30 novembre 2008

29 novembre 2008

I 20 agns dal Istitût ladin furlan

Vinars ai 5 di Dicembar h. 20.30 a Cjase Turoldo di Coder di Sedean FIESTE pai 20 agns di ativitât dal Istitût Ladin Furlan “Pre Checo Placerean”.
Intant de serade si podarà sintî la vive vôs di pre Checo (te foto) cuant che, tal Istât dal 1976, dopo dal taramot, al fevelà a Aquilee cuntun discors memorabil.
Fracait chi par lei dut il program.

28 novembre 2008

Cui vinçaraial chest an?

A tornin il Premi Friûl e la rassegne Musiche dal Comun di Udin. Dal sigûr chest al è un dai apontaments plui impuartants pe Musiche furlane li che si sint gnovis propuestis e confermis di sigûr valôr. L'an passât, il Premi Friûl 2007 al è stât vinçût di R.esistence in Dub (fracait chi par gjoldisi une biele cerce de lôr musiche) e chi sot us met un lôr toc live di chê sere. Apontament duncje al Palamostre a Udin usgnot e doman a lis 9 di sere.

27 novembre 2008

Grignei di scuele

De mestre Lorele la Morete us ai za fevelât.
Ma stant che secont me la scuele e je un argoment fondamentâl par lavorâ in teme di tutele de lenghe furlane, mi plâs presenta ancje a voaltris chest biel progjet de scuele di Codroip.
Grignei di scuele che e dopre un blog come imprest didatic ancje par furlan: compliments a la mestre Lorele e bulos ducj chei fruts che si son butâts te Rêt.

E se us interesse di lei cualchi biele considerazion su la scuele, scrite di pre Antoni Beline, us torni a visâ di dismenteâsi di "Une scuele pai furlans" o il speciâl de Patrie di Otubar 2007 dedicât propit a chest argoment (te foto la cuviertine).

26 novembre 2008

O deventi barbe!

Îr o ai stât a cjatâ mê sûr e stant che al jere un tic di timp che o volevi dîlu, cumò lu dîs: o deventi barbe!
O soi contenton!
Al è inmò ce spietâ, ma cumò si tache ancje viodi un pocje di panzute :)
Mê sûr mi à ancje dit che no volaran savê se e sarà une frute o se al sarà un frut: l'impuartant al è che e/al stedi ben e jo o condivît cheste idee.
Auguris duncje a la future mame, al futûr papà e a la future gneçute o futûr nevodut.

25 novembre 2008

Zornade cuintri de violence su lis feminis

Vuê o torni a proponi un test che o vevi scrit l'an passât... parcè che ciertis robis a restin simpri validis.
O dedichi ancje jo un pinsîr a la zornade internazionâl cuintri de violence su lis feminis.
Lis statistichis a disin che in Italie une femine su trê e patìs violence (lei dut l'articul sul Corriere).
Sperant che nol vedi mai di coventâ, o segnali a dutis lis feminis che a lei chest blog, un servizi che ur dâ la pussibilitât di cjatâ cualchidun che lis scolti. No stait a tignî dentri ciertis robis brutis che us àn fat: ancje se al pues semeâus dificil, insormontabil, o vês di denunciâ cui che us à fat e us fâs dal mâl.
Parcè che se cualchidun al alce lis mans (no dome tal sens fisic: tantis altris a son lis formis di violence) su lis feminis, nol merte nissun dûl o justificazion... nol merte nancje di jessi clamât om.

22 novembre 2008

Pre Toni e Don Milani

La Morete nus segnale une serade cuntun arlêf di don Lorenzo Milani (te foto di Wikipedia). Ancje pre Toni al veve spes iniments chest predi che al veve fondade une scuele a Barbiana. Jo us segnali Trilogjie tormentade, un libri (premi Sant Simon 1999) che pre Toni al à scrit su don Milani, Oscar Wilde e Pieri Pauli Pasolini.

21 novembre 2008

Consei comunâl

La setemane che e ven al è consei comunâl. Tra i diviers ponts tal ordin dal dì o vin in particolâr la jentrade dal conseîr che al cjaparà il puest di puar Enrico e une propueste di IntesaperMajano par fermâ la cuistion dal recupar dal Ospedâl di Sant Zuan a Sant Tomâs. A pene che sul sît dal comun e sarà publicade la convocazion, o fasarai un link.

Ve chi la convocazion dal consei comunâl.

19 novembre 2008

No taiâ la lenghe

Il Comitât 482 al à scrit un comunicât comentant la propueste che e jere stade fate di bande dal consei regjonâl in mert a la riduzion des spesis dal consei. Cun plasê o publichi cheste note dal Comitât e o ricjapi un biel post di Sandri che nus fâs capî ce che al significhe che in Friûl a son plui lenghis (come che si viôt te foto).

18 novembre 2008

Furlan in TV par mût di dî

Alc nus veve za dit Luca a proposit dal Tg realizât de Provincie di Pordenon. Jo mi soi permetût di lâ a viodi plui a fonts ce iniziative che e jere e o ai scrit un articul publicât su Il Friuli di vinars ai 14 di Novembar dal 2008.
Te foto: Elena Zanussi, la sporteliste de Provincie di Pordenon che une vore ben e à conduzût par furlan il notiziari in cuistion.

17 novembre 2008

Leçs raziâls

Par cui che al ves cualchi dubi o no si fos fat un judizi clâr sul Fassisim... o segnali che vuê a colin i 70 agns de promulgazion de decret dal re pe difese da la raze taliane che si zonte a altris documents che jo personalmentri no rivi a justificâ. par cheste e altris motivazions o condani cence "se" e cence "ma" il Fassisim e mi vegnin i sgrisui cuant che o sint ciertis declarazions che a nasin un tic di nostalgjie cence une condane ferme.

16 novembre 2008

In ricuart di cui che nol è plui


Vuê si ricuardin lis vitimis de strade. Come ducj o ai ancje jo personis che a son partidis e no son plui tornadis parcè che la lôr strade si è fermade. E vuê, ma no dome vuê, come l'an passât, un pinsîr al è par lôr, par che lis fameis e i amîs no vedin plui di patî la mancjance di une muart su la strade: un apel a ducj par evitâ lis muarts des stradis.

15 novembre 2008

Ator di me

Alessandro Venuti mi à mandât l'invît par cheste mostre su Renato Mertens che si fasarà a Colorêt in Cjistiel.
Jo lu ringrazii par vêmi visât e o slargji l'invît a ducj i letôrs dal blog.
Par altris info: fracait chi.
(te foto un biel crocifìs)

13 novembre 2008

Lenghe furlane a Triest

MINI-MU Parc dai frutins di Sant Zuan
v. E. Weiss, 15 – trieste – tel 040392113 – info@mini-mu.it

Us segnali cheste iniziative che si tignarà a Triest:
Provincie di Triest Aziende pai Sarvizis Sanitaris Triestine N.1 Grop Imagjine di Triest

Inaugurazion Sabide ai 15 di novembar 2008 aes 17

Mini-Mu
tant che plui piçul
tant che piçul museu
tant che piçul munari
tant che Parc dai frutins Sant Zuan là che no si fâs nuie
tant che museu mitût adun dai frutins

aes 17.15 A tachin i salûts
Maria Teresa Bassa Poropat
Presidente de Provincie di Triest

Franco Rotelli
Diretôr de Aziende Sanitarie Triestine n.1

Maurizio Fanni
President dal Grop Imagjine

aes 17.30 Elena Bertocchi:
Presentazion di Mini-Mu
fare dal nulla mostre di voris di Bruno Munari
te colezion di Adalberto Mestre

Intervents di artiscj

Esplorazions di colôr

Mini-Mu e promôf une dinamiche educative che:

e da al frut e ai plui zovins une funzion centâl e ative te gjestion dal imparâ
e môf la naturâl curiositât dai fruts e dai zovins lant daûr a la lôr voie di scuverte dal mont e di sè e e ufrìs ocasions par incressi la lôr imagjinazion e creativitât
e coinvolç la famee tes ativitâs di istruzion e di zûc e je cetant atente ai dibusgns e ai interès no dome dai fruts ma ancje de lôr comunitât, brincant gnûfs obietîfs e tacantsi ai stimui culturâi dal tessût socjâl tal cuâl e si poe


Domenie ai 16 di novembar 2008 aes 10

Une zornade al Mini-Mu cun Riccardo Dalisi


Presentazion dal catalic de mostre “Tra i Vetri” (omaggio a Bruno Munari) “ cu lis esperiencis creativis di Adriano Bon, Bruno Chersicla, Isidoro Dalcol, Riccardo Dalisi, Matteo Fanni Canelles, Gruppo &, Paolo Cervi Kervischer, Jasna Merkù, Enzo Navarra, Renzo Possenelli, Mario Sillani, Studio Openspace, Giorgio Valvassori, Franco Vecchiet

Presentazion dal libri di Riccardo Dalisi: “lo schizzismo”, Editore Corraini, 2008

Laboratoris cun Riccardo Dalisi che al larâ indenant ancje tal dopodimisdì

Dalisi si è indreçât ai frutins, ai fruts e ai students dal cuartîr Traiano a Napoli, sogjets inmò libars dal condizionament e in stât di vê un sintî gjenuin e dret su la realtât e di rispuindi a ce che ju coinvolç cun animazion, intun rapuart difarent jenfri l’om e lis tecnichis e jenfri la culture e la creativitât.

Di resint (2008) Dalisi al à elaborade la tecniche dai schiribiçs par produsi sponte, ideis e visions che e van oltri la dibisugne di clarece e di coerente dal sogjet, di grant interès tant che metodi indreçât ai procès educatîfs dai zovins che a son in situazion di disasi. Al à publicade cheste metodologjie cul editôr Corraini.

Sostegn
Regjon Autonome Friûl - Vignesie Julie, Cassa di Risparmio del Friuli - Venezia Giulia, Assicurazioni Generali, Cooperative Operaie di Trieste Istria e Friuli

Patrocini
Comun di Triest
Ministeri de Istruzion, de Universitât e de Ricercje
Ufici Scolastic de regjon dal Friûl - Vignesie Julie; Direzion Gjenerâl

Disastris!

Vuê us segnali une notizie pardabon avilente che e je sucedude dongje Spilimberc e che o ai let sul blog de Ninine.
Dal sigûr al è impuartant dâ un bon servizi di racuelte des scovacis, fâ funzionâ i ospedâi, asfaltâ lis stradis, ma se i aministradôrs publics a vessin di viodi dome di pocets, tombins, asfalts, e vie indevant... nol coventarès un consei comunâl: al bastarès dopleâ l'ufici tecnic e nomenâ un bon comissari. Se la classe dirigjente si permet di butâ vie lis lidrîs, al è dibant programâ l'avignî: nol è doman par un popul cence memorie.

Te foto di Wikipedia: Aquilee.

12 novembre 2008

Da la malte al malto

Grazie a Mauro Missane che lu à intervistât par radio e ai Fantats furlans, o ai savût che esist al Bire di Meni.
Ce aie di particolâr?
Che e je artesanâl.
Che e je furlane.
Che il so produtôr (Domenico "Meni" Francescon) al à inventât plui cualitâts.
Che il so produtôr ur à dât il non des borgadis di Cjavàs.
Che il so produtôr al è masse fuart: al faseve il muradôr e cumò al fâs bire: "da la malte al malto"!
Ma soredut... che e je buine!
Prosit!!!

11 novembre 2008

Campagne abonaments

Vuelistu jessi simpri inzornât su ce che al sucêt ta chest blog? Ti someial util (tal ben o tal mâl) di viodi ce che o cumbini? Po ben, se la rispueste e je "sì", alore aboniti! Cemût? Baste che tu ti iscrivis fracant chi!
Grazie a chei che lu àn za fat e a chei che lu fasaran!

10 novembre 2008

La Arlef che mi plasarès...

Checo un pôc mi dâ cuintri, un pôc mi fâs i compliments... no sai ce dî... però mi à dât la ocasion di proponi une robe che mi balinave za tal cjâf e o vierç cussì la discussion domandant a voaltris cualchi propueste pe Arlef. Une racomandazion: chest al è un zûc e la Arlef e à za un organisim che al varà di proponi lis liniis de politiche linguistiche, ven a dî il Comitât Tecnic Sientific, che al varà di proponi a Cda i progjets miôr pe valorizazion de lenghe furlane. Però a mi mi interesse di capî ce che i letôrs dal blog a volaressin viodi fat di bande de Arlef. A mi mi bastarès viodi metude in vore dute la normative in cont di tutele linguistiche: al sarès za un bon risultât cence scugnî lâ a cirî novitâts... Ma cumò vonde fevelât jo: us tocje a voaltris... ca che a vegnin lis ideis!

09 novembre 2008

Aldo in onde

Come che nus vise ancje lui, Aldo Rossi al sarà martars ai 11 di Novembar ator pes radio par presentâ il so prossim CD "Curtis, ghitaris e curtìs".

aes 10.30 in direte a Radio Onde Furlane cun Pauli Kantarut
aes 14.00 in direte a RAI Radio1 Regjon cun Tullio Durigon
aes 16.00 regjistrazion a RadioSpazio103 cun Marco Tempo

In spiete di sintî ce che al con(cjan)tarà, us torni a segnalâ chê che secont me e je une des cjançons plui bielis che Aldo al à fat, ma ancje che jo o vedi sintût. E o ai vût l'onôr di scoltâ in anteprime, une sere Lui: A là sù.

07 novembre 2008

Il diari di Tosoni

Un grazie a Stefano Gasti che sul ultin numar dal Diari al fâs un servizi sul gno blog, fevelant dal prin post su lis nominis dal Cda de Arlef.
Par lei dut il numar, o che o lais a cjoli une copie di cjarte o che o discjamais il pdf: fracait chi.

06 novembre 2008

Il Fogolâf furlan di Gjenue

Vuê o saludi il gno amì Daniele Martina (te foto, il secont in pîts a drete) e ducj i furlans di Gjenue che joibe passade si son cjatâts par fâ fieste cul lôr president Primo Sangoi, che al à fat 76 agns (te foto, Primo al è cu la golarine). Tancj auguris!

05 novembre 2008

Designazion de Provincie di Udin tal Cda ArLef

Usgnot o ai voie di condividi cun ducj voaltris letôrs di chest blog une biele notizie che mi rivuarde... vuê o ai ritirât il decret firmât dal president Pietro Fontanini: la Provincie di Udin mi à designât so rapresentant dal Consei di Aministrazion de Agjenzie Regjonâl pe Lenghe furlane.
Prin di dut o ringrazii il president Fontanini che a sorprese mi à proponût. In veretât no me spietavi e o dîs cun emozion che cheste designazion mi fâs pardabon, ma pardabon, un grant plasê. Par me e je une biele gratificazion e o speri di jessi a la altece di cheste grande responsabilitât. O ai za visât lis personis che mi son plui dongje: unic displasê al è di no vê podût condivi cheste notizie cun pre Antoni Beline, ma o sai che di là sù lu à za savût ancje lui.
Come che o vevi za dit cualchi dì indaûr, la Regjon e à za fat lis sôs nominis. Cumò al mancje dome il rapresentant de Anci. Di fat o fâs une piçule retifiche, stant che mi somee che pe Universitât al sedi il prof. Roberto Dapit e i components che a rapresentin la provincie di Pordenon (scjadince tal 2009) e la provincie di Gurize (scjadince tal 2011) a restin in carghe fint che al dure il mandât dal ent che ju à nomenâts.
Stant che cualchidun al domandave, come chel al è just, di cognossi il curriculum dai components dal Cda, o speri che almancul su la mê persone i letôrs di chest blog a vedin avonde informazions... se no: o soi chi!

04 novembre 2008

Racuelte diferenziade, la serade di Farle

Sucès di partecipazion al prin incuintri ilustratîf dal gnûf sisteme di racuelte diferenziade (grazie a Ranieri pe foto).
Us visi che il gnûf sisteme al tacarà ai 10 di Novembar: fint chê dì a continuin i incuintris e usgnot i tocje a Cjasesole cun Sant Salvadôr, simpri a 8 e mieze.

03 novembre 2008

Sintude in curve

Lunis zornade di coments sportîf e duncje cemût no comentâ il 2 a 2 dal Udin cul Gjenue. Tra lis scuadris rivadis in Friûl, cuasi ducj a àn dit che il Gjenue e je someade la plui ben organizade e, ancje se une vitorie nus varès tignûts bessôi parsore di ducj, nus è lade ben di puartâ a cjase un pont, stant che dopo il rigôr o sin lâts sot di 2. Ma o sin inmò là sù: gjoldìnsi il secont puest e il Milan al è dome a un pont!
Ma plui che di ce che al è sucedût su la jerbe, mi plâs ricuardâ ce che o ai sintût in curve...
A part lis tantis acuilutis zalis che a svolin su font blu, come pal solit si pues individuâ un gjenar ben definît di tifôs furlan: chel che al comente cence polse lis azions (pal solit metint in evidence i aspiets negatîfs) e che al varès simpri une soluzion ancje par cuant che magari lis robis no van tant ben, nancje che al fos il Grant Ct par antonomasie. A chest proposit, dopo che un nestri zuiadôr al veve passât la bale, ma in maniere no propit precise, si è alçât sù e al à berghelât viers la panchine in maniere che il nestri alenadôr al sintìs il so sugjeriment a proposit dal zuiadôr: "Butilu ta la plastiche!" al à vosât. Ce dî di plui: se no altri il sens civic de tifoserie al è cressût: une volte, cuant che o jeri piçul e gno pari mi menave in tribune a viodi l'Udin o sintivi a colâ dome "Sants, madonis e signôrs"... cumò almancul ti insegnin un tic di racuelte diferenziade...

Par savênt di plui sul Udin e il campionât, apontament su Radio Onde Furlane vuê a 9 e mieze di buinore cun "Un blanc e un neri" e cun Enrico Turloni joibe cu la trasmission "Il Balon al è di ducj" da lis 4 fint 5 dopomisdì.

02 novembre 2008

Pieripauli 02/11/1975-02/11/2008

PPP
Fint che al jere vîf, al deve fastidi a plui di cualchidun.
33 agns indaûr lu àn copât.
Cumò che nol è plui vîf, al continue a dâ fastidi a plui di cualchidun.
Ma no puedin plui copâlu.

"A vignarà ben il dì che il Friul al si inecuarzarà di vei na storia, un passat, na tradizion!..."
[furlan di Pier Paolo Pasolini]

01 novembre 2008

Pat pal Furlanist

Dopo il Pat in difese de Universitât, viodût l'ultin post dal Dree (te foto), o proclami la iniziative popolât par evitâ la sieradure dal prin blog fûr par fûr par furlan:

Pat pal Furlanist!
Se ancje tu che tu leis chest blog, ma prime tu jeris un letôr ancje dal Furlanist, lasse chi un coment cun scrit "PAT PAL FURLANIST: DREE RESTE IN LINIE" (che tra l'altri al è ancje un invît a no meti sù masse chilos...).
Cun di plui, o podês mandâ une mail cul stes messaç: "PAT PAL FURLANIST: DREE RESTE IN LINIE" a ilfurlanist[gubanute]gmail[pont]com


La coce dai nuviçs

Mê sûr e gno cugnât si son dât a la sculture... di cocis!
Ve ca il risultât de lôr fadie!