30 giugno 2008

Consei comunâl

Martars Prin di Lui a 8 e mieze di sere al sarà Consei comunâl, parcè che la setemane passade no vin rivât a sierâ i lavôr dentri di mieze gnot.
Pal savê l'ordin dal dì, fracait chi.

29 giugno 2008

La regjistrazion de interviste argjentine

Come che us vevi anticipât, îr o soi stât intervistât par telefon di une radio argjentine: Radio Fm Comunicar, la emitent di Colonia Caroya, un paîs furlan in provincie di Cordoba.
Cheste e je Colonia Caroya viodude dal cîl.


Invezit cheste chi sot e je la regjistrazion de mê interviste. Jessint une telefonade intercontinentâl, magari si sint ancje cualchi rumorut di font, ma te sostance mi somee avonde buine.http://www.blogger.com/img/gl.link.gif
Mi àn domandât dal gnûf lavôr, des novitâts in cont di tutele linguistiche di bande de gnove aministrazion regjonâl, di ce che si pues lei ta chest blog. Scoltait e disêtmi il vuestri parê.


Inmò grazie a Claudio, Marta, Daniel, Lito e a dute la redazion di Radio Fm Comunicar.

28 giugno 2008

Ce isal di miôr?

Usgnot o soi stât a Sant Denêl. Ce isal di miôr di une buine fete di pressut intune cjalde serade di Istât? Dome une buine fete di pressut intune serade di Istât, mangjade in compagnie: ve ca la Ninine che causalmentri o ai cjatât a cene a Sant Denêl...

In direte cun Radio FM Comunicar

Vuê se dut al va ben o sarai in onde a Radio Fm Communicar, la radio furlane di Colonia Caroya, che mi interviste tor 6 e mieze ore furlane. Chi sot o podês viodi la direte. In câs, se o vessis di pierdile, di solit la trasmission e va in replice su Radio Onde Furlane lunis a une dopomisdì.
Un grazie a Claudio, Marta, Daniel, Lito e a dute la redazion de Radio furlane argjentine e un mandi a ducj i furlans ator pal mont.

Live Streaming by Ustream.TV

Cristina, santule des cuessis

Cristina Chiabotto (te foto piçule, cul Gnut) mi sa che si cjate ben chi di nô. Dopo Friuli Doc, e je tornade in Patrie par screâ "Aria di Festa" (te foto grande cuntun biel plat di pressut... un grazie a Ranieri pe foto). E po, ancje par gambiâ sogjet: dopo dal uciel de aghe al è just cognossi ancje il purcit di culine...

27 giugno 2008

Une biele gnove di bande dal President

Renzo Tondo, President de Regjon (te foto) al à incuintrât il Comitât pe Autonomie e pal Rilanç dal Friûl. E mi à splaçât! Eh sì, parcè che se pal passât jo e lui o vin vût ce discuti in mert a la cuistion de tutele de leç sul furlan, cheste volte o dîs che o soi content di ce che o ai sintût. Ancje se al è stât sclet: "su cierts aspiets o resti critic" il President al à cjapât biei impegns "O siguri che o tutelarìn la leç sul furlan denant de Cort costituzionâl e sul furlan in Rai mi met a disposizion par une presince plui fuarte" al à dit.
Un moment simpatic de riunion al è stât cuant che il President al à ricuardât lis discussions che o vin vût fevelant di politiche linguistiche e dutis lis voltis che o vin resonât ancje cun decision, ognidun motivant lis nestris diviersis posizions.
O soi stât content ancje di sintî: "Fasìn un percors insiemit" che il President al à dit al Comitât pe Autonomie e pal Rilanç dal Friûl.
E la riunion dai 25 e je lade vie trancuile, fevelant di tantis robis che o podarês cjatâ te rassegne stampe tai coments. Intant ve chi il comunicât uficiâl dal sît de Regjon.
Ben: o soi content.

25 giugno 2008

Un di chescj

Torzeonant su Internet o ai cjatât un articul dal Piccolo che al fevele de categorie che o fâs part ancje jo: i impleâts di segretarie.
Ta chescj dîs si à sintût a fevelâ tant e duncje o propon ancje jo la discussion chi.
Mi riten fortunât a vê cheste ocasion e no mi lamenti par nuie des jentradis, ancje se i ten a precisâ che lis cifris che o lei chi, no mi somein coretis. O ai tirade la prime buste e i numaris publicâts sul gjornâl a son plui alts de realtât. Cun di plui, us garantìs che il lavôr nol mancje.

24 giugno 2008

Il blog dal Guardianut

Il dree al varès di jessi content: di cuant che al à sierât il blog a son nassûts altris par furlan. L'ultin al è chel di Miguel che al scree il blog dal Guardianut.
Stin a viodi ce che al cumbine: benvignût te blogosfere.

23 giugno 2008

Un ucielut mi à dit

Mi è rivade vôs che usgnot e sarès stade convocade une assemblee par domandâ a la comunitât ce che e pense dal gnûf tor. Intun prin moment ancje al comission teritori ambient dal Comun e veve decidût cussì, ma dopo la robe si è fermade.
Cumò o ven a savê (al jere scrit ancje sul Mv di îr), che don Giuliano al à clamât dongje la comunitât par ilustrâ il progjet (cussì al è scrit sul gjornâl...): apontament a 8 e mieze di sere te sale parochiâl a Maian.
Ma a mi... alc no mi torne...

21 giugno 2008

Prin dì di Istât sul Cuarnan

Vuê o ai stât a fâ une cjaminade sul Cuarnan par festegjâ la prime zornade di Istât.
Par câs, o ai ancje cjatade buine compagnie "impegnade intune perlustrazion"... almancul cussì mi à dit intant che si cjaminave sù pal troi...
Parsore e je la gleseute dal Redentôr (te foto), di dulà che si rive a cjalâ jù pal Friûl fintremai a Lignan, se al è biel.
Par dî la veretât, vuê no ai rivât fint insom, parcè mi soi cjatât un tic ingredeât... un tic rusin... o soi rivât fint a malghe Cuarnan e cuant che li mi soi inancuart che o vevi dismenteât il tacuin e no varès podût comprâmi il frico, mi son zirât i "cjarsons" e o soi tornât indaûr! :-( Ma o torni!... sigûr che o torni!

20 giugno 2008

Biliet di visite!

Vuê o soi un tic emozionât: mi àn consegnât i biliets di visite (cjalait chi in bande).
O soi emozionât parcè che al è il prin bilietut di visite che o ai e par di plui mal soi fat fâ di une bande par furlan e di chê altre par talian.
Lu sai, forsit mi fâs cjapâ un tic masse, però la vite e je fate di piçulis sodisfazions!
Un grazie a Claudio e a Federica che mai àn fats!

19 giugno 2008

Un libri di lei

Us segnali un biel libri di lei e che al sarà presentât vuê a Udin a 6 di sere in Sale Ajace. L'autôr al è Marco Stolfo e chi in bande e je la cuviertine di "Lingue minoritarie e unità europea".
Par altris info, fracait chi e chi.

18 giugno 2008

Consei comunâl

Martars ai 24 di Jugn a 6 e mieze di sere al sarà Consei comunâl.
Pal savê l'ordin dal dì, fracait chi.

17 giugno 2008

La Patrie on line

La Patrie dal Friûl e je rivade. Tal numar di Jugn o vin fat un speciâl "Ce che o volìn". Di chest numar o podês ancje lei i articui on line.
O aprofiti par segnalâus la Fotogallery chest mês che o ai fat a Zui pe bussade des crôs.
E visaitsi di fâ l'abonament: leile su cjarte e je dute une altre robe!!!

Abonament par un an: 25,00 euros (pal forest 30,00 euros) sul cont corint postal n.12052338 intestât a "LA PATRIE DAL FRIÛL" Glemone

16 giugno 2008

Euro2008 e Maxpola

O scuen ametilu: a mi cjalâ lis partidis par television, mi fâs une sium che no us dîs... ancje îr o ai cirût di viodi la Cechie, ma mi soi fat une ronfade di lusso.
Par furtune che il nestri Maxpola mi segnale un gnûf sît che al fevele di Euro2008.
A son diviersis rubricutis che mi àn propit divertît: par esempli, cheste e cheste... ma ancje tantis altris.

15 giugno 2008

12 giugno 2008

Di balon in balon

Stant che ducj us fevelin di Euro2008, jo invezit us feveli di un altri torneu di balon li che al à vinçût il Sudtirôl: ve ca il sît di Europeada2008, il campionât di Europe di Balon des minorancis linguistichis.

11 giugno 2008

Ospedâl di Sant Zuan sul Gazzettino

Vuê la stampe e à dât tant spazi al nestri comun. Dopo dal articul su la proteste pe rotatorie scrit sul Messaggero, ve chi il Gazzettino che al fevele dal Ospedâl di Sant Zuan a Sant Tomâs (te foto, la gleseute che e sta devant)

Inmò une rotatorie

Vuê sul gjornâl Margherita Plos di Triviâ e interven cuintri de rotatorie che e varès di jessi fate su la SS463 a Trivià, li dai Campos. E fâs un atac une vore fuart cuintri de Aministrazion, in particolâr cuintri dal ex assessôr ai LLPP Aldo Zucchiatti e cuintri dal Sindic.
I particolârs dai dibatit a son sul gjornâl. Par chel che o pensi jo, o crôt che une rotatorie no sedi la soluzion plui juste: suntune strade di grant trafic come la SS463 mi somee che e podedi rapresentâ un tapon pericolôs e no une soluzion che e judi. No je migo grande come chê di Dignan.

10 giugno 2008

In ufici

Vuê us mostri il gno gnûf ufici. Al è passât cualchi dì, ma dome cumò le met on-line... se no cualchidun al tache a pensâ che o vedi contât une bufule... :-)
Un grazie al Dree pal tapetut dal Mauuuuuus e pe golarine aur-blu (come la bandiere de Patrie, ben in viste su la mê scrivanie).

ps1: o domandi scuse pe risoluzion de foto, ma il gno telefonut nol à tante fuarce.

ps2: o domandi scuse pe muse, ma cheste o ai e cheste mi ten, eheheh

09 giugno 2008

Alc&Cè

Ve chi, in regâl cu la Vite Catoliche, il gnûf numar di Alc&cè, il gjornalut par fruts dut in marilenghe curât de brave Erika Adami, realizât cul contribût de Direzion centrâl Istruzion, culture, sport e pâs de Regjon Friûl-Vignesie Julie.
Chest colp si fevele di vacancis. A tornin i Gnognosaurs e Sclisignûf, ma al rive ancje Tocut cu lis lôr aventuris divertentis a fumets; cence dismenteâ i zûcs. E po tantis ideis pal timp libar.
Par sugjeriments e curiositâts sul gjornalut, si pues scrivi une e-mail a Erika Adami, coordenadore de riviste, ae direzion: adami@lavitacattolica.it

08 giugno 2008

Auguris Papà!

Vuê al fâs i agns gno pari Gian Carlo, che però ducj a cognossin come il "John", che, te foto, al sarès sedi chel daûr sedi chel parsore de torte! =)
Auguris Papà!

07 giugno 2008

Bikerfest 2008

Vuê matine o ai stât a la Bikerfest a Osôf. E jere la prime volte che o jentravi come "Motâr". Ve chi che o soi cul gno amì Moreno, l'organizadôr dal event. O ai stât a sintî une conference su la sigurece stradâl e i problemis che i motociscj a cjatin ator pes stradis e che a rapresentin un pericul pe nestre incolumitât.
Par chest us segnali il sît di Dismo, e di Motociclisti incolumi, che a fevelin di chest argoment.
Un "Grazie di cûr" a Carla e a Moreno: o soi stât pardabon content e mi sintivi come un frut su lis gjostris!!!
Pal rest, us dîs dome: Ride Free!

Us met cualchi foto (fracait sul link):
Bikerfest 2008 - 00
Bikerfest 2008 - 01
Bikerfest 2008 - 02

Par chestis chi sot o ringrazii Ranieri che lu ai cjatât a la Bikerfest!
Christian Biker 01
Christian Biker 02
Christian Biker 03

Invezit achì un met la mê Bikergallery


06 giugno 2008

E par un che al scree, un altri al inzorne

Disìn che i efiets di une cierte sieradure ben plancut a rivin... no sai se e je semplice coincidence o cause efetive, dopo che il Dree al à sierât o vin plui di cualchi novitât. Di fat, dopo dal blog di storie furlane, ve che i Sporteliscj a tornin a cjapâ in man il lôr (ma jo o preferìs dî: il nestri) blog: Il Sportel. Di fat ancje se formalmentri no soi plui de categorie, mi sint simpri part de famee. Bon lavôr!

Par un che al siere, un altri al scree

Come che o savìn il Dree si è cjapât un tic di polse, ma a son passâts dome pôcs dîs che la blogosfere furlane e salude cun gjonde une biele novitât: come che nus visin ancje la Ninine e Norman, ve chi un biel blog di storie furlane, screât dal nestri Sandri.

I diaris di Luca e Carlo

Luca nus vise che a son on-line ducj i documentaris di Farcadice: Colonia Caroya, Charleroi, Umkomaas e Toronto.
Grazie a Luca e a Carlo (te foto) pal lavoron che a àn fat.

05 giugno 2008

Jo o resti de mê

E je vere che no si à di creâ alarmisim, ma dute chel fevelâ di nucleâr che si à vût tai ultins dîs, al à trascurât un fat. E la notizie dal incident te centrâl nucleâr in Slovenie nus à tornât a fâ spiçâ lis orelis.
E je ancje vere che o vin un probleme di energjie, ma secont me prime di vierzi rubinets gnûfs par fâ jentrâ aghe, al sarès il câs di stropâ cualchi buse che e je te podine... e je une metafore, ma o pensi che e rindi...
E po, se ta chescj vincj agns che o sin restâts fers, no je stade tirade fûr une soluzion al probleme energjie, a voaltris no us pucial di stiç?

04 giugno 2008

Letare di Remo

Sul Messaggero di îr e jere une letare al diretôr scrite di Remo Brunetti di Cjavaç. Al ricuarde une biele iniziative li che o jerin intervignûts l'on. Mauro Pili, l'atuâl President de nestre Regjon, Carli Pup e jo. O ringrazii Remo Brunetti ancje pe segnalazion dal biel sît de Provincie di Trent su lis minornancis. Lait a viodilu.

03 giugno 2008

A proposit des vacancis dai plui piçui

O ringrazii sedi thermonuke, sedi M.F. (che mi à scrit une mail) che mi àn segnalât la evoluzion di chê riunion fate a proposit des ativitâts estivis pai fruts. Se intun prin moment al someave che la rispueste de Aministrazion comunâl e fos "Par resons logjistichis, rangjaitsi", cumò al ven fûr che e sarès une pussibilitât...
Ve chi la letare dal Sindic che al spieghe cemût fâ: LAIT A LEI.

02 giugno 2008

Sirenut furlan

Mi vevin contât di un siorut che al jere rivât a cjaminâ su la aghe e alore, profitant di cualchi zornade di polse al mâr, o ai volût provâ ancje jo...
Come che si viôt, te zone basse de schene, il risultât de fricodipendence...