03 agosto 2006

La revision de leç n. 15/96

Vuê al à tacât il so lavôr di revision de leç n. 15/96, il grup nomenât de Regjon: sul portâl lenghe.net ducj i nons.
A son 10 agns che e je stade fate buine cheste leç inovative che e je stade doprade come esempli ancje in altris bandis di Italie, ma che cumò e à dibisugne di jessi inzornade.
Ancje il Furlanist nus vise di chest impuartant apontament.

1 commento:

thermonuke ha detto...

Un aiut a cui nol cjate i toi vecjos post sul cuel (forsite talore decontestualizzas ma une trace par cui c'al ul).

Jo su alc (no su dut) mi ricròt e o fas parzial amende cun te ma o crot che l'epilogo de storie al sedi stat lunis quindi tu fasaressis ben a sclarilu.


Pal Cuel dal Fum, ancje a mi mi pâr un pugn tal voli la situazion di cumò, ma no stin a dismenteâsi che al è inmò viert il cantîr e duncje si à di viodi cuant che al sarà finît. La sfide e sarà cuant che si varà di meti lis plantis e chi jo o propon che al sarès impuartant pontâ a valorizâ la vegjetazion locâl cuntune plantumazion di speciis autoctonis e fâ cussì un zardin botanic tradizionâl: e sarès plui facile manutenzion par vie che lis plantis a son di chenti e no patissin e po e sarès la ocasion par valorizâ la crescite di un progjet ambientât leât ae nestre storie. Tantis critichis mi semein pretestuosis: si à di verificâ la regolaritât de esecuzion, ma par chest al è responsabil il diretôr dai lavôrs. Ciert al è che la presince e je une robe impuartante e se tu sês a Milan al è un tic plui dificil stâ daûr al lis robis, che no jessi chi dongje…17.06
O pensi che jo e stefano o vin cirût la soluzion de condivision. o vin il vantaç dai numars e o podaressin ancje freâsi, ma chest a cui zovial? al intristìs il clime e vonde: çampe o drete, o pensi che l'interès al sedi il ben dal paîs e se i problemis si rive a frontâju cun serenitât dialogant cu la minorance (ognidun tal rispet des rispetivis posizions) al sedi miôr par ducj, o no? Chest nol vûl dî abdicâ al nestri rûl di maiorance e socombi 24.06

chest parcè che plui di cualchidun nol sopuarte che la int no sedi un trop di pioris e al pues ancje capitâ che si cjati chel che al è dificil contâie, no parcè che al sa dut, ma parcè che no si contente de veretât dai "soliti noti", ma si permet di meti in discussion il "verbum".
e chestis personis no mertin nancje di considerâlis: jo o voi indevant pe mê strade e se cualchidun no i va ben, nol è un probleme gno.
i permalôs (e indi è tancj) a varessi di capî (o almancul sfuarçâsi) che la critiche no à di jessi cjapade come un atac personâl, ma come un stimul par cressi e fâ plui ben. ma se cheste e ven di bande di un plui zonvin, spes al da inmò plui fastidi (e se mi è permetût, o feveli par esperience direte).
dut câs, amen, no si contente mai ducj 28/06
mi soi za esprimût achì e di persone disint che il cantîr al è viert e par judicâ la opare si varà di spietâ cuant che dopo tancj agns si podarà doprâ une aree impuartante dal comun. cumò dut chel che si viôt al pues fâ impression, ma o pensi ancje che un tic la cuestion ambientâl e je stade strumentalizade…..sul cuel no ai podût intervignî in consei par vie che e jere une interogazion, ma su altris argoments no ai vût nissun probleme a fevelâ e manifestâ ce che no mi plaseve, par esempli chê robe fate sul referendum. ma no pensi ni di vê copât nissun, ni di vê mancjât di rispiet. o torni a dî: no si à di confondi l'aspiet istituzionâl cul rapuart personâl. dome cussì o pensi che si puedi risolvi i problemis. 28/06
Sì il gno mestri Tondo al à plui coragjo di me: nol sarès li che al è. e propit par cheste motivazion si sintìn spes, cussì o pues domandâi consei e evitâ ciertis falopis che magari o podarès fâ. la politiche e je confront, sedi cu la oposizion sedi cun che de tô bande. ma finide la discussion, no si à di strissinale tant ator, o no? 28/06
e scusait se cualchi volte no soi masse clâr, ma propit parcè che i ten al pinsîr de int, o ai pensât chest blog, nol sarà tant, ma o pensi che chi e sedi une pussibilitât par ducj. 28/06
Sul rest o speri che il gno lavorâ pal paîs al podarà fevelâ plui di tantis cjacaris: o ripet che no mi va di movi puçis tant par fâ casin, ma se alc o varai di dî lu fasarai. 28/06
in comission no jeri e tu sâs dome tu ce che tu âs viodût cun chei altris.
par zirâle e voltâle: cui che al è cence pecjât che al tiri il prin clap... o no?
come che al à dite cualchidun, cirìn di viodi des robis insiemit e lassìn un moment in bande lis polemichis 28/06
chê de assemblee publiche par presentâ il progjet no je une brute idee: si podeve pensâle ancje prime.
Dut câs o provarai a proponile e se la zonte no à voie di fâlu, o vedarìn ce fâ. grazie pal consei

ps: se no tu visis la int, no si pues nancje pretindi che dopo e vegni a scoltâ... 29/06
La posizion di Intesa per Majano e reste critiche e no pensi che nuie al fasarà gambiâ opinion in mert a chest progjet sul secont lot.
par chel che mi rivuarde, o speri che cheste comission e sedi l'ultin pas in chest lot, ma il prin par un percors di condivision pai prossims lots. O ai domandât che prin de conclusion la comission e vedi la pussibilitât di fâ ancje un sorelûc finâl. Pal rest, la minorance e à domandât di fâ un altri consei comunâl par fevelâ inmò de variante, No sai... 29/06
su la assemblee publiche: o resti de opinion che e sedi une buine idee e o speri di rivâ a fâle, ancje se o pensi che al sarès ben che lu presentàs la zonte e no une component politiche. se al ves di conventâ Forza Italia e podarès fâlu bessole, ma o pensi che la cuestion no sarès cjapade masse ben: al varès di jessi l'esecutîf a cjapâ la iniziative 30/06
Lis tematichis ambientâls a son une vore impuartantis a fasin prese su la opinion publiche parcè che i tegnìn ducj a salvâ il nestri teritori.
Ma cuant che o ai let lis acusis che il cuel dal fum al è stât distrut, mi pâr che le vedin dite un tic masse grande. Ciert, un progjet al pues plasê o no plasê e se si veve di confrontâsi prime, chest nol è stât fat avonde. Cumò o pensi che lis posizion no gambiaran: chei che a disin che al è brut, a continuaran a sedi contraris... lis discussions su la place a insegnin che dispès a Maian si fâs cuintriposizion: o cun me o cuintri di me. O speri dome che pal futûr si rivedi, ognidun de sô bande, a frontâ lis cuestions cence prejudizis: il disvilup dal parc e podarès la ocasion juste par meti vie i contrascj di fazion e resonâ maiorance e minorance insiemit su lis soluzions pal ben dal paîs. 1/7
jo o cîr di mantignî il plui pussibil la mê libertât, ancje se o soi cussient che chest status al è simpri in pericul e al covente scombâti dî par dî par difindilu. e tu? 5/7
Vuê aes 18.30 e je convocade la Conference dai Cjâfs grup par decidi dal prossin consei comunâl.
Intesa per Majano dopo de comission ambient, che o ai convocât la setemane passade, e à domandât di fâ un consei dome par fevelâ dal Cuel dal Fum. Jo o pensi che di chest argoment si puedi fevelâ ancje in Consei, ma fâ une sentade di pueste dome par chest, mi pâr un tic masse. Ancje parcè che pe fin dal mês dal sigûr al vignarà fat e si pues fevelâ in chê.
Al semee che cheste propueste no ur vadi ben e che se no fasìn come che a disin lôr, Intesa per Majano e à menaçât di convocâlu jê il Consei comunâl (e je une regule che e permet ai components dal Consei di convocâ une sentade ogni volte che lu domandin, e lôr i numars ju àn).
Us contarai dopo de riunion, cemût che e je lade... 6/7
dut câs o vin fate la conference dai cjâfs grup, ma come che o pensavi nol è vignût fûr nuie di gnûf: ognidun su la sô.
cun di plui la Zonte Comunâl, nus à dit il Sindic, e à za aprovât la variante e probabil za doman a tornaran a lavorâ par finî fûr il lot.
duncje jo o soi dacuardi par fevelâ ancje in consei, salacor fâ ancje une comission, ma rivant sul finî dai lavôrs al sarà o pensi dome un cjapâ at di ce che e sarà la conclusion.
jo o speri che cumò che o vin fat il colegament di abàs fin parsore, pai prossims progjets si rivi a vê une idee plui condividude, magari sintint lis comissions, i conseîrs e soredut ancje la int, prime di tacâ a lavorâ.
ancje chi o speri che a rivin ideis par viodi ce fâ là sù parsore. Jo une idee le ai, ma o spieti di sintî cualchidun altri, scusait ma pal moment o ai decidût di scoltâ (che nol è mai mâl). 6/7
jo o resti de opinion che lis robis a àn di jessi fatis insiemit, o almancul il plui pussibil. il fat al è che par chest lot, lis osservazion a son rivadis in pratiche ae fin e al è dificil meti man a une robe cuant che e je scuasit finide. ce che o vin fat al leve, par jessi modificât dal dut, fat al inizi, ma o torni a marcâ che o fevelìn di scuasi un an indaûr pe ultime comission e di cualchi mês di cuant che a àn tacât a lavorâ. par chel che al sarà di fâ là sù parsore invecit jo mi auguri che si tachi za di subit (e prin di tacâ a disegnâ progjets) a resonâ insiemit su lis soluzions di cjapâ. come che si diseve une volte, no si pues tacâ a fâ la cjase tacant dal cuviert: si à di lâ sù par ordin. se si ves fevelât prime, ciertis polemichis no saressin vignudis fûr. 7/7
Mi soi za visât che chi tal nestri paisut, se un al è masse critic cui siei al devente un traditôr e nol fâs zûc di scuadre... ma a mi no mi interesse di jessi criticât se o fâs cualchi osservazion e cheste e da fastidi: jessi un de scuadre, nol vûl di jessi une piore e dî simpri che al va dut ben. Ma o soi ancje cussient che cualchidun le puedi pensâ in maniere divierse. robis che a capitin 10/7
Invecit o soi achì a puartâ indevant un progjet che o volarès che al restàs dome politic, li che sugjeriments, conseis e ancje cualchi riflession critiche e sedi a pro de cause di Maian e vonde. Magari cussì no, invecit se jo mi permet di fâ cualchi osservazion ancje achì tancj a tachin a acusâmi di jessi un "furbo", un mieç delincuent che al pense dome a fâ dispiets. Il probleme invecit al è che fin cuant che chei che a son a rapresentâ la int a cjapin lis discussions sul plan personâl, o podìn metisi il cûr in pâs che nol gambiarà nuie. Al covente rindisi cont che si pues ancje discori, ma finide la contese politiche, no si à di strissinâ lis robis ancje sul personâl. 17/06
cuant che si dâ spazi libar al dibatit e ae discussion, chest al dâ fastidi. Ancje l'intervent di Mariute mi lasse une vore perplès e mi fâ pensâ che a son in tancj che no condividin il valôr de libertât di espression: tancj a preferessin fâ tasê e no si rindin cont che la int no je stupide e e sa viodi, resonâ e esprimi ce che e pense... e spes ce che e pense nol è propit chel cualchidun si spiete o che al è convint che al sedi. Ma ancje midiant des tantis testemoneancis di solidarietât, o comunichi che chest blog al larà indevant inmò par un biel toc e se a cualchidun i bruse, i darìn un tic di pomade... 17/7
mi pâr che ancje la minorance e veve cualchi foto... jo cu la mê machinute o ai fat ce che rivavi, ma se il Cuç mi mande cualchi altri element si pues viodi di mostrâ alc di plui, ancje se mi pâr che al baste fâ cuatri pas in place... ma chi o sin par informâ e al è just rispuindi. 17/7
Chest lot di lavôrs al covente par creâ un percors friubil pe popolazion in maniere di permeti ae int un acès ae somitât dal cuel.
In buine sostance e je une stradele (e no un autostrade, come che cualchidun al continue a contâle) che di a bas, tacant di li dal cancel che al è dongje dal camput di basket, e va sù drete fin cuant che e tache la rive. Cuant che la rive dal cuel e tache a lâ sù, par rispietâ lis pendencis che a àn di permeti ancje ai disabii di lâ sù (8%) la stradele e va sù pal flanc dal cuel. Chest al à compuartât ancje intervents sedi di moviments di tiere sedi ancje cualchi intervent di muradure che a àn la anime di cls ma che po a varan un rivestiment in clap.
La stradele e à une largjece di 2,5 metris e sarà di un materiâl come di tiere batude. Po a son ancje altris detai come la predisposizion di une iluminazion a basse intensitât (led e faretuts) par judâ ancje la acessibilitât ancje cuant che al ven scûr. Dopo de fin dai lavôrs al è proviodût ancje un inerbiment des areis li che e je stade mote la tiere 17/7
la stradele par daûr e je stade asfaltade no par fâ sù cjasutis, ma parcè che il gravon che al jere prime, ogni volte che al ploveve al vignive jù dut a bas parcè che nol jere batût e no si podeve fissâlu. Cussì si à pensât di meti un tapetut di cualchi centimetri di asfalt che al rive no fin parsore il cuel ma dome subite prime de seconde curve 18/7
Su la assemblee, cence jentrâ tal merit, o soi convint che e je une robe juste: fevelâ cu la int che ti à elet al è sacrosant intune democrazie. Si varès vût di fâle prime ancje noaltris 27/7
a presentaran une cuintri-perizie di variante. No jentri tal mert des sieltis. O fâs dome un pâr di considerazions.
La sielte di fâ une riunion publiche e je juste e secont me ancje noaltris o varessìn vût di fant une, ma cussì nol è stât fat.
Però se la çampe le fâs cumò, come minim mi ven di domandâmi: ma no ise un tic in ritart. Ancje lis cuintri propostis: e je une robe biele che si colabori cun plui ideis, ma no stin a dismenteâsi che aromai la Zonte e à za dât l'ok par tornâ a lavorâ dopo de sospension, e à aprovât la perizie di variante e prin di setembar il cantîr al verès di jessi finît. Fin cumò dulà sono stâts ducj? E che no vegnin a contâme che cu lis elezions di mieç la robe e je passade in secont plan: a àn pûr cjatât il timp di contindi pal cjamput di basket (e mi semee che di chest ancje cualchidun altri su chest blog si è visât...). Duncje o torni a scrivi che cheste cuestion dal cuel e pues plasê o no plasê, ma fant une strumentalizazion cirint di cavalcâ la onde emotive che e provoche la tematiche ambientâl e il fat che dome cumò si tiri fûr dutis chestis storiis mi semee come minin fûr timp massim. 28/7
Jo o ai dit che la sielte di fâ une assemblee publiche e je une robe juste: o ai fate une considerazion sul metodi, sul fat di fâ simpri riferiment ae int par cjapâ decisions. Jo o soi convint che cheste e je une strade juste: le ai domandade, ma nol è stât cjapât chest consei. Però mi semee che cheste azion de çampe e rive un tic in ritart. CERCHIOBOTTISTA no mi riten, ma in politiche intundude come azion di decidi lis soluzions al sedi fondamentâl vê simpri une posizion critiche (tal sens di analizâ ben il contignût des decisions) di ce che si fâs. Cuant che invezit si è masse convints di jessi simpri tal just, e je la volte che si fasin lis capelis. Duncje prime di sparâ sentencis, cjale la situazion tal complès e no sta viodi dome che che ti comude. 28/7
E stant che ancje cualchidun altri mi à fat presint che jo o varès dite che no mi plâs, o ribadìs che jo o ai dit simpri che par viodi il risultât si à di spietâ la fin dai lavôrs e che il cantîr viert al podeve preocupâ par come che si presentave. Duncje no mi semee il câs di meti in bocje di altris peralis mai ditis. Se si à voie di fâ une discussion obietive. Se invezit si à voie di continuâ a tirâ claps, alore dut al è lecit, ma cussì nol è zuiâ coret. Ancje parcè che tu riscjis di fâ brute figure, parcè che la int che e lei lis acusis che tu mi fasis e à il vantaç di podê la a viodi dut ce che al è scrit e judicâ se jo o soi un cerchiobottista tu tu âs dit un sac di monadis... 28/7
su la mê propueste di delibare pe cuestion de telefonie o vin rivât a jessi ducj dacuardi e il document, cul intervent ancje de minorance, al è passât ae unanimitât di dut il consei. No simpri, ma cualchi volte si rive a lâ dacuardi ducj... 3/8