Cualchi dât sul sît di Sant Zuan a Sant Tomâs

Dispès une des acusis che mi ven fate e je chê di jessi un tifôs acanît dal progjet, ma di no vê nissun element concret che al justifichi cheste mê posizion. Cuasit che o ves cualchi interès o tornecont personâl. Cualchi zornade indaûr o vin fat une riunion de comission culture li che o vin vût cualchi informazion che mi somee just condividi cun voaltris, sperant che us podedi sclarî la impuartance di chest sît (za documentade di fonts di archivi). Ancje se al somee pleonastic, o torni a ricuardâ il significât dal non "Ospedâl" ta chest contest: no sin denant di une struture sanitarie come che si podarès intindile vuê, ma di une struture che e deve ospitalitât, acet, prin ai cuarps militârs che e jerin a presidiâ la zone, dopo vie pai secui ancje a dut chel passaç ancje di pelegrins che par motîfs religjôs a ziravin par dute Europe (tal dissen, 2 cavalîrs dal Ordin di Sant Zuan).
Tornant al sît za dal pont di viste struturâl, dute la aree e presente une articolazion une vore interessante: si puedin ricognossi ampliaments seguitîfs che a son stâts fats dilunc dai secui. La part plui antighe e je rapresentade de struture plui a ovest che e ven clamade "tor": ven a stâi li che i mûrs une vore larcs (cuasit un metri di spessôr) a fasin pensâ a une prime struture cun funzion difensive-militâr e cheste funzion origjinarie e je testemoneade ancje des feritoiis muradis che si viodin ben de bande interne (a son barconuts strets che a podevin vê la funzion di postazion pe vuardie).
Sot dai paviments dal cuarp centrâl dal ospedâl invezit a son stadis fatis lis indagjins archeologjichis che intune aree une vore strete a àn puartât a scuvierzi ben 3 nivei di paviment (fat avonde particolâr e par capî di plui al coventarès slargjâ lis trinceis di sgjâf). Ta chescj sgjâfs a son vignûts fûr diviers reperts di ceramiche ingubiade (no soi espert, ma o speri di vê scrit just...). Al plan parsore a son stadis ancje cjatadis, sot de stabilidure plui resinte, decorazions frescadis databilis tor dal tart 1300. Cun di plui ancje la forme dai barcons (sierâts in epoche seguitive) a testemonein la antighitât de struture.
Al è di dî che il lavôr di indagjin archeologjiche al è stât condizionât ancje dal lavôr di metude in sigurece de aree e chest al à ralentât: al jere pericul che cualchidun si fasès mâl.
Tes setemanis passadis ancje la soreintendent e à fat un sorelûc dimostrantsi une vore interessade al sît che al rapresente un esempli une vore râr (se no l'unic) in regjon di chestis struturis: pal solit te ete di mieç si fevele di cjistiel (ven a stâi di abitazions dai siôrs) no ricuardantsi invezit che la plui part de popolazion no viveve in cjistiel ma al jere plui facil che e ves contat cun struturis come chê di Sant Zuan a Sant Tomâs.
Pal moment mi fermi chi, ma us siguri che e je dome une cerce une vore piçule di dut ce che al pues dâ inmò chest sît.