Apel di firmâ e mandâ al Comitât 482

Us met achì l'apel dal comitât 482: baste copiâlu, sot scrivilu cun non cognon e comun di residence e mandâlu ancje par pueste eletroniche a com482@libero.it.
Jo lu ai za fat

PE DIGNITÂT E PAL AVIGNÎ DE LENGHE FURLANE
PAI DIRITS DI DUTIS/ DUCJ

A undis agns de Leç Regjonâl n.15 dal 1996 e a cuasi vot di cuant che e je stade fate buine la Leç 482 dal 1999, i timps a jerin e a son madûrs par un proviodiment di bande de Aministrazion regjonâl dal Friûl Vignesie Julie che al tegni cont cun serietât dal impuartant argoment dai dirits linguistics dai citadins che a fasin part de comunitât linguistiche furlane.
Un proviodiment che al compuarti il coordenament e la razionalizazion des normis che a son in cheste materie, cul fin di rindi cierte e eficace la tutele, tignint cont dal detât costituzionâl e dai documents di indreçament sedi de Union Europeane sedi dal Consei de Europe. E che al consideri cun di plui il caratar de presince de comunitât di lenghe furlane tant che fonde pe stesse esistence de Regjon autonome a statût speciâl Friûl Vignesie Julie.
Magari cussì no, juste ae fin di un iter che al puartave a sperâ ben, la Zonte regjonâl e à licenziât un dissen di leç che al jentre in plene contradizion cu lis dibisugnis parsore marcadis, e ancje cu lis liniis di indreçament fatis buinis pôc timp prime e cul test consegnât de Comission di esperts, clamâts a prontâlu.
Chest Ddl si palese a clâr incostituzionâl in ciertis sôs parts e cence coerence interne; si è intervignûts cul sisteme dal taie e incole mudant un test, chel de Comission di esperts, dât dongje in maniere coerente e meditade.
Si è cun di plui lâts indenant cul pleâsi in maniere no spietade denant di une impostazion che e cubie ignorance provinciâl, sborfade cu la tecnocrazie e l’eficientisim, e un nazionalisim talian che nol rive a concepî il pluralisim linguistic e culturâl. Altri che risoluzions dal Parlament european, altri che Cjarte europeane des Lenghis regjonâls o minoritariis o Convenzion cuadri des minorancis nazionâls! Chi o sin ae solite culture de Italietta dal Vot-Nûfcent.
Par chel che al rivuarde la funzionalitât, no un dai problemis presints, començant di chel scolastic, a son disgredeâts cun chest test. Al contrari ae confusion si zonte confusion: te scuele, tai uficis publics, tal cjamp dai media, e v.i.. Si ignore la pussibilitât di fâ de lenghe furlane un element di inovazion, creant professionalitâts e puescj di vore cualificâts.
Il cuadri gjenerâl che si olme al è fintremai chel di un tornâ indaûr, di un meti in discussion i elements di politiche linguistiche inviâts in chescj dîs agns: si gjave fuarce parfin aes normis relativis al ûs de grafie uficiâl.
Dut chest cul subordenâ in mût pesant lis sieltis di politiche linguistiche, che a compuartin une serie di cognossincis specifichis, aes variazions de politiche tout court, parcè che l'organisim di politiche linguistiche al sarès la stesse Zonte regjonâl. Cualsisei riferiment al model galês, declarât tant che ispiradôr di chest test, al pues someâ fintremai une provocazion par cui che al cognòs pardabon i risultâts grues otignûts de politiche linguistiche in Gales
Ae fin, se e je vere, come che e je vere e come che al è stât declarât dai massims esponents de Zonte, che lis lenghis furlane, slovene e gjermaniche a son la fonde de autonomie e de specialitât regjonâl, une leç metude dongje in chest mût e je un atac diret ai motîfs che a rindin plausibile la esistence dal Friûl Vignesie Julie; sedi parcè che a ‘ndi inderede la coesion sociâl, sedi parcè che e gjave argoments par contradî cui che nol viôt motivazions reâls par mantignî la sô specialitât tal cuadri des regjons talianis.
In ogni câs vê judizi al vûl dî tornâ indaûr des decisions faladis, scancelant chest Ddl.
Il test consegnât de Comission di esperts al è un bon test, ni visionari ni estremist; ae Zonte e a dutis lis fuarcis politichis o disìn che di chest si à di tornâ a partî, par miorâlu e rindilu plui eficaç, calcolant ancje i aspiets inovatîfs contignûts tes propuestis di leç su la scuele presentadis ae VI Comission e tignint presint la sô finalitât: la tutele e la promozion de lenghe furlane.
Aes democratichis e ai democratics di ogni paîs e localitât, a cui che al à a cjâr, parie cun ducj i dirits, i dirits linguistics, in mût indipendent de sô marilenghe o de lenghe che al dopre, ur domandìn di sotscrivi chest apel, discjamâlu di Internet, fânt copie, discutilu in public. O fasarìn parie un bon servizi al pluralisim linguistic, patrimoni preziôs di dute la umanitât.


com482@libero.it Comitât – Odbor – Komitat – Comitato 482

Consei comunâl a Maian

Vinars ai 29 di Jugn (Fieste di SS Pieri e Pauli, patrons dal paîs... ma no si podevial fâ intune altre dì?!?) aes 18.30 al è Consei Comunâl: ve chi l'ordin dal dì.
Jo o ai presentât cualchi interogazion che us metarai dentri tai coments.
Intant us anticipi dome i argoments domandâts:

1. cuestion dal incuinament di Sant Liseu
2. internet e aministrazion publiche
3. interreg e plurilinguisim
4. cuel dal fum
   

e o 'nd ai firmade cualchidune altre cun altris conseîrs.
Ancje chest al sarà un consei comunâl une vore lunc.

I amîs dal Faf

Ve ca la foto cui amîs dal Faf: sentât dongje di me Bruno Colledani di Spilimberc, ancje colaboradôr de Patrie e che ta cheste foto al è content par vê vinçût la clavute USB dal quiz dal mês. Jo o soi rivât secont e mi àn dade la maiute.
Come che o viodês te foto, ur ai ancje consegnât il numar de Patrie dal Friûl dedicât a pre Toni.

Vuê o jeri a Triest in audizion de Comission VI

Vuê pe prime volte o soi jentrât te aule dal Consei regjonâl li che la Comission VI (te foto, il president Kristian Franzil tal mieç) e à convocât ents e istituzions par cjapâ sù i parês in mert aes propuestis di leç di tutele sul furlan. Lis associazions a jerin tal dopomisdì e jo o ai stât in rapresentance da "La Patrie dal Friûl" e o soi intervignût disint cussì:

O ringrazii la Comission VI pe ocasion che nus dâ di fevelâ e dî la nestre su lis propuestis di leç pe tutele de lenghe furlane. Ma dopo i ringraziaments o scuen ancje manifestâ dut il gno malstâ par cheste situazion.
Lu dîs parcè che se jo o fos responsabil di ce che al è stât fat cu la propueste di leç 257 "Norme per la tutela, valorizzazione e promozione della lingua friulana" (propueste de Zonte Illy, ndr) mi sintarès ridicul e mi vergognarès.
Sedi pe metodologjie che prime si da une incjarie a un grup di esperts che di agns a lavorin tal setôr e dopo si fâs dut altri, sedi pal risultât dal test che cussì come che al è, dopo che il test origjinari dai esperts al è stât parât a tocs cu la manarie e cul bisturi, nus puartarès indaûr a prime dal 1996.
Su lis cuestions juridichis, che dal sigûr a son stadis frontadis ancje vuê di matine, mi fermi su la cuestion de lenghe standard e des varietâts. Jo o feveli la mê varietât di Maian, ma cuant che o ai di scrivi, o dopri la lenghe normalizade che o ai imparât dai libris. Anzit propit di cuant che o ai imparât lis regulis par scrivi o ai imparât a cognossi e a preseâ dutis chês altris feveladis locâls che prime no cognossevi. E duncje vê une uniche lenghe scrite nol è un probleme, ma anzit un vantaç ancje pes feveladis locâls che sot di chest "cuviert" a son plui protetis. E lu dîs ancje come operadôr linguistic che ogni dì sul teritori al è usât a vê a ce fâ tra lenghe fevelade e lenghe scrite.
Dut câs, tornant aes propuestis di leç, ancje se la cuestion e je gjenerâl, mi permet di fevelâ in particolâr de scuele e o invidi il Consei a cjapâ in considerazion une propueste ben precise: jo o concuardi cu la posizion esprimude de propueste sotscrite dai Conseîrs Violino, Guerra, Baiutti e Zorzini, par un inseriment curiculâr dal insegnament de lenghe furlane a scuele. Dome cussì si varà un risultât. E a chest proposit us lei une relazion che cualchi an indaûr al veve fat il nestri diretôr pre Toni Beline, fevelant propit de impuartance dal insegnament de lenghe locâl a scuele: "La impuartance de scolarizazion inte lenghe dal cûr" (e jù che o ai let dute la relazion, cirche 25 minûts di intervent)

Dut l'intervent al è stât par furlan.

La Zonte Illy nus taie la lenghe!

Come che forsit za o savês cualchi dì indaûr la Zonte Illy e à fat bon il dissen di leç che e varès di tutelâ la lenghe furlane integrant la L.R. 15/96 (Normis pe tutele e la promozion de lenghe e de culture furlane), tignint cont ancje de jentrade in vore de Leç 482/99 (normis in cont di tutele des minorancis linguistichis storichis).
La Regjon e veve nomenât une Comission di esperts pe scriture di chest dissen di leç, ma il test fat bon de Zonte Illy al è stât savoltât rispiet al origjinâl, cussì tant di risultâ un pas indaûr rispiet ae normative statâl e regjonâl in vore in dì di vuê. Lassant pierdi la cuestion metodologjiche (prime si nomene une comission e dopo si bute par aiar lis sôs conclusions), lis modifichis fatis a àn produsût un test incoerent e in cierts articui, adiriture anticostituzionâl.
Noaltris operadôrs linguistics o vin il "dovê" di informâ la int di ce che che al è daûr a sucedi, su cheste situazion che e met in pericul lis concuistis dai ultins 10 agns di politiche linguistiche. L'obietîf al è chel di rindi publiche la nestre proteste: i timps a son strets ma alc di pues inmò fâ. Cumò la discussion dal dissen di leç e passarà in Consei Regjonâl, e o volìn fâ capî a cui che al varà di decidi, ma ancje ae popolazion, che la uniche decision pussibile e je chê di aprovâ il test origjinâl, così come che al è stât formulât de Comission di esperts.
Chest document, che o cjatais chi sot, al è stât firmât no dome di operadôrs linguistics furlans, parcè che il probleme al è regjonâl, nol rivuarde dome la lenghe furlane ma dute la politiche linguistiche dal Friûl-Vignesie Julie, e dut il sisteme des minorancis linguistichis regjonâls.

UNE PROPUESTE INDECENTE
Ta chestis setemanis la Zonte Illy e à fate buine une propueste di leç regjonâl che e varès di conventâ a tutelâ la lenghe furlane, rinfuarcint e integrant la Leç 15 fate buine de Regjon F.V.J. tal 1996.
O doprìn il condizionâl parcè che, par come che le viodìn nô, no je vere che si trate di une leç che e permetarà di miorâ la situazion de nestre marilenghe.
Noaltris operadôrs linguistics, che o lavorìn tai ents locâi e teritoriâi, e che ogni dì o vin a ce fâ cu la situazion dificile che la lenghe furlane e je daûr a vivi, o crodìn che la lenghe furlane e vedi bisugne di intervents seris e no di sflocjis!
Une propueste di cualitât e jere stade preparade di un grup di esperts che a vevin lavorât par mês, metint dongje un test che al leve te direzion juste: afermazion dal dirit di podê doprâ il furlan in ogni situazion; la presince di un orghin tecnic responsabil de politiche linguistiche regjonâl (ARLeF) che al varès vût di lavorâ cun serietât e continuitât; une scuele metude finalmentri tes condizions di podê dâ une istruzion plurilengâl ai nestris students, come che za e previôt la Leç statâl 482/99... E la liste des riformis positivis e varès podût lâ indevant inmò.
Invezit NO! Parcè che la Zonte Illy e à fat capî che chestis robis lis judiche “masse” pe nestre lenghe, e e à decidût di butâ par aiar il lavôr di mês e mês di int che e lavore di agns a pro de lenghe furlane, e di intervignî in maniere pesante sul test!
Noaltris operadôrs dai sportei linguistics o vin confrontât i doi tescj e si sin rindûts cont che, se ta chescj agns a jerin stâts fats tancj pas indevant, cun cheste gnove propueste di leç il Friûl al fasarès un salt indaûr di passe 10 agns: e je stade fintremai taiade la definizion dal ûs de lenghe furlane come di un dirit!
Il nestri interès nol è politic, ma al è chel di tecnics che a lavorin intal setôr de promozion linguistiche, cussients des problematichis che a son tal meti in vore lis normis di tutele, ma convints che si à di lâ indevant e no indaûr.
Ce che al à stât fat bon de Zonte regjonâl nol va ta chê direzion. Si trate di un pas indaûr rispiet ae leç statâl di tutele des minorancis linguistichis e ancje rispiet ae politiche europeane ta chest setôr.
Al è ancjemò timp par comedâ i erôrs fats e par chest e je bisugne che il Consei regjonâl al torni sul test de propueste fate indenant dai esperts. Al è impuartant l'impegn di ducj par lâ ta cheste direzion e par convinci i conseîrs regjonâi a cjapâ cheste strade.
Se cussì nol ves di jessi, al è ben che ancje lôr si visin che ca di cualchi mês si varà di lâ a votâ, e i furlans a varan di meti sul plat de belance ancje l'impegn che lis fuarcis politichis, sedi a centriçampe sedi a centridrete, a àn metût par difindi la lenghe furlane e dut il patrimoni plurilengâl, unic vêr element che al justifiche e che al fonde la specialitât de nestre regjon.
Forsit lis elezions no si vincin dome cu la tutele linguistiche, ma i nestris politics a àn di rindisi cont che, cence i furlans e il furlan, al è facil pierdilis.

Alessandro Carrozzo, sportelist di lenghe furlane
Christian Romanini, sportelist di lenghe furlane
Elena Zanussi, Ex sporteliste di lenghe furlane
Federica Angeli, sporteliste di lenghe todescje
Federica Mecchia, sporteliste di lenghe furlane
Isa Dorigo, sporteliste di lenghe furlane
Laura G. Lazzara, sporteliste di lenghe furlane
Lorena Zuccolo, sporteliste di lenghe furlane
Maria Grazia Lacovig, sporteliste di lenghe furlane
Maurizio Biasizzo, sportelist di lenghe furlane
Priscilla De Agostini, sporteliste di lenghe furlane
Rosalba Della Pietra, sporteliste di lenghe furlane
Rossella Malisan, sporteliste di lenghe furlane
Sara Cuomo, Ex sporteliste di lenghe furlane
Sara Maieron, sporteliste di lenghe furlane

Il timp parsore il Friûl

Cualchi sagome si divertìs a fevelâ di previsions meteo, ma tornant al seri us segnali il servizi di previsions regjonâl che al permet di vê a cjase dute la situazion dal timp: al baste compilâ chest modul.
Al sarès biel che ancje i gjornâi di chi a doprassin chest servizi in lenghe, stant che al è dut pront e no ur costarès nuie: cumò no son scusis.
Jo lu ai metût tai leams chi in bande a çampe.

Leç di tutele e efiets economics

Une cunvigne sui efiets economics e ocupazionâi

des leçs di tutele pe lenghe furlane

martars ai 26 di Jugn a Colorêt di Montalban

Esperts e rapresentants des istituzions

clamâts a confrontâsi de cooperative Serling

Ce vuelial dî invistî te tutele de lenghe furlane? Otignî risultâts linguistics o ancje ricjadudis concretis pal teritori in direzion di un so disvilup economic? A chestis domandis e cirarà di rispuindi la cunvigne «Efiets economics e ocupazionâi des leçs di tutele pe lenghe furlane», inmaneade de cooperative Serling in colaborazion cul Servizi pes Identitâts linguistichis de Regjon Friûl Vignesie Julie e cul patrocini de Comunitât culinâr dal Friûl, che si tignarà martars ai 26 di Jugn, li de sale cunvignis dal cjistiel di Colorêt di Montalban, tacant des 9 e mieze di matine e vierte a ducj i interessâts. A vignaran presentâts i risultâts di une ricercje puartade indevant de Serling sui efiets economics e ocupazionâi de tutele dal furlan, a saran ospits che a presentaran la situazion ocupazionâl e economiche derivade de politiche linguistiche in Catalogne, in Gales, in Sardegne e li dai ladins des Dolomitis, a intervignaran alts rapresentants des istituzions e des realtâts plui interessadis par chest aspiet in Friûl, par esempli di chei ents che a gjestissin une part significative dai fonts publics a pro dal furlan o che a rivin a vê lavoradôrs dipendents inte lôr ativitât pe marilenghe.

Une riflession necessarie intun moment culminatîf pal avignî de lenghe furlane. A son aromai plui di dîs agns che si pues dî che e je tacade une politiche linguistiche pal furlan poiade des istituzions publichis: al è dal 1996, di cuant che la Regjon Friûl Vignesie Julie e à fate buine la leç 15/96. Po dopo e je rivade la leç 482/99 dal Stât.

«Fâ politiche linguistiche – al dîs Alessandro Carrozzo, president de cooperative Serling – al vûl dî spindi, o miôr invistî, bêçs publics par vê un risultât: tal nestri câs, al à di jessi il recupar de lenghe furlane, che si oten cun obietîfs tecnics. Tra chei plui imediâts si à di meti: fissazion de ortografie e de lenghe di riferiment, elaborazion di struments linguistics tant che dizionaris e coretôrs, publicazion di tescj di cualsisei sorte par furlan, elaborazion di struments didatics, insegnament tes scuelis, emission di programs radiofonics e televisîfs, ûs dal furlan te aministrazion publiche, in pocjis peraulis dut ce che al covente par fâ cressi il corpus e il status».

In chescj agns, intune maniere o intune altre, si è rivâts a diviers obietîfs tecnics di chei metûts in liste, ma i risultâts si otegnin cu lis personis e lis personis a puedin lavorâ ben se a son lis cundizions economichis e professionâls par stâ sigûrs e par cressi. In struc, par Carrozzo: «I bêçs publics invistîts te lenghe furlane no àn dome di puartâ risultâts linguistics, ma ben – e propit par garantî une cualitât di chei risultâts e un sparagn des risorsis – a àn di vê ancje efiets economics e ocupazionâi». Daûr di chescj resonaments la cooperative Serling, che e sta sù propit su la professionalitât dai operadôrs linguistics dal furlan e che par cumò e rive a tignî cuatri lavoradôrs dipendents stabii, e à organizât la cunvigne a Colorêt di Montalban.

Chest il program: si tacarà aes 9 e mieze di matine cui salûts des autoritâts – il president dal Consei regjonâl, Alessandro Tesini; l’assessôr pes Identitâts linguistichis e culturâls, Roberto Antonaz; il president de Arlef, la Agjenzie regjonâl pe lenghe furlane, Lorenzo Fabbro; il president dal consei di aministrazion de Comunitât culinâr dal Friûl, Lorenzo Cozianin –, si passarà po al aprofondiment dai efiets economics e ocupazionâi de planificazion linguistiche in Friûl – presentâts di Linda Picco de cooperative Serling – e in altris comunitâts linguistichis minorizadis in Europe: di chê galese e di chê catalane e fevelarà Maite Puigdevall, linguiste dal Ciemen, il Centri internazionâl pes minorancis etnichis e lis Nazions di Barcelone; de realtât de Val di Fasse Sabrina Rasom, linguiste coordenadore dal Ufici di politiche linguistiche e culturâl de Comunitât di Fasse; Diego Corraine, espert di politichis linguistichis, al scrutinarà la situazion de Sardegne.

Daspò il gustâ, aes 2 e mieze daspomisdì, spazi ai intervents dai rapresentants des istituzions cun plui personâl dipendent in relazion cu la lenghe furlane: pe Regjon Friûl Vignesie Julie al fevelarà il diretôr dal Silce, il Servizi pes Identitâts linguistichis e coregjonâi tal forest, Marco Stolfo; pe Provincie di Udin William Cisilino, dirigjent de Unitât operative lenghe furlane e altris identitâts storichis; pe Provincie di Gurize la assessore aes Comunitâts linguistichis Roberta Demartin; pe Universitât dal Friûl Alessandra Burelli dal Cirf, il Centri interdipartimentâl di ricercje su la culture e la lenghe dal Friûl. Po dopo a cjaparan la peraule – tant che rapresentants des struturis privadis cun plui personâl dipendent in relazion cul furlan – Feliciano Medeot, diretôr de Societât Filologjiche Furlane; Antonio Buiani, president de societât cooperative Informazion Furlane; Alessandro Carrozzo, president de cooperative Serling. I ultins intervents a puartaran la atenzion dai scoltadôrs su lis prospetivis pe lenghe furlane tal mont de scuele – e intervignarà Rosalba Perini dal Ufizi scolastic regjonâl – e tal setôr dai uficis, in particolâr pai operadôrs linguistics di sportel, di chest e fevelarà Federica Angeli, operadore dal Silce. Lis conclusions de cunvigne lis fasarà Ernesto Liesch, espert di problematichis legjislativis e aministrativis tal setôr culturâl.

Belenos e la tradizion di Sant Zuan

Par passâ une biele serade a Martignà: vuê aes 18. Par viodi ben l'invît, fracait su la imagjin.

Fieste dal Pressut

E cun vuê e tache la Fieste dal Pressut a Sant Denêl.
Pe inaugurazion e je stade clamade Valeria Marini, che in cont di pressuts mi pâr che no sin mâl... ;-)

Grazie a Carlo e Luca!

Chê altre sere o ai vût grant plasê e onôr di viodi in anteprime il tierç documentari di Farcadice, dedicât ae migrazion furlane (zone di Tor di Zuin) jù in Sudafriche (Umkomaas).
Compliments a Carlo Della Vedova e Luca Peresson che a àn fat un lavôr bielon e emozionant.
Te foto Carli cu la videocjamare e Luca impegnât te interviste.

Grazie Carli e grazie Luca par dut ce che o vês fat e par vêmi dade la ocasion di partecipâ a chest progjet! Grazie grazie grazie: mi vês fat un grant regâl, ma soredut lu vês fat a ducj i furlans!

Us visi che o podarês viodi "Farcadice: Umkomaas (Sudafriche)" a Felet ai 8 di Avost tal parc de Vile dai Tinins, in ocasion de iniziative di Cine sot des stelis. Us spieti a Felet.

Viaç te fede e tal mît

Tierç e ultin incuintri a Tavagnà li dal Centri Civis
La Odissee di Omêr Joibe ai 21 di Jugn aes 20.30

Odissee
Caricato da christianromanini

Par secui Omêr al è stât un pont di riferiment fis pe leterature ocidentâl. Inte vision tradizionâl de culture, cun Omêr e tache la leterature greghe, e tache la leterature classiche, e tache la leterature europeane. I grêcs par prins a ricognossevin in Omêr la lidrîs no dome de lôr epiche, ma di dute la lôr civiltât. La traduzion de Odissee par furlan, fate di Sandri Carrozzo e Pierluigi Visentin e je la prime opare classiche voltade dute par furlan dopo che il gurizan Bosizio al veve voltât la Eneide par furlan tal Sietcent.

Sandri Carrozzo al è laureât in letaris classichis e al à frecuentât diviers cors specifics par tradutôrs e par lessicolics in lenghe furlane. Al à insegnât e al insegne in cors di lenghe furlane un pôc par dut il Friûl.

Discjame il file dal sfuei informatîf.

Prime de presentazion a saran distribuîts i atestâts ai corsiscj che a àn frecuentât il cors di lenghe furlane "Cemût si scrivial?"

21e BIKER FEST:IL PLUI SPETACOLÂR RADUN MOTÂR IN EUROPE

RALLY & ROCK FESTIVAL a Sudri (Udin) – A-23 jessude Cjargne-Tumieç

La edizion 21 de Biker Fest, il plui spetacolâr motoradun european, si davuelzarà dai 21 ai 24 di Jugn li de aree de Mont çoncolan, in comun di Sudri (Udin); un event storic, une manifestazion uniche tal so gjenar che, di an in an, e continue a clamâ dongje a ogni edizion desinis di miârs di personis che a rivin di ogni bande dal mont (chest an a saran ospits dai Stâts Unîts, Canadà, Australie, Santo Domingo, ma ancje de Russie, Ucraine e Moldavie). Il puest dal incuitri ideâl di ducj i motârs europeans, a cjaval di chopper, custom, naked o streetfighter che a sedin, un univiers colorât, un mont par so cont che si torne a cjatâ e al devente protagonist par cuatri dîs par an, dîs fats di incuitris internazionâi, novitâts, curiositât, musiche, amicizie, fradilance e solidarietât.

Il Bike Show al previôt i premis plui siôrs mai metûts in pali intun Bike Show european e la partecipazion dai plui impuartants costumizers internazionâi. Ta cheste edizion a saran ufierts 3 viaçs ae Bike Week di Daytona 2008 e altris premis bielons ai proprietaris des miôr motos tes categoriis Chopper U.S. Engine, Custom U.S. Engine, Chopper, Custom, Bobber, Café Racer, Naked, Streetfighter, Classiche, Full Dresser, Speciali e Best in Show. Dal 1996 fin vuê a son stâts distribuîts sîs viaçs complets e disesiet biliets di avion, cun destinazion la Bike Week di Daytona, in Floride.

Ancje par chest an la lotarie e met in pali une sflandorose Honda Shadow Spirit 750! Pal passât a son stadis vinçudis ae lotarie siet H-D Sportster, dôs Yamaha Drag Star, une Moto Guzzi Breva, une Moto Guzzi California Special, dôs Custombike, trê Honda Shadow 750 e une Kymco. Cun di plui la HONDA Italia Uficiâl e sarà presint par ufrî al public demo ride cun ducj i gnûfs modei e cors di vuide sigure par ducj, comprindûts i minôrs di etât.
Chest an ancje ARCTIC CAT cui siei Quad multiûs al darà la pussibilitât di provâ i siei innomenâts cuadriciclis.
Come simpri la colone puartant di chest event e sarà la musiche: di agns a montin sù sul palc band e personaçs innomenâts tant che Ronnie James Dio, Kim Brown, Creedence Clearwater Revival, Status Quo, Uriah Heep, Dr. Feelgood, Sweet, Alvin Lee, Whitesnake, Motörhead, Soon, Rats, Yardbirds, Animals, Canned Heat, Wishbone Ash, Blues Pumpm, Alex Sure Band, Trutz “Viking” Groth, Ten Years After, Kim & The Cadillacs, Saxon, Twin Dragons e Tony Martin (Black Sabbath), Andrea Braido, Uli Roth degli Scorpions e Jaime Dolce... Sieltis che a pescjin tai stîi e tai ritmis classics dai mestris mondiâi e fûr di discussion dal Rock e dal Blues.
Ancje chest an la Fieste dai Motârs a viodarà protagoniste la musiche cun Paul Di’ Anno, il prin cantant dai Iron Maiden,e cun tantis tribute band di Rock Heavy Metal (cjale il program).
Come di tradizion de Fieste dai Motârs, no mancjaran lis spetacolârs e entusiasmantis esibizions dai Dragster, dai Stunt Men Internaziozâi, cul famôs Ricky Angerer (D) e dal Motocross Freestyle cui FMX International (I) come ancje i spetacui acrobatics, i divertents bike game, ma a saran ancje i esuberants Burn Out di Udo Bracht (D), kart, ape race, trike, sidecar e un contest pai motoveicui plui stranis... No mancjaran ancje lis elezions des Miss, il sexy bike show internazionâl cun Justine, i cors di vuide sigure, e vie indevant. Spazi ancje pai passionât di aerografie e tatuaçs; e po cetancj barachis par compra di dut: dai vistîts di piel ai ogjets indians, dai cjapiei ai acessoris par moto e tant tant di plui.

Par cui che al ame i viaç e la discuvierte di altris popui, ae Fieste dai Motârs a podarà cjatâ diviers motocicliscj che par cheste ocasion a contaran lis lôr entusiasmantis esperiencis di viaçs in ogni bande dal mont, de Indie ae Cine, de Irlande ae Siberie. Pai passionâts di culture indiane invezit e je une novitât assolude: pe prime volte la Fieste dai Mortârs e ospitarà une part dal museu storic sui natîfs di Americhe dal siôr Biscotti Enrico di Orvieto.

Events tal event
Cun di plui domenie a buinore al è di no pierdi la 12. US CAR REUNION, storic radun di machinis americanis, li che si podarà rimirâ cetantis machinis a “stars and strips”, che si esibiran ancje in garis di regolaritât (www.uscarreunion.it) e il radun nazionâl di RIVS – regjistri talian di veicui storics – al sarà presint cuntun stand di pueste, par dâ conseis su lis sigurazions agjevoladis pai veicui storics imatricolâts prime dal 1987.

Cun di plui al sarà pussbil partecipâ a ativitât di interès sociâl come chês inmaneadis dal Coordenament Mototocicliscj, de associazion DISMO (Dimensione Sigurece in Moto – Disabii in moto) e de Associazione Motociclisti Incolumi, che a sensibilizaran i presints su argoment sune vore seris e cjalts che a fasin patî il motociclisim e i motocicliscj disabii, come la sigurece su la strade, lis omologazions e lis patentis speciâls. Cun di plui, presints de Belgjiche, de Gjermanie e de Italie i pastôrs motârs protestants.

Us visìn che la Fieste dai Motârs e rapresente ancje une otime ocasion par fâ un san mototurisim e par cognossi miôr la Regjon che le ospite, il Friûl – Vignesie Julie (www.turismo.fvg.it). Di fat, logade tal cûr de Cjargne, e permet di visitâ localitâts di grant interès culturâl e naturalistic, museus e bielecis storichis e ancje di preseâ la innomenade tradizion enogastronomiche; par fâ vivi in maniere complete l'event, a saran inmaneâts zîrs turistics e enogastronomics. Pe prime volte chest an al sarà presint ae manifestazion www.terredimoto.it, sodalizi che al ponte al disvilup di un sisteme integrât tra events/aveniments tradizionâi di promozion e acet turistic e servizis e iniziativis studiadis di pueste pal turist su dôs rovedis, cu la finalitât di fâ cognossi lis particolaritâts teritoriâls, storichis e culturâls e la splendide morfologjie dal Friûl, midiant dal comun denominatôr de passion pes motos.

Altris comunicâts stampe specifics (ancje in altris lenghis), e ancje materiâl audio, video e fotografic, a puedin jessi domandâts al Ufici Stampe.

Par info diviersis e su Bike Show e Stand (+39) 0432.948777; fax (+39) 0432.948606
e-mail: info@bikerfest.it – sito web: www.bikerfest.com

GRANDE DISPONIBILITÂT di ALBIERCS
Par hotel e acet: +39/(0)433-778921 - info@albergodiffuso.org - (Albierc Difondût di Sudri);
Par hotel e acet e curis termâls (Termis di Darte): +39/(0)433.929290 – arta@infocarnia.org - (Carnia Welcome)
Par altris informazions turistichis e par mototuriscj: www.terredimoto.it – www.turismo.fvg.it

Il Diari di Mauro Tosoni: Jugn

Ve chi la cuviertine dal DIARI-mês di Jugn.
Cui che al à voie di vê une copie di cjarte al pues vignî a cjolilu li dal Sportel pe lenghe furlane di Tavagnà. Al è a gratis!

VTC in Cjargne: la trasmission di Marino Plazzotta

Us ai za fevelât di Marino Plazzotta, gno amì e colaboradôr sedi de Patrie dal Friûl, sedi di Video Tele Carnia.
Cheste e je une pontade de rubriche televisive che e va in onde su la emitent che si cjape dome in Cjargne o su internet.
Jo i ai domandât a Marino di fâ la rubriche par cjargnel e no par talian e o speri tant che dopo di cheste pontade, al continui cussì!

Par ridi cul gno amì Romeo

Romeo balonîr de Cjargne
Caricato da christianromanini

Par cui che no lu cognòs: us presenti il gno grant amì Romeo Patatti, comic, cabaretist, intratenidôr, par ducj cognossût come il Balonîr de Cjargne! Une persone uniche, bon e simpatic, cuntun cûr grant plui de mont Mariane!
Fasìnsi une ridade scoltat un tocut in musiche che al à regjistrât tal so prin CD.
Cui che al volès vê i 2 CD (o cassetis) di barzaletis o il libri o invidâlu in cualchi sagre o fieste, o podês clamâlu al numar 043392437 o 3396639561.

Romeo al è a stâ a Dimponç, ma cu la Cinccent nol sta trop a vignî jù in Furlanie.

In ricuart di pre Toni

La Provincie di Udin e à inmaneât vuê matine une biele cunvigne par ricuardâ pre Toni.
Ogni volte che o pensi a lui, mi monte sù une rabie che no dîs.
Trop che al varès podût inmò dî e fâ, o ancje dome conseâ.
Il Friûl al è plui puar, ma la piês robe e je che no si rint cont.
La plui part de classe politiche si free dai furlans e magari cussì no i furlans no si rindin nancje cont... E sarà ancje vere che cul furlan forsit no si va ator pal mont, ma a di chei che a disin cussì jo o domandi, come che al à dit il pari di un gno amì, "Dulà vadial il Friûl cence la lenghe furlane?"
Pre Toni, met une man sul cjâf di chei che a àn di decidi pal nestri popul e fasiur une gracie par che si rindin cont che copant la nestre marilenghe, a copin il nestri popul.
Fasiural capî prin che al sedi masse tart!

LA UNIVERSITÂT E CONSEGNE I ATESTÂTS

Cuarte edizion dai cors di “marilenghe” destinâts ai dipendents de aministrazion publiche

Si consegnaran vuê vinars ai 15 di Jugn, a misdì, inte sale dal Consei di Palaç Florio, in vie Palladio 8, a Udin, i atestâts di partecipazion ae cuarte edizion dai cors di lenghe furlane, prontâts dal Centri interdipartimentâl di ricercje su la culture e la lenghe dal Friûl (Cirf) de Universitât dal Friûl. A cjaparan part ae cerimonie il retôr Furio Honsell e la diretore dal Cirf, Piera Rizzolatti. Si previôt l'intervent dal president de Societât Filologjiche Furlane, Lorenzo Pelizzo, e dal vicepresident de cooperative Serling, Antonio Buiani, che a àn colaborât ae realizazion de iniziative.
La iniziative e je stade inmaneade cui fonts de leç 482/99 su la tutele des minorancis linguistichis storichis. I cors, gratuits e su cinc nivei, a son destinâts ai dipendents des aministrazions publichis, ma dut câs a son vierts a ducj i interessâts tant che uditôrs. L’obietîf dai cors al è chel di dâ continuitât di bande dal Ateneu ae formazion linguistiche di meti in vore tal ambient lavoratîf, e in particolâr, intai ents publics.

Gardoland: 3 dîs di sport e divertiment

Seconde edizion di green fest sport: di vuê fin domenie tal parc de culine di front di Gardo.

Furlan obligatori a scuele: une oportunitât par cressi

Il gno amì Janez Erat, che us ai za presentât, mi da la ocasion par fevelâ dal insegnament dal furlan a scuele.
Jo o soi convint che fâlu jentrâ tal program scolastic come lenghe par insegnâ materiis diviersis (ûs veicolâr de lenghe) e ancje insegnâlu une ore par setemane, al fasarà cressi i fruts de nestre regjon cuntune oportunitât in plui.
Se lu dîs jo, forsit cualchidun mi da dal fanatic, ma provait a scoltâ Janez, che al sa 10 lenghis e sô fi (3 agns) al è za su la buine strade.
Un apel ai politics: scoltait chestis peraulis!!!
Grazie Janez!

furlan obligatori
Caricato da janez_si

Piçulis grandis sodisfazions

Cheste e je la interviste a Elio De Capitani (Compagnia dell'Elfo di Milan), un impuartant regjist che al à diret "I Turcs tal Friûl".
Pauli Cantarut lu à clamât par domandâi un parê su Donald dal Tiliment, il radiodram in onde su Radiorai 1 regjonâl. Cualchi part di cheste interviste e je lade in onde îr intune trasmission di Tullio Durigon.
Un grazie a Elio De Capitani.

Interviste a Elio De Capitani
Caricato da christianromanini

Compliments a lis frutis dal Volley

La scuadre di volley feminin di Maian e à vinçût il campionât di seconde division e il prossim an e zuiarà in prime: chi in bande la targhe premi pe vitorie dal campionât.
Compliments pal sucès! Bravis!

... e za che o soi, ancje lunis

Domenie cun Vasco...

Une flabe che mi à fat propit zirâ i cjarsons...

Al jere une volte un cavron che, fermât li dal laip in place, al viodè un mus che si svicinave.
Prin che i disès alc, il cavron lu à cjalât e si è metût a ridi disinti “Mandi bec!”
Il mus, di grîs che al jere, al è deventât di ducj i colôrs e cidin cidin al à zirade la code e al è lât cun chê che al jere vignût.
Mi zirin i cjarsons cuant che il cavron i dîs “bec” al mus e inmò di plui mi zirin cuant che il mus i continue a lâi dongje a chel cavron che al varès dome di tasê e stâ peât tal tamar.
Ma chel che mi à fat zirâ di plui i cjarsons al è il vilan, che viodût a rivâ te stale il mus dut avilît i à dit “Sù su no stâ a avilîti”... Ma dopo invezit di dâi une legnade al cavron a pene che i capitave a tîr, il vilan al è lât a cirîlu e i à puartât une biele bale di fen di chel plui bon e profumât.
E chest a lis pioris no ur è lât masse ben e ancje a mi no mi plâs come finâl de flabe.
La miôr robe e sarès chê di dâi une legnade al vilan, al cavron e ancje al mus, ma stant che no si pues, cui mi judial a gambiâ il finâl de flabe e a inventânt un plui just?

Donald sot procès

Cualchi zornade indaûr us ai conseât une leture e une trasmission di scoltâ: Donald dal Tiliment.
Dopo cualchi letare e cualchi comunicât sul gjornâl par criticâ la iniziative, cumò o ven a savê che martars la Rai e à clamât in radio i responsabii de produzion:

Donald dal Tiliment: opare di art o turpilocui? Interviste di Tullio Durigon cul autôr Stiefin Morat e Pauli Cantarut (Informazion Furlane, produzion). Al interven Elio De Capitani (regjist che al à ancje diret i "Turcs tal Friûl", Teatro dell’Elfo). Martars ai 12 di jugn Radiorai 1 (FVJ) a lis 13.30 (dopo la 22e pontade)

No je pâs par un puar razut: SANGO BASTART!

Auguris E!!!

Vuê o ai savût che si maride une mê amie. O soi propit content e i auguri ogni ben.
Congratulazions E. e une bussade!

Zornadis furlanis a Traversetolo

Ancje se no si lu cjate scrit di nissune bande (se no che sul sît di Traversetolo), chest fin setemane a saran lis zornadis furlanis a Traversetolo.
O ringrazii la Pro Majano, che come simpri e je la vere anime des iniziativis dai rapuarts di amicizie cul comun emilian.
Jo o ai decidût di no lâ jù par une schierie di motivazions che o disarai ca di un pôc.

Une brute notizie - inzornaments

Dopo cualchi zornade di calme, vuê si à tornât a lei lis de cuestion che nus à tocjât come comunitât juste cualchi zornade indaûr.
Personalmentri no ai rivât a fâmi une opinion e une robe che mi à dât pardabon fastidi e je stade la maniere che la stampe e à gjestît chest câs. Se e fos vere al sarès ce sgrisulâsi, ma se no fos vere cualchidun al varès di metisi la man su la cussience e cjapâsi la responsabilitât di ce che al è stât scrit.
Jo o ripet: no doi judizis e o lassi che lis fuarcis dal ordin e la magjistrature a fasin la lôr part.

Viaç te fede e tal mît

Prin incuintri a Cjavalì li de gleseute di Sant Lenart
I mosaics di Aquilee – Aule Nord Joibe ai 07 di Jugn aes 20.30
I mosaics de Aule Nord, che si cjate sot dal tor de basiliche, a saran mostrâts in video-proiezion dilunc de conference. A tegnin i segrets di une vision particolâr dal cristianisim, chê gnostiche, e a insegnin cun simbui il percors che la anime e veve di fâ dopo de muart par tornâ intune cu la plenece di Diu. Il professôr Renato Iacumin al è rivât adore di cjatâ il sens di ducj chescj simbui, incrosant une analisi atente de iconografie, testemoneancis storichis e leterariis.

Par cognossi dut il program, fracait achì

Sangoi a Colonia Caroya

Gnovis di Colonia Caroya
Caricato da friultv

Mi àn dit che a Colonia Caroya al è cualchi Sangoi, che al veve il nono che al jere partît di Maian. Cui sa se a Maian al è inmò cualchi so parint?

Radio FM Comunicar

Radio FM Comunicar (Colonia Caroya)
Caricato da friultv

Cheste e je Radio FM Comunicar, la Radio di Colonia Caroya, un paîs furlan in Argjentine in provincie di Cordoba. O ai cognossût vie mail Claudio Roya che mi à invidât a fevelâ intune trasmission che si clame "Fuarce Furlans". Alore par vuê dopomisdì, aes 17.00, o spieti un telefonade intercontinentâl, sperant che il colegament nol vedi problemis.
Par scoltâ la Radio FM Comunicar e la trasmission Fuarce Furlans (aes 17.00 GMT +1): fracait achì.
Mandi ai Furlans ator pal mont e in particolâr a chei di Argjentine.

Rino Gaetano 29.10.1950-02.06.1981

Fieste de Republiche

Vuê e je la fieste de Republiche taliane. Tal 1946 al fo fat un referendum par sielzi o la Monarchie o la Republiche:
cun 12.717.923 vôts cuintri 10.719.284 e vincè la Republiche (1.509.735 a son stadis lis schedis no validis).
Di cheste sielte, tal 1948 e nassè la costituzion taliane che us invidi a lei, stant che li dal art. 6 e dîs che "La Republiche e tutele lis minorancis linguistichis cun normis di pueste".

Donald dal Tiliment

Di cualchi zornade o ai tacât a lei Donald dal Tiliment, un romanç trastolon di chel trastolon e usmatic che al rispuint al non di Stiefin Morat.
Cheste conte che e dopre un furlan caraibic, miscliçât e imbastardît, e à fat un pôc di scjas, soredut di cuant che e je rivade in Radio su Radiorai.
Un lengaç colorît, sclet, trastolon che al semee che al vedi disturbât cualchidun, ma che invezit al dimostre che al è pussibil sperimentâ doprant la lenghe furlane. A mi mi plâs e us invidi, se no lu vês inmò fat, a leilu o a scoltâlu par Radio. Purtrop la Rai lu mande in onde a un orari dificil: ogni dì di lunis a vinars aes 13.30 ore furlane (GMT+1).

ps:
Piçule note linguistiche dedicade a Chiara, une mê amie che e sta in Egjit: cjapitul III, pagjine 8, e comparìs la peraule magjiche... "il migul".

VE CHI UNE BIELE RECENSION DI LAURIN ZUAN NARDIN