Par te, cun te, par jessi plui dongje

O torni sul argoment "provincie sì o provincie no" parcè che plui di cualchidun al sta zuiant sul cjâf dai citadins. Cui che al aferme che scancelant lis provinciis si risolvin ducj i mâi de aministrazion publiche al fâs dome demagogjie di bas nivel. In Sicilie, il president Crocetta al à ubidît a cheste mode "tipicamente italiana" e al à tiradis vie lis provinciis. Ma nissun nol dîs che la alternative proponude a son i consorzis di comuns che in realtât a son altris "provinciis" cun cda e framentazion dal teritori. Secont me i sindics a àn za masse ce fâ a viodi di fâ ben pal lôr comun e al è just che e sedi la int a dâ la responsabilitât di guvier al president de Provincie, elezintlu e domandant a lui di rispuindi des sôs azions.
Alore no si pues menâ il mus pe glace. La Provincie, o ent di mieç, e je une istituzion ricognossude tai ordinaments internazionâi, dulà che tra il comun che al viôt de aministrazion dal paîs e la regjon che si ocupe di legjiferâ a alt nivel, e je la Provincie che e à une funzion aministrative di aree vaste (in Ingletiere e tai Stâts Unîts lis clamin "conteis", in Francie lis clamin "dipartiments", in Gjermanie lis clamin "circondaris"). No si pues pensâ che i nestris sindics a vadin a Triest par ogni piçule robe: la Provincie e covente par jessi plui dongje e al servizi dal citadin, dai nestris paîs. A la Provincie i van trasferidis plui funzions e risorsis, slizerint la Regjon che e varà di fâ leçs e tignî rapuarts interistituzionâi ancje cui stâts dongje. Si varès duncje di scomençâ a pensâ a "mancul regjon e plui provincie", plui dongje ai citadins e duncje plui controlabile. E se o sarai elet in consei provinciâl o sarai a disposizion dai sindics e des aministrazions comunâls par fâ di puartevôs a lis necessitâts dai nestris comuns, fin di subit, in spiete che la riforme dai ents locâi e vadi indevant su la strade che o ai spiegât chi parsore.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).