Furlans on line

Vuê o resti su la multimedialitât e us segnali il sît www.furlanfriulano.eu dal Consorzi universitari furlan, che al met adun une vore di materiâl.
Personalmentri ce che mi à plasût di plui a son lis intervistis che si cjatin in homepage (chi in bande la foto).
Lait a viodi, o cjatarês bielis sorpresis!

Sul Corriere

Us segnali chest articul dal Corriere della Sera li che si fevele di un grup di zovins che a rapresentaran sot de insegne de Universitât dal Friûl, la Italie al Imagine Cup, une competizion informatiche: fracait chi.
Jo lu segnali parcè che tra chei zovins al è ancje Marco Amato di Maian che spes mi à dât conseis tecnics di nature informatiche.
La scuadre (te foto) si clame «Pata-Track» e cun Marco Amato a son ancje Elisa Buttussi, Alessandro Verona e Ivano Zanello: ducj insiemit a àn vinçût la categorie «software design», che tra dutis e je la plui impuartante dal premi.
Tancj compliments e un grant "in bocje al lôf" pe finâl che si tignarà in Egjit.

Lenghis minoritariis, media e emigrazion

Al è di un pôc che il Consorzi universitari furlan al à publicât i ats di une cunvigne fate a Colorêt cuasi 2 agns indaûr (ai 19 di Mai dal 2007).
O jeri intervignût ancje jo fevelant di blog, Internet e lenghe furlane: ve chi il link a "Emigrâts inte Rêt", il gno contribût che al è stât publicât tal librut (cun DVD di une seconde cunvigne simpri sul stes teme, ma fate a Colonia Caroya).
Grazie al Cuf e grazie a Luca!

Adesion al Pat pe Universitât

Ancje jo o ai aderît al Pat pe Universitât, ancje se chel document al è stât scrit par jessi sotscrit des istituzions (slargjât ai parlamentârs).
O soi convint che la Universitât dal Friûl e vedi bisugne di un grant impegn pe sô difese e mi soi convint ancjemò di plui dopo vê sintût l'intervent dal Retôr Magnific, la prof.e Cristiana Compagno. Alc o pensi che o varês za let sui gjornâi, ma la frase che plui mi à plasût e je stade: "La Universitât dal Friûl prime e fâs e dopo e domande: se o sin chi a domandâ al è parcè che fint cumò o vin lavorât pal miorâ simpri di plui e o continuarìn a fâlu dimostrant di volê otimizâ e riorganizâsi. Ma se i tais a restin chei anunciât la nestre Universitât no rive al 2010: e colasse prime". E à ricuardât cun passion e clarece dute une schirie di dâts su la cressite di un ateneu zovin, ma che in pôcs agns si è taiât fûr une posizion di dut rispiet, ancje se al è in credit di tancj milions di euros di bande dal stât. Propit brave e la lungje batude di mans che e à vût a Palaç Belgrât, e je une conferme che e à plasût no dome a mi.
O pensi che chest so intervent e cheste cunvigne a conventaran a tancj par valutâ cun atenzion cuâi pas che a son di fâ in materie.
E mi auguri 2 robis pe nestre Universitât dal Friûl: che e otegni ce che e merte e che però si ricuardi ancje jê dal son non (Universitât dal Friûl, no une Universitât taliane a Udin e cualchi sede distacade ator pal teritori): il leam cu la identitât, la lenghe, la culture, il teritori dal Friûl al è ricuardât a clâr te leç istitutive, L546 dai 8 di Avost dal 1977 - art. 26, e cun fuarce al à di jessi rispietât.
Se cualchidun altri al à voie di manifestâ la sô adesion al pat e solidarietât al comitât promotôr, o podês mandâ une mail a blogromanini[gubanute]gmail[pont]com e jo le zirarai al coodinatôr.

Universitât dal Friûl

Ta chei dîs chi si à sintût tant a fevelâ di Universitât, ancje Checo achì al dîs la sô. Cualchidun, in maniere legjitime, al è saltât sù denunciant il pericul di scancelâ la grande concuiste che il Friûl al veve vût cu la istituzion dal Ateneu di Udin.
Ancje a mi no mi plasarès pierdi cheste istituzion domandade a grande vôs dal popul furlan e otignude cu la leç su la ricostruzion dopo dal taramot (art 26 di une leç dal Stât che no mi somee modificabil cun tante facilitât...).
Al è ancje di dî che però, cuant che a àn voie, sui gjornâi no viodin la ore di montâ sù une buriane che no ti dîs e ancje ta cheste ocasion a àn scjadenade une burascje intune tace di aghe. Di fat... la robe mi somee che e sedi rientrade propit par vôs dal President...

La Universitât e Glesie furlane a ricuardin pre Toni

Vuê la Universitât dal Friûl e Glesie Furlane a ricuardin pre Antoni Beline intune cunvigne su lis sôs oparis e la sô figure.
Pre Antoni al jere stât proponût pe lauree honoris causa e la pratiche e jere za stade vierte e i contâts cul ministeri za cjapât. Ma il destin al à volût in maniere difarente.
Ve chi il comunicât uficiâl de Universitât dal Friûl su la cunvigne.

Master di Furlan

No si trate di chel Master te foto, ma di une iniziative de Universitât dal Friûl pe formazion di insegnants di furlan.
Par plui info, lait a viodi chi.

Assise su FriûlTV

Us met achì il link ae FriûlTV, in maniere che o podês viodi la Assise des Rapresentancis furlanis.
Tra i tancj biei intervents, o met chel di Roberto Visentin, za senatôr.

Assise des rapresentancis furlanis

Fin cumò a difese de lenghe furlane si son jevadis dome vôs singulis, plui o mancul autorevulis. Cumò il front furlanist si mobilite e al da apontament a ducj chei che a crodin tal valôr de indentitât di un popul, ancje piçul, te Gnove Europe che e cres di an in an, si da apontament pai 11 di Setembar aes 17.30 te Aula magna de Universitât dal Friûl in plaçâl Kolbe.
Promotôrs dal incuintri a son il stes ateneu, il comitât 482, il comitât pe autonomie e pal rilanç dal Friûl, i media de diocesi di Udin Vite Catoliche e Radio Spazio 103 e la emitent radiofoniche Onde Furlane. Argoment, la poie dai previodiments che il Consei regjonâl al esaminarà in autun par fissâ lis normis di tutele e valorizazion des lenghis minoritariis presintis in Regjon.

Presentazion in Universitât

Isal eficaç il lengaç publicitari par promovi la lenghe furlane? Trop isal impuartant investî te promozion de lenghe? Il furlan isal daûr a scomparî parcè che leât a strent dome al mont dal passât e de tradizion o isal une lenghe che e pues esprimi cualsisei concet? E ancjemò… il furlan isal eficaç te publicitât? Aial di jessi promovût cu lis gnovis tecnologjiis? Rapresential une oportunitât lavorative? Isal just insegnâlu ai fruts?…"
Par rispuindi a chestis domandis e cjapâ sù lis prospetivis pussibilis, cun cheste iniziative si è sielzût di da vôs ae int.
Il progjet de campagne di comunicazion F=MC2 Furlan = Mieç di comunicazion al cuadrât, inmaneât dal Cirf de Universitât dal Friûl, al à ufiert la oportunitât di indagâ fra i spetatôrs dai cines de regjon, no dome il gradiment pe campagne promozionâl ma ancje i aspiets de percezion personâl de lenghe furlane, dal so ûs e de sô promozion ufrint indaûr une realtât interessante e vivarose, buine di vierzi, massime ai esperts, prospetivis gnovis di progjetazion.
Apontament in sale Florio a Udin ai 10 di Lui aes 11.00.

Vuê o jeri a Triest in audizion de Comission VI

Vuê pe prime volte o soi jentrât te aule dal Consei regjonâl li che la Comission VI (te foto, il president Kristian Franzil tal mieç) e à convocât ents e istituzions par cjapâ sù i parês in mert aes propuestis di leç di tutele sul furlan. Lis associazions a jerin tal dopomisdì e jo o ai stât in rapresentance da "La Patrie dal Friûl" e o soi intervignût disint cussì:

O ringrazii la Comission VI pe ocasion che nus dâ di fevelâ e dî la nestre su lis propuestis di leç pe tutele de lenghe furlane. Ma dopo i ringraziaments o scuen ancje manifestâ dut il gno malstâ par cheste situazion.
Lu dîs parcè che se jo o fos responsabil di ce che al è stât fat cu la propueste di leç 257 "Norme per la tutela, valorizzazione e promozione della lingua friulana" (propueste de Zonte Illy, ndr) mi sintarès ridicul e mi vergognarès.
Sedi pe metodologjie che prime si da une incjarie a un grup di esperts che di agns a lavorin tal setôr e dopo si fâs dut altri, sedi pal risultât dal test che cussì come che al è, dopo che il test origjinari dai esperts al è stât parât a tocs cu la manarie e cul bisturi, nus puartarès indaûr a prime dal 1996.
Su lis cuestions juridichis, che dal sigûr a son stadis frontadis ancje vuê di matine, mi fermi su la cuestion de lenghe standard e des varietâts. Jo o feveli la mê varietât di Maian, ma cuant che o ai di scrivi, o dopri la lenghe normalizade che o ai imparât dai libris. Anzit propit di cuant che o ai imparât lis regulis par scrivi o ai imparât a cognossi e a preseâ dutis chês altris feveladis locâls che prime no cognossevi. E duncje vê une uniche lenghe scrite nol è un probleme, ma anzit un vantaç ancje pes feveladis locâls che sot di chest "cuviert" a son plui protetis. E lu dîs ancje come operadôr linguistic che ogni dì sul teritori al è usât a vê a ce fâ tra lenghe fevelade e lenghe scrite.
Dut câs, tornant aes propuestis di leç, ancje se la cuestion e je gjenerâl, mi permet di fevelâ in particolâr de scuele e o invidi il Consei a cjapâ in considerazion une propueste ben precise: jo o concuardi cu la posizion esprimude de propueste sotscrite dai Conseîrs Violino, Guerra, Baiutti e Zorzini, par un inseriment curiculâr dal insegnament de lenghe furlane a scuele. Dome cussì si varà un risultât. E a chest proposit us lei une relazion che cualchi an indaûr al veve fat il nestri diretôr pre Toni Beline, fevelant propit de impuartance dal insegnament de lenghe locâl a scuele: "La impuartance de scolarizazion inte lenghe dal cûr" (e jù che o ai let dute la relazion, cirche 25 minûts di intervent)

Dut l'intervent al è stât par furlan.

LA UNIVERSITÂT E CONSEGNE I ATESTÂTS

Cuarte edizion dai cors di “marilenghe” destinâts ai dipendents de aministrazion publiche

Si consegnaran vuê vinars ai 15 di Jugn, a misdì, inte sale dal Consei di Palaç Florio, in vie Palladio 8, a Udin, i atestâts di partecipazion ae cuarte edizion dai cors di lenghe furlane, prontâts dal Centri interdipartimentâl di ricercje su la culture e la lenghe dal Friûl (Cirf) de Universitât dal Friûl. A cjaparan part ae cerimonie il retôr Furio Honsell e la diretore dal Cirf, Piera Rizzolatti. Si previôt l'intervent dal president de Societât Filologjiche Furlane, Lorenzo Pelizzo, e dal vicepresident de cooperative Serling, Antonio Buiani, che a àn colaborât ae realizazion de iniziative.
La iniziative e je stade inmaneade cui fonts de leç 482/99 su la tutele des minorancis linguistichis storichis. I cors, gratuits e su cinc nivei, a son destinâts ai dipendents des aministrazions publichis, ma dut câs a son vierts a ducj i interessâts tant che uditôrs. L’obietîf dai cors al è chel di dâ continuitât di bande dal Ateneu ae formazion linguistiche di meti in vore tal ambient lavoratîf, e in particolâr, intai ents publics.

Aghis motis li dal Cirf

Di cualchi zornade si lei sui gjornâi diviersis robis sul Cirf.
Us met ancje jo cualchi articul di rassegne stampe tai coments.

Imprescj informatics pe Marilenghe

Continuant su la cuestion de marilenghe e de inovazion us segnali un pâr di robutis che o podês cjatâ sul sît dal Consorzi Friûl Lenghe 2000.
A son i plug-in dal Grant Dizionari Bilengâl Talian Furlan e dal Dizionari Ortografic Furlan di istalâ sul vuestri browser, in maniere di vê simpri a puartade di man l'imprest pe traduzion dal talian al furlan e dal furlan al talian.
Chescj modui a permetin di doprâ cun plui facilitât il Dizionari ortografic e il GDB TF tes versions o­n-line.
Cun di plui e je ancje la pussibilitât di discjamâ il driver de tastiere furlane par chei che a doprin il sisteme Windows in maniere di no lambicâsi par scrivi la cidilie e i acents juscj.
Un grazie di cûr al CFL2000.
Cui visial Beppe Grillo?

Furlan in Universitât: i cors dal Cirf

Il CIRF, Centri Interdipartimentâl di Ricercje su la culture e la lenghe dal Friûl, al organize ancje chest an i cors di lenghe furlane (L.482/1999 su la tutele des minorancis linguistichis storichis) pai dipendents des Aministrazions Publichis.
Il cors al è viert ancje ai students e ai citadins come uditôrs e nol proviôt nissun paiament.
Dut câs, o podês visitâ il sît internet dal CIRF.

CIRF – Universitât dal Friûl – Università degli Studi di Udine
Tel. 0432.556480
Fax 0432.556481

Furlan te Universitât dal Friûl

Par ducj i zovins che a volessin continuâ la lôr formazion te Universitât dal Friûl, cumò a puedin cjatâ la lôr strade consultant ancje la vuide ai cors di lauree pe prime volte par furlan.
Indreçade ai students des scuelis superiôrs, la Vuide e mostre tal detai la ufierte formative dal an academic 2006-2007 di dutis lis dîs facoltâts dal ateneu.
Il progjet lu à metût in vore il Centri interdipartimentâl di ricercje su la culture e la lenghe dal Friûl (Cirf) cui finanziaments de Leç 482/1999 su la tutele des minorancis linguistichis storichis.
La Vuide e vignarà presentade e dade fûr pe prime volte in ocasion dal Salon dal student programât par Vinars ai 16 e Sabide ai 17 di Fevrâr al Campus dai Rizzi, in vie delle Scienze 208. Il progjet di traduzion al à cjapât dentri ancje la “mini vuide”: un librut svelt che al presente in maniere sintetiche la ufierte didatiche, i servizis e lis ativitâts di ricercje de Universitât dal Friûl.
Lis dôs vuidis, stampadis ognidune intun miâr di copiis, a saran a disposizion li dal Centri orientament e tutorât, li dal Ufici relazions cul public, tes segretariis didatichis dal ateneu des sedis di Udin, Pordenon e Gurize. Cun di plui a vignaran distribuidis tai Sportei di orientament (Ritmo) de Regjon, in ducj i uficis Informezovins e ai insegnants dal orientament des scuelis superiôrs des provinciis di Udin, Pordenon e Gurize. Lis vuidis par furlan a àn chei stes contignûts e chê stesse grafiche de edizion taliane.
Al progjet a àn colaborât il Centri comunicazion e stampe e il Centri orientament e tutorât (Cort) dal ateneu, la cjase editore Forum e i studis di grafiche cdm/ekostudio.
« La fuarce e la origjinalitât di espression di cheste lenghe maraveose – al rimarche il retôr, Furio Honsell - e presentarà ogni dissipline, sedi fedelmentri che ancje sot di une lûs gnove, che e insiorarà la dissipline stesse e ancje il furlan». « Il sproc che al compagne lis vuidis al è “facoltât di inovazion” – e spieghe la diretore dal Cirf, Piera Rizzolatti – che al vûl riclamâ la atenzion su la largje sielte di ûs che la lenghe locâl e permet te comunicazion: dai argoments plui informâi a chei plui sofisticâts de tecnologjie e de ricercje sientifiche. ».
Dongje des vuidis in edizion furlane, il Cirf al presentarà tal Salon dal student altris novitâts: gnûfs materiâi stampâts de campagne di comunicazion F=MC2 ; il gnûf depliant informatîf dal Cirf bilengâl; lapis promozionâi de lenghe fats in plui colôrs cun plastiche riciclade di scjatis di cd, videocassetis e tacis; adesîfs che si darà fûr tai locâi publics, cuntun dissen studiât di pueste e il sproc “o feveli ancje par furlan” par sburtâ lis personis a fevelâ daurman par furlan dulà che a cjatin chest logo.

Il Furlan al va cu la coriere!

Su ILfurlanist e je la notizie dal ultin at de campagne promozionâl dal Cirf de Universitât dal Friûl.
Ocjo al furlan su lis stradis de regjon. La campagne di promozion de lenghe, pensade dal Centri Interdipartimentâl di Ricercje su la culture e la lenghe dal Friûl (Cirf) de Universitât dal Friûl, si sierarà cuntun viaç in coriere, di Zenâr fintremai ae metât di Lui, tra lis provinciis di Udin, Gurize e Pordenon. Cuatri autobus extra urbans, doi che a partissin de stazion di Udin, un di chê di Gurize e un di chê di Pordenon, a ziraran di fat pal teritori regjonâl metint fûr cartei cu la formule “F=MC2 Furlan mieç di comunicazion al cuadrât”.

La scree de campagne di promozion de lenghe e je dal prin di Novembar dal 2006: di chê volte, la campagne si è disvilupade midiant di spots publicitariis trasmetûts tes salis cinematografichis plui grandis de regjon, ma ancje in gracie di messaçs pe radio, di publicazions su gjornâi specifics e su la cjarte stampade, o cu la distribuzion di cartulinis e di segnelibris, adesîfs e manifescj. Par ducj i interessâts, i materiâi si distribuissin al Cirf, li de Universitât, in vie Petracco 6, a Udin. Inte stesse sede si pues usufruî dai servizis dal Sportel di lenghe furlane, che si pues contatâ ancje la numar 0432 5564580, o pûr scrivint une mail. La campagne promozionâl «e je stade – e comente Piera Rizzolatti, diretore dal Cirf – une biele prove pal Cirf e pal Ateneu di Udin. Pe prime volte o vin vût a ce fâ cuntune campagne in grande scjale pe promozion de lenghe furlane, leade al mont de tecnologjie, de sience e de inovazion».

«La formule F=MC2 – e spieghe Priscilla De Agostini dal Cirf, coordenadore dal progjet -, che e ven di chê di Einstein E=MC2, sinonim universâl di discuvierte sientifiche, e rimarche l’aspiet une vore inovatîf dal doprâ il furlan tant che lengaç sientific, tecnologjic e filosofic». Tai ultins agns, il studi, la ricercje continue, lis publicazions dal setôr, come cualchi riviste sientifiche in lenghe furlane, e il fat di vê prontât imprescj linguistics specifics, «a àn contribuît – e rimarche Rizzolatti - al procès di insiorament continui e di evoluzion dal furlan». «La lenghe furlane – e siere De Agostini – e à vuê la pussibilitât di rapresentâ ad implen la realtât e di afrontâ nivei alts e diversificâts di comunicazion, e la discuvierte di cheste gnove formule F=MC2, dute par furlan, e je sore il dut un ricognossiment des potenzialitâts concretis di cheste lenghe».