Zornadis catalanis chestis. Dopo vê cognossût Aureli Argemì, vuê o ai vût il grant plasê di cognossi Josep-Enric Teixidó (te foto cun me), un ricercjadôr de Universitât di Lleida che o vevi cognossût grazie a Dree par Internet. O vin fat une biele tabaiade su la cuistion linguistiche e lis difarencis che a son tra Friûl e Catalogne. Mi à dât un sac di conseis, ma plui di dut mi à fat pensâ une robe che mi à dit. Cuant che i ai domandât cuale che e je la prime impression che al à vût, rivant a Udin (e je la prime volte che al ven chi), mi à dit che daûr di ce che al viodeve in Internet midiant dai blogs furlans e i contats cui furlaniscj de Rêt, al pensave pensave che ancje in citât al varès cjatât tant "Friûl". Invezit rivant a Udin al è restât deludût parcè che al someave di no jessi in Friûl. Pr furtune fûr de citât al à vût plui riscuintri. Chest al à di fâ pensâ trop lavôr che al è di fâ, massime a Udin.Une altre considerazion le ai fate intant che o fevelavi. Tancj mi disin "Ma vonde furlan che no ti covente a nuie... no tu podis restâ sierât...", po ben a cheste int o rispuint cuntun pâr di riflessions.
Se no mi fos interessât di furlan, forsit cumò no lu fevelarès plui, ma no varès rivât a intindimi cun Josep: dut il timp lui al fevelave català e jo o fevelavi par furlan, dôs lenghis une vore dongjis. No nus è coventât l'inglês, che magari lu doprarai in altre ocasion. Une seconde riflession le fâs simpri sul fat che i furlaniscj a son acusât di sierâsi... po ben: jo o ai cognossude plui int midiant i contats che o ai imbastît midiant il gno interès pe cuistion linguistiche che no prime. O ai cognossût plui la Europe fevelant di chestis robis, ancje midiant dal blog, che no studiant l'inglês a scuele. Che forsit o vedi reson jo e ducj chei che le pensin cussì? Jo mi convinç simpri di plui.
Ma soredut il furlan mi covente a mi par mostrâmi cemût che o soi, par rapuartâmi cul mont cu la mê vere identitât.
Post
14 commenti:
Ancje jo o ai viodût Udin in te stesse maniere...ancje impuaride culturalmentri. Tantis buteghis gnovis e vuedis e simpri mancul "comunitât"...
In ogni mut al fat co tabai ancje par Furlan mi a puartât a cognossi e a tabaiâ cun int une vore interessante sie par Inglês che par Talian che par Furlan.
Al Furlan al e' ale radis dal me jessi, di cui co soi e de comunitât de int le co soi cressût di frut.
Sul discors dai Furlaniscj siarâs, o pensi che si rifasedi ai solits stereotips sui Furlans, e i Furlaniscj co cognòs di persone e son tra le int plui cosmopolite co cognòs.
Mandi, Norman
Jo mi maravei che tu Cristian tu ti maraveedis de delusion che Josep-Enric al à patit tal cognossi Udin.
Il Friul al è muart cun pre Toni, ator e son restras dome int che je dome a sta in chiste regjon e che e cor ator a inboconasi il cjaf e le panse cun lis Frecce tricolori, j alpins, l'Udines, l'Aira di festa, le Chiabotto, il Grande fratello, l'Outlet, il Fiera e vie indevant ducj i model dal massepassutisin dal dì di vuè. No stin nancje a fevela di chei che varessin di jessi i modei e lis guidis di un stat: il to ami Silvio/muserote, o al to “dator di lavor” Renzo che no i free un boro dal furlan e ogni dì al pre voltat viars Hammamet sperant che le Consulte e fruci le leç regjonal sul furlan.
Su Cristian, jo o capis che le rodelis de to cjadre e girin di dio ma amancul no sta fati passa par chel che si maravee di ce ch'al à ator di se, su su un fregul di serietat amancul!
E ma cumo al a le golarine, anzit plui di une!
Checo: un mito!
checo mandi e benvignût.
No sai dulà che tu âs let la mê maravee... jo mi soi dome limitât a dî che mi à fat pensâ, ma forsit "pensâ" al è alc di strani par te...
O soi ben cussient che la situazion no je facil, ma se tu disis che il Friûl al è muart cun pre Toni, tu i fasis un tuart propit a pre Toni par prin e a ducj chei che cun lui a àn lavorât e che a continuin a lavorâ tignint cont dai siei insegnaments.
No rispuint a non dal President, ma o rimandi a lis sôs declarazions di cualchi dì indaûr.
Ti ringrazii pal invît a la serietât e ti saludi cun dut il rispiet che tu mertis.
Bè, la globalizazion siguramentri tindt a taiâ vie lis identitâts locai e a Udin si fas sintî di plui il so efiet. Ma chest è un fat che cjiape dentri il mont intîr e dâ une rispueste poitiche che sedi in grât di meti dongje disvilup economic e tutele nol è tant sempliç.
Christian no volevi ufinditi cul reclama un tant di serietat ma solecitati a vierzi i voi su ce che ti sta ator. Il Friul al sta finint di vivi, ca di cualchi an al fasarà la fin ch'al sta fasint a Pordenon (par fasi une idee viot la pagjne furlane de Vite Catoliche dal 5 di Lui). Jo o crot che no si po fa nancje un tocut di che strade ch'al à tal cjaf il "to" president parcè che il so troi ti puarte tal poç de alienazion de nestre culture e de nestre identitat. La posizion dal "to" president e dai furlans in zonte regjonal e je che, di une bande, di contenta, riveri e pleasi a Camber & TS e di che altre ve pore di ducj no furlans che o vivin in friul e di chei furlans che no àn, par tancj mutifs, nissune cussience de lor identitat.
mandi, checo
I dâts a fevelin clâr: il FVG e è une des regjions plui vecjiis in Europe. Con di plui al è il fat de fuarte imigrazion. E ae fin al è che robe che clamin globalizazion (par esempli i Outlet, Zara, Ikea...).
E steiso ancjiemò a fevelâ di politiche regjionâl (Udin cuintri Triest)? Par fâ ce?
Mandi Checo
che tancj furlans no vedin cussience de lôr identitât e je vere (ma come che al diseve pre Antoni, no je colpe lôr: a chest proposit ti segnali une letare che o publicarìn il prossim mês su la Patrie dal Friûl).
Su chest pont o sin dacuardi e mi plâs imbastî i discors su lis visions comunis pluitost che tornâ a marcâ i elements di division. E duncje o cirarai di spiegâmi miôr ancje cun te in maniere di viodi se si rive a resonâ insiemit.
Che il Friûl al sedi daûr a murî e cun lui ancje la lenghe furlane e je une robe che a disevin tancj agns indaûr e come che si pues viodi o sin inmò chi. Di sigûr a son bruts segnâi che a vegnin indevant ma la gjenerazion che e je deventade classe di guvier cumò (chei che a àn dai 40 a 50 agns in sù) a son chê gjenerazion che tai agns Otante si son sintûts a dî a scuele: "Ce fevelistu par furlan che tu someis un contadin".
Però e je ancje vere che tancj plui zovins a son tornâts a discuvierzi lis lidrîs.
Ti fâs inmò une considerazion su la cuistion "Il furlan al è daûr a murî" mi cjati une vore dacuardi cun Aureli Argemì che, cuant che i ai domandât: "Cuant muerie une lenghe", mi à rispuindût cussì: “La lenghe e je leade al popul e ai siei gambiamentes: se un popul al mûr, cun lui e pues murî e chest al pues ancje jessi acetât come fat naturâl. Ce che nol è amissibil al è che un individui nol feveli plui la sô lenghe parcè che i ven improibît cun propotence di un altri che al fevele une lenghe difarente: chest noaltris lu clamìn gjenocidi linguistic”.
Lei ancje il rest de interviste...
Par Checo,
mi fâs plasê che tu sês un tic tornât "di ca" e limitât un tic il tono de critiche.
Se une prove de muart dal Friûl a son i centris comerciâi, il Grande Fratello e vie indenant, alore a sta murint ancje la Catalogne, stant che i stes fenomenos a son ancje li di lôr!
Se une prove de muart dal Friûl a son i centris comerciâi, chei che a an dât il permès par fânt une sdrume e je la Zonte precedent, cundiplui di une alienant liberalizazion dai oraris dal cumierç.
Tant par dî che ognun e à lis sôs rognis e lis sôs responsabilitâts.
Se une prove che il Friûl al è muart parcè che al è muart pre Toni, si sintive chê ancje cuant che al jere muart pre Checo.
E invesit o sin simpri achi.
Felix Marchi, il fondadôr de Patrie, intune interviste dade a pre Toni intal 1982 al dîs "Daûr di nô o sês vualtris, e daûr di vualtris ant sarà di altris, parcè che la libertât e fâs part de vite e fint che ant sarà vite ant sarà simpri cualchidun che si bat pe libertât dal Friûl". E al fevelave un omp che al à dât tant al Friûl e che al è muart praticamentri dibessol a Mediis intal 1986.
Nome un piçul riliêf: intal 1982 al jere scuasit inammissibil un discors public par furlan, cumò no.
Si podarès fâ dai resonaments cuntun tic plui di sintiment invesit di butâ robis vaiotis e un tic a slàs un cuintri l'altri jenfri furlaniscj, impleant il timp miôr a convinci chei che no lu son.
Nol si pues fâ nancje un tocut di strade cul gnûf president? Bè, o sin usâts cun ducj i presidents di cheste Regjon, di ogni colôr.
Vino propuestis alternativis "al poç de alienazion de nestre culture e de nestre identitat"?
Se sì, tirinlis fûr, se no murìn cence tancj vaiotaments e cence dâsi tant fastidi l'un cun l'altri, almancul tra di nô che si fevele di chestis cuestions par furlan...
Par Christian e par Dree
O varès plui di une robe di dî ma o cîr di fâle curte.
O vevi za sintût chês peraulis di pre Toni dulà che mi ricjati, ma pre Toni, come tancj, no àn simpri il sens dai numars e de realtât di trops pôcs fruts che a son restâts a fevelâ la lenghe. Pre Toni come altris (e di ce che mi risulte ancje di vualtris doi) no son passâts te fadie dal tirâ sù dai fîs cu la
cognossince de lenghe tal dì di vuê. Chel che o vin ereditât si sta scjafoiant
sot di un lent e inesorabil blob. Il "gjenocidi linguistic" al è stât perpetuât
tes scuelis fin a cuindis/vinçi agns indaûr de bande dal sisteme scuelastic
ancje e soredut par vie che i mestris a vignivin produsûts di une
“industrie” nazionaliste, par no dî fassiste/comuniste. Cumò che di cualchi an in ca o scomençavin a vê i prins operadôrs te scuele cuntune cussience plui
sensibile ae culture di chenti e cualchi imprest legjislatîf ch’al permetarès un lavôr impuartant, si cjatìn a tornâ a vê lis alis tarpadis prime di fâ la prime sbatude.
No mi ricjati dal dut cun Argemì no dome pai delits te scuele taliane ma ancje e
soredut pal fat che il ”gjenocidi linguistic”” plui grâf e pesant al è chel fat de
politiche che si plee al egoisim dai zûcs di part e che no difint lis culturis "debulis" dai interès di dut ce ch’al zire ator dai imprescj dai mass mediatics, bêcs prime di dut e po telegjornâi, spetacui, publicitâts e vie indevant. In pocjis peraulis dut ce chel nol è sucedût tal Sudtirol, tal ben e tal mâl. Ogni popul che nol sta in pîts suntune lenghe nol è un popul, e je une entitât economiche tal câs plui furtunât regolade di buinis normis di civîl
convivence. Une peraule su la Catalogne: sì, ancje là centris comerciai, GF e
companie, ma a diference di ca la int che no i free nie dal ben di une culture
e de identitât e ven tignude dentri dal sac de lenghe!!! e s’o permetês e je
une biele diference, là la lenghe e vîf e tu t’inacuarzis za di cuant che tu
smontis dal avion, ogni tabele e scomence par catalan, ca chel puar Josep-Enric
al varà cjatade sì e no cualchidune par Udin.
O concuardi cun lis valutazions su certis malefatis de zonte Illy (Bertos in particolar) e propite che sul cumiarç ma no dome, vino di fevela de leç 5/2007 pe urbanistiche? e le scjarse atenzion pal ambient?
Par siara: di propuestis di parta indevant and'è tantis che si vuelin, ce che mancje e je une fuarce politiche/movimentiste sul cjamp cun personis che vedin al sens dal timp, che vedin energjis, che no vignidin fur ogni volte 2 mes prime di ogni elezion, e soredut che vedin pits e cjaf te onestat e coerence.
Al è dut e tant di fa.
mandi
Mandi Checo,
praticamentri dut chel che tu scrivis al è condivisibil e o crôt che lu condivît ancje Chris.
E chest al è il pont: duncje parcè tirâsi i dincj fra int che à lis stessis opinions???
La uniche robe che no condivît al è il parallêl cul Sudtirol, dal dut fûr de vade e che al sarès miôr che s'al gjavìn dal cjâf: se i furlans in Italie e vessin daûr un Stât cun milions di abitants no varessin un probleme che al sedi un...
Posta un commento