31 marzo 2008

30 marzo 2008

Otave in Cumierç 2008



Come ogni an, us feveli ancje vuê de Otave in Cumierç: procession di chei di Sant Denêl a buinore e dopo fieste dut il dì sul cuel. Chest an a son stâts i Scampanotadôrs che o sintîs tal filmât. No pues però no ringraziâ la siore Maurizia e Franco pe biele merinde che come ogni an a preparin sul lôr prât: une fieste te fieste. Apontament pal prossin an!

29 marzo 2008

La insegnante di Buie


Vuê o soi stât nomenât sul gjornâl. La insegnante di Buie che no pense che il furlan nol sedi une materie cussì impuartante di insegnâ a scuele, mi clame in cause: secont jê chi i àn mancjât di rispiet.
Par jessi sincîr, se un al cjape cjarte e pene e al manifeste un pinsîr in public, dopo nol à di lamentâsi se simpri in public cualchidun i rispuint. Su la cuistion dai anonims... mah... mi somee che la insegnante e vedi voie di passâ par vitime: e à fat une altre falope, parcè che nissun anomin le à contestate stant che cui che i à dit "Vergogne" si sa cui che e je e, par di plui, jo o dîs che la ninine e à fat dome che ben.
Dut câs, tornant a la letare di vuê, che us met tal prin coment, al ven fûr cemût che la insegnante no dome e cîr di rimpinâsi sù pai spiei, ma ancje e dimostre une cierte suponence: denant des osservazions di Davide Turello e Fabian Ros no cjate nuie di miôr di fâ che spostâ la atenzion fûr dal probleme, che je stesse e à mot: ven a stâi la cuistion linguistiche parcè che o resti dal parê che une buine cognossince des lenghis, tacant di chê che tu fevelis in cjase, no fasi altri che ben pe cognossince di dutis lis lenghis.
Dit chest ancje la conclusion de letare mi à fat ridi: la mestre e dîs "O lassi a voaltris la ultime peraule parcè che jo o ai di lavorâ, e tal timp libar o preferìs dedicâmi a robis plui legris".
Ma jo mi domandi: parcè no fâlu prime invezit di scrivi sul gjornâl robis che a son pardabon fûr dal vade? Si sarès sparagnade une figure magre, anzit dôs.

Ps: se jo o met une "ciore" tal microondis, mi rive a cjase la Enpa e mi denuncie! Miôr mangjâsi un tic di popcorn o sioris e lassâ pierdi atacs dal gjenar. (o scomet che la insegnate no si rabie se i meni un tic il rost, stant che jê e dîs che e à il sens of humour).

Terapie cul mus

Us met achì une iniziative segnalade sul gjornâl: a Sant Tomâs al tacarà un cors di onoterapie, une gjenar di cure che e dopre i mus come che in altris câs a vegnin impleadis altris bestiis.
Magari cussì no, o pensi par une incomprension, a chest proposit al è sucedût un piçul incident diplomatic tra il thermo e la ninine.
La terapie cu lis bestiis e je une robe serie e al è di preseâ cui che si impegne rivant a risolvi situazions une vore delicadis.
O scuen ameti che ancje a mi, cuant che o ai let il gjornâl, mi veve fat simpatie la foto cul mus: no parcè che o ai voie di mancjâ di rispiet ai promotôrs dal progjet, ma dome parcè che pensant al mus, mi veve scjampade une riduçade... po dopo o ai let cun atenzion l'articul e o ai capît il sens de iniziative.
Par chei che a vuelin savênt di plui, o torni a meti come prin coment, l'articul che al fevele de iniziative o lait a viodi il sît "i amîs di Totò".
Dai, thermo e ninine: no stait a barufâsi.

28 marzo 2008

Un mê interviste

Us segnali il portâl di LengheNET che mi à fat une interviste: un grazie a la redazion. Par leile, fracait achì.

Un figure di riferiment

Juste îr Forestpark mi à fat une biele domande: cui sintetizial la furlanetât? Jo o ai cjatât un riferiment in pre Antoni Beline e Glesie furlane. Par chest us consei, par cognossi miôr chest om pardabon fûr de norme par inteligjence, preparazion, dignitât e bontât, di lâ a viodi cheste serade a Cjamin dal Tiliment (chi in bande l'invît) joibe ai 3 di Avrîl a lis 21.00 in auditorium-biblioteche, place San Valentino 12 (cjalait chi la mape).
Forest, se no tu sês in Friûl e no tu puedis jessi presint a la conference, cuant che tu tornis a cjase fâs un salt in biblioteche e domande cualchi libri di pre Antoni, tu viodarâs che cualchi rispueste tu le cjatis.

27 marzo 2008

Mandi Renato

Us met chi cheste brute notizie che mi è rivade:
"Cun infinide comozion us comunichi che Renato Mertens nus à lassâts martars a buinore. Sabide a lis 9:30 al sarà puartât tal cimitieri di Maian. Par sô volontât no saran fatis cerimoniis e dut si fasarà cu la sobrietât e la semplicitât che di simpri lu àn caraterizât". (O ringrazii Alessandro Venuti par vêmi visât).

Mandi Renato.

26 marzo 2008

Sant Durì, Flaiban? No, Argjentine!

Vuê us feveli di un paîs che si clame Colonia Vincente Agüero, ma che ducj a clamin Sant Durì. Chi o podês lei la storie complete e chi invezit o viodês dulà che al è: no in comun di Flaiban, ma dongje Colonia Caroya, in provincie di Cordobe, Argjentine. Vincente Agüero al jere un plevan, che al judà la nassite di cheste comunitât furlane argjentine (vuê a son cirche 400 dissendents di furlans) fondade tal 1910. (Te foto e je la place dal paîs cul bust di Sant Durì)
Un grazie a Pauli, Sandri, Claudio e Luca e un mandi a ducj i furlans ator pal mont.

25 marzo 2008

Archeopascute

Cun chel frêt bec che al è vignût, no jere propit zornade di lâ a fâ cori ûfs par rivâi. Cussì o ai decidût di lâ a Udin a viodi une mostre in Cjistiel. E fat il biliet, cui ti cjatio che e stave par jentrâ? La archeoNinine (te foto cun me) e cussì o ai vuadagnât la vuide! Grazie Ninine!

24 marzo 2008

23 marzo 2008

Buine Pasche

Chest an Pasche e je adore e duncje ancje i auguris a rivin prin.
Dut câs, a part la batude de foto, us auguri di cûr buine Pasche a voaltris e a lis vuestris fameis, fasint un pinsîr che pre Antoni al faseve, ma no dome riferît a chest apontament religjôs: "O vin ognidun di puartâ la nestre crôs, ma no strissinâle, parcè che se no nus taie lis spadulis".

Un grazie a Marino par vêmi fat ricuardâ chestis peraulis di pre Antoni.
Tancj auguris a ducj.

22 marzo 2008

I auguris di Renzo Gardo

Vuê mi soi jevât cul mâl di cjâf e no rivavi a stâ in cjase. Alore mi soi cjapât sù e o soi lât a fâ un zirut, lant a cjatâ la ASDMajanese che e faseve un piçul incuintri par fâsi i auguris di Buine Pasche. Dopo dai auguris, Renzo "Il President" Gardo si è lassât lâ intune interpretazion di "Io Vagabondo" dai Nomadi!
Masse fuart!
Tancj auguris a ducj i dirigjents, atletis e amîs de Majanese e di dutis lis associazions sportivis e no di Maian.

Doman in television

Come che us ai dit, o soi stât ospit de trasmission +sklet di Telefriuli. Par cui che si è pierdût la pontade dai 19 di Març a lis 17.45, us visi che la repliche e larà in onde doman domenie di Pasche a lis 22.15. O fevelarai di Internet e lenghe furlane.

Vuê e doman dai Sportei

Come che o savês jo o lavori come operatôr linguistic intun sportel pe lenghe furlane: par jessi precîs, o lavori a Tavagnà.
Par savê che ce o fâs o podês viodi cheste pagjine e in particolâr cheste ultime iniziative che e je stade fate adun cul Comitât482, che o ringrazii, ven a stâi une piçule vuide resonade par capî.
Ma ta chescj dîs no je dome la cuestion dal decalic che e cjape la atenzion (al è vignût fûr un articul sul gjornâl e ancje Federico Rossi mi à clamât par fevelânt a Radio Spazio).
Ta chescj dîs o ai vût maniere di jessi presint sedi su Antenna3, Telenordest e sul gjornâl par une cuestion che e rivuarde no dome me, ma ducj i operatôrs di sportel linguistic. Tai coments o cjatais il test di une letare che o vin mandât a Antonaz e un pocje di rassegne stampe.

21 marzo 2008

Mi informaRAI par furlan

Une biele notizie e rive de Rai: al tacarà in curt il notiziari par furlan, in convenzion cu la Regjon.
Ve ca cualchi informazion di plui sul sît di Radio Onde Furlane.

Pasche di donazion

Vuê o ai stât a dâ sanc tal Ospedâl di Sant Denêl.
Al jere un pôc che o vevi voie di tornâ a tacâ. Pe ocasion mi àn domandât di fâ une donazion di plasme, stant che il gno grup di sanc (AB+) al è universâl pal plasme: ven a stâi al pues jessi doprât par dutis lis trasfusions. Il plasme al covente in câs di incidents, operazions o ducj i câs li che il pazient al à patît pierditis gruessis di sanc.
Chest an la AFDS e fasarà i 50 agns di fondazion e pe ocasion e ospitatà il congrès di dutis lis sezions talianis.

(ps: un grazie al Dree pe maiute "Tu âs cjatât chel dal formadi")

Via Crucis a Cicunins

In ocasion dal Vinars Sant o segnali la rievocazion de Via Crucis a Cicunins.
E se o volês lei il test sacri, us segnali il Vanzeli di Matieu sul sît di Glesie Furlane: fracait chi.

20 marzo 2008

Giovanna del Grillo

Vuê sul gjornâl al è un interessant articul li che Giovanna Iesse, candidade Pdl pal Senât, e rispuint a la sô ex-liste La Nuova Maiano che i domande di dimetisi parcè che e à tradît il lôr dissen politic che le veve viodude impegnate tal 2006 poiant a Maian il candidât sindic di centriçampe.
Lait a lei il prin coment... In sostance ur rispuint che se ancje un grup di plui personis i domande di lâ a cjase dopo il "salt dal fossâl", la lôr domande no je unanime (ocjo: parcè che a mancji la firmis di 2 di lôr... adiriture!) e duncje jê no si dimet parcè che nol interesse ce che lôr a disin... il grup nol conte se i doi referents politics no son dacuardi.
Al mancjave dome che ur disès cussì...

Branduardi al cjante par furlan

O ringrazii il Pionîr par vê cjatât e metût sul blog dal Fa.f chest video musicâl dulà che Angelo Branduardi al cjante par furlan: Scjaraçule Maraçule.

19 marzo 2008

Propueste

Chest colp a Maian, in ocasion des elezions, o varìn une situazion che mi somee che no si è mai verificade prime inte storie des elezions resintis. Di fat, in contemporanie o varìn in dutis lis schedis un candidât o une candidade impegnade te corse eletorâl:
pal Senât, Giovanna Iesse (Pdl);
pe Cjamare, Elisa De Sabbata (Pd);
pe Regjon, Mariella Unfer (Lega Nord);
pe Provincie, Adriano Piuzzi (Pdl), Margherita Plos (Autonomia per la nostra terra), Elisa De Sabbata (Pd), Patrick Pierre Bortolotti (La Destra).

Al sarès biel vê un dibatit public cun ducj chescj candidâts (o speri di no vê dismenteât nissun, in câs o fasarai la integrazion chi parsore), par domandâur ce che a fasaran par Maian, ognidun te lôr istituzion di competence, se a vignaran elets!
Sêso dacuardi? E ce ur domandaressiso?

Meditazion eletorâl

No ai vût maniere di partecipâ a tantis elezions. Di 12 agns in ca ogni tant o voi a cjoli la schede e la matite e dopo vê segnât, o met il gno vôt te casele.
Ma mai come chest an o pensi a ce che o larai a scrivi su chês schedis che ai 13 e ai 14 di Avrîl a saran cjapadis sù pe elezion de Provincie di Udin, dal Consei Regjonâl F-VJ e dal Parlament.
E il gno nol sarà dal sigûr un vôt "aliniât e cuviert": o soi stât elet intune liste li che insiemit a corevin An-Udc-Forza Italia, ma l'asset politic al è gambiât cuntune fusion imponude (An+Forza Italia=Pdl), une separazion derivade (Udc par so cont) e duncje o soi che mi domandi ce che o votarai.
Il dibatiment a nivel regjonâl su la cuestion identitarie e la tutele de lenghe furlane mi à segnât une vore. Mi à smaraveât la tristerie di cierts intervents e la posizion che sedi An, sedi Forza Italia, sedi l'Udc a àn cjapât a nivel regjonâl mi à viert i voi. O ai cirût in mil manieris di comunicâ cul grup consiliâr di Forza Italia, ma mi soi cjatât denant un mûr di gome. Cuntune ecezion, Massimo Blasoni, che mi à dât la ocasion di fevelâi, di furnî cualchi dât: a la fin nol à votât cuintri, ma nol à nancje votât a pro de gnove leç di tutele de lenghe furlane. Si è impegnât (e i doi at), ma par gno cont no avonde. Il rest dai conseîrs a àn fat declarazions velenosis cuintri de lenghe furlane, doprant une terminologjie al limit de decence. No pues votâ par int che a àn dimostrât tante contrarietât par un teme che jo o riten fondamentâl no dome pe mê identitât, ma ancje pe specialitât regjonâl come che al à ancje dit plui voltis Claudio Violino (te foto parsore), conseîr regjonâl de Lega Nord.

Tachìn de Regjon.
Fate la premesse chi parsore, o dîs che il rapuart personâl cun Renzo Tondo (te foto) al è par gno cont fûr di discussion e duncje Renzo Tondo al è e al reste il gno candidât pe presidence de regjon. E alore cemût fâ? Mi soi metût a lei lis listis e o ai cjalât cui e se o cognossevi cualchidun che tal Centridrete al à lavorât a pro de lenghe furlane in maniere fuarte: cui che al à tirât simpri di cheste bande, difindint cun fuarce la lenghe furlane al è Claudio Violino (Lega Nord, te foto parsore), che o cognòs personalmentri e che o sai che su cheste cuestion nol molarà. In regjon o votarai e us invidi ancje voaltris a scrivi Claudio Violino (Lega Nord, te foto parsore) a pro dal candidât president Renzo Tondo.

Po dopo o ai pensât a la Provincie di Udin.
Chi o soi plui seren parcè che al torne a cori Adriano Piuzzi (Pdl) che mi à garantît une atenzion ancje a la cuestion linguistiche. Cun di plui il candidât president al è Pietro Fontanini e duncje o soi trancuil. Stant che o voti tal coleç di Sant Denêl, su la schede al è za il non e duncje al baste segnâ une X sul simbul Pdl: Adriano Piuzzi (te foto) a pro dal candidât president Pietro Fontanini.

Ancje se o soi a stâ di une altre bande, o dîs ancje alc sul Comun di Udin.
Chi o darès la preference a Simone Bressan (Pdl), un zovin in gjambe, colaboradôr de Patrie dal Friûl e che come me in Forza Italia al è sensibil a la cuestion de tutele linguistiche. Simone, no pues votâti, ma se o fos a stâ a Udin tu varessis dal sigûr la mê preference.

E par sierâ, viodìn dal Parlament.
La fusion cun An no mi va jù. Secont me al jere miôr mantignî la struture federade cui 4 simbui, ma al è stât imponût che si ves di meti insiemit Fi e An. Cheste fusion sbilançade a drete, viers An, un partît che al è cuintri a la tutele des identitât furlane no mi à plasût e no mi plâs. Cun di plui e je la barzalete che pal Senât il Pdl al à candidât Giovanna Iesse che e je in oposizion in consei comunâl di Maian e nus à votât cuintri ancje te aprovazion dal belanç: a mi chestis luianiis no mi plasin e duncje un motîf in plui par no votâ Pdl in Parlament. O varès fat il sfuarç se almancul Vanni Lenna al fos stât tignût in considerazion, e invezit al è stât spostât di une posizion sigure a la cjamare, a une incierte al Senât. E ce centrial Frattini? Îr al è vignût a Udin e tra lis robis che al à dit, al à contestât la leç sul furlan. O soi schifât.
E si son ancje sustâts parcè che i furlans dal Pdl no àn ubidît e no àn metût dentri in liste Volpe Pasini pe Regjon.
Cun cheste, mi soi fat une idee avonde precise di cemût che il Pdl di Rome al considare il Friûl: une robute di meti sul marcjât.
Par tant sedi pal Senât sedi pe Cjamare NO VOTARAI Pdl!
Ta chei dîs achì o cjalarai ben ce che a ufrissin i partîts pe nestre regjon.
Cussì, pal moment, no doi nissune indicazion pal Parlament, se no che dal sigûr NO VOTARAI Pdl.

Auguris papà!

Jo ju fâs a gno pari, che tal paîs ducj lu clamin il "John"!
Tancj auguris papà!

18 marzo 2008

La Cine e cope il Tibet, Simone al boicote lis Olimpiadis


Mi è rivade cheste mail di Simone Paoloni, che o condivît e us met achì.

Stant ce che al è sucedût ta chescj dîs, jo tal gno piçul o boicoti... o miôr o manifesti il gno dissens... su che che al sucêt ta chescj dîs in Cine... a gno mût. Se o volês, fasêt zirâ, se o podês fasêt ancje voaltris alc...

Ve ca Simone: jo o pues dome condiviti la tô antipatie pe Cine e la tô solidarietât pal Tibet.
E mi fasin stomi ducj chei che cuant che a sintin a fevelâ di Cine, a scatin come sustis pensant dome ai afârs e ai bêçs che ur podarès puartâ chê gnove frontiere dal consumisim.
Ma jo mi domandi: ce centrial il spirt decubertinian des Olimpiadis cuntun paîs li che i dirits umans no son rispietâts?

E je rivade la Patrie

La Patrie dal Friûl e je rivade. Tal numar di Març o vin dedicât il "speciâl" a lis votazions. E al continue ancje l'insert Spieli, dedicât ai comuns. Fracait achì par lei il pdf de riviste.
E visaitsi di fâ l'abonament: leile su cjarte e je dute une altre robe!!!

Abonament par un an: 25,00 euros (pal forest 30,00 euros) sul cont corint postal n.12052338 intestât a "LA PATRIE DAL FRIÛL" Glemone

Fotovoltaic sul gjornâl

Cualchi zornade indaûr si veve fevelât di produzion de energje cul soreli. Stant che no vevi rivât a lâ par vie che o jeri li de Pro Majano, vuê us segnali un articul di gjornâl li che al è un piçul resocont dal incuintri. Lait a lei il prin coment.
Tal dissen, un esempli simpatic di cemût che al funzione un implant fotovoltaic pe cjase.
Mi permet ancje di fâ une segnalazion par cjatâ cualchi informazion di plui, ma o fâs ancje une premesse, tal link che o larês a viodi, a son informazions che no ai rivât adore a verificâ. Duncje us dîs cjalait i aspiets gjenerâi, ma su finanziaments e numars, no met la man sul fûc. Anzit, se cualchidun al à numar plui sigûrs o altris informazions, par plasê fasêt une segnalazion: intant, dopo cheste lungje racomandazion, lait a viodi achì.

17 marzo 2008

Il gjenocidi in Tibet

Ta chescj dîs o vin let la tragjedie dal Tibet, aromai teatri di un gjenocidi culturâl metût in vore de Cine che e smire a scancelâ i tibetans e la lôr identitât, come che al à denunciât ancje il Dalai Lama.
Daûr de segnalazion di Roberta, che o ringrazii, tal prin coment us met une testemoneance dal poete tibetan Tenzin Tsundue, in esili in Indie.

16 marzo 2008

Giovanna Iesse candidade pal Pdl

Di cualchi zornade e je notizie publiche che la conseire Giovanna Iesse, iluminade su la vie di Arcore, e je candidade pal Pdl pal Senât.
Giovanna Iesse a Maian e je in consei in oposizion a une maiorance di centridrete: te sentade dal consei pal belanç (lunis ai 18/02/2008) e à ancje fat un atac une vore dûr cuintri de maiorance, votant cuintri a la nestre propueste di preventîf 2008.
Chi sot o ripuarti il so curriculum politic dai ultins agns, che le à puartade a la corse par Palaç Madama te liste dal Pdl.
Ma prime us visi che, come che o vevi za anticipât, e je vignude fûr al letare che al someave che ziràs par Maian: sedi Intesa per Majano sedi Fausto Floreani nus comunichin il contignût.

Il curriculum politic resint di Giovanna Iesse:
2004 elezions pal consei comunâl di Sant Denêl: Giovanna Iesse e cor come tierce candidade sindic (cualchi mês dopo e deventarà referent pe Margherite te zone colinâr). No ven elete.
2006 elezion pal consei provinciâl di Udin (Avrîl): la Margherite e met tra i candidâts Giovanna Iesse cuintri la coalizion di Centridrete. No ven elete.
2006 elezion pal consei comunâl di Maian (Avrîl): la stesse Giovanna Iesse e cor come conseîr tal Centriçampe cuintri la coalizion di Centridrete. E ven elete, ma e va in oposizion.
2007 in Novembar in consei comunâl a Maian, Giovanna Iesse si declare indipendente dal grup Intesa per Majano, ma e reste in oposizion cuintri une maiorance di centridrete.
2008 consei comunâl di Maian (Lunis ai 18 di Fevrâr): cuant che si veve di votâ la aprovazion dal Belanç di prevision 2008, la Giovanna Iesse che e je in oposizion, indipendent, e vote cuintri dopo vê let une relazion une vore dure cuintri de maiorance di Centridrete (par lei il test dal intervent, fracait achì).
2008 elezion pal Senât di Rome (Avrîl) la stesse Giovanna Iesse e cor come candidade te liste dal Pdl, come parlamentâr dal Centridrete (ve ca lis listis).

Salte di ca, salte di là... mi ricuarde cualchidun...

15 marzo 2008

La simie crote

Vuê o ai stât a viodi une biele mostre: la simie crote, la storie de evoluzion dal om e il confront cun nestris antenâts, lis simiis.
Pensait che cui simpanzè o vin il 98% dal DNA compagn... beh, cjalant cualchidun, forsit al è cualchi câs li che la diference e je pardarbon inmò plui piçule... eheheh, ma no ai voie di dî tristeriis!
A par batudis o soi propit content, massime pe vuide di ecezion che mi à acompagnât in visite: la archeoNinine furlane (te foto cun me)!
Tra l'altri, conseant a ducj di lâ a Udin a viodi la mostre che e je te glesie di Sant Francesc, dongje de Cjamare di Cumiêrç, tribunâl... insome, in place Venerio, us consei ancje di passâ a dâ un cuc al gnûf blog furlan nassût di cualchi zornade: l'archeoblog de Ninine!

13 marzo 2008

Il Diari di Tosoni

Ve ca la cuviertine dal Diari, cuindisinâl jessût îr e che o podês discjamâ in version pdf fracant achì.

L'ultin Alc&Cè

Sabide ai 23 di Fevrâr, cu la Vite Catoliche, in regâl il gnûf numar di Alc&cè, il gjornalut par fruts dut in marilenghe, realizât cul contribût de Direzion centrâl Istruzion, culture, sport e pâs de Regjon Friûl-Vignesie Julie.
Chest colp si fevele di inovazion, dal Friûl come tiere di inventôrs. A tornin i Gnognosaurs, Sclisignûf e Alan l’acuilot nostran cu lis lôr aventuris divertentis a fumets; i zûcs, par divertîsi imparant la lenghe, e la conte, ispirade a une storie di Dolfo Zorzut. E po tantis ideis pal timp libar. Lis bielecis artistichis e naturâls di Grau a son ae puartade dai fruts che a decidaran di provâ l’itinerari in biciclete conseât, mentri «Il cjantonut dal fâ» al insegne a realizâ un tambûr cu la sô bachete.
Par sugjeriments e curiositâts sul gjornalut, si pues scrivi une e-mail a Erika Adami, coordenadore de riviste, ae direzion: adami@lavitacattolica.it

Par discjamâ il pfd, ancje dai numars passâts: fracait chi

12 marzo 2008

Musiche vuarbe

Induvinâ lis cjançons cence vê altris indizis al è il contignût di chest zûc che al cjape dentri i musiciscj furlans di Musiche Vuarbe, in onde su Radiorai a lis 13.30 ogni miercus.
A son 10 pontadis par un viaç tai agns Setante, tra lis musichis e la memorie dai musiciscj furlans.
Il program e al condot di Pauli Cantarut e Zorç Cjanton che a ospitin ogni pontade un musicist furlan che al à di induvinâ cjançons publicadis tai discs dal 1970 al 1979.
Une maniere di rivivi la storie su la musiche plui o mancul famose che si scoltave ta chei agns: da chê internazionâl, a chê taliane, di chê plui popolâr a chê plui di èlite.
I ospits, un par ogni an, a son par ordin: Dario Zampa, Alessandra Kersevan, Lino Straulino, Emma Montanari, Ermes Maria Ghirardini, Andrea Del Favero, Glauco Venier, Stefano Montello, Leo Virgili, Cristina Mauro.

11 marzo 2008

I 130 agns di Colonia Caroya

Ai 15 di Març dal 1878 a rivavin in Argjentine, a Colonia Caroya, lis primis fameis furlanis che a fondarin chê citadine che cumò e à 25.000 abitants, metât a son i nevôts di chei furlans. E a fevelin inmò par furlan.

Par chest aniversari e je previodude cheste cunvigne. Un mandi al gno amì Claudio Roya, a la redazion di Radio Comunicar FM e a ducj i furlans argjentins di Colonia Caroya: tancj auguris!!!


Vinars ai 14 di Març 2008

Comunitât Culinâr dal Friûl

Cu la colaborazion de Regjon Autonome Friûl Vignesie Julie

Lenghis minoritariis, media, emigrazion - II

La emigrazion e fâs part de storie di tantis comunitâts di lenghe minoritarie. Tra i emigrâts l'ûs de lenghe native si à svilupât in maniere divierse a seconde des tieris là che a jerin rivâts, ma cun cierts elements in comun: il leam fuart des primis gjenerazions, la crevadure des secondis e, dispès, il recupar di interès des tiercis.

La prime cunvigne su "Lenghis minoritariis, media, emigrazion" si è davuelte tal 2007 a Colorêt di Montalban in Friûl. Si à cirût di rifleti su cemût che la difusion dai gnûfs mieçs di comunicazion e ufrìs imprescj origjinâi par valorizâ i leams di culture e di lenghe tra regjons di divignince e comunitâts emigradis a pro di une condivision des esperiencis.

Cun chest secont apuntament che si davuelzarà a Colonia Caroya in Argjentine, ma che si podarà viodi e scoltâ globalmentri su la rêt, si vûl puartâ la riflession su la necessitât di une comunicazion ative "viers" e "da" la emigrazion. Lis gnovis tecnologjis a cualis richiestis puedino dâ une rispueste?

Isal pussibil progjetâ un "Friûl mondiâl", un "Friûl in rêt", dulà che lis diviersis comunitâts a interagjissin intune rêt di relazions che no vedi simpri tal centri la nestre Regjon?

Cuâi sono i struments e lis strategjis di comunicazion e - infin – cuâi sono i servizis che a àn di sedi realizâts par rivâ a chest obietîf?

Cemût cambie, seont cheste prospetive, il rûl des associazions storichis dai emigrants?

Blog: http://lenghisminoritarismediaemigrazion.wordpress.com/

Il salt dal scriç

Cjalant lis listis presentadis pe regjon e pal parlament, mi è vignût iniment "IL FRIULI", dulà che o ai let un editoriâl di Amstrong.
Us met achì juste une cerce...

"Cul svicinâsi de Primevere, come piçui cjaps di uciei migratoris che si dan dongje parcè che la date des elezions si svicine simpri di plui, a tornin i candidâts "peones". Si clame "peone" cui che par motîfs di vanitât esagjerade o tindincis masochistichis al met la sô candidature intune formazion politiche a câs cence la minime pussibilitât di jessi elet, ma al coltive chest sium in segret..."

Voaltris vêso vude la stesse sensazion?....

Sapade furlane

Come che nus vise il Dree, vuê si varès di savê alc di plui sul risultât dal referendum par che Sapade (Plodn) e torni in Friûl. Cjalait sul Furlanist.

10 marzo 2008

+sKlet 04.08

Miercus ai 12 e tache la gnove serie de trasmission +sKlet 04.08 su Telefriuli. Ancje jo o soi stât clamât a regjistrâ une pontade par fevelâ di Internet par furlan, in particolâr dal materiâl multimediâl in lenghe furlane che si pues cjatâ in Rêt.
Duncje apontament ogni miercus a lis 17.45 e in repliche la domenie a lis 22.15.

09 marzo 2008

Pause


Guardo gli asini che volano nel ciel

Furlan a scuele

Cualchi zornade indaûr une letare di une insegnante di Buie mi à fat glaçâ il sanc. Vuê par furtune un pâr di letaris i rispuindin e us torni a meti tai coments cheste discussion.
Al veve reson pre Toni cuant che al diseve che buine part des colpis e je dai insegnants che vint la responsabilitât di cressi lis gnovis gjenerazions, a àn il podê di scancelâ la lenghe di un popul!

"Si che duncje, si vierzin lis scuelis.
Coragjo, biâts gjenitôrs che o tradîs la vuestre canaie, biâts mestris che le ruvinais, e soredut biâts fruts che o jentrais contents e cence nissun scrupul là che us coparan!
Tant che un agnel in becjarie".
(Antoni Beline)

08 marzo 2008

Fieste de Femine

Ma parcè cheste fieste? Tra aveniments che a san di sagre e cenutis, forsit si à tacât a pierdi la memorie sul parcè di cheste ricorence. Stant che o pensi che se si secje la lidrîs, la plante no cres, pluitost che fâ spetacui al è necessari ricuardâ.
E alore, augurant a lis feminis bon "8 di Març", mi auguri che i oms no si visedin des feminis dome vuê.
Par savênt di plui: fracait achì.

Doi agns

Un frut di doi agns al cjamine... beh, mi somee che ancje chest blog al va: a son compagns...
Un frut di doi agns nol fevele tant... chest blog invezit par cualchidun al fevele masse: a son difarents...
Un frut di doi agns al è divertent... beh, cence modestie, ancje chest blog ogni tant al fâs ridi: a son compagns...
Un frut di doi agns nol fâs durmî la mame cuant che al vai di gnot... chest blog nol fâs jevâ nissun parcè che nol vai: a son difarents...
I fruts di doi agns (in jù) a son stâts eliminâts di Erode... chest blog lu fasaressin fûr vulintîr (e no mi riferìs a Erode): a son compagns o a son difarents (dipent dal pont di viste)...

E cumò, ringraziant ducj i letôrs di chest blog, mi fâs dibessôl, ma condividint cun voaltris, i auguris pai 2 agns di chest blog, screât ai 8 di Març dal 2006!!!

La robe plui biele e je fâ fieste cu lis Feminis: auguris e tantis mimosis par dutis!!!



ps. se o volês, provait ancje voaltris a continuâ tai coments chest zûc: "un frut di doi agns e il blog: compagns o difarents?"

07 marzo 2008

Assemblee de Filologjiche

Domenie ai 9 di Març aes 9.30 e je la Assemblee de Societât Filologjiche Furlane pe aprovazion dai belanç.
Par lei la convocazion, fracait achì.

06 marzo 2008

Produsi energjie sparagnant

Vinars aes 20.30 inte sale dal consei dal Comun di Maian si davuelzarà une cunvigne sul "Solâr fotovoltaic" e lis oportunitâts che e da cheste font energjetiche alternative.
E je une iniziative dal assessorât al ambient.
Par viodi il volantin de serade, fracait achì.

05 marzo 2008

Assemblee de Pro Loco

Come che o ai za anticipât la setemane passade, vinars ai 7 a lis 20.30 li dal salon centrâl dal palaç des Associazions in vie Zorutti 4 si davuelzarà la assemblee gjenerâl de associazion Pro Majano.
Si preanuncie un grum di iniziativis par chest Festival 2008 e o speri che e vegni confermade une cierte vôs che e zire par Maian...
Si viodìn a la assemblee.

04 marzo 2008

Iniziativis pe fieste de femine

Chest an l'assessorât ae culture e a la paritât om femine a àn inmaneât un pâr di iniziativis in ocasion de fieste de femine. Vinars ai 7 a lis 18.30 te sale Ciro di Pêrs si scree une mostre di artiscj oms che a dedichin lis lôr oparis a lis feminis.

Sabide ai 8 di Març a lis 20.45 in auditorium
al è un spetacul simpri dedicât dai oms a lis feminis (chi in bande la imagjin de locandine).
Come che si lei tal invît... Dedicât a jê: teatri, danze, poesie e musiche, "performances" di talents masculins.
Ta che sere e sarà ancje une racuelte di beneficence in memorie di Mariagrazia Scandolin, pal repart oncologjic feminin dal Cro di Davian.
Par viodi i invîts complets, fracait chi.

03 marzo 2008

02 marzo 2008

Fasint doi conts...

Duncje, viodìn...
se l'un tal vot al sta vot voltis...
ancje il dîs tal otante al stâ vot voltis...
e alore dîs mil tal otante mil al sta vot voltis ancje chel...
cifre taronde... cheste volte al è just...
thermo mi à za coionât avonde...
bon alore cheste volte lu publichi... click:
GRAZIE par chescj 80.000 contats di cuant che o ai screât chest blog!

01 marzo 2008

Sul comodin

Pre Tonin Cjapielâr, plevan di Ruvigne, mi à fat un biel regâl.
Propit chê altre dì o ai ricevût "Pre Checo Placerean, notis par une biografie" (ed Arts Grafichis Furlanis, 1997), un libri scrit di pre Antoni Beline su la vite di Francesc Placerean, predi furlanist, grande inteligjence dal secul passât e tra i fondadôrs dal Moviment Friûl.
Us met achì un tocut, cu la promesse che o tornarai a scrivi alc plui indevant.
Al scrîf pre Toni ta chest libri su pre Checo (te foto):

"Tal contest culturâl di une Europe di popui.
Dongje de fonde culturâl pal popul furlan, pre Checo al veve vude une seconde, fenomenâl intuizion: che il Friûl si salvave dome tun contest di Europe dai Popui, in linie cu la sô tradizion storiche. Il claut che lui al bateve saldo al jere che il Friûl al à tacât a stâ mâl cu la Italie parcè che al è stât confinât intun cjanton e cjonçât fûr dal so puest legjitim tal cûr de Europe. Si podeve vê sperance dome internazionalizant la cuestion dal Friûl e fasintlu tornâ a respirâ cui siei polmons naturâi e tal so aiar naturâl, l'aiar de convivence plurietniche e pluriculturâl di Aquilee prime e de Mitteleurope dopo.
"

Cumò par furtune i confins a son colâts, sperìn che e sedi daûr a sflurî une gnove Primevere ancje pal popul furlan.