E je jessude la Patrie dal Friûl di Dicembar (www.lapatriedalfriul.org).Jo no fâs tancj coments, ma mi sint di dî dome GRAZIE DI CÛR a Dree Venier par dut ce che mi à insegnât, no dome come gjornalist ma ancje dal pont di viste uman.
Post
2 giorni fa
2 commenti:
Comunicât stampe
Il “mandi” dal Dreetôr
La Patrie dal Friûl (www.lapatriedalfriul.org) e ven fûr cul ultin numar dal 2009 dedicant il “Speciâl” a un teme une vore di atmosfere, “La nêf”.
Ma prin, tal editoriâl, si pues lei une impuartante notizie: Dree Venier al lasse la incarghe di diretôr dopo passe 2 agns a cjâf de storiche riviste in lenghe furlane, che al veve cjapât dopo de muart di pre Antoni Beline. “O ringrazii di cûr (ma une vorone!) ducj chei che a àn colaborât al progjet in chescj agns, metintsi a disposizion la plui part in maniere gratuite e par une passion comun: chê dal Friûl” al dîs il “Dreetôr” che al continue “O vin cirût di fat, di pandi une idee che o vevin in comun: une Patrie vierte a dutis lis personis e a ducj i aspiets dal furlanisim, cence preclusions”.
La Patrie di Dicembar e va indevant cuntune interviste a Nives Meroi, la alpiniste nassude in provincie di Bergamo, ma di vincj agns in ca furlane di adozion.
No dome “Speciâl” e rubrichis che si cjatin ogni mês ma ancje tante atualitât: in particolâr 2 intervistis di Christian Romanini a Luca Campanotto, che al à depositât tes setemanis passadis 3 denunciis cuintri la stampe antifurlane, e a Franco Soldati, president dal Udin, che al à di pôc sotscrit un acuardi cu la Agjenzie regjonâl pe lenghe furlane, pal ûs dal furlan te comunicazion istituzionâl de societât blancje&nere. “O pensi che lis istituzions, tacant de Regjon ma mi riferìs a ducj i nivei, a vedin di continuâ a tutelâ la lenghe furlane metint in vore azions incisivis. Personalmentri o soi favorevul a la difusion e al ûs de lenghe furlane inte scuele, te industrie, tal cumierç… in dute la nestre societât. Mi plasarès che gno fi al imparàs il furlan no dome orâl ma ancje scrit, coniugantlu cun chês altris lenghis” al à dit Soldati che po, a proposit de cuintriposizion tra furlan e inglês, al continue “No à di jessi nissune cuintriposizion: la lenghe furlane e à di convivi cence problemis cun chês altris lenghis. Duncje nol è coret meti cuintri il furlan e l’inglês: in dì di vuê al covente cognossi sedi lis lenghis internazionâls sedi la lenghe furlane parcè che lis nestris lidrîs a son impuartantis”.
Chescj articui a son za visibii sul sît www.lapatriedalfriul.org la che si pues lei ducj i contignûts de riviste fint al mês passât.
Si ricuarde che “La Patrie dal Friûl” si le cjate tes miôr librariis e ediculis o si ricêf a cjase par abonament.
Mandi Dree, grazie di dut!
=)
Posta un commento