A distance di pôc timp de sô scree, la golaine di studis sul autonomisim, edite dal Istitût ladin furlan di Coder di Sedean, e je za rivade al numar nûf: di fat al jere il 2002 cuant che in ocasion dai trente agns de muart di Fausto Schiavi, esponent di ponte dal Moviment Friûl, al jessive il prin volum dedicât al pinsîr dai grancj autonomiscj de nestre regjon. E cumò al è a pene stât presentât l’ultin, pal moment, che al à tant che protagonist pre Josef “Bepo” Marchet, om di glesie e inteletuâl come pôcs che masse adore, cuarante agns indaûr, al à lassât chest Friûl, inmò vuarfin di une figure che puedi cjapâ il so puest... (continue a lei achì).
27 dicembre 2006
Il pinsîr di Josef Marchet
A distance di pôc timp de sô scree, la golaine di studis sul autonomisim, edite dal Istitût ladin furlan di Coder di Sedean, e je za rivade al numar nûf: di fat al jere il 2002 cuant che in ocasion dai trente agns de muart di Fausto Schiavi, esponent di ponte dal Moviment Friûl, al jessive il prin volum dedicât al pinsîr dai grancj autonomiscj de nestre regjon. E cumò al è a pene stât presentât l’ultin, pal moment, che al à tant che protagonist pre Josef “Bepo” Marchet, om di glesie e inteletuâl come pôcs che masse adore, cuarante agns indaûr, al à lassât chest Friûl, inmò vuarfin di une figure che puedi cjapâ il so puest... (continue a lei achì).
Iscriviti a:
Commenti sul post (Atom)
Post
3 commenti:
E simpri su pre Bepo, us met achi ancje un interviste a Meni Zannier:
Messaggero Veneto dai 8 di Mai dal 2006
Lis batais di pre Bepo Marchet pe fede, culture e autonomisim
Par ricuardâ Josef Marchet, nassût ai 23 di Lui dal 1902 e mancjât ai 8 Mai dal 1966, o sin stâts a fevelâ cun Domeni Zannier a Cjasesole di Majan, li che al vîf il nestri poete, leterât, insegnant e om di grande culture, candidât par ben dôs voltis tai agns Otante al premi Nobel pe leterature.
– A son 40 agns che al mancje pre Bepo Marchet; se al podès fâi Lui une domande bot e sclop, ce i domandaressial dopo 40 agns che no si viodês? «Ce ti parial dal Friûl di vuê? Tu che tu lu âs insumiât intun ciert mût, aial puartât indevant ce che tu tu pensavis che al puartàs indevant o isal lât pai trois?».
– Voaltris doi o vês condividût un moment storic impuartanton pe rinassite dal Friûl dopo de vuere: ce aiar jerial in chei agns? «Chei agns a jerin come une ete adolessensiâl dal Friûl, une Primevere: un moment li che si cjatave inmò alc di crei, ma si tacave ancje a viodi a svilupâsi i prins butui di un gnûf Friûl. O jerin ducj plui idealiscj. Si pensave in tiermins di aspirazion, cuntun spirt diviers, un entusiasim e une voie di fâ che nus puartave a crodi intun Friûl che al podeve jessi difarent di ce che al jere stât».
– Ce mancjal di chei agns in dì di vuê? «Cualchi aspetative no si è dal dut realizade, ma ce che al mancje pardabon vuê al è chel spirt ideâl. In chei agns si lavorave ducj cence seconts fins, cun dut che la clime no jere par nuie favorevul: si cjatavisi a confrontâsi cuntune politiche che no capive i dirits dai Furlans. La nestre anime di popul, la nestre culture, la nestre lenghe no jerin acetadis e al jere il risi di jessi mangjâts di une culture taliane che no tignive cont de realtât de nestre regjon. Chenti la int e je di culture sedi furlane sedi taliane. Di simpri la nestre e je une culture di popui , che no pues no visâsi ancje de culture dai paîs confinants: no si pues acetâ un fanatisim furlan che nol ten cont di cheste realtât di confin e di convivence ancje cui popui todesc e slâf. Marchet al veve za marcât che il Friûl nol podeve sierâsi, ma al veve di vierzisi e lâ dacuardi cui popui e cu lis culturis confinantis».
– Cence il rûl de Glesie, ce saressial stât de cuestion furlane? «Pôc e nuie. Ancje in altris tieris, a son stâts i predis in gran part a dismovi i popui e lis cussiencis, par vie che dome lôr a jerin inlidrisâts te societât e a cognossevin pardabon la int. Pal passât o podìn ricuardâ Jaroni Sini, che al à scrit il sonet in laude de lenghe furlane, o Vuarneri di Dartigne: a jerin predis. O ancje la nobiltât. Chestis dôs classis sociâls a vevin une consapevolece de grandece de culture e de storie dal Friûl. Il popul, magari cussì no, al veve di scombati par vuadagnâsi di vivi. E je ancje stade une classe di inteletuâi, ma plui leade ae Italie come cussience culturâl e linguistiche e dut câs elitarie. Ma a jerin i predis, che a cognossevin ben il popul».
– E dal om Bepo Marchet, ce ricuart aial? «Di une persone fuarte che si scjaldave ma e veve la sô ironie; e po al jere un bon om, e umil».
– Ce confront vevial cun lui: ce volevial dî contindi, resonâ cun lui? «Lui al veve chescj concets ben clârs e definîts: il sens de autonomie, il rispiet dai popui di dongje e une critiche fuarte al nazionalisim talian. Par lui chescj concets a jerin vite e no un esercizi di retoriche».
– Trop coventaressial un come pre Bepo in dì di vuê? «Al coventarès tant pal so ecuilibri: Marchet al jere un che al tignive in stangje i valôrs di fonde, cence pierdisi vie. No crôt che si sarès lassât tirâ dentri intune autarchie furlane culturâl e materiâl. Lui al jere consapevul de grandece de culture dal Friûl, ma al jere viert e convint che la specialitât dal nestri Friûl, no veve (e no à nancje vuê) di jessi un limit, un sierâsi».
– In chescj agns si è tant scrit, fevelât e ricuardât di pre Bepo: isal alc inmò tasût che al à voie di dî? «In lui a convivevin sedi l’om di Glesie che al veve di ponisi in posizion di critiche cuintri cierts ecès de societât, sedi un spirt libar, che no i à dât cualchi problemut cu la autoritât eclesiastiche. Cheste sô libertât inteletuâl no lave tant dacuardi cu la cuintri-riforme e l’antimodernisim di chei agns. Il dut si è risolt cul Concili Vatican II (sierât tal 1965), ma lui nol à podût gjoldilu par tant».
– Ce disaressial pre Bepo di chest Friûl, che tal 1976 al à scugnût passâ ancje pal montafin dal taramot? «I sarès dal sigûr displasût un ciert egoisim, un individualisim che al è vignût fûr ta chescj ultins agns. Al jere un che al cjalave lontan e no i piçui interès dal singul».
– I plasaressial? «Dal sigûr no i sarès plasude la cuintriposizion che si viôt tra furlans, impegnâts dispès plui a barufâsi che no a strussiâ pe cause comune. Lui nol jere par un associazionisim di maniere , ma tal stes timp al voleve tignî dongje la int intun sisteme plui larc».
– In ce si fondie la ereditât inteletuâl di Marchet? «Si pues cjatâle tai siei scrits, salacor marcant i concets che ancje culì o vin ricuardât».
– Cui in dì di vuê le aie cjapade sù pardabon? Al è une vore dificil cjatâ un erêt pre Bepo. Ma cjalant il patrimoni spirituâl, inteletuâl e culturâl che nus à lassât si pues dî che i depositaris des sôs ideis o sin ducj noaltris furlans di vuê, che o vin di cjapâ sù i siei principis morâi e fâju deventâ no materie di museu, ma nestre semence di vite».
Christian Romanini
Beh ancje vue e jerin un par di robis su majan sul menzognero no?
L'articul complet publicât sul Friuli tal Dicembar 2006:
Il pinsîr di Josef Marchet
A distance di pôc timp de sô scree, la golaine di studis sul autonomisim, edite dal Istitût ladin furlan di Coder di Sedean, e je za rivade al numar nûf: di fat al jere il 2002 cuant che in ocasion dai trente agns de muart di Fausto Schiavi, esponent di ponte dal Moviment Friûl, al jessive il prin volum dedicât al pinsîr dai grancj autonomiscj de nestre regjon. E cumò al è a pene stât presentât l’ultin, pal moment, che al à tant che protagonist pre Josef “Bepo” Marchet, om di glesie e inteletuâl come pôcs che masse adore, cuarante agns indaûr, al à lassât chest Friûl, inmò vuarfin di une figure che puedi cjapâ il so puest.
Par capî miôr il significât di chest ultin libri, ma ancje di dute la golaine, progjet realizât cul jutori finanziari de Regjon Friûl – Vignesie Julie, o vin fevelât cun William Cisilino, il president dal Istitût ladin furlan. Lis sôs primis peraulis a son stadis di ringraziament: prin di dut ai protagoniscj de golaine che cu lis lôr ideis e la lôr fuarce a son stâts pardabon ponts di riferiment pe nestre regjon, no dome te lôr ete, ma ancje pes gjenerazions che a son vignudis dopo; e un altri ringraziament lu à fat a Gianfranco Ellero e Geremia Gomboso, diretôrs di cheste golaine, che cun passion e ispirazion a son lâts a tirâ fûr no un sempliç e frêt studi agjografic, ma a àn rivât a cjatâ fûr scrits, se no inedits, une vore râr e scuasit dismeteâts, che a àn fat tornâ a vivi cun vivarositât la vôs sclete di chescj grancj autonomiscj furlans.
Se chescj elements si cjatin in dutis lis oparis presentadis ta chescj cuatri agns, il discors al vâl in particolâr tal volum numar nûf dedicât a Bepo Marchet. “L’autonomia culturale di Giuseppe Marchetti” al met adun i intervents che il grant furlanist al veve presentât dal 1946 al 1949 su la “Patrie dal Friûl”, il storic gjornâl che lu veve viodût protagonist insiemit a Feliç Marchi e Maria Del Fabro.
Tantis voltis no jerin firmâts, ma la olme di chel penâl e jere inimitabil e nol è stât dificil ta chês peraulis dispès cence non ricognossi la fuarce, la scletece, il coragjo e la grande paronance de lenghe furlane, doprade no dome cuntun stîl pardabon gustôs, ma ancje cuntun regjistri une vore alt, a conferme che lenghe furlane e pues jessi un imprest che ben si preste a frontâ ancje concets complès e une vore tecnics come che a testemonein chescj documents di pre Bepo Marchet sul concet di autonomie culturâl.
“La fuarce e la elegance des sôs peraulis a son inmò disarmantis in dì di vuê e forsit nissun al varès nancje cumò il coragjo di scrivilis come che lis à scritis lui» al comente William Cisilino «Ogni intervent al devente un element inluminant che no si rive a dismenteâ e, par fâ dome un esempli, o pues ricuardâ chel intitulât “Cui nus liberaraial des liberazions?”, li che pre Bepo Marchet al fâs un atac frontâl cuintri de retoriche nazionalistiche, in particolâr chê taliane: peraulis che probabilmentri dome lui al podeve permetisi”.
Cence gjavâ il gust a chei che a leiaran chest e i altris titui, sedi chei passâts sedi chei che a vignaran, William Cisilino nus presente il rest de golanie che, dopo dal za ricuardât numar un dedicât a Schiavi, e passe in ressegne une vore di nons storics dal autonomisim furlan: Gino Di Caporiacco, Tiziano Tessitori, Arnalt Baracêt, pre Checo Placerean, Nelso Tracanelli, Pier Paolo Pasolini, bonsignor Luigi Faidutti e pre Bepo Marchet, apont.
“O vin spietât il numar nûf, no parcè che si jerin dismenteât di lui” al specifiche Geremia Gomboso “ma parcè che o vin volût rindi un just omaç a pre Bepo Marchet tai cuarante agns de sô muart”.
Ma chest lavôr no si ferme achì «O sin une vore contents di chest lavôr” al comente William Cisilino “parcè che, ancje cuntune cierte sorprese, in tancj nus domandin di vê lis copiis e chest nus conferme che la golaine e je une vore preseade e diviers numars a son bielzâ esaurîts: par chest o vin in prevision di meti i tescj “on line” tal nestri sît www.istitutladinfurlan.it». I letôrs di chescj libris a son no dome ativiscj che magari a àn vivût in prime persone chei agns, cognossint cualchidun dai protagoniscj, ma ancje zovins e gnovis fuarcis che si svicinin al pinsîr autonomist “E chest al è par nô il stimul plui grant par lâ indevant» al dîs William Cisilino, che nus da ancje une anticipazion su la prossime jessude, che cun dute probabilitât e sarà une antologjie che e metarà adun plui vôs intune uniche publicazion”.
Nus ven naturâl domandâsi ce che al disarès vuê pre Bepo Marchet par comentâ la gnove vivarositât autonomistiche che e semee jessi vignude fûr tai ultins agns.
Pre Marchet al jere un om di culture, che al voleve dâ il so contribût pal disvilup dal patrimoni culturâl furlan: la analisi de lenghe furlane a tresintesessante grâts (de poesie, ae creazion di un gjornâl, passant pai studis di linguistiche e gramatiche), la storie e il studi dal patrimoni artistic a jerin i cjamps preferîts des sôs ricercjis. E su cheste fonde si moveve ancje la sô azion plui “politiche”. Ma pre Bepo Marchet al jere prin di dut un inteletuâl, che al è rivât prin di tancj a madressi za in chê volte ideis inmò atuâls. E duncje ancje se al varès viodût cun plasê il fat che di cierts argoments che lui al veve a cûr si discuti forsit di plui vuê di in chê volte, cun dute probabilitât al varès mote cualchi critiche al mont de ricercje e dai studis su la culture e la lenghe furlane “Di une bande al sarès content” al siere William Cisilino “ma di chê altre al varès centant ce dî...”.
Christian Romanini
Posta un commento