MUSICHE FURLANE FUARTE su Telefriuli

E tache domenie ai 11 di Jugn, a lis 20.30, une gnove trasmission di Telefriuli in lenghe furlane. Il program, ideât di Giorgio Cantoni, si clame "Musiche Furlane Fuarte, un program di musiche vive" e in sîs puntadis, de durade di une ore, al proponarà i concierts di une schirie di grups musicâi, cjantantis e cjantants, fra i plui vivarôs de gnove musiche furlane: ARBE GARBE, PANTAN, FABIAN RIZ, MADRAC, DEK ILL CEESA, JONOKOGNOS, PRISKA, TUBET & PANSELECTA, PARAFANGOS, BRUT & MADONE,
SILVIA MICHELOTTI e KOSOVNI ODPADKI.
I concierts, realizâts dal vîf intal studi di Telefriuli, a son
presentâts di Mojra Bearzot, che cul jutori di Dek ill Ceesa, Albi Zanier e Leo Virgili, jenfri un toc e chel altri e interviste i
musiciscj su la lôr musiche, i tescj des cjançons, la sielte di
esprimisi par furlan, i lôr progjets musicâi e discografics e tant altri.
In ogni trasmission al sarà ancje un cjanton dediât ai libris par furlan, cun servizis realizâts ator pal Friûl cun Giusi Gubiani e Stefania Nonino che a lein cualchi tocut e a discorin sui libris.
Il program, realizât di zovins e indreçât a un public zovin, al vûl meti in evidence la impuartance fondamentâl che intai ultins agns e à vût la musiche par svicinâ lis gnovis gjenerazions a la lenghe furlane.
Il messaç che chescj musiciscj a pandin al è chel che une culture no si pues difindi cul romanticisim, cu la nostalgjie pal Friûl di une volte, cuntune cierte filologjie pes peraulis plui arcaichis, ma fasintle vivi tal presint cun esperiencis che a puartin la lenghe stesse a confrontâsi cul mont globalizât.
Par fâ juste cualchi esempli: i Arbe Garbe a son stâts invidâts, tal mês di Otubar, inte Laponie svedese al "Liet International", il plui impuartant festival par musichis tes lenghis minoritariis europeanis.
I Kosovni Odpadki a àn vinçût il mês passât il "Mantova Music Festival" e a son stâts invidâts, tal mês di Avost, a Budapest pal "Sziget Festival", il plui grant festival musical estîf in Europe. Madrac al à di pôc realizât "Real", il prin cd di musiche furlane disponibil in rêt, par intîr, sui principâi servizis par discjamâ musiche.
Musiche Furlane Fuarte, che al è stât finanziât de Regjon Friûl Vignesie Julie cui fonts pe lenghe furlane, al larà in onde su Telefriuli daûr di chest calendari:
- domenie ai 11 di Jugn: Parafangos e Pantan
- domenie ai 18 di Jugn: Fabian Riz e Silvia Michelotti
- domenie ai 25 di Jugn: Kosovni Odpadki e Priska
- domenie ai 2 di Lui: Dek ill Ceesa e Brût & Madone
- domenie ai 9 di Lui: Arbe Garbe e Tubet & Panselecta
- domenie ai 16 di Lui: Madrac e Jonokognòs