Sabide ai 17 di Otubar, cun Hotaka Gotoh, responsabile dal Centri di Lenghe Gjaponese WA di Udin, o sarai a Triest par “Parole tra i luoghi”, la Fiere de editorie transfrontaliere e dal Mediterani promovude di Vita Activa Nuova.
Aes 12.50 o puartarìn la esperience di “Stagjons, haiku par furlan”, intal incuintri “Il viaggio dell’haiku friulano verso il Sol Levante”.
O fevelarìn di poesie e di traduzion, dal percors che al à fat incuintrâ il furlan e il gjaponês, passant traviers il talian. E des personis che a àn contribuît a chest piçul viaç.
Il multilinguisim e la traduzion a son il cûr di cheste edizion: temis che o sint dongje, par chel che o scrîf e pal valôr che o doi ae nestre lenghe.
O volarès sotlineâ il lavôr di Gabriella Taddeo di Vita Activa Nuova, impegnade insiemi a dute la scuadre inte organizazion de manifestazion. In chest câs, meti adun editôrs indipendents, autôrs e tradutôrs, dâ spazi ancje aes lenghis mancul difondudis, preparâ trê zornadis di incuintris al domande timp, cure e convinzion.
O cognòs Gabriella za di cualchi an e o ai simpri preseadis la sô energjie e la passion che e met tai siei progjets: a jê e a cui che al lavore cun jê al va il gno agrât.
La fiere si fâs dai 16 ai 18 di Otubar te Sale Xenia de Comunitât Greghe Orientâl, su lis Rivis (Riva 3 Novembre, 7), des 10 aes 20. La jentrade e je libare.
Se sabide o sês a Triest, viodìn li. Mandi!
Post
Nessun commento:
Posta un commento