Lenghis su la glace sul gnûf “Alc&Cè”

Lis bolps di Bolzan a fevelin todesc, come i lôfs de Val Pusterie; lis civuitis di Alleghe, lis acuilis di Fasse e lis sghiratis di Cortine, ladin; lis acuilis di Pontebe, invezit, furlan. I bulldog dal Piemont a vuachin par ocitan, i leons di Asiago in cimbri. “Alc&Cè”, il gjornalut par fruts dut in lenghe furlane, suplement mensîl dal setemanâl “la Vita Cattolica”, nol da di mat. Chescj animâi a son dutis mascottes di scuadris di hockey su glace. Tal campionât talian di serie A a zuin, di fat, scuadris che a rivin di isulutis linguistichis dal Stivâl. A pandin, duncje, un messaç plurilengâl. Al cjacare di chest miscliçot di lenghis il speciâl dal gnûf numar de riviste che e je realizade cul finanziament de Agjenzie regjonâl pe lenghe furlane e che e torne in edicule sabide ai 31 di Otubar, daspò de pause estive. Cun tantis gnovis. A scomençâ de rubriche Palaç cence segrets, che e fevele di ce che al sucêt tai palaçs de politiche a traviers de vôs dai aministradôrs. Si tache dal Senât cuntune interviste a Mario Pittoni. Ambient in prin plan cun Barbe arbul al conte, che al spiegarà la fotosintesi clorofiliane. E par cognossi la storie dal Friûl in pirulis, si puedin lei I siums di Mario, la gnove storie a fumêts di “Alc&Cè”, che e nas de matite di Luca Malisan, prometent disegnadôr di fumuts storics, e colorist, massime pes cjasis editoris francesis.

Po a tornin i Gnognosaurs e Pantiagneur cu lis lôr aventuris a fumets; i zûcs, par divertîsi imparant la lenghe; l’util vocabolari par imagjinis. Di no pierdi lis “Perlis di nature”, cuntune divertente ricognizion sui mûts di dî che a àn par protagoniscj i animâi.
Par sugjeriments e curiositâts sul gjornalut, si pues scrivi une e-mail a Erika Adami, responsabile e coordenadore editoriâl de riviste, ae direzion: adami@lavitacattolica.it

“Alc&Cè” al ven doprât ancje in tantis scuelis de regjon dulà che si insegne la lenghe furlane. I docents che a vuelin ricevilu pai lôr arlêfs, sore nuie, a puedin domandâlu telefonant al numar 0432/242611, mandant un fax al 0432/242600, o une e-mail ae direzion: amministrazione@lavitacattolica.it

I ultins numars dal gjornalut (che al è ancje su Facebook) si puedin scjariâ, in formât pdf, dal sît de “la Vita Cattolica”: www.lavitacattolica.it