31 maggio 2007

Canis aureus

Ve chi un esemplâr di Canis Aureus.
Come che o podês lei ancje sul link chi parsore, al è di cualchi timp ancje presint in Italie, e, secont cualchidun, adiriture in Friûl, plui precisamentri a "Maian e dulintor"...
Al nestri "segnaladôr": cheste dediche.

30 maggio 2007

Il Zîr

Ancje chest an il Zîr di Italie in biciclete al è passât pe Cjargne, ancje se la ultime volte al jere passât plui dongje dai nestris paîs. Cualchidun isal migo lât sul çoncolan a viodi la tape?
Personalmentri o pensi che iniziativis cussì a puedin zovâ a fâ cognossi la nestre tiere. Compliments al comitât organizatîf.

29 maggio 2007

Dam ambientâl tal Cuar

Vuê o ai let une robe sul Gazzettino che mi à preocupât une vore. Un trafilet al visave che de Ex fornâs a Sant Liseu, une cuantitât di vueli pesant e je saltade fûr di une cisterne e e je finnide tal Cuar. O ai fat daurman une interogazion par domandâ clariments ae aministrazion.
Chest il test de interogazion.

AL SINDIC DI MAIAN

Leint la stampe locâl di vuê al risulte che in frazion Sant Liseu si sedi verificât un fuart incuinament des aghis dal Cuar e de zone, cause vueli industriâl che al è jessût di une cisterne.
Il sot scrit conseîr comunâl CHRISTIAN ROMANINI

al interoghe

il sindic e la zonte

  1. par savê cuale che a je la reâl situazion
  2. se a son stadis individuadis responsabilitâts par chest fat
  3. ce previodiments che la aministrazion e intint cjapâ in mert a cheste situazion

mandi e grazie
christian romanini
conseîr di FI

Aes 18.30 il Sindic nus à convocât in Municipi par informânus cemût che a son lis robis. In sostance cualchidun al à viert une saracinesche intune tubature e al è vignût fûr il vueli. A son in cors indagjins. Jo o ai domandât che la cisterne che e je restade plene di vueli di cuant che la fornâs e je sierade, a vegni bonificade e svuedade. Il vueli al è il combustibil dal for de fornâs, ma dopo tot agns al semee che nol puedi plui jessi doprât.
tai prossims dîs sperìn di rivâ a savê alc di plui. Intant il comun al à scugnût intervignî clamant une scuadre di bonifiche e cumò viodarìn cui che al paie.
Finide la riunion o soi lât a viodi e in efiets, cuant che si rive a un ciert pont si viodin lis cjanussis plenis di vueli e la puce e je pardabon fuarte.
Tai coments, il trafilet che al jere sul Gazzettino.

28 maggio 2007

Brâfs chei di Cjasesole

Compliments a Dario dai Ols e a chei di Cjasesole. Ancje se al à fat brut timp, ancje la edizion 2007 de fieste dal sport e je rivade insom.
Lait a lei achì un articul in mert, su Sportfriuli.

27 maggio 2007

La Patrie Radio Onde Furlane

Doman, lunis ai 28 di Mai o sarai ospit a Radio Onde Furlane, cun Dree Venier e Zuan Pieri Biasat par fevelâ dal numar di Mai da "La Patrie dal Friûl" (te foto, la cuviertine).
Cui che al vûl scoltâ la trasmission "Ator Ator" al pues colegâsi tor 10.00 sui FM90.0_Mhz o scoltâ la trasmission in streaming.

26 maggio 2007

Glesie Furlane e ricuarde pre Toni a Vençon

Domenie ai 27 di Mai, zornade di Pentecostis, tal Domo di Vençon (te foto) aes 19.00, bonsignôr Roberto Bertossi al celebrarà la messe par ricuardâ pre Toni Beline a un mês de sô muart.
“La sielte di ricuardâlu a Vençon” nus sclarìs Glesie Furlane “si fonde su dôs motivazions: pre Toni Beline al jere nassût a Vençon e simpri a Vençon la nestre associazion e à la sede dai i siei incuitris che si fasin ogni mês”.
E cussì la associazion e à decidût di rindi omaç al grant predi furlanist propit tal paîs li che al jere nassût ai 11 di Fevrâr dal 1941 e che lu à viodût tantis voltis protagonist dai apontaments culturâi inmaneâts de associazion che e met adun predis e laics impegnâts tal puartâ la lenghe furlane ancje dentri dal mont de glesie.
La messe e sarà come che i plaseve a pre Toni: cjantade dal popul. Al intervignarà ancje il grup di cjantôrs di Guart, vuidâts di pre 'Zef Cjargnel.
A la fin de funzion al è previodût un intervent dal prof. Remo Cacitti, docent ae Universitât di Milan.
Tal dopomisdì prin di messe e je convocade une riunion di Glesie Furlane “La riunion le fasìn par fâ une riflession su ce che pre Toni al à fat e lassât a Glesie Furlane e par resonâ sul avignî de nestre Associazion cumò che lui nol è plui: o puartarìn indevant dut ce che lui al veve fin sul ultin progjetât cun nô” al declare il dean Zuan Pieri Biasat.
Pre Toni Beline (66 agns) al è mancjât ai 23 di Avrîl dal 2007 a Visepente, dulà che al jere rivât tal 1982.

Brute notizie

Pardabon une brute sorprese vuê leint il MV.
Un mestri de scuele di bal al è stât arestât cu la acuse di violence sessuâl su minôrs (almancul cussì si lei sul gjornâl).
Propit une brute storie se e fos vere. Cumò a son in vore i incuirents. Ogni coment e judizi pal moment secont me si à di lassâlu ae magjistrature che e je daûr a fâ lis indagjins.
Pal ben di chei fruts che a son cjapâts dentri di cheste vicende, sperìn che no sedi vere.

25 maggio 2007

E cumò ti conti jo (vol. 2)

Vuê intun auditorium plenon di mamis e paris, fradis e sûrs, nonos e nonis, barbis e agnis, cusins e dut il rest dal parintât, al è stât presentât il secont volum dal progjet didatic "E cumò ti conti jo" dal asîl di Maian, flabis scritis dai fruts pai fruts.
La publicazion e je un progjet dal Istitût comprensîf di Maian e Forgjarie e e je finanziade de Provincie di Udin (LR 15/96).
O ringrazii il preside, lis mestris e i frutins che mi àn permetût di condividi cheste esperience cun lôr.

24 maggio 2007

Spietant la Bikerfest (21-24 di Jugn 2007)

E rive di Daytona 2007 cheste cerce di ce che o podarìn viodi in Cjargne sul Çoncolan: la Bikerfest numar 21, dai 21 ai 24 di Jugn dal 2007.
Grazie a Moreno pal video che o vedês.

Ps: "compliments" a Renzo Scarso, za assessôr al turisim de Comunitât Colinâr, par vê pierdude la ocasion di tignî te nestre zone une manifestazion come cheste.

23 maggio 2007

Fieste dal Sport a Cjasesole

E tache joibe ai 24 la Fieste dal Sport a Cjasesole. La iniziative e je inmaneade de Pro Loco di Cjasesole: compliments a ducj e grazie a Dario dai Ols che mi à mandât la foto.

Ve chi il program de Fieste:

Joibe ai 24:
aes 6 sore sere si vierç la fieste e al tache il torneu di balon in 6;
aes 9 sore sere "Serade in ligrie".

Vinars ai 25:
aes 6 sore sere si vierç la fieste e al continue il torneu di balon in 6;
aes 9 sore sere "Serade in ligrie".

Sabide ai 26:
aes 9 di buinore si vierç la fieste e al continue il torneu di balon in 6;
aes 3 e mieze dopomisdì e je une gare di bicicletis cu la colaborazion di "Jam's Bike Team" (ma par lâ in biciclete si scuegnial par fuarce vê une scuadre par inglês? Boh...);
aes 6 e mieze sore sere a son lis premiazions de corse;
aes 9 di sere serade di discoteche e al met sù musiche DJ Claudio (vuelistu viodi che il Sindic al à cjatât un gnûf passetimp...)

Domenie ai 27:
aes 9 di buinore si vierç la fieste e al continue il torneu di balon in 6;
aes 10 di buinore e je la tierce edizion de scuele di piture cun Monica Zumino
aes 2 dopomisdì e je la ultime fase dal torneu di balon in 6;
aes 3 dopomisdì si zuie cu la Asd Basket Friuli;
aes 4 dopomisdì a rivin lis machinis dal Radun Lancia Delta in colaborazion cun Motori Italiani
aes 5 dopomisdì a son lis premiazions dal Radun Lancia Delta e dal torneu di balon in 6
aes 8 sore sere e tache la serade musicâl cui "2 di Notis"

Cun dut chest sport, mi è vignude gole passâ a cjatâ chei de foto... disìn che lis specialitâts e saran "Corse pe brusadule" e "Salt de polente" ;-) (e la belance e proteste simpri di plui...)

22 maggio 2007

Colorêt: la mê relazion "Emigrâts inte rêt"

Sabide e je stade propit une biele esperience. O vin fevelât in direte ancje cun Radio FM Comunicar di Colonia Caroya (ARG) e cul prof Zorç Cadorini in Cechie. Il gno intervent al è stât spostât tal dopomisdì. Par chei che no jerin e par chei che no nus àn cjalât in streaming, ve ca la mê relazion.

Cjistiel di Colorêt di Montalban, ai 19 di Mai dal 2007

Emigrâts inte rêt
Une idee par un canâl informatîf mondiâl, spontani, libar e furlan

Il resonament che o larìn a fâ al partìs di une evoluzion che massime tai ultins timps a àn vût i mieçs di comunicazion e di informazion.
Un pâr di esemplis mi judaran a presentâ ce che a significhin une fruizion passive e une friuzion ative de informazion.
La fruzion passive e je tipiche dal scoltadôr di radio e spetadôr di television. Chest model si lu clame “verticâl” stant che il broadcast al previôt une schirie di condizions par che l'utent al ricevedi i contignûts metûts in circolazion. Di fat e covente une “sincronie”: l'utent al à di jessi denant dal ricevitôr e tal moment de emission dal contignût se no nol pues savê ce che al ven trasmetût. Cun di plui chest sisteme al è ancje condizionât de distance: i ripetitôrs che a permetin di puartâ il segnâl a àn une potence che e pues jessi ancje fuarte, ma dut câs e reste simpri limitade e simpri unidirezionâl di emitent a utent.
La fruizion ative invezit e je chê che al à un cybernavigadôr o miôr un utent di internet. Chest model si lu clame orizontâl, stant che no si à plui chês condizions che a limitavis il model dal broadcasting. Di fat la friuzion de informazion su internet e je “asincrone”, tal sens che e je indipendent sedi dai timps e des distance: une volte che i contignûts a son metûts in rêt, chescj a son simpri a disposizion di cui che al à voie di cognossiju. In ogni moment e dapardut, baste conetisi. Cheste situazion e à permetût une rivoluzion te circolazion dai contignûts, ven a stâi la pussibilitât pai utents di podê cirîsi lis informazion in maniere plui indipendente e libare, ancje se in forme inmò unidirezionâl.
Ma a chestis premessin, a son vignûts daûr altris doi elements che a rivoluzionin l'acès a la informazion:
1)une diminuzion dai coscj de tecnologjie
2)une velocitât di trasmission dai dâts simpri plui alte.
Cheste situazion che e partìs dal model orizontâl che o vin a pene presentât, e permet che l'utent nol sedi plui dome un friutôr atîf, ma il sogjet al deventi un produtôr di contignût. Cun chestis condizions si cree la pussibilitât di passâ di un model di fruizion al model de Condivision (ce che par inglês si sint a clamâ “sharing”).

La Seconde rivoluzion
Ancje se la prime (il passaç dal model verticâl a chel orizontâl) e jere za une grande rivoluzion, cun cheste o vin une facilitazion inmò plui grande.
Di fat ancje cui che nol cognòs la informatiche al devente no dome un fruitôr di contignûts, ma al devente protagonist di creazion di contignûts. O vin duncje la pussibilitât di doprâ Internet ancje par chei che no son programatôrs informatics.
Par meti contignûts in rêt e covente dome une competence culturâl, vâl a dî chê capacitât di produsi contignûts, cence necessariamentri vê plui une competence informatiche.
Cheste evoluzion di Internet viers il concet di condivision si lu clame WEB 2.0 (la seconde fase di Internet).

I imprescj dal Web2.0, cualchi esempli
Informazion e gnovis tecnologjiis (idee di condivision di esperience e cognossince)

Blog_Un blog, struc di web log, al è un diari personâl su Internet, inzornât plui o mancul frecuentementri dal proprietari che lu à viert (gjeneralmentri une persone). Sul blog, che ducj a puedin lei e comentâ, a vegnin publicadis in timp reâl notiziis, informazions, opinions o contis di ogni gjenar.
Esempli:
un blog: ILfurlanist
un post: un contignût (notizie, opinion, messaç, batude, la riflession, insiorade di un video, une foto, une musiche...) che il titolâr dal blog al decît di publicâ.
un coment: l'intervent di cui che al visite il blog e al decît di lassâ un sô parê suntun post.

Il nivel di condivision di un blog al pues ancje jessi slargjât dant la pussibilitât di meti dentri contignûts (post) a plui personis. Fasint cussì al pues deventâ un spazi li che si dan dongje navigadôrs che a condividin interès comuns, ven a stâi un spazi tematic (al è il câs dal Furlanist, li che l'argoment di fonde e je la furlanetât e la cause furlaniste).
Rispiet ai prins blog saltâts fûr tal 1999, in dì di vuê fâ un blog al è pardabon facil: si pues screâ un blog cence cognossi nuie di informatiche. Si sielç la impostazion grafiche tra modei predeterminâts e si pues tacâ daurman a meti dentri i contignûts (post).
Il servizi al è dât di diviersis aziendis che a dan ospitalitât a gratis a cui che al à voie di vierzisi un blog: www.blogger.com o www.splinder.com (che dome chescj a contin aromai miârs e miârs di utents).
Par fâ rindi miôr il significât dal concet di partecipazion intun blog midiant i coments dai visitadôrs, si pues fâ l'esempli cjapant un post dal blog di Beppe Grillo, un dai prins al mont in tiermins di letôrs. Se o cjapin un post cualsisei o viodìn che la partecipazion medie e puarte almancul plui di 1000 coments. Chest al significhe che daûr di ogni post al ven scrit intun pâr di zornadis l'ecuivalent di un libri di 200 pagjinis (esempli un post sui timps de justizie).
Ma un blog nol rest par fuarce sierât te rêt: al pues deventâ spont par iniziativis che a àn efiets ancje te societât reâl (no “virtuâl”). Al è juste il câs di ricuardâ un esempli che nus tocje di dongje e che al è sucedût a di un ent: il cefap.
Intune publicitât che e veve tacât a zirâ par radio, si presentave un cors di formazion par operadôrs di agriturisim. Il spot al jere stât comissionât dal Cefap, un istitût di formazion che al à sede a Codroip.
Ta cheste publicitât, dute par talian, si sintive une siore che e gjestìs un agriturisim e che dopo vê cjapade la ordenazion dal client invezit di lâ in cusine e lassâi l'ordin al cogo, si meteve a berghelâi tal mieç de sale: in sostance il messaç che al passave al jere che intai agriturisim furlans, il personâl al fevele par furlan e al berghele, duncje nol è professionâl e e par chest al à di lâ a fâ i cors di inzornament. In dut chest la lenghe furlane e vignive associade a un messaç une vore negatîf.
Grazie ae segnalazion di Aldo Rossi, un musicist che al sta a Tumieç, chest notizie e je stade metude tai blogs furlans e simpri grazie a Aldo Rossi al è stât metût in rêt il test di une letare di proteste in maniere che e fos condividude e mandade par mail a la Cefap di ducj chei che si sintivin ofindûts de publicitât in cuestion. Si domandave di sostituî chel spot che al ofindeve la dignitât de lenghe furlane e dai tancj che a lavorin te ristorazion par furlan e cun professionalitât. Risultât? Il president de Cefap nus à rispuindût a ducj par email, scusantsi e il spot al è stât modificât in maniere che la lenghe furlane no fos plui metude sot di une lûs negative. O lassi a voaltris i coments sul significât ecezionâl di cheste azion, stant che ancje chei che no son dal setôr a puedin rindisi cont di ce che al significhe un investiment par un spot radiofonic, che al jere za stât finît e metût in onde e che al è stât gambiât.
Ma tai ultims timps a son diviers i esemplis che a testemonein cemût che lis gnovis tecnologjiis a puedin vê une ricjadude su la societât, permetint a la int di organizâsi cun facilitât e di passâsi informazions in maniere svelte, cun efiets che pal passât al sarès stât une vore plui dificil di rivâ a vê.
Forsit o ricuardarês il grant polvaron che al veve cirût di alçâ il cuotidian il Messaggero Veneto.
Mi riferìs a la polemiche strumentâl montade sù dopo de vignude in Friûl di Beppe Grillo, che intune declarazion vie par une repliche dal so spetacul si smaraveave de convivince tra “Inovazion” e “Marilenghe”, acusant i furlans di jessi vitimis di une sorte di schizofrenie. Il gjornâl in cuestion al veve cirût di meti in evidence cheste dicotomie promovint il solit scandai strumentâl “Furlan o inovazion?” metint in cuintriposizion i doi concets e forsit tal cjâf al veve voie di rivâ a un risultât ben precîs... Ma ancje cheste volte, la cuestion e je rivade sui blog (cjale chi ce che al è sucedût). Ancje in cheste ocasion si à preparât un messaç di proteste, li che si à declarât che i doi concets no son in cuintriposizion ni in concorince, anzit a convivin in maniere une vore costrutive e trancuile. Pal solit, cuant che il gjornâl in cuestion al propon scandais dal gjenar, par zornadis o cjatìn pagjinis e pagjinis che a ripuatin i risultâts e e je simpri une predominance di une posizion su chê altre... Stranementri cheste volte la robe e je muarte sul nassi e no vin vût il plasê di lei pagjinonis su pagjinonis. Anzit in pocjis riis si à vedût che divierse int e pensave e e pense che lis gnovis tecnologjiis e la lenghe furlane no son une contradizion, ma une realtât pussibil e za concrete, cence nissune schizofrenie. Come ultin esempli di cheste influence su la societât e interazion tra i utents, us ripuartìn chest episodi che al à rivuardât Radio Onde Furlane, vitime a Març di un atac decisamentri brut: su la puarte dal palaç li che e je la sede de radio a son stât piturâts simbui naziscj cu la vernîs nere. Simpri sui blog (cjale chi ce che al è sucedût) e je partide une campagne di solidarietât che e à viodût une vore di intervents a coment di chest fat, condanât di une vore di int.
Ma il blog al pues ancje deventâ imprest di promozion di materiâl in Internet, par esempli il videomusicâl “Puar Beppin” (2 minûts) dai Arbe Garbe, al è stât viodût za 1.100 e passe voltis; il videodocumentari che o viodarìn tal dopomisdì “Diari di viaç-Charleroi” (37 minûts) al è stât viodût passe 930 voltis.
Ducj i doi chescj prodots, dopo jessi stâts metûts in rêt, a son stât segnalât o metûts in “condivision” su plui blog e fats cognossi ai lôr letôrs, che cun dute probabilitât ju varessin cjatâts cun dificoltât cence cheste segnalazion che e à dât plui visibilitât a chest materiâl.
Chestis carateristichis e altris che no rivìn a nomenâ par cuestions di timps, a àn puartât a la trasformazion di un strument nassût tant che un diari in rêt a fenomen sociâl che al condizione la cuotidianitât di desinis di milions di personis in dut il mont.
E chest si lu fâs cence scrivi une rie di html (il lengaç tecnic par programâ), cence intindisi di Internet! In sumis une robe che ducj a puedin fâ: baste vê un ordenadôr, une conession Internet e un pocje di... voie di comunicâ e condividi.
BLOG E INFORMAZION_Stant la grande semplicitât e libertât, i blogs si cuintriponin subit al gjornalisim tradizionâl. I media tradizionâi a vegnin incusâts di jessi al servizi di editôrs cundizionâts. Une des critichis plui fuartis al blog e pues jessi sintetizade dal intervent di Gianni Riotta, vicediretôr dal Corriere della Sera (e prin gjornalist che si è firmât cu la mail suntun cuotidian) che al è intervignût in mert al argoment cuntun editoriâl che al à mot un biel gjespâr di polemichis te “blogosfere” (cussì si lu clame il mont dai blogs). Riotta al scrîf “Il lôf dai gjornâi al mangjarà l'agnel dal blog. E al è un ben”. In sintesi al dîs che i blogs a riciclin une antighe utopie: Riotta al paragone la fase atuâl dai blogs e de esaltazion de informazion democratiche cui timps des radio libaris dai agns Setante, cuant che e jere une grande varietât e vivarositât che però dopo e je stde glotude dai grancj grups editoriâi.
BLOG E EDITORIE_Di cuintri il blog, jessint un imprest dedicât ae scriture, al è doprât di tancj aspirants scritôrs par esprimisi e fâ lei i lôr lavôrs. Un articul di no tant timp indaûr dal Corriere della Sera al jere intitulât: “Vuê Montale al publicarès su Internet”. Si sostignive tal articul che pe poesie, che no à grancj riscuintris di vendite, al podarès jessi un imprest privilegjât. Une gnove nus dîs che Paolo Anio (fondadôr di Matrix), Gianluca Dettori (ideatôr di Vitaminic), Fausto Gismondi (ex diretôr editoriâl di Virgilio) e Massimo Esposti (ex amistradôr delegât di Apogeo) – editôrs tal cjamp dal web – a àn dât vite a Unwired Media, cjase editore che e publiche autôrs cjatâts fûr tal web. Di fat, al è grandonon il volum di contignûts che milions di blogarins scritôrs, musiciscj, videoamatôrs, fotografs a produsin e “a publichin” in rêt ogni dì. Blog come ricercje di talents?
BLOG E FOTO_Cu la incressite de memorie a disposizion, a son sîts che a ufrissin un grum di spazi gratuit par meti fotografiis. Il plui grant al è www.flickr.com li che intun moment si pues cjamâ in linie lis fotos.
BLOG E VIDEO_E di pôc e je nassude ancje la pussibilitât di mandâ fûr contignûts video sul blog. Il servizi plui cognossût al è chel di www.youtube.com che al met a disposizion spazi gratuit par publicâ filmâts, ma a esistin ancje altris come www.dailymotion.com o www.metacafe.com. Ogni dì a vegni metûts in linie e condividûts milions e milions di videoclips.

Tags (etichetis che a permetin di organizâ i contignûts par argoment e peraulis clâf). Par fâus capî ce che al è un tag, o etichete, o lin a viodi un esempli pratic suntun blog, anzit il prin blog dut fûr par fûr par furlan.

FriûlTV, la provocazion
La propueste di www.friul.tv e vûl jessi une provocazion.
Une provocazion par stiçâ la discussion e viodi se cheste e je une soluzion a la domande: “Si puedial vê un spazi in rêt par dâ ai furlans ator pal mont un leam cu la Patrie di dulà che magari a son partîts i nonos o i paris?” Noaltris o pensìn di sì ancje se i timps no son curts.
Propit sfrutant lis potenzialtitâts che a son stadis a pene presentadis (metude in rêt di materiâl scrit, audio e soredut video) cun coscj bas e cun competencis avonde acessibilis e je nassude la scomesse di FriûlTV, che o disìn subit e je un laboratori che al podarà esprimisi cun fuarce dome ca di un an, ancje se i prins esempli za nus fasin sperâ ben.
La idee di meti in pîts une television in Internet e nas de radio. Su lis frecuencis di Radio FM Comunicar, radio scoltade inte provincie argjentine di Cordoba, si fevele par furlan par diviersis oris a setemane. Nol è un esperiment, ma ce che al sucêt zaromai di cualchi an a Colonia Caroya, citât fondade sul finî dal Votcent di un grup di fameis furlanis. La iniziative de radio argjentine e cjate la poie e la colaborazion de emitente che di cuasi trente agns e je impegnade inte promozion de lenghe furlane, Radio Onde Furlane, che cun Radio FM Comunicar e sgambie trasmissions informativis e musiche vie Internet. Adiriture al ven tornât a mandâ in onde, di là dal Ocean 24 oris su 24, propit il segnâl di Radio Onde Furlane. Chescj progjets a son daûr a fâ cressi rapuarts virtuôs jenfri il Friûl e lis comunitâts di divignince furlane ator pal mont, seneosis di mantignî un leam cu la tiere des lôr lidrîs e di no pierdi la lôr lenghe native.
E propit par rispuindi a cheste domande che e ven simpri plui dai migrâts furlans di “tierce” gjenerazion, e par chest ancje plui zovins e plui usâts a confrontâsi cu lis gnovis tecnologjiis, o vin pensât ae www.friul.tv.
Par tant, ta chest portâl no dome si leiaran notiziis relativis ai migrants furlans, ma ancje si varà la percezion puntuâl de presince di cheste nestre int ator pal mont. Di fat, cuntun geotag, (un indicatôr che al permet di individuâ suntune cjarte gjeografiche la posizion di chel che al interven) i visitadôrs a podaran cognossi il pont esat di dulà che al è partît il messaç che àn viodût, cjapant cussience cui lôr voi de dimension de diaspore furlane.



L'imprest, Cemût fâ? Dimostrazion pratiche...

Cualchi esempli
la prime rêt embrionâl di contats e corispondets di furlans ator pal mont che si son tornâts a cjatâ te rêt: cjale i esemplis fracant chest link.

O sieri cui ringraziaments:
a la Comunitât Culinâr che e à dât la ocasion di fevelâ di chescj argoments;
a la Cooperative Informazion Furlane che mi à permetût di puartâ e fevelâ de mê esperience sul “cjamp”, o miôr, “te rêt”

e ducj voaltris che o vês vût la pazienze di stâ a scoltâmi.

Christian Romanini
La Patrie dal Friûl

21 maggio 2007

Se o sês in Sardegne o o volês là in curt...

Organizatzione: PROVÌNTZIA DE OGISTRA - UFITZIU DE SA LIMBA SARDA·ULS - ASSOTZIU CULTURALE OGIASTRA

Seminariu:
Testos sacros e liturzia in limba sarda: su tempus benidore
Die: 30 de MAJU de su 2007, mèrcusris
Orariu : dae sas h 9.00 a sas h 18.00
Logu : LANUSEI
Partetzipantes : Preìderos e reliziosos
Programa : Saludu de sas autoridades:
----
Relatziones
Miss. Antioco PISEDDU [Pìscamu de sa Diòtzesi de Ogiastra / Presidente de sa Cumissione Limba Sarda]
Miss. Pietro MELONI [Pìscamu de sa Diòtzesi de Nùgoro]
Miss. Sebastiano SANGUINETTI [Pìscamu de sa Diòtzesi de Otieri]
Miss. Duilio CORGNALI [Diòtzesi de Udine]
Aureli ARGEMÌ [Ciemen, Barcelona]
Padre Raimondo TURTAS [Universidade de Tàtari]
Don Antonio PINNA [Vitzepreside de sa Facultade Teològica]
Don Giovanni USAI [Comunidade S. Anna de Arborea]
Dr. Diegu CORRAINE [Coordinadore de s'Ufitziu de sa Limba Sarda]

Ufìtziu de sa limba sarda de s'Ogiastra.
Coordinadore: Diegu Corràine

Segreteria: Barbara Murru e Simonetta Mereu.

Se o sês in Sardegne o o volês là in curt...


Ve chi doi apontaments che mi segnale Diegu Corraine

La bussade des crôs a Zui in Cjargne

Juste îr, come ogni an a Zui, te plêf di Sant Pieri, e je une des plui bielis e emozionantis cerimoniis religjosis de nestre mont. Lis glesiis de Cjargne si cjatin a Zui, li che une volte al jere il vescul, e dutis inflochetadis a puartin la lôr bussade a la Crôs mari di Zui.
Un moment une vore intens de nestre Cjargne. Us met achi ancje une biele riflession a proposit dal avignî e de situazion de Cjargne: fracait achì.

20 maggio 2007

Messe par pre Toni Beline



Miercus ai 23 di Mai aes 19.30 (ore de Patrie GMT +1) a Visepente e sarà fate une messe par ricuardâ pre Toni a un mês de sô muart. Ta chê ocasion al sarà ancje let il so testament spirtuâl. Intant achì us met la gnove rubriche di libris de FriûlTV: cun "Pagjine7" si presentin libris, leint cualchi rie de pagjine 7 di un libri a sielte... baste che al sedi scrit par furlan.
Se o vês voie di partecipâ ancje voaltris a la incressite de FriûlTV, fracait achì.

Il Diari di Mai

Al è jessût il numar di Mai dal Diari, il mensîl di Mauro Tosoni.
Par lei il gjornâl, o podês tirâ jù il pdf: fracait achì.

19 maggio 2007

La direte de cunvigne di Colorêt


A tacâ des 9.30 di buinore (GMT +1) di sabide ai 19 di Mai al sarà pussibil viodi in streaming, in dut il mont, la cunvigne "Lenghis minoritariis, media, emigrazion" che si trasmet dal Cjistiel di Colorêt (UD).
Buine vision!

18 maggio 2007

Cuinte cunvigne di Toponomastiche in Branc

E tache vuê la Cuinte cunvigne di Toponomastiche in Branc, frazion di Tavagnà. Par viodi dut il program de manifestazion che dure dai 18 ai 27 di Mai: fracait chi.

17 maggio 2007

Proloco e motos in vile

A Vile Manin di Passarian apontament motociclistic cu la associazion TERREdiMOTO.
Motoincuintri par sabide ai 19 par scuvierzi i savôrs e lis bielicis dal nestri teritori: compliments e grazie a Moreno che al è tra i promotôrs de iniziative e mi displâs che no rivarai a partecipâ.
O soi propit content e o aprofiti par gjavâmi un claput de scarpe: cuant che 4 agns indaûr o soi lât in Comunitât Colinâr a fevelâ a pro dai Bikers, l'assessôr de colinâr che si ocupave di turisim al jere Renzo Scarso di Sant Denêl.
In chê volte jo o vevi proponût une idee par leâ il mototurisim al teritori de colinâr. Renzo Scarso mi à rispuindût che la robe no interessave ae colinâr e mi à licuidât cence tancj compliments. O soi content che la Cjargne e vedi dât bon acet ae Bikerfest, che cumò la associazion regjonâl des pro loco e crodi tal mototurisim e o soi content che chestis dôs realtâts a vedin capît che cui che al à une moto al è une persone che i plâs gjoldisi il timp libar su dôs rovedis e magari jessi ancje une font di jentradis pal marcjât dal turisim.
E nol è un delincuent.
Robe che invezit cualchidun altri forsit forsit al pense inmò...
Se la int no ves tancj prejudizis e capirès che bogns e triscj a son dapardut, indipendentementri che a vedin une machine o une moto o une golarine o un gjubet di piel!

15 maggio 2007

I Langobarts a Sant Salvadôr

A Sant Salvadôr, sot de gleseute di Sant Silvestri, e je une necropoli langobarde: un cimitieri (tal dissen, un vuerîr langobart: un di chei che a podaressis jessi stâts sapulîts a Sant Salvadôr).
Al è un dai sîts plui impuartants de regjon e se o lais al museu di Cividât, li o cjatais une vore di materiâl (ancje preziôs) che al è stât cjatât propit a Sant Salvadôr.
Jo o speri che a nissun i vegni tal cjâf di domandâ che i reperts a tornin a jessi puartâts in Comun di Maian: a Cividât a son plui sigûrs.

Se o passais propit denant de gleseute, di front dal cjistiel, o cjatais une tabele che e fevele propit de necrepoli che e je juste sot dal paviment.
Vinars aes 18.30 li de fieste des cjariesiis (almancul si clamave cussì une volte) al vignarà presentât il lavôr di doi zovins dal Malignani che a àn vinçût un premi pai rilêfs che a àn fat achì.
Tal prin coment us met l'articul dal Gazzettino.

12 maggio 2007

Atentât!

Dopo diviersis setemanis di sut, un bon burlaç al passone parsore Maian, lassant aghe a seglots e no dome.
Di fat, un folc al à trat sul Cuel dal Fum e al à crevât in doi un peç che al jere là parsore. I testemonis dal event a àn declarât che il sclop al è stât precedût di une grande lûs rosse...

11 maggio 2007

I toponims dal comun di Maian


Come che si pues lei te sezion dal sportel, il comun di Maian al è daûr a fâ une ricercje su la toponomastiche. Il progjet al è in colaborazion cu la Societât Filologjiche Furlane. Se us va di dâ une man, contatait il sportel pe lenghe furlane dal comun di Maian.

09 maggio 2007

Zornade de Europe

Vuê la Europe e ricuarde la declarazion Schuman dal 1950. Dal 1985 cheste zornade e je deventade la Zornade de Europe e duncje e je une fieste par ducj i stâts europeans.
Te foto us ai metût la cjartute des lenghis locâls che si fevelin in dut il continent: altris informazions lis cjatais sul sît di Eurominority.

Aghis di Buie

Il Vicesindic di Buie, Stefano Bergagna, che o ringrazii, mi à visât che doman, joibe ai 10 di Mai, a Buie li de Cjase de Zoventût a Sant Stiefin, e sarà une serade par presentâ un lavôr su la Ledre e i altris riui di Buie: il progjet si clame propit Aghis. A saran presints ancje i candidâts sindics Marcuzzo (sindic in cjarie) e Taboga: chest an a Buie si vote.
Cuasit cuasit o fâs un salt (no te aghe... ma a Sant Stiefin!).

08 maggio 2007

Mandi Enricon

Vuê o aprofiti par saludâ un gno amì che al è "di là de aghe"... ma une vore "di là de aghe": al è Enricon, che o vês za viodût.
Enricon al fâs l'alpin e par trê agns al sarà tai Stâts Unîts par une incarghe intune base americane: cheste foto me à mandade cuant che al è rivât in Americhe.
Mandi Enricon e mi racomandi: visiti di ce che tu mi âs prometût! Mandi mandi

07 maggio 2007

Pascat day: Woodstock furlane


Al mancje inmò un pôc di timp, ma al è miôr tacâ a visâ adore... e duncje ve chi il Pascat day 2007, une sorte di Woostock furlane, che si ten ogni an tai prâts di Cjaurià.
Apontament pai 8 e 9 di Jugn.

06 maggio 2007

La letare pal Ministri Gentiloni

Come che us ai za dit, o vevi propit gust di dî une robute intune orele al ministri Gentiloni che però nol è vignût.
Dut câs o vevi preparât un volantin e mi jeri fat dâ une letare preparade dal Comitât 482, che i ai dât a Marcello Fiori, segretari gjenerâl dal ministeri des telecomunicazions.
Chest al è il test dal volantin consegnât:
"PLUI RISPIET PAI DIRITS LINGUISTICS!
Dopo dai 6 di Mai dal 1976 il Friûl al ringrazie e nol dismentee
Tal 2007 il Guvier e la RAI si son dismenteâts dal FURLAN, IL FRIÛL AL DOMANDE un contrat di servizi radiotelevisîf public plui just, che al rispieti la leç statâl 482/99 di tutele des minorancis linguistichis!"

Tal prin coment us met ancje la letare, scrite dal Comitât 482, che o ringrazii.

Par no dismenteâ



A son passâts 31 agns e al semee pardabon un altri Friûl. La nestre storie plui resinte si divît tra un "prime" e un "dopo" dal taramot dai 6 di Mai dal 1976.
Jo o ai vude la furtune di nassi dopo e di no vê vût muarts ta chê disgracie. Il gno ricuart di vuê al va ae siore Luciana Bonatti Mora e al dotôr Franco Mora, mancjâts tancj agns dopo dal taramot, ma che ta chê emergjence a àn fat tant pal nestri paîs.

05 maggio 2007

Lunis o soi a Radio Onde Furlane

Lunis ai 7 di Mai aes 10.00 o sarai ospit a Radio Onde Furlane cun Marino Plazzotta par fevelâ de Patrie dal Friûl di Avrîl, ma soredut di pre Toni Beline e dal ultin libri: La fatica di essere prete.

Il Ministri Gentiloni a Susans

Zornade di "ultimis oris": a 'nd ai savude une altre e simpri al ultin moment... Vuê sabide ai 5 di Mai aes a misdì al è in program un intervent dal Ministri pes telecomunicazions Gentiloni (te foto) vie pe cunvigne de Protezion Civîl a Susans in Cjistiel, in ocasion dal aniversari dal taramot dai 6 di Mai dal 1976.
Mi plasarès propit di lâ a dîsi une robute intune orele, a proposit de cuestion dal contrat di Servizi e de tutele de lenghe furlane in RAI...

04 maggio 2007

Screât il Bar...bi

No ai rivât a fâlu prime e us visi dome cumò parcè che ancje jo lu ai savût usgnot: il barut dal centri sportîf al è stât screât cheste sere e si clame Bar...bi.
La persone che lu à in gjestion e je Barbara, la fie di Gabry, la Barbiane di Cjaurià.
No ai stât tant e o tornarai ta chescj dîs: e à fat un biel lavôr e jê e je dal sigûr brave.

03 maggio 2007

Rene e Gardo intun libri sul taramot

Biele serade martars di sere alì di Gardo, pe presentazion di un libri sul Taramot, fat di Toni Russo, il diretôr di "La voce della Montagna".
Il libri (te foto, la cuviertine fotografade di Ranieri Furlan, che o ringrazii) al fevele dal taramot dal 1976 e al ripuarte doi episodis particolârs: la tragjedie viodude di une femee di Trivià (la famee di Rene e Gardo) e di un piçul comun di mont, Resiute.
Mi à plasût l'intervent di Giorgio Santuz, che in chê volte al jere parlamentâr e che fin chê altre sere no vevi mai sintût a fevelâ dal taramot.
Une vore sintût ancje l'intervent dal autôr, Toni Russo. La sale e jere plene e o speri che il libri al sedi biel come la presentazion.

02 maggio 2007

Far east Sant Denêl

A Sant Denêl e rive la art di soreli jevât cu lis sculturis dal artist corean Doh Heung Rok. Alessandro Venuti, curatôr dal event, nus segnale che li dal Museu dal Teritori si podarà visitâ la mostre dai 5 ai 20 di Mai. Tal prin coment us met il comunicât stampe.
La scree de mostre e sarà cheste sabide aes 18.30.
La mostre e je realizade in colaborazion cu la associazion Servi di Scena.

01 maggio 2007

Prin di Mai in musiche

Di cualchi an e je la usance di passâ la fieste dal Lavôr cuntun conciert che a fasin a Rome in place Sant Zuan. Alore o ai dit, stant che no mi semee che a vedin sunât tancj furlans a Rome, "O fâs un Prin di Mai in musiche ancje jo", fasintjus scoltâ Straulin-Fedêl-Vescul (te foto, di çampe a drete: Lino Straulino, Stefano Fedele e Loris Vescovo), trê dai cjantautôrs plui impuartants de nestre regjon.
Par scoltâ une cerce de lôr musiche, fracait achì.
Us consei la lôr reinterpretazion di "La biele stele"...