31 gennaio 2009

Cualchi dât sul sît di Sant Zuan a Sant Tomâs

Dispès une des acusis che mi ven fate e je chê di jessi un tifôs acanît dal progjet, ma di no vê nissun element concret che al justifichi cheste mê posizion. Cuasit che o ves cualchi interès o tornecont personâl. Cualchi zornade indaûr o vin fat une riunion de comission culture li che o vin vût cualchi informazion che mi somee just condividi cun voaltris, sperant che us podedi sclarî la impuartance di chest sît (za documentade di fonts di archivi). Ancje se al somee pleonastic, o torni a ricuardâ il significât dal non "Ospedâl" ta chest contest: no sin denant di une struture sanitarie come che si podarès intindile vuê, ma di une struture che e deve ospitalitât, acet, prin ai cuarps militârs che e jerin a presidiâ la zone, dopo vie pai secui ancje a dut chel passaç ancje di pelegrins che par motîfs religjôs a ziravin par dute Europe (tal dissen, 2 cavalîrs dal Ordin di Sant Zuan).
Tornant al sît za dal pont di viste struturâl, dute la aree e presente une articolazion une vore interessante: si puedin ricognossi ampliaments seguitîfs che a son stâts fats dilunc dai secui. La part plui antighe e je rapresentade de struture plui a ovest che e ven clamade "tor": ven a stâi li che i mûrs une vore larcs (cuasit un metri di spessôr) a fasin pensâ a une prime struture cun funzion difensive-militâr e cheste funzion origjinarie e je testemoneade ancje des feritoiis muradis che si viodin ben de bande interne (a son barconuts strets che a podevin vê la funzion di postazion pe vuardie).
Sot dai paviments dal cuarp centrâl dal ospedâl invezit a son stadis fatis lis indagjins archeologjichis che intune aree une vore strete a àn puartât a scuvierzi ben 3 nivei di paviment (fat avonde particolâr e par capî di plui al coventarès slargjâ lis trinceis di sgjâf). Ta chescj sgjâfs a son vignûts fûr diviers reperts di ceramiche ingubiade (no soi espert, ma o speri di vê scrit just...). Al plan parsore a son stadis ancje cjatadis, sot de stabilidure plui resinte, decorazions frescadis databilis tor dal tart 1300. Cun di plui ancje la forme dai barcons (sierâts in epoche seguitive) a testemonein la antighitât de struture.
Al è di dî che il lavôr di indagjin archeologjiche al è stât condizionât ancje dal lavôr di metude in sigurece de aree e chest al à ralentât: al jere pericul che cualchidun si fasès mâl.
Tes setemanis passadis ancje la soreintendent e à fat un sorelûc dimostrantsi une vore interessade al sît che al rapresente un esempli une vore râr (se no l'unic) in regjon di chestis struturis: pal solit te ete di mieç si fevele di cjistiel (ven a stâi di abitazions dai siôrs) no ricuardantsi invezit che la plui part de popolazion no viveve in cjistiel ma al jere plui facil che e ves contat cun struturis come chê di Sant Zuan a Sant Tomâs.
Pal moment mi fermi chi, ma us siguri che e je dome une cerce une vore piçule di dut ce che al pues dâ inmò chest sît.

29 gennaio 2009

Estroverso 2009

Us segnali une biele iniziative dal Comun di Tavagnà che us vevi za dit timp indaûr: Estroverso al è un concors di traduzion di leterature pe infanzie partint di lenghis forestis rivant al talian o al furlan. Chest àn il concors si siere no dome cu la premiazion ma ancje cuntun seminari su lis problematichis relativis a la traduzion. Apontament al è par sabide dopomisdì ai 31 di Zenâr come che si pues lei sul sît dal comun: fracant chi.

28 gennaio 2009

Sacrabolt... 32!

Eh sì... 32 agns indaûr intun ospedâl in Svuizare o tacavi il gno viaç su cheste tiere! Al è ancje di dî che al è mancjât pôc che il gno ostetric al fos il taxist che mi puartave, anzit, al puartave mê mari in ospedâl. Ma dopo 6 mês o soi tornât in Patrie... sdrumade dal taramot. Ma trop ben che o soi stât ta chei agns tes barachis di Farle: o jerin une schirie di fruts e no mi è mai mancjât nuie. Po ben: vonde nostalgjiis che nol è il câs... E cumò scusait che o voi a soflâ su lis cjandelis... se o rivi a fâlis stâ dutis =)

27 gennaio 2009

Zornade de memorie



Come che us scrivevi îr, vuê e je la zornade de memorie. Il comun di Maian al à organizade une serade inte sale dal consei la proiezion dal cine "Hotel Meina" (tal video o podês viodi il trailer talian) compagnât di riflessions dal prof. Paolo Strazzolini.
Cun di plui e sarà ancje la testemoneance di Guido Riva che al fevelarà de sô esperience di militât tun cjamp di concentrament.
Apontament usgnot aes 20.30 li dal municipi.

26 gennaio 2009

Spietant la Zornade de Memorie

Doman e je la zornade de memorie, l'aniversari de liberazion dal cjamp di stermini di Auschwitz. Ma no vin di dismenteâ che nol covente lâ in Polonie o in Gjermanie par viodi testemoneancis di ce che il nazisim e il fassisim a àn fat. Vêso mai stât a Triest li de Risiere di San Sabba? Se la rispueste e je no, us consei di fâ une visite: jo o ai stât un Istât e cuant che o pensi a ce che o ai viodût mi vegnin inmò i sgrisui. E se o pensi che dut chest al è a une ore di strade di cjase mê, mi vegnin i sgrisui inmò di plui.
L'articul 1 de leç 211 dal 2000 al dîs "La Republiche taliane e ricognòs la zornade dai 27 di Zenâr, date che a son stâts butâts jù i cancei di Auschwitz, "Zornade de Memorie", cun chê di ricuardâ la Shoah (stermini dal popul ebraic lis leç raziâls, la persecuzion taliane dai citadins ebreus, i talians che a àn patide la deportazion, la prisonie, la muart, e ancje chei che, ancje in cjamps e posizions diferents, si son oponûts al progjet di stermini, e metint in pericul la lôr vite a àn salvât altris vitis e protezût i perseguitâts".
A scuele o vevi let "Se questo è un uomo" di Primo Levi, une testemoneance tragjiche di ce che al è stât. Come che tragjiche e emotivementri pardabon fuarte e je stade le cognossince direte di Boris Pahor (te foto cun me), un scritôr sloven di Triest che al à vivude su la sô piel la deportazion e che mi àn lassât dentri un alc di indescrivibil.
Dome a distance di passe 50 agns Pahor al à vût il just ricognossiment ancje dal public in Italie cun Necropoli. Cumò al è in librarie cuntun altri libri che si intitule "Qui è proibito parlare" une altre testemoneance che e fevele dal sintiment antisloven che al à caraterizât il Fassisim a Triest. Ma o scuen dî che inmò vuê chest sintiment a Triest al è inmò. E plui o voi di chês bandis e plui mi rint cont che e je vere.

25 gennaio 2009

Une vuide speciâl

Ancje se no sin lâts in moto e je stade une domenie bielone: gjite a Aquilee cuntune vuide speciâl!
Jo e Ninine o vin prime stât te Basiliche e po li dal Museu Archeologjic (te foto o sin propit devant de jentrade).
E ce dî dal risot cu la luianie e il lidric di Trevîs li dai Patriarchi? Gnam!

24 gennaio 2009

Onderodeghein

Eh sì: vuê profitant de zornade cence ploie, o ai tornât a tirâ fûr la moto! E jere ore! Cotrol des gomis, plen e vie... ma dome par un zirut par gjavâi il polvar. No soi lât tant lontan no tant pal frêt (che dût câs a 'nd è inmò masse pai miei guscj...), ma pal asfalt des stradis che nol è tant ce fidâsi: tra glerein e umit cuntune trasmission cardaniche si à di stâ atents.
Po ben, almancul o ai tornât a sintî a cjantâ il gno bicilindic e cumò o spieti che la stagjon si vierzi pardabon par lâ a fâ un biel zirut... Ninine, sêstu pronte? ;)

23 gennaio 2009

Alc&Cè di Cjocolate

Doman sabide ai 24 di Zenâr, cu la Vite Catoliche, in regâl il gnûf numar di Alc&cè, il gjornalut par fruts dut in marilenghe, realizât cul contribût de Agjenzie regjonâl pe lenghe furlane. In cuviertine une ploie di cjocolatins al anuncie il teme centrâl dal numar: la cjocolate. Un viaç ae scuvierte di chest dolç, che al met di bon umôr e al fâs ben, cuntune recipe golose pai fruts. In "Perlis di nature" si puedin lei ducj i segrets des bestiis salvadiis par parâsi dal frêt dal Invier. Po a tornin i Gnognosaurs, Pantiagneur e Barburice cu lis lôr aventuris a fumets; i zûcs, par divertîsi imparant la lenghe; la interviste al campion furlan di ciclisim su strade, Franco Pellizotti; infin, il cjantonut dal fâ, che al insegne a fâ un biel campanelut colorât.
Par sugjeriments e curiositâts sul gjornalut, si pues scrivi une e-mail a Erika Adami, responsabile e coordenadore editoriâl de riviste, ae direzion: adami@lavitacattolica.it
Alc&cè al ven doprât ancje in tantis scuelis de regjon dulà che si insegne la lenghe furlane. I docents che a vuelin ricevilu pai lôr arlêfs, sore nuie, a puedin domandâlu telefonant al numar 0432/242611, mandant un fax al 0432/242600, o une e-mail ae direzion: amministrazione@lavitacattolica.it

22 gennaio 2009

Laboratori archeologjic

Us segnali une biele iniziative didatiche pai fruts di scuele. O ai let il depliant che mi à fat vê Venusia Dominici (in art, la Ninine) che cuntune sô coleghe di universitât, Francesca Ciroi, e à realizât.
Si trate di un progjet par un laboratori didatic su la archeologjie. Tal program a son une part teoriche e une part pratiche che e viodarà i fruts impegnâts intune simulazion di sgjâf.
O fâs i compliments a lis 2 archeolighis (te foto) parcè che a àn ancje fat une riflession su lis lenghis, proponint il progjet sedi par furlan sedi par talian. Cussì i fruts, tal câs de opzion par furlan a varan la pussibilitât di fâ un esperiment di Clil (Content and Language Integrated Learning) ven a stâi imparâ sedi i contignûts sedi la lenghe furlane.
Par savênt di plui o podês contatâ la Ninine sul so blog, baste fracâ chi.

21 gennaio 2009

Auguris al Faf

A son passâts 14 agns! Forsit no saran plui tant "fantats" su la cjarte di identitât, ma dal sigûr i "Fantats furlans", associazion di zovins pal Friûl, a restin simpri in prime linie. Dut câs la etât no je dal sigûr un dât anagrafic e duncje chei dal Faf ancje cuant che a varan i nevoduts (furlans) a restaran simpri chei che 14 agns indaûr a àn metût in pîts cheste biele associazion.
Augurons di cûr!

(te foto, une des mitichis maiutis dal Faf)

20 gennaio 2009

Lenghe furlane e imigrazion

O segnali une interessante e biele iniziative de Provincie di Udin che adun cun chê di Pordenon, come Associazion di Provinciis, e à inmaneât une cunvigne dal teme "Furlan e imigrazion".
O pensi che al sedi necessari par une integrazion complete, previodi iniziativis che a permetin ai imigrâts di cognossi la culture de tiere li che a rivin. Cuant che o jeri a Tavagnà o vevin colaborât cuntun associazion "Mediatori di Comunità" fasint un cors di furlan pai imigrât: une des plui bielis esperiencis che o vedi mai fat tal gno lavôr (te foto, il volantin di chê volte: fracait su la imagjin par viodilu ben). E o soi content di viodi che tra i relatôrs e je ancje Irma Guzman, messicane, ma aromai furlane di adozion, che e je stade tra lis personis che o ai cognossût ta chê esperience.
Ve chi l'invît pe cunvigne di Voleson ai 29 di Zenâr a lis 17.00: fracait chi.

19 gennaio 2009

Lenghis minoritariis, media e emigrazion

Al è di un pôc che il Consorzi universitari furlan al à publicât i ats di une cunvigne fate a Colorêt cuasi 2 agns indaûr (ai 19 di Mai dal 2007).
O jeri intervignût ancje jo fevelant di blog, Internet e lenghe furlane: ve chi il link a "Emigrâts inte Rêt", il gno contribût che al è stât publicât tal librut (cun DVD di une seconde cunvigne simpri sul stes teme, ma fate a Colonia Caroya).
Grazie al Cuf e grazie a Luca!

18 gennaio 2009

Ce spietistu? Aboniti

La Patrie dal Friûl a Zenâr no ven fûr, stant che a ‘nd è 11 numars intun an e il prin al sarà chel “dopli” di Zenâr/Fevrâr. Duncje o vês ancjemò timp par abonâsi e cjalâ il 2009 cuntun voli furlan.
Une volte al mês met in bande un moment par un cjanton dut furlan: aboniti a LA PATRIE DAL FRIÛL.


17 gennaio 2009

Tacâ l'an cuntune donazion

Bon dai, nol è propit il Prindalan, ma o sin inmò in Zenâr e duncje mi someave just che par tacâ chest 2009 par ben, mi mancjave alc.
E cussì vuê o soi tornât a donâ plasme tal ospedâl di Sant Denêl.
Lu consei a ducj e par vê plui informazions us segnali il sît de Associazion Furlane Donadôrs di Sanc: e je une buine pratiche che e fâs dal ben par cui che al à bisugne e ancje a cui che le fâs, stant che par jessi donadôrs al ven domandât dome di tignîsi in salût.
Un "mandi" di cûr al nestri President Renzo Peressoni che al è un vulcan di ideis e di entusiasim!

Ps. Un grazie ancje a la Friûlpoint e ai Fantats furlans, fornidôrs des maiutis di cheste campagne spontanie di publicitât a pro de Donazion dal Sanc.

16 gennaio 2009

Laboratori musicâl

Doman tal auditorium di Maian a lis 9 di sere e sarà "Soul lab - La anime in vore", une serade dedicade a la gnove musiche di autôr. La iniziative e je une colaborazion tra il Servizi associât culture de Comunitât culinâr e il Progjet integrât culture dal Friûl di Mieç (di fat e sarà une repliche a Lestize domenie ai 25 di Zenâr).

15 gennaio 2009

Benedet XVI al ringrazie Glesie furlane

Ancje vuê o cjapi spont di un articul vignût fûr sul Gazzettino: Andrea Valcic al à dedicât a Glesie furlane la sô rubriche in prime pagjine di Udin (lu cjatais tal prin coment).
Glesie furlane e à ricevût 2 letaris (par viodilis, fracait chi), une dal vescul di Rome Benedet XVI e une Segretari di Stât gardenâl Tarcisio Bertone che si complimentin e a ringraziin pe copie di "Cjant Patriarcjin de tradizion orâl", un libri su la musiche te liturgjie dal Patriarcjât di Aquilee scrit di pre 'Sef Cjargnel.
Te prossime Patrie o dedicarìn un servizi su chest impuartant ricognossiment.

14 gennaio 2009

Ostarie leterarie

Mi àn scrit i "ustîrs di Contecurte"... ve ca:

Un lûc virtuâl là che ducj a podin proponi e lei piçulis storiis in lenghe furlane. Cheste la idee dal blog «Contecurte», che o cjatais ae direzion http://contecurte.splinder.com
Nô lu definìn «une ostarie leterarie, li che si cjatisi par lei cualchi conte e fâle cognossi ai amîs». Une sorte di circul leterari di chei di une volte e di fat la grafiche e je ispirade a un imagjinari circul culturâl dal Votcent.
«Contecurte» e vûl jessi un lûc par ducj chei che àn voie di lei e scrivi par furlan, tignint di cont i timps curts dal web e il jessi pôc usâts a doprâ la marilenghe. Cun di fat, a vegnin ametudis dome contis curtis di al plui 2000 batudis.
La nestre iniziative e vûl jessi ancje un mût par preseâ e pandi une forme leterarie pôc considerade de editorie taliane come la conte, che invezit in altris paîs e je valutade come che e merte. Al sarès biel deventâ un pont di riferiment e une vetrine pai furlans che a àn tal cûr la leterature, cence confins di lenghe e… lungjece.
Vignît a cjatânus, autôrs e letôrs, su
http://contecurte.splinder.com

I ustîrs di Contecurte

Grande!

13 gennaio 2009

Agnul di Spere

Vuê sul Gazzettino al è biel un intervent di William Cisilino, president dal Istitût ladin furlan, che al ricuarde Agnul di Spere (parint de colaboradore da La Patrie dal Friûl, Bete di Spere): lait tal prin coment.
Jo no lu ai cognossût di persone, ma inmò une volte o ai come la impression che al capite masse dispès che il Friûl nol cognossi avonde i siei fîs e si inacuarzi di ce che al à pierdût dome cuant che aromai al è masse tart.
Sabide passade e je stade ancje une cunvigne a Sedean in memorie di Agnul di Spere.

12 gennaio 2009

Il diari di Tosoni

Ve ca come pal solit la cuviertine dal cuindisinâl "Il Diari". Par lei la riviste on line, ve ca il link par discjamâ il pdf: fracait chi.

11 gennaio 2009

10 agns cence Faber

A son za 10... Ai 11 di Zenâr dal 1999 si studave la grande vôs di Fabrizio De Andrè. Ma par furtune al continue a sunâ e chi us propon la biele Creuza de ma.
Mandi, Faber: tu mancjis!

08 gennaio 2009

Ora et la...BORA

O ai inmò tes orelis il sivilâ dal aiar.
Vuê o jeri a Triest par vore e no us dîs ce vitis a rivâ.
Di fat za in zone Prosec-Sgonic o ai tacât a preâ "ducj i sants dal Paradîs": la strade che e mene a Opicine e jere dute une lastre di veri!
E dopo "l'ora" di benedetine tradizion, al è vignût il moment di "la...Bora" (te foto): e soflave che Diu le mandave!
Ma o soi rivât a tornâ in Patrie distès.

07 gennaio 2009

Riunion de comission culture

Mi è rivade la convocazion de comission culture che e varà come ordin dal dì "ativitâts culturâls dal mês di Fevrâr al mês di Mai dal 2009".
Intant o ai mandât cheste mail a ducj i components de comission, compridude la Assessore a la Culture e il Sindic:

"Intant par inviâ la discussion che dopo o aprofondarìn in chê sere, o propon une robe: proviodi une biele campagne di informazion e inzornament sui lavôrs che o sin daûr a fâ a Sant Tomâs. No mi riferìs al recupar architetonic in sens stret, ma ai risultâts de analisi storiche e archeologjiche vûts fint cumò. Si podarès fâ seradis ilustrativis (o propon tai spazis dal informezovins o te sale dal consei comunâl, parcè che in auditorium al è masse grant) cun intervents dai esperts, proiezion di diapositivis e esposizion di materiâi, simpri che la Soreintindince ai Bens Archeologjics e dedi il permès".

Cun di plui, se ancje voaltris letôrs dal blog o vês cualchi idee, ancje che no rivuardi dome la mê propueste, o podês segnalâle e o provarai a puartâle in comission.

06 gennaio 2009

La vignude dai Magjos

Dopo che Gjesù al jere nassût a Betlem in Gjudee, sot dal re Erode, ve che a rivarin a Gjerusalem dal orient magjos e a domandarin:2 «Dulà isal il re dai Gjudeos apene nassût? Parcè che o vin viodude la sô stele in orient e o sin vignûts par adorâlu».3 Sintint une tâl, il re Erode al restà scaturît e cun lui dute Gjerusalem.4 Alore al clamà dongje ducj i sorestants dai predis e i scrituriscj dal popul e ur domandà: «Dulà varessial di nassi il Messie?».5 I rispuinderin. «A Betlem di Gjudee. Cussì di fat al è stât scrit midiant dal profete:6 E tu, Betlem, tiere di Gjude
no tu sês propit il plui piçul di ducj i paîs di Gjude.
Di te al saltarà fûr un sorestant
che al passarà il gno popul, Israêl».
7 Alore Erode, al clamà di scuindon i magjos e si informà sul timp precîs che ur jere comparide la stele;8 po ju mandà a Betlem disint: «Lait, cirît cun precision il frut; a pene che lu cjatais, fasêtmal savê ancje a mi, che o puedi lâ a adorâlu».
9 Lôr, sintudis lis racomandazions dal re, si meterin in viaç. E ve: la stele, che a vevin viodude in orient, e leve denant di lôr fin che no si fermà sul lûc là che al jere il frut.10 Viodint la stele, si jemplarin di une gjonde straordenarie.11 Jentrâts in cjase, a vioderin il frut cun Marie sô mari e si butarin denant di lui adorantlu. Alore a vierzerin lis lôr arcjis e i ufririn in regâl aur, incens e mire.12 Po dopo, visâts in sium di no tornâ a passâ par li di Erode, a tornarin par une altre strade tal lôr paîs.

dal Vanzeli di Matieu - Il vanzeli de Infanzie (cjapitul 2, 1-12): par lei dut il cjapitul, fracait chi.

05 gennaio 2009

Baste che al tiri

Si sa: doman ducj in spiete di savê di ce bande che al va il fum dal Pignarûl (foto vikipedie). Tarcint il plui famôs, ma ancje a Maian la tradizion no pues mancjâ. Tra i tancj, jo us segnali chel di Cjasesole stant che Dario dai Ols mi à visât: il fûc si impie aes 5 di sere in borc di Schirat, ma za des 10 a buinore al sarà dut un "ce fâ"!
E alore, no savint se al va a mont o a soreli jevât, sperìn dome che al tiri ben! (il fum, ve, ce vêso capît?!)...

04 gennaio 2009

Cualchi volte a tornin

O speri che nissun si susti par vê parafrasât il titul di un famôs cine, par salutâ il blog di IntesaxMajano di gnûf in linie (te foto, Lieto Molinaro, il lôr cjâfgrup). Di fat, timp indaûr o vevi segnalât che no si cjatave plui te Rêt: ve chi.
Mi fâs plasê che a vedin paiât i debits e che la lôr vôs a sedi resuride: la pluralitât di viodudis e di opinions le ai simpri calcolade come une robe positive e duncje... Bentornâts!

03 gennaio 2009

02 gennaio 2009

Notiziari comunâl di Maian

Mi è rivât a cjase il notiziari comunâl di Maian. O ai inmò di rivâ insom: pal moment o ai let dome il prin articul, chel firmât dal Sindic...
Lu ai cirût ancje te pagjinis Internet dal Comun di Maian, ma nol è inmò on line. Cuant che al sarà, o speri di comentâlu cun voaltris.

01 gennaio 2009

Bon Principi!

Sandri mal à mandât cualchi zornade indaûr e jo lu condivît cun voaltris: ve ca un biel auguri di Bon An, par un 2009 di flabe. Tancj auguris!