24 febbraio 2008

La rose de Cuaresime

O sin rivâts in Coresime, a chel timp che ai viei al riclame sardelons e Viacrucis e ai zovins pôc o nuie. Ma al reste un timp impuartant parcè che la Coresime e riflet la lûs de Pasche e duncje e je un timp estremementri "positîf", vîf, stimolant.
Par dâ un sens ancje esteriôr di austeritât, la glesie e tache la Coresime cu la cinise, cence rosis e cul predi a viole.
E biel che o stavi metint sù la planete viole, il pinsîr mi e svualât pal barcon e al è lât a poiâsi tun ricès dal ort, là che la dì prime o vevi cjatade la prime viole. Parcè che a mi il viole de glesie mi riclame propit la viole, chê rosute spaurose che e cuche fûr framieç de jerbe tal prin clip e mi dîs che l'invier al sta finint e la primevere e je za pronte.
Volìno alore dâi a la nestre Coresime il savôr de viole?
Come che la viole e romp la sensazion di muart dal invier, cussì la Coresime e je il prin segnâl di chê primevere dal timp e de eternitât che si clame Pasche.
pre Antoni Beline
Cirint lis Olmis di Diu, I

1 commento:

ninine ha detto...

Bielissim chest pas di pre Toni, mi a fat rifleti sul ver significat da lis robis, e mi a fat pierdi par un moment in tun sium fat di colors e di rosis...