RALLY & ROCK FESTIVAL a Sudri (Udin) – A-23 jessude Cjargne-TumieçLa edizion 21 de Biker Fest, il plui spetacolâr motoradun european, si davuelzarà dai 21 ai 24 di Jugn li de aree de Mont çoncolan, in comun di Sudri (Udin); un event storic, une manifestazion uniche tal so gjenar che, di an in an, e continue a clamâ dongje a ogni edizion desinis di miârs di personis che a rivin di ogni bande dal mont (chest an a saran ospits dai Stâts Unîts, Canadà, Australie, Santo Domingo, ma ancje de Russie, Ucraine e Moldavie). Il puest dal incuitri ideâl di ducj i motârs europeans, a cjaval di chopper, custom, naked o streetfighter che a sedin, un univiers colorât, un mont par so cont che si torne a cjatâ e al devente protagonist par cuatri dîs par an, dîs fats di incuitris internazionâi, novitâts, curiositât, musiche, amicizie, fradilance e solidarietât.
Il Bike Show al previôt i premis plui siôrs mai metûts in pali intun Bike Show european e la partecipazion dai plui impuartants costumizers internazionâi. Ta cheste edizion a saran ufierts 3 viaçs ae Bike Week di Daytona 2008 e altris premis bielons ai proprietaris des miôr motos tes categoriis Chopper U.S. Engine, Custom U.S. Engine, Chopper, Custom, Bobber, Café Racer, Naked, Streetfighter, Classiche, Full Dresser, Speciali e Best in Show. Dal 1996 fin vuê a son stâts distribuîts sîs viaçs complets e disesiet biliets di avion, cun destinazion la Bike Week di Daytona, in Floride.
Ancje par chest an la lotarie e met in pali une sflandorose Honda Shadow Spirit 750! Pal passât a son stadis vinçudis ae lotarie siet H-D Sportster, dôs Yamaha Drag Star, une Moto Guzzi Breva, une Moto Guzzi California Special, dôs Custombike, trê Honda Shadow 750 e une Kymco. Cun di plui la HONDA Italia Uficiâl e sarà presint par ufrî al public demo ride cun ducj i gnûfs modei e cors di vuide sigure par ducj, comprindûts i minôrs di etât.
Chest an ancje ARCTIC CAT cui siei Quad multiûs al darà la pussibilitât di provâ i siei innomenâts cuadriciclis.
Come simpri la colone puartant di chest event e sarà la musiche: di agns a montin sù sul palc band e personaçs innomenâts tant che Ronnie James Dio, Kim Brown, Creedence Clearwater Revival, Status Quo, Uriah Heep, Dr. Feelgood, Sweet, Alvin Lee, Whitesnake, Motörhead, Soon, Rats, Yardbirds, Animals, Canned Heat, Wishbone Ash, Blues Pumpm, Alex Sure Band, Trutz “Viking” Groth, Ten Years After, Kim & The Cadillacs, Saxon, Twin Dragons e Tony Martin (Black Sabbath), Andrea Braido, Uli Roth degli Scorpions e Jaime Dolce... Sieltis che a pescjin tai stîi e tai ritmis classics dai mestris mondiâi e fûr di discussion dal Rock e dal Blues.Ancje chest an la Fieste dai Motârs a viodarà protagoniste la musiche cun Paul Di’ Anno, il prin cantant dai Iron Maiden,e cun tantis tribute band di Rock Heavy Metal (cjale il program).
Come di tradizion de Fieste dai Motârs, no mancjaran lis spetacolârs e entusiasmantis esibizions dai Dragster, dai Stunt Men Internaziozâi, cul famôs Ricky Angerer (D) e dal Motocross Freestyle cui FMX International (I) come ancje i spetacui acrobatics, i divertents bike game, ma a saran ancje i esuberants Burn Out di Udo Bracht (D), kart, ape race, trike, sidecar e un contest pai motoveicui plui stranis... No mancjaran ancje lis elezions des Miss, il sexy bike show internazionâl cun Justine, i cors di vuide sigure, e vie indevant. Spazi ancje pai passionât di aerografie e tatuaçs; e po cetancj barachis par compra di dut: dai vistîts di piel ai ogjets indians, dai cjapiei ai acessoris par moto e tant tant di plui.
Par cui che al ame i viaç e la discuvierte di altris popui, ae Fieste dai Motârs a podarà cjatâ diviers motocicliscj che par cheste ocasion a contaran lis lôr entusiasmantis esperiencis di viaçs in ogni bande dal mont, de Indie ae Cine, de Irlande ae Siberie. Pai passionâts di culture indiane invezit e je une novitât assolude: pe prime volte la Fieste dai Mortârs e ospitarà une part dal museu storic sui natîfs di Americhe dal siôr Biscotti Enrico di Orvieto.
Events tal event
Cun di plui domenie a buinore al è di no pierdi la 12. US CAR REUNION, storic radun di machinis americanis, li che si podarà rimirâ cetantis machinis a “stars and strips”, che si esibiran ancje in garis di regolaritât (www.uscarreunion.it) e il radun nazionâl di RIVS – regjistri talian di veicui storics – al sarà presint cuntun stand di pueste, par dâ conseis su lis sigurazions agjevoladis pai veicui storics imatricolâts prime dal 1987.
Cun di plui al sarà pussbil partecipâ a ativitât di interès sociâl come chês inmaneadis dal Coordenament Mototocicliscj, de associazion DISMO (Dimensione Sigurece in Moto – Disabii in moto) e de Associazione Motociclisti Incolumi, che a sensibilizaran i presints su argoment sune vore seris e cjalts che a fasin patî il motociclisim e i motocicliscj disabii, come la sigurece su la strade, lis omologazions e lis patentis speciâls. Cun di plui, presints de Belgjiche, de Gjermanie e de Italie i pastôrs motârs protestants.
Us visìn che la Fieste dai Motârs e rapresente ancje une otime ocasion par fâ un san mototurisim e par cognossi miôr la Regjon che le ospite, il Friûl – Vignesie Julie (www.turismo.fvg.it). Di fat, logade tal cûr de Cjargne, e permet di visitâ localitâts di grant interès culturâl e naturalistic, museus e bielecis storichis e ancje di preseâ la innomenade tradizion enogastronomiche; par fâ vivi in maniere complete l'event, a saran inmaneâts zîrs turistics e enogastronomics. Pe prime volte chest an al sarà presint ae manifestazion www.terredimoto.it, sodalizi che al ponte al disvilup di un sisteme integrât tra events/aveniments tradizionâi di promozion e acet turistic e servizis e iniziativis studiadis di pueste pal turist su dôs rovedis, cu la finalitât di fâ cognossi lis particolaritâts teritoriâls, storichis e culturâls e la splendide morfologjie dal Friûl, midiant dal comun denominatôr de passion pes motos.
Altris comunicâts stampe specifics (ancje in altris lenghis), e ancje materiâl audio, video e fotografic, a puedin jessi domandâts al Ufici Stampe.
Par info diviersis e su Bike Show e Stand (+39) 0432.948777; fax (+39) 0432.948606
e-mail: info@bikerfest.it – sito web: www.bikerfest.com
GRANDE DISPONIBILITÂT di ALBIERCS
Par hotel e acet: +39/(0)433-778921 - info@albergodiffuso.org - (Albierc Difondût di Sudri);
Par hotel e acet e curis termâls (Termis di Darte): +39/(0)433.929290 – arta@infocarnia.org - (Carnia Welcome)
Par altris informazions turistichis e par mototuriscj: www.terredimoto.it – www.turismo.fvg.it
Post
5 commenti:
LA STORIE DE FIESTE DAI MOTÂRS
(La Bikerfest)
Al jere il 1987 e in chê volte i raduns dai motârs in Italie in pratiche no esistevin. Cualchi piçul incuintri di chês che si clamavin “Gjachetis blu”, cualchi cunvigne di gruputs di motârs locâi, ma nuie di plui. Cussì i “Motârs”, un grup di motocicliscj esperts e rocketârs furlans, al decît di impegnâsi pe realizazion di une fieste particolâr, plui complicade di chês pocjis che a jerin in Italie, un event che al las daûr des olmis dai grancj raduns dal Nord Europe, in particolâr chei une vore cognossûts inmaneâts in Gjermanie (la German Bike Week, il Biker Union Rally ed il President Rally) o di là dal ocean (Daytona e Sturgis prins di ducj). L'inizi a al fo dificil e la prime edizion, chê dal 1987 apont, e fo caraterizade di une ploie che Diu le mandave. Tal vinars i partecipants no jerin plui di 250, ma la sabide si rivà ae cuote impuartant di uns 600 personis, cun plui di 400 motos. No tantis, ma par une comunitât piçule come chê di Vilegnove di Sant Denêl (Udin) che e fâs dome un miâr di abitants, il radun di motârs al rapresente une sorte di invasion: tancj tatuaçs, tendis e forcelis cussì lungjis no si jerin mai viodudis prime. Ta chei agns pal moviment dai motârs di dute Italie e pai organizadôrs al fo un grant sucès.
Pe prime volte in Friûl, ma ancje in Italie, si viodin e si copiin lis stretis di man “come i motârs” (cui poleârs strents), in pôcs agns ducj i motocicliscj talians si daran la man ta chê maniere. L'interès e i partecipants al radun a cressin an dopo an in maniere progressive e costante no cate la ploie che e resente ogni edizion. Il mert al è dai organizadôrs atents e esperts che a curin ogni detai par meti comuts i ospits: zentilece, iluminazion, servizis e spetacui a 'nd è fin avonde. Ogni moto che e rive tal parc e à une breute di len sot dal cavalet, par no lâ sot. Si copie “il miôr” di dut ce che si viôt ator pai raduns di dute Europe. A cressin lis iniziativis che a fasin di contor ae fieste: lotariis par vinci une moto, ciclomotôrs, vistîts di piel e cascs, viaçs a Daytona (pai vincidôrs dal Bike Show), stands, convention di tatuadôrs e aerografiscj, zîrs cul elicotar, bungee jumping, sexy show cun grandis stelis dal erotisim (Luana Borgia, Baby Pozzi e Selen Edelweiss tra lis tantis), concierts simpri plui grancj e impuartants (Ronnie James Dio, Kim Brown, Creedence Clearwater Revival, Status Quo, Uriah Heep, Dr. Feelgood, Sweet, Alvin Lee, Whitesnake, Motorhead, Soon, Rats, Yardbirds, Animals, Canned Heat, Wishbone Ash, Blues Pumpm, Alex Sure Band, Trutz “Viking” Groth, Ten Years After, Kim & The Cadillacs, Saxon, Twin Dragons e Tony Martin [Black Sabbath], Andrea Braido, Uli Roth degli Scorpions e Jaime Dolce, par nomenânt cualchidun), i zûcs di ogni gjenar cu la nassite (pe prime volte in Italie) des garis di Monobike, la partecipazion di personaçs e nons famôs dal mont dal sport e dal spetacul.
Si è cussì rivâts 4.000 personis tal '90, 13.000 tal '94 e plui di 23.000 tal '97 te edizion numar undis, intun cressi cence limits. Il dut intune atmosfere di amicizie e solidarietât che a ten dongje i partecipants europeans cu la passion pe moto, cualsisedi che e je. Tal 1998 si fâs la sielte, che si è dimostrade vincente, di gambiâ sît de manifestazion, deventât aromai masse limitât e no avonde sigûr par tignî lis desinis di miârs di partecipants. Di Vilegnove di Sant Denêl si passe a Osôf, simpri in provincie di Udin, a uns 10 chilometris de prime sede. La gnove aree e je chê dal Rivelin di Osôf, grandone (uns 280.000 mq e di chescj 6.000 a sot tet), spaziose e tal vert. Tal 1999 si contin 32.000 presincis, cun plui di 17.000 motos parcadis, di ducj i gjenars e di dutis lis marcjis. Grande novitât de edizion numar 13 a son lis garis di Dragster e chê internazionâl di Stunt Men, prime e ultime davuelte fin cumò in Italie. Stant l'otim risultât de manifestazion e il grant sens di civiltât dai partecipants, i organizadôrs a ricevin un encomi public dal Sindic di Osôf e dai prins citadins dai comuns dongje.
Tal 2001 si torne in comun di Sant Denêl, ma cheste volte te aree dai innomenâts pressutificis, un spazi avonde grant par ducj, ma magari cussì no cence nuie di naturâl che ti pari dal soreli che al bateve. Cun di plui, une imposizion burocratiche nus oblee di scurtâ l'event di cuatri a dome doi dîs; une legnade in tiermis di presincis che si paiarà tai agns di dopo. No cate dut, i motârs a continuin a rivâ, ancje di di là dal ocean, par vivi la atmosfere adrenaliniche che si respire ae Fieste dai Motârs, che di agns a sburte l'event midiant di un sît internet dedicât. A cheste ocasion al è presint il camion di Overland a sostegn dal Unicef. A Ricky Angerer e al Show Actin Group a son i protagoniscj dai spetacui acrobatics, e la musiche e puarte i nons dai Status Quo (GB) e dai Creedence Clearwater Revival (USA). Il 2002 al rive intun moment e al viôt la manifestazion a tornâ li che e jere nassude 16 agns prime, ma cumò i visitadôrs si son centuplicâts e il spazi a disposizion al è masse pôc. Altris spetacui e atrazions si zontin a chês tradizionâl, ma come simpri la buine musiche e je la prime atrative. La edizion 17 a Sant Denêl (UD) no je stade une des plui favurevulis, par vie dal masse cjalt (42°) e ancje pe concorince sleâl metude in vore di cierts comerciants di fûr de aree delimitade.
Dopo numerôrs sfuarçs par cjatâ un spazi plui adat par ospitâ l'event, dal 2004 la manifestazion si davuelç su la mont çoncolan a Sudri, dulà che l'otim puest e la ecelente ativitât dai albiercs a permetin di sodisfâ lis esigjencis di ducj i motârs, dai plui ruspis ai plui stracs e stressâts, che a cirin di svariâsi e rilassâsi dopo setemanis di lavôr dûr.
Ogni an si pues vinci cul Bike Show trê viaçs ae Bike Week di Daytona. Come simpri i spetacui a son numarôs: Stunt Men, burn out, motocross freestyle, ape race, bike games, elezions di Miss Contest, sexy bike wash, mostris fotografichis, show, zîrs turistics e tant altri inmò.
Dut câs la Fieste dai Motârs no je dome numars e spetacui, ma e je di simpri ancje un impegn sociâl. Ogni an a vegnin dâts miârs di euros a associazions umanitariis e cence finalitât di profit nazionâls e internazionâl; tai agns tantis associazions motociclistichis a àn fat come noaltris.
Ta chescj 21 agns la Fieste dai Motârs e à rapresentât un cressi continui e i organizadôrs a continuin a impegnâsi al massim par ufrî simpri il miôr ai lôr ospits.
L'apontament pe edizion 22 al è pai 19-22 di Jugn dal 2008.
Posta un commento