis come chê di Sant Zuan a Sant Tomâs.
Pal moment mi fermi chi, ma us siguri che e je dome une cerce une vore piçule di dut ce che al pues dâ inmò chest sît.

Spietant la Zornade de Memorie

Doman e je la zornade de memorie, l'aniversari de liberazion dal cjamp di stermini di Auschwitz. Ma no vin di dismenteâ che nol covente lâ in Polonie o in Gjermanie par viodi testemoneancis di ce che il nazisim e il fassisim a àn fat. Vêso mai stât a Triest li de Risiere di San Sabba? Se la rispueste e je no, us consei di fâ une visite: jo o ai stât un Istât e cuant che o pensi a ce che o ai viodût mi vegnin inmò i sgrisui. E se o pensi che dut chest al è a une ore di strade di cjase mê, mi vegnin i sgrisui inmò di plui.
L'articul 1 de leç 211 dal 2000 al dîs "La Republiche taliane e ricognòs la zornade dai 27 di Zenâr, date che a son stâts butâts jù i cancei di Auschwitz, "Zornade de Memorie", cun chê di ricuardâ la Shoah (stermini dal popul ebraic lis leç raziâls, la persecuzion taliane dai citadins ebreus, i talians che a àn patide la deportazion, la prisonie, la muart, e ancje chei che, ancje in cjamps e posizions diferents, si son oponûts al progjet di stermini, e metint in pericul la lôr vite a àn salvât altris vitis e protezût i perseguitâts".
A scuele o vevi let "Se questo è un uomo" di Primo Levi, une testemoneance tragjiche di ce che al è stât. Come che tragjiche e emotivementri pardabon fuarte e je stade le cognossince direte di Boris Pahor (te foto cun me), un scritôr sloven di Triest che al à vivude su la sô piel la deportazion e che mi àn lassât dentri un alc di indescrivibil.
Dome a distance di passe 50 agns Pahor al à vût il just ricognossiment ancje dal public in Italie cun Necropoli. Cumò al è in librarie cuntun altri libri che si intitule "Qui è proibito parlare" une altre testemoneance che e fevele dal sintiment antisloven che al à caraterizât il Fassisim a Triest. Ma o scuen dî che inmò vuê chest sintiment a Triest al è inmò. E plui o voi di chês bandis e plui mi rint cont che e je vere.