22 maggio 2007

Colorêt: la mê relazion "Emigrâts inte rêt"

Sabide e je stade propit une biele esperience. O vin fevelât in direte ancje cun Radio FM Comunicar di Colonia Caroya (ARG) e cul prof Zorç Cadorini in Cechie. Il gno intervent al è stât spostât tal dopomisdì. Par chei che no jerin e par chei che no nus àn cjalât in streaming, ve ca la mê relazion.

Cjistiel di Colorêt di Montalban, ai 19 di Mai dal 2007

Emigrâts inte rêt
Une idee par un canâl informatîf mondiâl, spontani, libar e furlan

Il resonament che o larìn a fâ al partìs di une evoluzion che massime tai ultins timps a àn vût i mieçs di comunicazion e di informazion.
Un pâr di esemplis mi judaran a presentâ ce che a significhin une fruizion passive e une friuzion ative de informazion.
La fruzion passive e je tipiche dal scoltadôr di radio e spetadôr di television. Chest model si lu clame “verticâl” stant che il broadcast al previôt une schirie di condizions par che l'utent al ricevedi i contignûts metûts in circolazion. Di fat e covente une “sincronie”: l'utent al à di jessi denant dal ricevitôr e tal moment de emission dal contignût se no nol pues savê ce che al ven trasmetût. Cun di plui chest sisteme al è ancje condizionât de distance: i ripetitôrs che a permetin di puartâ il segnâl a àn une potence che e pues jessi ancje fuarte, ma dut câs e reste simpri limitade e simpri unidirezionâl di emitent a utent.
La fruizion ative invezit e je chê che al à un cybernavigadôr o miôr un utent di internet. Chest model si lu clame orizontâl, stant che no si à plui chês condizions che a limitavis il model dal broadcasting. Di fat la friuzion de informazion su internet e je “asincrone”, tal sens che e je indipendent sedi dai timps e des distance: une volte che i contignûts a son metûts in rêt, chescj a son simpri a disposizion di cui che al à voie di cognossiju. In ogni moment e dapardut, baste conetisi. Cheste situazion e à permetût une rivoluzion te circolazion dai contignûts, ven a stâi la pussibilitât pai utents di podê cirîsi lis informazion in maniere plui indipendente e libare, ancje se in forme inmò unidirezionâl.
Ma a chestis premessin, a son vignûts daûr altris doi elements che a rivoluzionin l'acès a la informazion:
1)une diminuzion dai coscj de tecnologjie
2)une velocitât di trasmission dai dâts simpri plui alte.
Cheste situazion che e partìs dal model orizontâl che o vin a pene presentât, e permet che l'utent nol sedi plui dome un friutôr atîf, ma il sogjet al deventi un produtôr di contignût. Cun chestis condizions si cree la pussibilitât di passâ di un model di fruizion al model de Condivision (ce che par inglês si sint a clamâ “sharing”).

La Seconde rivoluzion
Ancje se la prime (il passaç dal model verticâl a chel orizontâl) e jere za une grande rivoluzion, cun cheste o vin une facilitazion inmò plui grande.
Di fat ancje cui che nol cognòs la informatiche al devente no dome un fruitôr di contignûts, ma al devente protagonist di creazion di contignûts. O vin duncje la pussibilitât di doprâ Internet ancje par chei che no son programatôrs informatics.
Par meti contignûts in rêt e covente dome une competence culturâl, vâl a dî chê capacitât di produsi contignûts, cence necessariamentri vê plui une competence informatiche.
Cheste evoluzion di Internet viers il concet di condivision si lu clame WEB 2.0 (la seconde fase di Internet).

I imprescj dal Web2.0, cualchi esempli
Informazion e gnovis tecnologjiis (idee di condivision di esperience e cognossince)

Blog_Un blog, struc di web log, al è un diari personâl su Internet, inzornât plui o mancul frecuentementri dal proprietari che lu à viert (gjeneralmentri une persone). Sul blog, che ducj a puedin lei e comentâ, a vegnin publicadis in timp reâl notiziis, informazions, opinions o contis di ogni gjenar.
Esempli:
un blog: ILfurlanist
un post: un contignût (notizie, opinion, messaç, batude, la riflession, insiorade di un video, une foto, une musiche...) che il titolâr dal blog al decît di publicâ.
un coment: l'intervent di cui che al visite il blog e al decît di lassâ un sô parê suntun post.

Il nivel di condivision di un blog al pues ancje jessi slargjât dant la pussibilitât di meti dentri contignûts (post) a plui personis. Fasint cussì al pues deventâ un spazi li che si dan dongje navigadôrs che a condividin interès comuns, ven a stâi un spazi tematic (al è il câs dal Furlanist, li che l'argoment di fonde e je la furlanetât e la cause furlaniste).
Rispiet ai prins blog saltâts fûr tal 1999, in dì di vuê fâ un blog al è pardabon facil: si pues screâ un blog cence cognossi nuie di informatiche. Si sielç la impostazion grafiche tra modei predeterminâts e si pues tacâ daurman a meti dentri i contignûts (post).
Il servizi al è dât di diviersis aziendis che a dan ospitalitât a gratis a cui che al à voie di vierzisi un blog: www.blogger.com o www.splinder.com (che dome chescj a contin aromai miârs e miârs di utents).
Par fâ rindi miôr il significât dal concet di partecipazion intun blog midiant i coments dai visitadôrs, si pues fâ l'esempli cjapant un post dal blog di Beppe Grillo, un dai prins al mont in tiermins di letôrs. Se o cjapin un post cualsisei o viodìn che la partecipazion medie e puarte almancul plui di 1000 coments. Chest al significhe che daûr di ogni post al ven scrit intun pâr di zornadis l'ecuivalent di un libri di 200 pagjinis (esempli un post sui timps de justizie).
Ma un blog nol rest par fuarce sierât te rêt: al pues deventâ spont par iniziativis che a àn efiets ancje te societât reâl (no “virtuâl”). Al è juste il câs di ricuardâ un esempli che nus tocje di dongje e che al è sucedût a di un ent: il cefap.
Intune publicitât che e veve tacât a zirâ par radio, si presentave un cors di formazion par operadôrs di agriturisim. Il spot al jere stât comissionât dal Cefap, un istitût di formazion che al à sede a Codroip.
Ta cheste publicitât, dute par talian, si sintive une siore che e gjestìs un agriturisim e che dopo vê cjapade la ordenazion dal client invezit di lâ in cusine e lassâi l'ordin al cogo, si meteve a berghelâi tal mieç de sale: in sostance il messaç che al passave al jere che intai agriturisim furlans, il personâl al fevele par furlan e al berghele, duncje nol è professionâl e e par chest al à di lâ a fâ i cors di inzornament. In dut chest la lenghe furlane e vignive associade a un messaç une vore negatîf.
Grazie ae segnalazion di Aldo Rossi, un musicist che al sta a Tumieç, chest notizie e je stade metude tai blogs furlans e simpri grazie a Aldo Rossi al è stât metût in rêt il test di une letare di proteste in maniere che e fos condividude e mandade par mail a la Cefap di ducj chei che si sintivin ofindûts de publicitât in cuestion. Si domandave di sostituî chel spot che al ofindeve la dignitât de lenghe furlane e dai tancj che a lavorin te ristorazion par furlan e cun professionalitât. Risultât? Il president de Cefap nus à rispuindût a ducj par email, scusantsi e il spot al è stât modificât in maniere che la lenghe furlane no fos plui metude sot di une lûs negative. O lassi a voaltris i coments sul significât ecezionâl di cheste azion, stant che ancje chei che no son dal setôr a puedin rindisi cont di ce che al significhe un investiment par un spot radiofonic, che al jere za stât finît e metût in onde e che al è stât gambiât.
Ma tai ultims timps a son diviers i esemplis che a testemonein cemût che lis gnovis tecnologjiis a puedin vê une ricjadude su la societât, permetint a la int di organizâsi cun facilitât e di passâsi informazions in maniere svelte, cun efiets che pal passât al sarès stât une vore plui dificil di rivâ a vê.
Forsit o ricuardarês il grant polvaron che al veve cirût di alçâ il cuotidian il Messaggero Veneto.
Mi riferìs a la polemiche strumentâl montade sù dopo de vignude in Friûl di Beppe Grillo, che intune declarazion vie par une repliche dal so spetacul si smaraveave de convivince tra “Inovazion” e “Marilenghe”, acusant i furlans di jessi vitimis di une sorte di schizofrenie. Il gjornâl in cuestion al veve cirût di meti in evidence cheste dicotomie promovint il solit scandai strumentâl “Furlan o inovazion?” metint in cuintriposizion i doi concets e forsit tal cjâf al veve voie di rivâ a un risultât ben precîs... Ma ancje cheste volte, la cuestion e je rivade sui blog (cjale chi ce che al è sucedût). Ancje in cheste ocasion si à preparât un messaç di proteste, li che si à declarât che i doi concets no son in cuintriposizion ni in concorince, anzit a convivin in maniere une vore costrutive e trancuile. Pal solit, cuant che il gjornâl in cuestion al propon scandais dal gjenar, par zornadis o cjatìn pagjinis e pagjinis che a ripuatin i risultâts e e je simpri une predominance di une posizion su chê altre... Stranementri cheste volte la robe e je muarte sul nassi e no vin vût il plasê di lei pagjinonis su pagjinonis. Anzit in pocjis riis si à vedût che divierse int e pensave e e pense che lis gnovis tecnologjiis e la lenghe furlane no son une contradizion, ma une realtât pussibil e za concrete, cence nissune schizofrenie. Come ultin esempli di cheste influence su la societât e interazion tra i utents, us ripuartìn chest episodi che al à rivuardât Radio Onde Furlane, vitime a Març di un atac decisamentri brut: su la puarte dal palaç li che e je la sede de radio a son stât piturâts simbui naziscj cu la vernîs nere. Simpri sui blog (cjale chi ce che al è sucedût) e je partide une campagne di solidarietât che e à viodût une vore di intervents a coment di chest fat, condanât di une vore di int.
Ma il blog al pues ancje deventâ imprest di promozion di materiâl in Internet, par esempli il videomusicâl “Puar Beppin” (2 minûts) dai Arbe Garbe, al è stât viodût za 1.100 e passe voltis; il videodocumentari che o viodarìn tal dopomisdì “Diari di viaç-Charleroi” (37 minûts) al è stât viodût passe 930 voltis.
Ducj i doi chescj prodots, dopo jessi stâts metûts in rêt, a son stât segnalât o metûts in “condivision” su plui blog e fats cognossi ai lôr letôrs, che cun dute probabilitât ju varessin cjatâts cun dificoltât cence cheste segnalazion che e à dât plui visibilitât a chest materiâl.
Chestis carateristichis e altris che no rivìn a nomenâ par cuestions di timps, a àn puartât a la trasformazion di un strument nassût tant che un diari in rêt a fenomen sociâl che al condizione la cuotidianitât di desinis di milions di personis in dut il mont.
E chest si lu fâs cence scrivi une rie di html (il lengaç tecnic par programâ), cence intindisi di Internet! In sumis une robe che ducj a puedin fâ: baste vê un ordenadôr, une conession Internet e un pocje di... voie di comunicâ e condividi.
BLOG E INFORMAZION_Stant la grande semplicitât e libertât, i blogs si cuintriponin subit al gjornalisim tradizionâl. I media tradizionâi a vegnin incusâts di jessi al servizi di editôrs cundizionâts. Une des critichis plui fuartis al blog e pues jessi sintetizade dal intervent di Gianni Riotta, vicediretôr dal Corriere della Sera (e prin gjornalist che si è firmât cu la mail suntun cuotidian) che al è intervignût in mert al argoment cuntun editoriâl che al à mot un biel gjespâr di polemichis te “blogosfere” (cussì si lu clame il mont dai blogs). Riotta al scrîf “Il lôf dai gjornâi al mangjarà l'agnel dal blog. E al è un ben”. In sintesi al dîs che i blogs a riciclin une antighe utopie: Riotta al paragone la fase atuâl dai blogs e de esaltazion de informazion democratiche cui timps des radio libaris dai agns Setante, cuant che e jere une grande varietât e vivarositât che però dopo e je stde glotude dai grancj grups editoriâi.
BLOG E EDITORIE_Di cuintri il blog, jessint un imprest dedicât ae scriture, al è doprât di tancj aspirants scritôrs par esprimisi e fâ lei i lôr lavôrs. Un articul di no tant timp indaûr dal Corriere della Sera al jere intitulât: “Vuê Montale al publicarès su Internet”. Si sostignive tal articul che pe poesie, che no à grancj riscuintris di vendite, al podarès jessi un imprest privilegjât. Une gnove nus dîs che Paolo Anio (fondadôr di Matrix), Gianluca Dettori (ideatôr di Vitaminic), Fausto Gismondi (ex diretôr editoriâl di Virgilio) e Massimo Esposti (ex amistradôr delegât di Apogeo) – editôrs tal cjamp dal web – a àn dât vite a Unwired Media, cjase editore che e publiche autôrs cjatâts fûr tal web. Di fat, al è grandonon il volum di contignûts che milions di blogarins scritôrs, musiciscj, videoamatôrs, fotografs a produsin e “a publichin” in rêt ogni dì. Blog come ricercje di talents?
BLOG E FOTO_Cu la incressite de memorie a disposizion, a son sîts che a ufrissin un grum di spazi gratuit par meti fotografiis. Il plui grant al è www.flickr.com li che intun moment si pues cjamâ in linie lis fotos.
BLOG E VIDEO_E di pôc e je nassude ancje la pussibilitât di mandâ fûr contignûts video sul blog. Il servizi plui cognossût al è chel di www.youtube.com che al met a disposizion spazi gratuit par publicâ filmâts, ma a esistin ancje altris come www.dailymotion.com o www.metacafe.com. Ogni dì a vegni metûts in linie e condividûts milions e milions di videoclips.

Tags (etichetis che a permetin di organizâ i contignûts par argoment e peraulis clâf). Par fâus capî ce che al è un tag, o etichete, o lin a viodi un esempli pratic suntun blog, anzit il prin blog dut fûr par fûr par furlan.

FriûlTV, la provocazion
La propueste di www.friul.tv e vûl jessi une provocazion.
Une provocazion par stiçâ la discussion e viodi se cheste e je une soluzion a la domande: “Si puedial vê un spazi in rêt par dâ ai furlans ator pal mont un leam cu la Patrie di dulà che magari a son partîts i nonos o i paris?” Noaltris o pensìn di sì ancje se i timps no son curts.
Propit sfrutant lis potenzialtitâts che a son stadis a pene presentadis (metude in rêt di materiâl scrit, audio e soredut video) cun coscj bas e cun competencis avonde acessibilis e je nassude la scomesse di FriûlTV, che o disìn subit e je un laboratori che al podarà esprimisi cun fuarce dome ca di un an, ancje se i prins esempli za nus fasin sperâ ben.
La idee di meti in pîts une television in Internet e nas de radio. Su lis frecuencis di Radio FM Comunicar, radio scoltade inte provincie argjentine di Cordoba, si fevele par furlan par diviersis oris a setemane. Nol è un esperiment, ma ce che al sucêt zaromai di cualchi an a Colonia Caroya, citât fondade sul finî dal Votcent di un grup di fameis furlanis. La iniziative de radio argjentine e cjate la poie e la colaborazion de emitente che di cuasi trente agns e je impegnade inte promozion de lenghe furlane, Radio Onde Furlane, che cun Radio FM Comunicar e sgambie trasmissions informativis e musiche vie Internet. Adiriture al ven tornât a mandâ in onde, di là dal Ocean 24 oris su 24, propit il segnâl di Radio Onde Furlane. Chescj progjets a son daûr a fâ cressi rapuarts virtuôs jenfri il Friûl e lis comunitâts di divignince furlane ator pal mont, seneosis di mantignî un leam cu la tiere des lôr lidrîs e di no pierdi la lôr lenghe native.
E propit par rispuindi a cheste domande che e ven simpri plui dai migrâts furlans di “tierce” gjenerazion, e par chest ancje plui zovins e plui usâts a confrontâsi cu lis gnovis tecnologjiis, o vin pensât ae www.friul.tv.
Par tant, ta chest portâl no dome si leiaran notiziis relativis ai migrants furlans, ma ancje si varà la percezion puntuâl de presince di cheste nestre int ator pal mont. Di fat, cuntun geotag, (un indicatôr che al permet di individuâ suntune cjarte gjeografiche la posizion di chel che al interven) i visitadôrs a podaran cognossi il pont esat di dulà che al è partît il messaç che àn viodût, cjapant cussience cui lôr voi de dimension de diaspore furlane.



L'imprest, Cemût fâ? Dimostrazion pratiche...

Cualchi esempli
la prime rêt embrionâl di contats e corispondets di furlans ator pal mont che si son tornâts a cjatâ te rêt: cjale i esemplis fracant chest link.

O sieri cui ringraziaments:
a la Comunitât Culinâr che e à dât la ocasion di fevelâ di chescj argoments;
a la Cooperative Informazion Furlane che mi à permetût di puartâ e fevelâ de mê esperience sul “cjamp”, o miôr, “te rêt”

e ducj voaltris che o vês vût la pazienze di stâ a scoltâmi.

Christian Romanini
La Patrie dal Friûl

Nessun commento: