Michael Jackson

Par fevelâ si varès di cognossi.
Dal sigûr l'artist nol à bisugne di presentazions e, ancje se jo no soi mai stât un so fan, tantis sôs cjançons tornadis a scoltâ ta chescj dîs, no mi sunavin gnovis.
Ma forsit, di un artist tant cognossût si sa pardabon pôc, come om.
Tra dut ce che al è stât dit, mi à fat tante impression il drame di un frut che nol à vivût di frut, cressût simpri sot des lûs dal spetacul. E chel zovin che al à sfondât, cuant che tancj de sô etât massime vuê a àn cif&çaf a rivâ a la fin dal mês?... Viodût di di fûr al veve dut, ma dentri? Mi à fat tant dûl provâ dome a imagjinâ il torment interiôr di un om che nol à mai vivude une vite sô, condizionât de famee (e di ce che o ai capît, massime dal pari), ma un eterni spetacul. Un om che al veve cirût di deventâ ce che nol jere, dineant lis sôs lidrîs trasformant il so aspiet par scjampâ. No ai voie nancje di comentâ i fats di cronache judiziarie. E a la fin, il tragjic balet dai numars al à fat capî che ancje la sigurece economiche no jere plui tant "sigure"...
Cumò il torment al è finît, forsit. Ma, come che o disevi, par fevelâ si varès di cognossi.
Cussì o preferìs tasê e impiâ la radio... une robe però mi sint di dî cun sigurece: se un artist al à di provocâ emozion, scoltant cheste o soi convint che lui lu è stât, e ancje grant.
Recuie.


Michael Jackson - Heal The World

Marta Copetti di Colonia Caroya

Par tancj Marta Copetti e je une vôs: la vôs de trasmission "Fuarce Furlans" di Radio FM Comunicar di Colonia Caroya.

E ancje jo le ai cognossude pe prime volte grazie a la radio: o ai ancje vût il plasê di jessi so ospit cualchi volte, midiant di une telefonade o di un colegament skype che di fat ti anulin la distance tra il Friûl e la Argjentine.

Ma il plasê plui grant al è chel che o ai vût fevelanti di persone e danti la man stant che Marta e je in Friûl par cualchi dì inmò e si sin cjatâts. I ai regalât une copie dal ultin numar de Patrie dal Friûl e cualchi libri di pre Antoni Beline par che ju puarti te lôr biblioteche pai Furlans di Colonia Caroya.

No finarai mai di dâmi di maravee a pensâ che di là dal Atlantic e je une comunitât che, pe plui part, no à mai viodût il Friûl (par esempli, il nono di Marta al è rivât in Argjentine che al jere inmò frut tal 1879.), ma e continue a fevelâ par furlan cun braure... e pensâ invezit che achì a son furlans che a àn scuasit vergogne...

O saludi cun afiet Claudio e no dome chei di Colonia Caroya, ma i Furlans di dute la Argjentine e di dute la diaspore de emigrazion che ju à puartâts par ogni cjanton dal mont.

Il Diari

Ve ca la cuviertine dal cuindisinâl Il Diari.

Il mitic Aldo Rossi

Ve ca il gnûf video di Alduti! Masse fuart!

Cuasi il 70% al domande il furlan a scuele

Po ben, se chei che a continuin a bati cuintri dal furlan si fermassin a resonâ cjalant i numar, si inacuarzaressin che nol covente vuacâ tant: l'ufici scolastic regjonâl al à comunicât che il 64% des fameis a domandin di insegnâ il furlan a scuele. Lait a lei ancje l'intervent di Valcic sul Gazzettino

E par cui che si fos dismenteât, us linki ancje il speciâl de Patrie Otubar 2008 dedicât a la scuele fracait chi.

A chest proposit us segnali che sul setemanâl IL FRIULI al è un scandai che us invidi a votâ: fasìnsi sintî ben (fracait chi par votâ)!

Il diari di Bobby Sands

Vuê o ai voie di ringraziâ Carli Pup che mi à fat cognossi miôr Bobby Sands.
Di fat us segnali e us consei ancje a voaltris cheste publicazion curade di Carli "Il diari di Bobby Sands", edizions Kappavu.
Par jessi precîs no si trade dome de traduzion furlane dal militant republican irlandês, ma ancje un biel struc di storie su la Irlande.
Une pagjine interessante di storie resinte inmò pôc cognossude, pardabon emozionante.
Cun di plui, lis pagjinis dal diari a comunichin dute la dramaticitât, ma ancje la dignitât e la braure di un om muart pai siei ideâi e pe libertât dal so popul.
Une vore biele la conte che e siere il libri e che e fevele di une lodule, tant che simbul di libertât.

La Patrie dal Friûl di Jugn

E je jessude la Patrie dal Friûl di Jugn. Un grazie a Dj Tubet che nus regale no dome une biele interviste, ma ancje il spot esclusîf che o podês scoltâ tal video che o cjatais chi sot.

Frank Spada

Chê altre dì o ai fat un salt te Ostarie leterarie plui fuarte de blogosfere.
Intant che o ziravi pai taulins di Contecurte e i ordenavi di bevi al ustîr, o ai viodût tun cjanton un siorut che al scriveve. Al à alçât il cjâf un lamp, mi à cjalât, no mi à dit nuie e dopo al à continuât a fâ i siei fats tornant a scrivi sul so cuadernut. A la fin, che no vevi nancje bevût dut il gno Chinotto, si è cjapât sù e al è lât.
I ai domandât al ustîr cui che al jere, ma nol à volût dîmi.
Vuê o rivi a cjase e o vierç la pueste eletroniche e ce ti cjatio? Une mail di chel siorut: al jere Frank Spada (te foto, di zovin).

Ocio, can in baul!

Al somee che il sport preferît dai antifurlans al sedi cirî di meti in evidence tropis risorsis (par lôr "simpri strassariis") che a finanziin i progjets pe lenghe furlane. Stant che la rispueste sui coscj dal GDBTF e je za stade dade al ass. Molinaro, che o ringrazii une vore pes declarazions positivis su chest imprest, jo o gambii argoment, segnalant un biel finanziament di passe un milion di euros par un cjanili a Triest.
In struc chi a son i numars.
Contribût regjonâl di 1.020.000 euros suntun totâl dai finanziaments publics di 1.200.000 euros (chei 180.000 euros che a mancjin parsore al varès di metiju il Comun di Triest).
Considerât che dentri si metaran 150 cjans, fasint une division svelte, a son 8.000 euros di becins publics par cjan.
Ma il biel al ven cumò.
Leint ben il comunicât uficiâl (fracait chi par leilu dut), il project financing complessîf (che se no ai capît mâl al è un sisteme di finanziament che dongje dal public al tire dentri finanziadôrs privâts) al è 3.750.000 euros che, simpri dividût pal numar ipotetic di ospits a cuatri gjambis, al fâs 20.000 (vincjmil!!!) euros par "bau".
Cun di plui i partners privâts che a varessin di cofinanziâ la opare, no son inmò individûats... ma intant il contribût public al ven assegnât.
Cumò mi fâs e us fâs cualchi domande: ma se no vessin di vignî fûr finanziadôrs privâts par cuvierzi la difarence, ce sucedial? Il progjet si fermial e i finanziaments publics a vegnin tornâts indaûr o invezit passial dut su pe schede dal ent e il cjanili "di 20.000 par cjan" al ven paiât dut dome dal public? La rispueste no le sai e mi ten la curiositât...
E intant che si spiete il finanziadôr privât, cualchidun, par puartâsi indevant, al pense za a la cerimonie di inaugurazion fasint lis provis... fracait chest link! E a spietin ancje Lelio Luttazzi.

La miôr rispueste

«Jaio» al è un furlan che al vîf in Belgjiche. Là vie al fâs di mistîr adiriture l'artist, e si capìs dai siei post fantasiôs e pevarins.
Jessint a stâ tal forest, par fortune si sparagne dutis lis polemichis su la lenghe furlane imbastidis a art dai antifurlans.
E cussì al è sucedût che par câs îr al vedi fat un post che e je la miôr rispueste al polvaron cuintri il CFL2000: lait a lei chi http://furlanar.blogspot.com/2009/06/o-cumo-o-mai-plui-o-adesso-o-mai.html

Di bessôi, in pâs

Us met une foto che mi à mandât un gno amì.

Ta chescj dîs a Vignesie e je in cors la mostre "Anton's Memory by Yoko Ono" e ancje lui al à volût lassâ un messaç di pâs come testemoneance de sô visite. E jo lu ringrazii.

Pe mê stelute

Un video speciâl, par une zornade speciâl.

Gioele

Cualchi setemane indaûr si jere presentât dibessôl. Cumò al tache ancje a metisi in pose. Isal figo!?!

Biel a Buie

Us met chi une biele locandine par une iniziative interessante che si fasarà domenie a Buie.

Cine curt di Muris a Maian

Joibe 11 aes 9 di sere tal auditorium il cine curt di Muris al rive a Maian cu la colaborazion de pro loco di Maian. I lavôrs che a àn partecipât al ultin concors a son propit simpatics e cualchidun al è pardabon ben fat. O scomet che plui di cualchidun al ricognossarà cualchi protagonist... ma no ai voie di anticipâ masse!

Elezions europeanis: la vitorie de Leghe Nord

Ancje a Maian, come in dut il Nord Italie, al somee che la liste che e à "vinçût" e sedi la Leghe Nord (chi i dâts pal Nord-Est).
Se o fasìn une analisi svelte si pues confrontâ il dât dal 2008 (ultimis elezions regjonâls) cun il dât dal 2009 (elezions europeanis) e si viôt che e à vuadagnât +5,55 ponts percentuâi. Se po si lu paragone cul dât dal 2006 (elezions Cjamare dai Deputâts), alore la difarence des percentuâls e je di 12,56 ponts.

Fasint un struc dai 6 partîts plui fuarts, lis difarencis tra lis percentuâl des ultimis 3 votazions a son cussì (tignint presint che tal 2006, lis listis a podevin vê nons difarents. Cun di plui no ai tignût cont di une semplifacazion, stant che no ai considerât tancj partîts minôrs, massime a çampe):
Pdl (a-b=+0,39; a-c=-9,74)
a) Elezions europeanis 2009: 33,93%
b) Elezions regjonâls 2008: 33,54%
c) Elezions politichis 2006: 43,67% (Fì: 28,02%+An: 15,65%)

Leghe Nord (a-b=+5,55; a-c=+12,56)
a) Elezions europeanis 2009: 21,82%
b) Elezions regjonâls 2008: 16,27%
c) Elezions politichis 2006: 9,26%

Pd (a-b=-6,29; a-c=-0,58)
a) Elezions europeanis 2009: 22,69%
b) Elezions regjonâls 2008: 28,98%
c) Elezions politichis 2006: 23,27% (Ulivo)

Udc (a-b=-0,94; a-c=-0,8)
a) Elezions europeanis 2009: 6,20%
b) Elezions regjonâls 2008: 7,14%
c) Elezions politichis 2006: 7%

DiPietro (a-b=+0,71; a-c=+3,79)
a) Elezions europeanis 2009: 6,67%
b) Elezions regjonâls 2008: 5,96%
c) Elezions politichis 2006: 2,88%

Se o cjatais che o ai fat cualchi casin, visaitmi tai coments.
N.B: i dâts a cjalin i risultâts tes sezions eletorâls di Maian.

Bêçs e lenghe furlane

Un dai argoments che si dopre par dineâ la utilitât de lenghe furlane al è che "sì, va ben il furlan, ma a son altris lis prioritâts: miôr meti i bêçs di une altre bande..."
A part che si varès ancje di tacâ a pensâ che e je divierse int che e lavore cu la lenghe furlane (sporteliscj, gjornaliscj, editôrs, mestris, ricercjadôrs e vie indevant) e dispès cheste int e je precarie e magari e à di paiâ ancje chê il mutui pe cjase... al sarès ben tacâ a cjalâ ancje li che i becins publics a son pardabon "straçâts".
Mi à fat propit fastidi lei sul gjornâl cun tante pompe che pe fieste de republiche, pe sfilade dai 2 di Jugn a Rome a son stâts sparagnâts 1 milion di euros: e tant e coste cheste liende se a rivin a fâle sparagnant 1 milion! Ce costie? E soredut: a cui zovie cualchi ore di militârs che a passonin jù par une strade di Rome? E la cerimonie di Redipulie, cun tant di ministri, graduâts, pichet militâr... e cence int? Misteris nazionalistics che a continuin cence motivazion, par me. Ma no pensi che e sedi dome une mê impression sogjetive, stant che mi risulte dificil cjatâ une rispueste obietive.
Po ben, tornant al discors di vierzidure, us segnali l'articul di William Cisilino, vuê sul Gazzettino.

Pocje int a votâ

O soi di servizi te sezion eletorâl n.3 "Pêrs e Sant Eliseu". Dopo des operazions di preparazion pe votazion fatis vuê matine, aes 3 dopomisdì o vin viert. O vin vude pocje int: aes 5 dopomisdì al veve votât il 3,8% e aes 7 di sere o jerin rivâts al 6,2%.
Stin a viodi ce che al sucêt tes prossimis oris. Usgnot si pues votâ fint 10 di sere e doman des 7 fint 10 di sere. O tacarìn a contâ lis schedis doman di sere subit dopo vê sierade la sezion.

Su lis olmis dai pelegrins

A continuin i incuintris su la storie dai pelegrins par fâ cognossi miôr l'Ospedâl di Sant Zuan.
Usgnot aes 20.45 il prof Bellavite de associazion "Iter Aquileiense" al fevelarà in sale dal consei comunâl di Maian di pelegrinaç, cjapant spont dai viaçs a Sant Jacum di Galizie e a Rome.

Apel par Archeofurlane

Forsit za lu savês: vuê la Ninine (te foto intant in vore intun laboratori a meti a puest reperts archeologjics) e salude ducj i letôrs dal so blog parcè che e à decidût di sierâ archeofurlane.blogspot.com viert tal mês di Març dal 2008.
A ducj chei che a àn a cûr la blogosfere furlane e a àn vût maniere di preseâ i contignûts di chest blog dedicât a la archeologjie e a la storie de nestre tiere (e no dome), o domandi di partecipâ a cheste campagne par invidâ la Ninine a tignî dûr e o us domandi di passâ li di jê par sburtâle a continuâ a scrivi.
Ninine continue cul to blog!

Anticipazion motare su La Patrie

Cun doman e tache la Fieste dai Motârs e come l'an passât o larai a fâ un zirut a Osôf dai 4 ai 7 di Jugn.

Intant us segnali cheste anticipazion de Patrie dal Friûl: stant che o fevelarìn di motôrs o vin sintût Moreno Persello che o viodês chi te foto cul club dai Motârs (al è chel tal mieç sentât su la moto, cualchi an indaûr). Par lei la interviste, fracait chi.