22 dicembre 2007

Premi a Luca e Carlo

Congratulazions a Luca Peresson e Carlo Della Vedova (te foto) che a àn vinçût il premi dal cine furlan cun "Farcadice-Diari di viaç", documentaris su la emigrazion furlane.
Farcadice al à 4 pontadis: Colonia Caroya, Charleroi, Umkomaas e Toronto.
Chest l'estrat dal verbâl de jurie:

"[...] Cjapant in considerazion sei Diari di viaç, Charleroi, Belgjiche sei Diari di viaç, Umkomaas, Sud Afriche, la Comission e consegne il premi a:
Farcadice, Diari di viaç di Carlo Della Vedova e Luca Peresson
cun cheste motivazion:
"L'otim nivel di realizazion professionâl des dôs oparis (Diari di viaç, Charleroi, Belgjiche e Diari di viaç, Umkomaas, Sud Afriche) al è compagnât di une sielte atente dai materiâi, di une sensibilitât indiscutibile tal savê condusi lis intervistis, di une composizion de imagjin acurade e elegante che e riclame a di une culture cinematografiche vivarose, e al è metût in evidence par vie di un montaç eficaç, li che il snait, dentri di un progjet cussì complès, al rive a coinvolzi dal dut il spetatôr [...]".

Ju ringrazii ancje par vêmi dât l'onôr di contribuî a chest progjet cuntun gno piçul intervent.
Compliments di cûr!!!

3 commenti:

Christian Romanini ha detto...

MOSTRE DAL CINE FURLAN 2007 X EDIZION, CONSEGNÂT IL "PREMI CINEMATOGRAFIC MARIO QUARGNOLO"
Intant de serade conclusive de Mostre dal Cine Furlan (20 di Dicembar) si è davuelte, li dal "Visionario" di Udin, la cerimonie di premiazion dal "Premi cinematografic Mario Quargnolo" cu la consegne de targhe ex aequo a cuatri autôrs.

La comission, componude di Marcello De Stefano, Carlo Gaberscek, Luca Giuliani e Roberto Iacovissi, e à di fat individuât, dentri de produzion cinematografiche par furlan dai agns 2006 e 2007, plui lavôrs mertevui dal riconosciment.

La Comission pal "Premi Cinematografic Mario Quargnolo", componude di Marcello De Stefano, Carlo Gaberscek, Luca Giuliani e Roberto Iacovissi, dopo di vê visionât ducj i films realizâts in lenghe furlane (cu lis carateristichis pandudis dal regolament dal premi stes) e che a son stâts produsûts tai agns 2006 e 2007, si è riunide ai 19 di Novembar dal 2007 par deliberâ il vincidôr.

Daspò di un lunc dibatiment, la Comission e à decidût di premiâ, ex aequo, chescj lavôrs:

Nûfcent, videosclesis dal Friûl (part II) di Dorino Minigutti

cun cheste motivazion:
"Te suaze di un lengaç storichementri codificât - la regjie di montaç - l'autôr al à savût cjatâ une forme origjinâl di narazion. I materiâi di archivi a son doprâts cuntune cure palese e cul rispiet dal fat storic e des oparis origjinariis stessis. I materiâi di documentazion a son la ocasion e, dut intun, a compagnin la creazion di une trame narative atente a di une rievocazion li che la ande e tint a rivocâ une presince de vôs popolâr.

I tescj di Patui a àn savût frontâ la sfide di meti adun document storic e invenzion, cuntun sens de sintesi costante tant di fâju restâ fedêi a di une cifre tipichementri cinematografic".

Cjapant in considerazion sei Diari di viaç, Charleroi, Belgjiche sei Diari di viaç, Umkomaas, Sud Afriche, la Comission e consegne il premi a:

Farcadice, Diari di viaç di Carlo Della Vedova e Luca Peresson

cun cheste motivazion:
"L'otim nivel di realizazion professionâl des dôs oparis (Diari di viaç, Charleroi, Belgjiche e Diari di viaç, Umkomaas, Sud Afriche) al è compagnât di une sielte atente dai materiâi, di une sensibilitât indiscutibile tal savê condusi lis intervistis, di une composizion de imagjin acurade e elegante che e riclame a di une culture cinematografiche vivarose, e al è metût in evidence par vie di un montaç eficaç, li che il snait, dentri di un progjet cussì complès, al rive a coinvolzi dal dut il spetatôr".

Storiis in cuatri lenghis. Un an tra tradizion e timp presint tal Comun di Malborghet-Valbrune di Erica Barbiani, Sergio Beltrame e Elena Vera Tomasin

cun cheste motivazion:
"Opare che e presente un messaç une vore clâr e di grande atualitât metint in lûs un plurilinguisim partecipât e condividût, in maniere armoniche e mai competitive, te suaze di une comunitât. Il riclam aes usancis e ai costums locâi, no si identifiche cuntun fat folcloristic, ma si propon tant che riferiment a specificitâts che a cjapin sù significâts di resitence cuintri de massificazion e de omologazion li che e pues puartâ la globalizazion di vuê".

Il brigant de Stradalte di Danilo Toneatto

cun cheste motivazion:
"La storie, ben inmaneade, e je tratade cun passaçs clârs e cuntune conclusion risolte. Une buine recitazion, cuntun ûs otim de lenghe furlane, e rive a indicâ e a marcâ la impuartance dal recupar costrutîf dal messaç etic fat di comprension e di solidarietât, valôrs che a coventin in mût particolâr te societât postindustriâl di vuê. Un ûs sensibil dal lengaç fotografic al rive a ricostruî ambientazions de epoche cun moments visîfs che si drecin tant che simbul".

PREMI DAL PUBLIC
Il premi dal public al è invezit lât al film L'amôr nol è brût di verzes di Remigio Romano.

rpontisso ha detto...

Complimentons a Luca e Carlo. Ben meretade.

Robert

Christian Romanini ha detto...

Mandi Robert
Bon Nadâl e Bon Principi a ducj i Furlans canadês!