31 luglio 2008

A spas pe Ocitanie

A cui che al pense che interessâsi di furlan al significhe "sierâsi" o torni a ripeti che o ai cognossût plui la Europe ta chescj agns achì che mi soi interessât in maniere plui aprofondide de cuistion identitarie che no prime.
A chest proposit us segnali "Vian in Europe - Ocitanie" di Marco Stolfo (ed. Associazione della Carnia Amici dei Musei e dell'Arte, 2006) che al fevele propit di cheste nazion a cjaval di Spagne, Francie e Italie.
Une maniere svelte di cognossi une realtât interessante, massime se no vês inmò decidût dulà tes prossimis vacancis.
Te foto la cuviertine dal librut e altris informazions su la Ocitanie, chi.

30 luglio 2008

Centris estîfs

Sul gjornâl di vuê al jere un articul su lis ativitâts estivis tal comun di Maian.
A pene che o cjati la copie, us e met tal prin coment.

29 luglio 2008

Alc di lei, MajanoNuova

Come ogni inaugurazion, ancje il Festival 2008 al puarte la sô edizion di Majano Nuova (te foto la cuviertine), la storiche riviste anuâl che e fevele di diviers temis: di art, di leterature, di narative, di storie locâl, di personaçs dal paîs.
Dopo cualchi timp ancje jo o ai tornât a meti la mê firme su la riviste, che mi à viodût a scrivi lis primis pagjinis cuant che o vevi mancul cul di 20 agns, e di chest o ringrazii Alessia che mi à contatât: lu ai fat cun plasê.
Biele e di efiet la cuviertine dedicade a la Araucana, opare di Sebastian Matta che a Maian al à fat une mostre diviers agns indaûr e lis sôs oparis cumò a son esponudis te Pinacoteche (o sugjerìs ancje la costruzion di un sît Internet, par une visite virtuâl... se la idee no je stade za pensade).
Come simpri lis primis pagjinis si vierzin cui salûts, ma propit chi o ai cjatade une brute stonadure tes peraulis dal Sindic: mi à displasût di lei che in dut l'intervent no sedi une peraule di ringraziament par chei che dut l'an si fasin il cûl come verzis e invezit al à cjatât il timp par definî la associazion "inquieta". In dute sinceritât mi à someât propit fûr lûc. La associazion ProMajano jo le viôt come un patrimoni di dut il paîs e se ancje a puedin jessi moments di confront sui temis, no mi somee che tal salût introdutîf de MajanoNuova si ves di lâ a rimproverâ... no sai di ce.

Verba volant et scripta manent...

28 luglio 2008

Il Diari di Tosoni

Ultime cuviertine dal Diari dedicade al Retôr Magnific de Universitât dal Friûl, prof.e Cristiana Compagno.
Però interessant ale è ancje un servizi su Edi Snaidero.
Par lei il cuindisinâl diret di Mauro Tosoni, fracait chi.

27 luglio 2008

La bolp furlane 3.0

Par navigâ si pues doprâ Firefox, par navigâ furlan: Firefox furlan, rivât a la edizion 3.0.
Un mandi a Robert che dal Canadà, cun tancj altris furlans canadês al è un dai letôrs dal blog.

Thermorubriche meteorologjiche

Pe prime volte dopo plui di 10 agns, no ai partecipât a la scree dal Festival di Maian.
Al è un pâr di dîs che o soi vie e duncje no ai rivât a lâ.
Mi àn dit che al à plot e che al jere frêt: mi displâs pal Gnut e pai fantats de Pro Majano.
Ultimementri il Thermo mi à simpri dât la colpe che lis manifestazions dopo che lis presinti chi a cjapin la ploie... chest colp no ai fat il post prime dal apontament, ma e je vignude la ploie distès: chist Istât al va cussì... il timp al somee che nol vedi voie di comedâsi.
Dut câs, isal cualchidun che al è stât a la cerimonie e nus comente come che e je lade? Mi somee che il rompiscatole al jere... nissun altri?

26 luglio 2008

Sul sît archeologjic de Tumbare

Vuê o ringrazii la Ninine che îr mi à puartât a viodi il sît archeologjic de Tumbare di Merêt di Tombe. Causalmentri.
Chi a son stâts cjatâts i rescj di un zovin di 17/18 agns (te foto, i vues) che, stant la dimension de tombe, al à di vê vût un rûl une vore impuartant tal so vilaç. Si fevele di une sepolture che e à plui o mancul 4000 agns di storie. Une tessare preziose tal mosaic de storie de nestre tiere che e conferme la sô origjin ben prime de vignude dai Romans.
Come che si viôt te fotogallery, e je ben evidente la stratigrafie de Tumbare.
La sepolture e je stade fate prin di dut fasint la buse dulà che al è stât metût il muart. Parsore di cheste al è stât fat un prin côl circolâr di claps e pieris alt 2 metris e cuntun diametri di cirche 20.
Par finî, il dut al è stât taponât cun tiere, argjile e gravis fint a une altece di 7/8 metris, mi somee a voli.
Par datazion e dimension, chest al rapresente un monument funerari pardabon impuartant.
Une testemoneance che nus lee une vore di plui al cûr de Europe che no al rest di Italie: di fat sîts come chescj si cjatin ancje in Venit, Carinzie, Slovenie, Cravuazie... ma no volarès dî imprecisions e mi fermi chi.
Une curiositât: l'assessôr Violino mi à presentât il paron dal teren. Agns indaûr al veve di tacâ a plantâ il vignâl e al è lât in comun a domandâ se al podeve splanâ cheste culinute che al veve tal cjamp. Il comun al veve dit di sì, ma lui, rivât sul puest al à tornât a pensâi parsore e al à dit "Ma parcè tirâle vie... jo le lassi" e al à plantât lis vîts ator ator tignint la Tumbare. Vuê a distance di agns e dopo de scuvierte di Rovul (chest il non che al à volût dâi al zovin) si à di dî brâf a chest om cussì inteligjent che al à vude la intuizion di conservâ cheste testemoneance dal passât!
Par savê alc di plui di cheste impuartantissime scuvierte, lait a lei chi e par cui che al à voie di viodi cualchi foto dal sît, ve chi la fotogallery de Tumbare.

25 luglio 2008

Ultime lezion



Mandi

ps: la lezion complete le cjatais chi

Alc di lei

Al è rivât pes cjasis il gjornalut dal Comun: Majano informa (te foto la cuviertine, che no ai capît...).
La novitât plui evidente e je che al è publicât par furlan e par talian. Cul contribût de leç 482/99 il comun al à sparagnât une spese che fint cumò al veve sostignût dibessôl.
Mi spietavi une riflession plui atente su la novitât linguistiche dal notiziari, ma invezit nuie. Dut câs, us propon l'editoriâl che il Sindic di Tavagnà al fat in ocasion de jessude di une iniziative similâr, fracait chi.
Sui contignûts, o ai inmò di leilu dut e duncje no pues dî tant, se no che cheste volte no je nissune lavade di cjâfs par "saccenti" o"polemicants"...
Une piçule critiche sul intervent firmât dal grup di maiorance (ma che o lei ancje jo insiemit a voaltris no vint contribuît a scrivilu): mi à someât un tic debulut...

SCOOOOOOOOOOOOOOOOOOPPPPP!

Il Dree al è tornât: ve ca Macôr l'agregadôr!!!

24 luglio 2008

Un ucielut mi à dit... de riunion de Maianese

Mi àn dit che un ex Sindic al à dit di dut al Sindic, che" e je une vergogne che cuant che al è stât il trofeu Rocco cun tantis scuadris interternazionâl nissun dal comun al jere presint a rapresentâ Maian"...
Mi somee che e je stade une discussion une vore coloride (ancje cun cualchi peraule pesante) e che a la fin cualchidun al à ancje cjapade une batude... di mans. Ise vere?

23 luglio 2008

Un gnûf editorialist dal blog

Un articul di Repubblica che nus piture come une bande di cjochelis, mi veve fat propit zirâ i "cjarsons"!
Ma ta chestis oris une mail mi à fat pensâ in maniere plui gjenerâl, e saludant "Picecûl" (l'autôr de mail che al domande di restâ dome un pseudonim), lu ringrazii cu la sperance di podê vê altris contribûts di bande sô. Duncje, dopo de thermorubriche, ve chi che o screi la gnove rubriche dal Picecûl.

La vagje grasse e nete e je triestine, chê piel e vues sporcje e je furlane.
FRIULANO (ex tocai) del FRIULIVENEZIAGIULIA
UNIVERSITÀ (dal Friûl) del FRIULIVENEZIAGIULIA
UDINESE (balon) del FRIULIVENEZIAGIULIA

GIOVANI ALCOLIZZATI del FRIULI
STUDENTI SOMARI del (VENETO) e del FRIULI

Dut chest al merte une riflession…
I comunniscj dopo de vuere a disevin”A da venì baffone! Ce che al è to al è ancje gno, e ce che al è gno al è gno”…

Il Picecûl

22 luglio 2008

La Patrie al mâr

Ve chi il numar di Lui de Patrie dal Friûl: dut on line.
Ma no stait a dismenteâsi che si pues ancje abonâsi par vêle a cjase par pueste e gjoldile miôr.
Intant us segnali l'articul che o ai scrit su Marco De Agostini, segretari dal Moviment Friûl.
Ps: vêso viodût che il truc dal segnaladôr di feed al funzione no dome cui blogs ma ancje cui sîts!!
Un grazie al Dree che mi da simpri cualchi biel sugjeriment...

21 luglio 2008

Universitât dal Friûl

Ta chei dîs chi si à sintût tant a fevelâ di Universitât, ancje Checo achì al dîs la sô. Cualchidun, in maniere legjitime, al è saltât sù denunciant il pericul di scancelâ la grande concuiste che il Friûl al veve vût cu la istituzion dal Ateneu di Udin.
Ancje a mi no mi plasarès pierdi cheste istituzion domandade a grande vôs dal popul furlan e otignude cu la leç su la ricostruzion dopo dal taramot (art 26 di une leç dal Stât che no mi somee modificabil cun tante facilitât...).
Al è ancje di dî che però, cuant che a àn voie, sui gjornâi no viodin la ore di montâ sù une buriane che no ti dîs e ancje ta cheste ocasion a àn scjadenade une burascje intune tace di aghe. Di fat... la robe mi somee che e sedi rientrade propit par vôs dal President...

20 luglio 2008

La acuile che o varès volût

La maie dal Udin par me e je dome a riis blancjis e neris. Lis acuilis mi plâs viodilis a svolâ su la curve come che za di cualchi an (no tancj) al sucêt.
Secont me prin di dut, l'Udin al è leât al Friûl e cuant che si fevele di tifoserie e passion al è facil che lis reazions a sedin fuartis: ve ca ce che si lei sul blog di Alduti.
Cussì al è normâl che al sedi vignût fûr un grant riviel dai tifôs cuant che a àn viodude une altre acuile su la maie dal Udin: ancje il Pionîr mi somee che al è stât clâr.
Se mi vessin domandât a mi, ancje jo o varès conseât cheste acuile (te foto in bande): chê de Bandiere de Patrie.

19 luglio 2008

Cun Ernest a Lignan

Vuê o jeri a Lignan ("La Floride di Italie", le clamave lui) e o soi lât a viodi la mostre "With much love and gratitude" dedicade a Ernest Hemingway (te foto intant che mi da la man...) in Friûl, cuant che pe ultime volte tal 1954 al è stât ospit a Villa Kechler a Percût.
La mostre e je a Pinede, li dal parc che al puarte il so non e us consei pardabon di lâ parcè che si rive a tornâ a vivi la storie di chei agns 50... a pensâ che un personaç come Hemingway al è passât pal Friûl, al fâs un ciert efiet.
Cun di plui... causalmentri... e jere ancje cualchidun di nestre cognossince...

18 luglio 2008

Inmò sul tor

Dopo de letare di Renza Barazzutti, a son jessudis diviersis opinions, no dome sul blog. Di fat cumò o tiri dongje lis ultimis letaris vignudis fûs sul gjornâl e dopo lis publichi...

17 luglio 2008

Simpri plui siôr

No mi riferìs al gno cont corint, ma al blog che o ai inzornât cuntun pâr di gnûfs servizis: la liste blog personâl e lis Notiziis de Rêt.
Come che o viodês la liste dai blogs e presente chei che pal solit o lei jo e si inzorne man man che ogni blog al met un post, fasint viodi lis publicazions plui resintis.
Il servizi Notiziis de Rêt e permet di viodi, tramite une peraule clâf, notiziis pescjadis te Rêt.
Insome une maniere par cjatâ su chest blog simpri plui informazions in maniere simpri plui pratiche.
Stay tuned.

16 luglio 2008

Sul Cuarnan

Cuant che us ai scrit che o jeri stât sul Cuarnan, no savevi ce che mi soi pierdût no rivant fint insom: par furtune Gianpaolo Della Schiava, il President de Clape che mi lei simpri, mi segnale cheste biele gjite e mi mande la foto.
Un mandi a Gianpaolo e a la sô famee che in chê dì a jerin là sù parsore: magari la prossime volte si cjatìn di persone.

La mê machinute e je mê

O ai a pene finît di paiâle e finalmentri o pues dî che e je mê al 100%. Piçulis grandis sodisfazions!

15 luglio 2008

Gnognos are back

Lu vêso cognossût? Al è il Dree, ma la robe plui impuartante e je chê che si viôt sul sfont: i Gnognosaurs che a tornin sul blog di FriuliDOC.
Tal blog si cjate ancje une sezion une vore ninine che e fevele des detulis par furlan: cumò o voi a regjistrant une ancje jo... vêso cualchi sugjeriment?

Cercjadôr di vin par furlan

Si clame sommelierfurlane e al è il gnûf blog par furlan nassût par idee di Mara, che e je ancje colaboradore de Patrie dal Friûl.
Brave Mara e compliments, ma soredut... Cin cin.

Brave Consuelo, veline furlane

Cheste e je Consuelo Forgiarini di Glemone. Îr e à vinçût la pontade di Veline, il program di Antonio Ricci su Canale 5 in prime serade.
Consuelo no dome e je une biele frute, ma e je stade ancje brave a tignî bot a Ezio Greggio: sul palc e à fat une piçule gag cul comic e cuant che chest i à domandât di fevelâ in "dialetto friulano" je e à specificât cun braure "il furlan è una lingua".
Un biel caratarut che al à di vêi zovât cu la jurie che le à premiade.
Brave Consuelo!

14 luglio 2008

Sfogaitsi chi

Tal zîr di cualchi zornade al è sucedût che plui di cualchidun si è tirât pai dincj. Dut al nas di une considerazion che no mi à fat plasê. O vevi decidût, dopo di un gno coment, di lassâ pierdi, ma si son zontadis peraulis che nol è just che a sedin, ancje se chel che lis cjape no mi sta tant simpatic.
Propit par evitâ che un che secont me al à tuart (e ancje secont il parê di divierse int che mi à dade la solidarietât) al passi come vitime, us invidi a evitâ i insults e lis malisperaulis. Dut câs, ancje par rispiet de neodotore e dal gno amì Daniele, evitìn di scrivi tai post dedicâts a lôr e se cualchidun al à dibisugne di sfogâsi, al pues fâlu tai coments di chest post.

Cinc, cuatri, trê, doi, un... Zero/bis


RENATO ZERO and MOMIX-i MIGLIORI ANNI DELLA NOSTRA VITA

13 luglio 2008

Grazie a ducj!

Ce dî di plui? Nuie: dome grazie!

Daniele Martina

Chest al è Daniele Martina, un zovin furlan di Gjenue, une vore atîf tal fogolâr furlan de citât ligure e al colabore ancje cul sît de associazion Clape Friûl pal mont.
Daniele al è un dai tancj furlans di tierce gjenerazion che a son nassûts fûr dal Friûl, ma che no àn voie di pierdi lis lidrîs furlanis e o soi content che chest gno blog al rapresenti un puint pai furlans che a son sparniçâts pal mont: ancje lui lu ai cognossût dopo che o vevi screât il blog.
Daniele al è di Taurian di Spilimberc e ta chescj dîs al è passât a cjatâmi parcè che al sarà in Patrie fint a la metât di Avost. Daniele, organize une serade te citât dal mosaic e magari vise ancje Bruno!

12 luglio 2008

The Chieftains a Udin cu la Sedon Salvadie

Îr di sere in cjistiel a Udin o ai viodût un dai plui biei concierts de mê vite: I Chieftains, grup mitic de Irlande a àn dât pardabon spetacul (cjalait il sît uficiâl). Prin di lôr La Sedon Salvadie, altre storiche formazion de musiche folk de nestre tiere. Dut dentri dal calendari di Folkest 2008.
Pardabon une robe di viodi!
Massime se in buine compagnie!
Chi sot une piçule cerce...



ma ancje:
chi
chi
chi
e chi

Damme 'a 2...

mandi Gianfranco.

11 luglio 2008

Dotore... dotore... dotore de buse dal...

Casualmentri îr o passavi par Udin dongje di Palaç Flori e cuant che o ai viodût che a jerin discussions di tesis, o ai ricognossût la Ninine (te foto cun me) che e steve par laureâsi.
Alore mi soi fermât e dopo cualchi minût, la Ninine e je jessude cuntune corone di orâr sul cjâf! Compliments a la neodotore in Conservazion dai Bens Culturâi - curriculum archeologjic!
Propit brave!

Dotore... dotore... dotore de buse dal...

ps: un grazie a gutiz pe foto
ps2: un grazie a Paolo che mi à regalât la golarine by Marinella

10 luglio 2008

Polemichis sul Sunsplash

Ta chestis zornadis e je in cors une gare sul Sunplash: une gare tra cui che al è plui a pro e cui che al è plui contrari.
Protagoniscj a son di une bande (a pro) il sindic di Udin Furio Honsell, che al à laudade la iniziative invidant a cjapâ esempli, e di chê altre (cuintri) il senatôr dal Pdl Ferruccio Saro, che al à adiriture fat une interogazion parlamentâr criticant cun fuarce lis declarazions dal sindic.
Po ben, jo o pensi che sedi di une bande sedi di chê altre si vedi esagjerât.
Ancje se o ai dit che mi plâs la musiche, mi somee ecessîf dut chel entusiasim dal sindic di Udin e no mi somee che il Friûl al vedi dibisugne estreme dal model Sunsplash, massime a nivel economic, ma di chê altre bande mi somee ecessive la reazion dal senadôr dal Pdl che al dinee il valôr di un event che al è prin in Europe.
Dal sigûr problemis di legalitât a 'nd è e no si pues dineâ che tal ambient e zire int pôc racomandabil, ma spaçadôrs si ju cjate ancje tes discotechis ancje se no àn i rasta (cence dismenteâ un ciert servizi des Iene...). Po dopo, se il servizi des fuarcis di polizie al coste, mi domandi però se al è just che sui cjamps di balon di societâts professionistichis i agjents di polizie a vedin di jessi paiâts de comunitât cuant che daûr dai zuiadôrs e i CdA des scuadris di balon a messedin milions di euros par fâ profit.
Duncje mi sarès plasût se a fossin stadis mancul polemichis e plui atenzion par un fenomen che al presente un moment di confront cuntun mont lontan dal nestri, ma che al sucêt propit a cjase nestre: o pensi che dal difarent si podedi tirâ fûr simpri alc di construtîf se il confront al è seren. E alore jo e Simone o impiìn... la radio!

09 luglio 2008

Messe a Aquilee

Come ogni an pe fieste dai Sants Ermacure e Fortunât, il grup di Glesie furlane al celebre la Messe dai Patrons dal Friûl.
Si cjatìn domenie ai 13 di Lui a lis 7 sore sere te Basiliche Mari di Aquilee.
La liturgjie e sarà compagnade dal Coro Vôs di Vilegnove e dopo Messe al sarà un moment par un cjoli alc insiemit.

08 luglio 2008

Esercizi di retoriche

Cualchi secul indaûr a disevin che la retoriche e jere une art. Po ben, a Maian i artiscj no mancjin e a scrivin letaris sul gjornâl. Tal prin coment us met l'intervent di Renza Barazzutti, dal grup di minorance Intesa per Majano, che e fâs savê al mont la sô contrarietât al gnûf tor des cjampanis.
Diviersis voltis mi soi cjatât dacuardi cun jê, ma chest colp no pensi che e vedi fat un biel intervent e o pensi che pre Giuliano nol vedi dal sigûr pensade la opare par strassâ bêçs.
Uniche note che o condivît e je la considerazion che il tor di cumò al è une vore simbolic... tant al è vêr che invezit di netâlu vie cu la pacare, ancje il progjetist lu à mantignût tal progjet.
Al pues plasê o no plasê, ma se o vessin di lâ daûr de retoriche populiste de Barazzutti a cheste ore o varessin ducj di lâ ator tun sac come Sant Francesc. E no pensi chel distès che o risolvaressin i problemis tal mont... o varessin dome resentade un tic la nestre cussience.

07 luglio 2008

Rototom a Osôf

Come ogni an, la Gjamaiche e rive in Friûl: Rototom Sunsplash al è tacât a Osôf.
A mi il reggae mi plâs une vore e o varès propit gust di lâ a fâ un zirut.
Cun di plui doman al rivarà a Osôf il ministri de culture dal guvier gjamancan.
Intant us segnali il link al sît uficiâl li che si pues seguî i spetacui in streaming.
Un grazie a Ranieri pe foto!

06 luglio 2008

Glesie Furlane e Sardigna Cristiana

O ai a pene ricevût une biele sorprese di bande dal gno amì Diegu Corraine (te foto) di Nùgoro, Sardegne.
Si trate dal numar di Sardigna Cristiana, une riviste che e fevele di promozion de lenghe sarde te liturgjie. Mi à domandât un servizi su Glesie Furlane par fâ cognossi in Sardegne la esperience di pre Toni e di dut il grup di predis che di passe trente agns a puartin indevant la bataie par fâ jentrâ cun dignitât plene la lenghe furlane te Glesie.
FRACAIT CHI PAR VÊ il PDF de riviste.
E par chei che mi disin che o soi antitalian, o dimostri che no je vere che o soi cuintri de lenghe taliane: tal prin coment us met la version che i ai mandât... o vin doprât il talian come lenghe di lavôr, stant che jo no soi (inmò) bon di scrivi par sart.
O ringrazii pre Romano, che come simpri, mi è stât dongje par tirâ fûr lis informazions che mi coventavin e ancje Diegu par vêmi dade la oportunitât di fâ scrivi su la sô riviste.

05 luglio 2008

Amicizie tra Friûl e Sardegne

No je la prime volte che o feveli di Sardegne, ma no di chê dai Billionaire, dai Briatore, de Costa Smeralda, des vilis... Chê no mi interesse ancje se mi rint cont, e o aceti che cualchidun al preferissi chê. Jo o preferìs fevelâ de Sardegne che e fevele une lenghe altre, une isule che o sint cusine, propit parcè che tra furlans e sarts o sin scuasit 2 milions di personis che, ancje se a àn sì te sachete la cjarte di identitât anagrafiche cu la citadinance taliane, a son prin di dut di rispietâ parcè che a son furlanis e sardis, cuntune identitât vere diferente. Cussì profonde che spes nancje noaltris si visìn di vê, inceâts di proclamis che nus fasin dismenteâ ce che o sin pardabon.
Ancje la musiche spes e conferme chest leam e îr a Monfalcon Flk e Tazenda si son cjatât a cjantâ insieme sul stes palc. No ai il video de serade, ma o pensi che "Armentos" e sedi une biele cjançon che e plasi a ducj e che e rindi mert ancje a la memorie di Andrea Parodi, il cjantant dai Tazenda muart cualchi an indaûr e che o ai vude la furtune di viodi a Sest intun conciert tal curtîl de Abazie cun Al Di Meola cualchi mês prime che al mancjàs.

04 luglio 2008

Statue a Sant Tomâs

Sabide a 5 di Lui a Sant Tomâs e sarà la ocasion par viodi e cognossi une preziose statue di len dal Sant Diacun Martar Laurinç (te foto) che e jere stade robade de glesie di Sant Zuan cuasi 80 agns indaûr. Ve chi il comunicât de Crup che le à recuperade l'an passât e le à afidade al Museu diocesan di Udin.

03 luglio 2008

Josep-Enric Teixidó

Zornadis catalanis chestis. Dopo vê cognossût Aureli Argemì, vuê o ai vût il grant plasê di cognossi Josep-Enric Teixidó (te foto cun me), un ricercjadôr de Universitât di Lleida che o vevi cognossût grazie a Dree par Internet. O vin fat une biele tabaiade su la cuistion linguistiche e lis difarencis che a son tra Friûl e Catalogne. Mi à dât un sac di conseis, ma plui di dut mi à fat pensâ une robe che mi à dit. Cuant che i ai domandât cuale che e je la prime impression che al à vût, rivant a Udin (e je la prime volte che al ven chi), mi à dit che daûr di ce che al viodeve in Internet midiant dai blogs furlans e i contats cui furlaniscj de Rêt, al pensave pensave che ancje in citât al varès cjatât tant "Friûl". Invezit rivant a Udin al è restât deludût parcè che al someave di no jessi in Friûl. Pr furtune fûr de citât al à vût plui riscuintri. Chest al à di fâ pensâ trop lavôr che al è di fâ, massime a Udin.
Une altre considerazion le ai fate intant che o fevelavi. Tancj mi disin "Ma vonde furlan che no ti covente a nuie... no tu podis restâ sierât...", po ben a cheste int o rispuint cuntun pâr di riflessions.
Se no mi fos interessât di furlan, forsit cumò no lu fevelarès plui, ma no varès rivât a intindimi cun Josep: dut il timp lui al fevelave català e jo o fevelavi par furlan, dôs lenghis une vore dongjis. No nus è coventât l'inglês, che magari lu doprarai in altre ocasion. Une seconde riflession le fâs simpri sul fat che i furlaniscj a son acusât di sierâsi... po ben: jo o ai cognossude plui int midiant i contats che o ai imbastît midiant il gno interès pe cuistion linguistiche che no prime. O ai cognossût plui la Europe fevelant di chestis robis, ancje midiant dal blog, che no studiant l'inglês a scuele. Che forsit o vedi reson jo e ducj chei che le pensin cussì? Jo mi convinç simpri di plui.
Ma soredut il furlan mi covente a mi par mostrâmi cemût che o soi, par rapuartâmi cul mont cu la mê vere identitât.

02 luglio 2008

O ai cognossût Argemì

Cuntun pôc di cûl e cuntun pôc di sintiment (forsit plui il prin, ma ogni tant al covente ancje chel...) o ai rivât a cognossi Aureli Argemì (cun me te foto), che us ai fevelât propit îr. O ai vude la conferme che al è pardabon un personaç di cognossi e di scoltâ. Une des frasis che plui mi à impressionât, intun lunc discors che o vin fat su la identitât e sui dirits linguistics, e jere riferide a la Europe "Fint cumò la Europe e à fevelât di noaltris Nazions cence Stât, ma cence fevelâ cun nô: come se o fossin frutins che a àn di fâsi dî ce che o vin di vê. Te prossime Conseu, o fasarìn une propueste concrete, cun noaltris a meti sul plat ce Europe che o volìn: vonde fâsi tratâ come che o fossin fruts, no sin piçui, ma o dimostrarìn di jessi popui pronts par costruî une gnove Europe che e rispieti pardabon il principi di unitât te diviersitât".
Fevelant cun lui, che al è stât perseguitât di Franco pe sô ativitât di catalanist, o ai capît che si à di dâsi un obietîf e cirî di realizâlu: se no si mole, i risultâts a rivin... baste viodi ce che a fasin in Catalogne cumò par rindisi cont che al è pussibil cressi il nestri spirt identitari ancje chi di noaltris.
L'apontament al è par doman di sere ai 3 di Lui a Coder di Sedean pe serade cun Aureli Argemì li de Cjase Turoldo, sede dal Istitût Ladin Furlan "pre Checo Placerean".

01 luglio 2008

Aureli Argemì in Friûl

Aureli Argemì (te foto) al sarà in Friûl ta chescj dîs. Une biele ocasion par cognossi un om che al à fat tant pe cause catalane, tant di jessi perseguitât dal Gjenerâl Franco intant de ditature.
Mi plasarès propit cognossilu (Argemì, no Franco...).
Intant achì o podês savê alc di plui su di lui e la sô iniziative pe declarazion dai dirits linguistics presentade a la Organizazion des Nazions Unidis.