31 agosto 2006

Thermorubriche mensîl di Setembar: la torbere di Cjasesole

Il nestri Thermonuke al stice une discussion su la torbere di Cjasesole. Stant che al è stât svelt a induvinâ la rubriche dal cjanton, lu contenti, ma prime o fâs une piçule introduzion, capî di ce che si fevele. La torbere, o come che le cjame cualchidun, il palût di Cjasesole al è un Sic: sît di interès comunitari, vâl a dî une zone protete par vie de particolaritât naturalistiche che e je achì.
La idee al sarès di rindi visitabil cheste aree cu la creazion di un biel percors che al jentri te torbere, cence ruvinâ l'ambient naturâl. Jo o pensavi a un percors su passarele in len tratât in autoclâf che e fasi dut il zîr de torbere e meti jù cualchi tabele informâtive (cualchidune e je za) e cualchi gabiot pe osservazion dai masurins, airons e ducj chei uciei di palût che a son alì. Ma al è un problemut: la regjon che e varès di fâ lis oparis alì no pues fâju fin che i terens a son privât e duncje e varès di comprâju. Ma se no mi visi mâl a son plui di 100 proprietaris e duncje no à inmò rivât a meti dacuardi ducj pe compravendite. Cumò cualchidun al disarà "Ma ce covential butâ i bêçs tal palût?"...

29 agosto 2006

Dut un cine: BURIS martars ai 29 di Avost

Ancje se us ai za visât lu torni a scrivi
Dopo dai sglavisn dai 24 di Lui, vuê si recupare tal zardin di Vile Tinin a Felet la serade di cine furlan (se al è brut timp, o lin in auditorium):
MASSIMO GARLATTI COSTA,
DUT INTUNE GNOT

Massimo Garlatti-Costa al nas ai 19.4.1969 a Udin. Daspò de lauree in Siencis Politichis e vê fat la "Scuola Ipotesi Cinema" di Ermanno Olmi al va in Grande Bretagne dulà che si iscrîf a la "Northern Media School" di Sheffield e al cjape il Master in Regjie e Senegjature. Finîts i studis al tache a lavorâ par diviersis cjasis di produzion indipendentis dal Ream Unît, pal canâl televisîf Channel 4 e par la BBC, e par chei al realize tancj films curts. Lis sôs produzions a son stadis mitudis in onde di une schirie di rêts televisivis e tancj siei films a son stâts selezionâts e premiâts di preseâts Festivals Internazionâi tant che il Festival du court métrage di Clermont-Ferrand, il Welsh International Film Festival, l'International Short Film Festival di Capalbio, il Raindance Films Showcase di Londre e altris. La sô ultime produzion in lenghe furlane e cjape dentri la schirie di microdocumentaris su la int e lis sôs passions, Int in Curt e il program musicâl SunsAtor ducj i doi realizâts pe RAI dal Friûl Vignesie Julie, ma prime di chescj al à realizât i trê documentaris che a saran presentâts vie par cheste serade.
21.15 Friûl viaç te storie (2004, 38') Il documentari su la storie dal Friûl des origjins ae fin dal Stât Patriarcjâl.
22.00 La Radio Libare dai Furlans Libars (2005, 28') La storie de radio libare dai furlans tes peraulis e i ricuarts dai protagoniscj di chescj 25 agns di programazion in marilenghe.
22.45 Grant finâl Pai plui grancj: BURIS (2000, 38') Tal 1997 Buris al jere un paîs che al jere daûr a disfâsi. I siei abitants a someavin destinâts a un futûr di disocupazion e rassegnazion e il paîs a une lente agonie. Ma la idee e perseverance di un dai siei fîs plui creatîfs a vevin di gambiâ la muse dal paîs par simpri …
Altris informazions su: comun di Tavagnà o www.buris.it

28 agosto 2006

A scuele di furlan

Vuê us fâs une domande: saressial nissun interessât a imparâ lis regulis de Grafie Uficiâl par scrivi e lei par furlan?
Anzit, us fâs une altre: in pratiche, se o met une volte par setemane une lezion, us plasial?

27 agosto 2006

Un comun piçul, ma cun ideis grandis

Vuê o feveli ancje di un comun chi dongje: Rivis Darcjan_Rive D'Arcano (te foto il Cjistiel).
O aprofiti par saludâ il Sindic, Gabriele Contardo, e la zonte comunâl che intai ultins mês e je daûr a lavorâ une vore ben, come che a dimostrin i gjornâi e chê piçule note che o cjatais come prin coment.

26 agosto 2006

Cipaf: riunion de comission


Come che nus à anticipât Stefano Tuti, si è davuelte la comission Ativitâts produtivis. L'ass. Marco Minisini al à volût puartâ la discussion in comission par fevelâ de situazion e des strategjiis che la zonte e à in program tes prossimis setemanis no dome pal Cipaf, ma ancje pal Agroalimentâr. Al sarès util che Tuti, Minisini o cualchi altri comissari nus disès cemût che e je lade.

24 agosto 2006

Requiem pal Tocai

Cun îr in nestri vin blanc plui carateristic no si clame plui "Tocai", ma Friulano.
Ma provait a imagjinâ: o jentrìn li di Gardo e magari daûr dal banc, invezit di Renzo o cjatin Renute. I domandìn: "Mandi Rene, mi darestu un tai di Friulano?".
Come minimo, invezit di un tai, nus dâ cu la scove!
Cualchidun al à proponût di fâ il funerâl dal Tocai al prossim Friuli Doc!

23 agosto 2006

Ska...tait ducj sul Tiliment!


Prin festival di musiche Ska in Tabine

Musiche a sbreghe balon a Viluce di Ruvigne, localitât Tabine (dongje Sant Denêl) cun “Skatiliment”, l’event musicâl inmaneât de associazion culturâl Frequenze Team, in colaborazion cun Pascat Day.
Ducj sul Tiliment sabide 26 e domenie 27 di Avost: a son ancje i Makako jump.
Par informazions, fracait achì

Convocazion dai comitâts di frazion

Doman aes 18.30 in Municipi a son convocâts i comitâts di frazion. A son clamâts a scoltâ lis decisions che la zonte comunâl è à za cjapât in mert ae taronde di Trivià (te foto la cjase zale che e sarà butade jù - un toc - par fâ stâ la taronde; fasint click sul disen, al devente plui grant e si capìs plui ben).
Chescj a son i nons dai gnûf components dai comitâts:
Farle
DANILO FURLAN (pres), SANDRA STEFANUTTI (vice), DANIELE MARCHETTI, ALESSANDRO BERTINO, IVANO MARCHETTI, ANGELO CAMPANER, ANDREA GABRIELE BERTINO

San Salvadôr
CLAUDIO CARGNELUTTI (pres), VALDI MINISINI (vice), DENIS MINISINI (segretari), AUGUSTO MINISINI, ARMIDA BURELLO

Maian Ovest
GIAN PIERO ANGELO DE MEZZO (pres), GIOVANNI BATTISTA DAFFARA (vice), CARLA NOTARFRANCESCO (segretarie), FRANCO PICILLI, ANNA SCRUZZI, ANNA MARIA CATANIA, MAURO COLETTI

Susans
VECELLIO PLOS (pres), GABRIELLA PITTINO (vice), ALESSANDRO ITALO VENUTI (segretari), GIOVANNI CARLO RADICI, BARBARA GIACOMUZZI, GIUSEPPE BELLO, FLAVIO PLOS

Sant Tomâs
BARBARA MONGARLI (pres), NINO CANDUSSO (vice), LILIANA BEL (segretari), MAURO TABOGA, ANGELA CASASOLA

Pêrs-Sant Liseu
STEFANO BANDERA (pres), SANDRO MICHELINI (vice), ANGELO NICOLA CHIAVOTTI (segretari), MARCO PERSELLO, ANDREA MINISINI, GIANNI VIDONI, ALDO FABRO

Maian Est
MICHELE QUAI (pres), DONATELLA CAPOSASSI (vice), FABIO RIVA (segretari), ITALICO RIVA, ETTORE CIVIDINO, CESARE MODESTO

Cumierç-Trivià
MARGHERITA PLOS (pres), ITALO PIO ROIA (vice), MARTINA PERESANO (segretarie), DANIELE PAOLINI, GIOVANNI PAOLINI, ALBERTO NADALIN, ONORINA COLLINI

Cjasesole
DARIO MODESTI (pres), MAURO BORTOLOTTI (vice), CINZIA MODESTI (segretarie), ALCEO SANDRI, VALENTINO TROMBETTA, PAOLO SCRUZZI, MAURA LIZZI

Fieste Ladine a Sant Denêl

Sul blog il furlanist e su lenghe.net , la notizie de Fieste Ladine a Sant Denêl ta chest fin setemane.
Achì dut il program

22 agosto 2006

Il libri di Angelo Dreosti

Achì o ai voie di complimentâmi cun Angelo Dreosti di Susans, che al à publicât un libri cu la Gaspari Editore di Udin (la buteghe e je in Via Vittorio Veneto, di front de pueste centrâl: librarie Einaudi). Di ce che mi risulte, e je une ricercje che al à fat tai archivis parochiâi su la Prime Vuere Mondiâl. Cumò o ai di leilu, ma se cualchidun al sa za alc al podarès fâ un tic di recension achì. Une volte Agnul al è passât par ca e mi fasarès plasê un so intervent par anticipânus alc dal test...
ps: o domandi scuse a Agnul se no ai dit nancje il titul, ma lu ai viodût di scjampon e ancje par chest o speri che cualchidun al partecipi dant cualchi informazion util.

21 agosto 2006

Il "Vatican" al vinç il torneu dai Borcs di Susans

Borc de Glesie, che cualchidun al clame "vatican", al à vinçût il torneu di Susans, batint in finâl Borc di Gjavon.
La çucule di len invezit e je lade a Borc de Vile.

20 agosto 2006

Letaris sul gjornâl


Us segnali un pâr di letaris che a son jessudis sul gjornâl cualchi zornade indaûr...

19 agosto 2006

Su lis stradis

Dongje di De Mezzo îr di sere tor 6 al à capotât un camion: a àn lavorât cualchi ore par tornâ a metilu in strade ma mi semee che no si son fats mâl.
E simpri a proposit di viabilitât lait ancje a viodi ce che o ai scrit plui di un mês indaûr suntun probleme de ss463.
Pe cronache e par jessi clârs: jo le pensi come in chê sere che o ai scrit chel post e inmò prime cuant che o ai fat une interogazion cuintri chê soluzion (Novembar 2005).
E duncje JO NO SOI DACUARDI DI FÂ UNE ROTATORIE SU LA SS463!!!
Voaltris ce pensaiso?

18 agosto 2006

Thermorubriche mensîl di Avost:
centris sociâi sì, centris sociâi no…

Il nestri Thermonuke al stice une discussion sui centris sociâi. Prin di dut al è ben sclarî che no si fevele di Leoncavallo o robis cussì, ma di chês struturis che a son plui o mancul in dutis lis frazions e che pal plui a son afidadis ai comitâts di frazion par doprâju.
Cualchidun (come cuso) fevelant ancje dai comitâts di frazion al à za dit che a son robe che no covente o un sisteme par riciclâ i trombâts de politiche. Secont me ancje cuso di cjan un part di veretât le à: o vin vût plui di cualchi esempli... Ma a part chest, al è di dî che tai comitâts e je ancje tante int che si impegne cence domandâ nuie e lu fâs parcè che i ten ae frazion e aes problematichis dal paîs.
Un grant difiet de politiche di vuê al è chel di jessi masse voltis lontane de int. Parcè disio chest? Dome par dî che ducj i imprescj par cirî un confront cu la int a van ben e duncje in linie di principi jo o pensi che i comitâts a puedin jessi utii, ma si à di stâ atents a no clamâju dome cuant che al covente alc. Nol è nuie di piês che iludi la int disint che tu i tegnis a ce che a disin e dopo deludile. Par tant a van ben i comitâts se si ju ten in considerazion, no dome cuant che a àn di puartâ ator avîs o calendaris. Parcè che cuant che si tire masse la cuarde, si le romp e dopo no si à di lamentâsi se la int a bruntule.
Par tornâ sui centris sociâi, forsit al volarès viodût di fâju costâ il mancul pussibil, stant che une struture e à coscj fis e si à di cirî almancul di fâle lavorâ par no vê di paiâ spesis di bant. Dut câs a son forsit inmò un puest che al covente e tignî dongje la comunitât, a fâ comunitât e par chest o soi convint che e sedi stade une sielte juste fâju un par frazion, li che se no i unics puescj che la int e à par cjatâsi a son dome la glesie o lis ostariis, stant che ancje lis butegutis a son dutis sieradis. Par Maian al è un tic diviers rispiet aes frazion.

13 agosto 2006

Airshow a Lignan

Vuê al è l'airshow de P.A.N. a Lignan e o speri che ancje la Menapace e vedi vût mût di pensâ a ce che e à dit cualchi setemane indaûr. A proposit: tal ultin consei comunâl daûr de iniziative de nestre maiorance al è stât fat bon un ordin dal dì di solidarietât aes Frecce Tricolori (jo o ai fat di relatôr in sostituzion di Gaggiano, prin firmatari, che però al jere assent). Ancje la minorance lu à votât fasint une propueste di fâju passâ a Maian cuant che la Libertas e fâs il meeting. Ancje noaltris o sin stâts dacuardi. Mi plâs ricuardâ un pâr di robis: no dome la votazion e je stade ae unanimitât, ma par cui che al jere preocupât che cheste e fos une pierdite di timp, il dut si è risolt in 30 seconts! Di altris bandis a àn barufât par oris cence metisi dacuardi!

12 agosto 2006

Festivalshow pardabon biel!


Biele serade cun Radio Birikina. Mi risulte che un dai plui brâfs al è stât Dj Francesco, ma dut il spetacul al mertave. Pecjât pal timp che nol à judât...
Achì o ai cjatât il resocont de serade
: i numars sono juscj?

11 agosto 2006

Istât, timp di motârs

Une des robis plui bielis de Istât, se nol plûf come ta chestis zornadis, al è cjapâ sù la moto e fâ un zirut ator pes nestris monts. Ma prime di lâ al sarès interessant lei chest librut che o ai cjolt li di Moreno Persello, il gno amì motâr che al fâs la Bikerfest.
Il test al è stât scrit di Marco Guidarini, president di Ami, e miedi.
Al è un manuâl che al fâs une panoramiche a 360° grâts sul teme de sigurece par strade e che al invide i motocicliscj a coltivâ la nestre passion pe vuide cun cussience, ma ancje i responsabii des infrastruturis a curâ cun atezions la realizazion di intervents a pro de incolumitât dai motârs.
Bon viaç e un salût ilegâl a ducj!
Ma lait ben planc che il viaç nol è dome rivâ...
Apontament al prossin OKTOBIKERFEST a Pêrs!

Par savê alc di plui sul libri, frache chi

10 agosto 2006

Cipaf

Tal ultin consei comunâl si à fevelât ancje dal Cipaf. Par chei che no lu san, al è il Consorzio per lo Sviluppo Industriale ed Economico della Zona Pedemontana dell'Alto Friuli.
Il comun al è dentri di cualchi mês, ma a son di fâ in curt ats par rindi pardabon significative la nestre presince tal consorzi. Prin di dut e sarès di fâ la perimetrazion des areis di conferî al Cipaf, in maniere che cussì il consorzi al puedi fâ i investiments pal disvilup.
Tes prossimis setemanis a saran clamâts i imprenditôrs des zone par confrontâsi su chest aspiet che secont me al è strategjic pe nestre comunitât.
Voaltris ce pensaiso di cheste sielte?

09 agosto 2006

Un cjanton dal gno paîs


Viodì di cui che al è il voli atent che al induvine dulà che al è chest salt di aghe...

08 agosto 2006

La fieste di Tumieç

Fiestone pai 50 agns di Renzo Tondo: tante int, ma soredut un clime di amicizie vere e sincere. Tra i tancj invidâts ancje Mauro Corona, che di bon montanâr al à ricuardât une metafore significative:
La vite, come la politiche, e je come lâ in mont. Cuant che tu rivis insom tu puedis dome tornâ in jù!
E Renzo al à zontât: Sì, ma la piês robe al è che cuant che tu tornis a bas, tu incrosis simpri chei che a van in sù!

07 agosto 2006

Cun Tondo e Haider a Las Vegas

Vuê al è il complean dal gno mestri Renzo Tondo: 50 carnavâi. Pal solit i regâi si fasin a chei che ju finissin i agns, invezit îr di sere nus à menâts a Klagenfurt, ospits di Jörg Haider, che al è une persone ae man (di politiche no vin fevelât). Il governatôr de Carinzie nus à invidâts a un conciert bielonon. Cu la Rat Pack Band o vin scoltadis lis musichis di Las Vegas cun Frank Sinastra, Dean Martin e Sammy Davis Jr. Pardabon une biele serade! Grazie al paron di cjase e a Renzo!
Tancj auguris onorevul!

06 agosto 2006

Dut un cine: BURIS martars ai 29 di Avost

Dopo dai sglavisn dai 24 di Lui si recupare tal zardin di Vile Tinin a Felet la serade di cine furlan:
MASSIMO GARLATTI COSTA,
DUT INTUNE GNOT
(se al plûf o fasìn in auditorium).
Massimo Garlatti-Costa al nas ai 19.4.1969 a Udin. Daspò de lauree in Siencis Politichis e vê fat la "Scuola Ipotesi Cinema" di Ermanno Olmi al va in Grande Bretagne dulà che si iscrîf a la "Northern Media School" di Sheffield e al cjape il Master in Regjie e Senegjature. Finîts i studis al tache a lavorâ par diviersis cjasis di produzion indipendentis dal Ream Unît, pal canâl televisîf Channel 4 e par la BBC, e par chei al realize tancj films curts. Lis sôs produzions a son stadis mitudis in onde di une schirie di rêts televisivis e tancj siei films a son stâtsselezionâts e premiâts di preseâts Festivals Internazionâi tant che il Festival du court métrage di Clermont-Ferrand, il Welsh International Film Festival, l'International Short Film Festival di Capalbio, il Raindance Films Showcase di Londre e altris. La sô ultime produzion in lenghe furlane e cjape dentri la schirie di microdocumentaris su la int e lis sôs passions, Int in Curt e il program musicâl SunsAtor ducj i doi realizâts pe RAI dal Friûl Vignesie Julie, ma prime di chescj al à realizât i trê documentaris che a saran presentâts vie par cheste serade.

21.15 Friûl viaç te storie (2004, 38') Il documentari su la storie dal Friûl des origjins ae fin dal Stât Patriarcjâl.
22.00 La Radio Libare dai Furlans Libars (2005, 28') La storie de radio libare dai furlans tes peraulis e i ricuarts dai protagoniscj di chescj 25 agns di programazion in marilenghe.
22.45 Grant finâl Pai plui grancj: BURIS (2000, 38') Tal 1997 Buris al jere un paîs che al jere daûr a disfâsi. I siei abitants a someavin destinâts a un futûr di disocupazion e rassegnazion e il paîs a une lente agonie. Ma la idee e perseverance di un dai siei fîs plui creatîfs a vevin di gambiâ la muse dal paîs par simpri …
Altris informazions su: comun di Tavagnà o www.buris.it

05 agosto 2006

Al cjante il Gjal...

Vuê al Festival al è in program "Un Gjal pal Istât", il concors di cjant de Comunitât Colinâr. Ogni partecipant al è leât a di un dai 16 comuns dal comprensori e al ven judicât di une jurie fate dai sindics e di une jurie tecniche di esperts musicâi.
No vino di fâ ancje noaltris une classifiche? Chei che usgnot a vadin, nus podaressin dâ la classifiche alternative, no?

04 agosto 2006

Un cjanton dal gno paîs

Cheste setemane la rubriche e je dedicade al Festival: achì al è Bincoletto, un zuiadôr di une scuadre di balon CHE NO JE "LA PRIME" cul Gion, il siôr perît di Forgjarie: un cussì grant che ti fâs pôre dome a cjalâlu di lontan, ma cuant che tu fevelis cun lui tu capissis subit che al è bon come il pan. Îr ae presentazion de stagjon 2006/2007 de ASD Majanese o vin patît tant di chel frêt che mieç al baste!
Vuê tor des 7 di sere, Gardoland: fieste li di Gardo!

03 agosto 2006

La revision de leç n. 15/96

Vuê al à tacât il so lavôr di revision de leç n. 15/96, il grup nomenât de Regjon: sul portâl lenghe.net ducj i nons.
A son 10 agns che e je stade fate buine cheste leç inovative che e je stade doprade come esempli ancje in altris bandis di Italie, ma che cumò e à dibisugne di jessi inzornade.
Ancje il Furlanist nus vise di chest impuartant apontament.

02 agosto 2006

Ai 4 fieste li di Gardo

Vinars ai 4 di Avost Renute e Renzo a sierin buteghe per feriis. Come ogni an sot sere a fasin une fieste pe sierade dal ambient. Si viodìn a bevi une robe e mangjâ une bocjade.
Ma prime, ai 3 di Avost li dal Festival aes 8 di sere, il President Renzo al presentarà la stagjon agonistiche 2006/2007 balon e volley de ASD Majanese

01 agosto 2006

Sul Messaggero di vuê

La Leç 15/96: une fonde pe incressite de lenghe e de culture furlanis
Par un frut, 10 agns a son dal sigûr un pont di partence cuntun avignî dut di fâ sù. Cuant che invezit si fevele di normis e leçs, 10 agns a puedin jessi considerât un moment par fâ un belanç, resonâ su la atualitât o mancul dal dispositîf normatîf e valutâ se al è il câs di viodi se si rive a meti mans stant la evoluzion dai timps e i cambiaments de societât. Chest discors al vâl duncje ancje pe Leç Regjonâl numar 15 dai 22 di Març dal 1996, che propit chest an e je rivade al travuart dai prins 10 agns di aplicazion.
Par fâ un prin e sintetic belanç di chest deceni, al baste viodi cuâi risultâts a son stâts puartâts in concret di cheste normative, che plui di cualchidun ancje ator pe Italie al à puartât a esempli pe sô completece e struture. Dal sigûr al è stât un imprest normatîf che al à judât a promovi il spirt di apartignince e al à mot un sens di autocussience di une identitât linguistiche, che pe prime volte e vignive ricognossude par leç.
Par nuie secondari pe promozion e pe tutele de lenghe furlane al è stât il ricognossiment di une grafie uficiâl cun regulis claris e definidis pe costruzion di une coinè, une lenghe comune che no cope lis variantis locâls (come che cualchidun al volarès dâ di intindi), ma che e fâs di cuviert, difindint e tegnint sot dut chest patrimoni linguistic fat di tantis particolaritâts.
Lassant pierdi argomentazions tecnichis che dispès a colin intune polemiche che no zove a nissun, come che si à rilevât ancje vie pai tancj cors pratics di grafie inmaneâts de Societât Filologjiche Furlane, lis gjenerazions gnovis a àn sêt di Marilenghe e a sintin la dibisugne di imparâ a lei e scrivi te lenghe uficiâl. Dome se al cres l'ûs ancje scrit, une lenghe e pues pensâ di vê un futûr salt e il fat che tancj zovins si son svicinât ai cors pratics al è dal sigûr un biel segnâl che al va a pro di chescj prins 10 agns de Leç 15/96. Ma cetancj altris a podaressin jessi i esemplis di puartâ, ricuardant i tancj progjets che a van de ricercje toponomastiche, al disvilup di une bibliografie in lenghe furlane che si è insiorade, aes iniziativis proponudis di scuelis, ents locâi e associazions che a àn puartât in maniere capilâr la lenghe furlane dentri de societât civîl.
Ma cheste fase promozionâl, ancje se tal complès une vore positive, no pues fermâsi achì e daûr dal parê di tancj al è rivât il moment par une riflession pal avignî di chest imprest normatîf di tutele linguistiche.
Ta chescj dîs di fat e je stade nomenade di bande de Regjon un comission di pueste coordenade di Pier Carlo Begotti che e varà di rielaborâ cheste norme. La Societât Filologjiche Furlane, cjapant esempli di minorancis linguistichis cuntune tradizion plui fuarte de nestre – prime fra dutis chê catalane – , è je daûr a scrivi une relazion par dâ un contribût costrutîf in chest delicât e fondamentâl moment.
La Societât Filologjiche Furlane no si tirarà indaûr e, stant la tradizion che e viôt chest sodalizi un riferiment storic pe azion di tutele de Marilenghe fin de sô costituzion intal lontan 1919, e je fin di vuê disponibil a dâ il so contribût ae Regjon pe revision di cheste leç cuadri, ancje tignint cont de evoluzion normative che e je stade a nivel statâl cu la leç 482 dal 1999 «Normis in cont de tutele des minorancis linguistichis storichis» che daspò plui di 50 agns e met in vore i principis dal art. 6 de Costituzion che za tal 1948 e diseve clâr che «la Republiche e tutele cun normis di pueste lis minorancis linguistichis».