30 aprile 2006

♪ ♪ ♪ "Eppi birtdei tu ju!" ♪ ♪ ♪

Vuê e finìs i agns mê sûr:
tancj auguris Sonia!!!

ps: lu sai, lui sai... l'inglês nol è propit chel di Oxford, ma si sin intindûts distès, no?

29 aprile 2006

Premi internazionâl di poesie in lenghe furlane "Gjiso Fior"

Verzegnis, o come che a disin lenti "Verzegnas", e je famose pe corse di machins che e mene fintremai a Siele Cjanzutan, pal lât, pe piere rosse e lis sculturis, ma di cualchi an in ca ancje pal premi internazionâl di poesie in lenghe furlane "Gjiso Fior", poete, artist e gjornalist mancjât tal 1978. Vie pe cerimonie di premiazion o vin scoltât no dome lis poesiis che a àn vinçût, ma une vore interessants a son stâts i intervents des delegazions des minorancis linguistichis di Sauris, di Resie, di Tamau, dai Ladins dal Belumat e dai Romançs de Svuizare. Come par dî: plui lenghis minoritariis (e duncje ancje plui Furlan) = plui Europe!
Compliments ae organizazion pe iniziative!

ps: compliments al cogo pal rinfresc! :-)

28 aprile 2006

Annuntio vobis: habemus "Giuntam"!

Come che si à let sul Gazzettino dai 28 di Avrîl, e je stade presentade la gnove Zonte Comunâl.
Jo no soi.
In consei o ai fevelât come Cjâf grup e chest al è il gno intervent che o ai fat a non di Forza Italia, UDC e AN:
"O sin chi usgnot par inviâ chest gnûf mandât aministratîf.
Chest al è il risultât des urnis, che a àn dit in maniere clare cemût che le pense la int di Maian.
Te stesse dì la int e je stade clamade a sielzi sedi la composizion dal Parlament sedi la composizion dai Conseis des aministrazions locâls: la Provincie e il Comun. E Maian al à fevelât clâr: la maiorance e sta cul centridrete (pes politichis o sin tor dal 62% e passe).
Ma al è clâr che si à di fâ une analisi profonde di ce che al è vignût fûr des elezions.
Il risultât che o vin vût a nivel locâl al responsabilize une vore il Consei Comunâl: sedi la Maiorance sedi la Minorance. La Maiorance in Consei Comunâl e à vinçût cuntun scart di dome 93 vôts e chest al à di fâ pensâ: no vin nissun alibi di chi indevant.
Ancje la composizion dal esecutîf e merte une considerazion.
La int e veve indicât in maniere clare lis preferencis dai elets. A gno non personâl e di ducj i candidâts o ringrazii i eletôrs.
Lis sieltis dal Sindic a son il risultât no dome des indicazions dal eletorât, ma ancje di regulis di compuartament concuardadis par dâ la juste rapresentance a lis fuarcis politichis: o vin di vê la onestât di dîlu!
Cumò chest esecutîf al à di lavorâ: lassìnlu lavorâ, continuant il percors passât.
Jo, par spirt di servizi al partît e par responsabilitât tai confronts des personis che mi àn dade la lôr fiducie, o ai decidût di acetâ l'impegnatîf rûl di Cjâf grup, come che mi àn domandât e cence tirâmi indaûr denant des responsabilitâts.
Cun cheste mê sielte, o declari (par chel che mi rivuarde) sierade une parentesi fate di tensions e contrascj, che cualchi mês indaûr e à viodût chest paîs protagonist de cronache.
Le sieri parcè che la int mi à dimostrât clâr e net ce che e pense di me e chest mi baste, al è clâr che Forza Italia, ma o crôt di fevelâ ancje par UDC e AN che mi àn volût come lôr puarte vôs, e je consapevule di jessi la fuarce politiche di riferiment.
Par chest no fasarà mancjâ il so contribût di sostegn e stimul pal esecutîf, ma lu fasarà in maniere atente e propositive: a son stâts condividûts i obietîfs dal program eletorâl, ma chescj a varan di jessi realizâts cun timps e modalitâts che a àn di vê come interès prin, l'interès dal paîs.
Il lavôr di grup al à di continuâ a jessi il motôr pe gjestion da la "res publica".
O concuardi cun ce che plui voltis e à dit ancje la Minorance: i partîts no àn di jessi un intric aes necessitâts dal paîs. Lu son dome se cualchidun si vise di lôr dome par vê la scuse e parâsi tes situazions di dificoltât.
Ma se la dialetiche politiche e devente stimul pe cressite, jo o soi il prin a rivendicâ cheste funzion di riferiment. E par chest mi sint di tindi une man ancje ae Minorance: che o clami di pueste cussì "Minorance" e no "oposizion".
Il statût e il regolament no proviodin come in Gjermanie la "Große Koalition", ma ognidun te sô posizion al varà di lavorâ par stimolâ la Zonte Comunâl.
E se la Minorance lu riten util, mi rint disponibil a fâmi interlocutôr par un dialic fra lis fuarcis politichis, tai confronts dal Esecutîf e de Maiorance, pal obietîf condividût de cressite dal paîs.
Cun chest o sieri il gno intervent augurant bon lavôr a ducj i elets, domandant une man ancje a chei che no àn rivât adore a jentrâ in Consei Comunâl e ringraziant i partîts e i eletôrs che a àn crodût e a crodin tal nestri progjet".

A la fin de presentazion des liniis programatichis o vin fate ancje la declarazion di vôt, cheste chê dal nestri Grup FI_UDC_AN:
"Come che al diseve il Cjâf grup Molinaro, mi rint cont ancje jo che la prime sentade dal Consei Comunâl e je une evenience particolâr: mi auguri e o ai fiducie che jentrant te operativitât si puedi concentrâsi sul lavôr concret. O torni a ribati la mê ufierte a puartâ indevant un dialic interlocutori, pal ben condividût dal paîs, ognidun te sô posizion.
Lassìn lavorâ l'esecutîf, ma stant ben atents ai obietîfs, ai timps e aes modalitâts: no in maniere passive, ma in maniere dinamiche. Se chest al disturbe, mi displâs, ma al è il gno mût di fâ.
Dite chest, a non di FI_UDC_AN o doi parê favorevul a lis liniis programatichis che o vin sintût".

27 aprile 2006

Vivi a Ruvigne

L'amì Dino nus segnale chest sît internet che al fevele di Ruvigne e nus conte di cemût che si vîf tal paîs bagnât dal Tiliment: fracait achi par viodi Vivi a Ruvigne.
A proposit di Tiliment: cui sa se il gnûf Consei Comunâl di Maian al varà la voie, il cûr e la fuarce di esprimisi cuintris lis cassis di espansion o se al sucedarà come ae fin dal 2005? Al jere Novembar 2005 cuant che o ai domandât di cjapâ posizion e o ai presentade une mozion cuintri lis cassis di espansion. Ce rispueste mi àno dade (sedi la Maiorance, sedi la Minorance)? "Mah, viodarìn... inmò no savìn ce pensâ!"
Varano pensât avonde cumò? Cuasi cuasi ur torni a domandâial di gnûf... Par chest patrimoni ambientâl e vâl la pene bati e continuâ a bati!

26 aprile 2006

Spiete, che ti spiete...


Spiete, che ti spiete, la zonte no je inmò no stade nomenade. Intant Vinars ai 28 di Avrîl aes 18.00 al sarà il prin Consei Comunâl: sperìn di viodi ancje cualchi assessôr. Forsit cul marcjât de Joibe, a rivin ancje lis nominis.

25 aprile 2006

A Maian, Atletico Mineiro-Azerbaijan: 2 a 0

Biele partide vuê a Maian, li che la scuadre brasiliane e à vinçût su di chê azare. Stant che o vin fat cognossince cun chei dal Atletico Mineiro, Paolo Graziani (te foto piçule) al subit domandât di podê lâ a fâ lis vacancis a Belo Horizonte: achì al è che al telefone al sindic de citât brasiliane e, stant che al è convint che e je sul mâr, al è che i domande trop che coste un gabine, sdraio e ombrelon… Pecjât che Belo Horizonte e je a 800 metris di altitudin e il mâr nol è propit a un tîr di sclop... (chi in bande a çampe si pues viodi). Par dî la veretât la scrite “Horizonte” e rive cuasi dute sul Atlantic, ma no crôt che e sedi la stesse robe… ma va tu a spiegâial a Pauli… Po ben… mi sa che al è miôr che intant si vadi a fâ une svuacarade tal Tiliment o te Tor. Compliments al President Renzo Natolini e a dute la societât dal Maian pe organizazion dal event! Bulos ancje i cogos e chei dal bevi! Grazie a ducj pe biele zornade!

24 aprile 2006

Gradiscje: il balon al è il sport plui biel dal mont (beh, forsit al ven al secont puest...)

Cerimonie di inaugurazion dal torneu di balon par zovins "Nereo Rocco" a Gradiscje dal Lusinç . Cul President Renzo Gardo e cul dirigjent Zannier o sin lâts tal gurizan pe ocasion. Tantis societâts di balon cu lis lôr rapresentativis di zovins. E intant che i interiscj a jerin in pose cui dirigjents di Moratti & C., o ai cjapade la ocasion par cognossi la Miss Italia triestine Susanna Huckstep: ciò muli, go fato una fatica bestia a vardar drito el fotografo, me cascava l'ocio! (Mi tocje ancje imparâ a fevelâ forest, ma e val la pene...)
Fevelant ancje un tic di balon, doman 25 di Avrîl a Maian ospits pal torneu Atletico Mineiro e la nazionâl dal Azerbaijan. Si tache aes 16.00 tal stadi gnûf.

23 aprile 2006

Otave in Cumierç

Vuê e je la “Otave” di Pasche e in Cumierç e je fieste grande. L’an passât la parochie di Sante Marie e à fat fieste pai seit secui di fondazion dal Santuari Marian (1305-2005). Pe ocasion Pro Giuliano al à fat fâ une biele ristampe in trê lenghis (furlan-la lenghe dal paîs, talian-le lenghe dal stât e todesc-la lenghe de plui part dai forescj che a passin denant dal Santuari).
O ai vût il plasê e l’onôr di coordenâ la realizazion di cheste preziose publicazion che e à viodût impegnats ancje: Vincenco Di Leno pes fotos, Tiziana De Caneva pe version furlane, Francesca Cattarin pe version todescje e la Provincie di Udin pal finanziament dal progjet.

22 aprile 2006

Gnovis su la Damiere di Tarvis

Come che o vin comunicât cualchi zornade indaûr, cheste setemane a Tarvis (ecezionâl la organizazion metude in vore dal Comun e dal Sindic Franco Baritussio, che al à dute la ricognossince e il ringraziament di Renzo Tondo, president de FID) a son in cors lis 16 partidis pal "match" finâl che al darà il titul di campion nazionâl assolût di dame taliane: a contindisâl il livornês Michele Borghetti e chiozan Mirco De Grandis (pe cronache al è in vantaç Michele Borghetti, za 10 voltis campion talian).
Si pues viodi lis partidis in direte cu la webcam dal sît de F.I.D. (Federazione Italiana Dama). Domenie ultime zornade di gare e martars cerimonie di premiazion.

Te foto, di çampe a drete: Franco Baritussio, Mirco De Grandis, Maria Giovanna Elmi, Michele Borghetti e Renzo Tondo.

21 aprile 2006

Berlusconi a Triest: Jo a Prodi no i telefoni gran!

Intant che a Maian a son daûr a resonâ par contentâ i ultins che a àn di jentrâ in zonte (stant ai gjornâi, vuê in matinade a vevin di jessi nomenâts i assessôrs, ma stant che nissun mi à dit nuie, la mê esclusion dal esecutîf e je daûr a deventâ une ciertece…) noaltris cun Renzo Tondo o vin passât un biel dopomisdì e Berlusconi nol à deludût lis plui di 3500 personis (a voli) rivadis al PalaTriest.
Gran biel comizi cun piçule introduzion dal Silvio che al cjante come Teddy Reno e al recite a memorie une poesie di Umberto Saba!Argoment principâl a son stadis lis elezions. No mi à parude une biele peraule chê des “irregolarità elettorali”, jo no le varès doprade, ma o condivît in plen une jessude che al à fat Berlusconi (o jerin a Ts e nol à podût fevelâ par furlan, almancul fin che al jere sul palc...):
“Se la sinistra è così certa della vittoria, dovrebbe farsi lei promotrice dei controlli e delle verifiche per fugare ogni dubbio e non dover portarsi addosso il pesante fardello di una sorta di peccato originale, come è il dubbio di non aver raccolto effettivamente i consensi dell’elettorato”. In buine sostance: se al è dut a puest, se a son cussì sigûr di vê vinçût benon e che des verifichis il risultât nol pues che jessi confermât, che a tornin a contâ lis schedis!
Eh il PalaTrieste al è dut cun lui! Grant Silvio!

20 aprile 2006

Doman ducj in Gjite a Triest

Il nestri Silvio al rive doman a Triest par sierâ la campagne eletorâl pal secont turni des elezions aministrativis. Cun Renzo Tondo o vin fate la coriere e si partìs doman dopomisdì di Tumieç!

19 aprile 2006

AUTORItratti a Rivis Darcjan: musiche e leterature

Us segnali une serade speciâl sul teme "peraulis e musichis" fevelant e sunant di vuere e imigrazion: sabide ai 22 di Avrîl aes 21.00 a Rivis Darcjan Bozidar Stanisic (nassût tal 1956 a Visoko in Bosnie), che cumò al vîf in Friûl za aromai dal 1992, al presente Bon Voyage, il so libri suntune vuere dismenteade. Cun lui e sarà la musiche dai Dodi&Monodi che tal 1998 a àn vinçût Arezzo Wave e che sabide a presentaran "New Barbonia", il lôr ultin album.

18 aprile 2006

Dante Alighieri al jere furlan: o ai lis provis!!!

A Pascute o ai stât a fâ cori i ûfs a Florence (Firenze) e par leâ l'util al divertiment, o ai stât a fâ visite al Fogolâr Furlan di lenti. Ben, cuant che o ai tacât a lei tal archivi dal Ent, no volevi crodi ai miei voi: al è saltât fûr l'At Costitutîf e cui jerial il prin firmatari? Dante Al è Vieri (che po al è deventât par Talian: Alighieri).
E po in chei agns (a jerin i prins dal 1300, come l'At Costitutîf dal Fogolâr Furlan Fiorentin datât "Mai 1307") al jere propit daûr a scrivi la "Divina Commedia" che te prime version e jere par furlan, ma che par cuestions di comercializazion, l'editôr i à conseât di voltâ par Talian... Ve chi un tocut che o torni a scrivi par intîr: al è chel toc famôs che al fevele di Ulisse e che al finìs par talian cun:
"fatti non foste per viver come bruti,
ma per seguir virtute e canoscenza."

Duncje o ai cjatât:
"O fradis" o disei "che par milante
pericui l'ocident o vês rivât
a cheste vilie tant pôc impuartante

dai nestris sens par ce che al è restât
no stait a refudâ la esperience
daûr dal soreli, il mont inabitât.

Considerait ben la vuestre semence
no sês stâts fats par vivi di salvadis
ma par cirî virtût e sapience”.

17 aprile 2006

Musiche in Friûl

I Musicologi a son une associazion che a sede a Colorêt, ma che e lavore par dute la Comunitât Colinâr (e no dome): tal 2004 a son stâts ancje a Maian cuntune cunvigne "Notis su Notis" su la musiche furlane e l'ûs dal furlan. Chi in bande e je la pagjine principâl dal lôr sît internet: www.musicologi.org ma no si fermin dome achì. Di fat al esist ancje un altri portâl: www.musicologi.com. In chescj doi sît si pues cjatâ pardabon dut ce che al inten la musiche te nestre regjon (concierts, cors, discs, e vie indevant...)
Di tignî di voli!

16 aprile 2006

Ospits di Renzo Tondo

Îr al Benvenuto di Tumieç o ai vût il plasê di cognossi un pocje di int che o vevi viodude dome par television: intant che Idris al zuiave di dame cun “il Vate” Otello (pe cronache: al à vinçût Otello), jo o ai preferît dedicâmi a cheste altre Dame: Antonella Elia. Cun Maria Giovanna Elmi a jerin tal albierc di Tondo, par vie che in setemane a Tarvis si davuelzarà la finâl pal titul di Campion Assolût di Dame: duncje apontament miercus 19 aes 18.00 pe conference stampe cui Vip e po cuatri dîs di gare!
Intant, inmò Buine Pasche a ducj!

15 aprile 2006

Rassegne stampe: a fevelin di Maian...


Vuê o ai piât il Pc o torzeonant ator par internet o ai cjatade une dople sorprese: ve chi il servizi che al à fat lenghe.net, il portâl de lenghe furlane, su chest blog. Grazie ae lôr redazion!
E ancje sul Gazzettino...
Inmò Buine Pasche a ducj!

14 aprile 2006

Buine Pasche!!!


Tancj auguris a ducj!!!

Letaris pe Argjentine a Egidio Feruglio

Vinars ai 21 di Avrîl a Tavagnà li dal centri civic aes 18.00 Javier Grossutti e Gianpaolo Carbonetto a presentin il libri di Bianca Agarinis Magrini “Lettere per l’Argentina a Egidio Feruglio” (te foto, la cuviertine), archeolic, esploradôr, grant studiôs, salacor plui cognossût in Argjentine che no in Friûl.
Par cognossi la figure di Egidio Feruglio, lait a viodi la sô biografie e il sît dal Museu Archeologjic Egidio Feruglio che i àn dedicât in Patagonie.

Il vin blanc: cemût clamâlu?


Ancje chei che no bevin vin, al è probabil che a vedin sintût a fevelâ de cuestion che il Friûl al à in pîts cu la nazion de Ongjarie in mert ae denominazion dal vin Tocai. Stant ancje a ce che e à decidût la Comunitât Europeane, chi di nô si varà di gambiâ non al vin. Par viodi di cjatâ fur une propueste acetabile si son scomodât in tancj e al pâr che si sedi dongje de soluzion. Ma cualchidun nol mole e al propon un scandai. Lait a dî la vuestre achì...

13 aprile 2006

Par chei che no podin fâ di mancul di fâ conts...


Dopo des elezions, al semee che il passetimp preferît di plui di cualchidun (indi è un ancje achì che al à volût dimostrâ cemût che si dopre l'imprest te foto) al è chel di pierdisi in conts e calcui par dimostrâ che chei che a àn vinçût no àn vinçût avonde, cjalant il numar di chê altre volte invezit al jere di plui, al jere di mancul... e vie indevant...
Un altri esempli di grande statistiche e dimostrazions matematichis si pues lâ a leilu achì...

Maianês ator pal mont

Cjalait ce che a fasin chei di Maian, tes siencis e tal sport, ator pal mont!
Mandi a Claudio (chi a çampe) e Tiziano (chi a drete, lait a lei pagjine 13 dal pdf linkât...).

Ps: chi la politiche no centre, dome che no savevi cemût meti lis fotos :)

12 aprile 2006

Maxpola e la machine dal timp


Par cui che al à voie di un tic di "amarcord", ve chi ce che mi à mandât Maxpola: tignîtsi dûrs e bon viaç!!!

11 aprile 2006

46 VOLTIS: GRAZIE!!!

O ringrazii dutis lis 46 personis che mi àn dade la preference!
Daûr di chescj numars (provisoris-uficiôs) o soi:
il 2° di Forza Italia
il 3° de Liste FI_UDC_AN
il 3° de Maiorance
il 4° di dut il Consei Comunâl.

Dâts gjavâts fûr dal servizi eletorâl de Regjon .

Rassegne stampe: il Friuli di vinars ai 7 di Avrîl


Intant che o spietìn di capî alc di plui sui numars, ve chi alc di lei une robe sul Friuli

10 aprile 2006

Risultâts des Elezions: la analisi dal assessôr esThermo

Intant che o spietavi i risultâts finâi dal Parlament o ai cjatât l'inzornament in direte e cualchi coment di lâ a lei.

Anchì sot invezit lis Aministrativis (risultâts uficiôs):
I risultâts des Provinciâls tal coleç di S. Denêl (Maian, S.Denêl, Ruvigne, Forgjarie) e composizion dal gnûf Consei Provinciâl di Udin.
Achì in bande invezit la composizion dal gnûf Consei Comunâl di Maian.
O disarès che cumò o spieti il coment di Thermonuke: e tache la rubriche dal assessôr esThermo...

Elezions Aministrativis: Comun di Maian

Il cont des schedis pes elezions Comunâls al tache martars 11 dopo des Provinciâls: par viodi la afluence frache chi.

Pe precision a Majan a son chescj numars (uficiôs) pe afluence aes Comunâls:

Iscrits tes listis dai eletôrs: 6.060
Sezions: 8/8
Oms che a àn votât: 2.078
Feminis che a àn votât: 2.123
Totâl dai votants: 4.201
Percentuâl: 69,32%

La percentuâl e je plui basse des politichis par une cuestion matematiche: chest numar al ten cont ancje dai residents tal forest e duncje il numar dai iscrits al è plui alt. Pes politichis invezit il numar al è plui piçul par vie che al è za gjavât il numar di chei che a votavin tal forest.
Duncje pes politichis mancul iscrit=percentuâl plui alte; pes aministrativis plui iscrits=percentuâl plui basse; il numar dai votants al è di fat plui o mancul il stes di chel de Cjamare (18 agns).

Elezions Aministrativis: Provincie di Udin


Il cont des schedis pes elezions provinciâls al tache martars 11 aes 14.00: par viodi la afluence frache chi.

Pe precision a Majan a son chescj numars (uficiôs) pe afluence aes Provinciâls:

Iscrits tes listis dai eletôrs: 6.060
Sezions: 8/8
Oms che a àn votât: 2.080
Feminis che a àn votât: 2.122
Totâl dai votants: 4.202
Percentuâl: 69,34%

La percentuâl e je plui basse des politichis par une cuestion matematiche: chest numar al ten cont ancje dai residents tal forest e duncje il numar dai iscrits al è plui alt. Pes politichis invezit il numar al è plui piçul par vie che al è za gjavât il numar di chei che a votavin tal forest.
Duncje pes politichis mancul iscrit=percentuâl plui alte; pes aministrativis plui iscrits=percentuâl plui basse; il numar dai votants al è di fat plui o mancul il stes di chel de Cjamare (18 agns).

Elezions Politichis - Cjamare: risultâts in Regjon

Ve chi il link par viodi i Risultâts pe Cjamare.
I inzornaments a son fats man man che a rivin i conts des sezions tai singui Comuns.
Al pues ancje stâi che inmò a mancjin cierts Comuns: chi il cont des schedis al è tacât dopo che al jere finît chel pal Senât.

Chi invezit la pagjine ansa

Pe precision a Majan a son chescj numars (uficiôs) pe Afluence:
Iscrits tes listis dai eletôrs: 4.988
Sezions: 8/8
Oms che a àn votât: 2.070
Feminis che a àn votât: 2.111
Totâl dai votants: 4.181
Percentuâl: 83,82%

Chi il totâl dai votants al è di plui par vie che si tache a votâ pe elezion de Cjamare dai Deputâts bielzà dai 18 agns

Elezions Politichis - Senât: risultâts in Regjon

Ve chi il link par viodi i Risultâts pal Senât.
I inzornaments a son fats man man che a rivin i conts des sezions tai singui Comuns.
Al pues ancje stâi che inmò a mancjin cierts Comuns.

Chi invezit la pagjine ansa

Pe precision a Majan a son chescj numars (uficiôs) pe Afluence:
Iscrits tes listis dai eletôrs: 4.639
Sezions: 8/8
Oms che a àn votât: 1.918
Feminis che a àn votât: 1.972
Totâl dai votants: 3.890
Percentuâl: 83,88%

Tignît presint che l'eletorât pal Senât al è di mancul: a votavin dome chei che a àn plui di 25 agns.

Il timp parsore il Friûl


Ve chi la rubriche sul timp: meteo regjonâl.
Il link al restarà ancje te liste dai leams chi a çampe: Il timp parsore il Friûl.

09 aprile 2006

Speciâl elezions: aes 22.00 sieradis lis urnis


Come za segnalât, ve chi il link che al puarte ai dâts su la Afluence aes elezions a Maian.
Si à di spietâ un moment pal inzornament: l’ultin fax al à di jessi partît di pôc e duncje i dâts a vignaran cjamâts in curt.

Darte: Romeo Patatti al à vinçût il 10° Memorial Volpi

Vuê Romeo Patatti, grant damist ma che cualchidun ancje a Maian al cognòs par vie che ogni tant si viest di cjargnel e al conte barzaletis ator pal Friûl, al à vinçût pe prime volte il Memorial Volpi li dal Edelweiss di Darte.
E je stade ancje la prime edizion dal Memorial Bruno Marini, mancjât l'an passât: te foto le sô siore Anna Plos di Maian (la sûr di Paride).
Mandi Bruno, tu nus mancjis e grazie pai salûts: to fradi Otello nus à puartât il to "Mandi"!

Gnovis in curve: risultâts de domenie


Domenie no masse biele pal Maian: 1-3 in cjase cuintri il Trep. Il gol de bandiere pai nestris lu à fat Caricchia.
Il President Renzo un tic avilît al à comentât: "Vuê propit no nus è lade par nuie ben..."

Invezit tal anticip di sabide, ben l'Udin a Livorno: 2 a 0. E la B e je plui lontane. Alè Udin!

Bielecis furlanis ator pal mont

Rafaela Zanella (foto grande), 19 agns origjinarie di Prate di Pordenon, rapresentante dal stât di Rio Grande do Sul, e je stade sielte usgnot passade come "Miss Brasile 2006" e duncje di dirit e passe cumò tes selezions par "Miss Universo".
O ricuardi ancje Barbara Clara (foto piçule), 24 agns origjinarie di Sant Tomâs, rapresentante dal Venezuele, che tal 2000 e je stade elete "Miss Italia nel Mondo".

Speciâl elezions in Regjon

Zornade di elezions e duncje ducj a votâ. Come che o vin dite: no si fevele di politiche fintremai aes 15.00 di lunis cuant che e tacaran a contâ lis schedis. Par tignî di voli i scrutinis ve chi il sît de Regjon-sezion elezions.
Propit par vie che il moment al è delicât, o ai rindût visibii inte pagjine principâl dome i posts ultins di domenie indevant. Dut al tornarà come prime dopo di lunis aes 15.00.

Lait a votâ.

08 aprile 2006

Auguris: Prin mês di ativitât dal blog


O jerin ai 8 di Març (te foto) cuant che al è partît chest blog: par festegjâ chest prin mês, o ai cjatade cheste robute di lâ a lei...

Thermonuke: Assessôr virtuâl!

Jo (te foto...) lu fasarès gno Assessôr virtuâl, cundut ce che nus à fat ridi e pensâ! O propon une rubriche setemanâl par Thermonuke

Par radio

Intant che o jeri sul pc o ai piade la radio e… e je partide cheste cjançon: mi pâr che e vadi ben, no? Cence fâsi tantis domandis, jo le dedichi a une mê amie (no stêt a domandâmi ce che si clame… no le cognossês e no us al dîs) e ai siei voi…

07 aprile 2006

Cui disevial che il furlan al è un limit?...

Cheste le ai cjatade su internet, le torni a scrivi par talian come che le ai cjatade:
"mercoledì 15 marzoNEWS - PANTAN A ...NEW YORK??! - Della serie "non si sa mai cosa puo' accadere...": Il gruppo dei PANTAN suonando rock cantato in friulano è entrato a far parte della classifica dei brani più richiesti dell'emittente radiofonica newyorkese ELECTRIC EYE RADIO; in questo momento con il loro nuovo disco "No Vain" sono al tredicesimo posto fra nomi eccelsi quali Aerosmith, Foo fighters, Strokes,Glodfrapp, U2,ecc.. evidentemente gli Italiani non sono l'unico popolo che ascolta musica straniera senza capirne il significato...;

giovedì 16 marzoNEWS - PANTAN A RADIO DUE - Sabato 18 Marzo alle 15:00 su RAI DUE, per "NU ROADS" ,la rubrica di "CD LIVE" che va in onda tutti i sabato pomeriggio a cura di Omar Pedrini, ci sarà presentazione del nuovo live-video dei "PANTAN" "Catodizat", brano che fa parte del nuovo cd "NO VAIN"

Notizie gjavade fûr di ROCKNOTES

Mi pâr che i confins a son tal cjâf de int (dome di chê che e à voie di restâ sierade) e nol interesse ce lenghe che si fevele cuant che si fasin robis bielis! Compliments ai Pantan e us consei di scoltâ il lôr CD: su Radio Onde Furlane al passe avonde dispès.

Ce sorte di soreli!


Dopo vê passade la joibe in muel sot de ploie (no ai mai viodude tante int al marcjât cun dute chê aghe come îr), vuê al è vignût fûr il soreli e par passâ il timp, rivât di vore, o ai dit: “Cumò o voi tal ort…” (mi vês mandât di tanti bandis…).
Ma mi soi visât che mi mancjave alc e alore o soi lâ in Trivià: jentrât li di Maxpola o ai zirât un tic pai scafâi, ma… Cuant che o soi passât dongje dal repart “palis di svangje” mi son vignûts i sgrisui pe schene e mi è passade la voie di lâ tal ort… Mi sa che o voi a comprâ la salate li di Olimpia…