30 settembre 2008

A proposit di Expro

Mi à fat plasê di lei sul notiziari di Confindustrie un articul di une pagjine interie su la mostre Expro de Pro Majano. Compliments a la pro loco!
Ve chi l'articul publicât sul notiziari di Confindustrie di Udin.

28 settembre 2008

Biel cun anime

No soi mai stât un grant passionât di cine. No cognòs i atôrs, no sai nuie de lôr vite. Cuant che o ai sintût che al è muart Paul Newman però ancje jo o soi lât a leimi i gjornâi e vuê o soi restât une vore impressionât di cheste interviste di Oriana Fallaci che i veve fat a Vignesie tal 1963 (te foto, un moment de interviste).

26 settembre 2008

Un referendum sul referendum

Thermo nus segnale la letare di Fausto Floreani che sul Messaggero al propon un referendum sul progjet di recupar dal Ospedâl Langobart di Sant Zuan a Sant Tomâs. E jo us domandi un parê chi in bande, a proposit di cheste idee: cjalait chi la letare.

25 settembre 2008

Ancje jo te Puccifamee dai Pucciamîs

Piçule parentesi di lezerece cuntun ringraziament al sît dai Corona's che mi à fat jentrâ te simpatiche famee dai Pucciamîs: ve chi il Puccichris77, ven a stâi la version dissegnade dal sotscrit. O ai preseât une vore i ocjaluts e i murseluts ros!
Un grazie al Dree, al Loma e al 30Marlboro.

24 settembre 2008

La mostre dal Dree

Ve chi un ricuart de inaugurazion de mostre dai Gnognos in ocasion di Friulidoc li de Filologjiche. O soi stât content pal Dree che al à vude la ocasion di meti in mostre i siei dinosauruts, ma o ai vude come la impression che al è mancjât alc.
Forsit in Filologjiche e je inmò une cierte distance gjenerazionâl: mi spietavi plui atenzion par une atrazion che e je stade preseade une vore di bande de int, ma che ta chê sere de scree mi à parût un tic trascurade stant che dut i sorestants a son lâts di corse a plan tiere a vierzi chê altre mostre invezit che fermâsi un moment di plui parsore a taiâ il "nastri" cul Dree. A part chest, o torni scrivi: o soi content pal papà dai Gnognos! Bulo!

23 settembre 2008

Sgarfefurlans e Unesco

Tal an internazionâl des lenghis, la trasmission di Loris Vescovo (te foto cu la maiute nere) e je stade inseride tal sît de Unesco cuntune schede dute sô. Bulo Loris e compliments a ducj chei che a àn lavorât par cheste trasmission.

22 settembre 2008

Renza Barazzutti e lasse il Consei comunâl

Vinars ai 26 di Setembar, zornade europeane des lenghis, si darà dongje il consei comunâl. Ve chi l'ordin dal dì.
La novitât che mi à lassât plui smaraveât e je chê des dimissions de conseire di Intesa per Majano Renza Barazzutti che e vignarà sostituide. E un tic mi dispâs parcè che su ciertis cuistions, come pe tutele linguistiche, e à posizions che o condividevi.
Pluitost mi sarès spietât lis dimissions di cualchidunaltre, ma cumò no mi vâ di cavilâ.
E alore o dîs: mandi Renza e benvignût a Valdi Minisini di Sant Salvadôr.

21 settembre 2008

Contradizions

Cuant che cualchi mês indaûr al jere tacât l'iter pe aprovazion de gnove leç su la lenghe furlane, une vore di conseîrs dal Centridiestre a vevin contestât cheste iniziative disint che no jere une robe utile di fâ. Cumò tancj di chei stes conseîrs, tra chescj Piero Camber, un dai plui contraris a la tutele de lenghe furlane, a àn presentât une propueste di leç pe tutele dal triestin, dal bisiac, dal graisan e altris dialets venits, cirint di passâ come i difensôrs de varietât linguistiche de nestre regjon. Mi plasarès cjatâ chei verbâi des sentadis di consei regjonâl prime de aprovazion de leç regjonâl di tutele de lenghe furlane par fâur visâ di ce che a disevin Camber e ducj chei altris firmataris: al sarès cumò di cjapâ chei discors e fâur lei i verbâi gambiant la peraule "furlan" cu la peraule "triestin", "biasiac", "graisan"... e domandâur: "Cemût ti sintaressistu?"
Come che al à dit cualchidun: o che si è di front a une conversion totâl (ma o dubiti...) o che al è un tipic esempli di schizofrenie...
E intant che il President de Regjon si dimostre une vore frêt tai confronts di cheste propueste sui dialets, jo us segnali un biel editoriâl di Dree Valcic sul Gazzettino di vuê.

20 settembre 2008

Une zornade speciâl

Prime di dut us auguri une robe. Che l'amôr fresc che o vês vuê no us bandoni mai te vite. Soredut che o vedis la gracie di no pratindi masse un di chel altri, ma di jessi bogns di sopuartâsi un cul altri. Mai concludi, inte vite concrete, masse svelts. Spietâ simpri. Il spietâ e je la forme dal sopuartâ, e je la forme miôr par podê lâ dacuardi.
Seconde robe. Inte fieste dal matrimoni no si pues dismenteâ che no sin dibessôi, stant che la fieste dal matrimoni e je la fieste de risultive de vite. E alore no sin dibessôi, ma, tune maniere o ta chê altre, e je dute la umanitât che e fâs fieste chi cun nô.
E alore us dîs chest: us auguri che Diu us dedi la gracie di vê fruts, di vê fîs. E che ju vedis in chê cuantitât che e je convenient pe umanitât di vuê e di doman, pal popul nestri di vuê e di doman, par voaltris.

pre Checo Placerean


ps: un grazie a Ranieri pal servizi fotografis

19 settembre 2008

Mandi di Dortmunt

E Friulidoc, pe prime volte te sô storie, al piert il bancut dal Fa.f, l'Udin al vuadagne in tifoserie. Ve chi la foto che mi mande il Pionîr che al à cjatât a Dortmunt la tifoserie svuizare dal Udin. E mi conte che e jere ancje int dal Lussenburc. Cun di plui, ducj chei furlans in trasfierte a àn puartât ben al Udin che al à vinçude la partide 2 a 0!
Alè Udin!

18 settembre 2008

Confindustrie su Telefriuli

Usgnot Telefriuli e dedica un speciâl a la assemblee di Confindustrie di lunis passât. O speri che e mandi in onde ancje l'intervent de ministre Sandra Pupatello Pizzolitto (te foto cun Donald Ziraldo, Luca Peresson e Carlo Della Vedova).

Inzornament: ve chi la pagjine dal sît di Confindustrie di Udin cul video dal prin intervent de ministre Sandra Pizzolitto Pupatello.
(un grazie doverôs a Luca, che i ai cjapade dal so blog la foto!)

17 settembre 2008

La Patrie e je... in taule

Il numar di Setembar de Patrie dal Friûl al è dedicât a la cusine... no tal sens de sûr dal cusin, ma tal sens di ce che si fâs di bon di mangjâ chi di nô.
Tantis informazions che ancje jo o ai savût pe prime volte e che a mertin di jessi letis dutis.
Se no savês di ce bande tacâ, us segnali la recension di 2 libris: un libri di storie che si presente no propit ben e la riedizion di Siôr Santul, di pre Toni Beline.
Simpri te memorie di pre Toni, ve ca un biel intervent di pre Tonin Cjapielâr in mert a lis cuistions relativis a la traduzion des sôs oparis.
E visaits che ancje se Internet al è plui comut, l'abonament us fâs gjoldi miôr la riviste: su la cjarte e je dute une altre robe.

16 settembre 2008

Biel intervent de ministre Pizzolitto

Che la ministre canadese pal cumierç e il disvilup economic Sandra Pizzolitto (te foto cul President de Regjon Renzo Tondo e il President di Confindustrie di Udin Adriano Luci) e fos une persone pardabon straordenarie, lu vevi za acenât cualchi zornade indaûr. E îr a la assemblee di Confindustrie di Udin e je rivade puntuâl la conferme. Jo no jeri, ma mi àn riferît, e no stenti a crodi, che la ministre Pizzolitto e à fevelât bogns 10 minûts par furlan! E e je stade grandiose no dome parcè che e à doprât la lenghe furlane, ma ancje par chel che e à dit: forme e sostance cun fuarts riferiments al valôr de indentitât e dal jessi furlans. O pensi che e sedi stade une dimostrazion esemplâr e savê che il public in sale (nol covente che o disi cui che al jere) al vedi preseât cun entusiasim chest intervent, al vedi di fâ pensâ. Ancje la Mercigaglia, presidente de Confindustrie taliane, mi àn riferît, e à di vê dit che e veve capît alc e che i displaseve di no podê ancje jê saludâ par furlan: la prossime volte si prepararà alc par furlan.
Une notizie che e mertave secont me plui spazi rispiet a ce che i à dât la stampe: Messaggero, Gazzettino (cuntune biele citazion di Luci) e Radio Onde Furlane a àn metût in evidence chest fat. Ma jo mi sarès spietât alc di plui.
Par concludi, la Sandra Pizzolitto e à continuât il so intervent par inglês, corezint la interprete cuant che e sintetizave masse la traduzion par talian. Insome, se o fos a stâ in Ontario o votarès Sandra Pizzolitto Pupatello.

15 settembre 2008

14 settembre 2008

Cinc, cuatri, trê, doi, un... Zero/ter

Al mancje pôc a la fin dal Istât... per no dismenteâsi e par gjoldi inmò un pôc dal mâr, dal savalon e dal soreli...

13 settembre 2008

Casse integrazion in Snaidero

O scuen ameti che no sai cemût che e je la situazion. O ai let ancje jo come voaltris i gjornâi e di cualchi timp o cîr di seguî ce che al sucêt te Snaidero a Maian par chei 40 che a son di masse. La uniche robe che o pues fâ e je meti l'ultin dai tancj articui, che vuê al è sul Messaggero Veneto. Un aspiet mi somee interessant pes personis coinvoltis: l'acuardi al è rivât di corse dant in curt une rispueste a chês 40 personis.

12 settembre 2008

Blasco 10 a Udin

Un Blasco in formissime (cjavei taiâts e grinte di vendi) e un concienton che no si dismentee!
E jo e la Ninine o jerin li!

11 settembre 2008

Sandra Pizzolitto Pupatello ospit di Confindustrie di Udin

Cheste e je Sandra Pizzolitto Pupatello. Ai plui, forsit, chest non no ur dîs nuie, ma cheste biele siore e je la ministre pal cumierç e il disvilup economic dal Ontario e e sarà ospit de Confindustrie di Udin, lunis che al ven pe assemblee anuâl.
La ministre Pizzolitto e à origjin furlane, braurose des sôs lidrîs e fevele benon ancje par furlan e in pratiche si pues ben dî che e je la seconde cjarie dal Guvier dal Ontario.
No pensi che al coventi zontâ nuie altri: personis cussì a fasin capî ce che a àn puartât i furlans pal mont. Al sarès propit biel vierzi un puint cul Canadà, par un dialic di disvilup economic cun chel paîs: la seconde citât furlane tal mont e je Toronto e al sarès propit impuartant che la nestre int e aprofitàs di chest canâl.
Dopo dut chest, o ringrazii inmò une volte Luca e Carlo che me àn fate cognossi midiant dal documentari "Farcadice - Diari di Viaç: Toronto".

10 settembre 2008

Fieste a Cjasesole

Cun doman e tache la fieste de Madone dal Don, che no je la fieste de mari de femine dal plevan...
A Cjasesole a tachin i 4 dîs di sagre e jo i fâs tancj compliments a Dario dai Ols par savê jessi ancje chest an anime de fieste tignint dongje la proloco dal paîs e ducj chei che i dan une man. Anzit, bulos ducj!

PS: ve ca l'articul che al è jessût sul Gazzettino.

09 settembre 2008

Lucio Battisti, 10

A son dîs agns che nol è plui... ma o pensi che ognidun che al cjale chest video (o altris...) nol à dismenteât la sô musiche. Cuant che o sintût par radio che al jere muart, no sai parcè, mi è someât che si sierave un toc de nestre storie resinte. O ai sielt dome une des tantis bielis cjançons, ma dome parcè che no mi saressin stadis dutis chês che mi plasin...


08 settembre 2008

Bandieris in place

Cuant che a Maian tu fevelis di Gjani Dafare, fûr dal lavôr, ti ven iniments la Ferrari e i alpins. Dispès Gjani al met fûr sui barcons dal so condomini tantis bandieris (cuant che e vinç la Ferrari nol mancje mai il cjavalut neri su sfont ros). Ma ancje in ocasion dal meeting di atletiche al à metût a disposizion la sô terace par decorâ la place cu lis bandieris des rapresentativis che a àn partecipât.
La foto no je cuissà ce, ma e je avonde par complimentâsi e ringraziâ Gjani pe disponibilitât e pe sensibilitât.

07 settembre 2008

Fieste dai mus

Ve ca une altre foto dal album dai ricuarts. In ocasion de fieste di Feagne no podevi no meti une fotute che mi viôt cuntun mussut... pe cronache jo o soi che cu lis tiracjis e i sandaluts...

06 settembre 2008

Muris in fieste

Ve ca la locandine di Muris in Fieste, un biel event a Muris di Ruvigne. Jo o ai stât ancje l'an passât e mi à plasût. Tra lis iniziativis di chest an mi incuriosìs il concors di cine curt e l'apontament cu lis machinis e lis motos di une volte che al sarà doman.
Tancj compliments a Diana che si dâ une vore di fâ par cheste manifestazion.

05 settembre 2008

Gnûf libri par imparâ il furlan

Il Cuf, consorzi universitari furlan, al presente il gnûf libri di Stefania Garlatti-Costa e Roberta Melchior. Il test al è un cors par imparâ il furlan: cui che al à voie di vê informazions al pues contatâ il consorzi, fracant chi.
Chi us met il test dal comunicât stampe.
Compliments al editôr e a lis autoris.

03 settembre 2008

Chiara cu la Patrie

Aprofitant de biele fieste che la frazion di Cjavalì di Tavagnà i à dedicât, o soi lât a puartâ la Patrie dal Friûl a Chiara Cainero (te foto cun in man il numar de Patrie di Avost 2008), che o vevin intervistât prime des Olimpiadis.
Cuant che jo e la Ninine i vin dit che la Redazion de Patrie e jere braurose di vêi puartât ben cun chê interviste, nus à ringraziât!
E noaltris o ringraziìn jê pe biele sodisfazion sportive che e à regalât a dut il Friûl!

02 settembre 2008

Rally di Maian

Chest al è il percors dal Rally di Maian che si corarà ai 20 di Setembar.
Compliments al Gnut e a la Pro Majano par vê puartât inmò une volte chest event!

01 settembre 2008

Dree sul Gazzettino

Se a cualchidun i fos scjampade, ai 21 di Avost e je vignude fûr une biele intervistute al Dree (te foto) sul Gazzettino. Te pagjine si fevelave di furlan e imigrâts, che a imparin la nestre lenghe cence tancj prejudizis.
Dongje, il Dree al dîs la sô a coment dal articul principâl. Oltri che pai contignûts, la interviste e je biele parcè che mi somee che e sedi la prime volte che al vegni publicât suntun cuotidian un articul par furlan e talian, cence tancj fastidis o fufignis.
Chi l'articul di vierzidure e chi la interviste dal Dree.