28 febbraio 2010

Ondefurlane a Telefriuli

Doman lunis prin di Març a Telefriuli, te trasmission Operazione Effe conduzude di Alberto Terasso, e sarà une pontade dute dedicade ai 30 agns di Radio Onde Furlane: Pauli Cantarut, Mauro Missana, Carli Pup e Leo Virgili. In tribune redatôrs e colaboradôrs de Radio Libare dai Furlans: tra chescj il vulcanic Daniel Samba, il ben cognossût "Furlan piturât di neri".
Ma ancje Piero Cargnelutti, Isabel Grattoni, Enrico Turloni, Francesca Lionetti, Ferdinando Passone, Gigi Patruno e tantis altris vôs di Radio Onde Furlane.
Apontament aes 9 di sere di doman lunis prin di Març su Telefriuli.

27 febbraio 2010

Zornade furlane dai dirits 2010 - Programazion speciâl di Onde Furlane

Vuê e je la zornade furlane dai dirits, aniversari dal riviel contadin dal 1511.
Ve chi il comunicât di Radio Onde Furlane, che chest an e à fat i 30 agns e che vuê e propon une programazion speciâl.


27 di Fevrâr: la Zornade Furlane dai Dirits a Onde Furlane
Une programazion speciâl par fevelâ di dirits e dai 30 agns de Radio
Ai 27 di Fevrâr dal 1511 si invià il riviel plui grant de storie furlane. Dâts dongje in bandis di vuerilie, i contadins a derin l’assalt e a brusarin i cjistiei e i palaçs de nobiltât ator par dute la Patrie dal Friûl. La insurezion e fo scjafoiade intal sanc, ma e judà a infuartî la cussience des comunitâts rurâls furlanis che, contrari di ce che cualchidun al va dilunc a contâ, no jerin pipinots mugnestris tes mans dai sorestants di in chê volte, ma sogjets impegnâts intune lungje lote par difindi i lôr dirits. Par chest si à sielzût la date dai 27 di Fevrâr par celebrâ la Zornade Furlane dai Dirits.
Zaromai di un pôcs di agns, Radio Onde Furlane, cu la poie dal Comitât 482, e celebre cheste Zornade cuntune programazion speciâl che e à chê di stiçâ la riflession sui dirits dai furlans e su lis bataiis inviadis par difindiju. Cun di plui, ta chest 2010, pe ocasion dai 30 agns de emitente si varan ancje altris elements di novitât.
La jentrade de Zornade e sarà curade dal diretôr de Radio, Mauro Missana, e dal puartevôs dal Comitât 482, Carli Pup. Il president de cooperative editore di Onde Furlane, Paolo Cantarutti, al darà des anticipazions su lis iniziativis pai 30 agns de Radio.
Vie pe buinore si fasarà il pont sul stât dai dirits linguistics e nazionâi dai furlans e di chês altris comunitâts minorizadis dal Friûl in gracie des intervistis cun Donato Toffoli (Comitât Tecnic Sientific de ARLeF), Luigia Negro (presidente provinciâl de SKGZ) e Lucia Protto (presidente dal circul culturâl Schneider di Sauris).
La part de programazion dedicade ai aprofondiments storics e sarà organizade in trê moments diferents: une analisi de situazion socioeconomiche dal Friûl jenfri stât patriarcjin e dominazion veneziane (tant che fonde par capî i acjadiments dal 1511) cu la professore Donata Degrassi de Universitât di Triest; la riproposizion di cualchi riflession di Tito Maniacco, che nol è tant che nus à lassâts, sul riviel dal 1511, sul rivielisim e su la formazion di une cierte ideologjie furlane; e une leture storiche su la insurezion de Joibe Grasse e su lis sôs causis.
Vie pal dopodimisdì, invezit, a laran in onde i aprofondiments su dirits specifics. Ta cheste edizion de Zornade Furlane dai Dirits, chescj spazis a permetaran un confront tra il dì di vuê e il nestri passât resint. Cun di fat, in ocasion dai 30 agns di Radio Onde Furlane, si proponaran dai fruçons di trasmissions su chescj argoments ladis in onde su la emitente furlane tra i agns ’80 e i ’90. Chescj “piçui barcons sul passât” a permetaran di viodi trop e cemût che il Friûl al è cambiât inta chescj agns. A coordenâ chescj spazis a saran Mauro Missana, Piero Cargnelutti e Isabelle Grattoni cul jutori di diviers ospits: Marco Spizzamiglio (rapresentant storic dal antimilitarisim furlan) al fevelarà di servitûts militârs, Ferdinando Ceschia (segretari provinciâl de UIL) di lavôr, Giorgio Cavallo (president regjonâl di Legambiente) di ambient e di teritori, e Maria Carminati (CTS de ARLeF) di scuele.
Ai 27 di Fevrâr ancje la programazion musicâl di Onde Furlane e sarà speciâl cul miôr de musiche furlane e di altris nazionalitâts minorizadis, e cun trasmissions di pueste curadis di Matteo Bellotto e de cubie storiche Francis e Adrianus (Checo Tam e Adriano Moschioni).
Buine scolte e buine Zornade Furlane dai Dirits a ducj.
Il diretôr di Radio Onde Furlane
Mauro Missana

26 febbraio 2010

Zornade furlane dai dirits 2010 - Il comitât 482

Doman al è l'aniversari dal riviel contadin dal 1511.
Cualchidun al varà sintût alc in mert a la "Crudel Zobia Grassa", ma parcè "crudel"? Cheste e je la version viodude cul voli di chei che lis àn cjapadis, ven a stâi i nobii sorestants. A mi mi plâs di plui la version furlane "il riviel de Joibe Grasse" cuant che par une volte i Furlans a àn di "Vonde!" a cui che in chê volte che al tibiave il popul.
Chi us met il comunicât dal Comitât 482.

27 di Fevrâr: Zornade Furlane dai Dirits
Al è zaromai di un pôcs di agns che, ai 27 di Fevrâr, il Comitât 482 al celebre la Zornade Furlane dai Dirits. Chê date, di fat, e ricuarde la Joibe Grasse dal 1511 cuant che si impià il riviel popolâr plui grant inte storie dal Friûl: un episodi storic che, fûr di ciertis leturis stereotipadis che cualchidun al va dilunc a proponi, al mostre a clâr che lis comunitâts furlanis a jerin prontis a doprâ ogni mieç par difindi i lôr dirits.
Vuê, compagn di chê volte, si cjate simpri cui che al è pront a dineâ o a usurpâ chei dirits. Vuê, compagn di chê volte, al covente che i furlans a rivendichin i lôr dirits e a lotin par difindiju. Dut câs, tantis robis a son cambiadis, a tacâ dai sistemis par puartâ indenant la lote: îr cun ronceis, pichis e arcabûs; vuê cun mobilitazions democratichis, bataiis civîls e resistence no violente.
Il Comitât 482 al è nassût cun chê di difindi i dirits linguistics e nazionâi des diviersis comunitâts minorizadis dal Friûl e, duncje, al è propit su chest teren che o vin miôr movisi. Dut câs, chest nol vûl dî che dutis chês altris cuestions no nus tocjin. Par esempli, ancje in Friûl, i efiets de crisi economiche internazionâl a son denant dai voi di ducj. No podìn, duncje, no jessi dongje di chei che ta chescj mês a àn pierdût il lôr puest di vore e a chei che a son daûr a batisi par difindilu. Ce che nus cjate malfidents, invezit, al è cemût che la politiche regjonâl, une volte finide la crisi, al pâr che e ponti plui a tornâ a proponi un model di svilup compagn di chel di cumò, impen di imbastînt un alternatîf in stât di resisti miôr ai efiets des crisis finanziariis e economichis, e ancje ae concorince internazionâl. Cun di plui, o stimìn vergognôs il compuartament di cui che al profite des dificoltâts puartadis de crisi par meti sot atac o limitâ i dirits, sei intal mont dal lavôr che inaltrò. Al sarès miôr che lis autoritâts no cjapassin masse sot gjambe chês bandieris furlanis che plui di une volte i lavoradôrs a àn jevât intant des lôr mobilitazions…
Cuant che o fevelìn di model di svilup alternatîf, no pensìn dome al mont dal lavôr, ma ae societât interie. Cun di fat, al covente un sisteme di autoguvier reâl des comunitâts locâls che al sepi gjestî cun cussience lis risorsis umanis e naturâls che un teritori variât e complès tant che il Friûl al ufrìs e no fiscâlis pal interès di altris. Ce bisugne vino di eletrodots che a savoltin il teritori e che la lôr energjie i covente a altris? Ce nus servissie une linie feroviarie a alte velocitât che e sbreghe fûr la Basse e che no à nancje une fermade in Friûl? A son juste dôs des milante domandis che o varessin gust di fâi a chei che a imponin lis lôr sieltis a di une tiere e a di un popul che al pâr che nol vedi nancje il dirit di vierzi bocje. Tant di cjapiel, alore, denant des mobilitazions di chei furlans che a rivendichin il dirit di decidi dal lôr destin e dal avignî de tiere là che a vivin.
E ce dî po dai dirits linguistics dai furlans? La leç statâl 482/99 e à juste finît dîs agns e, se no si varan novitâts, in curt si cjatarìn al so funerâl. Cun di fat, al va dilunc il tai progressîf des risorsis che a coventin par metile in vore. Par dodis lenghis e par passe trê milions di citadins, intal 2010, no varìn nancje doi milions di euros. Forsit, inte Union Europeane, dome la Grecie e rive a fâ piês di cussì… E intant che i nestris politics a restin cidins, si sassine la 482, ven a dî la leç che e varès di meti in vore l’articul 6 de Costituzion de Republiche taliane! E in Regjon ce sucedial? La gnove leç sul furlan, la 29/07, e reste ferme e lis risorsis si sbassin. Partîts e politics si mandin di Erode a Pilât, e nissun di lôr al fâs pardabon alc par cambiâ cheste situazion. Al è pardabon dongje, aromai, il pericul di pierdi chel che si à rivât a otignî cun agns e agns di bataiis democratichis.
In Regjon e je stade fate buine ancje une leç sui dialets di çocje venite. Nus àn dite che e covente par difindi la diviersitât linguistiche de nestre tiere, ma ce difese puedie rivâ di cui che al cîr dal continui di sdrumâ jù lis politichis linguistichis che la leç za e previodarès? Aromai lu àn capît benon ducj chei che – come il Comitât 482 – al è di agns che si batin pai dirits linguistics dai furlans, dai slovens e dai todescs dal Friûl. O sperìn che un tant no ur tocji ancje a chei che – furlans o no – a doprin fevelis di stamp venit. E cemût dismenteâ rom e sinti che, in Friûl compagn che in Italie, no dome no si ju ten di minorance linguistiche, ma dispès si ju discrimine a palês?
Nol è chest l’avignî che o volìn pal Friûl e al è par chest che no restarìn a cjalâ dut chest in cidin. Pal rispiet che o puartìn pes bataiis e pai sacrificis dai nestris paris si refudìn di sbassâ il cjâf e o lin dilunc a rivendicâ i nestris dirits linguistics e nazionâi. Cussì, compagn dai nestris vons, o alcìn la bandiere dai dirits e dal autoguvier, par fâ sù un Friûl che al sedi Patrie di dirits par dutis e par ducj.
Udin, Fevrâr dal 2010
Il puartevôs dal Comitât 482
Carli Pup

23 febbraio 2010

Presentazion de Patrie a Ruvigne

Un grup di amîs de lenghe furlane di Ruvigne al presente il gnûf numar de riviste mensîl par furlan "La Patrie dal Friûl", che e sarà distribuide a gratis al public. Ta chest prin numar dal 2010, in cuviertine Giannola Nonino, intervistade di Dree Venier. Ma ancje tante atualitât e aprofondiments simpri cuntun voli furlanist, "par un Friûl plui furlan".
L'apontament al è par joibe ai 25 di Fevrâr a lis 20.00 li dal Museu di Ruvigne in Vile
A intervignaran:
Gianni Pascoli, presentadôr de serade a non dal grup dai amîs de lenghe furlane
Dree Valcic, diretôr da "La Patrie dal Friûl"
Pre Tonin Cjapielâr, Dino Temil, Dree Venier e Christian Romanini, de redazion da "La Patrie dal Friûl"
Angelo Floramo, moderadôr de serade.
Par lei cualchi articul za publicât sul sît de Patrie, fracait chi.

19 febbraio 2010

17 febbraio 2010

Si torne a cjaminâ

Dopo de biele esperience di Jugn dal an passât, ve ca une altre ocasion par tornâ a cjaminâ.
Fracait la foto par lei miôr il program de presentazion di doman di sere.

12 febbraio 2010

Tal segn di Gjone, a Aquilee

Us segnali chest apontament di usgnot te rassegne In File 2010 ai Colonos di Vilecjace di Listize.
Tal segn di Gjone a Aquilee al fevelarà de ricjece pluralistiche de antighe glesie di Aquilee.
La serade e sarà introdusude di Angelo Vianello, president de associazion culturâl Gilberto Pressacco e intervents a saran di Remo Cacitti e Angelo Floramo.
Si tache aes 20.30 e par viodi dut il program, fracait chi.

11 febbraio 2010

Bon complean pre Antoni

Vuê al varès fat i agns. Pre Antoni Beline al jere nassût ai 11 di Fevrâr dal 1941.
Ta cheste zornade diviersis robis, che tancj a clamaressin coicidencis (ma cheste peraule no mi plâs masse...), mi puartin a rifleti e a ricuardâlu.
Ce aial lassât pre Antoni? Tant, par un Friûl che probabilmentri vuê al à tante dibisugne di int come lui, ma che compagns no si 'nt cjate cussì facil... (ma, no dut al è pierdût!)
Un Friûl che al va indevant plui par inerzie che par braure di jessi une tiere siore di un patrimoni inestimabil e che pluitost che alçâ il cjâf e pratindi il so, al è dispost a cori daûr cul cjapiel in man, simiotant chei altris... (ma, no dut al è pierdût!)
Un Friûl che al à dibisugne di un scufiot par sveâsi, parcè che durmint masse e cu la panze plene, tu coris il pericul di lassâti scjafoiâ di un rivoc. (ma, no dut al è pierdût!)
Auguris pre Antoni, e ancje se la situazion e podarès jessi miôr, o pensi, parcè che no dut al è pierdût, che tu nus disaressis "O salvarìn lis nestris animis cul tignî dûr" (Lc 21, 19) savint però ancje che si à "vê il coragjo di sunâlis, o disarès cun preference cuant che al coste di plui", come che al varès dit pre Checo Placerean.

10 febbraio 2010

Memorie infoibade

[...] Ce che mi fâs dubitâ de utilitât di chestis comemorazions al è che i vêrs protagoniscj no son lis vitimis muartis e chês restadis in vite, ma lis formazions partitichis o ideologjichis, che a doprin la storie come une tiracje e, se no ur torne cont, a fasin di dut par rimovi lis pagjinis no propit esaltantis de lôr militance [...]

pre Antoni Beline, Cirint lis Olmis di Diu, ai 17 di Fevrâr dal 2007 (par lei dut, fracait chi)

Cun di plui us segnali ancje chest document dal scrit di une comission taliane-slovene che al fevele di chest argoment. Pecjât che, ancje se in Slovenie al è stât publicât dal Guvier, chi inmò no. Fracait chest link.

Achì dut il pdf dal document.

09 febbraio 2010

08 febbraio 2010

Lenghis minoritariis e Europe

Doman a Palaç Belgrât, sede de provincie di Udin, e sarà une cunvigne su Lenghis minoritariis e Europe. Si confrontaran diviersis esperiencis e si cjalarà ancje al mont des gnovis tecnologjiis.
Par lei dut il program, fracait chi.

05 febbraio 2010

Auguris ancje a Rof

Eh sì, ancje cuntun tic di ritart, tancj auguris ancje a la Radio libare dai Furlans: 30 agns indaûr, ai 2 di Fevrâr dal 1980 e tacave a trasmeti Radio Onde Furlane.
E il Friûl no dome i varès di fâ i auguris, ma ancje ringraziâle par dut ce che e à fat e e continue a fâ.

04 febbraio 2010

La "Spade" dal misteri

Nol è il titul dal ultin libri fantastic, ni l'ultin cine su cavalîrs e dragons.
Al è dome un piçul misteri citadin che al zire par Udin...
Come che us vevi segnalât ancje jo, Frank Spada al è jessût cul so ultin libri.
Ma cheste no je la uniche novitât... di fat ator par Udin a son che si domandin: "cui isal?... cui no isal chel fantat che si viôt te foto in blanc&neri?".
Al somee che al sedi propit lui, cuant che al jere fantat... cualchi Carnavâl al è passât, plui di un e di doi...
Se mi domandassin a mi, o disarès che al è un blogarin simpatic che ogni tant al passe di ca e mi segnale i siei lavôrs: o ai lete cualchi conte, ma il so libri no inmò (e par chest i domandi scuse, ndr).
E o zontarès ancje che cumò o soi preocupât parcè che no sai se al tornarà a cjatâmi tant dispès, stant che ancje lui... al à screât il so blog (lait a viodi il link)!
Benvignût te blogosfere, Frank!

03 febbraio 2010

Sipari furlan

Tal teatri Giovanni da Udine e jentre la lenghe furlane: Sipari Furlan al propon Lenghe furlane: microstorie di un repertori, lezions spetacul par cure di e conduzudis di Angela Felice e Paolo Patui (te foto).
Cjacaris, citazions, leturis, visions, scoltis e une taule taronde dedicâts a la storie dal repertori in lenghe furlane (cun cualchi ecezion). Ducj i apontaments a son a jentrade libare ritirant il segnepuest.

Ps: Biele iniziative dal Teatron, ma cuant che o ai let la parentesi "repertori in lenghe furlane (cun cualchi ecezion)" mi soi domandât se ancje tal repertori in lenghe taliane e je previodude "cualchi ecezion" par furlan... nol sarès mâl, no?