31 dicembre 2009

Auguris a ducj!

O speri che l'an che si siere, ancje se tra dificoltâts, us sedi lât avonde ben, ma la sperance e l'auguri plui grant che o fâs a ducj i letôrs di chest blog, e no dome, al è che il 2010 al vadi inmò miôr.
Intant che Gioele al finìs di mangjâ lis balutis dal arbul di Nadâl, o cor a viodi che nol vedi za frontât ancje cualchi pipin tal presepi...
O sieri rinovant a ducj voaltris e a lis personis che ur volês ben, i miei auguris par un 2010 di pâs, salût, sodisfazions e che il mont dulà che o sin al torni a scuvierzi il valôr dal rispiet par chei altris.
Che i vuestris siums a podedin deventâ realtât.
Tancj auguris

30 dicembre 2009

Il rispiet pe muart esistial inmò?

La dì di Nadâl al è muart Carlo Sgorlon. E îr al è stât il so funerâl.
Ce che mi avilìs al è chest tentatîf che plui di cualchidun al cîr di fâ par impiâ la polemiche su la pocje o tante partecipazion di int al so funerâl.
Jo no ai stât e dome vuê o scrîf di lui. No soi stât un so letôr ancje se nissun pues meti in discussion la sô opare che lu fâs un dai scritôrs talians plui innomenâts dal Nûfcent.
Si pues ancje no jessi dacuardi, e jo tra chescj, cu la sô concezion dal furlan (mi somee che, pûr scrivint tant dal Friûl, nol ves vude tante stime de lenghe furlane, che par tant timp al veve fadiât a considerâle "lenghe"... ancje se, leint i gjornâi di vuê, o ai cjatât une declarazion di Federico Rossi che al dîs che al ves gambiade idee... no sai ce pensâ, mi documentarai miôr).
Ma cumò nol è il moment des polemichis tra chei a pro e chei cuintri, des recriminazions, de conte di "cui che al jere e cui che nol jere": cuant che al mûr un om, al lasse simpri un vueit e se la sô e jere une "vôs de culture", il cidin che al lasse al pese.
E mi fâs tant mâl viodi che chest "vueit" al jemple simpri di plui une societât che no je buine di vê rispiet nancje denant de muart, e, invezit di stâ cidine almancul in cierts moments, e vuache dibant.

26 dicembre 2009

Realtât industriâl, pagjine 62

Realtât industriâl al è il periodic di Confindustrie di Udin. Sul numar di Novembar e jere une interviste al president regjonâl Calligaris che al fevelave di "Furlan vs Inglês" cuasi che a fossin robe di metile une cuintri di chê altre. Alore o ai cjapade "cjarte e pene" e o ai scrit une mail a Confindustrie che e à publicât sul numar di Dicembar la mê e altris protestis.
Par lâ a lei, fracait su chest link e lait a pagjine 62.

Simpri su chest argoment, us segnali ancje chescj 2 links:
Adriano Luci, su La Patrie di Novembar 2008
Franco Finco, su La Patrie di Otubar 2009
Arnalt Baracêt, su La Patrie di Novembar 2009
Franco Soldati, su La Patrie di Dicembar 2009

25 dicembre 2009

Bon Nadâl e che Diu us dei dal ben, par chest an e par chel cu ven

Preiere di Nadâl
Ven jù Signôr
dal to cîl di glorie,
ven a comedâ la nestre storie.

Ven jù Signôr
in cheste puare tiere,
là che a regnin
svindic, fam e vuere.

Ven jù Signôr
a sfantâ la pôre e il scûr,
a morestâ e a sclipî il nestri cûr.

Ven jù ancje vuê
come chê dì a Betlem,
ven a viodi dal puar
e di chel che al zem.

Ven jù in chest mont
simpri plui forest:
dome cu la tô gracie
si podarà meti in sest.

Ven jù Signôr
dal to biel cîl stelât,
ven a viodi dal mont
che al è malât.

Ven jù Signôr
a fânus il grant regâl
dal perdon e de pâs
come tal prin Nadâl.

pre Antoni Beline

19 dicembre 2009

Floc di nêf


Figade!!! Vuê mi soi jevât e o ai dât un cuc fûr dal barcon: dut blanc e nêf che continue a vignî jù!
Alore o vevi pensât di meti ancje jo une biele foto cu la neveade, ma intant che o mateavi cun Feisbûc o ai brincade cheste foto di un "flocut di nêf batiât" juste domenie passade: ve chi Gioele, il gno superfigo nevodut intant che al smicje don Giuliano prime che i resenti il cjavut [pe cronache: al è stât bravin, Gioele al à molade dome une vuicade, ma o scoment che dopo cualchi zornade di fiere, plui di cualchidun al varès bruntulât par une lavade di cjâf cu la aghe frede =)...]
Bon, intant buine neveade a ducj e cumò o voi a balonâlu! =P

ps: e no stâit a dî "viôt li ce barbe, piês dal nevôt!"... parcè che e je vere! eheh!!!
pps: grazie a Ranieri pe foto!

18 dicembre 2009

Internet libar!

Us segnali doi intervents: un sul blog di Aldo Rossi (di pôc laureât cun tesi "Marketing in Marilenghe", compliments!!!) e un dal prof. Francesco Pira, docent a Relazions publichis a Gurize.
Une frase mi à plasût in particolâr tal articul dal prof. Pira: "E credo che molte persone, le stesse che criticano i social network , e una larga parte della classe politica del nostro paese non siano mai entrati effettivamente in un social network. Non sanno neanche come sia fatto".
O soi dacuardi al 100%: di fat, masse int spes su chescj argoments e fevele di bant, cence savê di ce che e fevele!
Internet al à di restâ libar!

Fracait chi par lei il post di Aldo e fracait chi par lei la interviste al prof. Pira.

17 dicembre 2009

Grazie Dreetôr

E je jessude la Patrie dal Friûl di Dicembar (www.lapatriedalfriul.org).
Jo no fâs tancj coments, ma mi sint di dî dome GRAZIE DI CÛR a Dree Venier par dut ce che mi à insegnât, no dome come gjornalist ma ancje dal pont di viste uman.

15 dicembre 2009

Alè Udin, in Internet ancje par furlan!

Finalmentri realtât! Lu vevi anunciât cun sodisfazion un mesut indaûr e cumò di cualchi dì si pues lei il gnûf sît dal Udin (http://www.udinese.it/) ancje par furlan.
Cheste biele gnove però e je un tic fuscade dai risultâts che pal moment a son propit jù...
Dut câs, Alè Udin e par cheste iniziative, che e somee vê grant sucès, tancj compliments!
(foto gjavade dal sît www.udinese.it)

10 dicembre 2009

10 agns de Leç 489/99

La prossime setemane a colin i 10 agns de leç 482/99.
Pe ocasion la Universitât dal Friûl, il centri interdipartimentâl pal plurilinguisim, e à inmaneât une cunvigne su scuele e publiche aministrazion.
Lait a lei chi dut il program.

Viodint i clârs di lune che si presentin, plui che di complean, chest aniversari mi sa di requiem...

Conciert di Nadâl

Ve ca il volantin dal tradizionâl conciert di Nadâl fat de corâl di Maian. Apontament par sabide ai 12 di Dicembar in Glesie a Maian a lis 20.45.
Di no pierdi!

09 dicembre 2009

Piçul cu la fiere

E dopo cualchi zornade di cidin, ve chi che o torni a postâ, ma par une notizie no tant biele: il piçul Gioele al è plen di fiere e ancje sô mari no scherce.
Sù sù che ca di cualchi zornade o vin di fâ fieste!

03 dicembre 2009

01 dicembre 2009

La infrastruture che e covente di plui

Sabide e je vignude fûr La Vita Cattolica, setemanâl diocesan di Udin diret di Ezio Gosgnach.
Il so editoriâl al tache cussì:
"Lu à dit e fat capî plui voltis il president de Regjon, Renzo Tondo; lu à confermât a claris letaris l'assessôr a la Culture, Roberto Molinaro, intun incuintri resint su la metude in vore de leç di tutele: la valorizazion de lenghe furlane no je tra lis prioritâts de atuâl Zonte dal Friûl-Vignesie Julie. Massime in timps di ristretecis economichis. Par tant, te finanziarie pal 2010, li za scjarsis risorsis pe lenghe furlane a varan un tai dal 20%". [...]

Continuait a lei l'editoriâl di Ezio Gosgnach sul blog di Simone.

30 novembre 2009

29 novembre 2009

No al nucleâr

Al è di un pôc che si torne a sintî a fevelâ di nucleâr. Jo no soi un espert, ma se o ai di scoltâ o preferìs afidâmi a chei che a san: alore us segnali no dome chest video chi sot, ma ancje a lis peraulis di Carlo Rubbia.
Par risolvi il probleme de energjie, secont il premi Nobel pe fisiche Carlo Rubbia, si à di rivoluzionâ dal dut la strade. "In ce maniere? Taiant il grop gordian e tacant a cjalâ intune altre direzion. Parcè che di une bande, cui combustibii fossii, o vin i problemis ambientâi che a menacin di fânus scherçs une vore bruts. E se di chê altre bande o cjalìn al nucleâr, si inacuarzìn che o sin di front a lis stessis dificoltâts no risolvudis di un cuart di secul indaûr. La strade prometent e je pluitost chê de energjie solâr, che e je daûr a cressi cuntun ritmi dal 40% ogni an tal mont e e dimostre di savê risolvi i problemis tecnics che i capitin denant. Clâr che no feveli de Italie. I paîs li che si concientrin i progrès a son altris: Spagne, Cile, Messico, Cine, Indie, Gjermanie, Stâts Unîts".
Par lei il rest de interviste, fracait chi.

25 novembre 2009

Mostre dal Cine

Vuê e tache la mostre dal Cine, no dome par furlan, ma in calendari a son ancje films di altris minorancis europeanis.
Tra chei par furlan al sarà ancje "Jo o ai voie di jessi un vuerîr" che us propon chi sot e che al nas di une conte dai fruts de scuele materne di Maian.
Un grazie a Luca e Marco (fracait chi par scoltâ la sô spiegazion) che le àn fate deventâ un video.

24 novembre 2009

Dinosaurs sot dai puartis a Udin!

Tai prossins dîs cui che al passarà par Udin al podarà viodi stranis olmis sot dai puartis: olmis di dinosaurs. «I dinosaurs sono estints? No, a rivin in librarie!» al è il sproc che al compagne la jessude de prime racuelte da «I Gnognosaurs», fumut in lenghe furlane nassût de fantasie dal ilustradôr Andrea “Dree” Venier. Sabide ai 28 di Novembar il sproc al devente realtât e il volum al sarà presentât li de librarie Ribis di Udin a lis 5 dopomisdì. I protagoniscj a son simpatics dinosaurs che a fevelin par furlan e che lis lôr aventuris a son publicadis a strichis su Alc&Cè, riviste par fruts in alegât a La Vita Cattolica. Chescj piçui erois dal Jurassic a àn la carataristiche di jessi propit gnognos, e di chest e nas dute une schirie di gags spiritosis e sureâls. I dissens a son une vore colorâts, cun trat sintetic e une vore personâl. Il volum al è publicât de cjase editore “L'Omino Rosso” di Pordenon, specializade in leterature par fruts. Pal apontament al sarà presint il president de Arlef (Agjenzie Regjonâl pe Lenghe Furlane) Loreno Zanon, Sandri Di Suald, creadôr di Tarvos, il prin fumut par furlan, l'autôr Dree Venier e la senegjadore Elisabetta Pittana. Par dute la durade dal event Dree Venier al sarà disponibil par fâ lis “dedicacès”, (tiermin francês che al significhe dedichis autografis dissegnadis) a cui che al volarà comprâ il libri. Une ocasion di no pierdi par cui che al vûl un libri “grifât” di persone di un autôr e par viodilu in vore intant che al dissegne.
Il debut in librarie al è stât anunciât di une promozion inovative su Internet, midiant dai cussì clamâts “social network”: misteriosis emails, cun olmis di dinosaurs che a fasevin intuî che alc al veve di sucedi, a àn precedût la scree di un blog dedicât (www.gnognosaurs.blogspot.com) li che si puedin cjatâ zûcs, strichis ineditis, indicazions par gadgets omaç di ritirâ in diviers ponts dal Friûl e discjamâ contignûts difarents. Po i “Gnognos” a son sbarcjâts ancje sul innomenât Facebook cun, par esempli, il quiz “Ce Gnogno sêstu?” e midiant di altris aplicazions dopradis tra i utents dal “social network” plui famôs. Cui disial che il furlan nol cjale al avignî? I Gnognosaurs lu fasin, ancje se a vegnin dal Jurassic.

23 novembre 2009

Consei comunâl

Al è convocât par joibe ai 26 di Novembar aes 6 e mieze di sere il Consei Comunâl.
Tra i tancj ponts dal ordin dal dì, lis dimissions di Antonio Pesenato.
Par lei dut l'ordin dal dì, fracait chi.

22 novembre 2009

Jude, il tradutôr che ti jude

Come che si dîs spes "tradusi" al è cuasi "tradî" parcè che dispès al devente dificil mantignî il stes savôr dal test in lenghe origjinâl rispiet a chê de traduzion. Forsit al è ancje par chest che i creadôrs dal prin tradutôr automatic a àn sielt come non "Jude", realizât cence nissun contribût public.
L'imprest informatic realizât de Serling al sarà presentât in curt pal public: l'apontament al è par martars 1 di Dicembar aes 18.00 a Udin, li de sale de Fondazion CRUP, in vie Manin 15.
Par savênt di plui, fracait achì.

17 novembre 2009

16 novembre 2009

Il blog dai Gnognosaurs

Dopo des mails misteriosis de setemane passade, ve ca scuviert il misteri: a son tornâts i Gnognosaurs e a àn viert un lôr blog, lait a viodi chi gnognosaurs.blogspot.com.

15 novembre 2009

Dopo lis mails, lis letaris

A son zornadis di corispondencis... dopo des mails che mi son rivadis te pueste eletroniche, vuê o vierç il gjornâl e o cjati 2 letaris di doi di Maian che da lis pagjinis dal cuotidian a mandi messaçs ancje al Sindic e a la Zonte comunâl.
Tai coments us met lis 2 letaris.

Inmò une mail strane

O ai ricevude ancjemò une mail strane... ve ca:

Date: 14 novembre 2009 14.39
Oggetto: DINOSAURS: LIS VÔS A VAN INDEVANT


Ve chi l'imagjine di cualchi fossil dal Jurassic cjatât ta lis montagnis dal Friûl.
Dut al fasarès pensâ che i dinosaurs a sedin aromai nome piere di meti intun museu.
Ma lis vôs parsore di une lor tornade a van indevant a slargjâsi.
Ce sucedial?
E ce isal chel vues a tre pontis parsore dal cjâf di chest scheletri, e il cuar sul music di chel altri?
Par savêlu, spietait ancjemò un pôc: il misteri nol restarà misteriôs tant a lunc.

14 novembre 2009

Isal vuarît?

Une strane mail plene di olmis


Vuê o ai vierte la pueste eletroniche e o ai cjatade cheste mail tant strane e che us propon chi sot...

Date: 13 novembre 2009 14.52
Oggetto: OLMIS

Ise propit vere che i dinosaurs a son estints? Nô o crodìn di no.
Dispès, tai ultins dîs, a nus an segnalât ator par Udin e pardut il Friûl, segnos dal passaç di cualchi forme di vite preistoriche. Simpri plui int e dîs di vê viodût cualchi esemplâr di une strane specie di dinosaurs, che a si distinguin par jessi particolarmentri dordei.
Cui sono? Dulà si platino?
Dutis chestis domandis a stan par cjatâ une rispueste. Doman, un gnûf inzornament.

13 novembre 2009

Jo o stoi cul Sunsplash

Jo no justifichi e no justificarai mai cui che al consume droghe. Ma fâ di dut par parâ vie un event mondiâl che fint al 2009 si è fat a Osôf, come il Sunsplash, mi somee un grant autogôl.
In tancj agns e je stade arestade tante int par droghe (tignìn presint che però a son stadis miârs e miârs di personis ogni an e duncje i numars a van contestualizâts), ma acusâ l'event di jessi un festival des sostancis stupefacentis mi somee strumentâl e ideologjic, une posizion cjamade di prejudizis. Alore sono di sierâ dutis lis ostariis, lis fiestis di paîs, lis sagris, cu la acuse di favorî il consum di alcul? E ce dî dai concierts e des discotechis?
E mi fâs ancje avonde ridi la mode di tancj politics di metisi a fâ il test de droghe. Nissun mal à domandât a mi, ma no larès a fâlu parcè che mi somee un iniziative propagandistiche, juste par fâsi fotografâ e finî sul gjornâl: juste la setemane passade o ai fat une donazion di plasme in aferesi e sul gno tessarin di donatôr de Afds o soi rivât a cuote 20 (tal 2009 o soi stât 5 voltis: 4 di plasme e 1 di sanc intîr). Nol covente che o disi che se o voi al servizi trafusionâl ancje dome cuntun rafredôr, mi mandin a cjase e no mi fasin donâ sanc... altri che test anti droghe! (fasint une provocazion, parcè dongje dal test antidroghe nol è stât previodût ancje il test su la alcolemie?...)
Dit chest o speri che vuê aes 6 di sere a Udin e sedi tante int pe manifestazion a pro dal Sunsplash!

12 novembre 2009

Un pas a la volte...

Dal sigûr o vês let ducj de notizie che e rivuarde la Arlef e la scuadre di balon dal Udin, che a àn firmât un acuardi par promovi la lenghe furlane (fracait chi par lei il comunicât). Prin pas, la consulence pe version par furlan dal sît www.udinese.it (te foto, gjavade fûr dal sît uficiâl dal Udin o podês viodi il president Franco Soldati cul president de Arlef, Lorenzo Zanon: compliments e grazie a ducj i doi e a la famee Pozzo par cheste firme).
Jo o soi content par tancj motîfs: prin di dut parcè che al è di timp che o speravi ta chest pas. Lu vevi za di tant sugjerît al president dal Udin Soldati e lu ringrazii par cheste sensibilitât. Cence veleitâts di paternitât de idee, o speri tal gno piçul di vê contribuît ancje jo cu lis mês informazions a cjapâ cheste decision.
Po dopo o soi content parcè che cumò l'Udin (scusait ma jo no rivi a clamâle Udinês, mi plâs di plui cussì, come che le ai clamade fin di piçul) al vedi cjapade la strade di grandis scuadris come il Barcelone (che e à il sît prin par catalan) e l'Atletic Bilbao (che lu à par basc).
Par chest, continuant i ringraziaments prin di dut o dîs grazie ai Fantats furlans, che al è di agnorums che a batin su chest argoment e Radio Onde Furlane che e à tacât a fâ dal an passât la trasmission di Enrico Turloni, il Balon al è di ducj.
E grazie ancje al Associazion dal Udinese Club (di chest an e à volût ancje la colaborazion cu La Patrie dal Friûl) e a Friuli nel mondo che di timp a puartin indevant il discors cui tifôs e i emigrâts. Cun di plui, vêso mai viodût il bandieron che al ven tirât sui distints e che al è stât realizât cul contribût de provincie di Udin? Cuant che lu ai viodût dal vêr l'an passât, o soi restât cence flât di trop content che o jeri!
Sierant o ai voie di ringraziâ ancje Massimo Lombardo de agjenzie Alan Norman che e je chê che e cure sedi il sît dal Udin che chel de Arlef, parcè che secont me un rûl lu à vût ancje lui.
Cuant che si lavore insiemit e la idee e je buine, prin o dopo i risultâts a rivin: Alè Udin!!!

11 novembre 2009

25 agns di Bibie par furlan

Vinars aes 11 la Provincie di Udin e ricuarde i 25 agns de presentazion de Bibie par furlan, te traduzion di pre Checo Placerean e pre Antoni Beline (te foto).
Lait a lei chi.

06 novembre 2009

Assemblee publiche a Farle

Joibe ai 12 di Novembar a Farle li dal centri sociâl a lis 20.30 il sindic e la zonte comunâl a sclariran la cuistion sui arlevaments zootecnics e la zone artesanâl che a rivuardin la frazion. Cualchi setemane indaûr ancje la minorance e veve convocât une assemblee par fevelâ di chest.

04 novembre 2009

La retoriche mi stufe

Ancje chest an al è stât celebrât l'aniversari dai 4 di Novembar.
E jo invezit o ai piât il gno stereo e mi soi scoltât dut il dì "Il Soldatin" di Giorgio Ferigo (fracait il link e scoltait cun atenzion).
Mi son vignudis iniment tantis contis di vecjos soldâts furlans che, massime des bandis di Gurize, vie pe prime vuere mondiâl si svantavin di no vê mai trat un colp: o sai di un che al contave adiriture "Trai a chei di là? Ma sêstu mat: no vevi migo voie di becâ gno cusin che al jere aruolât cun chei altris!"

31 ottobre 2009

Votait Straulino in concors al Liet

A saran ancje la ghitare e la vôs di Lino Straulino in concors al Liet Festival, il concors european de musiche des minorancis linguistichis: fracait chi e lait a votâ pal musicist cjargnel!

30 ottobre 2009

Lenghis su la glace sul gnûf “Alc&Cè”

Lis bolps di Bolzan a fevelin todesc, come i lôfs de Val Pusterie; lis civuitis di Alleghe, lis acuilis di Fasse e lis sghiratis di Cortine, ladin; lis acuilis di Pontebe, invezit, furlan. I bulldog dal Piemont a vuachin par ocitan, i leons di Asiago in cimbri. “Alc&Cè”, il gjornalut par fruts dut in lenghe furlane, suplement mensîl dal setemanâl “la Vita Cattolica”, nol da di mat. Chescj animâi a son dutis mascottes di scuadris di hockey su glace. Tal campionât talian di serie A a zuin, di fat, scuadris che a rivin di isulutis linguistichis dal Stivâl. A pandin, duncje, un messaç plurilengâl. Al cjacare di chest miscliçot di lenghis il speciâl dal gnûf numar de riviste che e je realizade cul finanziament de Agjenzie regjonâl pe lenghe furlane e che e torne in edicule sabide ai 31 di Otubar, daspò de pause estive. Cun tantis gnovis. A scomençâ de rubriche Palaç cence segrets, che e fevele di ce che al sucêt tai palaçs de politiche a traviers de vôs dai aministradôrs. Si tache dal Senât cuntune interviste a Mario Pittoni. Ambient in prin plan cun Barbe arbul al conte, che al spiegarà la fotosintesi clorofiliane. E par cognossi la storie dal Friûl in pirulis, si puedin lei I siums di Mario, la gnove storie a fumêts di “Alc&Cè”, che e nas de matite di Luca Malisan, prometent disegnadôr di fumuts storics, e colorist, massime pes cjasis editoris francesis.

Po a tornin i Gnognosaurs e Pantiagneur cu lis lôr aventuris a fumets; i zûcs, par divertîsi imparant la lenghe; l’util vocabolari par imagjinis. Di no pierdi lis “Perlis di nature”, cuntune divertente ricognizion sui mûts di dî che a àn par protagoniscj i animâi.
Par sugjeriments e curiositâts sul gjornalut, si pues scrivi une e-mail a Erika Adami, responsabile e coordenadore editoriâl de riviste, ae direzion: adami@lavitacattolica.it

“Alc&Cè” al ven doprât ancje in tantis scuelis de regjon dulà che si insegne la lenghe furlane. I docents che a vuelin ricevilu pai lôr arlêfs, sore nuie, a puedin domandâlu telefonant al numar 0432/242611, mandant un fax al 0432/242600, o une e-mail ae direzion: amministrazione@lavitacattolica.it

I ultins numars dal gjornalut (che al è ancje su Facebook) si puedin scjariâ, in formât pdf, dal sît de “la Vita Cattolica”: www.lavitacattolica.it

25 ottobre 2009

La Patrie si lei on line

I abonâts le àn za ricevude a cjase di cualchi zornade, ma par cui che nol à inmò viodût la ultime jessude da “La Patrie dal Friûl” al pues intant lâ a leisi on line la edizion di Setembar. Di fat ducj i articui dal penultin numar dal mensîl diret di Dree Venier a son visibii sul sît http://www.lapatriedalfriul.org/ dulà che si cjate ancje dut l'archivi dai ultins 3 agns. A Setembar la Patrie e veve dedicât il so “Speciâl” in ocasion di Friuli Doc a “Bire, vin e resentin... da la tiere dal bon bevi a la tiere dal bevi ben”, cuntun voli però ancje al delicât teme dal alcolisim cuntune interviste di Elena Zanussi al prof. Francesco Piani, il diretôr dal Dipartiment des Dipendencis de Aziende pai Servizis Sanitaris n. 4 «Friûl di Mieç», e responsabil de Unitât di Alcologjie.
Ma ancje par Otubar e je on line cualchi anticipazion. Di fat il numar si vierç cul editoriâl in esclusive firmât di Xavier Lamuela, il professôr catalan che al à dade la sô consulence pe definizion e normalizazion de grafie uficiâl de lenghe furlane e che nus fevele dai risultâts otignûts ator pe Europe cuant che si metin in vore plans di politiche linguistiche serie, rivant a recuperâ miârs di locutôrs ancje cuant che une lenghe e someave destinade a disparî.
Il Speciâl di Otubar al è dedicât al teatri par furlan, cuntune interviste di vierzidure di Valentina Pagani a Tarcisio Mizzau, president de Fondazion Teatri “Giovanni da Udine”.
Il numar di Otubar al va indevant tra aprofondiments sul teme teatrâl, ma ancje atualitâl: si segnale in particolâr l'intervent di Franco Finco, espert di linguistiche de Universitât dal Friûl e de Arlef, che cul articul “Se tu sâs il furlan tu imparis l'inglês” al presente un confront tra la lenghe furlane e la lenghe inglese, masse voltis metudis in cuintriposizion strumentâl. Invezit de analis dal dot. Finco a vegnin fûr interessants paragons di nature sintatiche, morfologjiche e fonetiche ancje se lis dôs lenghis a son une vore distantis par origjin, confermant cussì inmò une volte che cognossi plui lenghis, tacant propit de lenghe locâl, come il furlan, al jude a imparâ ben ancje chês altris lenghis forestis, comprindude la lenghe inglese.
Une rispueste sientifiche e provade cui fats a la tante malinformazion che cierte stampe taliane e à fat e e continue a fâ cuintri la lenghe furlane: come che al dîs a chest proposit ancje Dree Valcic tal so intervent “Lenghe furlane sui media talians? Miôr fevelâ di robis seriis”.
Si ricuarde che “La Patrie dal Friûl” si le cjate tes miôr librariis e ediculis o si ricêf a cjase par abonament. Cun di plui, ducj i articui a son disponibii on line tal sît http://www.lapatriedalfriul.org/ cul mês dopo de jessude su cjarte.

22 ottobre 2009

Riunion di Intesa per Majano a Farle

Se no lu vês let, vinars ai 23 di Otubar a lis 8 e cuart di sere e je une riunion a Farle: le à inmaneade Intesa per Majano par fevelâ dai problemis de frazion.
Achì o cjatais cualchi informazion di plui.

20 ottobre 2009

Furlans su Vilaweb TV, cuotidian catalan

Come che us ai za contât, il viaç in Catalagne al è stât une vore interessant. Une des robis che mi àn plasût di plui al è stât viodi e cognossi la redazion di Vilaweb e chi us propon il servizi che la lôr redazion de webtv e à fat su la nestre visite.
Cjalait il video su youtube o la version integrâl sul lôr sît (fracait i 2 links), cussì o sintîs ancje cemût che al sune il catalan.

19 ottobre 2009

Benvignût bons. Mazzocato

La Arcidiocesi di Udin e à un gnûf Arcivescul, bons. Mazzocato che îr al à celebrade la sô prime messe.
Us segnali il test de sô prime predicje, che se ancje al è di Trevîs e nol mastie tant di furlan, al à vude la grande sinsibilitât no dome di fâ une biel intervent, ma ancje di sierâlu doprant lis lenghis de nestre ArUn biel biliet di visite che us torni a proponi.

Cjârs sûrs e fradis, us doi il cûr che mê mari mi à dât e che il Signôr al à
formât. O soi sigûr di cjatâ vierts ancje i vuestris cûrs par cognossisi, volêsi
ben e sostignîsi tant che nus insegne il Vanzeli di Jesù
.

Ma no dome, parcè che il gnûf Arcivescul al à volût saludâ ancje par todesc:

Ich grüße Alle, im Namen des Herrn, auch in deutscher Sprache

ven a stâi “O saludi ducj tal Signôr ancje in lenghe todescje”

e par sloven

Prosim, po slovensko, božiji žegan

ven a stâi “O invochi, par sloven, la benedizion di Diu”), dimostrant atenzion par dutis lis lenghis feveladis te nestre Arcidiocesi.


Mandi a ducj” al à sierât l'Arcivescul Mazzocato.



Il rest dal intervent lu cjatais chi, sul sît de Vita Cattolica. E chi l'audio.

17 ottobre 2009

Rassegnâts e apatics?

Une letare sul gjornâl a firme di Fausto Florean di Maian e denuncie la rassegnazion e la apatie dai citadins di Maian.
Us rimandi al prin coment dulà che o podês cjatâ la letare e valutâ se l'autôr al à reson o no...

15 ottobre 2009

Sportissimo Club - on line

Come che us vevi anticipât martars, o soi stât ospit de trasmission Sportissimo Club.
Par cui che si è pierdût la pontade, ve ca la regjistrazion on line sul sît de Associazion Udinese Club.

13 ottobre 2009

Mandi Vescul Brollo

Come che o savarês, domenie l'Arcivescul bons. Pieri Brollo (te foto) al à saludade la Arcidiocesi di Udin cu la sô ultime messe in cjarie.
Tantis a son stadis lis manifestazions di stime e mi à plasût ancje il fat che si sedi impensât di saludâ par furlan.
Ma a part i salûts formâi e i auguris che al passi une pension serene, lant a la sostance, mi permet di segnalâ un intervent dal "mestri" Dree Valcic, che o condivît in dut e par dut: par leilu, fracait chi.

12 ottobre 2009

Miercus su Free - Sportissimo Club

Miercus di sere o sarai ospit di Gianluca Bertozzi te trasmission "Sportissimo Club", la trasmission de Associazion dai Udinese Club in onde su Free. Si fevelarà di Udin e no dome.
Us spieti.

11 ottobre 2009

A proposit de Catalogne

O ai viodût e imparât diviersis robis dal viaç in Catalogne e se o pensi che une setemane indaûr a cheste ore o jeri a Girona che o spietavi l'avion par tornâ a cjase, mi somee cussì strani che e sedi passade za une setemane.
Ma no soi dome jo che o feveli di chest, di fat us segnali un biel articul vignût fûr su "Il Friuli" vinars passât firmât di Federica Angeli e un articul di William Cisilino publicât sul Gazzettino di îr: fracait chi par leilu.

(te foto Vicent Partal, diretôr di VilaWeb e responsabil de comunicazion dal coordenament indipendentist).

10 ottobre 2009

Cjans di museu in Cjistiel a Susans

E tache vuê la mostre di art "Cjans di museu" oparis par contâ il miôr amì dal om di Argo a la Pimpa. La mostre e je tal Cjistiel di Susans e e larà indevant fint ai 15 di Novembar
Par savênt di plui, fracait chest link.

09 ottobre 2009

Glesie furlane simpri plui on line

Glesie furlane (www.glesiefurlane.org) e continue la schirie di ativitâts che le viodin impegnade te valorizazion des lidrîs culturâls, religjosis e linguistichis dal Friûl.
Une atenzion che no cjale dome a la storie vint come riferiment il patrimoni inestimabil dal Patriarcjât di Aquilee, ma ancje al dì di vuê cuntun voli a lis gnovis tecnologjiis.
Cun cheste atenzion propit par mantignî une azion leade ai timps de societât moderne, Glesie furlane e à realizât un program radiofonic cul titul “Lis flabis di Fedro voltadis pai furlans di pre Antoni Beline”, une schirie di leturis radiofonichis in 16 pontadis che a laran indevant ogni sabide fint a Nadâl 2009.
Il progjet al è realizât cence contribûts publics in colaborazion cun Radio FM Comunicar e il program "Fuarce Furlans" (che si pues scoltâ ancje in streaming su http://www.fuarcefurlans.com.ar/) fat de radio dai furlans di Colonia Caroya te provincie di Cordoba in Argjentine.
La trasmission e je stade ideade di Christian Romanini che le à realizade cun Venusia Dominici e Sonia Romanini pes vôs e cul jutori tecnic di Luca Peresson e Claudio Roya: il program al ven trasmetût sedi in direte in FM in Argjentine e in streaming sul sît http://www.fuarcefurlans.com.ar/ ogni sabide te suaze dal program "Fuarce furlans" che al tache aes 5 dopomisdì (ore furlane). La repliche e je ogni lunis a 1 dopomisdì su lis frecuencis di Radio Onde Furlane (FM 90.0 MhZ) e dut l’archivi des pontadis si cjate on line: http://www.fuarcefurlans.com.ar/ .
Ma la atenzion a lis gnovis tecnologjiis che a permetin di scoltâ la radio in dutis lis bandis dal mont no si ferme chi: Glesie furlane, dongje dal sît isituzionâl (www.glesiefurlane.org) e je rivade ancje su Facebook, il plui cognossût social network dal moment “I confins fisics no esistin plui: il Friûl al va pensât no dome come la nestre Patrie cul teritori che o cognossìn, ma propit parcè che ator pal mont a son tancj i fîs e i nevôts di furlans, che tai agns a àn scugnût partî, al devente inevitabil resonâ intune prospetive “glocâl”, ven a stâi “pensâ globâl fevelant locâl”. Il Friûl al è duncje chel lûc, reâl e virtuâl, li che si fevele par furlan: che al sedi chi in Patrie, o in Argjentine o in Canadà o in cualsisedi altre bande dal mont e di Internet” e dîs Glesie Furlane.

08 ottobre 2009

Il Vicesindic di Maian Romano Ciani al repliche sul blog

Jessint stâ vie par cualchi dì, o ai vût bisugne di un tic di timp par cjalâmi ator e inzornâmi.
Stant che vuê sul Messaggero Veneto e je ripuartade une letare dal grup Intesa per Majano che e riclame un post publicât sul lôr blog, o aprofiti ancje par segnalâ il coment che il Vicesindic di Maian Romano Ciani (te foto) al à fat sul lôr blog li che in sostance al sclarìs cuâl che al è stât il contignût dal so intervent tal ultin consei comunâl a proposit des dimissions di Giovanna Iesse: fracait chi par lei l'intervent dal Vicesindic Ciani.

06 ottobre 2009

Cuint seminari interladin di gjornalisim a Barcelone

Ai 30 di Setembar o soi rivât a Barcelone par partecipâ a non de Arlef al V seminari interladin davuelt in date 1 e 2 di Otubar (un grazie al Istitût Ladin Furlan "pre Checo Placerean").
Come di program, lis 2 zornadis a son stadis dividudis cussì:
joibe relazions e confronts cun rapresentants Catalans (a buinore) e Ladins (dopomisdì) e vinars visitis tes redazions dai media locâls.

VILAWEB
Dai intervents di joibe buinore, chel che secont me al è stât plui concret e util (par me) al è stât Vicent Partal, il diretôr di http://www.vilaweb.cat/ il prin gjornâl indipendent catalan on line (e je dome la version internet) nassût tal 1995.
Par cui che al ves di spaventâsi sul fat che un gjornâl nol esisti su cjarte, a puedin fevelâ i numar: 300.000 (tresintemil) visitis ogni mês (60mil in dì) cuntun public di letôrs di 25/45 agns.Te redazion a lavorin a lavorin 24 personis. Cumò il gjornâl si manten cu la publicitât.
Nus à contât che in Catalogne (che a son cirche 9.000.000 di lôr) la situazion e je cressude une vore tai ultins agns, ancje se la cussience identitarie catalane e je stade fuarte tai agns, dilunc dai secui.
Une svolte però si le à vude dopo de fin dal Franchisim cuntun intervent fuart te scolarizazion (in catalogne i fruts a son scolarizâts fin a la etât de scuele dal oblic par catalan e no par castilian).

RûL DES UNIVERSITÂTS
La seconde "rivoluzion" e je stade a metât dai agns 90 cun Internet e la azion des universitâts che in Catalogne a son 3: Politecniche di Catalogne, Jaume 1 e la universitât des Baleârs.

Chestis universitâts a àn metude a disposizion la lôr competence e i lôr mieçs pe difussion di internet e de lenghe catalane tal web: a àn fornît no dome la poie informatiche dal pont di viste tecnic, ma ancje lis competencis linguistichis e i prins sîts istituzionâi par catalan a son stâts chei des universitâts.
Cun di plui, cumò internet e la telefonie no son furnîts dome di une societât, ma il marcjât al è libar.

UNE LENGHE E JE GLOBÂL NO PAL NUMAR DI CHEI CHE LE FEVELIN, MA PE Sô FUNZION
Cheste libertât di marcjât e je ancje in internet dulà che lis polemichis anticatalanis no son parcè che no je politiche in internet: par esempli i motôrs di ricercje spagnûi no àn la version in lenghe catalane parcè che la politiche e fâs in maniere che al sedi dome il castilian (spagnûl).
Google, invezit, il program di ricercje su web cun sede tai Usa e duncje no condizionât de politiche spagnule, viodint chest presince simpri plui grande di lenghe catalane tal web al à une version in lenghe catalane (tal mont a son 40 lenghis di google).
Par savê ricognossi e duncje cjatâ lis pagjinis par catalan, un informatic al à inventât e regalât a la comunitât (al podeve fâ milions cul copyright dal brevet e invezit al à regalât pe cause) un algoritmi: il catalan (come dutis lis lenghis) su internet al è identificât cun cheste formule:

+ () + és + (dels quan què)

che in sostance al met dongje lis peraulis plui comunis de lenghe catalane: in sostance, se intune frase a son une o plui di chestis peraulis, al è une vore probabil che la pagjine web e sedi par catalan e Google le ricognòs e le segnale (si podarès tacâ a pensâ la stesse soluzion ancje par furlan, fasint un algoritmi pe lenghe furlane).
La impuartance dal multilinguisim e je dade dal fat che cumò al è un fenomen planetari. Lis compagniis a àn une concorince mondiâl e duncje cualsisedi element che al permeti une difarence, une cressite ancje piçule, al permet di imponisi suntun marcjât e cussì lis ditis che a lavorin cun internet a àn viodût che in Catalogne tu dopris la lenghe catalane par promoviti, la int ti lei di plui e duncje ti cognòs di plui (google al è dome un dai tancj esemplis: tal sît de Cjase Blancje su youtube, ducj i discors di Obama a son cui sot titui ancje par catalan)

Grazie a la scolarizazion e a lis universitâts, il nivel di alfabetizazion in lenghe catalane al è une vore alt e chest al permet une paronance de int une vore difondude: a son tancj i volontaris (come che mi à ricuardât ancje Dree Venier, e esist propit une associazion che si clame Softcatalà che e fâs chest) che si dan di fâ par tradusi tancj sîts: facebook (il catalan al è 3° tal mont dopo dal inglês e dal gjaponês), wikipedia e à miârs di pagjinis in lenghe catalane e vie indevant...

IN STRUC
A la fin nus à fât un struc, fasint presint chescj ponts:

  1. si à di veicolâ la lenghe cu la inovazion (lenghe=inovazion)
  2. la universitât e la societât civîl (borghesie) a àn vût un rûl clâf e strategjic
  3. si à di pontâ al concet di glocâl (vê une vision locâl, fevelant la nestre lenghe, par vê une funzion globâl)
  4. no si à di vê un ategjament sotan te globalizazion, ma rindisi cont che la universalitât si le à dome cu la valorizazion ancje de nestre lenghe particolâr
  5. rivâ a mostrâ che ancje tal forest la lenghe locâl e je stade preseade, al jude a movi la braure a nivel interni (google nol è ni catalan, ni furlan: ancje in catalogne lis robis si son mioradis cuant che il guvier locâl al à viodût che la lôr lenghe e jere preseade ancje fûr)

L'AVIGNî DE TV AL è SUL WEB
Un ultin concet nus è stât dât su la cuistion de television: l'avignî nol è il digjitâl terestri, ma la television "a la carta", ven a stâi su ordenazion cun internet: il podcast al superarà il concet tradizionâl de television parcè che la int e sielzarà cuant e ce viodi cence spietâ lis trasmission denant dal "casselot" (al dal gjenar, ma fevelant di radio, o vevi dit ancje jo un pâr di agns indaûr a Colorêt: lait a lei chi).

VISITE IN REDAZION DI www.vilaweb.cat
Une vore interessante e je stade ancje la visite in redazion li che o vin podût verificâ lis peraulis dal diretôr. Nus àn spiegât che cheste societât (un ecuivalent di une SrL taliane) e da lavôr a une redazion di 11 di lôr (1 diretôr, 1 editôr, 2 cjâf redatôrs e 8 redatôrs) che a lavorin a turni des 6 di buinore fint 11 di sere. Cun di plui a son ducj i colaboradôrs che a puartin il numar a cirche 24 di lôr.

Nus àn spiegadis lis diviersis sezions tematichis, i canâi dedicâts (leterature, tecnologjiis...) e ancje lis ultimis novitâts cu la sezion Video (servizis video realizâts de stesse redazion e visibii dome su internet sul sît, su youtube), la sezion blogs (a paiament: cui che al à voie di vê un spazi blog al paie a vilaweb 3 euros par mês: ancje tancj politics lu àn li) e la scuele (sezion dedicate ai fruts che lis scuelis catalanis po dopo a doprin in classe come materiâl didatic).
Cun di plui nus àn dit che e je ancje une sezion marketing dal gjornâl che si ocupe di cjapâ sù e vendi la publicitât che si viôt sul sît.
O varès inmò tantis robis di contâ su cheste e su chês altris redazionsl, ma pal moment mi soi concentât su cheste parcè che e je secont me la vere novitât e chê plui a la puartade di esportazion (o fâs dome un esempli: o vin visitade ancje Catalunya Radio (fracait chest link) ven a stâi la radio publiche de Generalitat di Catalunya: te radio a lavorin 350 personis ven a stâi une realtât grandonone e siore ma che tal concret no je pal moment realizabil chi di noaltris).

UNE RIFLESSION CONCLUSIVE
Di dutis lis informazions che o ai cjapât sù mi soi convint inmò di plui che a la fonde di dut e je la scolarizazion: dome insegnant ai fruts no dome 1 misare ore di lenghe furlane (adiriture achì cumò e je dome facoltative, dome se lis fameis lu domandin) si varà cualchi risultât: il furlan al à di jessi obligatori a scuele, no dome come materie ma ancje come "ûs veicolâr" (insegnâ par furlan ancje chês altris materiis come la storie, la gjeografie, la matematiche, lis siencis e vie indevant). Parcè che se no, cuntune "attuazione graduale, con insegnamento non obbligatorio", in pratiche "ben plancut" come che al à dit ancje l'ass. Molinaro intun comunicât di domenie e lunis sul gjornâl, no si salve il furlan... si lu fâs murî plancut plancut.
E il fat che l'argoment de scuele al è chel plui combatût, al è propit par cheste motivazion: la scuele e je la clâf principâl par salvâ une lenghe. E lant a Barcelone mi soi rindût pardabon cont che e je une realtât (une realtât fatibil e eficaç: baste volê).

PAR LÂ INDEVANT
O pensi che cumò al sarès impuartant continuâ, come che a sugjerivin Mauro Tosoni e Dree Venier, ancje lôr partecipants de cunvigne, a fâ audizions in Friûl, convocant i professioniscj furlans (e no dome) dai diviers cjamps.
Al sarès interessant continuâ lis audizions: noaltris a Barcelone o vin scoltât come che si fâs gjornalisim in Catalogne, ma al sarès impuartant cognossi ancje la opinion di professioniscj in Friûl e no dome de informazion.
Par esempli, come che o vin fat cui sporteliscj, al sarès interessant savê ce che i gjornaliscj furlans (che a scrivin ancje par talian) a àn di dî a la Arlef. Ma la stesse robe si pues fâle cun ilustradôrs, esperts di art, comunicazion, insome ducj i aspiets de societât...
Chest in maniere di fevelâ cui professioniscj di setôr par capî cemût fâ ben lis robis e po dopo viodi cemût aplicâ i concets par fâlis ben par furlan.
Di solit o fevelìn spes dome di musiche, scuele (che a van ben), ma no son dome chestis tematichis, che par di plui a son avonde specifichis: o vin dibisugne, ta chest moment storic, di tornâ a jentrâ te societât civîl a nivel plui popolâr.

05 ottobre 2009

Si torne a tacâ balant

O sai, o sai: us ai trascurâts ta chescj dîs, ma mi soi cjapât une polse par lâ a fâ un zirut. Prime o soi stât a Milan pal conciert di Elton John e po...
Viodìn cui che al induvine dulà che o soi stât par cualchi dì...



Ancje masse facil, ma intant cussì... Plui indevant us zontarai inmò alc su cheste esperience che par me e je stade entusiasmante!

26 settembre 2009

Zornade europeane des lenghis

Come ogni an, ancje jo o ricuardi la zornade europeane des lenghis, comprindudis chês mancul pandudis, par esempli chês che feveladis dai popui cence stât.
Chest apontament al è celebrât dal 2001 cuant che la Europe e à formalizâ "an european pal multilinguisim.

Par savênt di plui, lait a lei chi.

25 settembre 2009

Transumancis politichis

Il consei comunâl di usgnot si è viert cu la leture de letare di dimissions di Giovanna Iesse (te foto).

"Al Sig. Sindaco
e al Consiglio Comunale
del Comune di Majano

Con la presente rassegno le mie dimissioni quale Consigliere Comunale di minoranza eletta nella Lista Civica "La Nuova Majano" poichè il mio attuale impegno politico all'interno del Popolo della Libertà non è più compatibile con il mandato affidatomi al momento delle passate elezioni amministrative dagli elettori, che ringrazio per la fiducia.
Estendo i miei più sentiti ringraziamenti al Segretario Comunale e al personale dell'Ufficio di Segreteria per la cortese collaborazione.
Auguro a Lei e ai colleghi Consiglieri i migliori auguri di buon lavoro".

E cussì Giovanna Iesse e siere la sô presince al consei comunâl. Jo no comenti la decision parcè che ognidun al è libar di gambiâ idee politiche, decidi di passâ di une altre bande e fâ ce che plui si sint. O ricuardi dome che par passe un an la siore Giovanna Iesse e à tignût il pît in dôs scarpis: a Maian e jere conseîr di centriçampe cuant che invezit chi in comuns dongje si dave di fâ par fâ nassi i Circui de libertât, e coreve pal Senât come candidade pal Pdl e vie indevant.
Jo al so puest, prime mi sarès dimetût di conseîr e dopo o varès formalizât altris sieltis. Ma si sa che no si è ducj compagns, par furtune.

23 settembre 2009

150mil voltis grazie

Al pues someâ ripetitîf e autocelebratîf, ma meti un post in ocasion di travuarts simpri plui grancj lu riten il minim.
Un grazie a ducj che che mi lei e in particolâr a chei che si son iscrits al grup su Feisbûc!
O aprofiti ancje par domandâ alc di fâ in concret: ce pensaiso se o organizi alc par cjatâsi di persone?
Un piçul event par stâ insiemit, cence formalitâts... isal fatibil?

Dimissions di Giovanna Iesse

Al jere za di timp che la notizie e zirave, e a la fin a son rivadis.
Tal prossin consei comunâl (fracait chi par lei dut il document) il prin pont interessant tal ordin dal dì al è chest: "Surogazion dal conseîr comunâl siore Giovanna Iesse e verifiche condizions di eleibilitât e compatibilitât dal gnûf conseîr."
Su cheste situazion che e viodeve la stesse persone di une bande conseîr di centriçampe in comun a Maian e candidade dal Pdl pal Senât de Republiche, o ai za scrit, ma se o vês pierdût cualchi pontade, lait a lei chi.

22 settembre 2009

Contile juste

Us segnali chest link: la pagjine internet dal notiziari "Contile juste", un imprest informatîf che finalmentri si cjate ancje on line e no dome par television.
Lait a dâ un cuc...

21 settembre 2009

Ricuarts di Friulidoc

Un grazie al President Fontanini, al Assessôr Mattiussi, a Cristian e Roberto de associazion de "Strade dal Vin".
Ma soredut a Venusia, Federica, Bruno, Daniele e Mauro par dut ce che a àn fat pe associazion Glesie Furlane.

Contile Juste, 18 di Setembar dal 2009 from Provincia di Udine on Vimeo.

17 settembre 2009

La Patrie dal Friûl ospit di Ersa a Friuli Doc

La Patrie dal Friûl (www.lapatriedalfriul.org) i dediche il speciâl dal numar di Setembar a «bire, vin e resentin»: da la tiere dal bon vin ae tiere dal bevi ben. Un viaç in cheste ecelence dal Friûl, cence dismenteâ il probleme dal alcolisim, cuntune interviste al prof. Francesco Piani, diretôr dal Dipartiment des Dipendencis de ASS nr. 4 «Friûl di Mieç». 
Tal rest dal numar si sierin dôs inchiestis, chê su la publicitât par furlan e chê sul libri vert de sanitât, e si ‘nd invie une su la scuele in marilenghe. Dentri des pagjinis de riviste, ancje un toc sui paîs de Alte Valmarecchia passâts des Marchis ae Emilie Romagne, un decision che si spere e puedi rivâ adore ancje par Sapade/Plozen e ancje a altri spaîs dal Friûl storic che a an domandât di tornâ te scune de Patrie. 
Il partî dal campionât di balon al è il rimpin par intervistâ il president de Associazion dai Udinese Club, Michele De Sabata, cun dongje un servizi su la tifoserie in marilenghe tal stadi e tai club stes.Il numar fresc di stampe al sarà presentât vie par Friuli doc a Udin, li dal stand di Ersa - agjenzie regjonâl pal disvilup rurâl (in place "dai grans" - XX di Setembar) vinars ai 18 di Setembar a lis 17.00. Al event  e sarà presinte Cristina Coari, autore dal libri «Bye bye Tocai» che al fronte la vicende de pierdite dal storic non dal tipic vin blanc furlan. Cun di plui si vise che dai 20 di Setembar, sul sît www.lapatriedalfriul.org a saran disponibii i contignûts dal numar di Avost dedicât al «Mâl dal modon». La Patrie dal Friûl si ricêf par abonament o comprante tes miôr ediculis e librariis. 

16 settembre 2009

Contecurte: leturis in marilenghe par une ostarie leterarie itinerante

Une gnove impuartante in salse furlane e inricjìs cheste edizion di “Friuli Doc”: la colaborazion cul blog “Contecurte”, singolâr e divertent contignidôr par mininarative in marilenghe, e crearà la ocasion par trê apontaments pardabon golôs in diviers locâi storics de citât.
La particolaritât di “Contecurte” e je che si trate di une “ostarie leterarie virtuâl” une vore origjinâl, dulà che ognidun al pues lassâ contis curtis letis daspò de comunitât leterarie. La idee che l’Ufici par valorizâ la lenghe furlane dal Comun di Udin al à proponût al staff di “Contecurte” e je chê di calâ te realtât cheste ostarie virtuâl, puartant lis contis letis “dal vîf” tes ostariis storichis de citât. Grazie ae misture di leterature e enogastronomie al nassarà un clime dal sigûr interessant e di no pierdi: ancje parcè che la cualitât des contis sielzudis e je pardabon di rivuart. I apontaments a son fissâts par vinars ai 18 di Setembar aes 18.30 inte ostarie “Sbarco dei Pirati” in vie Bartolini; sabide ai 19 di Setembar aes 20.00 al “Vecchio Stallo” di vie Viola; e domenie ai 20 di Setembar aes 18.30 tal bar “Da Artico” in borc di Poscuel. In dut a saran letis 12contis (e us anticipi che une di chestis seris o sarai ancje jo...), cualchidune scrite di pueste par “Friuli Doc”, ducj a son stât metûts dongje intun librut dât fûr sore nuie in ocasion dai trê apontaments. Il miôr de narative curte in marilenghe us spiete: e tra une degustazion e chê altre nol sarà dificil cjatâ mieze ore par gjoldi dal incjant di une conte par furlan in puescj pardabon speciâi come lis ostariis storichis di Udin. 

Par info. contecurte@gmail.com

15 settembre 2009

Glesie Furlane a Friuli Doc

Obietîf di Glesie furlane (www.glesiefurlane.org) al è chel di cognossi, studiâ, promovi, valorizâ cun ricercjis, publicazions, incuintris dut ce che al rivuarde la dimension religjose te culture furlane cirint tant traviers lis fonts storichis che la realtât contemporanie. Propit par cheste azion che e à chê di puartâ a une dimension plui umane e incjarnade la opare di evanzelizazion, la associazion e à cjapât cun plasê la pussibilitât di partecipâ a la prossime edizion di Friuli Doc (dai 17 ai 20 di Setembar 2009). Une ocasion nassude grazie al intervent de Provincie di Udin, in particolâr par mert dal President Pietro Fontanini e dal Assessôr al Turisim Franco Mattiussi, e cu la colaborazion de associazion “Strada del Vino” di Aquilee.
Tal spazi dedicât si podaran cjatâ i libris editâts di chest grup di cristians e furlans che a cirin di lâ a font des lôr lidrîs culturâls e religjosis, par podê conciliâ in maniere armoniche la proprie fede cu la proprie identitât culturâl. Vuê si fevelarès di "inculturazion de fede" o di "vanzelizazion de culture". Il grup, nassût viers i agns '70, sul sburt dal Concili Vatican II (1962-1965), dai prins pas de Teologjie de liberazion e tal contest politic-culturâl de cussience autonomistiche furlane, al à come figure carismatiche iniziâl il professôr pre Checo Placerean (1920-1986).
L’apontament al è duncje di joibe ai 17 fin domenie ai 20 di Setembar sot dal tendon di place Venerio, daûr de glesie di Sant Francesc, dulà che i visitadôrs a podaran cjatâ ancje i libris di pre Antoni Beline (1941-2007), ma no dome, domandant informazions e podint cognossi miôr cheste associazion che e cjale al avignî dal Friûl di vuê cence dismenteâ il patrimoni inestimabil che al ven da la tradizion dal Patriarcjât di Aquilee.

13 settembre 2009

Alè Udin!

Vuê o ai screât l'abonament!
Ma ce sudadis! Massime pe prime part de partide...
O miôr plui che sudadis, a jerin lagrimis...
Eh sì, cjatâsi in svantaç cun 2 pirucis cjapadis tai prins 45 minûts nol jere biel.
E po o ai ancje scuviert che chês dal prin timp no jerin lis unichis lagrimis: di fat cuant che o ai compradis 2 butiliutis di 0,5 lt di aghe e lis ai paiadis 4 euros in dut, mi è vignût il suspiet che a vessin propit imbutialidis lis lagrimis de Madonute di Madone di Mont.
Po ben, a part monadis, a la fin l'Udin al à recuperât e grazie al cjapitani Di Natale (te foto la mê tifose preferide, contente pe triplete di Totò) o vin fat 4 gôi: 1 par ogni euro di aghe che o ai comprât...
Alè Udin!

12 settembre 2009

Gjoêl sul Friuli

Come che us ai dit, sabide passade o ai stât a Udin a viodi la simultanie di dame. Di chel apontament al fevele ancje il Friuli e adiriture sul sît e je une biele galarie di fotos che a contin l'event (fracait chi).
Tra chestis o ai cjatât ancje il gno nevodut Gjoêl! Velu chi cun me!

11 settembre 2009

SUNS cui FLK

Doman o voi a viodimi e scoltâmi un pocje di buine musiche al Palamostre di Udin. Aes 21 al tache SUNS, concors di musiche in lenghe minoritarie, une semifinâl dal Liet festival.
Par savênt di plui lait a viodi sul sît de Arlef o di Radio Onde Furlane (fracait chi par viodi ducj i partecipants).
O voi content ancje parcè che nol sarà chest l'unic event de serade: dopo agns e torne la formazion complete dai Mitili FLK, il grup musicâl che al à rivoluzionât il panorame musicâl furlan dai agns 90.
Un mandi particolâr a Stiefin Montello (te foto)!

10 settembre 2009

Il blog di Gianfranco Pintore

Come che o ai dit plui voltis, di cuant che mi dedichi a la cuistion furlane, ai temis de tutele linguistiche o ai tacât a vierzi i miei orizonts plui che no prime. Di fat o ai vût il plasê di cognossi tant int impegnade e interessante in Friûl e fûr dal Friûl. Ma cemût? A lei cierte stampe, nô furlans o saressin int sierade, che e cjale dome il cjampanili, che no sa ce che al è il mont... e vie indevant cun tantis co****dis dal gjenar: par furtune i fats a cjacarin in maniere difarente.
Tra i tancj contats, l'ultin par ordin di timp al è stât Gianfranco Pintore (te foto, fracait chi par lei un pocje di biografie), gjornalist e scritôr de Sardegne, che si zonte cussì ai contats che za o ai cun chê regjon.
Chê altre dì o ai vût il plasê e l'onôr di viodi publicât sul so blog (http://gianfrancopintore.blogspot.com) il gno post che al cjapave il titul di une famose frase di Gandhi: fracait chi.
Un grazie e un mandi a Gianfranco Pintore e a ducj i amîs de Sardegne.