28 ottobre 2008

Adesion al Pat pe Universitât

Ancje jo o ai aderît al Pat pe Universitât, ancje se chel document al è stât scrit par jessi sotscrit des istituzions (slargjât ai parlamentârs).
O soi convint che la Universitât dal Friûl e vedi bisugne di un grant impegn pe sô difese e mi soi convint ancjemò di plui dopo vê sintût l'intervent dal Retôr Magnific, la prof.e Cristiana Compagno. Alc o pensi che o varês za let sui gjornâi, ma la frase che plui mi à plasût e je stade: "La Universitât dal Friûl prime e fâs e dopo e domande: se o sin chi a domandâ al è parcè che fint cumò o vin lavorât pal miorâ simpri di plui e o continuarìn a fâlu dimostrant di volê otimizâ e riorganizâsi. Ma se i tais a restin chei anunciât la nestre Universitât no rive al 2010: e colasse prime". E à ricuardât cun passion e clarece dute une schirie di dâts su la cressite di un ateneu zovin, ma che in pôcs agns si è taiât fûr une posizion di dut rispiet, ancje se al è in credit di tancj milions di euros di bande dal stât. Propit brave e la lungje batude di mans che e à vût a Palaç Belgrât, e je une conferme che e à plasût no dome a mi.
O pensi che chest so intervent e cheste cunvigne a conventaran a tancj par valutâ cun atenzion cuâi pas che a son di fâ in materie.
E mi auguri 2 robis pe nestre Universitât dal Friûl: che e otegni ce che e merte e che però si ricuardi ancje jê dal son non (Universitât dal Friûl, no une Universitât taliane a Udin e cualchi sede distacade ator pal teritori): il leam cu la identitât, la lenghe, la culture, il teritori dal Friûl al è ricuardât a clâr te leç istitutive, L546 dai 8 di Avost dal 1977 - art. 26, e cun fuarce al à di jessi rispietât.
Se cualchidun altri al à voie di manifestâ la sô adesion al pat e solidarietât al comitât promotôr, o podês mandâ une mail a blogromanini[gubanute]gmail[pont]com e jo le zirarai al coodinatôr.

3 commenti:

The Bourne ha detto...

Sperin ca si fasi alc prin che ledi a patras l'universitat e le ricerche!

checo ha detto...

Ben Christian
o vevi pore che tu ti fossis dismenteat de Universitat in chiscj dis e ti ài criticat te discussion in vore sul Furlanist.
Mi fas plase che tu feveledis e che tu vedis cjapat une posizion (che o condivit) ancje se di minime, ma al va ben.
O speri ancje che tu j vedis ancje contat a Tondo cemut che e je lade lunis e ce che cualchidun al à dit e no dit. No mi speti che in chist to blog tu fasedis un comment su lis peraulis di Saro e de Rosolen, o cunfidi che tu jes contis al president, al sares za tant.
Mandi checo

ninine ha detto...

O soi totalmentri dacuardi, bisugne tutelâ cheste impuartantissime istituzion, ancje se prime di pensâ a fale plui furlane pensin a tignile in vite!! No podarès imagjinami cumò la vite a Udin cence universitât...O capìs Christian ce che tu mi disis rivuart lis premessis su lis cuâls a si è fondade la nestre universitât, ma o soi dal parè che i beçs che nus spietin (o feveli di student)a vedin di lâ prin di dut a garantì il minimo che nus spiete. Ma tu lu sâstu che o varìn di fâ di mancul dal riscjaldament e che la biblioteche di storie e restarà sierade intes fiestis di Nadâl? Jo o soi a fâ lezion cul gjubin intor...