Al tache Sgarfefurlans

Une gnove trasmission su Radio Onde Furlane e in colaborazion cu la Comunitât Culinâr dal Friûl di Mieç, e tacarà lunis ai 2 di Jugn a 10 e mieze di buinore: si clame Sgarfefurlans e e fevelarà dai furlans che Loris Vescovo (tal mieç te foto) al è lât a cjatâ in Australie e in Asie. Un apontament par fâsi une idee de emigrazion furlane di vuê intune bande dal mont che e je pardabon lontane. Par plui informazions, fracait chi.

Il Dree al siere

Mi àn coventât 2 dîs par ripiâmi: la notizie e je di chês che a scjassin.
Il Dree (te foto) al anuncie di volê sierâ il blog. Ancje se dome par cualchi mês il Furlanist si cjape une polse: al à di tirâ flât.
Ma la conclusion dal ultin (pal moment) post e lasse cualchi preocupazion: "si ri-viarzarà al 1 di otubar, dopo ancje Friuli Doc, par tornâ plui fuarts di prime o par il mandi definitîf ;-)".

Us plasial?

Sul gjornâl di vuê e je la foto de simulazion dal gnûf tor di Maian. Ce disêso?

Superego in cuviertine!

A sun di bati, no dome la stampe locâl mi cjape come font di notiziis.
Adiriture o soi sbarcjât in Americhe concuistant la cuviertine di une des plui famosis rivistis di là vie.
No pario bon? Eheheheh

Create Fake Magazine Covers with your own picture at MagMyPic.com

Maian in Prime

La A.S.D Majanese e à concuistât la promozion in prime categorie: al sô President Renzo "Gardo" Natolini e a dute la societât i miei compliments! Bulos!!!

Biele e vonde!

Aldo Rossi me veve fate scoltâ in anteprime l'an passât intune biele sere di Istât.
Ogni volte che le scolti mi vegnin i sgrisui come ta chê sere. Brâf Alduti!

Fieste de Filologjiche

Si ten vuê te Concje di Tumieç la "Fraie de Vierte", ven a stâi la fieste di Primevere de Societât Filologjiche Furlane, un dai apontaments plui impuartants dal an. E sarà ancje la ocasion di consegnâ ai corsiscj i atestâts di frecuence pai cors 2008.

Par viodi dut il program, fracait chi.

Fieste tra Amîs

Domenie di fiestis e sagrutis. Une nus ven sagnalade de Ninine: la fieste tra Amîs a Vissandon.
Chi in bande la locandine de fieste.

Donazion di plasme

O soi a pene tornât dal Ospedâl di Sant Denêl. Come che o vevi fat sot Pasche, ancje vuê o soi lâ a dâ plasme (no "ont" come che mi veve dit il thermo, duncje: nuie patatis fritis!) parcè il gno grup di sanc (AB+) al è universâl par lis trasfuzions di chest element dal sanc.
Se o podês, lait ancje voaltris parcè che e je une robe che no coste nuie e che e jude tant.
Cun di plui us torne utile ancje a ognidun di voaltris parcè che e je un stimul di plui a tignîsi di cont e a controlâsi.
Par plui informazions, lait sul sît de AFDS. Un mandi al vulcanic President Renzo Peressoni!

Prevendite pai concierts in Pro Majano

Us doi une biele novitât: la Pro Majano e à otignût di fâ di prevendite pal conciert dai Pooh a Maian ai 2 di Avost.
No dome: la Pro Majano e fasarà di prevendite par ducj i concierts di Azalea Promotion che a saran in zone: ve chi la liste des prevenditis li che si cjate ancje il non de Pro Majano. Ca di pôc ancje sul sît de Pro Majano a vignaran fûr lis istruzions plui precisis. Intant o podês telefonâ al 0432959060.

La Universitât e Glesie furlane a ricuardin pre Toni

Vuê la Universitât dal Friûl e Glesie Furlane a ricuardin pre Antoni Beline intune cunvigne su lis sôs oparis e la sô figure.
Pre Antoni al jere stât proponût pe lauree honoris causa e la pratiche e jere za stade vierte e i contâts cul ministeri za cjapât. Ma il destin al à volût in maniere difarente.
Ve chi il comunicât uficiâl de Universitât dal Friûl su la cunvigne.

Mandi Siôr Vicesindic

Cussì lu ai saludât par passe doi agns che o ai lavorât a Tavagnà.
Cussì lu saludi ancje vuê, pe ultime volte.

"O preferìs continuâ a fâ ce che o ami di plui. Vaîsi intor nol covente a nuie".
(Valerio Frezza 29.05.1939 - 19.05.2008)

Fogolâr Furlan di Gjenue

O ai scrit diviers post sui furlans che a son ator pal mont. Cualchidun mi à scrit e mi scrîf dopo che a àn cjatât il blog in Rêt. Chest colp us presenti Daniele Martina, un zovin une vore atîf e che si dâ un grum di fâ tal Fogolâr Furlan di Gjenue. Lu ai cognossût cuant che al è stât in Friûl cirche un an e passe indaûr e cumò dispès si mandìn cualchi email e mi ten informât di ce che al sucêt vie par Gjenue.
Domenie passade Daniele Martina al à partecipât a Limbiate a la assemblee dai Fogolâr Furlans in Italie (te foto fate di Daniele, une rapresentance dai partecipants), li che a jerin ancje Giorgio Santuz, president di Ente Friuli nel Mondo, e l'on. Pietro Fontanini, president de Provincie di Udin.
Daniele Martina al è ancje intervignût cuntun discors che us met tal prin coment.
O pensi che Daniele al sedi une altre conferme di cemût che a son lis gnovis gjenerazions dai Furlans ator pal mont: no si contentin di partecipâ a lis ativitâts dal Fogolâr, ma a cirin, cu lis gnovis tecnologjiis, un contat cu la Patrie e o soi content che tal gno piçul, ancje chest blog al contribuissi a tignî un leam cul Friûl di chenti e il Friûl ator pal mont.

Il Diari di Tosoni

Ve ca la cuviertine dal Diari dedicade ai Tuareg di Purcie.
Par discjamâ il pdf fracait achì.

Al torne Alc&cè

Ve chi, in regâl cu la Vite Catoliche, il gnûf numar di Alc&cè, il gjornalut par fruts dut in marilenghe curât de brave Erika Adami, realizât cul contribût de Direzion centrâl Istruzion, culture, sport e pâs de Regjon Friûl-Vignesie Julie.
Chest colp si fevele de nature che e mude. A tornin i Gnognosaurs, Sclisignûf e Alan l’acuilot nostran cu lis lôr aventuris divertentis a fumets; cence dismenteâ i zûcs. E po tantis ideis pal timp libar.
Par sugjeriments e curiositâts sul gjornalut, si pues scrivi une e-mail a Erika Adami, coordenadore de riviste, ae direzion: adami@lavitacattolica.it

Par discjamâ il pfd, ancje dai numars passâts: fracait chi

La vitorie di Ranieri

Lui mal dîs a mi e jo jal dîs a lui: brâf Ranieri, che al à vinçût la sezion "colôr" e al à ancje cjapât une segnalazion te sezion "blanc&neri" dal concors fotografic di Sant Denêl.
Cun di plui us visi ancje che Ranieri al fasarà une mostre a Cjasesole te prossime fieste dal sport.
Inmò compliments, Ranieri! Chei di Farle a son propit bulos!!! ;-)

Gnûf lavôr

O tachi une gnove aventure professionâl e o ai di fâ cualchi ringraziament.
Par prin o ringrazii il President Renzo Tondo parcè che mi à clamât disintmi che mi voleve te sô segretarie, fasintmi une biele e grande sorprese.
Par secont o ringrazii il Comun di Tavagnà pe biele esperience che o ai fat in cuasi 2 agns e mieç di lavôr li dal Sportel pe Lenghe Furlane. O amet che il lavôr mi plaseve une vore e mi à displasût lassâlu, ma no podevi rinunciâ a une ufierte che no sai tropis voltis che mi sarès tornade a presentâ.
Par tierçs o ringrazii ducj chei che mi àn clamât par congratulâsi e augurâmi "Bon lavôr", ma ancje chei che, massime sul blog, a àn cirût di stiçâmi dantmi ancje sorenons pôcs simpatics: o soi cussì content di cheste gnove oportunitât che mi è stade dade che no ai nissune intenzion di fâmi ruvinâ la fieste.

La Patrie cu la Mame

Al è jessût l'ultin numar de Patrie dal Friûl.
Il "Speciâl" di chest mês al è dedicât a la Mame.
Par vê il pdf, fracait chi.
Par fâ l'abonament (un an, 11 numars):
25,00 euros (pal forest 30,00 euros) sul cont corint postal n.12052338 intestât a "LA PATRIE DAL FRIÛL" Glemone

Fieste dal Sport a Cjasesole

Mi è rivât il program de prossime fieste dal sport a Cjasesole (te foto di Ranieri, che o ringrazii, la cusine de sagre).

Buinegnot

Thermorubriche: resons logjistichis

Cheste volte Thermonuke nus segnale une letare che il Sindic al à scrit ai gjenitôr.
Us met chi sot il test e il coment dal Thermonuke.

Termo al scrîf:
Cheste e mertares un post a se, e ancje une interogazion:

Comune di Majano
Area Socio Assistenziale
Prot.009390 del 08.05.2008

Ai genitori dei bambini della Scuola dell'infanzia Istituto Comprensivo Majano-Forgaria
33030 Majano - UD

Oggetto: Centro Vacanze integrato anno 2008.-

Gentilissimi genitori,

desidero comunicarvVi che per l'anno in ocrso l'Amministrazione Comunale in collaborazione con l'istituto Comprensivo di Majano e Forgaria, Associazioni e Gruppo locali organizza il centro vacanze integrato.
Alcune attività sono dedicate, anche ai bambini di 5 anni. Per informazioni telefonare allo 0432/416256 (Centro vacanze "L'isola del tesoro").
Per quanto riguarda i bimbi più piccoli, per problemi logistici quest'anno non e' stato possibile attivare il centro estivo.
Tuttavia nell'amibto della collaborazione tra Enti, l'Asilo Nido del Comune di Ragogna ha dato diponibilità ad accogliere anche i Vs/bimbi, dal 07 luglio al 01 agosto e sono a disposizione per informazioni allo 0432/957255 (Ufficio Segreteria-Barbara).-

Cordiali saluti.

Il sindaco
Caludio Zonta


Perfet e tempestif no?
Ragioni logistiche !?!?! si sono dismenteats di perimetra le aree ???!!!
Parceche se une copie e va a vore e a puarte i fruts al asili o al nido nol e ciert par gust di parchegjaiu nomo?
E alore cui che al rive si rangje in famee o cun bebisitters etc etc, chei altris ?!?!?
Cui che l’an passat (une cuarantine mi par) al podeve conta sun t’un servizi cumo ce fasial?
Si tacone nomo?
Anzit no, al puest di la a Lignan al po la 23 dis a Ruvigne ae fin di Lui!!
E alore che code no lara su che agnele come che ti plas justifica a ti ma evidentementri se di une bande si viot un grant impegno e di che altre si viot un torna indavor su servizis che jerin al e il segno che ciertis sieltis di strategje e di prioritats e son stadis fatis!!!
Di questa storia poco normale
E' presto fatta la morale
Vai (poco) a Ragogna se vuoi il sociale.
Qui prima cosa vien l’ospedale
Di arcata ben tardo medievale
E per il resto ti devi arrangiare!!
Alla faccia del premio citta a misura di Bambino!
Estate a Majano? Perche NO!!!

Frico a Lavarian

Passant par Lavarian si pues vê la sorprese di cjatâti tal mieç de... Cjargne! Eh sì, no ai sbaliât di scrivi: tal marcjât de sabide e jere une barache cul frico di siore Catine, cjargnele doc. E stant che al frico no si resist, si sin fermâts a gustâ: frico e polente! E po o ai mangjât ancje un tocut di formadi frant.
E come che si viôt te foto (grazie ae Ninine pe colaborazion) al jere dut bon!

Auguris Mame!

Vuê e je la fieste de mame e jo o fâs i auguris a la mê e a dutis lis mamis!

Ospedâl Langobart sul gjornâl

Vuê sul gjornâl a son 2 articui che a fevelin dal "ospizi dal cavalîrs di Sant Zuan di Jerusalem" e dal so racupar (te foto, la jentrade de gleseute che e je denant dal sît).
Chest progjet al è stât plui voltis argoment di discussion tra minorance e maiorance, sui gjornâi cun letaris di citadins e ancje su chest blog si à fevelât tant (cjalait chi, chi, chi e chi).
Al è clâr che la nestre comunitât e à tantis necessitâts e par cualchidun al sarès plui impuartant risolvi altris cuistions, ma secont me, stant che si à rivât a vierzi cheste strade pal finanziament dal recupar e la valorizazion di cheste struture, al è impuartant continuâ, puartant indevant un progjet che o pensi che al podedi tal avignî jessi sfrutât come atrazion turistiche no di pôc.

Auguris Europe

Vuê e je la zornade de Europe, stant che ai 9 di Mai dal 1950 Robert Schumann al presentave la Declarazion che e puarte il so non.
E alore: Tancj auguris Europe, par che deventis simpri di plui Europe dai Popui, grancj e piçui!

Bentornade Bikerfest!

La fieste dai Motârs e torne in Friûl dopo cualchi an in Cjargne. A Osôf dai 5 ai 8 di Jugn fiestone tal Parc dal Rivelin!
Scusait, ma cumò o ai di lâ a lustrâ lis cromaduris de mê belve!

A Aldo i scjampe...

Aldo Rossi (te foto) nol à rivât a tignîle e i è scjampade une... curte!
Dopo de cuistion de publicazion dai redits su Internet (che cumò e je stade fermade dal Garant de Privacy, ndr) al veve cjapade cjarte, pene e ghitare par realizâ la sô ultime cjançon di denuncie: Peçots dal Friûl.

32 agns dal Orcolat

1976. E jere une sere cjalde dal mês di Mai... che no varessin dismenteât mai.
Fracàs e rudinaçs.
Polvar... tant polvar.
Un recuie par chei che no àn plui viodût il soreli.

Ultime dì di scuele

E someave tant lontane, ma ancje cheste volte e je rivade la ultime dì dal cors di lenghe furlane che o vin tacât trê mês indaûr.
Ancje se o varès di jessi jo il mestri, no sai parcè ma mi sint invezit come un arlêf, un student che al à imparât tant di cheste esperience.
E reste la sperance di vê rivât a lassâ ai corsiscj, plui che cualchi regulute (che si varès podût lei di bessôi), almancul la gole di cognossi simpri di plui la nestre lenghe, la voie di tignî dûr, la fuarce di continuâ... Parcè che un Friûl cence lenghe furlane al sarès dome une espression gjografiche come tantis altris.

La Crôs dal Friûl... E je achì!

Dificil di contâ ce che si sint dentri. Une vore dificil.
A viodi dutis chês crôs inflochetadis (cjale chi la foto), metudis in cercli di front de Crôs Mari di Sant Pieri in Cjargne, ti si sglonfe il cûr pe emozion. No je dome une cerimonie religjose. Al è un rituâl antîc, no vieri. Vieri al è ce che al è passât, antîc al è ce che al manten la fuarce des lidrîs simpri vivis di un popul. E intant che il Prevost di Zui lis clame, lis crôs a rispuindin "E je achì!", testemoneant che in 700 e passe agns che si ripet cheste tradizion, vuê come îr, la int a sint la fuarce di rimpinâsi fintremai sul Plan de Vincule par viodi la bussade des crôs e preâ inte nestre lenghe.
Pardabon une cerimonie sugjestive, cuntun soreli timit, ma simpri li a tignîti compagnie intune zornade che e reste tal cûr. E intant che o ven vie cuntune serenitât che no vevi di timp, o cjali jù pe val de Bût, un panorame che ti gjave il flât.
E po si domandisi parcè che la Cjargne le clamin la mari dal Friûl...

Pooh a Maian

Ai di 2 Avost dal 2008 a saran in conciert a Maian grazie a la Pro Majano.

Pooh - Uomini Soli

Sagre des crôs a Zui

Come ogni an, la dì de Sense e sarà la cerimonie une vore sugjestive des crôs de Cjargne che a fasin omaç lant a bussâ la crôs mari di Zui.
Pre Toni Beline i tigneve une vore a cheste zornade e, ancje cuant che nol veve podût partecipâ lu ricuardave: ve chi un biel intervent che us torni a proponi ancje chest an, fracait chi.

Grazie!

Beh, ce dî?
Dome "Grazie" a ducj, che o sês in tancj!
90mil voltis "Grazie"!

La gnove Zonte Regjonâl

Sul blog dal President de Regjon, o cjatìn i nons dai prossins assessôrs regjonâi. O soi content pe jentrade tal esecutîf di Claudio Violino (te foto), Roberto Molinaro, Vladimiro Kosic, Vanni Lenna e Elio De Anna, che o ju ai viodûts a lavorâ e ju stimi tant che personis e politics.
Su lis delighis però o varìn di spietâ lunis, cuant che e sarà la prime riunion de Zonte.

Un secul dal papà di Don Camillo e Peppone

Vuê al è un secul che al è nassût Giovannino Guereschi, l'autôr di Don Camillo e Peppone, che al reste un dai miei cines preferîts. Chi us propon une des senis che mi fâs plui ridi in assolût! :-D